Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

Chairman ding ah Justice T Vaiphei guat

Lamka, April, 13 *(Nisin Thuhiltu)* : Justice Tinlianthang Vaiphei (Retired), Chief Justice, Tripura Hihgh Court chu kum 5 sung Chairman, Human Rights Commission, Assam ding in Prof. Jagdish Mukhi, Assam Governor in April 12, 2018 ni’n appoint a bawl hi. Ama’n zia mawpuakna chu tunung sawtlo ah zawm ding hi’n a kigen hi. Justice T Vaiphei ahileh Feb. 27, 2018 ni ah High Court of Tripura , Chief Justice hina a pat a la retired a hi.

CMO/CCpur in submit ding ah hiatsak
Lamka, April, 13 *(Nisin Thuhiltu)* : Dr. Kimngaihching, Chief Medical Officer, Churachandpur in thusua a bawl dungzui in, CMO Churachandpur nuai ah staff, 2012 apat 2017 kikal a lut te’n a hungtung ding April 17, 2018 chan ah a min uh, post min, pay scale leh Employment Exchange a Registration Number tihaw ama kiang ah petlut ding in hiatsakna a bawl a, huntiam sung ah pelutlo te’n a maw a kipuak ding uh ti’n a taklang hi.

Contractor in Jamkhanmung galna Rs.1 lakh pia
Lamka, April, 13 *(Nisin Thuhiltu)* : Thanlon sub-division huapsung ah Tallian leh Suangpek kikal ah April 11, 2018 nitak dak 7:00 vel ah tuaksiatna ziak ah thina tuak JCB driver Jamkhanmung @ Mumung (24) s/o Upa Khamtingen of Mata Village luang chu zani zan dak 12:00 vel in Mata khua ah a chenna inn puaktung in a um a, tuni'n Mata thanmual in a kivui hi. Jamkhanmung ahileh Special Contractor Mangbeldam, JCB driver a hia, nasepna mun zuan ah a chiana lamkal ah accident ah thi a hi. Jamkhanmung thina tawh kisai a chun tuzingkal in contractor innsung vaihawmte leh mithi innsung vaihawm te'n kihona a nei ua, contractor in vawk khat that in a luang puandum in a tuam a, a galna Rs.1 lakh pia’n a kihofel ui.

Lieutenant apat Captain ah kaisang

Lamka, April 13 *(Nisin Thuhiltu)* : Mr. Lalngaisang @ Zohan Vaiphei S/o Lal David Vaiphei of S.Canan Veng (Tuibong) , Churachandpur District chu a sepna, Indian Army Maratha Light Infantry ah Lieutenant Rank a pat Captain Rank in a kaisang hi. Ama ahileh tu leh tu Sikkim ah posting hi’n a kigen hi. Tv. Lalngaisang ahileh Churachandpur College ah Graduate zo, UPSC-Combined Defence Service (II) Examination,2013 ah lawtinna a chan tawh kitawn ah 6th October 2014 ni ah Officer Training Academy (OTA), St.Thomas Muont, Chennai ah 100th Short Service Commission Course (for Men) ah join bawl a hia, kum 2017 ah course a zaw tawh kitawn ah Maratha Light Infantry ah Lieutenant Rank ah sem a hi.

Kinepna-II Premiere show leh album hawnna nei
Lamka, April, 13 *(Nisin Thuhiltu)* : Khawvaiphei Film Company (Ltd.) saina’ tunitak dak 6:00 in Bethel Veng a Vaiphei Community Centre Hall ah Kinepna songs (album) hawndawna leh Kinepna-II Premiere show a um hi. Zia hun chu Chief Guest hina tawh Henlianthang Thanglet, Vice President NPP, Manipur Pradesh in a uap a, Guest of honour in Pauchungnung Vaiphei, Associate Professor, CCpur College a pang hi. Chun, Functional president in Thanglalsiam, Gen. Secy. YVA/GHQ banah Chief host in Vungkholal E.E. a pang hi. Hun matna P. James in amapui a, Khaithianlal, Director (Kinepna-II) in vaidawnna thu gen in, James Thangluai, Producer (Kinepna-II) in thugenna aneih banah khuallian-te apat thugenna a um hi. Chun, Chief Guest in Kinepna songs (album) a hawng hi.

