Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

DC, SP CCpur mapuina' Rs 3 Cr & 25 lakhs man ding Kani lei susia

Lamka, Feb. 1 *(Nisin Thuhiltu)* : Churachandpur DC, Symlal Poonia, IAS, SP/Churachandpur Rakesh Balwal, IPS, Add SP (LO), SDPO, SDC te mapuin’n tuni, 1st Feb. 2018 ah police personnel 60 ten Saikot sub-division,Tunzaphai leh Benazou village kikal ah kani (poppy) lei 55 acres (15,15,15,10) 55 ah lian mun 4 in a susiau a, combine team khat Add SP (Ops)/Churachandpur, SDPO Churachandpur, Singhat police leh 2 Assam Rifles te mapuina’n security personnel 70 ten Lungthul (T), Singngat Sub-division in 10 acres ah lian kani lei a susia bawk ui. Zia suksiat ah um kani chu Rs 3 crores 25 lakhs man hizo ding ah hisap a hi. Zingkal lam dak 9:00 a pat nitak lam dak 4:00 tiang ah kani lei suksiatna nasep chu a chiapi uh a hi.

Study tour ding te thâkdawna nei

Lamka, Feb. 1 *(Nisin Thuhiltu)* : 25 Assam Rifle, Tuibong ah Multi Purpose Hall in tuzingkal dak 8:30 ah National Integration Tour (Operation Sadbhavana) 2017-2018 nuai ah Delhi leh Agra ah study tour ah chia ding, Lanva Government High School student-te thakdawna hun a mang ui. Zia hun achun, Brigadier Ajay Kumar, Lanva Government High School ah Headmistress leh teaching staff-te ban ah Colonel Mithun, Commanding Officer leh Rank officer-te a pang ui. Brigadier Ajay Kumar in Delhi leh Agra ah tour nei hun sung a thiamzilna tawh kisai ah thilthak hiatbena ding bep ah manglo ah, district sung ah thil thupi taktak a piandawtheina ding lungthim ah tupna nei kawm ah lawting tak ah tour chia ding in dawisakthu a gen hi. Student-te thasang in James Langzakap in Assam Riffle-te chung ah kipakthu gen in, kipakna thilpiak piakna a nei hi. National Integration Tour ahileh ni 15 sung hiding ahia, Delhi leh Agra ah mun pawimaw chuamchuam vafang ding ahiu a, Indian President le kimupi gua uh hi’n a kigen hi. National Integration Tour a ding in Lanva Government High School apat class VII leh Class XI student-te lak ah pawsal 16 têldaw ahiu a, school teacher 2 leh Assam Rifle apat Major Besri Lal, JCO Subidar Katoch leh Jawan 2 in kithuapi ding ahiu. CCpur apat Guwahati chan Bus ah chia ding ahiu a, train ah Delhi zuan ding ahiu.

Exgratia piakdawna nei

Lamka, Feb. 1 *(Nisin Thuhiltu)* : Pherzawl District huapsung ah um, Damdiei khua ah Kek in a se’lup mi pani insungmite kiang ah Manipur Government in tuni, February 1, 2018 in zangna-dawpna (exgratia) ah Rs. Lakh 4 chiat piakna a nei hi. A kihiatdan in, a chiata May 13, 2017 ni ah (L) Lalhlimum Hrangate@Uma (42) s/o Hluta leh (L) Hrangkapvel@Kapvel (32) s/o Upa Laltharlien nasem ding ah Uma-te thînglei ah kuan a hiu a, gawzuk ziak ah lobûk ah kichawl laitak ah vangsiatna tuak uh hi’n a kigen hi. Damdiei khua ahileh District Headquarter, Pherzawl apat kilometer 10 vel ah gamla ahia, Block leh Sub-Division ah Tipaimukh huapsung ah um in, hilele MLA Assembly Constituency ah Thanlon Assembly Constituency huapsung ah um ahiziak in, vangsiatna a tuak hun ua buaipi haksa tak kal ah, Exgratia muna ding ah panla, V. Hangkhanlian, Minister (Agriculture, Veterinary & Animal Husbandry), Government of Manipur; LT Hmar, Social Worker leh Working Chairman, HPC (D) ban ah Damdiei Village Authority apat Vanlalruot-te chung ah vangsiatna tuak inkuante’n news mangcha in kipakthu a gen ui.

Teacher Trainees Certificate Awarding Ceremony nei

Lamka, Feb. 1 *(Nisin Thuhiltu)* : Excelsior Spoken English saina in tuni, February 1, 2018 sunnung dak 2:00 in District Training Centre (DTC) Hall, Tuibong ah Teacher Trainees Certificate Awarding Ceremony matna a nei ui. Zia hun achun, Ajay Arora, AC to DC, Churachandpur in Chief Guest hina tawh uap in, Glory Kim Singsit, Junior MCS, in Guest of Honor leh CH Bobichand Singh, District Program Officer, SSA/RTE, ZEO Churachandpur in Functional President hina tawh a uap ui. Chuleh, Tuanzakhup, President, SSPP Joint Headquarter, Lamka in Special Invitee hina tawh a uap hi. Tuni’ Certificate piakdaw ah umte ahiu leh, December 2017 apat Excelsior Spoken English in ziltîltu ding ah lam chuamchuam ah zilsakna a piak uh ahia, zani January 31, 2018 ah Course a zaw dungzui un trainee 19-te kiang ah Certificate piakdaw ah um hi’n a kigen hi.

GYMAM Annual Conference 2018 mang

Lamka, Feb. 1 *(Nisin Thuhiltu)* : Kawnpui Field ah Group Young Mizo Association, Manipur(GYMAM) in January 31 apat February 3 sung ahum ding “Ram leh Hnam Humhalh” ti thupi nei in 33-veina GYMAM Annual Conference 2018 a mat chu a chiatha zing hi. January 31 in Central Young Mizo Association(CYMA) palaite’n Conference hawnna nei in kimelhiattuana a siam ua, YMA thupi sâmna, thugenna, member thitate sûnna ban ah hotute chawihawina tawh hun a mang ui. Conference nipi ni January 1, in Lungmuana, IAS, Principal Secretary, Government of Manipur in Chief Guest hina tawh uap in, JC Ramthanga, IAS, Principal Secretary, Government of Manipur leh R Lalngheta, Vice President, CYMA in Guest of honour leh Chief Host hina tawh a uap ua, Lalthara, IAS Retired, Thianghlima Pachuar IPS, ADGP, HR & RTI, Manipur, Thari Sitkil IRS Assistant Commissioner Taxation, Laltanpuii Vanchhawng, MCS, joint Secretary, Peter Lianzela BDO, Samulamlan leh Lalawi Gangte, AGM, IDI, Imphal te’n Special invitees hina tawh a uap ui. Nitaklam hun in, H Lalhmangaihzuala, Secretary, GYMA Manipur in activities report piakna a nei a, Central YMA palaite’n kumpuan puandawna leh hilchianna a nei ua, chial ah umte apat thugenna le a um hi. Conference kichaini, zing February 2 sunma dak 11 apat sunnung dak 2 kikal in vaihawmna nei ding ahiu a, zia zaw chuleh 2018-2020 sung ah GYMA, Manipur ah hotu ding telna um intin, chuleh nitak lam ah Rev Lallarmaia in hotu thakte Pathian kiang ah latna leh pauchapna nei ding ahi. Mizoram apat Conference mang ding in Central YMA ah hotu bangzat hem leh lasak thiam Lalruatfeli leh Rachel Lalnunkimi a hung ui. Aizawl apat in Zonunsang Handloom in conference neina mun ah stall hawng in, nampuan chi chuamchuam ah kicheina van tamtak a zuak hi.

District Hospital ah Nursing Superintendent thak ding Sangthuam
Lamka, Feb. 1 *(Nisin Thuhiltu)* : District Hospital, Churachandpur ah Nursing Superintendent Ms Chinzaniang a pension tak tawh kitawn ah ama thasang ding ah guat a um Staff Nurse lak a senior pen, Sangthuam in tuni, February 1, 2018 in mawpuakna la’n, Nursing Superintendent Room ama a ding ah Pastor D. Kamchinmang, Local Pastor, EBCC Hiangtam Lamka in pauchap piakna a nei hi. Zia hun chu Dr. T. Nengkhanmang, Deputy Medical Superintendent, District Hospital, Churachandpur leh Hospital a sem staff te leh Sangthuam ngaina tu ten a uap ui. Sangthuam ahileh 1987 ah ANM ah a la sem pan a hia, Parbung, Sinzawl ah a sep nung ah kum 1990 ah District Hospital, Churachandpur ah posting, TB Clinic, Maternity Ward, Sample Collection, nursing supervisor ti te ah a la sem a hi. Ama ahileh kum 3 vel service hun nein alai in a kigen hi.

