Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

Security khautak venbitna nuai ah UZO GHQ in vaipawthak ding telna nei

Lamka, Sept. 23 *(Nisin Thuhiltu)* : Security khautak venbitna nuai in tuni’n Zou nampi khaikhawmtu lianpen United Zou Organization (UZO) General Headquarter ah kum 2017-2021 sung vaipaw thak ding telna a um hi. Zia hun a chun, election um ding dawi leh dawilo pawl um in, kinawktuana leh a hawn hawn in kinakna a piang a, police te venbitna tawh election a nei ui. Election hun ah President Term 2 tukzawm ding in Chinlunthang Zou chu UZO electoral college lemsakna tawh un-contest ah teltin a um hi. Chun, V/President ding ah Zamgenthang ; General Secretary - Khamminlun @ KG Tungnung; Joint Secretary- Thangzamang; Secretary Finance – Khaizamang; Treasurer – Thangsuankhup; Secretary (Home & Organization) – Ginzathang; Secretary(External) –Ngamkhenthang; Secretary(Custom & Culture) – Amchinpau; Secretary(Literature & Youth Affair)- Nengchinlam leh Secretary (Information & Publicity)- M John Haulamlian te le uncontest ah teldaw in a um ui. Kitelna zaw a hi tawh kitawn in Election Commissioner in teltin ah a um a hidan uh puandawna nei in namdetna hun a mang ua, Rev. Stephen Chinzathang, Sr. Executive Secretary (ZPCS) in vaipaw thak ding te pauchapna piakna nei in election a zothiang ui.

A langkhatlam ah Goulal Tungnung, former Vice President, UZO GHQ mapui pawl khat in tuni, September 23, 2017 sunnung in Lailam Veng ah Press Conference ko in, United Zou Organization (UZO) General Headquarter UZO Election thianttho lo a hidan taklatna nei kawm in, UZO GHQ president ding ah dawi chuam umlo leh teltin ah um penpen chu President ah pawm ding ah a kimansa um himaleh thil chiadan diklo a um ziak ah Election neilo ding ah a na’n uh hin a gen a, khawvel ah um ngailo, Election Commission in teltin ah um te khawlai ah a puan uh chu pawmlo a hidan a taklang hi. A genzawm zelna a chun, President ding ah uncontest ah kai, Chinlunthang in UZO Unit 12 a phiat nung ah Unit 18 a Office Bearer ding table work a hausa leh Unit lawiupa te hiatpina bei ah teltin ah um gual ah kikawi chu pawm theilo uh hin le a gen a, UZO Unit leh Block election umsate phiat a, a thak ah election nei kit a hi ma, United Zou Organization (UZO) General Headquarter umlo ding ah August 24, 2017 ni ah Zou Synod Hall a thupukna siam uh, a thupuknau chu August 30, 2017 tiang ah dawnhuna peding ah UZO President kiang ah zikthaw hiatsak himaleh dawnhuna bangma umlo in a gen hi. Zia nung a chu September 22, 2017 ni ah Zomi Council kiang ah thil umdan tut maleu, Zomi Council in genkhawmna nei maleh khatlam bep ah thil umdan khantha kawm ah, Election chiatheng ding ah lemsakna nei ah hiatsakna bawl in a gen hi. January 15, 2015 ni a Singngat a meeting thupukna, UZO ah panmun nei te kuama Politics ah kibuallo ding ti ah um Chinlunthang in a bawsiat nung ah Zou namsung ah kikhenzakna piang in le a gen hi.

“Mega Mobile Traffic Adalat” ah traffic rules zui diklo tamtak liausak

Lamka, Sept. 23 *(Nisin Thuhiltu)* : District Legal Services Authority, Churachandpur leh Traffic Control Police TCP in tuni September 23, 2017 in Churachandpur Police Station mai,Churachandpur College Tipaimukh Road, Tedim Road dung Gouchinkhup veng leh UCO bank mai in “Mega Mobile Traffic Adalat” kiti a nei hi. Zia hun sung a chun, Traffic Control Police personnel te’n khawpi sung ah tai gari neu panna gari chuam chuam check bawl in, Driving Licese bei ah gari hek, kum tinglo ah gari hek, Registration Certificate (RC) bei ah gari tai, Insurance Certificate neilo, Registration Number taklo ah gari tai, Speed limit val ah gari tai, Helmet khuklo two-wheer hek leh chuang, gari hekkawm ah Mobile phone ah mang, Four wheeler a tai Seat Belth manglo ti te kituptak in etzuina a nei ui. Chun, traffic rules kituptak ah zuilo te man in sum a liausak ui. “Mega Mobile Traffic Adalat” hun sung a chun, traffic rules zui diklo two wheeler 199 leh four wheeler 100 val a mandawk ui. District Legal Services Authority, Churachandpur in ahileh mipi te bitna ding khualna ah Mega Mobile Traffic Adalat organised a bawl hi a hia, maban a le sunzawm zel ding uh ti a hi.
NT 24sep2017b

VPC Community Hall sakna ding ah chek tâng 6000 tuak

Lamka, Sept. 23 *(Nisin Thuhiltu)* : Vaiphei Peoples Council (VPC), General Headquarter ah cabinet member leh special contractor Mr Genlal Khaute in VPC Community Hall sakna, chek (brick) pieces 6000 ah pang ding ah thutiam a bawl dungzui in tuni’n VPC Community Hall mun in chek (brick) hun tiang a tut hi. VPC Community Hall sakna ding ah kiphal tak ah panlakna a neina chung in VPC GHQ in Mr Genlal Khaute chung in kipakthu a puang hi.

ZUF/ZTF cadre 1 mat ah um
Lamka, Sept. 23 *(Nisin Thuhiltu)* : 5/11 Gorkha Regiment leh Assam Rifle, Churachandpur kithua in tuni, September 23, 2017 in Kanan Veng, Tuibong ah Zeliangrong United Front/ Zeliangrong Tiger Force (ZUF/ZTF) cadre, Colonel Andrew kiti a mandawk ui. Mat ah um ZUF/ZTF cadre a pat galvan mudaw umlo maleh mobile handset, sum leh demand letter ZUF leh ZTF min ah kisua gel, Lower Keirap Kom, Manipur a ding demand letter ti te banin demand letter ah 2016 leh 2017 a ding, ration tax, late fine leh service tax percent 20 tawh September 6, 2017 sunma dak 10:00 tiang ah Governemnt of ZUF khut a piak ding ti a ki zik hi. Churachandpur Police Station a FIR ziklut in a um a, Police khut ah piakdaw ah um in a kigen hi. Mat ah um ZUF/ZTF) cadre, Colonel Andrew kipuanna a pat hunsawt ama chu tunaicha Zeliangrong United Front/ Zeliangrong Tiger Force (ZUF/ZTF) Town Commander mawpuakna piak ah um a hi.

Team Khawvaiphei in panpina Rs 55,000/- pia

Lamka, Sept. 23 *(Nisin Thuhiltu)* : Hydrocephalus natna nei Regional Institute of Medical Sciences, (RIMS) Imphal, Surgical (Female Ward) Bed No. 15 ah etkawl ah um Master Lamminlun s/o Genthianlian & Veineichin of Bisanmual chu tuni'n Team Khawvaiphei in et-thakna a nei ua, mi tawmngai mimal leh pawl chuamchuam in sum donate a bawlteu chu first phase dan in Rs 55,000 piakdawna a nei ui. Chun, Zillai DM College, KSP hotute, mimal leh pawl chuamchuam te'n le a mun ngei in vena a nei ui. Lamminlun ahileh tuni operation bawl ding ti himaleh a khawsik leh infection ziak ah operation ni ding chu chawn ah um hin a kigen hi. Master Lamminlun ahileh Sept. 16, 2017 ni, JNIMS Hospital, Imphal ah Neurology Department, doctor te etsak a hinung ah RIMS ah referred a hi tawh kitawn ah admit a um leh etkawl hizing a hi.

