Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

District thak te panna district zosia DIO Office kituptak ah a um ding pawimaw: IPR Minister

Imphal, Aug. 05 *(Nisin Thuhiltu)*: Information and Public Relations Minister Thongam Biswajit Singh in New Secretariat Conference Hall ah tuni’n IPR Department ah official te monthly review meeting a neipi a, department official te man-power, infrastructure leh equipments siam hawi thakna ding ah panla chiat ding in chialna a bawl hi. A kisaipi thuneitu te chu a pawimaw gari chawkna ding ah proposal pelut ding in hiatsakna a bawl a, District kisiam dawk thak te panna District zosia District Information Office kituptak ah a um ding pawimaw hin a gen hi. Department in DIO office um nailona mun ah office hawn a hitheina ding ah panlakna a nei ding pawimaw in le a gen a, a pawimaw leh office buildings luathaw (rented) ah hawn ding hin a gen hi. District Information Office hawn a hitak leh a pawimaw staff ding lak hiding leh kituptak ah office a function theina ding ah panlak hiding a hidan gen in, social media matkhial khak a phatlo dan tawh kisai ah awareness chiapi ding pawimaw a hidan a gen hi.DIO Tamenglong office gam kekneu piak ah a umna tawh kisai in department official te chu land leh plots record kituptak kawi ding ah hiatsakna bawl in, department nuai ah publication section chu a hun tak ah department’s annual calendar leh diary published bawl ding in hiatsakna a bawl hi. Zia meeting chu IPR Commissioner K Radhakumar Singh, Director Meghachandra Kongbam, Deputy Secretary Maibam Kamala, Deputy Secretary Ch.Sachi Devi, APO (P) leh District zosia DIO te’n a uap ui.

India Vice-President thak ding Venkaiah Naidu

New Delhi, Aug. 5 *(Nisin Thuhiltu)*: India Vice President thak ding telna (election) tuni’n a um a, 13th Vice-President of India ding ah Muppavarapu Venkaiah Naidu teltin in a um hi. Tuzing kal lam ah vote khiak ah um, nitak nung ah election result puan ngal a hi. Election result dungzui ah M. Venkaiah Naidu in total votes 760 um lak in vote 516 a mu, a ki tetpi Opposition candidate Gopalkrishna Gandhi in vote 244 bep a mui. Tuchung ah Vice President elections ah vote kikhia chu highest polling percentage 98.12% hi ah tepte in a um a, vote khelo MP 14 a um hi. Hiatthei khat chu kum 2007 ah vice presidential election ah incumbent Hamid Ansari teltin a hi hun a khan, Hamid Ansari in vote 456, Najma Heptullah in 222 votes leh Rashid Masood in vote 75 a mu, kum 2012 polls a khan Mr Ansari in vote 490 leh NDA nominee Jaswant Singh in vote 238 a la mui.

Khawpi sukthianna Mass drive nei

Lamka, Aug. 5 *(Nisin Thuhiltu)* : District Administration mapuina nuai ah tuni’n Village Authority (VA), Philanthropic Organization leh district mipi kitua in khawpi sung ah Cleanliness drive nei in a suthiang u’i. Khawpi sung sukthianna ding ah District Administration in sector 4 - A, B, C leh D ah khen in Sector A (New Bazaar Area a pat Lanva kikal) chu DFO Churachandpur mawpuakna nuai ah kawi a hia, Sector B (Zenhang Lamka, Rengkai Area a pat Sielmat Lei kikal) chu CEO ADC in maw a pua, Sector C (Forest Gate a pat Sielmat Lei kikal) chu SP Churachandpur in mawpua in Sector D (Hiangtam Lamka a pat Pearsonmun kikal) chu DC Churachandpur mawpuakna nuai ah kawi a hi. Sector chuam chuam te chu mun chuam chuam ah kingak khawm in a area chiat ua mass social work a nei ua, zia hun a chun lampi a nîn leh nulla te suthiang in lampi kuakna munte ah lei a sun ban ua hampa a hitthiang u’i. Social work nei hun sung ah nîn lawm te chu ADC Sanitation truck in dawlkhawm in nîn paina mun in a va bawthai. Social work nei hun sung ah dawr kâi te’n dawr khak ah mani dawr mai chiat sukthian ding ti ah thusua bawl himaleh a hun tak ah dawr kikhak mu ding a umlo banah lampi dung ah mezuak um in, lampi ah gari tai vel a tam takluat ziak in nasem te a ding in buai um mama hi’n a kigen a, district in thianthona leh kithumat tuana tasam mama nalai hi’n nasem tu te’n a gen u’i. Cleanliness drive nei hun a chun mi sîng a sim a pang ua, gamsung thiangthona ding ah district mipi’n kituapina hawitak a piak na chung ah Shyam Lal Poonia, IAS, DC CCpur in kipakthu a puang a, gamsung a thianthona leh a nawpna ding ah maban a le mipite’n panla ah mani hitheina chiat ah thiangthona umsak zing ding inle dawtna leh chialna a bawl hi.
NT 06august2017b

DSO in thusua chuam chuam bawl
Lamka, Aug. 5 *(Nisin Thuhiltu)* : District Supply Officer (DSO), Churachandpur in thusua a bawlna a chun, National Food Security Act nuai ah Ration Card zosia Aadhaar tawh kizawp sakna nasep chu DSO Office ah chiatha zing hi’n a taklang a, Ration Card nei thei ding himaleh a nei nailo te a ding ah min khumna leh min diklo zosia sukdik sak thei hi ah taklang kawm in zia na ding a chun office ah application lakthei ding hi’n a gen hi. Thusua dang khat a chun, Henglep A/C sung ah lakthak a um Rationing Agent leh SK Oil Sub-Dealer te kiang in a hung tung ding August 7, 2017 sunma dak 10:30 leh District Training Centre, Tuibong ah TT Haokip, MLA Henglep A/C leh Chairman, Hill Areas Committee (HAC) tawh meeting um ding hi ah puang kawm in zia hun a chun Henglep A/C a pat Rationing Agent leh SK Oil Sub-Dealer te pang kim ding in le a hiatsak hi. M. Ginzasuan, DSO/ CCPur in thusua a bawl dang khat in a taklatna a chun, SK Oil Sub-Dealer te’n Identity Card chawi ah Advice List dungzui in Dealer te kiang ah lathei ding a hiu a, zia tawh kitawn a chun, Singngat A/C leh Henglep A/C ah Sl. No. 30 a pat 46 kikal te’n M/S JHK Agency a pat, Saikot A/C te’n M/S S. Pudaite a pat, Churachandpur A/C te’n M/S ZT & Co. a pat, Henglep A/C ah Sl. No. 1 a pat 39 te’n M/S BB & Co a pat banah Parbung A/C, Thanlon A/C lehHenglep A/C ah Sl. No. 47 a pat 57 kikal te’n Pudaite Traders a pat lathei ding a hiu.

ME News suaklo di
Lamka, Aug. 5 *(Nisin Thuhiltu)* : Manipur Express a Helper-cum-Printer Trainee ah sem zing, N. Nengkhuallian (22) s/o N. Gouthang of Bungmual, Colony Veng chu tuni zing kal ah damlona ziak in mualliam a, zia tawh kitawn a chun sûnna leh zana suklatna in khawvel hinna Manipur Express August 6, 2017 (Sunday) issue suaklo ding hi’n Editor in thusua a bawlna a chun a taklang a, a mualliamna chung ah sûn thu le puang kawm in a nutsia a innsungmite thuakpi hi’n le a taklang hi.

Video Album hawnna leh latna nei

Lamka, Aug. 5 *(Nisin Thuhiltu)* : Laldavid Samte in phamta a nu leh pa hiat zing na ding ah Gospel music video Album a bawl, ‘Honpi Zel In’ kiti chu tuni’n Rayburn Presbyterian Church, New Lamka ah Rev Khen P Tombing, Chief Coordinator, PCI-R in a hawnna leh latna nei a hi. Zia hun a chun, album bawltu Laldavid Samte, Pator Kamchinthang, Local Pastor, Singngat banah gennawp nei khenkhat in thugenna hun a mang u’i. ‘Honpi Zel In’ album ah lâte a hileh Phamta Kamkhogin Samte in a phuak a hia, Felina Chiinhauching in a produced banah Mary Zou, Mr & Mrs Pautheinmoi, Sawmi Hauzel leh Kimneu te’n a co-sponsored uh a hi. Album a chun lâ 11 a um a, zia te ah music chhu Lalsiam Guite leh Siam T Paite te’n a bawl uh a hi banah Lalsiam Guite in Videography leh editing a bawl a hi.