SIUM ah sem Dr. Shubhabrata Aich suunna nei
Lamka, Feb. 1 *(Nisin Thuhiltu)* : Sangai International University, Manipur (SIUM), Churachandpur ah sêm, Dr. Shubhabrata Aich, Deputy Finance Officer, SIUM in za’ni 31 January ah thina a tuak ziak in, tuni February 1, 2018 sunma dak 11:30 in SIUM ah staff, faculty leh studentte’n ama sûnna hun a mang ui. Zia hun a chun Dr. Shubhabrata Aich insungmite leh University a ding ah pauchappiakna Hmangaisang Varte in a nei a, Professor Lal Dena, Vice Chancellor, SIUM in sûnna thu a gen hi. Dr. Shubhabrata Aich ahileh Kolkata ah Multiple Organ Failure ziak ah thi ahia, October 2017 ah Lamka nusia ah Kolkata ah suty mang ding ah chia, damlona tuak hi’n a kigen hi.

CM in Chief Minister’s Office leh Manipur Police Citizen Portal hawng

Imphal, Feb. 1 *(Nisin Thuhiltu)* : Manipur Chief Minister N. Biren Singh in tuni’n ama office ah Chief Minister’s Office leh Manipur Police Citizen Portal hawnna a nei hi. Hawn ah um websites 2 te chu-www.cmmanipur.gov.in leh https://mnpcitizenportal.gov.in/ a hi. Chief Minister in websites hawnna a nei hun ah a thugenna a chun, tu ah government thiltup chu region ah mipi te hindan leh khawsakdan bailamzaw a um theina ding a hidan taklang in, website kihawng thak te chu state pawlam ah um te tiang panlak theina ding hin a gen hi. Zia a pat a chu mipi ten Chief Minister’s Office ah thil tung leh thil thak um te hezing theii ding uh hin le a gen a, website “Manipur Connect” hiding, state pawlam ah um students ten education, racism, harassment leh corruption ti te chung ah ngaidan leh dawidan genzing thei ding uh hin a gen hi. Chief Minister’s Office website ah registered students ten thina leh liamna huaisia tak tuakkhakna chung ah financial assistance Rs. 2 lakhs leh Rs. 50,000 muthei ding, “Grievance Cell” le hingal ding hin a gen hi. Chief Minister in Manipur Police Citizen Portal tawh kisai a genna a chun, state mipi leh police te kal ah communication gap a umlona ding, website ah complaint piaklut thei ding hin a gen a, Manipur Police Citizen Portal chu Police people friendly hitheina ding hin a gen hi. Portal hawnna hun chu, MLA - K. Robindro Singh, L. Susindro, L. Rameshwor, H. Dingo, Th. Satyabrata Singh, Chief Secretary R.R Rashmi, DGP L.M. Khaute ten le a uap ui.

Rs. 3,42,825 man ding khamthei mandawk

Imphal, Feb. 1 *(Nisin Thuhiltu)* : Combined team - Narcotic Cell, Imphal East, NAB-PS Manipur, CDO-IE leh women police in Imphal East, Kairang Khomidok Area ah patrolling duty hun in Mayari (55) w/o Md. Rocky of Kairang Khomidok Mamang Leikai, Imphal East district chu khamthei - World is Yours (WY) tablets 1,117, 1 Spasmo Proxivon Capsules 163, Nitrosun-10 tablet strips 50 (strip khat ah chang 10 chiat) tawh a mandawk ua, matdawah um khamthei te chu a sum ah Rs. 3,42,825 man hiding in a kigen hi. Chun, Heigrumakhong Khongnung area ah Md. Azimuddin @ Inao, 24 s/o Md. Manab of Kairang Mayai Leikai leh heroine No.4 powder 1 (one) gram tawh a man ui. Mat ah um te leh khamthei te chu Heingang police khut in a pedawk ui.

Parliament ah Union Budget 2018-19 luidaw ah um
“Lobawlmite’n nasatak ah a phatchuam theina ding ah ua lobawlna lam sukhat hiding” :Finance Minister Arun Jaitley

New Delhi, Feb. 1 *(Nisin Thuhiltu)* : Union Finance Minister Arun Jaitley in tuni’n India Vaihawmna Innpi (Parliament) ah Union Budget 2018-19 ding chu luidawna a nei hi. Zia Budget kiluidawk chu General Election 2019 um masang ah NDA Government bana Union Finance Minister Arun Jaitley a ding ah a nga veina leh a tawp pen a suak hi. Chun, tepte thei um chu a hileh kum dang gual lo tak in tuchung Union Budget hin Railway Budget le a luidawk khawm a hi. A langkhat lam ah, India Prime Minister Narendra Modi in Finance Minister Arun Jaitley luidaw Union Budget 2018-19 chu India gamsung ah khantona nasa tak tun ding a hidan a gen a, sumkawl veina a bailam sak ding bep hilo ah hindan leh khawsak dan le nasa tak ah awlsam zaw mama ding inle a gen hi. Zia bep chu le hilo ah nam niam leh lobawlmite’n zia budget thak chu phatchuampi ngei ding uh a hidan le PM Modi chun a gen hi. Finance Minister Jaitley in Budget luidawna a nei hun a thugenna chun, tukum Budget thak kisiam chun lobawlmite nasa tak ah panpi ding leh suhat ding a hidan a gen ban in, income tax tawh kisai ah bangma kitheng danglam um lo a hiziak in, govt. semtute leh thalaw nei te a ding ah thu kipak um mama khat hiding in le a gen hi.
Union Budget 2018-2019 dungzui ah agriculture, rural development, health, education, employment, MSME leh infrastructure sectors sukhat ding ah taklat in a um a, structural reforms a pat khantona nasatak um thei ding ah suklat a hi. Institutional Farm Credit, 8.5 lakh crore (2014-15) chu 11 lakh crore ah sukpun in a um a, 22,000 rural haats te chu Gramin Agricultural Markets ah upgrade bawl ding, zia ding a chu Rs 2,000 crore fund bithiat a hinung ah interests of 86% small & marginal farmers hiding a hi.
Fisheries leh Animal Husbandary sector a ding ah Rs 10,000 crore puan in a um a, Re-structured National Bamboo Mission a ding ah Rs.1290 crore bithiat a hi. Women Self Help Groups te loan ding kum lui 2017 ah 42,500 crore bithiat ah um chu 2018-2019 ah Rs.75,000 crores hiding ah suktam a hi. Ujjwala, Saubhagya leh Swachh Mission nuai ah numei 8 crore te free LPG connections piak hiding, innkuan 4 crore te free electricity connection piak ding leh toilet 2 crore sakbe hiding a hi.
Health, education leh social protection a ding ah 1.38 lakh crore bithiat in a um a,Tribal students te ding ah kum 2022 tiang ah tribal block zosia ah Ekalavya Residential School kawi hiding, World’s largest Health Protection Scheme hiding ah innkuan 10 crore te panpina piak hiding, zia chu secondary leh tertiary treatment a ding ah innkuan khat in Rs 5 lakh tiang a muthei ding a hi. Kum 2018-2019 a ding ah Fiscal Deficit ahileh 3.5 %, projected 3.3 % ah kawi in a um a, infrastructure lamthil siamhawina ding ah Rs. 5.97 lakh crore bithiat in a um hi. Iconic tourist destination ding ah mun 10 siamhawi hiding, NITI Aayog in Artificial Intelligence(AI) kiti national programme a chiapi ding, zia nuai a chu robotics, AI, Internet etc siamdaw hiding a hi. Disinvestment crossed target ahileh Rs 72,500 crore to Rs 1,00,000 crore ah kawi in a um a hi.
Finance Minister Arun Jaitley in Income-tax rates ahiloleh corporate tax ahileh bangma san umlo, a lui gual ah chiapi hinalai ding in a gen a, zia chu salaried employees, pensioners, senior citizens, micro, small leh medium industries te ding ah zangkhai chuam mama in a gen hi. Transport allowance leh medical expenses reimbursement thasik ah salaried employees, standard deduction Rs 40,000 kawi in a um a, zia gual lemsakna chu pensioner ten phatchuampi ding, exchequer cost Rs 8,000 hiding leh mi 2.5 crore ten phatchuampi ding uh hin Mr Jaitely in a gen hi. Senior citizens te ding ah interest of income exemption Rs 10,000 hisek chu 50,000 ah sukkal in a um a, zia chun senior citizens te dawn zangkhai chuam mama ding hin a taklang hi.
Union Budget chun tukum sung ah Railway lam ah khantona leh masawn zawkna a um theina ding ah a sum seng ding uh Rs 1,48,528 crore a bithiat piak hi. Chunleh, Special Railway University chu Vadodara, Gujarat mun ah siamdaw hiding inle a taklang a, railway station tamzaw ah escalator kawi vek ding leh rail zosia CCTV leh WiFi kawi vek hiding inle a taklang hi.
Union Budget 2018-19 dungzui ah Defence Budget financial year 2017-2018 ah Rs 2.74 lakh crore chu 11.3 per cent ah kal in, Rs 3.05 lakh crore bithiat in a um hi. India in galvan kisiam theina ding ah Govt in new industry-friendly defence production policy 2018 siam dawk ding ah lampi siam ah um ding hi’n le a taklang hi.
Technology lam kai a ding ah Digital India Scheme a ding ah Rs 3,073 crore guan ah um in, India gamsung ah tukum sung ngei ah WiFi Hotspots 5 lakh kawi ah um ding in le a kigen hi.
Chun, Aviation lam kai a ding ah govt in state chuam chuam ah airport tamzaw te capacity hi suklet hiding ah guanggalna um a hidan a taklang a, lenna man tawm cha chuan a hitheina ding ah UDAN scheme nuai ah airport 64 te kikawmtuana hawi tak siam hiding tite le a pang hi.