NT 24sep2017c

PTC Unit President suunna nei

Lamka, Sept. 23 *(Nisin Thuhiltu)* : Paite Namte’ kikhai khawmna, Paite Tribe Council, General Headquarter in PTC Mizoram Headquarter nuai ah PTC Kawlbem Unit President Chalbuang (75) s/o (Late) Upa Thangmang a mualliam tawh kitawn in tuni, September 23, 2017 sunnung in suunna nei PTC Conference Hall, Hiangtam Lamka mun in a nei hi. Zia hun a chun T. Pumlianpau, President, PTC GHQ in suunna thu gen in, suunna hun amapui hi. Chalbuang ahileh cancer natna ziak ah mualliam a hi.

NT 24sep2017d

Adviser ding ah guat thak ah um te namdetna nei
Lamka, Sept. 23 *(Nisin Thuhiltu)* : Young Paite Association (YPA) Lamka Block in tuni, September 23, 2017 sunnung in Block Office, Hiangtam Lamka ah Block Meeting leh Adviser ding ah guat thak ah um te namdetna hun a mang ui. Zia hun a chun President in Adviser ding ah guat thak ah um te min simdawna a nei a, a chiakhawm member te’n a nemdetna ding ah khut tung in namdetna a nei ui. Chun, Agenda chuam chuam genkhawmna a nei ua, a genda lak a chun, Block sung ah Unit um te vethakna nei ding, G. Monglian Unit President a pat dawtna um te leh thu chuam chuam a gen khawm ui. Chun, G. Monglian khua ah cheng, opium (poppy) chiing ah khawsa innkuan tamtak YPA dawtna dungzui ah opium (poppy) chiin a chawlsan nung ua haksatna a tuaknau tawh kisai YPA Lamka Block in panpi theidan dan ah panpi ding in lemsakna a nei ua, YPA Lanva Block nuai ah um YPA Lamjang Unit tun din thak kitna ding tawh kisai le a gen khawm ui.

Literary Week 2017 mang ding
Lamka, Sept. 23 *(Nisin Thuhiltu)* : St. Peter’s School, Vengnuam, New Lamka in September 25, 2017 leh Annual Sports & Literary Week 2017 mang ding a hi. Zia hun chu N Routela, Second-in-Command, STC/BSF in Chief Guest hina tawh uap ding a hia, Dr. Kim Simte, Chief Medical Officer, Churachandpur in Guest of Honor hina tawh uap ding a hi.

Case nei Engineer khat MTDC Chief Engineer ding ah guat a um
Imphal, Sep 23 *(Nisin Thuhiltu)* : Manipur ah state government thak in Anti-Corruption Cell siamdawk ah state sung ah good governance a um ding tangko zing maleh case nei mi khat Chief Engineer thak ding ah guat a hina chung in good governance campaign chiapi ah um chu a min mai hileh kilawm in a kilang hi. Imphaltimes in a taklatna a chun, September 13 ni cabinet meeting hun ah Manipur Tribal Development Corporation (MTDC) chief engineer ding ah Chongtham Ranabir guat a hidan confirmed bawl ah um hin a taklang hi. Irrigation & Flood Control Department (lFCD) Manipur, ah retired additional chief engineer Chongtham Ranabir ahileh tu ah pending cases pani nei a hia, zia case pani te chu sum leh pai thelthanna, thuneina mat diklo ziak, professional ethics chiapi lo ziak ti te a hi. Anti-Conuption Cell nuai ah Chongtham Ranabir chung ah case numbered RR No. 82/10/07/2017 ziklut ah um a hi. Chuleh, executive engineer (EE/FCD-1) ah a sep hun ah achapa contractor, Hadlee Chongtham chu dawisak chuamna tawh contract na pezing sek a hi.

IOC athletes' forum ah AIBA representative ding ah Mary Kom guat hiding

Imphal, Sep 23 *(Nisin Thuhiltu)* : Five-time world champion leh Olympic bronze-medallist banah active parliamentarian M C Mary Kom has become the first Indian to be picked as the International Boxing Association's (AIBA) representative for the IOC Athletes' Forum scheduled in November. Ziana ding a chun, AIBA in Boxing Federation of India kiang in invitation letter a thawt ta bawk hi. 8th International Olympic Committee's (IOC) Athletes' Forum ahileh November 11th- 13th sung ah Lausanne ah um ding a hi.

Mega Traffic Lok Adalat hun ah Traffic rules zui diklo tamtak mat ah um

Imphal, Sep 23 *(Nisin Thuhiltu)* : Imphal ah Mega Traffic Lok Adalat hun ah tuni’n Traffic rules zui diklo ah gari tawl mitamtak liausak in a um hi. Manipur Legal Services Authority, District Legal Services Authority, Imphal West, Transport Department leh Traffic Police kithua ah Mega Traffic Lok Adalat chiapi in a um a, driving License bei ah gari hek, kum tinglo ah gari hek, Registration Certificate (RC) bei ah gari tai, Insurance Certificate neilo etc check bawl in a hiding gualtak ah um lo te gawtna dan ah sum liausak ah um a hiu. Public Prosecutor of CJM, Imphal West, Ajitkumar Mutum in Lok Adalat chu traffic nawngkaina a um zing bak ah accident a um mun mama na chung ah chiapi ah um hin a gen hi.

Marijuana/Ganja 40 kg kiman dawk
Imphal, Sept. 23 *(Nisin Thuhiltu)* : Imphal East ah Manipur police commando team khat in tuni’n Lamlong Bazar ah routine frisking leh checking a bawl hun un 40 kilogram ah gik Marijuana/Ganja , Rs 3 lakhs man ding a mandawk ui. Zia ah commando team te chu Robinsun Khamnam, DSP (CDO)/IE leh B Lunthang Vaiphei, OC(CDO)/IE mapui a hiu a, Jiribam Bus parking zuan Tata Magic gari sung ah a mudaw uh a hi. Chun, Marijuana/Ganja pawtu Laishram Ibohalbi Singh (60) s/o (L) L Thambalngou Singh of Yourabung Mayai Leikai leh Raju Kumar Das (39) s/o Seilendro Kumar Das of Sotu Haflong Village, Dimasu District, Assam, te le mat in a um ui.

TLDCWF in ADC suspension chung ah haksatna taklang

Imphal, Sept. 23 *(Nisin Thuhiltu)* : Tamenglong & Longmei District Citizens Welfare Forum (TLDCWF) in Autonomous District Council (ADC) tha 6 sung lam suspend ah a um takna chung ah mipi’n haksatna chi chuam chuam tuak ahidan tuni’n a taklang hi. Manipur Press Club, Majorkhul ah tuni Rangam Thoitak, president TLDCWF in thuthak lakhawm mite kiang ah a genna a chun, Tamenglong ADC chu political crisis ziak ah tha 6 sung suspension ah umta hin a gen a, ziana chung a chu domicile certificate lakna leh thil chuam chuam ah mipi’n haksatna tuak zing uh hin a gen hi. District administrative council nuai ah scheme chuam chuam mu ah um te le bangma mu hitalo in a gen a, State Government leh District Administration in a vaima theipen ah mipi te haksatna sukven a hitheina ding ah panlakna a nei ding pawimaw a hidan taklang kawm in district mipi te chu govt. establishment khak ding leh kiphinna chi chuamchuam chiapi ding ah kimansa um zing a hitak dan uh genlang kawm in nawna a bawl hi.