ZRO in pauchap piak ding ah dawn
Lamka, Aug. 5 *(Nisin Thuhiltu)* : Zomi Re-Unification Organization (ZRO) in tuni thusua a bawlna a chun Kochuam puitute, Upa leh mipi te kiang ah pauchapna ah kithuapi ding in a dawn hi. A hung tung ding August 9 leh pawlpi kikhaikhawmna, United People’s Front (UPF) in government tawh kihona, a 3veina ding Tripartite Political Dialogue ah kalsuan ding a hina ah zia hun chu lawting tak ah zaw a hitheina ding ah pauchap piak ding in a dawn hi. Pathian in organization a mapui dan te leh government in kihona ngaikhawk ah zia ding tawh kisai ah interlocutor 1 guat ta a hina ah chung ah kipakthu gen ding in a chial a, dialogue ah pang ding UPF/ KNO leader te a ding ah dawt piak ding in le chialna a bawl hi. Chun, kihona ah kilang leh kilanglo ah pang kha zosia a ding a le pauchap piak ding ah dawn kawm in gamsung ah chamna leh muanna a um theina ding ah Pathian kiang ah dawn ding in le a ngek hi.

NSS in college suthiang
Lamka, Aug. 5 *(Nisin Thuhiltu)*: National Service Scheme (NSS) Rayburn College unit in social work nei in college huangsung sukthianna a nei u’i. Central government in August 1-15 sung Swatchhta Pakhwada Forthnight ah mang in Government office, Private school, college leh institution te sukthian ding ah thupiak a nei tawh kitawn in Rayburn College NSS Unit in le tuni zingkal in amau college huangsung a suk thian uh a hia, zia hun a chun NSS tamtak a pang ui.

Dept chuam chuam in office suthiang
Lamka, Aug. 5 *(Nisin Thuhiltu)*: August 15 leh Independence Day lawpna ding tawh kisai ah District Administration in CCpur district sung ah Government Department zosia’n amau office chiat ah Cleanliness Drive nei ding ti ah a hiatsak tawh kitawn in department chuam chuam in Cleanliness Drive a nei ua, tuni’n le district sung ah government department chuam chuam in amau office huangsung sukthianna a nei ban ua office sung leh pua rawng a nu u’i. Government Department zosia’n amau office chiat ah Cleanliness Drive a nei uh chu a hung tung ding August 10 leh district administration in etthâknei ding a hia, August 15 leh office thiangthopen 3 te kiang ah kipakman piak hi ding a hi.

Damlote kithuapina ding lut zing

Lamka, Aug. 5 *(Nisin Thuhiltu)*: Henglep bial a pat damlona ziak ah District Hospital kitut te emkawl leh nek leh chak buaipi, Kuki Khanglai Lompi (KKL) khut ah tuni’n le mimal leh pawl chuam chuam a pat panpina a lut hi. Bethel International Mission, Rengkai Road a pat Pastor David Ralsun malatna in naupang te’n KKL Complex pha in KKL lawi upate tawh holimna saulo a nei zaw ua District Hospital leh Youth Hostel ah damlote kiang ah muamthum hawm in hun a matpi ui. Kuki Film Development Corporation (KFDC) in le tuni’n damlote a ding ti’n KKL khut ah ann-chang leh allu bag 1 gel banah vawksa a piau hi. Henglep bial a pat damlo etkawl a umte chu tuni tiang in tamtak discharge a hitau a, tu hin damlo 48 leh a umpi te pang in mi 100 val a um nalai ua, khenkhat te chule discharge thei ding dinmun in a um u’i. Damloute etkawlna tawh kisai ah KKL in Unit chuam chuam te kiang ah mawpuakna pia in Unit te’n zingkal-nitak ah nek leh chak ding a bawl piak ban un a pawimaw dan zil ah damlo te a pua vel sek u’i. Zia kawmkal a chun, damlo te panpina ding ti’n Kuki Khanglai Lawmpi (KKL) D Phailien Unit inntekna nuai ah Charity Musical Road Show nei in a um a, Charity Musical Road Show a pang ding te KKL Complex, IB Road ah kingak khawm in KKL GHQ President Kamthang in a thakdawna a nei hi. Zia hun a chun, district sung ah lasathiam - Lalparzo Sanate, Grace Ngaihching, Bliss Lhingboi, Daniel Gangte, B Muan Ngaihte, Muan Hangzo banah lasathiam dang hunkhawp a pang ua, Tedim Road Bethel/Khawmawi a pat kipan in lampi dung mun chuam chuam Tuibong Bazar, Old Bazar, Nehru Marg Junction banah Rengkai ah Musical Show a nei ui. Charity Musical Road nei hun sung ah pawl leh mimal chuam chuam in amau kiphal dan zil in damlo te a ding ah panpina sum a piau hi.

KKP in lampi siampha

Lamka, Aug. 5 *(Nisin Thuhiltu)*: Khristian Khanglai Pawl (KKP), Tuithanak Presbytery in Fund Raise na ding in tuni zingkal in Tangmual tawh Lingsiphai kikal Tedim Road siatna te siampha in gari taivelte a pat kiphal dan dan in sum a dawk u’i. Khanglai Pawl in luiguam a pat suang chawmkhawm in lampi siatna mun in a sung ua, a chung ah Ballu Single a sungkit ui. Tangmual tawh Lingsiphai kikal lampi a hileh se mama in gari ah tai lumlet te, a diak ah gari neu mang te a ding ah buai um mama in chûk hun ah buanthuak leh khâl hun ah leivui a a um sek hi.

Morgue ah lengkhawpna um zing
Lamka, Aug. 5 *(Nisin Thuhiltu)*: Sawisak lup ah a la um, Thangkhanlun Taitom (30) s/o T Pumhang of Sahei Road, Vengnuam, New Lamka in India dân tawh kituak ah thutanna dik a chang ding dawina leh tualthana ah kigawl te matdaw ding phutna leh dawtna a nei uh a lawtin machan morgue a pat a luang lakdaw hilo ding ti ah JAC Against Killing of T. Thangkhanlun (JAC AKT) in a puan tawh kitawn in morgue ah sûnna in lengkhawpna a um zing a, a chiata July 28 a pat Simte Youth Organization, General Headquarter mapuina nuai ah lengkhawpna chu nei a hi zing hi.

Myanmar mi khat Kakching ah kiman
Imphal, Aug 5 *(Nisin Thuhiltu)*: Passport leh gamdang ah lut theina lekha neilo ti a ngawna bawl in tuni’n Manipur Police te’n Kakching ah Myanmar mi khat ala man ui. Mat ah um Myanmar mi chu Mohammad Abdul Hussain ahi ti’n a kigen a, Kakching taw kinai Pallel check post ah zani tak ah kiman ahi dan police thusua chun a gen hi. Mat ah um pa puak lai Myanmarese dangka India sum ah Rs 47,000 le a man khawm ui.

Manipur CM in Vientiane khawpi Lao PDR zuan

Imphal, Aug. 5 *(Nisin Thuhiltu)*: Vientiane, capital Lao PDR ah 25th Anniversary of ASEAN-India Dialogue Relations Celebration uap ding in Manipur Chief Minister N. Biren Singh in tuni’n Imphal a nusia hi. 25th Anniversary of ASEAN-India Dialogue Relations Celebration chu August 7, 2017 leh Muong Thani Hotel, Lao PDR ah um ding a hia, Chief Minister in Special Guest hina tawh hun matna uap ding leh keynote address bawl ding a hi. Advisor to CM Rajat Sethi in le Chief Minister chu a zui hi. Zia event chu National Chamber of Commerce and Industry (LNCCI) of Lao PDR in support bawlna nuai ah ASEAN India Business Council (AIBC), Lao PDR Chapter leh Embassy of Republic of India, Lao PDR in joint ah organized a bawl a hi.

SSC CGL 2016 final result puan hita
New Delhi, Aug. 05 *(Nisin Thuhiltu)*: Staff Selection Commission (SSC) nuai ah Combined Graduate Level Examination, 2016, final result puan in a um hi. Zia ah lawtinna nei te chu Assistant Audit Officer, Junior Statistical Officer leh Posts dang dang ah sem ding a hiu. Result a hileh official website ssc.nic.in ah et thei ding a hi.

Education Minister in ACI Freshers’ Meet uap
Senapati, Aug. 05 *(Nisin Thuhiltu)*: Manipur Education, Labour & Employment Minister Thokchom Radeshyam Singh leh Minister of PHED, Printing & Stationery in khuallian hina tawh Asufii Christian Institutes (ACI), 7th Freshers’ Meet matna a uap hi. ACI Chapal Hall, Mao Gate ah 7th Freshers’ Meet chu mat a hia, Kholi, Board Member, Chairman, Asufii Christian Institutes (ACI), SDPO, Mao Gate Semi Ramror te’n le hun matna a uap ui. Asufii Christian Institutes (ACI) founder te lak ah khat Minister Dikho in muakna thucha genna a nei a, Minister Radheshyam hinkhua a pat khangthak te’n kipiakzawna, gin umna ti te zildaw thei a hidan gen in, student te tilkhona a nei hi. Minister Radeshyam in a thugenna a chun, freshers’ meet uap tu te pakcha kawm in, ACI chu holy temple pawimaw mama khat a hidan gen in, class chuam chuam te thiamzilna mun a hidan a gen a, Hindus te temple a chia, Christian te Biak-inn ah chia, Muslim te masjid ah chia sek maleu student class, caste, religion chuam chuam te hinna a bitna ding, chamna leh muanna a um theina ding banah society a khanto theina ding ah mun khat ah zilkhawm a hidan uh a gen hi. Chun, maban ah student te panlak ding dan tawh kisai in le ziltilna thu a gen a, Minister Dikho le ACI founder leh Board members khat ah a panna chung ah pakcha mama a hidan a gen hi. ACI Freshers’s Meet hun sung a chun, laa, choreography, Board member te a pat thugenna etc l a um hi. ACI ahileh January 4, 2017 a khah Manipur University tawh affiliate kibawl a hia, UGC in section 2(F) and 12(B) of the UGC Act 1956 tawh kituak ah July 11, 2017 a khah recognition piak a hi.

