Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

State Govt in April 1, 2019 a pat 7th Pay Commission chiapi ding ah lemsa

Imphal, June 8 *(Nisin Thuhiltu)* Manipur government leh 7th Pay Commission chiapi ding phutna ah kiphinna nei - employees & pensioners te’n tuni’n April 1, 2019 a pat 7th Pay Commission chiapi ding in lemsakna a nei ua, lemsakna chung in Memorandum of Understanding (MoU) suai a kai ui. Zia dungzui a chu Fitment Factors 2.57 hiding, January 1, 2016 a pat hiding a hi. Chief Minister mapuina nuai ah Manipur Secretariat Services Association (MSSA), Manipur Government Services Federation (MGSF) leh Manipur State Pensioners’ Union (MSPU) palai te leh state government in kihona a nei uh tawh kitawn ah zia gual kinawptuana chu piang a hi. Kinawptuana dungzui ah, April 1, 2019 -March 31, 2020 sung ah 7th Pay Commission leh allowances benefits te pre-revised rate (at actual amount paid as on today) tawh kituak ah GPF accounts ah deposit bawl hiding, April 1, 2020 a pat 7th Pay benefits leh revised allowances cash ah piakdaw pat hiding, government in work charged, muster roll leh casual employees tawh kisai ah a fello te a vaima theipen ah a sukfel ding ti a hi. Chun, MoU suai kai a hitak tawh kitawn ah MSSA, MGSF leh MSPU in kiphinna chawlsan ngal ding ti a hi. Hiatthei khat chu, Joint Administrative Council of AMTUC & AMGEO mapuina nuai ah January 1, 2016 a pat Manipur state government in 7th Pay Commission a chiapina ding phutna kiphinna a pat uh hita a hi.

DG, BSF in STC/CCpur pha ding

Lamka, June 8 *(Nisin Thuhiltu)* K K Sharma, IPS, (Rajasthan 1982), Director General, BSF leh additional charge Director General, NSG chu Manipur vetha ding in tuni’n Imphal a tung hi. Ama’n Manipur ah ni 3 sung hun mang ding a hi. Zia sung a chu, mun chuamchuam vethakna nei ding, 9th June 2018 ah BSF, Subsidiary Training Center, Churachandpur pha ding leh Chief Guest hina tawh recruit thak te passing out parade uap ding a hi. K K Sharma, IPS chu Imphal Airport ah N S Jamwal, IG, BSF M & C Frontier, Silchar in vaidawnna a nei hi.

Departments te’n amawpuakna’u a sukpitin chiat tak ua leh Model village concept lawting ding: MP Thangso Baite

Imphal, June 8 *(Nisin Thuhiltu)* Kangpokpi district, Saitu- Gamphazol sub-division huap sung ah um CC Hall, Motbung village ah tuni’n Village Development Plan (VDP) tawh kisai in Empowered Committee Meeting a um hi. Zia hun a chun, Lok Sabha MP, Thangso Baite in a thugenna a chun, departments chuamchuam in amawpuakna a sukpitin chiat ua leh Model village concept lawting thei ding a hidan a gen hi. Motbung village ahileh MP, Thangso Baite in Sansad Adarsh Gram Yojana (SAGY) nuai ah Model Village khat hiding ah adopt abawl a hi. Model Village lawtinna ding ah khuasungmi te’n le kipiazo tak ah panlakna a nei ding, education, khawsakdan, activity chuamchuam chiapina tawh kisai ah model village concept tawh kituak ah panlakna a um ding pawimaw in a gen hi. Chun, Model village siamdawna ding ah Deputy commissioner, ADC/ADM, SDOs, BDOs leh DLOs te chu pangkhawm ah panla chiat ding in chialna a bawl hi.
Zia ah meeting chu, MLA Saitu Assembly constituency, Namthang Haokip chairman Sadar hills autonomous district council Haokhalal Hangshing, deputy commissioner Kangpoki Dr. Rangitabali Waikhom, ADC/ADM Kangpokpi Hmangte Lerte Kom, SDO Saitu Gamphazol N. Johnson Meetei, Motbung village chief Kaikhosei Lhouvum, SDCs leh district level officers, Kangpokpi te a pang ui.

D. Lhangjol ah inn katna mi 7 liam
Lamka, June 8 *(Nisin Thuhiltu)* Churachandpur District, Sangaikot Dampi Lhangjol village / K. Lhangjol ah tuni 8th June 2018 zingkal dak 3:30 tuam in Ngamsei Khongsai, chief of D. Lhangjol inn mei in a kang a, ziana a chun naupang 4 panna mi 7 in liamna tuak ua hiat a hi. Liamna tuak te chu, Themneilam Khongsai (35), w/o (L) Lhunmang Khongsai, Seiminlen Khongsai (15), s/o (L) Lhunmang Khongsai , Seigouthang Khongsai (12), s/o (L) Lhunmang Khongsai, Seigouhao Khongsai (9), s/o (L) Lhunmang Khongsai, Lamchingnei Khongsai (5), d/ o (L) Lhunmang Khongsai, Lamneivah Khongsai (3), d/o (L) Lhunmang Khongsai, Lhunkhongam Khongsai (24), s/o Ngamsei Khongsai te a ahiu. Mei in inn a katna chung ah mei kipatna hiat a hipuai.

Tuitha lui ah khialut naupang 1 thi
Lamka, June 8 *(Nisin Thuhiltu)* Tuitha lui ah tuni, 8th June 2018 zingkal dak 9:30 vel in naupang khat Tuitha lui ah khialut in, hukdaw manlo in a mualliam hi. A kihiatdan in, Tuitha lui ah thina tuak chu numei naupang Hoinunnem (6) d/o Thenkhogin Singson of Zion veng Tuibong a hi. Tuitha lui tawh kinai ah cheng ahiu tawh kitawn ah tuitha lui ah tuithal ding a kisakna, zia tuaksiatna chu tung hi’n a kigen a, Tuitha lui khialut ahidan hiat ahi tawh kitawn ah a kiang ah um te’n a hawlna nei ngal ah, a mudawdaw ua, Sielmat Christian Hospital tut maleu dam zo lo ah thi hi’n a kigen hi. Tuaksiatna tuak naupang chu tuni mah ah Tuibong Thanmual ah vuiliam in a um hi. Hiatthei khat chu tukum sung ah tuitha lui ah naupang 3 panna piting khat in thina a tuakta’u a hi.