CM Relief Fund ding ah lakh 4 donate
Imphal, Sept. 23 *(Nisin Thuhiltu)* : Manipur ah tui-let ziak ah haksatna tuak te kithuapina ding ah mimal leh pawl chuam chuam in Chief Minister’s Relief Fund (CMRF) ding ah sum donate a bawl zing uh tawh kitawn in tuni’n Bishnupur District ah Deputy Commissioner leh Superintendent of Police officer te’n Rs. 4,00,000 (four lakhs) donate a bawl ua, Chief Minister N. Biren khut in piakdawna a nei ui.

“SWACHHTA HI SEVA” campaign ah Education Minister in panla

Imphal, Sept. 23 *(Nisin Thuhiltu)* : Imphal International Airport, Imphal. Kiangnai tuam ah tuni’n “SWACHHTA HI SEVA” campaign chiapi in a um hi. Zia hun chu Education Minister Thokchom Radheshyam Singh in le uap in, mipi te tawh cleanliness drive bawlna miphi pan in lampi phiatthianna nasep a nei hi. Education Minister Thokchom Radheshyam Singh in a thugenna a chun, thiangthona kiti chu taksa leh lungthim ah a um ding pawimaw in a gen a, Airport kim leh kiang chu Airport zuan, a tek a khang, a neu a lian te chiakhawmna munpi khat a hi ziak ah a thiantho ding ngaikhawkna sang diak in a gen hi. “Swachhta Hi Seva” campaign ahileh Airports Authority of India Imphal International Airport, Imphal in 2nd October 2017 tiang ah chiapi zawm ding a hi. Tuni ah “SWACHHTA HI SEVA” campaign hun chu Airport Director, Airports Authority of India Imphal International Airport, S. K. Panigrahi, Deputy Commandant, CISF ASG, P.D. Gaisung, Imphal CISF personnel, Airport Authority India official te, Air India, Indigo, Jet Airways leh Air Asia official leh staff te le a pang ui.

Museum in society ah pawimawna liantak nei: Minister L. Jayantakumar

Imphal, Sept. 23 *(Nisin Thuhiltu)* : Manipur Art & Culture Minister L. Jayantakumar Singh in tuni’n khuallian hina tawh Manipur State Museum, 48th Foundation Day Celebration a uap hi. Minister L. Jayantakumar Singh in a thugenna a chun, Museum kiti chu thil lui te mukit theina a hidan genkawm in museum in society a ding ah pawimawna liantak nei in a gen h. Manipur State Museum building siamthak ding pawi a hidan le taklang in, Chief Minister thuhiat ah a pawimaw dungzui ah Museum building siam thakna ding ah fund sanction bawl hiding in a gen hi. Chun, Manipur State Museum & Post Card, Booklet hawnna a nei a, Maharaj Gambhir Singh leh a army te statue kisiam hawnna le a nei hi. 48th Foundation Day matna hun chu, Commissioner, Art & Culture, M. Lakshmikumar Singh (IAS), MLA, Mayang Imphal A/C, K. Robindro Singh, MLA Sekmai A/C H. Dingo Singh, Art & Culture Director Dr. K. Sushila Devi te’n le a uap ui.

“SSA Manipur" kiti Youtube channel hawng
Imphal, Sept. 23 *(Nisin Thuhiltu)* : Th. Kirankumar, State Project Director, SSA, Manipur in thusua a bawlna a chun, Youtube videos upload theina ding leh free educational online a ding ah “SSA Manipur" kiti Youtube channel khat hawn ah um a hidan taklang kawm in a kisaipi Education (School) Department, Government of Manipur nuai ah teacher leh lunglutna nei mipi te’n Education lam thil ah video clip upload thei ding uh hin a gen hi. Chun, zia video clips upload kibawl ding te chu Manipur Board (Class 1 to Class 10) courses ahiloleh topics tawh kituak a hiding, Manipuri ahiloleh major local dialect -Kuki, Tangkhul Mao-maram, Rongmei, Anal etc) le hithei ding ti a hi.

User Rating: 0 / 5

Star InactiveStar InactiveStar InactiveStar InactiveStar Inactive

DIG (Range-II) in CCPur Police Station entha

Lamka, Sept. 18 *(Nisin Thuhiltu)* : Manipur sung District chuam chuam ah Police Station um te lak ah thiangtho pen etthâkna chiatha zing in tuni’n K. Radhashyam, IPS, DIG (Range-II) in Churachandpur Police Station etthakna a nei a, ama a hileh Bikramjit, MPS, CO 3rd Battalion IRB in a malat a, Police Station a phâk uh tawh kitawn in M. Nasir Ahmed, MPS, OC mapuina’n Guard of Honor piak in a um hi. Zia hun a chun OC Churachandpur Police Station in Police Officer leh Personnel um zat report piakna nei in a Room sung ah thingpi dawn in holimna a nei uh hi. DIG (Range-II) in tuni Churachandpur Police Station a phak hun a chun Rakesh Balwal, IPS, SP Churachandpur leh District sung ah Police Officer zosia’n a zui uh hi.

Sept 15 tiang ah malaria vei 4 mudawk
Lamka, Sept. 18 *(Nisin Thuhiltu)* : Malaria Department, Churachandpur in tutha September 1 a pat September 15, first Fortnight sung in Malaria positive 4 a mudawk hi. Malaria Department, Churachandpur a pat report kimu dungzui in September 1 - 15, 2017 sung ah malaria vei ding ah muanmaw mi 645 thisan test na lak ah Positive 4 mudawk in, Plasmodium Falciparum (PF) a hileh mudaw neilo hi’n SMO, Regional Health & Family Welfare, Imphal leh Director, Health Services, GoM ah report a pia’i.

AMNEWA in kiphinna sunzawm

Lamka, Sept. 18 *(Nisin Thuhiltu)* : All Manipur National Health Mission Employees Welfare Association (AMNEWA) in a sepna uh regular hisak ding phutna a nei uh sunzawm in tuni’n Churachandpur District a National Health Mission nuai a sem staff te’n CMO Office Campus ah Sit-in-Protest a nei uh hi. Sit -in- Protest a hileh a chiata September 14, 2017 ni’ Medical Directorate office ah AMNEWA malatna’ neipat a hia, September 15 ni ah Bishnupur District te’n nei in, September 16 ni’ Chandel District leh tuni’n Churachandpur District a NHM Staff te’n a nei ban ua, zing ah Imphal East leh zing kit, September 20 ah Imphal West District te’n nei ding a hiu. National Health Mission nuai ah Churachandpur District a pat Department chuam chuam ah Staff 193 a um ua, State sung pumpi ah a hileh Staff 2,265 um in, 2006 kum a pat Contract basis a sem ding ah lak a hiu. AMNEWA in regular hisakna ding in a chiata July 28, 2017 ni’n Manipur Chief Minister, Health & Family Welfare Minister, Health & Family Welfare Secretary, Mission Director leh Parliamentary Secretary, Health & Family Welfare kiang ah memorandum pia in a bawzuina August 21, 2017 ni ah pekit maleh Government a pat bangma thuhiat a neilo ziak ua kiphinna a pat uh hi’n a kigen hi. National Health Mission nuai a 2006 a pat staff lak a hi nung ah State in damtheina lam tawh kisai hihawi mama in Times of India news report dungzui in Manipur ah Infant Mortality Rate (IMR) 1,000 a pat 9 ah khesuk in, gamsung pumpi a 43 banah Assam ah 62 a hia, NHM a sem te’n Director chuam neilo in Directorate of Health Services nuai ah Mission Staff dan ah sem a hiu.