User Rating: 0 / 5

Star InactiveStar InactiveStar InactiveStar InactiveStar Inactive

NERCORMP CCpur nuai ah NEC Piggery Project (Fattening Unit) hawng

Lamka, Jan. 31 *(Nisin Thuhiltu)* : NERCORMP Churachandpur in tuni, January 31, 2017 zingkal dak 10 in K. Mollum khua Tuibong Block nuai ah NarmG te inkuan 10 te ding ah NEC Piggery Project ( Fattening Unit) kisa zo thak hawnna leh latna a nei hi. NERCORMP chu livelihood project, Ministry of DoNER, Govt of India nuai ah NEC Flagship project a hia, kum 1999 ah a la kipan hita a hi.

NEC Piggery Project ( Fattening Unit) kisa zo thak hawndawna hun chu, Shyamlal Lal Poonia IAS, Deputy Commissioner & Chairman NERCORMP Churachandpur in Chief Guest hina tawh uap in NEC Piggery Project (Fattening Unit) hawndawna a nei a, James Doujapao Haokip MCS, SDO Tuibong leh D. Khuala Vaiphei, Project Manager NERCORMP Churachandpur ten Functional President leh Chief Host hina tawh a uap ui.Chief Guest, Shyamlal Lal Poonia IAS in a thugenna a chun, ki hinsua theina ding ah gunchu tak ah beneficiary ten vawk vak ding in chialna a bawl a, Project Manager leh a team te nasepna chu kipakpi mama in a gen hi.

Functional President hina tawh hun matna uap, James Doujapao Haokip MCS in a thugenna a chun, NERCORMP ten mipi participate na project monitoring hawi tak ah a bawl ziak ua, a panlaknau lawting mama leh ettawn tâk a hidan a gen hi.

Chief Host, D. Khuala Vaiphei in a thugenna a chun, piggery project chu NERCORMP regular fund hilo, additional ah NEC ten Piggery fattening leh Rearing project dan ah unit 275 inkuan 275 a ding ah 3.52 crores a piak ding lak ah 1st phase ah inkuan 80 te kianga khua 7 ah implement kibawl a hidan a taklang hi. NEC Piggery Project ( Fattening Unit) hawndawna neizaw in, Guest ten Kholmun khua ah zia project nuai ma a chun, inkuan 10 te ding ah Unit ki siamthak hawnna nei in hall function a mang zawm ui.

Zillai CCpur Block in Eastern India Science Fair ah pang te vaidawnna nei

Lamka, Jan. 31 *(Nisin Thuhiltu)* : Birla Industrial & Technological Museum (BITM), Kolkata ah January 9-13, 2018 sung ah Eastern India Science Fair, 2018 hun ah Manipur a pat student kuan te lak ah CCpur District a pat mi 3 - Chawnglemmawi Khaute d/o Kamlalmuan Khaute of Red Cross Road, Florence Nengneivah Baite d/o Th.Kennedy Baite of B.Phaicham leh Florence Lalremsiem d/o Lalringnghet of Hmar Veng, CCpur te chu Zillai Churachandpur Block (Vaiphei Students’ Association) in tuni, 31st January 2018 nitaklam dak 3:00 in CCpur Govt. College ah vaidawnna leh kipakpina a nei hi.

Zia hun chu H. Johnny Sharma, SDPO/CCpur, T. Lalkhohao @TL Haopu Haokip, President KSO/CCpur Block, Pauchungnung Vaiphei, Associate Professor & Nodal Officer, CCpur Community College, Kaithianjoy Vaiphei, Presdent Zillai CCpur District leh T. John Thanglal, President, KSO Henglep Block ten khuallian hina tawh uap in, Eastern India Science Fair 2018 ah pang leh winner prize dawng, student 3 te Memento, Vaiphei Khiangkawi (muffler) leh Bookie piakna a nei ua, Pastor SL Minlun Neihsial, Central Church Local Pastor, EOC in pauchappiakna a nei hi.

Eastern India Science Fair 2018 ah pang student 3 ten report a piakknau a chun, Eastern India Science Fair 2018 ah pantheina ding ah District leh State Level competion ah pang masa a hidan uh a gen ua, Eastern India Science Fair, 2018 um hun ah Eastern Zone a pat States 12 ah participants 394 chiakhawm, category chuamchuam ah kidemna nei a hidan uh a gen hi.

Chawnglemmawi Khaute d/o Kamlalmuan Khaute ahileh Special Prize (Mask Making Camp) leh Quiz Competition Winner prize sâng a, National Level ah pangthei ding ah teldaw in a um hi. Zia Quiz Competition a chu, state 12 a pat telchuam ah um student 40 pang a hiu. Chawnglemmawi Khaute ahileh tu leh tu Donbosco Hr. Sec. School ah Class -XII (Science Stream) simlai a hi. Florence Nengneivah Baite ahileh Eastern India Science Fair 2018, Science Exhibition ah 'Special Prize' sâng a hia, Science Exhibition ah pang ding Manipur a pat student 3 teldaw ah um te lak ah khat a hi. Science Exhibition a ding a chu state 12 ah student 15 teldaw a hi. Florence Nengneivah Baite ahileh National level ah pangthei ding ah teldaw in le a um a, tu leh tu St. Mary Hr. Sec. School ah (Class-X) sim lai a hi.

Florence Lalremsiem ahileh Eastern India Science Fair, 2018 ah pang, prize lak neilo himaleh 'Innovations for Sustainable Development' ti thupi nei ah Dec. 16-18, 2017 sung ah ZEO Office ah XXXVIII (38) Dsitrict Level Science, Mathematics and Environmental Exhibition um hun ah Science Exhibition ah First Prize la leh Imphal ah 'State Level Science Exhibition for Children' ah le First Prize la, Kolkata ah Eastern India Science Fair, 2018 ah State min ah kuan te lak ah khat a hi. Ama ahileh St. Mary, Hr. Sec. School ah Class-X simlai a hi.

Eastern India Science Fair 2018 ahileh Birla Industrial & Technological Museum (BITM), Kolkata in (National Council of Science Museum, Ministry of Culture, Govt. of India), Education Departments/State Council of Education Research & Training of Govt. of Arunachal Pradesh, Assam, Andaman & Nicobar Islands, Bihar, Jharkhand, Meghalaya, Manipur, Mizoram, Nagaland, Odisha, Sikkim, Tripura, NCERT leh Department of Youth Services, Govt of West Bengal tawh kithua ah organize a bawl a hi.