Medicinal Plant te Life Saving Drugs a hi: Health Minister

Imphal, Aug. 5 *(Nisin Thuhiltu)*: Directorate of Ayush, Manipur nuai ah Manipur State Medicinal Plant Board saina’ tuni’n Old Secretariat Building, Minister Office Chamber ah Prize Distribution Ceremony a um a, zia hun a chun, Manipur Health and Family Welfare Minister L. Jayantakumar Singh in Prize piakdawna a nei hi. A ma’n a thugenna a chun, ni dang ah medicinal plants te tuhun ah le pawimaw zing nalai a hidan gen in Medicinal Plants te chu Life Saving Drugs a hi ti’n a gen hi. Prize hawp ah um te chu tunaicha Manipur State Medicinal Plant Board in Drawing, Speech, Recitation & Essay Writing competition a saina’ ah a chungchuang diak te kiang ah piak a hia, Cash Prize leh Citations piak a hiu. Zia hun matna chu Dr A. Guneshwor Sharma, Director AYUSH leh Rk. Romesh Singh, Secretary Foundation of Development for Society, Keisamthong Top Leirak, Imphal te’n le a uap ui.

Manipur leipek humbitna ding ah community zosia pankhawm ngai: AMUCO

Imphal, Aug. 5 *(Nisin Thuhiltu)*: All Manipur United Clubs Organisation (AMUCO) in Manipur leipek humbitna ding ah ah chêng namtin te pankhawm pawimaw hi’n a gen hi. Zani, Manipur Dramatic Union Hall ah 20th Manipur Integrity Day matna hun a chun, AMUCO President, Ph. Devan in a chiata 1997 kum ah Govt of India leh NSCN (IM) in ceasefire agreement suai a kai dawilo suklatna ah mipi’n kiphinna a la nei chu genlang kawm in India nuai ah Manipur a um a pat a mipite’n haksatna tuak pan uh hi’n a la gen hi. AFSPA leh centre's Divide & Rule Policy nuai ah phaicham leh thingtangmite kal ah kihiatthiamlona piang hi’n le a ngaw a, state ah resource te lakdaw theina ding ah government in Multi-national company te tawh kinawptuana suai kai uh hi’n le a gen hi. Chun, Manipur leipek humbitna ding ah Meitei, Naga, Kuki leh Pangal te kilungtuak tak ah pankhawm ngai hi’n le a gen hi.

Aug 1 a pat World Breast Feeding Week

Imphal, Aug. 5 *(Nisin Thuhiltu)*: August 1 a pat kipan World Breast Feeding week tawh kizawi tawn in tuni’n Keishamthong Kabui Village Community Hall ah Breast Feeding tawh kisai ah seminar nei in a um hi. Ministry of Women and Child development in Department of Social Welfare tawh kithua in Manipur sung mun chuam chuam ah Breast Feeding Week matna chu ‘Sustaining Breast Feeding Together World Breast Feeding week’ ti thupi tawh a sai u’i. Tuni ah hun matna a chun, L.S Wallang in nausen a ding ah nawitui phatchuam dan genna a nei hi.

CM in Vistarak Campaign hawnna nei

Imphal, Aug. 5 *(Nisin Thuhiltu)*: Mipi te tawh direct contact um theina tup ziak ah patdaw ah um, Vistarak campaign chu tuni’n Chief Minister Nongthombam Biren in Nityaipat Chuthek ah party office ah hawnna a nei a, Vistarak volunteer 30 chuanna gari 20 te chu le flagged off a bawl hi. Zia hun ah chief minister in a genna a chun, volunteer te chun assembly constituency zosia ah polling booth 2,794 te chu vê tha ding leh Pandit Deendayal Upadhay thuhil te puangzâk ding uh hi’n a gen a, Narendra Modi Government in kum 3 sung leh state Government in ni 100 sung ah a sepdaw te tangkopi ding uh hi’n le a gen hi. Campaign a hileh Pandit Deendayal Upadhyay pianchampha kum 100 tin hiat zingna ding ah sai a hia, ama a hileh Rashtriya Swayamsevak Sang (RSS) leader pawimaw tak khat a la hi. Campaign hawnna hun chu Works Minister, Thongam Bishwajit leh BJP leader hunkhawp te’n le a uap u’i.

Hueiyen Lanpao news in Legal Notice mu
Imphal, Aug.5 *(Nisin Thuhiltu)*: Imphal based daily newspaper Hueiyen Lanpao, Manipuri Edition ah “Raksha Bandhan Pangthokkadouri” matna ding tawh kisai diklo tak ah sua ah a um ziak in Government of Manipur in tuni’n Legal-cum-Demand notice a sua a, zia dungzui a chu Hueiyen Lanpao in hilchianna a piak ding ti a hi.

Food supplement packet sung ah khaulang kimu
Imphal, Aug.5 *(Nisin Thuhiltu)* : Social Welfare Director, Jacintha Lazarus leh official te’n tuni’n Ghari, Imphal ah food supplement packet khenkhat ah kaulang (cockroaches) um ah gen a hina chung in spot enquiry bawlna a nei ua, zia hun a chun, official team in supplementary food packets te kituptak ah etchilna nei in, beneficiary te le a kiholimpi ui. Social Welfare Director, Jacintha Lazarus in thuthak lakhawm mite kiang ah thil umdan a genna a chun, Imphal West Food Safety Department in test a bawl ding ah samples thawt ah um hin a gen a, Ghari area ah food supplement packet hawpna le chawlsak ah um hin a gen hi. Chuleh, Social Welfare Minister Nemcha Kipgen in le ziagual thil report um chu ngaikhawk mama a hidan a gen hi. Press meet chu Food Safety Officer Dinesh Singh, AISF student body leh a kisaipi official te’n le a uap ui.

User Rating: 0 / 5

Star InactiveStar InactiveStar InactiveStar InactiveStar Inactive

Tipaimukh Lampi siam hizing

Lamka, Aug. 3 *(Nisin Thuhiltu)* : Border Road Task Force (BRTF) in Tipaimukh Road siamthakna chu hapta masa a pat pan in lampi dung ah kawlsuang nên a sung hi. BRTF nuai ah nasem poineer te’n tuni sunma a pat in lampi ah kisung kawlsuang nênte chu lampi kuakna mun te ah vuk in Road Roller mang ah tâ cham a hi. Tipaimukh Road a hileh Zero Point, Police Station a pat kilometer 20, Khotuh chan bawl hiding in a kigen a, First Phase a chun lampi kuakna mun te ah kawlsuang nên leh leisan vukdim masak hi ding in zia chung a chun suang sung in Black topping bawl hiding in a kigen hi.

State Legislative Assembly: Department 4 a ding demands for grants Rs. 975,16,40,00 pass