Training ah pang ding ah hiatsakna bawl
Lamka, April, 13 *(Nisin Thuhiltu)* : N. Chingkhei Singh, District Project Officer/ZEO, SSA-RTE, CCpur in thusua a bawlna a chun, ZEO nuai ah school zosia SMDC member-te a ding ah a hung tung ding April 25-27, 2018 kikal ah YPA Ghq Hall, Hiangtam Lamka ah Community Mobilization of SSA-RTE CCpur nuai ah District Level Training um ding a hi. Zia ding tawh kisai a chu Headmaster/Headmistress leh Chairman SMDC in school khat apat SMDC Member 5 chiat training ah a pansak ding in hiatsakna a bawl hi. Chun, training ah pang ding te list kimtak April 21, 2018 ma ngei ah, District Coordinator Community Mobilization khut ah a piaklut uh ngai ding ti a hi. Chuleh, Training a chu Absent um theilo ding, attendance hawitak ah et ding a hina chung ah thusua limsaklo te chung ah apawimaw dungzui ah action lak hiding in a gen hi.

DC/CCpur mapuina DLO meeting

Lamka, April, 13 *(Nisin Thuhiltu)* : Shyam Lal Poonia, IAS, DC/CCpur mapuina tuni April 13, 2018 sun dak 12 apat in DC’ office, Conference Hall ah meeting ni a kizawm in a um a, meeting masa ah District Level Coordination Committee (DLCC)-cum-Review meeting a nei ui. Zia hun a chun, Manipur Chief Minister N.Biren Singh in “Go to village” Mission a chiapina ding tawh kisai genkhawmna a nei ua, CCpur District sung ah Deptt. chuamchuam in govt. schemes/ programmes/ activities a chiapi dan teu leh Gram Swaraj Abhiyan banah thupawimaw chuamchuam a genkhawm ui. DLCC-cum-Review meeting hun in District Level Officer tamtak a pang ua, Dist. a development tawh kisai Annual Action plan ziksa ah chawi in DC/CCpur kiang ah Department chuamchuam in Annual Action plan a neiteu taklatna a nei bawk ui. Meeting nina a chun, DC/CCpur mapuina nuai ma in, District Level Committee on Border Area Development Programme (BADP) meeting a nei ui. Zia meeting a chun, CCpur District ah BADP 2018-2019 tawh kisai Annual Action Plan tawh kisai Final a bawl ua, meeting a chun, Addl SP/CCpur ( Law & Order); DFO/CCpur; CMO; ZEO;EE/PHED; EE/PWD; EE/Minor Irrigation; Dist. Agri. Officer; Dist. Horti Officer; Joint Director, Vety & AH; Dist. TD officer; PO/BADP leh Planning Deptt/CCpur te a pang ui. BADP nuai ah tukum sung ah sepdaw ding chuamchuam a genkhawm ui.

HPC (D) cadre te ding ah Aizawl ah "Home Coming" ceremony nei

Aizawl, Apr. 13 *(Nisin Thuhiltu)* : Mizoram Government leh Manipur-based Hmar People’s Convention (Democratic) in April 2 , 2018 ni ah State Guest House, Aizawl ah Memorandum of Settlement chung ah suai a kai uh tawh kitawn in tuni’n HPC (D) Armed Cadres 102 leh Council Members 12 te Mizoram Government khut in a kipelut ua, Central Training Institute (CTI), Sesawng ah “Home Coming” ceremony matpi in a um ui. Zia Home Coming ceremony chu Mizoram Chief Minister Lal Thanhawla, Home Minister Lalzirliana, Minister of State for Cooperation Vanlalawmpuii Chawnthu, Political Advisor to Chief Minister Lalrinmawia Ralte, MLA John Siamkunga, Manipur's Tipaimukh MLA Dr Chaltonlien Amo leh Government ranking officials banah public tamtak te’n a uap ui. Mizoram Chief Minister Lal Thanhawla in a thugenna a chun, Sinlung Hills Council khantona ding ah panlak ding Government thiltup a hidan gen in, HPC (D) demand Sinlung Hills Council sukpitinna ding ah Memorandum of Settlement chung ah suai kikai in chamna leh muanna a tut ding a kinep thu a gen hi. Hun mat sung in, Chief Minister in HPC (D) cadre a ki surrender te rehabilation package Rs 3.42 crore piakdawna a nei a, meithal leh meichang a piakdawna chung un, Mizoram Government in Rs 7 lakhs a pe bawk hi. HPC (D) in Mizoram Government khut ah meithal a piakdaw te ahileh - Sniper Rifles 4, Assault Rifles 9, DBBL / SBBL 13 leh Pistols 7 panna a kigawm ah meithal 44; Meichang chang Rifle chang 2654, DBBL 127, 9mm & .32 chang 89, Mortal Shells 10 leh Industial detonators 7 a kigawm ah 2892 banah servicable Weapon Magazines 48, Radio Sets 5 leh Charger te a hi.