CDVDFWA) in MGEL/CPIS/SIN Form Fill-up ding dan tawh kisai ah hiatsakna bawl
Lamka, Sept. 18 *(Nisin Thuhiltu)* : Churachandpur District VDF Welfare Association (CDVDFWA) in MGEL/CPIS/SIN Form Fill-up ding thu tawh kisai thusua a bawlna a chun, MGEL/CPIS/SIN Form fill-up nailo member te Association in bawl piak thei ding leh mimal ah kibawl te’n le October 20, 2017 chan ah pawlpi a hiatsak uh ngai ding hi’n a taklang a, MGEL/CPIS/SIN delna ding tawh kisai ah member sung ah Rs. 500 dawlkhawm ah a la um pekha nailo te’n Form fill-up hun ah Form man ding Rs. 100 chawichiat ding in a hiatsak hi. Association hiatpilo ah form fill-up leh Rs. 500 pe khalo memberte’n haksatna a tuak uh leh pawlpi’n mawpawlo ding hi ah hillawk kawm in Bradchelle Inc. (Computer Works), B. Aijalon Bazaar ah sunma dak 10:00 a pat sunnung dak 3:00 kikal ah pawlpi puitute um ding uh a hina ah, a ni kipia dungzui ah Form fill-up chiat ding in hiatsak a bawl hi. Form fill-up ni ding bithiat dan a hileh - Kangvai Post leh Mini Secretariat te’n September 20, 2017, Singngat leh Sangakot Post te’n September 21, 2017, Thanlon leh Parbung Post te’n September 22, 2017, Henglep, Session Court leh Fire Station te’n September 23, 2017, Churachandpur Police Station te’n September 25, 2017, TCP, Office Runner leh Hospital outpost te’n September 26, 2017 leh Reserve Line ah umte’n September 27, 2017 hiding a hi.

Henglep ah DBT mat pat hita ding
Lamka, Sept. 18 *(Nisin Thuhiltu)* : Sub-Divisional Officer (SDO) Henglep panlakna’n Henglep Sub-Division ah MGNREGS Beneficiary te sum piakna ding ah Direct Benefit Transfer (DBT) mat hita ding a hi. Delhi a pat hung MGNREGA nuai ah Job Card holder te nikhawtha chu SDO office a pat a mutu ding te Bank Account ah lutsak hiding a hia, zia na ding ah Village Chief leh Village Authority tawh nasepna, Action Plan guan a um te genkhawmna chiatha zing hi’n Chunglenmang Kipgen, MCS, SDO Henglep in a gen hi. DBT etthâkna ding ah Henglep, Vungbuk, Tuilaphai, Lhenjang, Najang leh Munpi ah September Job Card sum lutsak hiding a tia, nikhawtha le nikhat ah Rs. 197 hisek chu Rs. 204 ah pung ta a hi dan gen in, Bank Account neikha nailo te’n SDO Office, Bijang ah Zero Balance ah HDFC leh SBI Bank Account hawnthei ding banah Aadhar Card leh Aadhar Seeding le bawlpiak thei hi ding ti’n SDO in a gen hi. Chun, Sub-Division sung ah Hill House Tax pelo khua te’n a bat uh a dit thiang masia uh nithâ mulo ding uh hi ah hiatsak kawm in khua 104 umlak ah khua 20 vâl in Hill House Tax pethiang ta uh hi’n a gen hi.

SBI-RSETI ah training chiatha zing

Lamka, Sept. 18 *(Nisin Thuhiltu)* : State Bank of Inding ah-Rural Self Employment Training Institute (SBI-RSETI) ah tuni’n Piggery Farming Training a kipan a, zia na’ chun Piggery Farming ah lunglut mi 27 a pang in S. Mangboi Vaiphei, Faculty, SBI-RSETI in ni 5 sung Entrepreneurship Development Training pia ding banah P. Khamsanglian, Progressive Farmer in ni 5 sung ma Practical leh Field Visit kithua ah ziltilna pia ding a hia, September 28, 2017 leh Piggery Farming Training zawthiang hi ding a hi. Tu hin SBI-RSETI, Bijang ah Basic Photography & Videography training le a chiatha zing in October 19, 2017 leh zawthiang hi ding a hi.

RIMS hospital ah Lamminlun admit a um
Lamka, Sept. 18 *(Nisin Thuhiltu)* : Hydrocephalus natna nei Master Lamminlun (2yr & 2month) s/o Genthianlian & Veineichin of Bisanmual chu tuni'n RIMS ah Surgical (Female Ward) Bed No. 15 ah admit in um hi. Ama ahileh Sept. 16, 2017 ni NHM nuai a RBSK te panlakna leh Team Khawvaiphei support na bawlna JNIMS Hospital, Imphal ah Neurology Department ah doctor te etsak in um a, doctor in a etzaw ah operation a kibawl masak (Oct. 2, 2016) hun ah a lu (head) sung ah tui umte luandaw theina ding ah pipe (stent) kitua pawtdawk, stent kikawi te a kimtaklo ziak ah a umna hiatchian theina ding ah X-Ray, Ultra Sound panna test chuamchuam bawl in a um a, test results kimtak tawh RIMS ah pui a hi nung ah doctor in admit hi’n kigen a, doctor in hawitak ah investigation a bawl zaw tak leh treatment pat ding dan kihia pan ding in le a kigen hi. Lamminlun etkawlna ding tawh kisai in National Health Mission, CCpur in nasatak in panlakna a nei a, Team Khawvaiphei in le donation bawl nuamte a ding in platform khat a bawl piak a, tuni tiang ah mimal leh organization chuam chuam 90 val in panpina peta ua hiat a hi.

Grace Amazing Foundation in panpina pia

Lingsiphai, Sept. 18 *(Nisin Thuhiltu)* : Hydrocephalus natna nei Master Lamminlun (2yr & 2month) s/o Genthianlian & Veineichin of Bisanmual panpina ding in mimal leh pawl chuam chuam in panpina a pezing ua, zia chu tawh kitawn in zani a khan Grace Amazing Foundation, Lingsiphai in le panpina piakna a nei hi. Grace Amazing Foundation ah Secretary Mr Khamlal Vaiphei leh Treasurer D Mina Vaiphei te’n donation bawl nuamte a ding in platform siampiak Team Khawvaiphei member te khut in Rs 3000/- piakdawna a nei ui.