Imphal, Aug. 3 *(Nisin Thuhiltu)* : State Legislative Assembly, Budget Session ah tuni’n Department pali a ding in demands for grants Rs. 975,16,40,00 passed in a um hi. Passed ah um demands for grants te chu -Stationery & Printing (Rs. 5,77,26,000), Relief & Disaster Management (Rs. 50,75,48,000), Economics & Statistics (Rs. 17,32,45,000) leh Information Technology (Rs. 23,66,45,000) a hi. Congress MLA K. Ranjit, Md. Abdul Nasir, Md. Fajur Rahim leh Kh. Joykishan te’n Relief & Disaster Management leh Information Technology a ding demands for grants chung ah gen leh sak a nei uh, Relief & Disaster Management portfolio tuk le hi, Chief Minister N. Biren Singh in a dawnhuna a chun, MAHUD Department bye-laws umsa banah State Government in state pumpi huap ah building bye-law siambe ding a hidan gen in, local MLA leh a kisaipi DC te tawh kithua ah tunai ah tuilet ziak ah haksatna tuak te ding ah Central Government assistance um te hawpdaw hiding in a gen hi. State Government account ah fund transferred a hi hun hun ah panpi hawpdaw ah um ngal ding hin le a gen a, official procedure ziak ah compensation sum leh rehabilitation material te vaigei a hidan a gen hi. State government in compensation leh rehabilitation material te a vaima theipen ah hawpdawna ding ah panla ding leh tuilet ziak ah haksatna tuak mitamtak a um na chung ua Relief & Disaster Management Department in 24X7 helpline hawng ah, Department chuam chuam te kithuapina tawh relief & rescue work chiapi a hidan le a gen hi. MCS officer pali te relief & rescue work enzui ding ah mawpuakna piak ah um leh Department in tu ah flood fighting leh rescue operations expert (specially trained personnel) 37 nei a hidan le taklang in, police, CSO leh NGO volunteers banah Scouts etc te’n regular tak ah tuilet ziak ah haksatna tuak a um leh rescue operations a pat ngal theina ding ua regular tak ah mock drill nei zing a hidan uh le gen hi. Tuilet ziak ah haksatna tuak te umna ding ah relief camps 97 hawn ah um, tuilet in a suksiat leh haksatna tuak te dinmun etzuina nei DC leh SDO te tawh kithua ah emergency relief material hawpdaw ah um hin a gen hi. DC leh officials khenkhat in MLA te thupiak a zui nawplo thu gen ah um chu ngaikhawk mama a hidan taklang in, bureaucrat leh official ten elected leader te a za (respect) ding uh pawimaw in a gen a, State leh gamsung pumpi elected leader te dan (law) siam in run a hidan official ten a hiat ding uh pawimaw in le a gen hi. State Government in Henglep sub-division ah Japanese Encephalitis leh Dengue natna ziak ah haksatna tuak mi tamtak a umna chung ua kituptak ah panlakna nei a hidan le gen in tu ah sukven hita hin a gen a, Lilong AC ah chenna inn khenkhat chenna theilo ah tuilet in a suksiat um a hidan a gen hi. Chuleh, Lilong AC ah tuilet in chenna inn a suksiat piak te a hun hun ah compensation piak ah um hita hin a gen a, kum 2015 ah tuilet ziak ah haksatna tuak te kithuapina ding Central Government assistance le release hinailo hin a gen hi. Chun, tuilet in a suksiat fish farm te ding ah compensation fixed rate le sukpunna ding ah government in panla hin a gen hi.

DC/CCpur in chialna bawl
Lamka, Aug. 3 *(Nisin Thuhiltu)* : Shyam Lal Poonia, IAS, DC Churachandpur in tuni thusua a bawlna a chun, 5th August 2017 ah District Administration in Mass Cleanliness Drive chiapi ding tawh kitawn ah khawpi sung ah dukan/dawr bawl zosia chu zingkal lam dak 7:00 a pat 11:00 kikal ah dukan/dawr khak ding leh Mass Cleanliness Drive ah panla chiat ding in chialna a bawl a, zia hun sung ma a chu, mipi te lampi gari taitua lo ding in le chialna a bawl hi.

Malaria Dept. in July, 2017 report suadawk
Lamka, Aug. 3 *(Nisin Thuhiltu)* : Malaria Department, Churachandpur in thalui July 2017 â report a piak dungzui in July sung ah Malaria vei hi ding ah muanmaw thisan 3,174 test a bawlna lak ah mi 7 Positive leh mi 2 Plasmodium Falciparum (PF) hi uh a hi dan mudaw a hi. July 1 a pat July 15, 2017 sung ah malaria vei ding ah muanmaw mi 592 test a bawlna lak ah positive mudaw a um pua, July 16 a pat July 31, 2017 kikal ah thisan 2,582 test a bawlna lak ah, mi 7 Positive mudaw aum in zia lak a chu mi PF 2 a pang hi. Chun, thalui chan ah Department in Dengue leh Japanese Encephalitis (JE) a kigawm ah 95 mudawk in zia lak a chun Dengue 66 leh JE case 29 hi’n Department in SMO, Regional Health & Family Welfare, Imphal leh Director, Health Services, Government of Manipur ah report a piakna a chun a taklang hi.

Outreach Health Camp nei

Lamka, Aug. 3 *(Nisin Thuhiltu)* : District Health Society (DHS), District NCD Cell leh District Dospital, Churachandpur kithua in tuni’n SL Senior Cemtre, Gangpimual ah Outreach Health Camp a sai ua, zia hun a chun, Dr. Th. Nirpendra, Senior MO, DHS, Churachandpur a pat ‘National Programme For Prevention and Control of Cancer, Diabetes, Cardiovascular Disease and Stroke (NPCDCS)’ tawh kisai banah Cancer leh Diabetes natna a pat kiveng ding dan genna a um hi. Dr. Kimngaihching, Chief Medical Officer (CMO), Churachandpur in mi tamtak kikâisawn theilo natna chuam chuam - cancer, diabetes, stroke leh a dang dang a pat kiven ding dan ngaisaklo ziak ah zia natnate chu tamtak in thipi law uh hi’n a gen a, natna kiti him him sukdam sang ah kiven ding ngai pawimaw zawk ding hi ah taklang kawm in zia chhu India Government in le a ngai pawimaw ziak ah kumsin leh sum tamtak sêng zing hi’n le a gen a, lawting tak ah Outreach Health Camp zaw a hi ding dawisak thu le a puang hi. Dr. Chingnunsiam, DNO, District Tobacco Cessation Clinic in chep leh muam a pat bailam tak ah Cancer nei thei a hi dan a gen banah chep leh muam hi zawngsak te’n District Tobacco Cessation Clinic, District Hospital a pat panpina dawng thei ding uh hi’n le a gen hi. Zia hun ma a chun, M. Swaminanda, Physiotherapist in ummun ah taksa sawizawi dan a ziltil hi. Camp ah District Health Society (DHS), Churachandpur, District Tobacco Cessation Clinic, Churachandpur leh District Hospital, Churachandpur a pat Medical Doctor leh staff te’n SL Senior Centre a um te banah vengsung ah taksa kum upate etna a nei ua, Diabetes Case 16, Hypertension case 4 leh post stroke patient 1 mudaw ah um in a mamaw dan uh zil in a thawn ah damdawi piak a hiu.

NT 4august2017b

6th Sikh LI in a bawl tanky hawnna nei

Lamka, Aug. 3 (Nisin Thuhiltu) : 6th Sikh Light Infantry (Khuga Battalion) in Panniel Lane, Muolvaiphei ah vengsung mipite a ding ah tuikhawlna ding tanky a bawl piak chu tuni zingkal in Panniel Lane, Muolvaiphei ah hawnna nei a hia, zia hun a chun Subedar Major Kunal Bhuria in vengsung numei pawl in tha 3 masang ah a ngek dungzui ah mipi mat ding tanky bawlpiak uh hi’n a gen a, vengsung mipi’n a phachuam thei ding pen ah tanky a mat ding uh a dawisak thu a puang hi. Lalrolhun, Secretary, Village Authority, Muolvaiphei in tanky bawl piaktu Khuga Battalion kiang ah kipakthu puang kawm in Kunal Bhuria, Hmar Puanlâisan a silsak hi. Tanky a hileh 6 Sikh LI in mipite ngaikhawkna ziak ah Battalion ‘Self Observed and Initiated Little (SOIL) nuai ah a bawl a hia, zia chu Muolvaiphei hausa, Lalzarlian Darngawn in a hawn a hi. Tanky hawnna hun mat sung a chun, Khuga Battalion in Mobile Interactive Terminal for Rural Areas (MITRA) ah Pre-Recruitment Rally a ding MITRA Suvugya Cell hawng in khangthak pawsal 26 in min a khum u’i.

Hoihkim kiang ah panpina pia kibelap zing
Lamka, Aug. 3 *(Nisin Thuhiltu)* : Lamka khawpi sung ah panpi ngaite panpi ding ah kibawldawk, ‘Panpihtu Nu-te’ kiti pawl te’n tuni nitaklam in V Munnoih, New Lamka a um Nianghoihkim @ Hoihkim panpina a piau hi. Zia hun a chun, ‘Panpihtu Nu-te’ a pat Nu Zoram in Newspaper leh Local Cable News te ah Hoihkim chanchin a hiat a pat lainat leh panpi utna nei a hi dan a puangdawk a, Hoihkim in innsung khawsakna lam ah haksatna a tuak bep hilo in numei khat ah piang maleh mi tuak ngailo tuak a hi na ah thuakpi mama a hi dan a gen hi. Panpihtu Nu-te’n Hoihkim pu, Ngulsum kiang in Hoihkim panpina ding sum Rs. 3,000 pia in Nu Zoram in Hoihkim leh a innsungmite a ding in Pathian kiang ah a pauchap piak hi. Panpihtu Nute a hileh mihing chanpi panpi ngaite panpi na ding ah 2005 kum a khan a la kibawl dawk a hia, tu leh tu a hin member 12 um in nauchaga etkawlna mun, Amazing Grace, Bungmual ah thasin leh Rs 1,000 a pia zing sek ua, EBC Project, DORCET a ding ah le thasin leh Rs 500 a piak ban un mimal panpi ngai tamtak kiang ah panpina a la pia zing u’i.