ZEO/Office ah JNV entrance test a ding Admit Card lakthei
Lamka, April, 13 *(Nisin Thuhiltu)* : Jawahar Navodaya Vidyalaya (JNV)/Tuinom ah Academic Session 2018-19 ah Class-VI simding lakna ding in April 21, 2018 ah Block 6 ah entrance test um ding a hi. Zia ding tawh kisai a chu student tamtak in admit card a download theilo ziak un ZEO office ah download a bawl piak ua, download zaw vek a hitak tawh kitawn in April 12, 2018 apat ZEO/Office ah Admit Card ki download sa la tamtak a um ui. CCpur disrict in candidate 2151 a um a, Admit card ahileh ZEO office ah block tin ah AI/DI kiang ah lakthei hi’n a kigen hi. CCpur block apat candidate 577 te’n Phungkhothang Govt. High School, Hiangtam Lamka ah entrance test nei ding a hiu a, Vimala Raina High school ah student 570 in exam bawl ding, Henglep block-te’n centre 2 – Vumhao Govt High School, Tuilaphai ah exam bawl ding, candidate 115 a um hi., Kangvai Hr Sec.School ah candidate 149 te’n entrance test bawl ding a hiu a, Singngat block apat candidate 106 te’n Singngat govt. High School ah entrance test bawl ding, Thanlon block apat candidate 171 te’n Bukpi Govt High School ah entrance test bawl ding, Tipaimukh block apat candidate 178 te’n Pherzawl Govt High School ah entrance test bawl ding leh Samulamlan block apat candidate 279 te’n INA Memorial High School ah entrance test bawl ding a hiu.

NFSA nuai ah anchang lakdaw hun ding bithiat thak
Lamka, April, 13 *(Nisin Thuhiltu)* : National Food Security Act. (NFSA) nuai ah thasin leh anchang hawpdaw hisek chu April 4-7, 2018 sung in Saikot AC/Sub-Division leh Thanlon AC/Sub-Division ah Rationing Agent-te’ kiang ah HQ Veng ah um FCS Godown ah anchang hawpdaw himahleh bandh etc. ziak in a la chawl a, zia nung a chun M.Ginzasuan, Dist. Supply Officer (DSO), CCpur & Pherzawl Dist. in Release Order (RO) leh anchang hawpdaw hun ding a bithiat thak (re-sheduled) hi. Zia dungzui a chu April 13, 2018 ah Parbung & Sangaikot AC/Sub-Division a Rationing Agent-te’n RO ladawk ding a hiu a, April 16, 2018 ah HQ Veng ah FCS Godown ah anchang ladawk ding a hiu. April 16, 2018 ah Singngat AC/Sub-Division ah Rationing Agent te’n RO la ding, April 17, 2018 ah anchang ladawk thei ding a hiu. April 17, 2018 ah Henglep AC/Sub-Division a Rationing Agent te’n RO la ding, April 18 & 19, 2018 ah anchang ladawk ding a hiu. Chun, April 18, 2018 ah CCpur AC/Sub-Division ah Rationing Agent te’n RO la ding a hiu a, April 20 &21, 2018 ah HQ Veng ah um FCS Godown ah anchang ladawk ding a hiu.

ZC Secretary lui leh thak in kikhutsanna nei
Lamka, April, 13 *(Nisin Thuhiltu)* : April 11, 2018 ni ah Zomi Council elected post chuam chuam lua ding telna (election) zaw thian a hitak tawh kitawn in tuni'n Khamneithang Vaiphei in General Secretary charge piakdawna Nangzakai Suante kiang in a nei hi. Zia hun ah chun Khamneithang in General Secretary thak a dawisakna thu gen in Nam nasepna ah vested interests apat kiven a poimaw dan leh Zomi policy leh programme umte hemil lo ah, bang gual huipi nung leh le Nampi interest hi a sang pen ah kawi a kal suan zel ding in dawisakna thu a gen hi.
Pu John K. Ngaihte, Chairman, Zomi Council in maban ah panlakna zosia ah Khamneithang kithuapina poimaw zing ahi dan gen in, ZC General Secretary a poimaw dungzui ah kithuapi zing ding in a chial hi. ZC General Secretary thak Nangzakai Suante in le ex-General Secretary kithuapina poimaw ahi dan gen in, maban ah le panlakpi zing ding in a chial hi.

District Level ah “Ambedkar Jayanti” mat hiding
Lamka, April, 13 *(Nisin Thuhiltu)* : District Administration saina’ April 14, 2018 zingkallam dak 9:30 ah DC office kiang ah um District Training Centre (DTC) ah Gram Swaraj Abhiyaan, District Level Celebration of “Ambedkar Jayanti” mat hiding a hi. Zia hun chu, Chief Guest hina tawh V.Hangkhan|ian, Minister (Agri/Vety.&AH.) in uap ding a hi. Program sung in, Prime Minister in India mipi hiat ding ah a thugenna ‘Live telecast’ ah suklat hiding a hi. Chun, SDO-te’n Special Camp bawl ding a hiu a, zia hun a chu scholarship enrolment a ding ah Tribe/ Income certificate piak hiding, Bank-te’n le Special camp saiding, bank account opening & Aadhaar linkage, Aadhaar/Biometric enrollment ban ah Distribution of entitlements to beneficiaries um ding a hi. Program ahileh MDC-te, District Level Offtcer-te leh mipi’n uap ding in DC/CCpur in chialna a bawl hi.