Beti Bachao Beti Padhao Slogan leh Anthem ah kidemna um di
Lamka, June 8 *(Nisin Thuhiltu)* Shyam Lal Poonia IAS/DC/CCpur in thusua a bawlna a chun, numei naupangte dawpkangna ding ah phualpi solkal in scheme a patdaw Beti Bachao Beti Padhao (Save Girl Child, Educate Girl Child) kiti CCpur district sung ah le hawn hipaita ding in a gen hi. Zia chu tawh kitawn ah Beti Bachao Beti Padhao Slogan leh Anthem ah kidemna um ding hi’n a taklang a, zia kidemna a chu a neupen a pat a lianpen tiang ah pang thei ding uh hi’n a gen hi. Best Slogan phuak thiampen te chu Rs.3000 piak hiding a hiu a, Best Anthem la te Rs.3000 ma piak hiding a hi. Category 2 ah Consolation prize 4 tiang, Rs 500 chiat piak hiding a hiu. Slogan leh Anthem ahileh English ahiloleh Local pau khat zawkzawk ah hithei ding, kidemna pang nuam te’n Beti Bachao Beti Padhao genna Slogan ahiloleh Anthem banah Min, umna mun leh Contact detail kimtak June 30, 2018 tiang ah DC Office ah piaklut thei ding a hi.

Singngat MLA in Award piakdawna nei

Lamka, June 8 *(Nisin Thuhiltu)* Singngat MLA Ginsuanhau Zou in tuni'n a chenna inn Lailam Veng ah Singngat A/C sung ah student lawtinna nei chungchuang diak te kipakpina leh Apa (late) Thangzalang Memorial Award 2017 hawpdawna a nei hi. Zia hun chu DC/CCpur Shyam Lal Poonia, IAS; SP/CCpur Rakesh Balwal, IPS leh T Goudou EX minister banah Singngat SDO James Sehlal Hangshing, Lianminthang Samte MCS SDO/Suangdoh leh Sangaikot SDO Zosanglur Joute banah award dawng student insungmite banah MLA worker-te te’n a uap ua, Award hawpdawna leh thilpiak piakna Ginsuanhau Zou, Singngat MLA & MANIREDA Chairman in nei in, Rev. Zamlianpau in award sangte Pathian kiang in malzawl dawt piakna a nei hi. Award sangte ahiuleh – CBSE Class XII ah Area topper - Ngamkhohao Haokip s/o Jangkholun Haokip of MB Saichang tu ah JNV Tuinom a kai, 86.6 percent a hia, Second - Houminlal Baite s/o Semjang Baite of Lunggil, Sangaokot, 82.4 percent of JNV tuinom a hi. Manipur Board CoHSEM class XII ah area topper - Donbosco Hr Sec School, Lamka a pat Hoineivah Baite d/o (L) Jangkholun Baite of Moljol, Sangaikot (76.6 percent) leh Second - Lisa Nauching d/o Thongkhanlam of Muallum, Rayburn College, (70.8 percent) a hi. Class X CBSE ah topper - Letkhohao Haokip s/o Doujathang Haokip of MB Saichang, tu ah JNV Tuinom ah kai (89.16 percent) leh Second - JNV Tuinom ah kai Boinu Hoineineng d/o James Chongthu of Mongbung (85.4 percent) a hi. Class X BSEM ah topper in Donbosco Hr Sec School, Lamka ah kai T Khupkhanlun s/o T Liankhanmang of Behiang village a pang a, second in Elohim H/S a kai Jangkholun s/o Seithang Haokip of G Khonom (81.16 percent) a pang hi. Award mute lak ah Area topper Rs 10,000 leh second te Rs 5000 chiat piak a hiu.

CDVDFWA in panpina pedawk

Lamka, June 8 *(Nisin Thuhiltu)* CCpur District VDF Welfare Association (CDVDFWA) in general assembly a nei hun ua member thi a um leh a insungmite kithuapina ah Rs 1 lakh piak ding ah lemsakna a nei uh a chiapi zing uh tawh kitawn in tuni’n thina a la tuak VDF No. 020286 K. Siamlianpau s/o K. Kapzathang of New Lamka, Vengnuam insungmi te kithuapina’n Rs 1 lakh a pedawk ui. Zia hun a chun, CDVDFWA ah Chairman S. Laltingen Vaiphei in executive member te mapui in, panpina sum piakdawna a nei ui. K. Siamlianpau ahileh Behiang Police Station ah posting a hia, damlona ziak ah March 5, 2018 ah mualliam a hi.

NABARD saina SHG te’n training bawl
Lamka, June 8 *(Nisin Thuhiltu)* National Bank For Agriculture And Rural Development (NABARD) saina’ Singngat Community Hall ah tuni’n Singngat area ah Self Help Group (SHG) chuamchuam ah lawiupa te ding in training a um hi. Zia hun a chun, Akisijolneng SHG, Haijang; Ebenezer SHG, Muvanlai banah Singngat khua a kipat SHG chuamchuam Pipi SHG, Khupching SHG; Tangpizol SHG, Lengtong SHG, Maukot; Moltinchan SHG, Lancha akipat SHG leader 32 a pang ui. Training coordinator in Thangchinkhup Guite, DDM/ NABARD a pang a, Resource persons in Moi Valte, Branch Manager, CBI Singngat, Hau Phiamphu, MSW & MD Nedar Foundation, P. Lamzamuan, Secretary, RDS leh Th. Hausuanpau, MA Environment te a pang ui.