SP leh MDC in Romeo innsungmite kimupi

Lamka, Aug. 3 *(Nisin Thuhiltu)* : MDC Grace Zamnu, Churachandpur SP, Rakesh Balwal, IPS banah numei police te’n tuni sunnung in ZRA Town Commander Romeo zi leh chate kimupi in hun chawmkhat a mangkhawm u’i. Zanitak ah Romeo zi sawisakna thu a kithang tawh kitawn ah SP malatna ah thupha chawi ah kalsuan a hiu a, zia hun a chun SP in thiltung tawh kisai inquiry hawitak ah bawl hi ding ti ah gen kawm in tuban ah raid him him chu ama hiatpina lo ah bawl hitalo ding ti’n le a puang a, Romeo zi leh a innkuante kiang a chun maban ah kuama’n amau subuai talo ding hi’n le a thamuan hi.
NT 4august2017c

Agriculture Minister in Lohuan piakdawna nei

Imphal, Aug. 3 *(Nisin Thuhiltu)* : Agriculture, Veterinary & Animal Husbandry Minister V. Hangkhanlian in tuni’n lobawl mi tuilet ziak ah haksatna tuak te kiang in paddy saplings /Lohuan piakdawna Haotal, Pangei,Imphal mun in a nei hi. Sainik School Campus, Imphal ah Raising of Community Nursery paddy saplings / Lohuan etthakna nei kawm ah Additional Chief Secretary Suhel Aktar, IAS; Director of Agriculture Dr. Ph. Rajendra Singh leh department official te kithuapina tawh Minister in paddy saplings / Lohuan hawpdawna a nei hi. ‘The Raising of Community Nursery’ kiti a hileh state sung ah lobawl mi tamtak ten tuilet ziak ah Lohuan a suntheilo uh tawh kitawn ah lobawl mite kithuapi theina ding ah Department of Agriculture, Government of Manipur in a bawl hi a hia, “Raising of Community Nursery’ thiltup ahileh Manipur ah agricultural food grain product kibelap sak ding ti a hi. Zia ah ki chiing Louhon chu tha tamlo sung ah a ga lak thei ding buchi- RCM-10 leh RCM-12 a hi.

GST nuai ah kumsin leh Rs. 150 - 200 Cr mu hi ding: Finance Minister
Imphal, Aug. 3 *(Nisin Thuhiltu)* : Goods and Services Tax (GST) nuai ah state government in kumsin leh revenue ah Rs 150 - Rs 200 crore tuam muzo ding hi’n Deputy Chief Minister leh Finance portfolio le tu, Yumnam Joykumar in tuni’n House ah a gen hi. A chiatha zing Assembly session Question Hour hun ah Khangabok MLA Surjakumar Okram thudawtna a dawnhuna a chun, GST Compensation Act nuai ah Manipur in GST revenue compensation ziak ah Rs 103 crore tuam mu ding in le Deputy Chief Minister in a gen a, dealer 4100 lak ah dealer 2800 te chu VAT regime a pat kichawn ta in a dang 1300 te chu GST nuai ah kikhum ta uh hi’n le a gen hi. GST chu revenue lam ah phachuam ding hi ah taklang kawm in GST Bill a pat state in revenue a mu kibelap ding hi’n a gen hi. Kakching MLA Y. Surchandra dawtna siam a dawnhuna a chun, State in Rs. 7774.42 crore bat nei hi’n Joykumar in a gen a, State in financial lam ah kiningtinna a nei tak leh thalaw lam le etthak hi ding in a gen hi.

NLCPR nuai ah project 40 project zaw thian hita: DoNER Minister
Imphal, Aug. 3 *(Nisin Thuhiltu)* : DoNER Minister Dr. Jitendra in Manipur state sung ah Non-Lapsable Central Pool of resources (NLCPR) nuai ah project 40 zawthian a um ta hi’n tuni’n a gen hi. Zia hi a hileh Rajya Shabha ah Manipur RS MP K. Bhabananda Singh in thudawtna a nei a dawnhuna a hia, scheme te a chun Rs. 256.62 crore suklut hi’n le Dr. Jitendra in a gen hi. 2014-15 ah project 3 - 2x5 MVA 33 KV Sub Station leh 33 KV line tuana banah Sekmaijin ah zia gual nasepna chu zawthian a um in a kigawm ah Rs. 1558.61 lut hi’n a gen a, Senapati, Churachandpur, Chandel leh lmphal West ah water supply scheme tawh kisai ah project 29 chu 2015-16 ah zawthian a um in a kigawm ah Rs. 20730.59 lakhs lut hi’n le a gen hi. NLCPR nuai ah project dang 48 te chu Manipur ah puaklut a um a hi dan le a puang hi. State in project proposal 19 a piaklutna lak ah project 4 te proposal chu pawmpiak a um in zia na ding a chun Rs. 219 crore sanction a um hi’n le Minsiter in a gen hi. Zia lo chun, 2016-17 ah kipan Rs. 155.25 tuam man ding project 11 te chu le sutzawp a um hi’n le a gen hi.

Police Personnel 3 suspend ah um
Imphal, Aug. 3 *(Nisin Thuhiltu)* : Andro police station ah 1st August 2017 ni ah muanmaw ziak ah hentang ah um numei khat a min - Mutum Ongbi Indira (42) wife of M. Ibohanbi of Andro khuman Leikai a kikhailumsa mudaw ah a umna chung in Imphal East, Superintendent of Police (SP) Kabib in police personnel pathum (3) suspend a bawl a, Andro Police Station ah OC le duty a pat chawlsak in a um hi. Suspend ah um police personnel te chu Sub-Inspector L Heramani, Assistant Sub Inspector H Prakash Singh leh numei police Soniya Devi a hiu. Hiatthei khat chu, Indira leh Sarubam Sunibala wife of S. Lokhin te 25th July ni ah pawtdawk khawm himaleu Sarubam Sunibala tunna hiatlo ah a um ziak ah Mutum Ongbi Indira chu mat ah um leh Andro police station ah thudawt ding ah hentang a hia, Police te’n thudawtna a nei hun un a pawtdaw pi Sunimala chu Gopal Sharma of Kwakeithel Takhel Leikai tawh ki zampi ua dawnhuna a piak, thudawtna neibe ding ah police station ah a kikawina ah 1st August 2017 zing kal ah washroom ah a kikhailumsa mudaw a hi

Pre-Ph.D programme form muthei
Imphal, Aug. 3 *(Nisin Thuhiltu)* : Manipur University nuai ah Pre-Ph.D a ding ah admission form mu thei a hi ta, Post Graduate ah 55% (ST/SC te a ding ah 50%) chung lam mu te banah qualifying exam pia ah result ngak nalai te’n apply thei ding a hiu. Form chu University Cash Counter ah Rs. 300 (ST/ SC/ PWD te a ding ah Rs. 200) piak ah lak thei ding a hia, MU website, www.manipuruniv.ac.in a pat a le download thei ding a hi. Online ah download te’n form chu Registrar, Manipur University, Canchipur – 795003 min ah demand draft tawh a piaklut uh ngai ding a hi. Form a hileh August 4 a pat lakpat thei ding leh August 28, 2017 chan ah piaklut thei ding a hi. Thuchian kimzaw hiatbe nuam te’n University website ah kan thei ding a hi.

Minister N. Kayisii in Viewland Colony rape victim kimupi
Imphal; Aug. 3 *(Nisin Thuhiltu)* : Minister of Tribal Affairs & Hills & Fisheries N. Kayisii in tuni’n Viewland Colony rape victim kum 15 numei khangdawng numei chu Raj Medicity, North AOC, Imphal ah a kimupi hi. Numei khangthak chu a hileh Viewland Colony, Senapati ah pawngsual a hi zaw in tha ding tup ah sawisak a la hia, tu hin Raj Medicity ah etkawl in a um hi. Minister N. Kayisii in thiltung chu nasatak ah dem kawm in zia gual gamtatna chu mihing thil bawl ding hilo hi’n a gen hi. Minister in pawngsual a um numeinu innsungmite le kimupi in hun chawmkhat a holimpi a, zia hun a chun thuakpi a hi dan puangdawk kawm in numeinu kizenna ding leh thiamlo chang te a kituakpi gawtna piak a hina ding in ama lam a pat theitawp sua ah kithuapi na pia ding ti’n a thamuan hi. Chun, N. Kayisii in Raj Medicity ah Management leh Medical Staff te le kimupi in hawitak ah kithuapina pia ding leh numei khangthak chu hawi tak enkawl ding in a dawn hi. Hiatthei khat chu, TAH Minister in tu ma a khan Senapati Police HQ kiang ah pawngsualna chu hawitak ah suizui ding leh thiamlo chang tu chu dân tawh kituak ah gawt ding in thu a la piai.

High Court Bar Association website hawng ding
Imphal, Aug. 3 *(Nisin Thuhiltu)* : High Court Bar Association of Manipur, Website hawnna 4th August, 2017 zingkal lam dak 10:00 leh High Court Bar Association of Manipur, Meeting Hall ah um ding a hi. Mr. Justice N. Kotiswar Singh, Acting Chief Justice, High Court of Manipur in website hawnna nei ding a hia, Mr. Justice Kh. Nobin Singh, Judge High Court of Manipur, N. Kumarjit Singh, Advocate General of Manipur, Kh. Binoykumar Singh, Sr. Advocate, President, High Court Bar Association of Manipur te’n le uap ding a hiu.