Vengnuam South VA Machet lawm ding
Lamka, April, 13 *(Nisin Thuhiltu)* : Vengnuam South Village Authority (VA) mapuina April 14, 2018 sunma dak 11:30 in YPA Vengnuam South Hall, New Lamka ah Vengnuam South VA Machet lawpna programme um ding a hi. Zia hun chu Chief Guest hina tawh V.Hangkhanlian, Minister (Agri/Vety.&AH.) in uap ding, Special Inveitees hina tawh Khaipao Haokip, Chairman, ADC/CCpur; Paukhanlian, EM/ADC; M.Gouzamang Guite, MDC; Shyam Lal Poonia, IAS, DC/CCpur leh Thangboi Gangte, MCS, SDO/CCpur te’n uap ding a hiu. Chun, Pastor K.Pumsuanthang, Local Pastor, Pethuel & Jordan, EBCC in pauchap piakna hun mang ding, Minister V.Hangkhanlian leh Lianmuanthang, Secy. Vengnuam South V/A te’n thu genna nei ding a hiu. Chuleh, Siamlalven, YPA Vengnuam South leh Pamlunkim apat Special No. um ding a hi.

Theigotang leh Mongjang a ding Solar Home Lighting flag-off

Lamka, April, 13 *(Nisin Thuhiltu)* : Singngat Sub-Division sung ah khua 2 a ding Solar Home Lighting bangzat hem tuzingkal dak 9:30 in Bialtu MLA, Ginsuanhau, Chairman, MANIREDA chenna In, Lailam Veng ah flag-off bawl a hi. Theigotang a ding Unit 13 leh Mongjang a ding Unit 8 ahia, John K. Ngaihte, Chairman, Zomi Council in flag-off a bawl a, Shaktiman ah puakdaw in a um hi. Flaf-off bawlzaw in MLA leh a zi ban ah Zomi Council Chairman in District Hospital a damlo ve’na a nei ui. Damlo ahileh MLA-pa a ding ah body guard, Ginsuanding (28) s/o V. Pumsuanthang of Zenhang Lamka ahia, a chiata April 8, 2018 ni a Singngat Sub-Division sung ah Buangmun khua ah Jeep accident ziak ah mi 3 in liamna a tuak uh ahi. MLA, Ginsuanhau in tilkhona thu gen in Pathian kiang ah pauchappiakna a nei hi. Ama’n a genna ah, Bible ah kigen gual in chawlni chan ding, chawlni ah kikhawm ding ti’longal ahithei chan ah pawimaw lele nasem ding ah kuanlo ding ahi ti’n a gen hi. Ginsuanding ahileh lamto ah Jeep taito zawlo ziak ah kinungtawl ah khobang bawkha ahia, zia nung achuh a Jeep 3-vei kilek in, a malpi changlam gu a delkhak hi’n a kigen hi.

CM in Civil Secretariat kisa zinglai entha

Lamka, April, 13 *(Nisin Thuhiltu)* : Manipur Chief Minister, N. Biren Singh in tuni, April 13, 2018 in Imphal East District ah um, Mantripukhri a Civil Secretariat kisa zinglai etthâkna a nei hi. Zia hun achun, PWD apat senior engineer te’n nasepna tawh kisai hilchian in, Chief Minister in a sung leh pua kibawldan haw etchianna a nei hi. Vanmatchak ding a tamzaw state dang apat laklut ahiziak ah nawngkaina liantak um hi’n a kigen hi. Zia hun achun, Th. Biswajit Singh, Works Minister leh Dr. J. Suresh Babu, Chief Secretary ban ah PWD a official leh government employee lubawk hunkhawp in a zui ui.