Aganwadi Worker-te ding ah Refreshers training course

Lamka, June 8 *(Nisin Thuhiltu)* Integrated Child Development Service (ICDS) Project, Henglep saina’ tuni sunma dak 11 apat Conference hall, PTC GHQ Hiangtam Lamka ah Aganwadi worker-te a ding in Refreshers training course kiti a um hi. Training hun ah Integrated Child Development Service ICDS Project, Henglep nuai ah sector pathum, Henglep Sector, Kolhen Sector leh Mouphai tampak Sector apat Aganwadi worker-te tel ua, hiai hun ah resource person V Sumati Devi leh L sunitabala Devi ten Aganwadi Worker-te a ding ah ICDS Family Detail register book htung thak tawh kisai ah ziltilna nei in, register book thak ah family detail ziklut dingdan taklatna a nei ui. Refreshers training course a chun, ICDS Project, Henglep nuai ah sector pathum Henglep Sector, Kolhen Sector leh Mouphai tampak Sector apat Aganwadi worker 83 a pang ui.

RBI in Town hall meeting nei ding
Lamka, June 8 *(Nisin Thuhiltu)* Reserve Bank of India (RBI) in June 15th 2018 leh Synod hall, IB Road ahTown hall meeting nei ding a hi. Zia hun a chu bank account nei, bank lam tawh kisai ah thupawimaw chuamchuam gen khawmna um ding, meeting ah pang te TA/DA piak hiding a hi. Lunglutna nei te’n June 14 tiang ah contact number 8974-225-922 ah register bawl thei ding a hiu.

YPA Ambulance ding ah gari tuakdawk

Lamka, June 8 *(Nisin Thuhiltu)* Vunglallian Tonsing’ chenna inn, Pearsonmun ah Young Paite Assn (YPA) Ambulance ding piakdawna, 7th June 2018 nitak in a um hi. Zia hun a chun, Lianmuanthang Valte, General Secy., YPA-GHQ in hun matna mapui in, Khaisianmung Tonsing leh a insungmi te’n YPA Ambulance ding piakdawna nei in, thugenna a nei ua, Pastor Kammuanlian, Local Pastor, EBCC Moria, Pearsonmun in Pathian min in YPA Ambulance latna a nei hi. YPA Ambulance ding donate bawltu Khaisianmung Tonsing suapipa, Vunglallian Tonsing in a genna a chun, YPA Ambulance ding ah amau innkuan in Mahindra Xylo a piak ua mitamtak in a hiat uh himaleh amau innkuan tuakdaw hizawlo ah a suapipa Khaisianmung Tonsing in a tuakdaw a hidan gen in, a gari le ama min ah um in a gen hi. YPA in pawimaw hun ah panpi ngai te leh damlo beidawng te panpina kituptak a nei ding dawina ziak ah thipha bawl a sutzawm zing ding dawina ziak ah Ambulance ding ah gari tuakdawk uh hi’n le a gen hi.

Felicitation programme mang

Lamka, June 8 *(Nisin Thuhiltu)* Molnom ah um Gandhi Memorial Govt High School in tuni sunma dak 11 apat in a school ua tukum ah Class X zodawk thak te ding in, Felicitation programme a mang hi. Zia hun matna chu Special Guest hina tawh H Doungel, Co-ordinator NYK CCpur in a uap a, Jamkhothang leh Baby Chiinneithem in matna mapui in, Nanggoulian mapuina’ Class X passed te introduction bawlna leh thilpiak piakna a um a, H Kaithanlian, Headmaster in congratulation speech nei in, GM Govt H/S apat class X passed-te a ding ah pauchap piakna Pastor Thenkhojang Haokip in a nei hi. Special Guest H Doungel in tilkhona thu gen in, Christina Shakum, Mangkhogin leh Esther Ngahboikim apat lasakna le a um hi. Tukum 2017-18 in GM Govt H/S apat Class X pass mi 59 a um ua, zia lak a chun, First division a pass student 17, Second Division ah 42, midang 20 in compartment mu’n, pass percentage 54% a tung hi.

User Rating: 0 / 5

Star InactiveStar InactiveStar InactiveStar InactiveStar Inactive

State sung ah Plastic ban hipaita ding; Police Recruitment result puan pai hiding: CM

Imphal, June 5 *(Nisin Thuhiltu)* : Cherry Blossom Avenue, Luwangshangbam, Imphal East District ah tuni’n World Environment Day mat in a um a, Chief Minister N. Biren Singh in khuallian hina tawh hun matna uap in thugenna a nei hi. Chief Guest in a thugenna a chun, state government in state sung ah plastic ban (khap) ding ah lemsakna nei a hidan gen in, dukan nei zosia te chu plastic thakhel ah thil dang mangzaw ding in chialna a bawl hi. Plastic matlona ding ah state government in tha 3 sung ah notice sua ding a hidan gen in, state sung ah pollution leh environmental degradation kibelap zing ah a um chu ngaikhawk mama hi’n a gen hi. Youth clubs leh voluntary organizations te chu waste management activity ah panlakna neite state government in financial assistance bawl ding hi’n a gen hi.

Private entrepreneur khenkhat plastic bag thakhel ding thil dang ngaitua umta ahidan gen in, pollution leh environment venbitna ding ah panlakna chu government leh mipi kithua ah panlakkhawmna kituptak a umtak leh lawting thei ding hi’n a gen hi.

Yangoi Maril kiangnai ah 7-km ah sau lampi pam ah plastic bag kum 30-40 masang ah kipai mang te tunaicha ah sukthian ah um hi’n a gen hi.

Chun, All Manipur DPC Completed Candidates of Police Constable (Male - 2013) kiphinna nei te chu kiphinna chawlsan ding in chialna a bawl a, a vaima theipen ah kum 2013 ah police Constable recruitment examination results puandawna ding ah state government in panlakna nei zing in a gen hi.

Government in police kilakna chung ah gawlgukna a um leh umlo, diklo tak ah nasep thilbawl a um leh umlo etzuina a nei ziak ah results puang ziang theilo ah um hi’n a gen hi. Diklo tak ah nasepna umkawm ah result puan hileh tunung ah kiphinna piang kit thei ding hi’n a gen hi.

