Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

DC/CCpur mapuina’ Childline patdaw ding dan genkhawm

Lamka, Feb. 6 *(Nisin Thuhiltu)* : Deputy Commissioner, DC Office, Tuibong a BRGF Resource Centre ah Shyam Lal Poonia, IAS, DC CCpur mapuina’ District sung a Childline patdawna ding tawh kisai in meeting a nei ui. Government lam apat H. Balram Singh, MPS, SP Pherzawl & Incharge CCpur SP; Ajay Arora, IAS, AC to DC; Ginmuan Ngaihte, MCS, AC to DC; T Kammuanlal Simte, CEO ADCC; Dr. Kim Simte, CMO; GloryKim Singsit, BO DC; James Doujapao, SDO BDO, Tuibong leh Thangboi Gangte, SDO BDO CCpur a pang ua, naupang etkawlna lam tawh kisai ah NGO chuamchuam apat Grace Zamnu, Action for Women and Child Advancement(AWCA), CCpur; V Englian, Superintendent Angels place; Captian David Lalnunmanga, Superintendent, Salvation Army; Rev James Lalrobul, Administrator, New Life Ministry; K Lalbiaksanga, The Mercy society; C Rosangpuii, Probation Officer, Destitute Children Home, The Mercy society; H Siemlien Gangte, Councilor, Mercy Society, Thingkangphai; Robindro Salam, Social Worker, DCPO, CCpur; M Seikhongam, Social Worker; B Surajkumar Sharma, Research Scholar, Department of Anthropology, Manipur University; Holkhomang Haokip, Chief functionary, Rural Aid Service(RAS); Pauzagin Tonsing, Director, Centre For Community Initiative(CCI); Florence Lamkhongai Haokip, Chairperson, Child Welfare Committee(CWC) & Secretary, SEEDS; Esther Vaiphei, President, SHARE, New Mata; Jenet Lemkim, Helper, SHARE, New Mata; Ningngaihkim, Home Mother, Amazing Grace Abandoned Home; Pau Johnson, Founder, Amazing Grace Abandoned Home; Letkhongam, CC(AWCA), K Thangmuansang, PA to Secretary(AWCA), Zionthanga, Caretaker, Happiness Home, James Infimate, PA, OB Home, Nicky Thanga hrangchal, Executive, Chief Organiser, HIM, Lalbiekmawi, Counsellor, G Lianminthang, Coordinator, AWCA chuleh NGO chuamchuam apat official-te a pang ui. Meeting hun ah Childline India Foundation apat Sabyansachi Chatterjee, Senior Coordinator leh Official-te a pang ui. Childline Toll Free Number 1098 patdaw a, zia contact number ah naupangte’n a hinkhua ua haksatna a tuakte uh NGO te hiatsak ah, a panpi theina ding ua Childline India Foundation in Childline Number patdawna ding ah a panlakna uh District sung a naupang lam tawh kisai NGO chuamchuam tawh meeting nei uh hi’n a kigen hi.

CCpur Police in khamthei zuak mi 2 man

Lamka, Feb. 6 *(Nisin Thuhiltu)* : Churachandpur District police in tuni, 6th February, 2018, 12:00 PM tuam ah Tuibong Bazar, Churachandpur ah khamthei ah sumkawl vei um ah hiatsak a mu tawh kitawn in Inspt. Romel Gangte (OC/Drug Cell Unit) leh a team te, SI Seikhotinlal of CCP-PS leh a team te banah W/ASI Chingzamawi panna women Police team ten SDPO/CCP mapuina leh Addl. SP (L&O) supervision bawlna nuai ah delzui in muanmaw ah um inn 2 ah search operation a bawl ua, zia hun a chun khamthei tawh mi 2 a mandawk ui. Mr. Letngam Haokip (28) s/o Jamthang of Tuibong Bazar ah CCP police in WY Tablets 31 a mudawk ua, inn neitu Mr. Letngam Haokip le man in FIR NO. 7(2)18 CCP PS U/S 22 (b) ND&PS Act nuai ah case a ziklut ui. Zia nung a chun, Mrs. Hatneikim Haokip (37) w/o Mr. Jangkhohao Haokip chenna inn ah police team in WY Tablets 217, kani (Opium) 240 gms leh khamtheina zawkna sum Rs1,10,800/- a mandawk ua, Mrs. Hatneikim Haokip le man in FIR No.8(2)2018 CCP-PS u/s 18(b)/22(b) ND&PS Act nuai ah case ziklut in a um hi.

One Day Free Mobile Medical Unit Camp bawl

Lamka, Feb. 6 *(Nisin Thuhiltu)* : CMO Office, CCpur in Sagang PHC huapsung ah um Gothol Khua ah Sênsi(Measles) natna a um hi ti report a mu dungzui in, CMO CCpur panlakna in Rapid Response Medical nuai ah District Mobile Medical Unit team khat in tuni zingkal dak 10 apat in Gothol Khua ah One Day Free Mobile Medical Unit Camp a nei ui. Camp ah, Dr Ngahneikim Haokip, District Surveillance Officer; Dr Sonia Monica, SMO, CMO Pool; Dr Tongjakai Haokip, Pediatrician, District hospital; Chungzaniang, Nurse leh John Biate, Epidemiologist, IDSP, NHM-te’n damlo etna a nei ui. Khaw mipi 142 a ki-etsak ua, zia lak achun, mi 9 in Hemoglobin test a bawl ua, mi 21 in RBS test chuleh mi khat in Widal test a bawl ui. Damlo ki-etsakte a tangpi in hitâng, kikhu leh khawsik ahiu a, mi 80 kiang ah Vitamin A a hawmdawk ui. Sênsi vei mi pani mudawk uh hi’n a kigen hi.

Lok Adalat um ding
Lamka, Feb. 6 *(Nisin Thuhiltu)* : A hungtung ding February 10, 2018 zingkal dak 10:30 apat National Legal Services Authority leh Manipur State Legal Services Authority mapuina nuai ah CCpur District Legal Services Authority te’n Chief Judicial Magistrate Court Compound, Tuibong ah Bank tawh kisai, chuleh innkuan sungthu tawh kisai ah buaina chuamchuam neite a ding ah Lok Adalat um ding ahia, zia hun achun thubuai chuamchuam piaklut ah umte genkhawm/thutanna siampiak hiding ahi.

Plastic bags tawh kisai genkhawm

Lamka, Feb. 6 *(Nisin Thuhiltu)* : Deputy Commissioner, DC Office, Tuibong, Conference Hall ah Shyam Lal Poonia, IAS, DC CCpur mapuina’ Chaurachandpur District sung ADC, Forest, PHED, Shopkeeper Association leh M/S MK Plastic Dimapur palai ten tuni, 6th Feb. 2018 in Churachandpur District sung ah non-biodegradeable plastic carry-bags sukbeina ding tawh kisai genkhawmna a nei ui. Zia hun a chun, 15th April 2018 a pat non-biodegradeable plastic zawk khap ding in lemsakna a nei ua, Churachandpur District chu non-biodegradeable plastic free district suaksak ding in lemsakna a nei bawk ui. Chuleh, Churachandpur Shopkeeper Association leh M/S MK Plastic Dimapur in biodegradeable plastic supply bawlna ding tawh kisai kinawptuana MoU suai a kai ding in lemsakna a siam ui.