Union Minister in Exhition -cum- Seminar ‘Naya Bharat –Hum Karke Rahenge’ hawng

Imphal, Sept. 18 *(Nisin Thuhiltu)*: Union Minister of State, Heavy Industries & Public Enterprises Babul Supriyo in tuni’n Manipur State Film Development Society Hall, Palace compound, Imphal ah “Exhition -cum- Seminar of ‘Naya Bharat –Hum Karke Rahenge’ hawnna a nei a, “New India” a ding ah panlakna sukpitinna ding ah kitiamna (pledge) hun amapui bawk hi. Exhition -cum- Seminar of ‘Naya Bharat –Hum Karke Rahenge’ ahileh 2022 leh Quit India Movement leh Independence kum 75 tinna lawpna ding kawm ah India Prime Minister Narendra Modi vision “New India” sukpitin theina ding ah organised kibawl a hia, Ministry of Parliamentary Affairs, Govt. of India in designed a bawl, Directorate of Advertising & Visual Publicity, Ministry of Information and Broadcasting, Govt. of India in organised a bawl, Ministry of Petroleum and Natural Gas, Govt. of India nuai ah Oil and Natural Gas Corporation Ltd in sponsored a bawl a hi. Prime Minister Narendra Modi vision “New India” nuai ah India chu kum 2022 tiang ah, free corruption, free poverty, free filth, free communalism, free terrorism leh free casteism umsak ding ti a hi. Hun matna a chun, Deputy Commissioner, Imphal East District Th. Chitra Devi leh Chairman, Council of Higher Secondary Education, Manipur L. Mahendra Singh te’n “New India” tawh kisai in thugenna a nei ua, Dy Secretary, Parliamentary Affairs, SumanBara, Director, DIPR Meghachandra Kongbam, Field Exhibition Officer, DAVP Imphal, Premlata Loitam, Kashyap Joshipura, Chief Manager, ONGCte’n le a uap ui. Exhibition chu 19th September 2017 tiang ah umzawm ding a hi.

CM in Chandel district ah development projects dinmun tawh kisai review meeting neipi

Imphal, Sept. 18 *(Nisin Thuhiltu)*: Manipur Chief Minister N. Biren Singh in tuni’n in Chandel district ah development projects chuamchuam chiapi ah um te dinmun tawh kisai a kisaipi official te review meeting a neipi hi. Zia hun a chun, Deputy Commissioner, Chandel Krishnakumar in power point presentation bawl in development projects chiapi ah um chawmkimtak ah suklatna nei in, District Administration in haksatna chi chuam chuam – staffs kidailo, official vehicles gari umlo, drinking water, health sector etc te genlatna a nei hi. Chief Minister in DC chu haksatna leh thil kituplo te zikdawk ding leh developmental works chiapi ah um te kituptak ah enzui ding in hiatsakna a bawl a, District Level Monitoring Committee in developmental project zosia kituptak ah a etzui ding pawimaw in a gen hi. Khantona ding ah lampi, power supply leh drinking water supply te ngaikhawk diak ding pawimaw in le a gen a, hill areas ah lampi kiangnai tuam ah drainage system kituptak a um ding pawimaw a hidan le a gen hi. Chun, Administrative Secretary te leh DC chu hill districts ah a chiatha developmental projects te 2018 tiang ah zawthian a hi teiteina ding ah panla chiat ding in hiatsakna a bawl hi.Government employees te transfer & posting tawh kisai a genna a chun, Chief Minister in transfer & posting chu a pawimaw dungzui ah chiapi hiding leh zia chu kidawi chuambikna umlo ding hin a gen a, hill districts ah posting chu a lotheilo ah kum 2 tiang rotation basis ah a um ding hin a gen hi. Differently-able students/ persons te haksatna tawh kisai, Chief Minister in a genna a chun, talented special child/ person te subsidized rates ah loan piak hiding leh monthly stipend Rs. 2000 piak hiding in a gen a, Ministry of HRD, Government of India in state sung ah flood affected school buildings te sakphat ding ah lemsakna nei hin a gen a, 50 bedded District Hospital, Chandel District Sports Complex, Joupi Power Sub-Station chu October tha leh hawn hiding in a gen hi. Review Meeting chu Minister for IFCD & MLA Chandel AC Letpao Haokip, MLA Tengnoupal AC D. Korungthang, Chief Secretary R.R. Rashmi, DGP L.M. Khaute, Administrative Secretaries, DC leh SP Chandel & Tengnoupal District, head of department te’n a uap ui.

Meitei Traditional Dance Teaching School & Performing Centre in Silver Jubilee mang

Imphal, Sept. 18 *(Nisin Thuhiltu)*: Chandrakriti Auditorium, Art & Culture Complex, Palace Compound, Imphal ah tuni’n Meitei Traditional Dance Teaching School & Performing Centre, Imphal in Silver Jubilee lawpna a nei hi. Silver Jubilee thupi ding ah “ Preservation of Traditional culture for peace & prosperity under the roof of love & unity One family One nation ONE WORLD.” kiti mat in a um a, Manipur Governor Dr. Najma Heptulla leh Director, CHORUS Repertory Theatre, Imphal leh former Chairmen, National School of Drama, New Delhi, Dr. Ratan Thiyam, Chairperson, MSCW, Dr. K.Sobita Devi leh Retd. Commissioner, Arts & Culture, Government of Manipur, IAS, Dr. P. Bharat Singh te’n khuallian hina tawh hun matna a uap ui. Governor Najma Heptulla in Souvenir “Meitei Traditional Dance Teaching School & Performing Centre” hawnna leh M.T.D.T.S & P.C. website hawnna a nei a, Meitei Traditional Dance Teaching School & Performing Centre ah gold medalists 4 te leh Dr.K.Sobita Devi leh Dr. P. Bharat Singh te kiang in shawl leh momentoto khat chiat piakdawna banah 40 Consultant Awards, 26 Ningshing Awards leh 13 Special Honours te le piakdawna a nei hi. Governor Dr. Najma Heptulla in a thugenna a chun, Manipuri culture bep masawnna ding hizawlo ah tuhun ah art & culture dinmun te genkhawm ding leh siamhawi thak ding dawi hin a gen a, “ Dance leh music in kipakna leh social, cultural history leh tradition sulang in a gen hi. Chun, khangthak te culture hausakna hiatthiam sak ding leh venbit ding pawimaw in a gen hi.

CM in Behiang ah police station hawnna ding ah nasep pan ding ah hiatsak

Imphal, Sept. 18 *(Nisin Thuhiltu)* : Chief Minister Secretariat, Imphal ah tunio’n Chief Minister N. Biren Singh mapuina’ kum 2017-18 sung ah Government Departments chuamchuam in a chiapi developmental projects ahiloleh scheme te sukpitin theina ding ah panlakna tawh kisai in review meeting a um hi. Zia hun a chun, Chief Minister in a kisaipi official te chu Behiang ah police station hawnna ding tawh kisai ah nasep pan ding in hiatsakna a bawl a, Manipur Police Department nuai ah gari um te dinmun enzui ding leh field visit bawl ding committee khat siamdawk ding ah thupiak neikawm in gari mattheilo ah um zat hiachian ding in a kisaipi te hiatsakna a bawl a, gari siam thak kit thei ding te zawk ding leh siamphat thak thei taklo ding te suksiat leh paimang ding pawimaw in a gen hi. Tuni meeting a chun, Home, Finance, MAHUD, MOBC leh Labour and Employment Departments in a chiapi scheme leh project te nasatak ah genkhawm in a um a, mipi te’n cooking gas/ LPG supply lam ah taksapna a neinau tawh kisai in Chief Minister in CAF & PD official te thil umdan dawtna a nei hi. Chun, a kisaipi official te’n thil umdan taklatna a nei ua, Chief Minister in a kisaipi thuneitu te chu mipi haksatna sukven theina ding ah a vaima theipen ah panla ding in a hiatsak hi. Deputy Chief Minister Y. Joykumar, Health leh Family Welfare Minister L. Jayantakumar, CAF & PD Minister Karam Shyam, MAHUD Minister Th. Shyamkumar, Agriculture Minister V. Hangkhanlian, Social Welfare Minister Nemcha Kipgen, Chief Secretary R.R Rashmi, DGP L.M Khaute, Additional Chief Secretary (Home) Dr. J. Suresh Babu, Administrative Secretaries, Head of Department te Review Meeting in a pang ui.