Hunmatna uap, Public Health Engineering Minister L. Dikho in a thugenna a chun, Manipur chu Pathian thilsiam, gam leh gua, lui leh guam, mual leh tang leh climate kituptak umna a hidan gen in, Manipur hawina chu mipi te’n venbit ding pawimaw in a gen hi.

Agriculture Minister V. Hangkhanlian in a thugenna a chun, tumasang ah Manipur in climate hawitak leh kituptak nei maleh tuhun ah temperature sang deudeu a hidan gen in, air conditioner umlona room sung ah um le haksa thimta hi’n a gen a, ziagual dinmun chu a hitakna chung ah environment venbit ding pawimaw in a gen hi.

Imphal East Zilla Parishad Adhyaksha P. Bimola Devi, Advisor to Chief Minister Rajat Sethi, Chief Secretary Dr. J. Suresh Babu and Institute of Bio-resources and Sustainable Development (IBSD) Director Dr. Dinabandhu Sahoo te’n le zia hun matna chu a uap ui.

Hun mat sung in Chief Minister in Cherry Blossom Avenue plaque hawnna nei in, hunmatna uap khuallian te tawh Cherry Blossom no phuna le a nei ui.

DoNER Secretary leh Joint Secretary in NERCOMP panlakna chuamchuam entha

Lamka, June 5 *(Nisin Thuhiltu)* : Department of North Eastern Region (DoNER), Govt of India ah Secretary Naveen Verma leh DoNER Joint Secy SN Pradhan in tuni, 5th June 2018 in CCpur district sung ah munkhenkhat hung pha’n, NERCOMP project nuai ah na kisemdawk te banah NaRM-G leh Self Helf Group-te holimpina a nei ui.

DoNER Secretary Naveen Verma leh DoNER Joint Secy SN Pradhan in ahileh Moirang khawsak ah um CCpur District sung ah Ujung Makhong village leh Bunglon khua a phau a, zia hun a chun, Andrian Marbaniang, Director (M & E) NERCOMP, Shillong; Dhruba Jyoti Natj, Director Financed NERCOMP Shillong; HB Rocky Anal, Director (FIFS) NEC Shillong leh Tychicus Vashum, District Project Manager, NERCOMP Ukhrul te’n le zui in, Distict sung a pat Shyam Lal Poonia IAS DC/CCpur, D Khuala Vaiphei, District Project officer NERCOMP Ccpur; Lalrongbawl Kangvai SDO te panna NERCOMP nuai ah Partner NGO, NaRM-G leh Self Help group banah NERCOMP CCpur nuai ah staff-te a pang ui.

DoNER Secretary Naveen Verma leh DoNER Joint Secy SN Pradhan in Kanvai Sub Division huapsung ah um Ujung Makhong village ah NERCOMP nuai ah project chuamchuam sepdawsa umte leh Self Help Group te panlakna le etthakna nei in, zia hun a chu Kim Gangte Ex-MP, Outer Manipur in vaidawnna siam in, zia nung a chun, Ujung Makhong NaRM-G, Ujung SHG leh Makhong SHG apat a nasep dawsa te chung ah report piakna leh NERCOMP ziak ah phatchuamna nei te taklatna a um a, Lamkhalal Sitlhou, Secy Ujung Makhong NaRM-G in kipakthu genna a nei hi. Ujung Makhong village ah hun matsung ah SHG chuamchuam te gendan in, NERCOMP panpina phatchuampi mama a hidan uh a gen ua, kum 2014 a pat haksatna chuamchuam a nei teu veng chuam mama in a gen ui. Nidang ah Bank account hawndan tiang helo ah um himaleu NERCOMP panpina leh panlakna te ziak ah a khawsaknau nuamchuam mama in a gen ui. DoNER Secretary Naveen Verma in SHG chuamchuam te holimpina nei in, dawtna chuamchuam a siam a, SHG chuamchuam te’n NERCOMP panpina tamsem a mutheina ding uh leh phatchuamna tamtak a nei zing theina ding ua panlakna neipiak ding in chialna a bawl ui. Ujung Makhong ah hun mat sung a chun, SHG chuamchuam in amau khutsuak theitui DoNER Secretary Naveen Verma leh DoNER Joint Secy SN Pradhan te panna leader chuamchuam dawnsakna a nei ua, DoNER Secretary in SHG te kukalna le panlakna chung ah lung-awi mama in a gen hi. Chuleh, a khutsuak teu chu Imphal tiang ah zawkdaw ahitheina ding ah panlakna nasazaw sem ah nei ding in tilkhona a bawl hi.

Ujong Makhong village a pat Bunglon khua ah NERCOMP nuai ah NaRM-G leh SHG in a sepdaw teu etthakna a neizawm ua, Bunglon khaw mipi'n vaidawnna siam in DoNER Secy Naveen Verma a zawn ua, hausapa inn mai ah reception programme saulo matpi in, Khousabung Cultural troupe nam lam suklatna a nei a, thilpiak piakna hun um in, Paukholal Chief of Bunglon Village in a khawsung ah pawimaw chuamchuam um te sukven piak ding in dawtna a siam hi.

Reception programme a umzaw in, Bunglon Community Hall ah hun matna a um a, Thempi Khongsai in hunmatna mapui in, D khuala Vaiphei, Project Director NERCOMP CCpur in vaidawn thugenna a nei a, khuallian-te thilpiak piakna a nei hi. Zia hun a chun, Naveen Verma IAS secy DoNER Govt of India in thugenna a nei a, SAMPADA nuai ah mimal in phatchuampina tamtak neithei a hidan gen in, North East mite'n zawkthei ding ah thil a suaksak teu chu leitual ah a puakman 20 percent subsidy leh lenna a puakman 33 percent subsidy um in a gen hi.