JAC Against Killing of Ch. Mani Meetei in Imphal-CCppur lampi khak

Lamka, Feb. 6 *(Nisin Thuhiltu)* : JAC Against Killing of Ch. Mani Meetei in tuni, February 6, 2018 ah Tedim Road, Torbung Area ah Bandh a puan uh, State Capital, Imphal tawh kikal kikawmtuana hun bangchan hem a sunawngkai man hi. A chiata January 27, 2018 nitak dak 8:00 vel in Thoubal Haukha ah Winger in Chungkham Mani Meetei (58) s/o Ch. Amumacha Meitei of Phaugakchao Ikhai Maning Leikai phulum in a taisan a, thiltung tawh kisai Thoubal Police Station ah FIR ziaklut himaleh, tuni tiang ah suizuina tawh kisai ah lawtinna a umlo ban ah, a phulumtu gari leh a hektu hina natiang hiat ahinailo ziak in JAC Against Killing of Ch. Mani Meetei kiti phudaw ah um in, suizuina a kinzawk ding phutna ah bandh a bawl uh hi’n Convener, Kh. Basanta Kumar Singh, in a gen hi. JAC in government apat dawtna dang bangma neilo ahidan leh, lusûn innkuante thuakpi kawm ah phukhatu gari leh a hektu matdaw ah Dân tawh kituak ah gawtna piak ding dawi uh hi’n a kigen hi. Bandh hun ah Torbung area, Tedim Road dung ah gari taitua muding a umpua, himaleh sûn ah Bishnupur Police-te a tun phat un, gari chawlsak ah umte chiasak in, ngaina gual ah gari taizawm hi’n a kigen hi. Ch. Mani Meetei ahileh nicheng nekkawm hawl ahi dungzui in, Thoubal Haukha mun ah Retaining Wall bawl ah um zinglai, zia gual tuaksiatna chu tuak ahi. A zi chuleh chanu 5 leh chapa khat nusia in, tuhin a luang JNIMS Morgue, Porompat ah kawi hinalai hi’n a kigen hi.

Assam Rifles transit camp ah bomb 2 puak; jawan 9 liam

Imphal, Feb. 6 *(Nisin Thuhiltu)* : Assam Rifles transit camp, Minuthong, Imphal West ah bomb 2 puak in Assam Rifles personnel 9 ten liamna a tuak ui. Liamna tuak te lak ah mi 2 te serious un a kigen hi. Transit camp compound ah a kizawm ah nitaklam dak 6:00 tuam ah bomb chu puak hin a kigen a, bomb khat chu western gate gate kiang ah puak, bomb puak masa umna a pat 50 metre ah gamla bomb dang khat puak kit hin thudawnna’n a taklang hi. Liamna tuak te chu - Sanju Lama of 25 Assam Rifles, Amar Sargary of 33 Assam Rifles, Umesh Kumar of 42 Assam Rifles, Shameer, H. Konyak, Dependra Subedy, Raj Kishor, Pradeep Sharma of 8 Assam Rifles leh Rajesh Kumar of 2 Assam Rifles te a hiu a, Shija Hospital and Research Institute tut in a um ui. Zia ah bomb puak chu zani Imphal Polo ground ah grenade 2 a puak ziak ah Assam Rifles jawans 2 in liamna a tuak nung ua thil tung kit hi a hi.

Diklo tak ah fund kimatna khual hiding: Minister Th. Shyamkumar

Imphal, Feb. 6 *(Nisin Thuhiltu)* : Forest and Environment Minister Thounaojam Shyamkumar in 2009-2012 ah Short Term Action Plan (STAP) nuai ah Catchment Area Treatment leh Biodiversity implement bawlna ding ah Loktak Development Authority (LDA) in Forest Department kiang ah total Rs 50,20,73,010 fund release a bawl, a hiding gual ah mat a hinlona tawh kisai chu khual (investigate) hiding in a gen a, zia chungchang chu Chief Minister tawh genkhawm zo ta a hidan uh a gen hi. Fund release kibawlna 12th Finance Commission Catchment Area Treatment nuai ah 2009-2012 ah first instalment Rs 44,79,79,010 release kibawl, 2009-2010 ah second instalment Rs 1,09,70,000 leh Biodiversity, third instalment ah Rs 1,09,70,000 release ah um hin a gen hi. Zia ah fund chu a hiding gual tak ah kimang hileh Thoubal Division, Bishnupur Division, Northern Forest Division, Central Division, Eastern Forest Division, Tengnoupal Forest Division, Ukhrul Division leh Southern Division te kituptak ah siamhawi hiding a hidan taklang in Minister Thounaojam Shyamkumar in media persons te panna, Forest officer lui te check bawl hiding hin a gen hi.

State Govt. 7th Central Pay Commission chiapi theina ding ngaitua zing: Dy CM

Imphal, Feb. 6 *(Nisin Thuhiltu)* : 11th Manipur Legislative Assembly, 4th Session ah tuni’n Deputy Chief Minister, Y. Joykumar Singh, in charge of Finance in State sung ah 7th Central Pay Commission chiapi theina ding tawh kisai ah State Government in panlakna nei zing a hidan a gen a, himaleh tu dinmun ah state chu 7th Central Pay Commission recommendation chiapi thei ding ah umnai tadilo hin a gen hi. State Government leh Private Firms/Companies etc ten Memorandum of Understandings (MoU) suai a kainau tawh kisai a genna a chun, November 21-22, 2017 g ah um North East Development Summit (NEDS) hun ah MoU 39 chung ah suai kikai in a gen a, himaleh investments details, activities, action plans etc. sukfel hinailo hin a gen hi.

Numei van zuak pawl in “ann-ngawl kiphinna” pan

Imphal, Feb. 6 *(Nisin Thuhiltu)* : Ima Keithel (market) ah numei van zuak pawl khat in “ann-ngawl kiphinna” pan in, Imphal Municipal Corporation office le chabi’n a kam ui. Hanjabam Binodkumari, Khwai Trustee Development in a genna a chun, earthquake in Ima Keithel (market) a suksiat masang ah Ima market 2 ah card holders 48 a umna, set 2 leh 3 um sek a hidan taklang in repairing zaw a hi tawh kitawn ah January 22, 2018 ah a hawnna a kinei nung ah IMC in set 2 ah numei vanzuak 4 um theisak a guat chu pawmlo a hidan uh taklang in, van zuak mi 48 te dawidan ah arrangement a um masang sia, “ann-ngawl kiphinna” sunzawm ding uh hin a gen hi.

CM in hand grenade 2 kisupuak nasatak ah dem
Imphal, Feb. 6 *(Nisin Thuhiltu)* : Chief Minister N. Biren Singh in tuni’n Imphal, City Police Station huapsung ah um Fire Services headquarter tawh kinai leh high security zone ah um Mapal Kanjeibung, Pologround ah zani, 5th Feb. 2018 nitak dak 5:30 tuam ah hand grenade 2 a puak ziak ah Assam Rifles jawans 2 in liamna a tuaknau tawh kisai chu State Assemnly session ah a thugen hun in nasatak in demna a bawl hi. Chief Minister in zia gual nasep thilbawl neite chu hawldaw hiding leh a kituakpiu gawtna piak hi teitei ding in a gen a, bomb supuak tute matdawna ding ah search operations chiatha zing hin a gen hi. Zia thiltung chu a khualna nei ding ah Special Investigating Team (SIT) siamdaw pai hiding a hidan taklang in, tha masa M Sector ah bomb puakna tawh kisai khualna nei ding ah SIT siamdaw ah a la um, Additional DGP Pramod Asthan in amapui hin le House a hiatsak hi.