DC/CCpur mapuina’ khamthei dodalna tawh kisai genkhawm

Lamka, Jan. 31 *(Nisin Thuhiltu)* : National Health Mission (NHM),Churachandpur nuai ah Chairman, District Level Core Committee (DLCC), National Tobacco Control Program (NTCP) dawina gual in, January 31, 2018 sunma dak 11:30 in DC Office ah a ni-veina ding in Executive Meeting a nei ui. Meeting hun chu Shyam Lal Poonia, IAS, DC leh Chairman, DLCC, NTCP in a mapui ua, District sung a NTCP nasep tawh kisai genkhawmna nei in, Executive Meeting masa ah sepdaw ding ah genkhawm ah umte etkitna leh, district sung ah school chuamchuam a Tobacco Control Program tawh kisai awareness nei ding dan leh Tobacco Control Law nuai a COTPA 2003 Act matthei ding a diam ti genkhawmna a nei ui. Chuleh, District sung a tobacco tawh kisai Enforcement Squad bawldaw ding chungchang leh thu pawimaw chuamchuam genkhawmna le a nei ua, Churchandpur District sung ah kani (poppy) lei sukbeina ding tawh kisai le a genkhawm ui.

Blessing-cum-Valedictory Day mang

Lamka, Jan. 31 *(Nisin Thuhiltu)* : EL Scism High School, Salem Veng ah tukum pawl-X, Board of Secondary Eduction, Manipur(BOSEM) nuai ah exam ding student-te study camp December 10, 2017 a pat kipan, a kichai dungzui in tuni sunma dak 11 in Jubilee Hall ah Blessing-cum-Valedictory Day hun a mang ui. Zia hun achun, exam ding student nu-le-pa, teaching staff, school tawh kisai a mawpuakna nei leh puitute a pang ua, S Thangkhuma, Headmaster in exam ding student-te kiang ah thilpiak piakna nei in tîlkhona thu a gen hi. Rev Paosei, District Secretary, UPC NEI, Ccpur District in student-te luchang ah sathau nu in, Pathian kiang ah malzawlna dawtpiakna a nei hi. Rev Haungam, District Treasurer, UPC NEI in tîlkhona thu gen in, teachers, student leh parents-te’n le thugenna a nei ui. Tukum BOSEM nuai ah pawl-X, exam ding student 36 lak ah pawsal 20 leh numei 16 a um ui.

SSA-RTE, SMDC tawh kisai ah awareness Campaign bawl
Lamka, Jan. 31 *(Nisin Thuhiltu)* : Zonal Education Officer (ZEO), Churachandpur in State Project Director, SSA, Manipur apat thupiak amu dungzui in tuni, January 31, 2018 sunnung dak 12:30 ah ZEO Office Campus in Nokphade Cultural Foundation (Drama Group) te’n Sarva Shiksha Abhiyan-Right to Education (SSA-RTE) leh School Management and Development Committee (SMDC) tawh kisai drama mangcha in awareness Campaign a bawl ui. N. Chingkhei Singh, ZEO Churachandpur in thugenna nei in Awareness Campaign hawnna a nei a, Nokphade Cultural Foundation apat Script ziaktu leh Director, Ruhini Kumar in thumapui genna a neizaw in drama a pan ui. Musician Bubon in Music bawl in, Rangilan, Kuber, Gobindash, Naobi, Suresh, Ranjan leh Pari te’n laa sakawm in mitin in thiamzilna a neitheina ding ua government panlaknate leh School Management Committee(SMC) tawh kisai ah hiat ding pawimaw leh phachuam-te thawna a nei ui. Zia hun achun, SMDC member tamtak leh, ZEO Staff cheng, ZEO nuai a Government school leh aided school a Headmaster/headmistress leh teacher-te le a pang ui.

Dorcas Road lampi bawlna nasep kipan

Lamka, Jan. 31 *(Nisin Thuhiltu)* : Bungmual khua leh New Lamka a ding ah kikawmtuana lampi lianpen leh pawimawpen Dorcas Road lampi bawlna nasep, za’ni January 30 in a kipan hi. Manipur State Fund ah Inter Village Road nuai ah lampi bawlna ding fund a hung a, release hinailo maleh, Special Contractor H Thangzamuan in ngaikhawkna ziak ah chûk tui luanma ngei ah bawlzaw ding dawi in nasep pat ah um hi’n a kigen hi. Lampi ahileh Tedim Road leh Tipaimukh road kikawm tuana Dorcas Road cheng bawl hiding ahia, Bungmual boundary apat Tipaimukh road kikal lampi a siat nasat ziak in suanghûm 40mm sung in, a chung ah lei san kisung kit ding ahi. Zia nasep chu a hawi chan ngak hun sung in Bungmual boundary apat Tedim Road chan blacktopping nasep Febrary 3 ah pat hiding hi’n a kigen hi. Black topping patma ngei ah tuilawng phuum ut dingte’n ala phuum kin ding in Contractor in chialna leh hiatsakna a bawl hi.

1st DPMFT khakna nei
Pengjang, Jan. 31 *(Nisin Thuhiltu)* : A chiata January 19, 2018 ni a la kipan, 1st (L) Dyna Pauminthang Memorial Football Tournament – 2018 chu tuni’n khak a hitai. Young Pengjang Association in a sai zia tournament khakna hun chu Khatkhotong Baite, President, VPC GHQ in Chief Guest hina tawh a uap a; Genlal, Special Contractor in Functional President leh Seipu, Social Worker in Guest of Honour hina tawh a uap hi. Tournament donors te a pat (L) Dyna Pauminthang chanchin genlatna a um zaw ah Guest te a pat dawisakna leh tîlkhona thucha genna um in, tournament final match a kipan hi. Kaprang YC leh Sanakhang FC te’n final pek in regulation time ah goal a kikhumtua zawlo ziak un penalty pek sak ah um in, Kaprang YC in 7-6 ah gualzawna chang in champion hina a chang ua, Sanakhang in runners-up hina a chang hi.

KWU in Free Medical Camp bawl

Lamka, Jan. 31 *(Nisin Thuhiltu)* : Kuki Women Union (KWU), Churachandpur in tuni, January 31, 2018 zingkal dak 10:30 in Sangga Muon Inn, Bijang ah Free Medical Camp a bawl ui. Dr. Kimjonlhing @Dr. Jolly in naupangte medical check bawl in, nurse pani in a kithuapi ui. Sangga Muon Inn ah nu-le-pa enkawltu ding neilo naupang 40, Ningnu Touthang etkawlna nuai ah um ahiu a, mimal leh pawl chuamchuam in panpina a piakkhawm zal ua kitodel in, Bethany Christian High School ah naupangte a kaisak ui. Tukum ah mi 8 in Class X leh mi khat in Class XII exam ding uh ahidan hiat ahi.

March 2018 masang ngei ah khamthei tawh kisai case buaipi ding Fast Track Court hawn hiding:CM

Imphal, Jan. 31 *(Nisin Thuhiltu)* : Manipur State Legal Services Authority (MASLA) in Government of Manipur tawh kithua in tuni’n Manipur Trade and Expo Centre, Lamboikhongnangkhong, Imphal West District ah Legal Services Camp a bawl hi. Khuallian hina tawh hun matna uap, Manipur Chief Minister N. Biren Singh in a thugenna a chun, state sung ah khamthei tawh kisai ah case um te buaipi ding Fast Track Court khat March 2018 masang ngei ah hawn hiding in a gen a, state a ding ah khamthei bawl leh khamthei ah sumkawl veina uang thak mama ah um chu dodal ding pawimaw in a gen hi. Fast Track Court siamdawna ding a chu, Law and Legislative Affairs Minister, Chief Justice of High Court of Manipur leh Advocate General of State te tawh a um ding dan genkhawm ding a hidan taklang in, government a ding ah khuam pawimaw mama pathum - Judiciary, Executive leh Legislature ten buaina sukven a hitheina ding ah panlakna a neikhawm pawimaw in a gen hi. Government welfare schemes chuamchuam um te mipi 50% ten hethiam nailo a hidan uh le taklang in, Judicial body in le awareness lam thil ah panlakna a nei ding a nawp thu a gen hi. Government schemes chuamchuam um te phatchuampi theina ding ah ningtin leh hill district te ah awareness pawimaw a hidan gen in, panlakkhawmna pawimaw mama in a gen hi.
Hun matna uap, Law and Legislative Affairs Minister L. Jayantakumar Singh in a thugenna a chun, citizen zosia’n dan leh mual a hiatthiam chiat ding uh leh a thuneinau a hiat uh pawimaw a hidan gen in, zia ding a chu National Legal Services Authority (NALSA) in India gamsung mun chuamchuam ah Legal Camps organised a bawl sek hin a gen hi. Legal Services Camp chu Chief Minister, Law and Legislative Affairs Minister L. Jayantakumar Singh banah, Acting Chief Justice of High Court of Manipur, Justice N. Kotiswar Singh and Judge of High Court of Manipur, Justice Kh. Nobin Singh ten le a uap ua, Government Departments chuamchuam in stall 18 a hawng ui. Legal Services Camp kibawlna ziak chu mipi ten National Legal Services Authority (NALSA) guideline um te a hiathiam theina ding uh leh legal lamthil ah buaina um te sukven ding dawina ziak a hi.