Rs 3 lakh man ding kanii mandawk
Imphal, Aug. 3 *(Nisin Thuhiltu)* : Imphal West ah Narcotic Cell team khat in tuni’n kani kag 3 leh a kim a man dawk ua, zia chu international market ah Rs 3 lakh man hiding ah hisap a hi. Inter State Bus Terminus Complex ah zingkal lam dak 10:30 tuam ah thuguk a mu’u tawh kitawn ah police team in Additional SP Law & Order, Imphal West, inspector leh sub inspectors of Narcotic cell te mapuina ISBT complex tuam ah a vak lumlet te check a bawl hun ua, Paolienmang Khongsai (35) s/o Paosei Khongsai of Phainom Village a pat khamthei chu a patdaw uh hin police thusuak in a gen hi.

CM Relief Fund ding ah donate bawl
Imphal, Aug. 3 *(Nisin Thuhiltu)* : Manipur ah tuilet ziak ah hatna tuak te kithuapina ding ah miphachuam ngai pawl leh mimal chuam chuam in Chief Minister’s Relief Fund (CMRF) ding ah sum donate a bawl zing uh tawh kitawn in tuni’n Education (S) Department, SSA & RMSA leh Manipur Women’s Co-Operative Bank Limited te’n Rs. 9,07,105 leh Rs. 50,000 donate a bawl ua, Chief Minister’s Secretariat ah Chief Minister N. Biren Singh khut in piakdawna a nei ui.

Admission notice
Imphal, Aug. 3 *(Nisin Thuhiltu)*: Pre-Ph. D. programme in Anthropology; Adult Continuing Edn. & Ext.; Biochemistry; Chemistry; Commerce; Computer Sci.; Earth Sci.; Economics; Education; Environmental Sci.; Hindi; History; Life Sci.; Linguistics;Mathematics; Manipuri; Dance & Music; Management; Mass Communication; Philosophy; Physics; Physical Edn. & Sports Sci.; Pol. Sci.; Sociology leh Statistics zialnuam te ding in amission a kihawng a, August 4, 2017 leh August 8, 2017 sung ah form lak leh piaklut thei hiding a hi. Thuchian kimzaw DIPR Website, http://dipr-manipur.gov.in/ ahiloleh DIPR mobile application a pat muthei ding a hi.

Admission hun susau
Imphal, Aug. 3 *(Nisin Thuhiltu)* : Manipur University ah Joint Registrar in tuni thusua a bawlna a chun, BA Dance & Music (Hons.), session 2017-18 a ding ah last date of admission chu August 10, 2017 tiang ah suksau a hidan a taklang hi.

User Rating: 0 / 5

Star InactiveStar InactiveStar InactiveStar InactiveStar Inactive

Government in state sung ah Indigenous mite vengbit ding: CM

Imphal, July 31 (Nisin Thuhiltu) : 11th Manipur Legislative Assembly, Budget Session ah tuni, opposition MLA R.K. Imo in student organization te’n kiphinna a nei zing uh tawh kitawn ah illegal migrant etzuina ding ah state government in banggual panlakna a nei em ti ah dawtna a siam, Chief Minister N. Biren Singh in a dawnhuna a chun, state government illegal migrants issue ngaikhawk mama a hidan taklang kawm in thil umdan kituptak ah etzui hiding leh genkhawm ding pawimaw hina gen a, government in state sung ah illegal migrant te etzuina ding ah Constitution ah provision um te tawh kituak ah panlakna nei ding a hidan a gen hi. State government in state sung ah migrants um zat hiatdaw theina ding ah panlakna nei ding a hidan gen in electoral rolls leh spot verification chiapi hiding in a gen hi. Zia hun a chu illegal migrants matdaw a um leh a petpet ah nawdaw hiding a hidan gen in, Assembly Constituency 8 ah indigenous te ding ah seat reservation demand bawl ah tu ah student organization kiphinna neite chu kiphinna chawlsan ding in a chial hi. Opposition MLA D. Korungthang in Tengnoupal Police Station ah infrastructure development tawh kisai ah dawtna a siam, Chief Minister N. Biren Singh in a dawnhuna a chun, Government in Tengnoupal ah Police Station kihawng thak in a pawimaw infrastructure dinmun etzuina nei zing a hidan gen in Superintendent of Police simlo ah police personal 177 in Tengnoupal Police Station pansa duty bawl un a gen hi. Manipur panna Border State te ah Chief Minister te’n Home Ministry, Government of India tawh meeting nei ah border areas ah Police Stations um te sukhat ding dan ngaitua hizing a hidan le a gen in, Tengnoupal Police Station ah infrastructure dinmun chu next meeting ah puaklut hiding in a gen hi. State government thak in damtheina (health) lam ngai khawk mama a hidan le gen in state sung ah mipi te taksa leh lunggel damthei tak a hina ding ua diklo tak ah khamthei leh zu kizuak te chung ah Police leh a kisaipi department in drive bawl zing a hidan uh a gen hi. Police leh a kisaipi department in drive bawl nung ua State sung ah local zu 8,000 litres leh foreign liquor 11,000 litres matdaw hita a hidan te le taklang in, government in mipi te leh MLA zosia kithuapina pawimaw in a gen hi. Khamthei bawl ziak ah state sung ah meithai kibelap zing a hidan le gen in, zu dawn ziak ah thi le kibelap nasa mama in a gen hi. Manipur Liquor Prohibition Act 1991 chiapi himaleh state sung ah mitamtak in local zu siam leh zawk chiapi zing a hidan uh gen in Manipur Liquor Prohibition Act 1991 nuai ah customary thil ah mat ding zu bep siam thei ding ah phalna um hin a gen hi. MLA K. Meghachandra in Imphal ah tunaicha zudawn ziak ah mi 5 te’n thina a tuak bak ua mi 71 hospital tut ah a um nau tawh kisai ah dawtna a siam, Deputy Chief Minister Y, Joykumar in a dawnhuna a chun, mi 71 lak ah mi 24 te Raj Medicity leh Shija Hospitals ah etkawl hizing nalai un a gen a, zia gual zu kisiamna tawh kisai a chu mi 2 te chung ah FIR ziklut ah um leh zu lak ah poisoning substance a pan leh a panlo hiatchian hinailo in a gen hi. MLA S. Bira Singh in Keibul Lamjao ah Sangai venbitna ding tawh kisai ah dawtna a siam Minister for Forest and Environment Th. Shyamkumar in a dawnhuna a chunm, Keibul Lamjao ah Sangai umzat total number chu 2016 survey dungzui ah 260 hin a gen a, 1985 a pat Sangai 27 kibalap in a gen hi. Keibul Lamjao National Park , boundary siamthakna ding ah panlakna chiatha zing leh tunung sawtlo ah zaw hiding ah le taklang kawm in, Sangai venbitna ding ah NGO te tawh kithua ah panlakna um a hidan le a gen hi. MLA Nambol N. Loken Singh in dawtna a siam, MAHUD minister leh hi, Th. Shyamkumar in a dawnhuna a chun, Imphal Municipal Corporation wards 11 leh State sung ah town 5 te chu Open Defecation Free areas ah Government of India in a puan hin a gen a, khawpi (town) 5 te chu - Kakching Municipal Council, Moirang Municipal Council, Bishnupur Municipal Council, Nambol Municipal Council leh Lilong Imphal West Nagar Panchayat hin a gen hi. State sung ah latrine 1130 sak ah umta a hidan le gen in Swachh Bharat Mission nuai ah Imphal leh State sung ah khawpi chuam chuam ah thianthona chiapi a hitheina ding ah panlakna um zing in le a gen hi. Minister Th. Shyamkumar in a gen belapna a chun, Ministry of Housing and Urban Development in latrine sakna ding ah financial assistance, Central share masang ah Rs. 4,000 a la hi sek chu tu ah Rs. 10,800 ah supung in a gen hi. Chuleh, Mission Organic Farming North East nuai ah Government of India in kum 2015-16 a ding ah Rs. 8.37 crore, 2016-17 ah Rs.7,36,78,500 leh 2017-18 a ding ah Rs.8,94,21,000 release bawl in a gen hi. State sung ah organic farming chiapina ding ah clusters 230 le identify bawl hita hin a gen hi.