Swacchata Pakhwada matna office suthiang
Lamka, April, 13 *(Nisin Thuhiltu)* : District sung a Swacchata Pakhwada matna chiato zel in, tuni’n CMO Complex ah office chuamchuam in office sukthianna a nei ban un, Swacchata Pledge genna a nei ui. Swacchata Pakhwada ahileh April 2 apat April 15, 2018 chan ding ahia, tuni’n CMO office a staff te’n office bang zosia rawng a nu ban un, CMO office chamber sung a hei danglam ua, GNM Nursing College te’n hostel kimvel cheng suthiang in, DAPCU, District Leprosy Office leh Food Safety and Standard office a staff te’n le office sung a sukthian ban un, office kimvel ah hampate a thothiang ui. Chun, Bethesda School of Nursing apat Induction ah hungte leh, GNM Nursing College student leh CMO Complex a office chuamchuam a staff te’n thianthona tawh kisai kiziltilna chawlkal khat ah dakkal 2 hun mang ding leh midang kiang ah thianthona tangko ding in Dr. Kimngaihching, Chief Medical Officer, Churachandpur in kitiamna a neisak hi.

"AW LALPA LA LEMGUATNA HI”- Vol. II Album hawng ding

Kangvai, April, 13 *(Nisin Thuhiltu)* : Famta Rev. V. S Liankhawpau (1917-1975) Mrs Lamtinkhawl (1927-1999), Seltinthang (1945-1981) Mrs Nemttinniang (1945-2014) leh Mr K Pyar 1976-1998) te hiatzingna ding ah kisiam, SHEFA House Production "Aw LALPA LA LEMGUATNA HI”- Vol. II (Gospel Music Video Album) hawnna tuni, 14th April 2018 zingkallam dak 11:30 AM ah Kangvai Community Hall ah um ding a hi. Zia hun chu, H S Kaiminlun, Assistant Professor in mapui ding a hia, T. Thangzalam Haokip @ TT Haokip, MLA Henglep, A/C leh Chairman, Hill Areas Committee (HAC), P Vaiphei (IAS), Principal Secretary (Commerce and Industries) & IPR Commissioner leh Mrs Ngaineiniang, (Representing Kangvai Village Chief) te’n khuallian hina tawh uap ding a hiu. Chun, Rev. B Lala, Bialtu Pastor in Pathian kiang ah Album latna nei ding a hi. "Aw LALPA LA LEMGUATNA HI”- Vol. II ahileh Mr & Mrs Pauchungnung Vaiphei, Associate Prof., CCpur Govt. College & Vhinboi Liapvung in Produce a bawl, K Chung Vaiphei, Director hina nuai ah shooting kibawl a hi. Artist te ahiuleh- Tracy Ngaihching, Mary Vaiphei, C. Lalvenhawi, Murphy Mang & Manglianlal te a hiu.

Lamka Matters-Talk Series, Lamka Chapter
Lamka, April, 13 *(Nisin Thuhiltu)* : Lamka Matters-Talk Series, Lamka Chapter kiti tuni, April 13, 2018 nitaklam dak 2:30 in Mini Auditorium, Dorcas Jubilee Hall, New Lamka in a um hi. Zia hun chu Thangbiaklian Hangzo in a mapui a, panelist dingte introduction bawl in, houlimna in a tupte a genzaw in holimna pat in a um hi. Thangzason Sonna, Thangkhanlal Ngaihte, Nianglian, Biakmuan Tombing leh Grace Zamnu-te panelist in a pang ua, Lamka ah khantona a tuntheina ding leh panlakna ding ah lampi umtheite genna a nei ui. Biakmuan in khantona daltu pen ding ah a ginchak, thingtang leh khawpi kikawmtuana ziak leh lo ah thaichi mante bithiak a umlo ziak ah dawigual ah thingtang lam ah khanthona umlo hi’n a gen hi. Nianglian in lampi bawlna tawh kisai gen belap in, Guite Road bawlna nasep etthakna a neina u tawh kisai in a gen a, khantona taktak a um theina ding ah government apat Scheme chuamchuam hungte nasepna specification tawh kituak ah sep pawimaw ahi’dan a gen hi. Grace Zamnu in government apat khantona ding scheme chuamchuam um in, nasem te’n le panla maleh, mipi lam inle eilam ah bawlding pawimaw umte sep ding ahi ti’n a gen a, eima hamphatna ding bep en mailo a, veng-le-pam a mite le khual ding ahi’dan a gen hi.