DC Tengnoupal mapuina’ Kani lei 36 acres susia

Imphal, Jan. 31 *(Nisin Thuhiltu)* : Tengnoupal Deputy Commissioner panna, combined team - Tengnoupal police, E-Coy, 18 Assam Rifles, 8 Manipur Rifles leh Narcotics and Borders Affairs ten tuni’n Machi Hills leh Simang village ah kani (poppy) lei 36 acres a susiau a, suksiat ah kani chu Rs 2 crore leh 16 lakh man hiding ah hisap a hi. Zingkal dak 9.30 a pat nitaklam dak 3:00 tiang ah kani (poppy) lei suksiatna nasep chu chiapi ah um hin a kigen a, kani (poppy) lei suksiatna a chun, Tengnoupal DC Kh. Raghumani Singh, SP Tengnoupal S.Ibomcha Singh, AC Th. Krishnatombi Singh of CDO Moreh, SDPO Moreh Lawrence K. Munlua, SDCs Tengnoupal A. Charankumar, N. Kamei, E-Coy, 18 AR led by Major Sekhar, OC Tengnoupal Inspector John Lamkang, OC Machi Inspector Dominique, in-charge CDO Moreh P.Tarunkumar Singh, SI Lamsanglien Thangzom mapui NAB team, Jem Binoy mapui 8 MR team te a pang ui.

MSPDCL & MSPCL Manager 36 ten indefinite cease work strike bawl

Imphal, Jan. 31 *(Nisin Thuhiltu)* : Manipur State Power Distribution Company Limited (MSPDCL) leh Manipur State Power Company Limited (MSPCL) nuai ah 2014 leh 2016 recruitment ah Managers, Deputy Manager leh Assistant Manager ah sena join ten Sepkitni a pat a khan, One-Time Relaxation Policy dawilo ziak in indefinite cease work strike a pan ua, a vek ah a kigawm ah manager 36 te nasemlo in a um ui.
Kiphinna nei pawl in a taklat nau a chun, amau chu MPSC in kum 2014 a pat directly recruit a bawl a, state sung ah power supply system hawina ding ah theitawp sua panlakna nei zing himaleu dan leh mual umsa chawpkan ah senior staffs te promotion rules One-Time Relaxation Policy ah kiheikawi chu pawmlo a hidan uh a taklang ui.

Kiphinna nei ten PWD office main entrance gate chabi kam

Imphal, Jan. 31 *(Nisin Thuhiltu)* : Public Works Department (PWD) nuai ah semtu ding ah kum 2016 ah recuit kibawl semtu Public Works Department (PWD) office main entrance gate chabi a kam in chutmun kiphinna a nei ui. Kiphinna a neina ziak uh All Manipur Newly Appointed PWD Employees’ Association (AMNAPEA), vice-president Y. Chandrasekhar in a genna a chun, Manipur Government Employees List ah kituptak ah a min uh chuansak a hiding a nawpthu’u taklang in, order zat chuamchuam sua ah government in AMNAPEA member te chuambawl in a gen a, Manipur Government Employees List suktuplo ziak ah haksatna a tuak zing teu sukfel ding phutna nei ah kiphinna tamvei tak a nei uh hita himaleh government panlakna bangma neilo hin a gen a, zia chu tawh kitawn ah kiphinna pan kit a hidan uh a gen hi. Kum 2016 ah Public Works Department (PWD) nuai ah post 342 (Grade III & IV post) ah semtu ding lakna final result ahileh December 31, 2016 ah puan ah um, March 2017 ah sepna join a hiu a, a chung ua “Keep in Abeyance” order sua ah a umna chung ah kiphinna nei a hidan uh le AMNAPEA Vice President Chandrasekhar in a gen hi. A langkhatlam ah kiphinna nei pawl in PWD office main entrance gate chabi kam maleu police ten nawzak in tala khensia’n a hawng kit ui.

Bu-pawl hal haisan ding: Minister V.Hangkhanlian

Imphal, Jan. 31 *(Nisin Thuhiltu)* : Manipur Agriculture Minister V.Hangkhanlian in Hotel Classic Grande, Imphal ah “Brain Storming Workshop on Rice Residue Burning in Manipur-Issue and Strategies for Sustainable Management” hun ah a thugenna a chun, bu khetzaw ah bu-pawl hal haisan ding in lo-bawlmite chialna a bawl a, pawl hal ziak ah state sung ah soil condition hawitak um theilo hin a gen hi. Lobawlmite lo hawina ding ah government in panlakna nei ah lobawlmi (farmer) te kiang ah Soil Health Card (SHC) hawm a hidan taklang in, bu-pawl hal a hi zing leh Soil Health Card issue kibawl in umzia neilo ding hin a gen hi. Agriculture scientists te chu lobawlmi ten a hiatthiam thei ding ua, lobawl dan tawh kisai papers publish bawl ding ah chialna bawl in, CAU, ICAR, NGOs, State Departments te chu Agri-business leh agro-based entrepreneurship development um theina ding ah panla chiat ding in chialna a bawl bawk hi.
Minister V.Hangkhanlian in agriculture chu State's economy kingakna a hidan le gen in, Manipur chu rice production hawi ziak ah 2011-12 leh 2012-13 ah “Krishi Karman Award” piak ah um hin a gen a, population kibelap dan tawh kituak ah crop productivity siamhawi ding chu challenge hizing in a gen hi.
Zia hun matna chu, Additional Chief Secretary- Dr.Suhel Aktar IAS, Vice Chancellor Manipur University- Prof. Adya Prasad Pandey, Director, Directorate of Environment, Government of Manipur Dr.Y. Nabachandra Singh, Director, Department of Agriculture Ph. Rajendra Singh leh General Manager, NABARD, Manipur Region Office, P.N Praveen Kumar ten le a uap ui.

A chapa zi pawngsualtu kaplup ah um
Imphal, Jan. 31 *(Nisin Thuhiltu)* : Thoubal district, Samaram Lamkhai, Charangpat ah cheng, Thokchom Ratan (46) s/o Jugeshore chu zani 31 January 2018 nitaklam dak 2:30 tuam in, Samaram Lamkhai ah ama steel furniture house verandah ah a dinlai tak in, kua a hi hiatlo pawsal 2 in meithal in a kaplum ui. Thokchom Ratan (46) chu September 14, 2012 ah Hotel Apsara, North AOC ah a chapa zi, gun point ah pawngsualtu (rapist) hin a kigen a, a chapa zi’n police ah complaint filed a bawl nung ah mat ah um hin le a kigen hi.
Thokchom Ratan luang chu JNIMS morgue ah kawi in a um hi.

SDPO transfer ziak ah bandh/ general strike bawl gua
Imphal, Jan. 31 *(Nisin Thuhiltu)* : Tengnoupal district ah civil society organizations chuamchuam - Hill Tribal Council Moreh, Kuki Students’ Organisation, Moreh, Kuki Women Union and Human Rights Moreh in Sub Divisional Police Officer, Moreh Lawrence Khen Munlua transfer order sua ah um chu 1st February 2018 tiang ah zukkit (revoke) ahiloleh Imphal -Moreh road ah general strike/ bandh bawl ding un vauna a bawl ui.

‘A semlo te, sepman piak lo ding
Manipur Social Welfare &Cooperation Minister Nemcha Kipgen in 31st January 2018 ah District Social Welfare Office, Bishnupur District vethakna (surprise visit ) a nei hun in, semtu te attendance a hawilo ziak in ama departments in semtu te ding ah “ a semlo te, sepman piaklo ding” system a vaima theipen ah chiapi (implement) bawl ding hin a gen hi. Minister Nemcha Kipgen in, officers-in-charge te chu kituptak ah attendance register mang ding leh a hun tak ah office kai ding, office hours sung ah kituptak ah nasem chiat ding in hiatsakna a bawl a, semtu ten ana sepman ding ua government in thalaw (salary) a piak a hi hezingkawm ah panlakna a nei ding uh pawimaw hin a gen hi. Official te chu mipi te haksatna kituptak ah ngaitha ding leh hepna neitak ah a haksatnau sukven theina ding ah panla chiat ding in chialna a bawl a, a pawimaw dungzui ah department te haksatna sukven theina ding ah ama’n a theina chan ah panlakpi ding hin le a gen hi. Social Welfare Minister in District Social Welfare Office etthakna a nei hun sung a chun, rooms sung zosia chuan in office sung leh pua thiangtho tak ah kawi ding in le semtu te a hiatsak a, a kitupzawk sem theina ding ah District office te vethakna nei zing ding hin a gen hi.