Assembly ah Demand for Grant 4 pass
Imphal, July 31 (Nisin Thuhiltu) : Manipur Legislative Assembly, Budget Session ah tuni’n discussion leh voting in Demands for Grant pali –Rs. 1,46,75,82,000 passed a bawl hi. Passed ah um te chu - Demand No. 45-Tourism Rs. 37,05,92,000, Demand No. 34- Rehabilitation, Rs. 4,24,14,000, Demand No. 41 –Art & Culture, Rs. 23,82,41,000 leh Demand No 43-Horticulture & Soil Conservation, Rs. 81,63,35,000 a hi. Demand No. 45-Tourism, Rs. 37,05,92,tawh kisai genkhawm hun ah dawtna um te Tourism incharge le hi Chief Minister in a dawnhuna a chun, Government in state sung ah Tourism Sector siamhawithakna ding ah panlakna thei chan ah panla a hidan gen in, DoNER Ministry leh North Eastern Council in approve abawl ding ah project reports piaklut ah um a hidan gen in Tourism Department nuai ah Ukhrul ah Kangkhui Cave siamhawina ding ah Rs 5 crore sanctioned ah um hin a gen hi. Demand No. 34- Rehabilitation, Rs. 4,24,14,000, tawh kisai ah MLA O. Surjakumar Singh in dawtna a siam, Chief Minister N Biren Singh in a dawnhuna a chun, NIT Complex chu Manipuri Ponies rehabilitating a ding ah siamhawi hiding leh bailam tak ah Dzukou Valley tuntheina ding lampi siam ding ah government in guanggalna nei hin a gen hi.

Silent Protest Rally; Total Shutdown
Lamka, July 31 (Nisin Thuhiltu) : Gucha ti ah ngaw ah um Mr (L) Thangkhanlun Taitom (30) s/o T Pumhang of Sahei Road, Vengnuam, New Lamka suunna a chiazawm zel tawh kitawn in maban panlak ding dan tawh kisai in tuni’n pawl chuam chuam in Simte Inn ah joint meeting a nei ui. Meeting hun in Civil Society leh Student Organization chuam chuam te’n (L) Thangkhanlun thina tawh kisai ah District Administration leh Police Department in a ki gawlkha te July 30, 2017 tiang ah amatdaw ding ua hun tiang piak himaleh panlakna bangma a umlona chung ah Joint Action Committee (JAC) against the Brutal Killing of Thangkhanlun Taitom kiti phudaw ding ah lemsakna nei in, Chairman ding ah Mr. P Thonglianmang guat in a um a, Secretary ding ah Mr. Vungzapau, YPA GHQ guat a hi. Vice Chairman ding ah Philanthropic organization chuam chuam ah President te Mr. Vungminthang ,YVA GHQ, Mr. Kamthang Haokip KKL, Mr. Ginkhamkhup ZYO GHQ, Mr. T Kailianthang YPA GHQ, Mr. L Dongchinthang SYO GHQ, Mr. C Vanlalduhawma YMA GHQ leh Mr. L Pumthang TCYA GHQ; Spokesperson ding ah Mr. Laldawnglien HYA GHQ, Information ding ah Mr Lianmuanthang YPA GHQ, Mr H. Thangkhansuan SYO GHQ, Mr. Pausianlal Simte, KZP GHQ; Treasurer ding ah Mr. T Chinminlun, SYO Rengkai Unit; Adviser ding ah Mr. B Dongzalian Simte STC GHQ, Mr. Danial Gangte, KIC, Mr. L Pumlianpau PTC GHQ, Mr Joseph Lalrothang, HI, Mr. Vanlalrinliana, MPC Manipur, Mr. Khatkhotong Baite, VPC, GHQ leh Mr. Thongkholian Mate, MTC GHQ te guat a hiu. JAC phudaw a hitawh kitawn ah a kiphutdawk thak Joint Action Committee (JAC) against the Brutal Killing of Thangkhanlun Taitom mapuina ah 1st August 2017 sunma dak 10:00 leh District Morgue ah kingak khawm ding leh lung-awilo suklatna, DC Office, Tuibuang tiang ah Silent Protest Rally nei ding in lemsakna a bawl ui. Chun, 2nd August 2017 zingkal dak 6:00 a pat nitak lam dak 6:00 tiang ah Ccpur Disrict, Total Shutdown bawl ding in lemsakna a nei bawk ui. (L) Thangkhanlun ahileh TP Electricals, Tedim Road, Central Lamka neitu’ inn a pat sum tamtak gudawk ti a hia, CCTV a pat a lim lakdaw a hi tawh kitawn ah Lamka pansa SoO nuai ah um meithal chawi pawl khat khut ah kipedawk, a thisa inn tut kit ah um a hi. (L) Thangkhanlun thina chung a chun, Pathianni Biak inn ah kikhawpna chawlsan in Simte nam sung ah kochuam pawl chuam chuam in District Morgue mun in hun matna le a la nei ui. (L) Thangkhanlun thina tawh kisai chu Zou Youth Organization, GHQ, Young Paite Association, GHQ, United Zou Organization, GHQ, Young Vaiphei Association, GHQ, Hmar Students’Association,Jt. Headquarter leh Kuki Students’ Organization, Churachandpur, Zillai GHQ te’n demna thusua a bawl ua, tualthattu te gawtna piak ding phutna leh lusuun insungmite suunpi thu a puang ui.

District Level Co-Ordination Committee Cum-Review Meeting
Lamka, July 31 (Nisin Thuhiltu) : Shyam Lal Poonia, Deputy Commissioner, Churachandpur District mapuina’ tuni’n BRGF Hall Deputy Commissioner, Complex ah District Level Coordination Committee – Cum-Review meeting a um a, zia hun a chun, Independence Day, 2017 matna ding ah kisaklawk ding dan leh government school etkawlna tawh kisai ah sepdaw ah um te le panlakna um te et-thakna a um hi. Churachandpur District sung ah Government Office te sukthianthona ding ah Action Plan le genkhawmna a um a, Deputy Commissioner Shyam Lal Poonia in District ah kivaipuakna a hiding gual tak ah a chia ding leh office attendance hawilo tak ah um te siamhawi thak ding pawimaw a hidan gen in, District Level Officer te chu District siamhawina ding ah panlakna kituptak chiapi ding leh kithuapina pezing ding in a chial hi. Zia meeting chu Department chuam chuam a pat District Level Officer 50 te’n a uap ui.

Damlo 23 te Dengue leh 13 te JE
Lamka, July 31 (Nisin Thuhiltu) : Henglep bial a pat damlo mi 35 te zani tak zan dak 9:00 tuam a khah District Hospital tutbe in a um kit ua, Hospital a tun uh tawh kitawn ah Shyam Lal Poonia, IAS, DC Churachandpur in Hospital ah damlo te dinmun etthakna a nei ngl hi. Damlo-inn puaktungbe ah um te chu zani ah Saktiman 3 in a dawllo, a tamzaw naupang a hiu a, tuni tiang ah Henglep a pat damlo District Hospital puaktung ah um te chu a kigawm ah mi 200 valta hi’n a kigen hi. Chun, damlo te thisan test a kibawlsakna result dungzui ah tuni tiang ah Dengue positive mi 23 leh JE nata nei mi 13 hita a hi. Chuleh, Dengue leh JE natna nei ah mudaw ah um te chu Hengkom, L Santing, New Pangsang leh Naajang khua a pat hi un le a kigen hi.

Zillai GHQ in demna bawl
Lamka, July 31 (Nisin Thuhiltu) : Zillai General Headquarters (Vaiphei Students’ Association) ah Vice President, Kamminlal Vaiphei in thusua a bawlna a chun, thil gu hiding ah
muanmaw ziak ah Mr. (L) Thangkhanlun Taitom sawisaklup ah a um chu nasatak in demna a bawl hi. Muanmaw himaleh zammang lo ah thil umdan sukfel theina ding a kipiakdaw nung ah sawisaklup ah a um chu mimawl te gamtatna a hidan taklang kawm in customary laws leh Christian te chiapi dan (law) susia a hidan uh a gen hi. Society in ziagual gamtatna chu pawmthei ding gual hilo in le a taklang a, zia kithana chun student te ngaituana susia thei leh chamna, muanna susia thei a hina chung ah a kisaipi thuneitu te’n thil umdan a etzui ua, thina tuaktu ding ah justice a um theina ding ah panlakna a nei ding uh phutna nei kawm in lusuun insungmite suunpi thu a puang hi.

YVA GHQ in demna bawl; Henglep Bial a pat damlo te panpina pia

Lamka, July 31 (Nisin Thuhiltu) : Young Vaiphei Association (YVA) General Headquarter puitu te’n tuni zingkal lam dak 11:00 in Ccpur District Hospital Morgue ah sawisaklup ah um (L) T Thangkhanlun Simte galna nei in Vaiphei Puandum khat a khu ui. Zia hun ah YVA GHQ President Mr Vungminthang in vangsiatna tuak innkuan te thawkpi a hidan a gen a, gamsung khantona ding ah kitha kimatna sang ah ki lungsiat tak ah chenkhawm zawk pawimaw a hidan a gen hi. Zia nung a chun, Young Vaiphei Association (YVA) GHQ puitute’n KKL Complex, IB Road ah Henglep bial a pat damlona ziak ah District Hospital kitut te panpina ding in KKL khut in Rs 2000/- piakdawna D David, General Secretary, YVA GHQ in a nei hi. Chun, YVA GHQ in Henglep bial ah damlona nasa tak um ziak ah mipite gentheina khawk a sak thu a taklang ui. A langkhatlam ah Info. Secretary Young Vaiphei Association GHQ min ah press release in a taklatna a chun, (L) T Thangkhanlun Simte sawisaklup ah a umna tawh kisai chu demna bawl in mihing hinna lak kiti tunung tuban ah a um kittaklo ding a nawpthu a taklang a, thuneitu te’n tualthattu te amat daw ua, a kituakpi gawtna a piak ding uh phutna bawl in, luunsuun insungmi te suunpi thu a puang hi.