PMUY Expansion a pandawk kit
Lamka, April, 13 *(Nisin Thuhiltu)* : India phualpi solkar in gamsung a khaw changkanglo leh khawsak haksadiakte a ding ah Pradhan Mantri Ujjwala Yojana(PMUY) nuai ah LPG connection a bawl sak, a lianzaw leh mi tamzaw phatchuampi ding in scheme thak, Pradhan Mantri Ujjwala Yojana(PMUY) Expansion a pandawk kit hi. Zia scheme thak hitawh kisai district mipi’n hiatchian zawk diak ding leh ziagual hamphatna a chan ding uh dawina ziak in tuni’n India Oil Coorperation Limited apat official 2 - Stephen Chinkhanson, Manager LPG-S Imphal leh Thangzamuan Hangshing, Assistant Manager, RS Imphal te’n press leh media-te kimupi in, PMUY Expansion tawh kisai hilchianna a nei ui. PMUY extension ahileh India phualpi solkar in khua/veng tin ah khantona a tunding dawina ah April 14 apat May 5, 2018 sung ah sepdaw ding ah a guante lak ah Gram Swaraj Abhiyan nuai a program khat ahia, zia program in a tup, India gam sung ah khua changkanglo, LPG gas connection nei nailote kiang ah LPG connection bawlpiak vek ding ti ahia, zia ding chun, Manipur ah khua 578 têldaw lak ah CCpur district ah khua 118 a pang hi. Ziagual hamphatna mu theina ding in, SC/ST certificate, AAY card, PMAY Gramin Card, MDC Card, Ration card, Aadhaar Card, Bank Account tihaw ngai ding ahi. PMUY Expansion ahileh Gram Swaraj Abhiyan matna ah a hungtung ding April 20, 2018 ah CCpur district sung a LPG distributor cheng in amau trading area chiat ah Ujjwala Divas mang ding ahiu a, zia hun achun, PMUY expansion tawh kisai hilchianna, hamphatna chuamchuam umte genna ban ah, gas mat dingdan tihaw tawh kisai awareness program chuamchuam um ding ahia, mass enrollment ban ah Ujjwala LPG connection piakdawna le um ngal ding ahi. Gamsung kiltin ah smokeless village suaksakna ding leh thing-le-lo leh gammâng venbitna ding ban ah boruak venbitna ding chuleh, numeite dawpkangna ding ah zia program hi patdaw ahi. CCpur district ah zia program hi lawting tak ah sepdaw ahitheina ding in tuni’n DC Office, Tuibong ah BRGF Resource Centre ah Shyam Lal Poonia, IAS, DC, CCpur mapuina’n DLCC meeting nei hun ah zia thu hi genkhawm in a um hi.

Lenlai Club in Grassroot football under 12 leh under 15 hawng

Lamka, April, 13 *(Nisin Thuhiltu)* : Lenlai Club(LC) in tuni nitaklam dak 3:30 in Don Bosco Higher Secondary School ah Lenlai Club in Grassroot football under 12 leh under 15 hawndawna a nei hi. Zia hun chu, M Mohendro Singh, District Youth Affairs And Sport Officer(DYASO), Ccpur in Chief Guest hina tawh a uap a, Th Thonglunthang Simte, Vice Chairman, Lenlai Club in hun matna a mapui hi. Chief Guest in Grassroot football under 12 leh under 15 hawndawna a nei a, Mang Taithul, coach, James Tawia ban ah assistant coach, Muana leh Minlun-te kiang ah Jersey leh sport bag piakdawna a nei ban in, player-te kiang ah Jersey leh water bottle(tuibawm) piakdawna a nei hi. Hun matzaw phat in, Saikawt khua ah Lenlai Club Sports Complex bawl patna ding in ground breaking a nei kit ui. Naupang mi 120 in min a piaklutna lak ua, tuni’n naupang 70 kiang ah jersey leh tuibawm piakdaw in a um hi. Lenlai Club in Grassroot football under 12 leh under 15 ding tawh kisai in March apat Don Bosco Higher Secondary School ah etthâkna dan in coaching class a pan ua, tuni ah official a hawndawna nei uh hi’n a kigen hi.

Ima Keithel ah pawsal van zuak khap a hi: Minister Th. Shyamkumar

Imphal, Apr. 13 *(Nisin Thuhiltu)* : Municipal Administration, Housing and Urban Development (MAHUD) and Town Planning Minister Th. Shyamkumar in tuni’n Ima Keithel, Khwairamband Bazaar ah pawsal van zuak khap ah um a hidan puang in, numei te van zawkna munpi ah kihia historic Ima Keithel kim leh kiang ah numei leh pawsal van zuak khawm theilo ding uh hin le a gen hi. Zia chu zuilo a um a, matdaw ahiuleh Manipur Municipalities Act, 2004 tawh kituak ah gawtna piak hiding in a gen hi. Ima Keithel chu Asia gam ah numei market lianpen ah kihia a hina chung ah numei te a ding bik ah kikawi hin a gen hi. Imphal Municipal Corporation (IMC huapsung ah MAHUD in 15th April a pat drive bawl ding leh pawsal van zuak umlona ding ah panlakna nei ding, phalna bei ah van zuak te chungchang le etchian hiding in a gen hi.