Government scheme chuamchuam um te taklatna neikawm in, Bunglon nupite a ding ah Handloom Industry masawn theina ding ah Kolkata, Showroom apat Germany khutsuak, puan gana khawl chankang mama, Dunlop cover, leh thil tamtak bawldaw theina peding hi’n thutiam a bawl a, zia Handloom a piak chu mang ah khutsuak a neiteu Kolkata tiang tut ding leh showroom ah kawi theina ding ah panla chiat ding in chialna a bawl hi. Naveen Verma in a genzawm zelna a chun August tha leh Bunglon khua phakit ding a hidan gen in, NERCOMP project nuai ah NaRM-G leh SHG-te nasep dan chung ah a lung tung mama in a gen hi.

Bunglon Community hall ah hunmatzaw in, NERCOMP Project nuai mah ah kibawl Leengthei lei etthakna anei a, Bunglon khua ah NERCOMP project nuai ah nasepna leh panlakna chuamchuam um te a etthakzaw nung un, Delhi zuan ding in a kilekit a, Imphal ah Manipur Chief Minister le kimupi malam ding hi’n a gen hi.

World Environment Day 2018 mang

Lamka, June 5 *(Nisin Thuhiltu)* : Southern Forest Division/CCpur saina nuai ah tuni nitaklam dak 3:00 in New Lamka TD block office, Khominthang ah World Environment Day 2018 mat in a um hi. Zia hun matna chu Niangthianhoi, MFS, Asst Conservator of Forest in amapui a, KS Tawmbing, Divisional Forest Officer/CCpur in keynote address bawl in, Shyam Lal Poonia IAS DC/CCpur in thugenna saulo nei in, thingno phuna a nei ui. KS Tawmbing in a thugenna a chun, mihingte a ding ah hui, tui leh lei pawimaw pen a hidan gen in, zia ah thil pathum te chu a thiangtho thei ding pen ah umsak zing ding, Plastic halziak ah huithianglo nasa mama thei a hidan a gen hi. Plastic chu kum 100 masang ah muat theilo a hidan gen in, plastic bag matlo ham ding a nawp thu a gen a, Gawphel leh Air gun mang ah vacha kap phal hilo ah District Administration in thusua a bawl chu zuidik guat chiat ding a nawp thu a gen hi. Hun matzaw in Environment Day matna kawm in a chiakhawm te’n thingno 200 phuna a nei ua, amau lak a chun, DC/CCpur, ZEO/CCpur, CEO/ADCC, SDO/Suangdoh, Addl DC Khaikhopau Ngaihte, AC-to DC Ginmuan Ngaihte, SDC/Sangaikot, EE/PHED, Range officer chuamchuam leh student-te' te a pang ui.

Assam Rifles in thingno phu

Lamka, June 5 *(Nisin Thuhiltu)* : Headquarter Veng ah um Assam Rifles te'n World Environment Day- 2018 matna kawm in tuni’n amau umna area a suthiang ua, thingno 300 phuna le a nei ui.
Zia hun a chun, Ofifcer 8, Junior Commissioned Officer 25 banah rank officer chuamchuam 320 te panna Assam Rifles personnel tamtak a pang ui.

ATSUM mapuina World Environment Day mang
Lamka, June 5 *(Nisin Thuhiltu)* : All Tribal Student Union Manipur (ATSUM) leh Joint Student Body, CCpur vaisaina tuni sunnung dak 1:30 in Headquarter Veng ah um Vimala Raina High School ah 'Beating plastic Pollution' ti thupi ah nei in World Environemnt Day- 2018 a mang ui. Directorate of Environment, Govt. of Manipur sponsored bawlna nuai ah ATSUM leh Joint Student Body in World Environment Day matna programme a nei uh hi’n a kigen a, CCpur district ah govt. school chuamchuam-te a ding ah organized a bawl uh hi’n a kigen hi. Zia ah World Environment Day matna hun chu student leh teacher te'n uap in, social work school kim-le-kiang sukthianna le a nei ui.

Sensitization meeting pan
Lamka, June 5 *(Nisin Thuhiltu)* : CCpur leh Pherzawl district sung ah CHC/PHC/PHSC ah nurse posting-te a ding ah ni-li June 6 apat June 7 sung CMO Conference Hall ah Reproductive Child Health RCH register tawh kisai ah sensitization meeting a nei ding tuni’n a kipan hi. Meeting ahileh sunma dak 10 in a kipan a, Samulamlan Block nuai ah PHC Sagang, PHC Saikot leh PHSC enkawl Nurse-te a pang ua, sunnung in Singngat block nuai ah PHC Singngt, PHC Behiang, PHC Zezaw leh PHSC enkawl Nurse-te a pang ui. Zing, June 6, 2018 sunma ah Samulamlan Town area ban ah District hospital leh District immunization office ah District hospital Gynea leh District immunization office/immunization cell enkawl nurse 2 chiat pang ding a hiu a, sunnung in Henglep block nuai ah PHC Henglep leh PHSC enkawl nurse-te pang ding a hiu. Chun, June 7 ahTipaimukh block nuai a CHC Purbung, PHC Senvon, PHC Sibapurikhal NGO, PHC Patpuihmun NGO leh PHSC enkawl nurse te pang ding a hiu. Reproductive Child Health RCH register tawh kisai a sensitization meeting nei hun sung ah Seiboi Mate, District data manger DDM in ziltilna nei ding a hi.

DC/Pherzawl mapuina Go to Village” mission tawh kisai genkhawm

Lamka, June 5 *(Nisin Thuhiltu)* : Mannuamching, IAS, Deputy Commissioner, Pherzawl mapuina tuni, June 5, 2018 sunnung dak 1:00 in a office chamber ah “Go to Village” mission tawh kisai in District Level Officer (DLO) meeting a um hi. Meeting hun ah Mannuamching in Go to Village mission, Pherzawl district sung lawting tak ah chiapi ding a nawp thu genna nei in, DLO te’n le amau department in mission chung ah panlakna report piakna a nei ui. Meeting hun ah maban a “Go to Village” mission lawtinna ding tawh kisai genkhawmna a nei a nei ua, maban ah kisak lawk dingdan le a genkhawm ui.