World Bamboo Day 2017 mang

Imphal, Sept. 18 *(Nisin Thuhiltu)* : Singjamei Community Hall, Imphal ah tuni’n World Bamboo Day 2017 mat in a um hi. Zia hun chu gua (bamboo) matthiam dingdan leh Healthy Environment a um theina ding tawh kisai ah awareness bawlna tawh mat a hi. Hun matna chu Mayor of Imphal Municipal Corporation L. Lokeshwar, Sukumar Haobam, President, Bamboo Forum of India ten khuallian hina tawh a uap ui. 5-Day Exhibition on Bamboo & Cane and Allied Crafts le tuni’n a kipan a, 19th September 2017 ah “Bamboo for Environment, Energy & Employmen” ti thupi mang ah Class V-VIII (Group B) leh Class I-IV (Group A) te ding ah Painting Competition le um ding a hi. Manipur Legislative Assembly Speaker Yumnam Khemchand Patron hina nuai ah World Bamboo Day chu kimang a hi. Hiatthei khat chu, kum 2009 a khah World Bamboo Organisation nuai in Prachan Buri, Thailand cah World Bamboo Day masapen mat in a la um hi.

 

User Rating: 0 / 5

Star InactiveStar InactiveStar InactiveStar InactiveStar Inactive

VPC GHQ Cabinet in Community Hall sakzaw dingdan nasatak ah genkhawm

Lamka, Sept. 16 *(Nisin Thuhiltu)* : Vaiphei People’s Council (VPC), General Headquarter ah vaipaw thak ding ah guat ah um te’n tuni’n VPC GHQ Office, Bethel Veng, New Lamka ah a masapen ding in Cabinet Meeting a nei ui. Meeting chu Khatkhotong Baite, President, VPC GHQ in amapui a, Upa Liankhothang in pauchapna tawh hun hawnna nei in meeting a pan ui. Meeting hun in Agenda chuam chuam genkhawmna a nei ua, a bik tak ah VPC Community Centre Hall sakna, sum taksap ziak sutzawm theilo ah a umna tawh kisai a genkhawm ui. VPC Community Centre Hall sakna sutzawpna ding ah VPC GHQ Cabinet Member zosia’n Rs. 5,000 chiat tuak khawmna le a nei ua, Building Construction Committee in Community Centre Hall sakna a sutzawm ding un thupukna a siam ui. Chun, cabinet member te a lak ah Mr. Mangbeldam, Special Contractor, Mr. Genlal Khaute, Special contractor leh Mr. Lunkhomang Vice President te chu Building Construction Committee member ding ah guatbe in a um ui. Meeting chu VPC GHQ Cabinet Member 25 um lak in mi 2 a absent ua, mi 2 leave la a um ui. Hiatthei khat chu - kum 2017 -2020 sung VPC GHQ President leh Vice President ding telna (election) a chiata August 25, 2017 ni, Kangvai Community Hall ah nei in a um a, September 9, 2017 ni ah Cabinet Member ding guatna a la um hi. Cabinet Member ding ah guat ah um te min leh mawpuakna (portfolio) chu - Khatkhotong Baite, President, Lunkhomang Neihsial, Vice President, Nangzakai Suante, General Secretary, T. Liansong, Joint Secretary, L. Sanga Vaiphei, Secretary (Finance), Manglianpau, Treasurer, Khamneithang Vaiphei, Secretary (Organization); Liankhothang, Secretary (Custom & Culture); Jamsei Baite, Secretary (Judicial); Lesei Vaiphei, Secretary (External); Kapbanyan, Secretary (Statistic); Tongkholam, Secretary (Relief & Rehabilitation); Khuptinlam, Secretary (Information & Publicity) banah Member ding ah Lunneikhup, Mangbeldam, D. Khuala, Khuallianmang, Genlal Khaute, TS Anek Vaiphei, Laltinlian, Jangmang Vaiphei, Dr. Lamkhogen Vaiphei, Lalunkam, Jamliankhup leh Ngamlet Baite te guat a hiu.

Mr T. Lala Vaiphei in UKB kithuapina Rs. 2,20,000 pia

Lingsiphai, Sept. 16 *(Nisin Thuhiltu)* : United Khawzim Brother (UKB) in Churachandpur District Super Division League 2017 ah Champion hina a lak uh tawh kitawn in UKB Board Member te leh Adviser te’n tuni’n Mr T. Lala Vaiphei, Special Contractor vena a nei ui. Zia hun a chun, Mr T. Lala Vaiphei in UKB in Churachandpur District Super Division League 2017 ah Champion hina a lak uh kipakpi mama a hidan taklang kawm in maban ah Winners Cup tournament ah kihel thei ding ah a um uh kipakpi kawm in Winers Cup a kihelhun ua a pawimaw dungzui ah amat ding un panpina Rs. 2,¬¬¬20,000 (lakh-ni leh sing-ni) UKB board te kiang in piakdawna a nei hi. Ziana chung a chun, UKB President H. Sangpi in in T. Lala Vaiphei chung in UKB ngainatute leh a fans te thasik in kipakthu genna a nei hi.

Press Media Workshop on Intensified Mission Indradhanush

Lamka, Sept. 16 *(Nisin Thuhiltu)* : Chief Medical Officer (CMO) leh District Immunization Officer (DIO), CCpur saina in tuni, 16 September 2017 sunnung dak 1:00 a pat in DIO, Immunization Office, IB Road ah Press Media Workshop on Intensified Mission Indradhanush kiti a um hi. Zia hun a chun, Dr. Kim Simte, CMO, Dr VC Pau Tonsing, DFWO/DIO, Veven Manager Cold Chain Management Unit leh DIO staff te’n tuchung Intensified Mission Indradhanush lawtinna ding ah mipi te panlaktheina ding leh hiat ding ah pawimaw te genlatna a nei ui. CMO Dr Kim Simte in naupangte natna a pat venbitna ding leh nauvawp te damtheina a hawizawk sem theina ding ah Intensified Mission Indradhanush patdaw ah um a hidan taklatna nei in, damtheina tawh kisai ah National Program chuam chuam um te lak ah Intensified Mission Indradhanush chu a pawimaw pen in a gen a, a lawtinna ding ah panlak chiat ding pawimaw in a gen hi. Intensified Mission Indradhanush (IMI) ahileh October, 2017 a pat January 2018 sung ah chiapi hiding, ziana ding a chu District sung ah ASHA leh nurse te training piak ah um zing a hidan uh le taklatna a nei hi. Dr VC Pau in Intensified Mission Indradhanush lawtin ding dawina ziak ah Press Media Workshop on Intensified Mission Indradhanush nei ah um a hidan a gen a, Mission Indradhanush kiti 2015 a pat umpanta a hidan taklang kawm in, India government in Intensified Mission Indradhanush chiapina ding ah District 118, City-17 a teldawna, North East ah District 52 te lak ah CCpur district le pang a hidan a gen hi. Veven Manager Cold Chain Management Unit in agenna a chun, India gamsung pumpi ah immunization damdawi vaccine hawpdawna munpi, Government of Medical Store Depot GSMD 4 um a hidan taklang kawm in, GSMD 4 te chu India gamsung ah vaccine supply na tawh kisai enzuitu a hidan uh a gen a, State vaccine store 53, regional vaccine store 110, vaccine store 666 nuai ah PHC/CHC ah vaccine store 2555 um in a gen hi. India gamsung pumpi, vaccine store 26388 um in le a gen a, zia mun a chu refrigerator mang ah vaccine damdawi siatlona ding ah kawitup a hidan a gen hi. hi. CCpur District ah vaccine store tawh kisai a genna a chun, District sung ah District Hospital panna PHC/CHC Saikot, Singngat, Sagang, Behiang, Sinzawl, Thanlon leh Parbung ah Vaccine store um in a gen a, zia a pat chu vaccine carrier mang ah immunization bawl ah um sek hin a taklang hi.