NH-37 ah passenger gari tuaksiatna mi 2 thi, 10 liam
Imphal, Apr. 13 *(Nisin Thuhiltu)* : Imphal kawmtua ah tai, passenger gari (Tata cruiser bearing registration no. As 11 C-0735) in tuni, 13th April 2018 nitak lam dak 1:00 tuam in Imphal –Jiribam sector NH-37 (Irang Bridge leh Awangkhul II kikal), Tamenglong district in accident a tuak a, ziana a chun passenger 12 chuang te lak ah pawsal 2 in thina a tuak ua, mi 10 in liamna a tuak ui. Liamna tuak mi 10 te lak ah mi 4 te chu serious un a kigen a, mi dang 6 te ahiuleh a liamnau thupilo in a kigen hi. A langkhatlam ah zia tuaksiatna ziak ah liamna tuak leh thina tuak te chu Police leh 14 Sikh Regmntt te’n Noney PHC a tut ua, 8AR Noney in Imphal in referred a bawl hi. Himaleh zia thu zik a hi tiang ah thina tuak te kua min leh umna hiatchian a hinai puai.

Jwalamukhi Bn. leh Police in UNPC cadre 2 man; galvan kiselgu mudawk

Imphal, April 13 *(Nisin Thuhiltu)* : Jwalamukhi Battalion in Sekmai police te tawh Kanglatongbi ah a chiata 12 April 2018 ni ah joint operation a nei hun un, United Naga People Council (UNPC) cadres 2 a man dawk ui. Mat ah um cadre pani te chu – ChanaphunInka (53), s/o MagouInka of Ijeirong, Post Office - Noney, District - Tamenglong leh Veinii Joyson (37) s/o L Veinii, No - 187265, Rank - Regional Council Member (Shepoumaram), village–KodomKhullen, Post Office - Maram, District - Senapati te a hiu. Amau a pat a chun, Air Gun khat leh mobiles phone le a mudawk ua, Police Station Sekmai in case a ziklut ui. A langkhatlam ah Jwalamukhi Battalion in Saikul police te tawh joint operation a nei hun un, Tolthang village, Kangpokpi district in AK-56 Rifle leh magazine 1, achang chang 13 live leh 5.56mm A-1 Assault Rif khat leh magazine banah achang chang 07 amandawk ua, Saikul police station in a pedawk ui.

Bobby’s “Matamgi Manipur” in Best Book on Cinema Awards sâng

Imphal, April 13 *(Nisin Thuhiltu)* : Bobby Wahengbam’s “Matamgi Manipur: The First Manipuri Feature Film” in 65th National Film Awards 2018 ah Best Book on Cinema Awards a sâng hi. Zia award chu 3rd May leh New Delhi ah Award Ceremony a um hun ah President of India in piakdawna nei ding a hi. Bobby Wahengbam a.k.a. Wahengbam Khemananda Singh (47) ahileh (University of Bombay) ah Master degree zo, XIC, Mumbai ah Diploma in Film Production zo leh FTII, Pune a pat Certificate on Film Appreciation a la sâng a hi. Chuleh, Imphal ah English daily - People’s Chronicle, Poknapham, Sangai Express, Free Press, Hueiyen Lanpao leh Seven Sister Post ah regular columnist le a hi.

User Rating: 0 / 5

Star InactiveStar InactiveStar InactiveStar InactiveStar Inactive

Guv’ in modern Indian Round Take Down Bow siamdawktu kimupi

Imphal, April 12 *(Nisin Thuhiltu)* : Manipur Governor Dr. Najma Heptulla in tuni’n Raj Bhavan ah “thal” ( modern Indian Round Take Down Bow) siamdawk B. Chaoba Sharma a kimupi hi. Zia Indian Round Take Down Bow chu Luwangsangbam Sports Exhibition ah March 16, 2018 ni, Prime Minister Narendra Modi in Manipur a phak hun ah suklat ah um, Prime Minister thupiak dungzui ah zia khutthiam thilsiamdaw thak chu Governor Dr. Najma Heptulla khut ah piaklut a hi. Governor in zia gual thil kisiamdawk thak chu Manipur minphatna mai hizawlo ah India min phatna hi’n a gen hi. Salam Santosh Singh, General Secretary, Chaoba Archers’Academy leh B. Pritam Sharma, Managing Director & Archery Coach (CRPF) te’n le zia hun a chun Governor a kimupi ui.