Zia ah “a semlo te, sepman piaklo ding” ti hi Manipur ah lawting tak ah chiapi thei hileh khantona nasa mama ding in ginchat a um a, a sem leh a semlo te kal le ki gamla mama ding, ki hechian mama ding a hi.
A hinlah, semlo ah sepman mangnuam tamtak umna state Manipur ah ziagual chu chiapi hitamai a lawting zo taktak diam?

Payment of Wages Act, 1936- Ministry of Labour & Employment, Govt of India nuai ah le a semlo te, sepman piaklo ding “No work, No Pay” ti a um a, zia dungzui a chu kua hitaleh semtu te a ziak bei leh dan tawh kituaklo ah a nasep ding dawnlo ah um te a sepman piaklo ding ti a hi.

“A semlo te, sepman piaklo ding” ti hi, Bible ah “La kiang ua ka um lai khan le zia thu hi ka hun piau ahi kha: kua’n le na a sep nawp lo chun, nek le ne ki hen, ti hi” (2Thessalonika 3:10) tawh le kituak mama a hina chung in, I gam ua chiapi hileh thilpha mama hiding in ginchat a um hi. Bible ah le a semlo in ngawl hen ti kichian tak ah zui ding ah thupiak um himaleh Christian tamtak in seplo ah muna ding leh hausatna ding mai kibuaipi a hitakna chung ah government in kituptak in “a semlo te, sepman piaklo ding” ti hih chiapi in hung nei leh tusang ah taksa leh thagau lam ah masawnna nasatak um ding in ginchat a um hi.

User Rating: 0 / 5

Star InactiveStar InactiveStar InactiveStar InactiveStar Inactive

VPC leh Zillai Eastern Block, Conference cum sports Meet- 2018 kipan
Salampatong, Jan. 30 *(Nisin Thuhiltu)* : Vaiphei Peoples Council (VPC) Eastern Block leh Zillai Eastern Block (ZEB) in Salampatong Village, Kangpokpi District ah 30th January - 5th February 2018 sung ah "Rejuvenating the Spirit of Oneness" ti thupi nei ah Conference- cum-Sports Meet- 2018 a mat ding chu tuni’n hawn in a um hi. Conference- cum-Sports Meet- 2018 inaugural function chu Yamthong Haokip, MLA Saikul A/C, Haokholal Hangsing, Chairman, ADC Kangpokpi, N. Rajendro @ Boy, Ex-President, ICHAM, Haukhotinlian Vaiphei, Chief of S. Molnuam te'n Chief Guest, Guests of Honour leh Functional President hina tawh a uap ua, Special Guests hina tawh - Prafullo, President ISTV, Kh. Khogen, General Secretary, ISTV leh Editor Naharolgi Thoudang te banah Vaiphei Eastern Block huapsung ah khua-hausa, YVA, Chief Association, Zillai GHQ lawiupa ten a uap ui. Chief Guest, Yamthong Haokip, MLA Saikul A/C in Conference- cum-Sports Meet- 2018 hawnna nei in, Zillai Eastern Block Veteran leh ISTV Staff, Manipuri Film Star Mr Sadananda leh Mr Gokul te pan na'n football exhibition match a nei ua, goal 3-3 a ki khumtua ui.
Functional President, Haukhotinlian Vaiphei, Chief of S. Molnuam in a thugenna a chun, Saikul Assemnly Constituency ah Vaiphei khua tampi a um tawh kitawn ah voter 3000 val um a hidan gen in, Vaiphei te kilungtuak tak leh Nam lawiupa te thugen zui kawm ah panlak chiat ding a nawp thu a gen a, election hun hin banglam thil hitaleh pankhawm dan thiam ding, a phachuam thei ding pen ah nasep thilbawl chiapi ding a nawp thu a gen hi. Chun, election hun ah a pha chuam thei ding ah candidate te support bawl ding, support I bawllo ten ei lau thei ding khawp ua, hangsan tak leh kithutuak tak ah pankhawm ding pawimaw a hidan gen in, Zillai Anthem ah “ka ki khawm ui, achawi hawi din” ti chu a sakthaw mai hilo ah taksua thei chiat ding ah Zillai ten panlakna a nei ding uh a nawp thu a gen hi.
VPC leh Zillai Eastern Block, Conference cum Sports Meet- 2018 hun sung a chu, competition chi chuamchuam - Cultural dance, Choir Competition, Lakawi Laa, Busep, Busuk, Kangkap leh pu leh pa ten a la bawl sek uh item chuamchuam ah gualnawp leh gualsiakna nei ding a hiu a,
Sunday Worship Program hun ah Rev. S. Prim Vaiphei leh Rev. Dr. S. Lalpi ten Pathian thugenna nei ding, 3rd January 2018 leh EVYSA Nite kiti um ding a hi. EVYSA Nite chu, Genhaumang, Paurouchung leh Zillai GHQ Presiedent Dr. Hauminthang Vaiphei ten khuallian hina tawh uap ding a hiu.
Closing Ceremony ahileh 5th February 2018 ah um ding a hia, Zia hun chu Letpao Haokip, Minister, YAS & Water Resources, Thangkam Misao, Vice Chairman, ADC Kangpokpi, O. Lukhoi, MLA, Wangoi A/C, Dr. SL Lunjapau Vaiphei, Ex-president, Zillai GHQ, Yamthong Haokip, MLA, Saikul A/C ten Chief Guest, Guests of Honour, Functional President leh Chief Host hina tawh uap ding a hiu.

Khuga Battalion in Singngat -Khunta lampi siam

Lamka, Jan. 30 *(Nisin Thuhiltu)* : Khuga Battalion in Singngat Sub-division huapsung ah Myanmar tawh gamgi tuam ah um khua (village) te kikawmtuana (saktiman lampi) hawilo tak ah um zing chu bulldozer mang in a siam hawi hi. Zia lampi a siam uh chu Singngat a pat Khunta tiang, 46 km tuam hin a kigen a, Zoukhonuom, Theigotang, Hiangtam Khonou leh Singngat ah um te kikawmtuana lampi pawimaw mama a hi. Khuga Battalion in SOIL projects nuai ah khua-mipi te ngaikhawkna ziak ah ziagual nasep chu a chiapi hin le a kigen a, lampi kituptak ah siamzaw a hitak leh a kim leh kiang ah cheng te ding ah sum leh pai hawlna, nek hawlna, education, damlo hitan hun ah hospital zawtna leh lam chuamchuam ah thawveng chuam mama ding a hi. Khuga Battalion in khangthak sepna neilo ten sepna a mutheina ding ua, free coaching leh activity chuamchuam chiapi zing kawm ah kikawmtuana lampi kituplo tak ah um te a siamhawina chung in, Assam Rifles Sector, Churachandpur nuai ah Khuga Battalion chung in khua-mipi leh area mipi’n kipakthu a gen ui.

Sparsh Leprosy Awareness campaign cum Anti-Leprosy Day mang

Lamka, Jan. 30 *(Nisin Thuhiltu)* : India Pa ti ah kihia, Mahatma Gandhi thini a hi tawh kitawn in Tuni, 30th January 2018 chu India gamsung pumpi ah Anti-Leprosy Day mat in a um a, zia dungzui a chun, Churachandpur District Leprosy Unit/NLEP, DHS organised bawlna’ CMO Mini Conference Hall ah Sparsh Leprosy Awareness campaign cum Anti-Leprosy Fortnight observance hawnna a um a, zia hun chu Deputy Commissioner, Churachandpur district Shyam Lal Poonia in khuallian hina tawh uap in, ‘Leprosy Free’ ti ah District puandawna neikawm in Sparsh Leprosy Awareness campaign cum Anti-Leprosy Fortnight observance hawnna a nei hi. Anti-Leprosy Fortnight observance ahileh Janaury 30 -February 13, 2018 sung ah um ding a hi. Shyam Lal Poonia in a thugenna a chun, district administration in district ah leprosy cases a umkhak leh a vaima theipen ah hiatdaw a hitheina ding ah panlakna nei ding leh Leprosy dodalna a lawtin theina ding ah panla ding a hidan gen in, leprosy case nei te chuam bawlna leh kawi chuamna umlo ding, pankhawm chiat ah leprosy dodal hiding in a gen hi. Zia hun matna a chun, Dr Kim Simte, CMO, Dr Kimneihlam, District Leprosy Officer leh Goihzachiin, Principal GNM Nursing School te mapuina’n Mahatma Gandhi zana piakna a um a, Dr Kimneihlam, District Leprosy Officer in Anti-Leprosy Day leh Sparsh leprosy Awareness Campaign tawh kisai genna nei in, GNM Nursing school student ten step 7 ah khut sawp thiang dingdan suklatna nei in, Sparsh leprosy Awareness Campaign bawlna’n skit show a bawl ui.