State Assembly Session ah Demands For Supplementary Grants 38 pass

Imphal, Feb. 6 *(Nisin Thuhiltu)* : A chiatha zing 11th Manipur Legislative Assembly Session 4na ah House in tuni’n 2017-2018 a ding in demands for Supplementary Grants 38 a pass a, zia sia chu a kigawm ah Rs 12,86,53,31,000 a hi zo hi. Passed ah um demands for supplementary grants te lak ah financial year bei tiang ah piakdaw ding te chu - State Legislature a ding Rs 84,000, Secretariat a ding Rs 8,02,26,000; Land Revenue, Stamps & Registration leh District Administration a ding Rs 8,87,72,000; Finance Department a ding Rs 15,00,000, Transport a ding Rs 1,28,79,000, Police a ding Rs 60,41,78,000; Public Works Department a ding Rs 93,19,04,000, Information & Publicity a ding Rs 2,73,71,000 leh Education a ding ah Rs 1,89,76,000 a hi. Chun, Medical, Health & Family Welfare Services a ding Rs 65,33,25,000; Municipal Administration, Housing & Urban Development (MAHUD) a ding Rs 170,01,31,000, Labour & Employment a ding Rs 3,14,93,000; Department of Tribal Affairs & Hills Development a ding Rs 200,28,55,000; Consumer Affairs, Food & Public Distribution a ding Rs 29,29,85,000; Co-operation a ding Rs 2,94,57,000, Agriculture a ding Rs 7,25,20,000; Dairy Farming pang ah Animal Husbandry & Veterinary a ding Rs 11,78,96,000, Environment & Forest a ding Rs 14,35,91,000; Community leh Rural Development a ding Rs 48,92,29,000 banah Public Health Engineering a ding Rs 72,47,08,000.
Zia lo chun, Power a ding Rs 105,29,72,000; Youth Affairs & Sports Department a ding Rs 7,77,95,000; Election a ding Rs 16,80,29,000 for Election, Sales Tax leh van chuam chuam ah tax/duty a ding Rs 45,03,000; Jails a ding Rs 3,77,000, Rehabilitation a ding Rs 4,40,69,000; Minor Irrigation a ding Rs 2,56,50,000, Fisheries a ding Rs 4,56,14,000, Panchayat a ding Rs 4,80,86,000; Water Resources Department a ding Rs 1,49,76,47,000, Art & Culture a ding Rs 1,51,48,000; Horticulture & Soil Conservation a ding Rs 4,18,88,00; Social Welfare Department a ding Rs 38,76,09,000; Tourism a ding Rs 41,33,97,000, Science & Technology a ding Rs 1,76,56,000, Minorities banah Other Backward Classes leh Scheduled Castes Department a ding Rs 59,27,21,000, Relief & Disaster Management a ding Rs 40,80,54,000 leh Information Technology a ding Rs 36,000 a hi. Deputy Chief Minister leh Finance lam in-charge, Y. Joykumar Singh in tuni Assembly session in Manipur Appropriation (No.1) Bill, 2018 luidawna le a nei hi.

User Rating: 0 / 5

Star InactiveStar InactiveStar InactiveStar InactiveStar Inactive

Manipur Legislative Assembly, 4th session ah State Budget luidaw ah um

Imphal, Feb. 5 *(Nisin Thuhiltu)* : A chiatha zing, Manipur Legislative Assembly, 4th session (Budget Session) ah tuni’n Deputy Chief Minister (in-charge Finance) Y. Joykumar Singh in Budget Estimates, 2018-19 luidawna a nei hi. Finance Minister in Budget Estimates 2018-19 a luidaw dungzui in revenue receipts Rs 12,648.94 crore leh capital receipts Rs 1084.68 crore panna’ total Receipts estimated Rs 13,733.62 crore kawi in a um a, State’s own tax leh non-tax receipts ah Budget Estimates Rs 1047.58 crore leh Rs 248.53 crore kawi a hi.

Deputy Chief Minister leh Finance Minister Y. Joykumar Singh in Budget tawh kisai a genna a chun, government in a umsa tax rate bangma a san danglam umlo maleh kum 2017-18 ah Revised Estimate Rs 4908.76 crore chu 15% ah kisukal in a gen hi.

Finance Minister in kum 2017-2018, Expenditure Estimates ding in total gross expenditure tawh Rs 13,731.04 crore biatthiat a hidan taklang in, State Consolidated fund Rs 3.68 % ah kisukal in revised estimates Rs 13,243.67 crore bithiat a hidan a gen hi. Total gross expenditure Rs 1002.82 crore lak ah Charged expenditure leh a dang Rs 12,728.22 crore chu Voted Expenditure ah kikawi in, Total Revenue Expenditure Rs 11,123.82 crore a hi.

Finance minister in Capital outlay estimated Rs 2252.89 crore ah biathiat a hidan gen in, budget estimates dungzui ah capital outlay 2018-19 ah kisuniam himaleh 2017-18 budget estimates Rs 2066.19 crore sang ah tamzaw hinalai in a gen hi. Fiscal deficit ahileh (-) Rs 612.41 crore ah estimate bawl in a um a, zia chu GDP 2.32 % hizo leh State Fiscal Responsibility & Budget Management Act nuai ah 3.5% tiang ah fixed a hidan a taklangkawm in kum 2018-2019 sung ah revised estimates 38.25 % lak ah total outstanding debt 37.34% kawi a hi.

Finance Minister in Revised Estimates 2017-18 tawh kisai a genna a chun, Government in total gross expenditure Rs 12,420.65 crore ah bithiat a hidan gen in, zia a chu revised Rs 13,243.67 crore leh a kisukal Rs 832.02 crores pang in a gen a, Revised Estimates Rs 915.72 crore chu Consolidated Fund nuai ah Charged expenditure hiding, a dang Rs 12,327.95 crore chu Voted expenditure hiding in a taklang hi. Kum 2017-2018 ah developmental outlay Rs 4972.07 crore kikawi chu tu ah Revised estimates Rs 5388.82 crore kikawi, Budget estimates 2017-18 ah Revenue receipts leh Capital receipts Rs 11,096.25 crore leh Rs 1414.35 crore kikawi chu Rs 12,025.33 crore leh Rs 1031.57 crore ah sukkal a hi.

Public procurement thil ah transparency leh efficiency chung ah Government in state sung ah sectors/department chuamchuam ah khantona a um vek ding ngaikhawk mama in Finance Minister in a gen hi.

District Level ah World Cancer Day mang

Lamka, Feb. 5 *(Nisin Thuhiltu)* : Tuni, February 5, World Cancer Day a hi dungzui in district level ah District Health society CCpur puihuaina nuai ah “We Can, I Can” ti thupi ah nei in World Cancer Day 2018 mat in a um hi. World Cancer Day 2018 matna kawm ah Forest Gate, Tuibong a pat District Hospital tiang in Marathon a um a, Rakesh Balwal, IPS SP CCpur zi Deepa Balwal in Marathon flag off a bawl hi. World Cancer Day 2018 Marathon ahileh Forest Gate a pat Tedim Road chuan in, Tedim Road a pat IB Road, District Hospital in a zo ui. Marathon a chun, Shyam Lal Poonia, IAS DC CCpur, District Level Officer, Women Police, First IRB, GNM Nursing Training School ah tutor leh student, medical staff te a pang ua, paungaina mang in Cancer natna piansak thei thil te a pat kikawi kang pawimaw a hidan tangko in, District Tobacco Control Society, CCpur in chep leh muam a pat cancer piang thei a hidan suklatna poster a siam te taklat in a um hi. Marathon zaw in signature campaign a um a, zia nung a chu Medical superintendent MS Conference hall, District Hospital ah District Tobacco Cell, District health Society, NHM, Ccpur te zintunna nuai ah World Cancer Day National program for prevention and control of cancer, diabetes CVD and Stroke NPCDCS ti mat in a um hi. Zia hun a chun, Dr Kimngaiching Simte, CMO, CCpur, Deepa Balwal leh Shyam lal Poonia, IAS DC Ccpur ten chep leh muam a pat kikawi kang ding pawimaw a hidan genna a nei a nei ui.

Eastern Vaiphei Conference khak hita

Salampatong, Feb. 5 *(Nisin Thuhiltu)* : Vaiphei Peoples Council (VPC) Eastern Block leh Zillai Eastern Block (ZEB) in Salampatong Village, Kangpokpi District ah Jan. 30- Feb. 5, 2018 sung ah ‘Rejuvenating the Spirit of Oneness’ ti thupi nei ah Eastern Vaiphei Conference- cum-Sports Meet- 2018 a nei uh chu tuni, Feb. 5, 2018 in a khakna a um hi. Zia hun chu O. Lukhoi Singh, MLA, Wangoi A/C; Kaiku Rajkumar, Manipuri Actor & Social worker; S. Kunjakishore Singh, MCS Director Sericulture leh P. Gojendro, Deputy Director, JNIMS ten Chief Guest hina tawh a uap ua, Bony , Manipuri Actor; T. Bangkim, Proprietor NRL leh Kh. Chandrakumar, Social Worker ten Special Guest hina tawh uap in, Dr SL Lunzapau Vaiphei, Principal Moreh College, Ex. Prez. Zillai GHQ in Functional President hina tawh a uap hi. Functional President hina tawh hun matna uap, Dr Lunzapau Vaiphei in a thugenna a chun, Zillai te'n, Khua Hausa, Nu leh Pa Za bawl ding, chiana bangkim te Nu leh pa hiatsak zing ding, amau a pat malsawmna dawt zing ding pawimaw a hidan gen in, khangthak te tilkhona a nei a, Manipuri Film Star hun matna uaptu te chu Vaiphei History/Khua/Gam base ah film bawl ding in chialna a bawl hi. Eastern Vaiphei Conference- cum-Sports Meet- 2018 hun sung a chun, khua 30 tuam te chiakhawm in, Pathian thu ah kiziltilna, Melhawi kitetna, Laa sakthiam ki demna, football, volleyball panna games chi chuamchuam in gualsiakna a nei ua, Football ah Kamutangnuam Youth Club leh L. Tangnuam (Haraothel) in First leh Second hina chang in, Numei Volleyball ah Thangza Youth Club leh Kamuching in First leh Second hina a chang ua, Pawsal Volleyball ah K. Tangnuam leh Kamutampak, Saronphai in First leh Second hina a chang ui. Eastern Vaiphei Conference- cum-Sports Meet ahileh kum 2 dan ah um sek a hi.