Unit te kiang ah YVA Flag hawpdawna nei

Kangvai, July 31 (Nisin Thuhiltu) : YVA Kangvai Block in pawimaw hun ah matthei ding ah a siam YVA Flag chu a chiata 29th July 2017 ni a khan Kangvai Block lawiupa te leh Unit lawiupa te’n Joint Meeting a nei hun un Unit President/Secretary te khut in piakdawna a nei ui. Zia hun chu YVA General HQ President leh V/President te’n uap in flag piakdawna a nei ui.

Henglep bial ah damlo te panpina pia

Lamka, July 31 (Nisin Thuhiltu) : Henglep bial ah natna hikpi a len ziak ah damlo tuak mitam tak te District Hospital tut ah a um uh tawh kitawn in, KKL Complex, IB Road ah etkawl in a um ui. Kuki Khanglai Lawmpi KKL GHQ in mawpuakna la’n, Complex leh hospital ah um damlo te leh a insungmi teu nek leh chak ding a ngaitua piak ua, panpina penuam te ding in le donation box a kawi ui. Chun, mipha chuam ngai, mimal leh pawl chuam chuam in kithuapina thil piak chuam chuam piakna a nei zing ui. Henglep bial ah damlo te panpina ding in zani leh tuni’n pawl chuam chuam - social media ZOLENGTHE team Rs. 4000/- Zou Youth Organization (ZYO) General Headquarters in anchang bag 12 leh dangka Rs. 5,000.00 (Rupees Five thousand) in Kuki Khanglai Lompi (KKL) khut in a piau a, zia gualma a chun, YPA New Lamka Block,Young Vaiphei Assocation GHQ leh Zillai GHQ in le KKL Complex ah damlo te panpina ding in sum a piau hi. Zani a khan, Tuibong ah um 26th Assam Riffle ten KKL Complex huang sung ah damlo umpi te umna ding Puanbuk bawl piak in, nek ding hunkhawp le piakna a nei ui. Panipna pia tuni tiang ah organization 10 leh mimal 92 hi ua hiat a hi.

PTC block 6 in August tha sung ah election nei ding
Lamka, July 31 (Nisin Thuhiltu) : Paite Tribe council (PTC) GHQ nuai ah block 6 ah puitu te term a bei tak tawh kitawn in, PTC GHQ saina ah August thasung ah Block puitu thak ding telna (election) um ding a hi. Zia dungzui a chu August 12 leh Lungthul Block lawiupa ding telna Block Headquarter, Suangdoh ah um ding a hia, August 13 leh Singngat block lawiupa thak ding telna Block Headquarter Singngat ah um kit ding a hi. August 20 leh Imphal block ah lawiupa thak ding telna Block Headquarter, Lamphelpat ah um ding, August 15 leh Lanva Block lawiupa thak ding telna Block Headquarter Tangnuam ah um ding, August 19 leh Lamka Block lawiup ah lawiupa thak ding telna Block headquarter Hiangtam Lamka ah um ding a hi. Chun, August 19 leh New Lamka Block lawiupa thak ding telna Block Headquarter Dorcas Veng ah nei ding a hiu.

Tribal Movement Ni 700 tinna nit

Lamka, July 31 (Nisin Thuhiltu) : All Tribal Women Union (ATWU) General Headquarter, Churachandpur mapuina ah tuni, July 31, 2017 sunma dak 10:00 a pat Jehova Jireh Home, L. Kamzathang’ Inn, Beulahlane ah Tribal Movement Ni 700 tinna nit in a um hi. Ningkhanvung in hun matna amapui a, Evangelist Thawnkhansuan pauchapna tawh hun matna hawng in, Nianglian, President, ATWU in hun matna tawh kisai taklatna a nei hi. Manngaihkim in Slogan sapna amapui a, Rev. K. Kamchinkhup, Divisional Superintendent, Imphal Division, EBC in Pathian’ thutak pansa’n tilkhona thucha a gen hi. Deborah Zou in pauchapkhawmna hun a mapui a, Upa L. Chinkhoson in hun matna a khak hi. Zia hun matna a chun, Liannem leh Ningzaman te mapuina laa sak khawmna le a um hi. Manipur Legislative Assembly in August 31, 2015 ah Thingtangmi te dawilo Bill thum a passed ziak ua kiphinna ah mi 9 in thina a tuak nung ua February 8, 2016 a pat All Tribal Women Union mapuina Movement pat ah um, Bill passed a hi pat Movement kichiapi chu tuni ni 700 tinna hita a hi.

Referees’ Fitness Test result puan hita
Lamka, July 31 (Nisin Thuhiltu) : Churachandpur District Sports Association (CDSA) leh All Manipur Football Association (AMFA) in July 24, 2017 ni ah Peace Ground, Tuibuang a Referees’ Fitness Test leh Grade Examination a nei uh Result suak in, mi 14 in lawtinna a chang ui. Zia ah lawtinna nei Churachandpur District a pat hiatthei te chu - Mangsonmuan Guite, Chinsonlian, Helun Haokip, David Lunminthang, S. Lalramhlun, Lalsonmung, Letminthang, Nehminlal, Paominthang Haokip leh Nehkhopao te a hiu a, Bishnupur a pat Ph. Manglem Singh leh RK Litesh Singh, Imphal East a pat N. Bikash leh Thoubal a pat I. A poimacha Meitei in lawtinna a chang ui. Zia lawtinna nei te chu kum 2017 sung ah AMFA leh District Sports Association saina ah Tournament a um hun hun ah Referee hithei ding un a kigen a, Referees’ Fitness Test leh Grade Examination bawl a hiu leh total ah mi 28 a hiu.

Workers’ Welfare Board Recruitment
Imphal, July 31 (Nisin Thuhiltu) : Building and Other Construction Workers’ Welfare Board, Govt. of Manipur nuai ah post chuam chuam - Filed Assistant - 10 (UR -06, ST- 03, OBC- 01); Computer Assistant /Office Assistant - 2 (UR -02); Driver -2 (UR -02) leh Peon -1 (UR -01) ah contract basis ah sem ding lakna um ding in L. Premkumar Singh, Assistant Employment Officer, Imphal East in thusua a bawlna a chun a taklang a, lunglutna nei te’n 01- 05, August 2017 sung ah apply thei ding a hiu. Chun, a chung ah post awng te ah sem ding chu kum 18 to 35 (3 years relaxable for ex-servicemen) mi a hiding in, Filed Assistan post ah sem ding thiamna lam ah Graduate a hi uh ngai ding, Computer Assistant /Office Assistant post apply ding te Class XII passed/ Diploma course zo a hiding uh leh Driver -2 ding ah Class X passed, Peon ding ah Class VIII passed a hi uh ngai ding a hi.

CMRF ding ah Rs 1 lakh donate

Imphal, July 31 (Nisin Thuhiltu) : Manipur ah tuilet ziak ah hatna tuak te kithuapina ding ah miphachuam ngai pawl leh mimal chuam chuam in Chief Minister’s Relief Fund (CMRF) ding in sum donate a bawl zing uh tawh kitawn in tuni’n Council of Higher Secondary Education Employees’ Association, Manipur in Rs. 1 lakh donate a bawl ua, Chief Minister’s Secretariat ah Chief Minister N. Biren Singh khut in piakdawna a nei ui.

Minister in Training hawnna nei di
Imphal, July 31 (Nisin Thuhiltu) : Admn Reforms, & training, Rural Development & Panchayati Raj, Public Works, IPR, Power, Commerce & Industries Minister Th. Biswajit Singh in 1st August, 2017 zingkal lam dak 9:30 leh State Academy of Training, Takyelpat ah Foundation Training of State Civil/Police Service Officers hawnna nei ding a hi.

Indo Myanmar Post Level Meeting

Nampisha, July 31 (Nisin Thuhiltu) : 10 Sector Assam Rifles nuai ah 31 Assam Rifles in Myanmar tawh ki unauna hawizaw sem a um theina ding in Indo Myanmar Post Level Meeting hun in friendly volleyball match organised a bawl hi. Indo- Myanmar bordering village Nampisha ah 31 July 2017 ni a khan gam 2 kal ah sepai te’n first friendly match a nei ua, zia hun chu Nampisha Khanpat Khullen, Ningchou leh bordering village chuam chuam a pat khawmi tamtak te’n le a uap ui. Col Ajay Kumar, Comdt 31 Assam Rifle leh a team te’n Sector commander supervise bawlna nuai ah gam 2 kal hawina ding ah panlakna a nei uh chu pakchat um a sakthu’u khawmi te’n a gen ui.

Page 1 of 10