Assam Rifles in S. Kawtlian ah Medical Camp bawl

S. Kawtlian, Jan. 30 *(Nisin Thuhiltu)* : Assam Rifles, Churachandpur in District Administration leh District Medical authority te kithuapina tawh OP SADBHAVNA nuai in tuni’n S. Kawtlian ah free Medical Camp -cum- Awareness Programme organised a bawl hi. Zia hun chu, Chief Guest hina tawh Brig Ajay Kumar leh TT Haokip, Chairman Hill Area Committee ten uap in, Medical Camp -cum- Awareness Programme hawndawna a nei ua, Shyam Lal Poonia, IAS, Deputy Commissioner Khaipao Haokip, Chairman, Autonomous Development Council, CCpur leh Rakesh Balwal, IPS, Superintendent of Police, CCpur ten le a uap ua, KKP S. Kawtlian Branch, MPCS ten le laa present a bawl ui. Army, Assam Rifles leh Chief Medical Office, Churachandpur a pat Doctors & Dentist ten damlo ki etsak nuam mi 850 te a en ua, District AIDS Control unit in awareness leh counseling bawlna a nei hi. Chun, government department chuamchuam - Sericulture, Horticulture, Fisheries, Veterinary, India Post, North Eastern Community Resource Management Project (NERCORMP) & District Family Welfare ten stall a hawng ui.

Tipaimukh Road siamzo pai ding ah dawtna siam
Lamka, Jan. 30 *(Nisin Thuhiltu)* : Zomi Namni 2018 Organizing Committee in a hung tung ding February 20, 2018, Zomi Namni lawpna ding tawh kisai ah panlakna a nei uh chiato zel in, tuni’n Bungmual a um, BRTF official-te va-kimupi in, Zomi Namni a tunma ngei a Tipaimukh Road ah blacktopping kibawl zing lai, Police Station mai (Zero Point) chan zoman ngeingei ding in ngekna bawl uh hi’n ZNN-OC apat hiat ahi. Union Home Minister, Rajnath Singh in Zomi Namni ah Chief Guest hina tawh uap ding ahi ban ah, government top official tamtak inle hung uap ding uh a hiziak ah nasep kinawdeu ding ah dawtna a bawl uh hi’n le a kigen hi.

Free Echo, Heart & Diabetes Screening Camp bawl

Lamka, Jan. 30 *(Nisin Thuhiltu)* : Sky Hospital & Research Centre, Imphal, Manipur Heart Foundation leh Non-Communicable Disease(NCD) Clinic, District Hospital, Churachandpur kithua in tuni, January 30, 2018 sunma dak 10:00 a pat NCD Clinic ah Free Echo, Heart & Diabetes Screening Camp a bawl ui. Free Screening ahileh Rashtriya Bal Swasthya Karyakram(RBSK) nuai ah nei ahia, damlona mudaw ah um, damdawi ah phachuamlo, at ngai dingte Sky Hospital ah a thawn ah bawlpiak hiding ahiu, ahi’nla damdawi leh a um man ahileh damlote’n a kipiak uh ngai ding ahi. Damlo et sung in, Shyam Lal Poonia, IAS, Deputy Commissioner, Churachandpur in etthâkna a nei hi. RBSK nuai ah NCD Clinic ahileh National Program for Prevention & Control of Diabetes, Heart Disease & Stroke nuai ah um ahia, Free Screening hun a damlo mudaw ah umte, Sky Hospital in RBSK Scheme mang ah a thawn ah at ding ahiu. Tuni’n naupang 50 leh piting 50 a ki-etsak ua, March tha ah ziagual free screening hi umkit bep ding hi’n a kigen hi.

Pension thâkna nei

Lamka, Jan. 30 *(Nisin Thuhiltu)* : District Hospital in tuni sunnung dak 1:00 in Dr. T Nengkhanmang, Deputy Superintendent Office Chamber ah hospital a sêm, pension ding Matron Chinzaniang Nursing Superintendent leh Grade IV Nemzachiin, Sweeper-te thâkna hun a mang ui. Zia hun achun, Hospital a sêm ward incharge, staff nurse leh grade IV bangzat hem in uap in, a thâkna ah district hospital in puandum silsakna a nei ui. Matron Chinzaniang, Nursing Superintendent mun ahileh staff nurse lak ah a senior pen, Sangthuam in lua ding ahia, zing January 31 ah charge kipe ding a hiu.

VEINA Free Coaching zo
Lamka, Jan. 30 *(Nisin Thuhiltu)* : Village Educational Initiative of Navodaya Alumni (VEINA) in thingtang apat zillaite khualna ah project VEINA nuai ah Free Coaching a nei uh zaw a hitai. Free coaching ahileh Jawaharlal Novadaya Vidhalaya (JNV), Tuinom a Class VI zil utte dawisakna ziak ah Navodaya Alumni te’n tha khat vel chiata apat Convention English High School, Sinzawl khua ah a bawl uh a hi. Sinzawl leh a kiang nai ah khuate a pat student 45 vel a pang ui.

BPCCHN student te’n exam pan
Lamka, Jan. 30 *(Nisin Thuhiltu)* : MS Conference Hall, District Hospital ah Indira Gandhi National Open University School of Health Sciences nuai a Bridge Program of Certificate Course in Community Health for Nurses (BPCCHN) student te’n exam, za’ni January 29 in a pan ui. BPCCHN ziltheina ding in June 28, 2017 in IGNOU tawh District Hospital pangkhawm a district Hospital ah Study Centre hawndaw ahia, tulaitak in student 19 in a zil ua, a zilzaw phat uleh, Primary Health Centre(PHC) ah Community Health Officer dinmun tu in Administration, Record Keeping tite enkawl ding ahiu. Zia course hi tha guk sung Certificate Course ahia, kum 2 sung ah zawthei ding ahi.

Kimang nailo himaleh ACLS Ambulance siam ah um

Lamka, Jan. 30 *(Nisin Thuhiltu)* : State Health Society, Manipur nuai ah January 21, 2018 ni ah Chief Minister-gi Hakshelgi Tengbang (CMHT) hawndaw ahi hun ah Churachandpur District a ding ah piak ah um, Advanced Critical Life Support (ACLS) Ambulance duthusam zo lo ziak in Company apat Mechanic-te’n a hung siam ui. Ambulance ahileh a hoilona hiatdaw pai himaleh, company apat a bawl dingte naw hat ziak bep ah hung uh hi’n a kigen hi. Mechanic te’n tuni Ambulance a bawl laitak un Shyam Lal Poonia, IAS, DC Churachandpur in entha in, a pawimaw leh ahiding gual tak ah bawlhawi ding in a mechanic-te a hil hi. Zia ambulance hi, damlo gim mama mundang ah puakdaw ngaite a ding ah mat hiding ahia, ECG Monitor, Defibrillator, Cardiac Monitor leh Ventilator te a um a, Operation Theatre ah Medical Officer, Technician leh Nurse-te zia ambulance matna ding tawh kisai hin training le piak hiding ahi dan uh hiat ahi.

Mizo People Convention in General Assembly nei

Lamka, Jan. 30 *(Nisin Thuhiltu)* : Mizo People Convention (MPC) Headquarter, Manipur in a 33-na, General Assembly tuni, January 30, 2018 sunma dak 11:00 in YMA Hall, YMA Complex, Hmuia Veng in a pan ui. CV Duhawma, President, Group YMA, Manipur; S. Vanlalruala, Chairman, MLS, Manipur; Paul Lalchhanhima, President, MZP Headquarter, Manipur leh Lalrinliana, President, MPC Headquarter, Manipur te’n thugenna a nei ui. Upa Lungmuana, IAS, Consultant, MPC Headquarter, Manipur in “Manipur Mizo-te’ dinmun leh kipumkhatna pawimaw dan” ti thupi mang in thugenna le a nei hi. Sunnung hun vaihawmna hun in a mang ua, Upa Dr. LS Gangte, Consultant, MPC Headquarter, Manipur in ma’pui in, agenda puaklut ah umte simdawna nei in, vaihawmna a nei ui. MPC Headquarter, Manipur nuai ah Unit 14 leh Sub-Headquarter khat a um a, Sub-Headquarter nuai ah Unit 31 vel a um hi.