Free Educational Tour 2018

Lamka, Feb. 5 *(Nisin Thuhiltu)* : 54 Battalion, Border Security Force (BSF) in tuni, 5th February 2018 in Sanga Moun In Orphanage Bijang, Churachandpur ah um naupang te ding in “Free Educational Tour 2018” organize a bawl a, staff 4 te mapuina nuai in naupang 29 ten Imphal khawpi sung ah um - Khongjom War Memorial Complex leh Kakching Garden panna chuamchuam etna a nei ui. Zia Free Educational Tour 2018 ah chia ding te chu Sh. MKT Simte, Second in Command (2iC), 54 Battalion, Border Security Force (BSF) in zingkal dak 7:15 in flag-off bawlna a nei hi.

YVA GHQ election um ding
Lamka, Feb. 5 *(Nisin Thuhiltu)* : Young Vaiphei Association (YVA) General Headquarters in a hung tung ding, February 22, 2018 leh kum 2018 - 2021 sung ah President leh Vice-President ding telna (General Election) nei ding a hi. Zia ding a chu, February 12, 2018 nitaklam dak 5:00 tiang ah Nomination form piaklut thei ding, February 17, 2018 ah Scrutiny um ding a hi. Nomination Fee ahileh President ah Rs. 1,000 leh Vice-President a ding ah Rs. 700 hiding a hi. Nomination form ahileh Th. Joel Phaltual, Red Cross Road kiang ah lakthei ding a hi. Chun, General Election hun ah YVA GHQ, CEC in Electoral Roll approved a bawl voter te’n vote khethei ding ahiu a, vote kheding ten Identity proof na ding ah Aadhar Card /Electoral ID/ Driving License / Govt. in a issue ID card khat chawi ngai ding a hi.

Ropiang Foundation in Jackets piakdawna nei

Lamka, Feb. 5 *(Nisin Thuhiltu)* : Ropiang Foundation Trust (RFT) in tuni, February 5, 2018 sunnung dak 1:30 in a office uh, Mission Road, Hiangtam Lamka ah Free Distribution of Genuine Luxury Jackets for Needy Persons kiti a bawl hi. Zia hun chu Shyam Lal Poonia, IAS, DC Churachandpur in Chief Guest hina tawh a uap a, Deepa Balwal w/o Rakesh Balwal, IPS, SP Churachandpur in Guest of Honour hina tawh uap in, Ajay Arora, IAS, AC to DC, Churachandpur in Functional President hina tawh a uap hi. Hun matsung in Genuine Luxury Jacket chang thei ding ah teldaw ah um kum 50 chunglam mi 20, PwD mi 4, Orphan 15 leh inchen haksa mi 47, a kigawm ah mi 78 te Jacket piak in a um ua, khuallian hina tawh hun matna uaptu ten Jacket piakdawna a nei ui. Zia ah jacket te chu aman tawmpen Rs. 4,500 leh aman tampen Rs. 20,000 hin a kigen a, tunung ah jacket a umdan zil ah hawp zel hiding in Ropiang Foundation Trust (RFT) thuneitu ten a gen ui. Ropiang Foundation Trust ahileh January 2018 ah kiphutdawk a hia, Trustee Chairman Dr. Thangchinkhup Guite pu (gandfather) min putsak a hi. Panpi ngai te panpi ding tupna tawh kiphutdawk hin a kigen a, Advisory Board Member-te’ panlakna Jaipur ah um ICICI Academy of Skills a Electric & Motor Repairs ding ah Churachandpur a pat mi 15 sawlta le a hi.

Mitamtak in JP Selection dawr ah School uniform ding chaw

Lamka, Feb. 5 *(Nisin Thuhiltu)* : Tukum thak 2018, Academic Session a ki pat kit tak tawh kitawn in, nu leh pa tamtak ten a chateu school kaina ding a buaipi zing ua, Churachandpur khawpi sung ah school banghem zat ah kai ding te uniform ding Old Bazar, JP Selection dawr khel khel ah chawk ngai ah a um ziak in tulak in JP Selection dawr ah school uniform chaw ding mi a tam thei mama hi. School cha patg te school uniform chawnuam a tam ziak in mi hunkhawp te dawr ah lutsak in dawr kawt khak zel in, a ban ah chaw di te'n innmai ah amau lut kit hun di ngak in a kitiang mai sek ui. Churachandpur khawpi sung ah dawr/dukan tamtak a umna, School uniform ding dawr/dukan khat ah kichu luilui ah chawk ding ah a umna chung in, school thuneitu te leh dukan/dawr neitu te kal ah kiho matna um hingei ding ah ginchatna nei nu leh pa tamtak a um ua, sun nitum phialphial ah school naupang te uniform ding chawkna hun a sukbei uh khawk a sakthu’u taklang kawm in, a lemchangzaw thei ding ah arrangement a um ding a nawpthu’u le a taklang ui.

Auto Owners Association in Election nei ding
Lamka, Feb. 5 *(Nisin Thuhiltu)* : All Churachandpur District Diesel Auto Owners Association (ACDDAOA) in February 7, 2018, 11:00 AM leh Kaichin Park, Mata khua ah General Assembly-cum-Election 2018 nei ding a hi. Zia hun chuleh Diesel Auto Association line 21 a pat palai tamtak chiakhawm ding, Khamsuan Ngaihte, Secretary leh Dongmang, Finance Secretary ten Report piakna nei ding, Presiding Officer te puihuaina nuai ah election um ding, Pastor Chinkhansuan, Local Pastor, EBCC Mata in teltin thak ah um te pauchap piakna nei ding a hi.

Dorcas Road lampi siamthak hizing
Lamka, Feb. 5 *(Nisin Thuhiltu)* : Dorcas Road lampi, Tedim Road a pat Tipaimukh Road tian saimthakna nasep chiatha zing in lampi tuni, 5th Feb. 2018 in black topping pat in a um hi. Zia lamlian chu Teddim Road leh Tipaimukh road kawmtuana ding ah lampi pawimaw tak a hia, January 30, 2018 ah nasepna kipan hita a hi. Dorcas Road lampi siam thak ah a umna chung a chun, Village Authority in lampi dung ah cheng te chu tui lakna ding, tuilawng phumna ding ah lampi kuama’n cho sialo ding in hiatsakna thusua a bawl a, zia gual bawl nuam ding te chun Black topping patma ngei ah tuilawng phum ding in chialna leh hiatsakna a bawl hi. Dorcas Road lampi ahileh Manipur State Funding (Inter Village Road) bawlna nuai ah kisiam thak a hia, Special Contractor H Thangzamuan contract hina nuai ah kisiam a hi.