Lianchinkhup in a gam thu tawh kisai taklang
Lamka, June 5 *(Nisin Thuhiltu)* : Lianchinkhup Chief of Mata Mualtam in press conference ko in, a gam umdan tawh kisai taklatna a nei hi. Ama’n a genna a chun, March 17, 1940 ah SJ Duncan, SDO West in order a sua dungzui ah Ginthong Kuki khut apat Mata Mualtam hausakna, maalam ah Mata stream, simlam ah Rock stream, sualam ah Tuithukphai leh tumlam ah Lhanbung hill chu Mata Mualtam gam boundary a hidan gen in, apu Ginthong Kuki umlo a kipat apa Douchinthang in hausa hina luato ah, apa ahat zawlo nung ah ama’n hausa hina a lua leh tuni tiang ah Mata Mualtam hausa hina tukto pek hi’n a gen hi. Nemkhoman w/o (late) Dr. Kaichinkhup of Gouchinkhup Veng, New Lamka in suanlam chuamchuam bawl ah Ginkhanpau apat gift deed ah farm mun zosia ama gam ti ah subuai zing a hidan le gen in, February 12, 2018 ah DC/CCpur kiang ah Manipur Land Revenue & Reforms Act, 1960 nuai ah Section 97 leh 85 tawh kituak ah dawtna pelut ah, DC/CCpur in SDO/CCpur kiang ah report bukim la ding ah hiatsakna bawl in a gen hi. DC thupiak dungzui ah office ah Nemkhoman tawh ama ko ah document bangkim siampiak vek ti’n le a gen a, dawnhuna leh thukhenna kichian tak kangak zing lai ah, April 4, 2018 ni ah Order No. 1/29/SDO/CH/Settl/105 in Dag No. 11 (105)- Kekru Tampak ti ah agam khenthak piak ah um chu lamdangsa a hidan gen in, SDO/CCpur in thudiklo ah gam khenthakna ding ah order a sua chu pawmlo in le a gen hi. Nemkhoman in Patta No. 39 C.S Dag No. 11 Area: 43.92 Ingkhol Villalge, No. 105-Kekru Tehsil, CCpur ti a nei le lamdangsa a hidan gen in, DC/CCpur kiang ah December 11, 2017 ah dawtna a siam hun ah patta gam tedaw piak ding ti himaleh gam neipa hiatpina panglo ah patta a um thei chu a kisaipi thuneitu te’n a etzui kin ding uh a nawp thu le a gen hi.

JAC in employees te chung ah divide & rule policy chiapilo ding dawi

Imphal, June 4 *(Nisin Thuhiltu)* : Joint Administrative council of AMTUC & AMGEO in state sung ah employees te’n central pay scale chiapi ding phutna kiphinna a neina chung ua divide & rule policy chiapilo ding a nawp thu a taklang hi. JAC general secretary, Biken in press conference ah a genna a chun, central pay scale chiapi ding phutna achiatha zing, huntiam umlo cease work strike chu state sung ah kiphinna sawtpen hita a hidan genkawm in, Chief Minister in kihona nei ah demand tawh kisai table ah genkhawm ding leh sukfel ding ah panlakna a nei chu kipakpi mama himaleu
Joint Administrative council of AMTUC & AMGEO, General Secretary chung ah show cause notice sua ah um chu cancelled ding leh member zosia te matna ding ah arrest warrant issued kibawl le withdraw ding a nawp thu a gen hi. Chief Minister tawh kihona a nei hun ua, chief secretary leh a kisai khakpi government official te a pankim vek ding uh a nawp thu gen in, kihona nei ding ah akimansa Joint Administrative council of AMTUC & AMGEO umzing himaleh third party te a kigawl ding uh dawilo hi’n a gen hi.

Kiphinna nei DESAM volunteer 31 mat ah um

Imphal, June 5 *(Nisin Thuhiltu)* : Democratic Students’ Alliance Manipur (DESAM) volunteer kiphinna nei mi 31 te tuni’n mat in a um ui. DESAM volunteer te’n kiphinna nei ah National Sports University office ah thilkhenkhat a suksiatna chung ua, office bulu ah pang DESAM volunteer te matna ding ah police te’n panlakna a neizingna chung ua tuni ah kiphinna piangkit ah chief minister’s bungalow lut ding gua a hiu a, state police te tawh nasatak ah kinawptuana a um nung ah volunteer 31 te chu mat ah um a hiu. DESAM secretary Shetal in thuthak lakhawm mite kiang ah a genna a chun, a min mai ah sports university umsak ding dawilo ah DESAM in buting tak tawh Nation Sports University a umsak ding phutna kiphinna nei hi’n agen a, Prime Minister, Narendra Modi leh chief minister, N. Biren kiang ah NSU chu fully-fledged university ahitheina ding ah memorandum a piak uh himaleh government leh a kisaipi thuneitu te thip bekcha a umzingna chung ua NSU office ah kiphinna nei uh hi’n a gen hi. Chuleh, mass court arrest order sua ah a umna chung ah kiphinna neizawm zing ding uh hi’n a gen hi.

Lamdan ah eco-tourism park siamdaw hiding: Shyamkumar

Imphal, June 5 *(Nisin Thuhiltu)* : Manipur Mountaineering and Trekking Association (MMTA) saina leh Directorate of Environment, Government of Manipur sponsored bawlna nuai in tuni’n MMI Complex, Lamdan, Churachandpur district ah ‘Beat Plastic Pollution’ti thupi ah nei in, State Level World Environment Day mat in a um hi. Zia hun matna chu Forest and Environment Minister Thounaojam Shyamkumar in khuallian hina tawh a uap a, ama’n a thugenna a chun, MMI Complex Lamdan ah eco-tourism park siamdaw hiding in a gen hi. Wildlife leh environment venbitna lam ah panlakna thak nei chiat ding a nawp thu gen in, kituptak ah etkawllo ding thingno phu phachuamlo a hina chung ah thingno phu ah um te kituptak ah venbit chiat ding pawimaw in a gen hi. Zia hunmatna chu L. Radhakishore Singh, Chairman, Manipur Pollution ControlBoard (MPCB) leh Y. Nabachandra Singh, Director, Directorate of Environment te’n le uap in thugenna anei ua, resource person hina tawh Prof. Rajmohan Singh, Dean, School of Mathematics and Physical Sciences, Manipur University in climate change lau um a hidan genna a nei hi.