Thalai Week matna ding ah sport bawl
Lamka, Sept. 16 *(Nisin Thuhiltu)* : Evangelical Free Church of India (EFCI), Rengkai kochuam ah Kristien Thalai Pawl (KTP) in October hapta masa leh Thalai Week mat ding ah guanggalna a neina chung ua kihelna chi chuam chuam a pat uh chu tuni’n le a sunzawm ua, Pastor David Ralsun, Bialtu Pastor in hun hawnna nei in,numei leh pawsal- Football, Volleyball, Badminton, Marathon, Tug-O-War, High Jump ti te ah kidemna a nei ui. Football leh Volleyball Final kihelna a hileh Thalai Week hun ah um ding a hi. Chun, Thalai Week matna ding tawh kisai ah KTP Idol leh KTP Band kidemna le um, Idol ah mi 26 leh Band 6 kidemna chiatha zing hin a kigen hi.

Freshers’ Meet-cum-Felicitation Program 2017
Lamka, Sept. 16 *(Nisin Thuhiltu)* : Hmar Students’ Association (HSA) Churachandpur College Unit in tuni, September 16, 2017 sunma dak 1:30 a pat in VTI Auditorium, Muolhlum, Rengkai ah Freshers’ Meet-cum-Felicitation Program 2017 a mang hi. Zia hun chu Lalhmangpui Fimate, MDC, 6 Parbung ADCC in Chief Guest hina tawh a uap a, Mangkhanthang Simte, Second in Command, 54th Battalion, BSF in Guest of Honor hina tawh uap in, Debory Fimsangpui, CEO, Arcadia School, Molnom in Functional President hina tawh a uap hi. Chun, HSA Joint Headquarter, Churachandpur leh Imphal, Rayburn Unit, MZP Churachandpur College Branch, TKSU Churachandpur College Unit, SSPP Churachandpur College Unit leh GSO Churachandpur College Unit te’n Special Guest hina tawh a uap ui. Zia hun a chun, Hmar Students’ Association (HSA) Churachandpur College Unit nuai ah Education Department te mapuina nuai ah prize chuam chuam hawp in a um a, Mister leh Miss HSA Churachandpur College Unit telna le a um hi. Chuleh, khuallian ah pang ten thugenna a nei ua, student te zilna lam ngaikhawk dingdan tawh kisai ah a ngaidan uh leh a dawidan teu genlatna a nei ui.

District First Division Football League 2017 kipan

Lamka, Sept. 16 *(Nisin Thuhiltu)* : Churachandpur District Sports Association (CDSA) saina nuai ah (Late) Khaikhanlian Memorial District First Division Football League 2017 Opening Ceremony tuni, September 16, 2017 sun dak 12:00 in Peace Ground, Tuibuang ah a um hi. Zia hun chu, Seilenmang Khongsai, EM ADC Churachandpur in Chief Guest hina tawh a uap a, Michael Ginzasuan, District Supply Officer, Churachandpur in Guest of Honor hina tawh uap in, Hemkholun Doungel, Co-ordinator, NYK Churachandpur leh Chief of Saihenjang in Functional President hina tawh a uap hi. Chun, John Deng-te nu-pan leh a chapau Lianminthang te’n League Donor hina tawh hun matna a uap ui. Hun matna chu, James Thangluai, Vice President, CDSA in amapi a, Pastor H. Laithang in pauchapna tawh hun hawnna nei in, Donor te a pat thugenna a um a, guest chuam chuam te’n thugenna a nei nung un, Chief Guest Seilenmang in thugenna nei in (Late) Khaikhanlian Memorial District First Division Football League 2017 kick-off a bawl hi. Tuni Opening Match in Ganggam Soccer Club (GSC) leh Neihsiel Veng Youth Club (NVYC) te a kihel ua, GSC in 4 – 1 in gualzawna a chang hi. Second Match ah First IRB leh Churachandpur Police te a kihel ui. District First Division Football League 2017 ah First Division Team 20 a pang ua, zia chu Pool 4 in a kikhen hi.

25th Assam Rifle saina Mass Social Awareness

Lamka, Sept. 16 *(Nisin Thuhiltu)* : 25th Assam Rifle saina nuai ah tuni’n SDO Block Office, Sangaikot ah Government Scheme chuamchuam um te tawh kisai in Mass Social Awareness a um hi. Awareness programme hawnna hun chu Khaopao Haokip, Chairman, ADC Churachandpur in Chief Guest hina tawh a uap a, Josanglur Joute, SDO Sangaikot in Special Guest hina tawh uap in, Major Besrilal in hun matna amapui hi. Chief Guest Khaipao in a thugenna a chun, Brigadier Ajay Kumar, 27 Sector Assam Rifle mapuina nuai ah Awareness programme chuam chuam chiapi a hina chung ah mi tamtak in phatchuampi a hidan uh genkawm in 25th Assam Rifle te panlakna chu pakcha mama hin a gen a, ziagual programme chu phatchuampi ding dan leh dan leh thupiak enzui tawh kal siamhawi ding pawimaw in a gen hi. Special Guest Josanglur in a thugenna a chun, ama etkawl Block sung ah ziagual programme organized ah a um chu kipak mama a hidan taklang kawm in, Assam Rifle te panlakna chu pakcha mama hin a gen a, ziagual Awareness hun matna chu bailsung ah um tamlo a hina chung ah bial mipi’n a phatchuampi ding uh kinem a hidan a gen hi. Colonel Mithun, CO 26 Assam Rifle in huntawp ah kipakthu genna nei in Awareness hawnna programme a khak ui. Awareness programme hun sung in Suvigya Cell, SBI leh AXIS Bank Extension Counter, Army Welfare Education Scheme (AWES), CDS Extension Counter banah, Medical Camp nei in a um a, Medical camp ah Specialist Doctor 9 te’n natna chuam chuam neite etna a nei bak un a thawn in a kituakpi ding uh damdawi piakna a nei ui. Counter chuam chuam um te lak in Suvigya Cell chu a luun mama a, zia counter chu pensioner te’n a pension sum uh a dik tak ah a mu leh mulo uh et (check) piakna a hi. Army Welfare Education Scheme ahileh Army a sem leh pension sa, a chateu school kai nalai umte ding ah scheme a hia, a hiachian nuam te zia hun a chu thil umdan genchian piak leh hiathiam sak a hiu.