Skill Development training hawng
Lamka, Feb. 5 *(Nisin Thuhiltu)* : Centre for Community Initiative (CCI) organize bawlna leh NABARD sponsor bawlna nuai ah Malsawm Abillity Resource Centre (MARC), Pearsonmun ah ni 13 um ding Training on Skill Development for Persons with Disabilities kiti hawndawna tuni, February 5, 2018, 11:00 in a um hi. Zia hun a chun, Pauzagin Tonsing, Executive Director, CCI in Training tawh kisai taklatna a nei a, Thangchinkhup Guite, DDM, NABARD in training hawnna leh thugenna nei in, Pastor G. Sanglian, Local Pastor, NLBC in Pathian kiang ah training kawlsakna a nei hi. Training hunsung a chu, Rights & Entitlement tawh kisai ah Pauzagin Tonsing in ziltilna nei ding a hia, Personality Development tawh kisai ah Niangngaihmang in ziltlna nei ding leh Entrepreneurship & Book Keeping tawh kisai ah CT Lian ziltil ding a hi. Chun, Language & Communication Skill tawh kisai ah Niangngaihmang leh CCI-TMI ah Special Educator te’n ziltilna nei ding, Artificial Flower Making tawh kisai ah Manngaihkim in ziltil ding leh Pickle Making tawh kisai ah Joy Singson in ziltilna nei ding a hi. Zia Training a chu, District sung ah gualphalo mi 15 te a pang ua, February 9, 2018 a pat Practical class neipan ding a hiu.

Feb 8 ah Lenlai Club in UKB maitua ding
Lamka, Feb. 5 *(Nisin Thuhiltu)* : Lamka Football Ground, Hiangtam Lamka ah 70th Zomi Namni Football Tournament chiatha zing in, tuni, 5th February 2018 in match 2 a um hi. Sun dak 12:00 in Happy Feet Football Academy HFFA leh Headquarter sports Club HSC a kihel ua, zia hun a chun, first half tiang ah goal kikhum tua umlo maleu second half minute 58 ah HFFA ,Jersey Number 29, Ginsanglian in HSC goal ah goal 1 a khum chu, HFFA ding ah gualzawna suak in, 1-0 in gualzawna a chang hi. Nitaklam dak 2:00 ah YCP leh ZSC te a kihel ua, match kipat nung minute 39 ah ZSC, Jersey number 8, Ginboi in YCP goal ah goal 1 khum in kihelna amapui ua, ZCS in tha zaw mama in second half nung ah minute 57 in ZSC, jersey number 12 Mangsianlal in goal 1 khumbe in, minute 66 leh minute 69 ah ZSC, jersey number 5 Lamboi Kipgen in, a kizawm ah goal 2 khum kit in 4-0 in kihelna amapui ua, minute 74 ah YCP, Jersey number 14 Mangthianmuan in goal 1 khum maleh gualzawna chang theilo in ZSC in 4-1 in gualzawna a chang hi. League match a kichai tawh kitawn ah February , 2018 ah match umlo ding a hia, February 8 leh Zomi Namni Football Tournament 2018 ah champion la thei ding Club lian mama pani - United Khawmzim Brothers (UKB) leh Lenlai Club te kihel ding a hiu.

State financial dinmun in hawilam manaw: Joykumar Singh

Imphal, Feb. 5 *(Nisin Thuhiltu)* : Deputy Chief Minister leh State Finance Minister Yumnam Joykumar Singh in Manipur Legislative Assembly, 4th session (Budget Session) ah tuni, 5yh Feb. 2018 ah State Budget a luidaw zaw ah thuthak lakhawm mite kiang ah a State Budget tawh kisai a genna a chun, state financial dinmun in hawilam manaw a hidan gen in, overall Gross State Domestic Products (GSDP) rate chu next fiscal year, 2018-19 ah 11.95 % ah kal thei ding hin a gen hi. Government in mipi te welfare a ding ngaikhawk mama a hina chung ah Budget Estimates, next fiscal 2018-19 dungzui ah - Skill Development, Housing, Drinking Water, Power leh Sports khanto sak ding thiltup ah nei a hidan gen in, Govt. in mipi te welfare a ding ngaikhawk mama a hina chung ah Budget Estimates, next fiscal 2018-19 dungzui ah - Skill Development, Housing, Drinking Water, Power leh Sports khanto sak ding thiltup ah nei a hidan gen in, State Government in economic activity chuamchuam subuai thei ding bandh, blockade leh thil dang dang te kituptak ah enzui ding, Primary, Secondary leh Tertiary Sectors te masawn mama ta hin a gen hi. Finance Minister Joykumar Singh in a gen belapna a chun, GST, tax collection kibelap zing a hina chung ah state financial dinmun hawi chuam mama leh Capital Outlay le kibelap thei ding, state sung ah Centrally Sponsored Schemes te kituptak ah chiapi ah um hin a gen hi. Chuleh, sports sector panna lam chuamchuam ah infrastructures siamhawi ding tamtak um a hidan gen in, next fiscal year 2017-2018 sung ah artificial football grounds 4 leh artificial hockey field siamdaw ding, ziana ding a chu Khelo India scheme nuai ah Union Finance Minister chu fund allocate bawlbe ding ah chialna bawl in a gen hi.

State ah Assembly Session ah ex- Minister (L) Holkholet Khongsai suunna nei
Imphal, Feb. 5 *(Nisin Thuhiltu)* : A chiatha zing, Assembly Session ah tuni’n tunaicha a la mualliam ex- Minister (L) Holkholet Khongsai suun in a um a, Speaker ofthe House, Y. Khemchand Singh in zia hun chu mapui in, House leader Biren Singh in suunna thu a gen hi. Holkholet Khongsai ahileh 1932 ah Sita Village, Tengnoupal Sub-Division ah piang a hia, District Council (1973 ) ah teltin ah a la um, 1980 General Election ah Manipur Legislative Assembly member ding ah teltin ah um kit leh Minister of State -Power, Education, Co-operation panmun a la tu a hidan community chuamchuam te kipumkhatna ding ah theitawpsua ah panlatu khat a hidan House leader Biren Singh in a gen hi. Opposition leader O. lbobi Singh in le suunna thu gen in, famta Holkholet Khongsai chu principle nei politician a hidan a gen hi. Opposition member T. N. Haokip, Yamthong Haokip leh Sanasam Bira ten le famta Holkholet Khongsai suunthu genna a nei ua, House in famta Holkholet Khongsai suunna’n minute 2 silence tawh a neizo hi.

ADC TEACHERS CAUTION TO LAUNCH STRIKE

Imphal, Feb. 5 *(Nisin Thuhiltu)* : All Manipur District Council Teachers’ Association (AMDCTA) in tha 4 tha-law (salary) a vaima theipen ah government in a piaklo ahileh kiphinna pan ding a hidan uh a taklang ui. Chun, state education department nuai ah primary teacher te tawh a tha-law uh pay scale kibangah sukkal ding phutna le bawl in, pensionary leh retirement benefit umsak ding le a phutna a nei ui. Manipur Press Club, Imphal ah AMDCTA President Guishipao Panmei in thuthak lakhawm mite kiang ah a genna a chun, October 2017 – January 2018 tha-law mutalo a hidan uh taklang in, February 10, 2018 tiang ah piak ahilo ua leh kiphinna pan ding uh hin a gen a, Christmas festival ziak ah December 2017 tiang ah tha-law piak thiang ding ah state government in order a sua himaleh autonomous district council education department nuai ah teacher te tha-law piak hilo uh hin a gen a, tha-law hentang ah um chu dan-kal hin a gen hi.

State education department nuai ah primary teacher ten tha-law (salary scale) Rs. 9300-34,800 + AGP Rs 3000 amu’u himaleh ADC nuai ah primary teacher ten tuni tiang ah pay scale Rs 5200-20,800 + AGP Rs 2400 mu sek uh a hidan gen in, ADC nuai ah semtu te khenchuam ah um a hidan uh a gen hi. Chuleh, January 1, 2005 ah ADC nuai ah semtu te ding ah New Pension Scheme / Contributory pension Scheme umsak himaleh teacher ten zia gual facility chu mukha nailo uh hin a gen hi. Government in “Go to the Hills” ti ah a tangko zing chu hills leh valley ah semtu kibang tak ah bawl (treatment) a hitak leh buting thei pan ding hin le AMDCTA President in a gen hi.
Pologround, Imphal ah hand grenade 2 puak; Assam Rifles jawan 2 liam

Imphal, Feb. 5 *(Nisin Thuhiltu)* : Imphal, City Police Station huapsung ah um Fire Services headquarter kiangnai high security zone, Pologround ah tunitak dak 5:30 in hand grenade khat a puak a, ziana a chun Assam Rifles jawans 2 in liamna a tuak ui. Liamna tuak jawan 2 te chu - Manbahadur Limbu (38) s/o (L) Limbu of Sikkim, 31st National Highway leh Uttamkumar Pun (52) s/o (L) Nanda Bahadur of Saitual district, Aizawl, Mizoram a hiu a, a pa niu ah 6th Assam Rifles ah sem a hiu. Manbahadur chu a changlam malpi liam in a kigen a, Uttamkumar ahileh a keng te 2 (both leg) leh a banbul lak liam ah hiat a hi. Regional Institute of Medical Sciences tut in a um ngal ui. 6th Assam Rifles jawan te chu 15th Sentinel Cup & 9th Junior Equestrian Championship 2018 final match leh closing ceremony umna ding ah arrangement a bawl laitak ua hand grenade 2 sekhum ah um a hidan uh thudawnna’n a gen hi.