Liansangmung thina chung ah kiholem
Lamka, Jan. 30 *(Nisin Thuhiltu)* : Liansangmung @ Sangmung s/o Zellet of Gouchinkhup Veng, New Lamka thina tawh kisai ah kiholemna a um dungzui in, a luang Imphal apat Lamka puak tung in a umtai. Liansangmung ahileh, achiata January 23, 2018 sunnung dak 3:00 vel a Paite Veng, Imphal ah Bike a tai lai, thautui pua tanker in a nunglam apat phu in, damdawi inn puaktung himaleh damzolo ah thi ahi. Hun bangchan hem kiholem theilo nung ah, Vungzagin Valte, Chairman, MTDC, MLA thanlon leh All Tribal Student Union Manipur(ATSUM) pangkhawm ah kihotheina ding lampi a ngaitua dungzui ua, tuni sunn dak 12 ah Vungzagin Valte, Chairman, MTDC, MLA thanlon Inn, Lamphelpat, Imphal ah kiholem ahiu. Sangmung ahileh, MANITRON nuai a Churachandpur District ah Aadhaar a ding ah limlatu khat ahia, mi kamtawm leh kipezo tak ahidan hiat a hi.

State in Martyrs’ Day mang

Imphal, Jan. 30 *(Nisin Thuhiltu)* : India Pa (Father of the Nation) ti ah kihia, Mahatma Gandhi thi ni, January 30 a hi dungzui in tuni’n India gamsung mun chuamchuam ah Martyrs’ Day mat in a um a, Mahatma Gandhi zana piakna leh suunna ah hun mat a hi. State Level ah GM Hall, Imphal ah Martyrs’ Day mat in a um a, zia hun a chun Manipur Governor Dr. Najma Heptulla mapuina’n Chief Minister N. Biren Singh leh a Council Minister te, Opposition leader O. Ibobi Singh, MLA leh top civil leh police official ten Mahatma Gandhi statue chung ah pakcha piakna leh zana piakna a nei ui. Chun, warning signal leh closing signal dan in siren sukgit in a um a, minute 2 sung Mahatma Gandhi suunna a um hi. Zia minute 2 sung a chun, Mahatma Gandhi zana etsakna’n gari taitua zosia chawlsak in a um a, a suunna nei zaw in, Shri Shri Bal Mukundev Government Music College, Imphal a pat teacher leh student ten Mahatma Gandhi ngaisan mama, Bhajans suklatna a nei ui.

‘A semlo te, sepman piak hilo ding: Minister Nemcha Kipgen
Imphal, Jan. 30 *(Nisin Thuhiltu)* : Social Welfare &Cooperation Minister Nemcha Kipgen in tuni’n District Social Welfare Office, Bishnupur District vethakna (surprise visit ) a nei a, zia hun a chun, semtu te attendance a hawilo ziak in ama departments in semtu te ding ah “ a semlo te, sepman piaklo ding” ti a vaima theipen ah chiapi (implement) bawl ding hin a gen hi. Minister Nemcha Kipgen in, officers-in-charge te chu kituptak ah attendance register mang ding leh a hun tak ah office kai ding, office hours sung ah kituptak ah nasem chiat ding in hiatsakna a bawl a, semtu ten ana sepman ding ua government in thalaw (salary) a piak a hi hezingkawm ah panlakna a nei ding uh pawimaw hin a gen hi. Official te chu mipi te haksatna kituptak ah ngaitha ding leh hepna neitak ah a haksatnau sukven theina ding ah panla chiat ding in chialna a bawl a, a pawimaw dungzui ah department te haksatna sukven theina ding ah ama’n a theina chan ah panlakpi ding hin le a gen hi. Social Welfare Minister in District Social Welfare Office etthakna anei hun sung a chun, rooms sung zosia chuan in office sung leh pua thiangtho tak ah kawi ding in le semtu te a hiatsak a, a kitupzawk sem theina ding ah District office te vethakna nei zing ding hin a gen hi.

Defence Ministry delegates ten Bishnupur District entha
Bishnupur, Jan. 30 *(Nisin Thuhiltu)* : Ministry of Defence nuai ah National Defence Colleg a pat delegate member 18 ten tuni, 30th January 2018 in Bishnupur district headquarter vena nei in, thil umdan etthakna a nei ui. Delegate member 18 te chu Major General Shri Vinaya Chandran (YSM, SM) in amapui a, delegate member te lak a chun, Israel, Japan leh Nigeria a pat foreign military delegate te le a pang ui. Chun, Pawan Yadav, Bishnupur DC leh Yogeshchandra H, SP mapui district team te tawh Mini Secretariat in meeting a nei ua, Panchayati Raj, Law and order, Women empowerment, Health, Education, Power, NGOs etc tawh kisai ah National Defence Colleg a pat delegate member ten thudawtna a nei ui. Meeting neizaw in delegate member ten Sendra Resort panna’n mun chuamchuam vena a nei ui.

Tobacco product dodal maw, aman (price) sukal???
Churachandpur Police in Old Bazar, Tuibong leh New Bazar ah dukan/dawr leh godown te check bawl in, tobacco product bangzat hem te a mandawk ua, tobacco product matdaw ah umte lak a chun, sadar 905, baba 120, baba black, sajan tobacco, balkimi tobacco, rally khaini tobacco, nerula tobacco ti te a pang a, a sum ah hisap ah Rs 4 lakh man ding vel a hi. Zialo a chun, a zuaktu mi 7 te man in Cigarettes and Other Tobacco Products (Prohibition of Advertisement and Regulation of Trade and Commerce, Production, Supply and Distribution) Act, 200 nuai ah case ziklut in a um hi. Zia gual panlakna hi, hun sawtpi a pat uh hitamleh tuni tiang ah tobacco product a kimuzo tapuai ti hiat ding khat le a um nai tadi lo a hi.

Mihing damtheina ding ah hawilo ah kihia tobacco product dodalna nei police te panlakna I pakcha, dodalna a pat ngal ua leh dodal zo ngei ding in panlakna neizawm leu dawi a um hi. Ahinlah tobacco product dodalna pan-ngal ah a ban zawm lo ding tho ahiuleh a ki pat phawlawklo uh thilpha hizaw ding in ginchat a um hi. A ziak chu, tobacco product leh khamthei dodal hizawlo ah a man (price) sukaltu mai in a pangkha sek ua, tobacco product leh khamthei ah sumkawlvei mite phungvuktu’n a le pan kit zaw sek ui. Khatvei, nivei tobacco product dodalna nasep nei ah chawlsan kit ziang kiti chu support bawl ding mipi te ding a le panlakpina ding hun um thei lo a hi.

Hiatthei ding in, lawting tak ah India ah tobacco khap (banned) ding chu thil haksa mama hiding a hi. A ziak chu, India ah tobacco product - chep leh muan chiing/ addict mi 200 million val a um a, zia chu khawvel pumpi chep leh muan chiing/ addict population 12% lam umna gam tina a hi. Thakhat thu’n Tobacco banned kibawl taleh tobacco addicts mi 200 million val te chu banggual in a um diam uh? Zialo a chun, Tobacco industry kiti mitamtak te sum muna leh kivakna pang a hi kit a, India ah tobacco manufacturer lianpen ah kihia chu ITC Ltd a hia, India gamsung ah tobacco product kizuak 80 % chu ITC Ltd product a hi. Cigarette manufacturer dang, Godfrey Philips in kum 2017 a khah turnover 3600 crore mu zo ah taklat a hi. Commercial sector ah Indian tobacco industry chu direct leh indirect ah mitamtak te sepna petu leh nisin kivakna, sum muna pang a hi.

Zia ziak a chun, a pha ding dawina ziak ah panlakna um a hi ngal leh kituptak in panlakna um zawm leh ti I dawi a, Manipur Government in tobacco product dodalna chiapi taktak ding a ti ahileh, National Highway, Imphal-Dimapur, Silchar -Imphal etc ah tobacco product puaklut ding khap bik bek henlah tobacco manufacturer te sukbeina ding in panlakna taktak nei leh Churachandpur District sung ah neilo ziak ah tobacco product zuak ah sumkawl veimi kiam chuam mama ding, tobacco product dodalna nasep in umzia a nei ngei ding in ginchat a um hi.

Page 1 of 20