User Rating: 0 / 5

Star InactiveStar InactiveStar InactiveStar InactiveStar Inactive

Chief Minister mapuina’ ‘Go To Village’ Mission tawh kisai Reviews Meeting bawl

Imphal, June 02 *(Nisin Thuhiltu)* : Chief Minister N. Biren Singh chairman hina nuai ah tuni’n ‘Go to Village’(GTV) mission tawh kisai in review meeting a um a, ‘Go to Village’(GTV) mission chiapi hun ah pending cases um nalai te sukven ding dan genkhawmna le a nei bawk ui.

Meeting hun in haksatna tut ah um sukvenlo ah um nalai te chu MLA te’n Nodal Officers, HODs leh DCs te tawh kithua ah 26th June, 2018 ah ‘Go to Village’ (GTV) camp a um kit masang ngei ah a sukfel ding un lemsakna a nei ua, Chief Minister in Departments chuamchuam ah official te chu ‘Go to Village’ mission tawh kisai ah mipi te awareness & sensitise bawl ding ah thupiak nei in, MLAs leh DCs te’n next GTV camp umna ding khua select a bawl ding un a gen hi.

Chief Minister in ‘Go to Village’ mission chung ah department chuamchuam ah official te leh mipi te chung ah kipakthu genkawm in, amau khut ah mission kinga hi’n a gen a, akisaipi MLA te chu mipi te haksatna sukvenna ding ah panlakna nei chiat ding in chialna a bawl hi.

Meeting hun sung a chun, Departments chuamchuam te’n status report piakna a nei ua, Ministers, MLAs, Nodal Officers, Departments chuamchuam ah official te’n ngaidan leh dawidan genkhawmna a nei bawk ui.

Hiatthei khat chu, tuni tiang ah ‘Go to Village’ (GTV) camp mun 227 ah chiapi hita a hia, ziana a chu compliant 2.9 lakhs um leh 1.73 lakhs te sukfel piak hita ti a hi. Chun, 1st of May, 2018, a pat GTV camps round 4 chiapi in a um a, next round of GTV ahileh 26thJune, 2018 ah um kit ding a hi.

Tuni ah review meeting chu Deputy Chief Minister Chuamchuam Y. Joykumar Singh, Minister for PWD, RD&PR Chuamchuam Th. Biswajit Singh, Minister for Health and Family Welfare Chuamchuam L. Jayantakumar Singh, Minister for CAF&PD Chuamchuam Karam Shyam, Minsiter for Forest Chuamchuam Th. Shyamkumar, Minister for PHED Chuamchuam Losii Dikho, Minister for Agriculture Chuamchuam V. Hangkhanlian, Minister for Social Welfare Smt. Nemcha Kipgen, MLAs, Chief Secretary, DGP, Administrative Secretaries, DCs, Nodal Officers, HODs leh Departments chuamchuam ah official te’n a uap ui.

Agent Commission pedawk ding ah dawn

Lamka, June 2 *(Nisin Thuhiltu)* : National Food Security Act (NFSA) nuai ah Rationing Agent 2016-17 (CCpur Assembly Constituency) te’n agent commission amulona chung un tuni'n media-te kimupi in thil umdan taklatna a nei ui.

Agent te lak ah Nengzamang in agendan in, govt. in hun sawtpek akipat agent-te commission sum sanction bawl maleh, theitawp sua ah panlakna a nei nung ua, District Supply Officer (DSO), CCpur; District Incharge Minister kiang tiang ah thil umdan a tut nung ua contractor te'n a kimlo ah a piak ziak ua la nuamlo uh hi’n a gen hi.

Constituency dang ah agent te'n lazo ta himaleh bangziak ah CCpur constituency ah hentang ah um a hi em ti’n dawtna a siam a, a kintheilam ah piakdaw a hiding phutna a bawl hi. DSO leh Contractor in May 30, 2018 tiang ah agent-te commission pedawk ding ah deadline pemaleu tuni tiang ah bangma thuthak a umlo chu khawk a sak thu a gen hi. Zia chung a chu a kisaipi govt thuneitu te’n panlakna a nei ding uh a nawp thu gen in , CCpur Assembly Constituency ah 2016-17 sung ah rationing agent 125 um te’n, tha 18 sung (April 2016 akipat September 2017) a sum mu ding uh kigawm Rs.29,59,51/- munailo uh hi’n a taklang hi.

April 2016 akipat September 2017 kikal tha 18 sung a ding ah Thanlon Assembly constituency ah rationing agent-te commission Rs. 4,62, 852 hi’n le a taklang a, Henglep ah agent-te commission Rs. 22,38, 736; Saikot constituency ah Rs. 46, 50, 399 banah Singngat constituency ah Rs. 26, 79, 768 a kigawm ah Rs. 1, 29, 91, 270.50 tung in a gen hi.

ADCC thu ah Hrila in Kamkholal thugen hilchianna bawl
Lamka, June 2 *(Nisin Thuhiltu)* : Autonomous District Council (ADC), CCpur sungthu buaina tawh kisai ah May 29, 2018 ah P. Kamkholal Vaiphei, Executive Member, ADC/CCpur in a office chamber ah media-te kiang ah hilchianna a bawlna tawh kisai in tuni sunnung in Lalhrillien @ Hrila, MDC in Rengkai Road, Life Cafe ah media-te kimupi in a dawnhuna leh a hilchianna a bawl hi.