Education kiti “Disturbance Free Zone” a hiding : Minister Th. Radheshyam

Imphal, Feb. 5 *(Nisin Thuhiltu)* : Manipur Education Minister Thokchom Radheshyam in state sung ah sections of society zosia te chu student te thiamzilna subuailo ding leh kituptak ah buaina umlo ah a zilnau (academic timetable) a zaw thei chiatna ding ua panla chiat ding leh thiamzilna mun te “Disturbance Free Zone” hisak chiat ding in chialna a bawl hi. Ama Office Chamber ah Minister Thokchom Radheshyam in Commissioner, Education Vineet Joshi, Director Education (S) leh Th. Kiran Kumar te uapna tawh thuthak lakhawm mite kiang ah state sung ah pawl khenkhat in catholic missionary schools te banned bawl ah report a umna tawh kisai a genna a chun, College pathum panna Manipur ah Catholic Schools 70 um a hidan taklang in Nursery - higher education tiang ah education petu a hidan uh a gen a, government in education sector ngaikhawk mama a hina chung ah quality education a pat buaina chuamchuam um te sukven a hiding kinem hin a gen hi. Chun, private schools leh colleges zosia chu admission process thiangtho tak ah chiapi chiat ding leh Department of Education rules leh guidelines um te zui dik chiat ding in hiatsakna a bawl a, nu leh pa, drivers’ Association te chu government in a pawimaw dungzui ah kithuapina pezing ding hin a gen hi.

User Rating: 0 / 5

Star InactiveStar InactiveStar InactiveStar InactiveStar Inactive

Rs. 5 crore 32 lakh man hiding Kani lei suksiat ah um

Lamka, Feb. 3 *(Nisin Thuhiltu)* : Churachandpur police, NAB, NCB leh Assam Rifles ten tuni’n executive magistrate 2 tawh kani (poppy) lei 130 acres ah lian mun 3 in a susia kit ui. Kani lei kisusia te chu Monglian ah 62 acres; Salvaphai ah 60 acres; B. Khomunnuam ah 8 acres a hi. Zia h suksiat ah um kani chu a sum ah hisap ah Rs. 5 crore 32 lakh man hiding in a kigen a, kani lei suksiatna nasep chu chiapi zawm hizing ding in a kigen hi.

Min pelut ding ah Ex-MDC te hiatsak
Lamka , Feb. 3 *(Nisin Thuhiltu)* : T. Kammuanlal Simte, MCS, Chief Executive Officer (CEO), Autonomous District Council, Churachandpur in 30th January 2018 ni ah thusua a bawlna a chun, Government of Manipur, letter No. 21/2/2008 –PEN/CHA of dated 18th January 2018 ah hiatsakna a mu dungzui ah Ex- MDC te Pension Scheme implement bawlna ding ah Ex-MDC te min list piaklut pawimaw a hidan taklang kawm in Autonomous District Council, Churachnadpur nuai ah Ex-MDC a dam nalai hin, a thi hitaleh a min list uh pelut ding in Ex-MDC, family members/relatives te hiatsakna a bawl hi. Chun, hiatsakna thusua a bawl ni (30th January 2018) a pat hapta 2 sung ah MDC a hi hunsung uh, a thi ni ti te sulang kawm ah Ex-MDC te min piaklut pawimaw in a taklang hi.

M. Luikhamin Director, Commerce & Industries in NARPS office entha

Tuibong, Feb. 3 *(Nisin Thuhiltu)* : Director, Department of Commerce and Industries, Manipur, M. Luikhamin tuni’n Tuibong ah um Natural Agrotech Research and Processing Service (NARPS), Churachandpur, Office vena nei in, NARPS/ Churachandpur panlakdan etthakna a nei hi. Zia hun a chun, NARPS Chairman Mr. Joseph Khaute mapui, NARPS official te tawh NARPS leh DIC in PPP mode ah Livelihood Business Incubator (LBI) a chiapidan leh panlak chuamchuam um te genkhawmna a nei ui. NARPS Chairman Mr. Joseph Khaute in NARPS panlakna tawh kisai in report piakna a nei a, maban ah kisingsakn leh panlakna ding ah guanggalna a nei teu taklatna le a nei hi. Zia nung a chun, room chuamchuam ah van matchak leh nasepna um te enkual in nitak nung in Imphal in a ki le hi. NARPS/Churachandpur ahileh kum 2016 a pat DIC tawh LBI chiapi hita a hia, Manipur ah Livelihood Business Incubator (LBI) chiapi te lak ah nasem hawipen ah kihia hin a kigen hi.

Educational Tour ding te thakdawna nei

Lamka , Feb. 3 *(Nisin Thuhiltu)* : Autonomous District Council Ccpur,(ADCC) panlakna nuai in Imphal ah EDUCATIONAL TOUR chia ding in, Thanlon Sub-Division sung ah um Joutung JB School ah student 20-te, Joutung hausapu inn, Simveng apat thakdawna Thanlon MDC, Th. Jamchinthang in a nei hi. Student-te ahiuleh, Joutung khua apat hotute etkawlna nuai ah Lamka hung tung ahiu a, Joutung hausapu, Th Pauchinthang inn, Simveng ah kinga ahiu. Imphal khawsung ah thiamzilna tawh kisai leh mun pawimaw khenkhat - Science Centre, Museum, Zoo, Sendra leh mun dangdang etna a nei ui.

Siamsin Coaching 2018 khakna nei

Lamka , Feb. 3 *(Nisin Thuhiltu)* : Siamsinpawlpi SSPP Joint Headquarter, Lamka vaisaina nuai in Lamka College, New Lamka ah January 15 apat pawl-X exam dingte a ding ah Siamsin Coaching 2018 a nei uh zawthian a hi dungzui in, tuzingdak dak 7:40 in a khakna hun leh naupangte pauchappiakna hun a mang ui. Zia hun achun, Pastor Dr. M Gousuan, Local Pastor, EBCC College Veng in tîlkhona thu leh Pathian kiang ah pauchappiakna a nei hi. Nangmuansang Nangmuansang Lethil, General Secretary, SSPP General Headquarter in exam ding student-te’n exam ding a nai tawh kitawn in, nek-le-chak ah pilvang a, time table kichian tak bawl ah zui ding chuleh, Admit Card sukmang thei ahiziak in, photo copy thum leh li bawl ding ahidan a gen hi. Dr. Vungkhokam Guite in student-te’n mani mawpuakna hia ah, Pathian lau kawm ah hina lam chiat ah titak kawm ah panlak ding ahidan a gen a, chuleh, khawvel ah pilna thiamna sang mamata ahiziak ah midangte sang ah chungchuang tup ding ban ah mani lunglut lampang subject tel thiam ding ahidan hil in, ama thiltuakte apat zillai tamtak ah ziltilna a nei hi. Naupang 130 vâl coaching in a pang ui.