Army recruitment rally ah pang nuam te ding ah training chiatha zing

Lamka, Sept. 16 *(Nisin Thuhiltu)* : Leimakhong, Kangpokpi district ah October tha leh Indian Army recruitment rally a umna ding tawh kisai ah Indian Army ah pangnuam khangthak te ding in Assam Riffle camp Tuibong in trainning a chiatha zing hi. Zia trainning ah pang te chu Assam Riffle, Churachandpur battalion in recruitment rally hun ah panlak ding dan tawh kisai in ziltilna a nei ua, khangthak Indian army ah pangnuam mi 100 training in a pang ui. Training ahileh, July 3 ah a pat uh hita a hia, zingkal dak 6 a pat physical training nei in, sunma dak 10 a pat theory class a neisek ui.

YPA New Lamka Block in kum 36 tinna mang
Lamka, Sept. 16 *(Nisin Thuhiltu)* : Young Paite Association (YPA) New Lamka Block in tuni’n YPA Hall, New Lamka ah YPA New Lamka Block dindaw a hi nung kum 36 tinna a mang hi. Zia hun a chun, YPA New Lamka Block nuai ah Unit 12 a pat lawiupa te leh YPA GHQ a pat lawiupa te uapna tawh S Manlian, President, YPA New Lamka Block in YPA flag kai palna a nei hi. Paumuanlal Guite, Assistant Secretary in hun matna a mapui a, department chuam chuam te a pat report piakna a um hi. S. Manlian Block President in a thugenna a chun, lawiupa masa te kukalna, gin-umna leh lemhiatna ziak ah tuni tiang ah YPA masawn zing thei a hidan genkawm in, YPA Block, Unit zosia OB Executive, Val Upa, Vengsung Nu leh Pa, Nungak Tangval te tilkhona nei in, nam leh gam sung ah identity, Culture leh Literature kawltup tu hina kihiatdaw thak ding pawimaw in a gen a, kum 36 tinna mat ah um chu, kihepina, kilainatna tuntu a hiding a nawp thu a gen hi. Chuleh, YPA thupi hemillo a, damtheina, thianthona, chaga leh liangvai te hiamillo ah a zawng a hau liangvaite leh panpi ngaite kingakna kham ting ding ah Unit tin in mawpuakna nei chiat a hidan taklang in, thudik dinpi ngam ding leh Nam a ding ah kingakna taak ting ah Block, Unit te a um ding pawimaw in a gen hi.

State Govt. in state sung ah good governance a um sak theilo ahileh govt. in umzia neilo: Chief Minister

Imphal, Sept. 16 *(Nisin Thuhiltu)* : Cabinet Hall ah Manipur Chief Minister N. Biren Singh mapuina tuni’n government departments chuam chuam in a chiapi projects/scheme te dinmun tawh kisai in review meeting a um hi. Department 14 ah official te panna tu financial year 2017-18 sung ah developmental projects ahiloleh scheme zawthian ah um ding te dinmun tawh kisai genkhawmna a um hi. Meeting hun ah Chief Minister in state khantona ding ah public oriented developmental work te ngaikhawk ding pawimaw in a gen a, government in state sung ah migenthei te phatchuampi thei ding ah panlakna a neilo a, good governance a um sak theilo ahileh government in umzia neilo hin a gen hi. Information Technology (IT) department nuai ah scheme chiapi ah um te dinmun tawh kisai genkhawm hun ah Chief Minister in a genna a chun, IT kiti chu Prime Minister Narendra Modi, priority list a pang a hidan taklang kawm in Information Technology bei ah state sung ah digital revolution umtheilo ding hin a gen hi. State sung ah Common Service Centres (CSCs) te chu welfare schemes chuam chuam te ding ah service points a hiding uh pawimaw a hidan gen in mipi te panpi nuam Nationalised bank te chu hill areas ah bank branch hawnna ding ah lemchang piak masat hiding in a gen hi. Review Meeting hun sung a chun, IT, TA & Hills, Tourism, Higher & Technical Education, School Education, YAS, SCERT, Health, Revenue etc nuai ah panlakna um te genkhawm in a um a, digital village umsak ding dan, cadastral maps chungchang, teachers recruitment tawh kisai ah thuneina hawp khen ding, transparent leh automated transfer policy etc. te le genkhawm na’n a pang hi. Zia meeting a chun, Cabinet Ministers, Chief Secretary, Administrative Secretaries, Commissioners leh departments chuam chuam ah Directors te a pang ui.

CM mapuina’ State Level Mera Houchongba Festival mat dingdan genkhawm
Imphal, Sept. 16 *(Nisin Thuhiltu)* : Chief Minister N. Biren Singh chairman hina nuai ah tuni’n 5th October, 2017 leh Mera Houchongba matna ding tawh kisai in 1st State Level Organising Committee meeting a um hi. Meeting hun ah Chief Minister in Mera Houchongba chu khawvel ah festivals luipen a hina chung ah State Level ah mat ding ah lemsakna um a hidan taklang kawm in, state sung ah community chuam chuam te kal ah chamna leh kituakna tuntu a hiding a nawp thu a gen hi. Zia gual festival kimatna a pat chu community chuam chuam te kipumkhatna, chamna leh muanna a thak ah siamhawi ding ah ginchatna nei a hidan le taklang kawm in, Mera Houchongba in political system, economic y, kipumkhatna siam hawi ding hin a gen hi. Deputy Commissioner te chu festival uap ding te a ding ah transportation kituptak ah arrange bawl ding in a hiatsak hi. State Level Mera Houchongba Festival Committee member te a hiuleh Chairman- Chief Minister ; Vice Chairman- Minister for Art and Culture; Member Secretary - Commissioner Art and Culture; Member ding ah Cabinet Minister, MLA, DC zosia leh Director (Art and Culture, TA & Hills, IPR), Sana Konung Thousillupa pat palai 7, Sanamahi Temple Board a pat palai 2 leh Kangla Fort Board te a pat palai 2 te a hiu. Minister for Art and Culture L. Jayantakumar Singh, Chief Secretary R.R Rashmi, Commissioner Art and Culture M. Lakshmikumar, Deputy Commissioners, Director Art & Culture Dr K Sushila, Director IPR K. Meghachandra, Sana Konung Thousillup leh Sanamahi Temple Board palai te’n tuni meeting chu a uap ui.

AMWJU in 43rd Foundation Day mang

Imphal, Sept. 16 *(Nisin Thuhiltu)* : All Manipur Working Journalists’ Union in tuni’n Manipur Press Club ah 43rd Foundation Day a mang hi. Zia hun chu Information and Public Relation Minister Thongam Biswajit Singh, Law Minister L. Jayenta, Konthoujam A/C MLA Dr Sapam Ranjan Singh, AMWJU president Wangkhemcha Shamjai te’n khuallian hina tawh a uap ui. Minister Thongam Biswajit Singh in a thugenna a chun, public leh government kal ah journalist te chu mediator a hidan uh a gen a, journalistic principle nei tak ah media person te’n panlakna a nei ding uh pawimaw hin a gen hi. Chun, mipi te’n Government scheme -Pradhan Mantri Awaj Yojana, Unnat Jyoti by Affordable LEDs (UJALA), Pradhan Mantri Ujjwala Yojana (PMUY) etc a hiatthiam theina ding ua media persons te chu awareness thezaktu ah a pan ding uh a nawp thu a gen hi. Tu ah state government in government masa’n a hawn schemes leh projects te bep a buaipi a hi ti ah gen leh sak um te a dawnhuna a chun, a process sutzawm ah um zing a hidan a gen a, tu ah government sukpitinlo project um te sukpitin ding dawi ah panla hin a gen hi.

Page 1 of 13