Hrila in a genna a chun, Khaipao Haokip, Chairman, ADC/CCpur in council member tamzaw te muanzawlona a chan ziak ah Septemer 2017 akipat Manipur (Hill Areas) District Council Act, 1971 pansa Chairman akipat thendawna ding ah phutna kipan, panlakna a um zing lai ah govt. in District Council 4th Amenment Act, 2018 a pass ziak ah chairman san ding tawh kisai chawlsan ah um hi’n a gen hi.

Ex-Chairman Langkhanpau Guite in kum 2 a puak sung ah council/house sitting khatvei bep ko, Khaipao hun ah house sitting kona ding ah agenda thupi talua umlo ti ah P. Kamkholal Vaiphei, Executive Member, ADC/CCpur in a genna tawh kisai a dawnhuna a chun, 2015 MDC election zawh ah Langkhanpau Guite, Chairman hina nuai ah Hill Peoples Alliance (HPA) ministry siamdaw ah um, kum 1 chairman a tuksung ah council/house sitting 1 vei nei ah um, zialo a chu thu pawimaw a um dungzui ah thil chuamchuam genkhawmna ding ah informal meeting tamveitak nei ah um himaleh Khaipao Charman-na nuai ah Education Policy (Transfer & Posting), Trade License leh Infrastructre development tawh kisai genkhawm ding um a hina chung ah CEO mangcha zikthaw ah sitting nei ding ah dawtna siam maleh tuni tiang ah nawl ah um hi’n a gen hi.

Development work kihawp thu ah Langkhanpau hunlai ah development work himhim constituency wise ah hawp a hitak leh opposition group (zia hun lai ah congress group-te) fifty percent sang ah tamzaw kipekhalo ti a genna tawh kisai ah, council member-te development work um te 50% ah kihawm gual hizaw ti’n a gen a, Langkhanpau hunlai ah council property banah diklo tak aha appointment bawl ah um ti tawh kisai in document bangkim suklat thei ding um in a gen hi.

BJP Party meeting tawh kisai ah Langkhanpau lamte mi 4 bep a pan ziak ua, State BJP-te lungna mama, State BJP Secretary Sarat Kumar in party musit leh State BJP President zalo ti ah vauna bawl ti tawh kisai in Khaipao Haokip in meeting hun lemchang ah la, Langkhanpau in member khenkhat puidaw ding ti a hiat ziak ah May 24, 2018 ah State BJP leader-te kiang ah zikthaw ah leave dawtna siam piak, State BJP Secretary leh President te'n hethiam ah pawmpiak ti’n a gen hi.

Zia meeting chu member strength show hilo in kum 2019 ah parliamentary election umna ding ah theitawp sua pangkhawm dingdan genkhawmna hizaw ti’n le a gen a, party sung ah court case um zing pen thil dawi umlo a hina chung ah ladawk ding ah dawtna siam uh hizaw ti’n a gen hi. Chuleh, State BJP lawiupa te tawh a kimukhawm hun ua 2019 Parliamentary Election zawthian masang ah Chairman san thei hilo ding thu State BJP lawiupa te’n bangma genkhalo uh hi’n a gen hi.

Chairman thendawna ding tawh kisai ah Supreme court in High court order umsa stay bawl ah final judgement bawltheita a ti masang sia bangma bawlthei hilo, phalna (advise) pethei ding supreme court sang ah lianzaw/thuneizaw umlo ahi ti hiat ngai ti tawh kisai ah legal expert chuamchuam kimupi ah, P. Kamkholal in ziagual thugen a nei chu ama le legal expert ahilona chung ah a hiatkhial hizaw ding ti’n a gen hi.

ADC/CCpur ah tu leh tu Member 26 um te lak ah Congress in nominate a bawl member 1 tilo a dang zosia BJP party ah ah um, developement tawh kisai ah tu leh tu Central akipat 14th Financial a pat fund hung, ADC account ah um zing pen chu kichu hizawlo, member-te a ding le hizawlo, gamsung khantona ding ah nasepna ding hizaw ti’n le a gen hi.

Mi 12 kum 1 belap piak
Youth Volunteer ding mi 10 lathak
Lamka, June 2 *(Nisin Thuhiltu)* : Shyam Lal Poonia, IAS, DC/CCpur mapuina Selection Committee, National Youth Volunteer (NYV)/CCpur in 2018-19 sung ah Ministry of Youth Affairs & Sports, Govt. of India nuai ah CCpur District ah National Youth Volunteers (NYV) semtu ding mi 10 lakthakna a nei banun a semsa mi 12 te kum 1 sung semzawm nalai ding in a hun a belap piak ui.

NYK/CCpur ah semtu lakna ding a chun, khangthak numei leh pawsal mi 264 in application a pelut ua, June 1 akipat DC Office chamber ah personal interview a um nung in, tuni ah interview zothiang in, zia ah applicant mi 264 te lak a chun, candidate 10 teldaw in a um ua, candidate 5 waiting list in a um ui.

NYC/CCpur nuai ah sem ding ah lakthak ah um te ahiuleh - Nemneihoi, Linda Lhingneimawi, Esther Nengneihoi Haokip, L. Lucy Gangte, K. Paothanjohn Thangniang, Hoineichong Doungel, Felix Chinbizo Tungnung, George Lamlamuon, Vungmuanching leh Paumission Gangte a hiu a, waiting list a umte ahiuleh Tinneihat Haokip, S.Lalminlun, P. Anthony Kaizamuan Zou, T. Kholneilhing leh B. B. Lunlemjohn Vaiphei te a hiu.

NYC ah semsa, kum 1 sung a sep hun ding ah belap piak ah um mi 12 te ahiuleh - Emmanuel Lalremruat, N. Nangsuan, Nguldinglen Hoakip, Ngaijaneng Touthang, Chinneisiam, M. Chinlianthang, Joseph Lalrolien Thiek, T. Ginneikhual, S. Lunkhohao Haokip, Mangminthang Touthang, Jessica Tinneineng leh M. Khupsuanthang te a hiu.

Page 1 of 27