Teacher te tawh 60-Singngat MLA in meeting nei

Lamka , Feb. 3 *(Nisin Thuhiltu)* : 60-Singngat Assembly Constituency sung a government school umte bialsung mipi’n a phatchuampi ding uh dawina ziak in bialtu MLA, Ginsuanhau@GS Haupu, Chairman, MANIREDA mapuina in school teacher-te tawh a chenna inn, Lailam veng ah meeting a nei kit ui. Zia hun a chun, 60-Singngat Assembly Constituency sung a school 11 apat Upper Primary School leh Junior High School teacher 30 val a chiakhawm ui. Teacher te’n amau school tawh kisai report a piau a, MLA GS Haupu in government in thiamzilna ngai pawimaw ah, India ah naupang kum 4 chunglamte’n thiamzilna a nei chiat ding uh dawina ah Education policy khautak ah chiapi ahidan a gen hi. Manipur ah Assembly Constituency 60 umna lak ah Singngat Constituency hi thiamzilna leh kawng bangkim ah mi nungdel pen pawl ahina ah, Minister leh MLA-pite kiang ah ngaipawimaw diak ding in chialna le a bawl a, kumdang sang ah government school-te a function hawitheina ding ah panlak hiding ahia, zia ding achun school khenkhat adiak ah student-te sang a teacher tamzawkna school ban ah student 50 nuai lam umna school-te etchian hiding ahidan le a gen hi. Meeting a neizaw un, MLA-pu mapuina in ZEO Staff-te’n Tuaitengphai a vaphau ah, government school tawh kisai panlak dingdan khawmipite tawh genkawmna a nei ui.

Ganggam Soccer Club in Cup lawm

Lamka , Feb. 3 *(Nisin Thuhiltu)* : Zougal Centenary Shield Champion Celebration Committee(ZGCSCC) saina ah tuni sunma dak 11 apat in Chiengkawnpang Community Hall ah Ganggam Soccer Club(GSC) in Zougal Centenary Open Shield Football Tournament 2017 ah champion a lak uh lawpna leh GSC a ding ah malsawmna dawtpiakna hun a mang ui. Zia hun achun, Shyam Lal Poonia, IAS, DC CCpur, TT Joshed, Deputy Commandant 25 Assam Riffle chuleh Chiengkawnpang khawsung ah officer-te, khawmipite leh chial ah um tamtak a pang ui. GSC in Lamka Public Ground ah Janaury 6 ni a Zougal Centenary Open Shield Football Tournament final match kihelna ah Lenlai Club tawh champion hina kichu in, GSC in penalty in 1-0 in a zo ua, Zougal Centenary Open Shield Football Tournament ah champion hina la in kipakna lakh 1 a dawng ui.

Senior Citizen Programme cum Discussion nei ding
Lamka, Feb. 3 *(Nisin Thuhiltu)* : Team CT Lian leh Zogam.com in a hung tung ding February 9 sun dak 12 apat sunnung dak 4 kikal ah Lamka fish Farm, Soutunuam ah Senior Citizen Programme and Discussion on Conservation and Sustainable Use of Our Natural Resources ti tawh kisai ah hun mang ding a hi. Zia hun chuleh, Chinkhenthang, IAS Retired, Donzathang, IAS Retired, Thiauakhup IRS Retired, Tuankhankhup IFS Retired, H Thangmang, IRS Retired, Thangkhosiam IAS , Thanghopau, IAS Retired leh Khamsuanmung, IFS te’n thugenna nei ding ahiu.

Zomi Namni matna ding ah Flag takdawna nei

Lamka , Feb. 3 *(Nisin Thuhiltu)* : 70th Zomi Namni matna ding tawh kisai ah Organizing Committee mapuina, tuni February 3, 2018 zingkal dak 8:30 in Lamka Public Ground ah Zomi nuai a kikhaikhawm Tribe leh Frontal Organization-te’n mani flag chiat takdawna a nei ui. Nasep kipatna ding in Thangkholian, President, Mate Tribe Council in pauchapna nei in, Frontal Organization-te’n Flag takdawna B. Dongzalian, Chairman, Zomi Council in a pan a, Lianzalal, President, Zomi Youth Association in a zawm a, Vanlallian Khaute, President, Zomi Students’ Federation in a zawmkit hi. Frontal Organization te’n a takzaw un Tribe tin ah President-te’n Nam Flag takdawna a nei kit ua, zia hun achun; Paite Tribe Council, Vaiphei People’s Council, Mate Tribe Council, Tedim-Chin Union, United Zou Organization, Gangte Tribe Union, Kom Union, Manipur, Thangkhal People’s Organization te’n mani nam Flag chiat a takdawk ui.

Minister Letpao Haokip in innkang te vena nei

Imphal, Feb. 3 *(Nisin Thuhiltu)* : Minister (IFCD & YAS) Letpao Haokip in February 1, 2018 zan ah Sugnu Zoveng ah a chenna inn kangtum Ms. Mangngaiching w/o (L) Lam En Thang of Sugnu Zoveng vena nei in kithuapi na’n anchang bag 3, a lu leh dak 1 kg gel, tui kawina, Blankets leh insung van mat khenkhat piakna a nei hi. Minister Letpao Haokip in a thugenna a chun, District Disaster Management fund nuai ah compensation piak hiding leh housing scheme PMAY-G nuai ah a chenna inn ding uh sakthak piak hiding in a gen hi. Minister Letpao Haokip chu, DC, Chandel, Krishna Kumar, SDO Khengjoi, N. Shokhongam Baite, SDO, Chakpikarong, David Rangkung leh SDPO, Sugnu, Romendro ten le a zui ui.

Minister Nemcha Kipgen in PMMVY kiti maternity benefits scheme hawng

Imphal,Feb. 3 *(Nisin Thuhiltu)* : Social Welfare and Cooperation Minister Nemcha Kipgen in tuni’n New Secretariat, Babupara ah ama Office Chamber in Pradhan Mantri Matru Vandana Yojana (PMMVY) kiti maternity benefits scheme hawnna a nei hi. Zia chu numei nauvawp, Pregnant Women & Lactating Mothers (PW&LM) ten Direct Benefit Transfer (DBT) a muthei ding uh a hi.Scheme chung ah sen leh so um te chu central in 90% a puakdaw ding, State in 10% a puakdaw ding a hi. Zia scheme tawh kisai ah DBT ahileh Office of Controller General of Accounts (CGA) in developed a bawl, web-based online software application Public Financial Management System (PFMS) ah chiapi hiding a hi. PMMVY scheme nuai a chu, beneficiary khat in instalment ah total Rs. 5,000 tiang muthei ding a hiu a, numei nauvawp scheme phatchuampi thei ding ah registered kibawl te first installment (first anti natal check-up ) hun ah Rs. 1000 piak hiding, second installment (last trimester) Rs. 2000 piak hiding leh third installment (1st immunization) Rs. 2000 piak hiding a hiu. Minister Nemcha in a thugenna a chun, Supervisor and Child Development Project Officer (CDPO) ten verified a bawl uh beneficiary ding ah kidawtna lekha Anganwadi worker te a pat pelut mi 5000 umta hin a gen a, zia lak a chu beneficiary ding ah 1696 te approved kibawl hin a gen hi. Pradhan Mantri Matru Vandana Yojana (PMMVY), maternity benefits scheme hawnna hun chu, Commissioner, Social Welfare H. Dileep Singh, Director, Social Welfare Jacintha Lazarus, Joint Director, Social Welfare, Surrender A. Shishak, Deputy Director leh a kisaipi thuneitu ten a uap ui.

7-Days Crafts Exhibition of Border Villages um ding
Imphal, Feb. 3 *(Nisin Thuhiltu)* : Directorate of Handlooms & Textiles, Manipur in Manipur Handloom & Handicrafts Development Corporation (MHHDC) Limited nuai ah a hung tung ding, 13-19 March, 2018 sung ah Urban Haat, Nilakuthi, Imphal East, Manipur ah “7-Days Crafts Exhibition of Border Villages of Manipur” organised bawl ding a hi. Zia Exhibition a chu Border villages a pat Craftsperson te pang thei ding a hiu a, a pangnuam ten kidawtna lekha plain paper ah zik ah February 20, 2018 tiang ah piaklut thei hiding a hi. A pang te chu Directorate of Handlooms & Textiles, Manipur in free Stall, TA leh free Accommodation peding a hi.

Deputy CM & Edu. Minister in Govt. School 2 entha

Imphal, Feb. 3:Manipur Deputy Chief Minister Yumnam Joykumar Singh in Education Minister Thokchom Radheshyam tawh tuni’n Langol, Imphal West ah school pani - Langol Ningthou Primary School leh Wangdei Primary School dinmun etthakna a nei a, zia hun a chun, infrastructure development works chiapi ah a umdan te a en ui.
Langol ah Wangdei Primary School chu Sarva Siksha Abhiyan (SSA) nuai ah kisa thak a hia, Deputy Chief Minister Yumnam Joykumar Singh in 20th April, 2017 ah foundation suangphu hawnna a la nei a hi. Langol Ningthou Primary School ahileh Education Guarantee Scheme (EGS) nuai ah kisiam thak a hi. Education Minister Th. Radheshyam in local mite leh School Managing Committee in amau property gual ah school a etkawl ding uh pawimaw a hidan gen in, quality education a um theina ding ah panlak chiat ding pawimaw in le a gen hi.

Gari kigu leh codine bottles tamtak mudawk

Imphal, Feb. 3 *(Nisin Thuhiltu)* : Combined team -Thoubal police, Kakching police leh NAB, SDC, Lilong, food safety officer, Thoubal leh Kakching, All Lilong Anti Drug Association member ten tuni’n Lilong Leihaokhong, Lilong Yangbi leh Lilong Haoreibi Awang Leikai in search operation a bawl ua, zia hun a chun, gukdaw ah um gari keng 4 nei pathu, gari keng 2 nei 8 leh double barren meithal banah 2 gm heroine no. 4 a man dawk ui. Chun, 77 Del (codine) bottles leh Sheikh Safique Ahamed kiti pawsal khat a pat in a mandawk ua, Sheikh Safique Ahamed le a man ui. Gari kimudawk te chu Ramijuddin, 43, s/o late Md Sambudin of Lilong Haoureibi Awang leikai chenna inn ah kikawi a hia himaleh search operation a nei hun ua, numei naupang khat bep zia inn a chu a la um in a kigen hi. Double barrel meithal kimandawk chu ahileh Moreh ah license issued kibawl a hi. 2 gm heroine No. chu Mujibur Rahman kiti a pat amatdaw uh a hia, gari tampi kikawina inn neitu Ramijuddin chu combined team in hawl zing ua hiat a hi.

BJP, NDPP in Nagaland ah next government form ding: Rijiju

Guwahati (Assam) Feb. 3 *(Nisin Thuhiltu)* : Bharatiya Janata Party (BJP) leh Nationalist Democratic Progressive Party (NDPP) in Ngaland ah next government form ding a hidan BJP leader leh Union Minister of State for Home Kiren Rijiju in press conference in a gen hi. Naga People's Front (NPF) tawh Assembly Election ah panlak khawmna ding ah panlakna nei maleu kinawptuana siamtheilo a hidan uh taklang kawm in, Nagaland Chief Minister lui Neiphiu Rio phudaw Nationalist Democratic Progressive Party (NDPP) zawk tawh kithua ah BJP in Nagaland next government a form ding kinema hidan a gen hi. Chun, Nationalist Democratic Progressive Party (NDPP) in seat 40 contest bawl ding leh BJP in seat 20 ah contest bawl ding hin a gen a, NDPP tawh kithua ding himaleu kum 15 sung ah NPF tawh alliance ahinau chu bei diaklo ding in le hilchianna a bawl bawk hi. Chuleh, central government State Assembly election kiti constitutional process a hina chung ah tuktan ahiloleh postpone bawl theilo hin le BJP election in-charge, Nagaland Kiren Rijiju in a gen hi.

PM Modi in Guwahati ah Global Investors Summit hawng

Guwahati, Feb. 3 *(Nisin Thuhiltu)* : Prime Minister Narendra Modi in Guwahati ah ni 2 sung um ding, Global Investors Summit hawnna tuni’n a nei hi. Prime Minister Narendra Modi in a thugenna a chun, North-East chu India Government Act East policy lailungtak ah um a hidan gen in, Act East Policy dungzui ah ASEAN gam te tawh people to people contact, trade ties leh lam chuamchuam ah panlak khawmna a um zing ding pawimaw hin a gen hi. Assam chu India’s Expressway to ASEAN hin le a gen a, North-Eastern state te chu gamsung ah overall development a um theina ding ah pawimaw mama a hidan taklang in, NDA Government in common man te ding ah phalam ah kisanna (change) a um theina ding ah panla zing hin a gen hi. Ziana chung a chu health care services kitupzaw a um theina ding ah Union Budget ah Ayushman Bharat Yojana kiti pansak ah um a hdian a gen hi. Global Investors Summit hawnna hun chu Bhutan Prime Minister Tshering Tobgay in Chief Guest hina tawh a um ua, Bhutan PM in Global Investors Summit a uap chu India leh Bhutan kal hawi mama a hidan a kilatna hin Mr Modi in a gen hi.
Zia two-day summit chu domestic leh international industry leaders leh palai 2000 tuam in a uap ua, Union Ministers - Nitin Gadkari, Union Minister for Road Transport & Highways, Shipping and Water Resources; Suresh Prabhu, Union Minister for Commerce and Industries; Ravi Shankar Prasad, Union Minister for Electronics and Information Technology, Law and Justice; Smriti Zubin Irani, Union Minister for Textiles & Information and Broadcasting; Dharmendra Pradhan, Union Minister for Petroleum and Natural Gas and Skill Development and Entrepreneurship; Jitendra Singh, Minister of State (Independent Charge) for the Ministry of Development of North Eastern Region; Kiren Rijiju, Minister of State for the Ministry of Home ten le a uap ui.

Madhya Pradesh CM Shivraj Singh Chouhan in cabinet keklian

Bhopal, Feb. 3 *(Nisin Thuhiltu)* : Madhya Pradesh, Chief Minister Shivraj Singh Chouhan in tuni’n a Cabinet keklian in, Minister ding in MLA pathum a la lut thak hi. Minister ding ah laklut thak ah um te chu - Cabinet Minister ding ah Narayan Singh Kushwaha (Gwalior a pat) leh Ministers of State ding ah Balkrishna Patidar (Khargoan a pat) leh Jalam Singh Patel (Narsinghpur) te a hiu. Governor Anandiben Patel in laklut thak ah um te chu Raj Bhawan, Bhopal ah kitiamna a neisak a, zia hun chu Chief Minister Shivraj Singh Chouhan leh a Cabinet member chanpi, BJP senior leader tamtak ten a uap ui. Madhya Pradesh State Government ahileh tu leh tu Cabinet Ministers 20 leh Ministers of State 9 nei a hia, Minister ding ah MLA pathum laklutbe a hiu tawh kitawn ah Minister 32 umta a suak hi.

Sushma Swaraj in PM Modi book lekhabu zik hawng
New Delhil, Feb. 3 *(Nisin Thuhiltu)* : Prime Minister Narendra Modi in a zik "Exam Warriors" kiti khangthak ten exam hun ah haksatna a tuakna teu chung ah ngaituana thak leh tha a suktho thak theina ding uh chu External Affairs Minister Sushma Swaraj in New Delhi ah a hawnna a nei hi. Zia lekhabu chu Penguin India in published a bawl a hi. Prime Minister Narendra Modi in tunaicha ama redio programme 'Mann Ki Baat' ah a thugenna a chun, examination ti chu festival gual ah neiding leh kingaisiatna ahiloleh lunggimna manglo ding in student te chialna a la bawl hi.

Nagaland: NPF MLA 3 in haina siam
Kohima, Feb. 3 *(Nisin Thuhiltu)* : Nagaland ah ruling Naga People's Front (NPF) sung ah dawidan leh ngaidan kibatlona um a hidan MLA 3 in haina a siam uh tawh kitawn ah muthei in a um hi. Nagaland Assembly notice sua in a taklatna a chun, NPF MLA Dr Longrineken, L Khumo Khiamniungan leh Pukhayi Sumi, ten haina siam a hidan uh a taklang hi. Haina siam MLA 3 te chu Chief Minister TR Zeliang mapui NPF government nuai ah parliamentary secretary panmun lua a hiu.

Page 1 of 20