JCB tuaksiat ah driver in thina tuak

Lamka, April 12 *(Nisin Thuhiltu)* : Thanlon Sub-Division sung a Suangpek khua kiang ah zani’n JCB khat tuaksiat tuak in, a driver in thina a tuak hi. A ki hiatdan in inn a pat nasepna mun zuan ah tailai, nitak dak 7:00 tuam ah a tunna ding a tun ma, lam thanglam feet 100 vel ah tai thasuk in, JCB in a driver dellum kha hi’n a kigen hi. Thina tuak JCB driver ahileh Jamkhanmung@Mumung s/o Upa Khamgen of New Mata ahia, Special Contractor, Mangbeldam@Dama JCB hektu ahi. Tuaksiat tuak hun ah midang kuama a chuang umlo uh hi’n a kigen hi. Mumung’ luangdamsa dawn ding in tuni’n nungak-tangval tamtak a kipandawk ua, Lamka puaktung ahi phatleh Post Mortem bawl ah, zia pat chu a In uh, New Mata puaktung hiding hi’n a kigen hi.

DC/CCpur in uniform hawpdawna nei

Lamka, April 12 *(Nisin Thuhiltu)* : Siamsinpawlpi(SSPP) Residential School in tuni, April 12, 2018 sunnung dak 1:00 in Free School Uniform hawmdawna a nei ui. Zia hun chu Shyamlal Poonia, IAS, Deputy Commissioner, Churachandpur in Chief Guest hina tawh a uap hi. SSPP GHQ President, Thanglalmuan in a gendan in, SSPP Residential School hi 1998 kum ah, Ministry of Tribal Affairs, Government of India sponsor-na nuai a phudaw ah um ahia, 2010 kum apat Preparatory Class, KG ban ah Class IX leh X be’lap ah um ahi ti’n a gen a, maban a Computer Class pat ahitheina ding leh Class XI leh XII chan a um theina ding ah panlak hiding ahi ti’n a gen a, zia ding chun District Administration lam inle panlakpi ding ah ngêkna a bawl hi. Chief Guest, Shyamlal in student-te zia school ah a kaikhak uh hampha uh ahidan gen in thiamna sang mamata ahiziak ah, taima leh thanuam tak ah lekha sim ding in a tîlkho hi. Chun, taksa leh lungsim ngaituana hatna ding ah kihel sek ding ahidan a gen a, ziltiltute leh nu-le-pa ban ah sang ah upazawte za’dan thiam ding in thuhilna a nei hi. Chuleh, zia school hin lawtinna a chan a, thiamna sang taktak nei mi tampi a hung sêkdawna di’n a dawisakthu a gen hi. Hun matna kichai in, Shyamlal in Headmistress, SSPP GHQ Cabinet Member leh School Managing Committee a member-te tawh hostel, numei leh pawsalte giakna mun leh a tuidawn uh etthakna a nei a, District Administration lam apat panpina umtheite ngaitua piak ding in tiamna a nei hi. Tulaitak in SSPP Residential School ah Headmistress, Kimbiaksang malatna nuai ah teaching staff 19 leh non-teaching staff 3 a um ua, student 606 registration kibawl lak ah 600 um hi’n a kigen hi.

Bungmual ah Aadhaar card a ding lim la

Lamka, April 12 *(Nisin Thuhiltu)* : Bungmual khua ah Aadhaar card a ding lim kilakna leh enrolment bawlna chiazawmto zel in, tuni’n le sutzawp ahi. Aadhaar Card a ding lim kila khanailote a ding khualna ah Bungmual hausapu, H. Mangchinkhup in Shyam Lal Poonia, IAS, DC Ccpur kiang ah dawtna a siam lemsakpi ahi dungzui ah za’ni April 11, 2018 apat Bungmual khawmipite a ding in lim kilakna pat ahi. April 16, 2018 ah lim kilakna sunzawm kit ding ahiu. Imphal a Miracle and FSRD Private limited apat MD Warish Sheikh, Enrolment Aadhaar Supervisor in lim kilakna a hung mapui ahi. Zani khan naupang leh piting kigawm in mi 30 in enrolment a bawl ua, tuni’n le mi 30 val in a bawl kit ui.

Only Grace Home a ding ah thing tuak

Lamka, April 12 *(Nisin Thuhiltu)* : Zomi Mothers’ Association (ZMA) Leijangphai Unit leh Tallian Unit in Only Grace Home a ding in thing tamtak, ZYA GHQ truck in a thawt ua, Lamka puaktung in a um hi. Thing puakna ah mat ding Diesel zosia, Th. Jamchinthang, MDC Thanlon in a puakdaw hi’n a kigen hi. Zia gual ah naupang etkawlna ah kithuapina pia, ZMA Leijangphai Unit leh Tallian Unit ban ah Thanlon MDC chung ah ZMA GHQ in News mangcha in kipakthu a puang hi.

KKP in blood donation camp nei ding

Lamka, April 12 *(Nisin Thuhiltu)* : Khristian Khanglai Pawl (KKP), MPCS, D. Phailian Pastor Bial in a hungtung ding April 14, 2018 ah Blood Bank, District Hospital mun ah Blood Donation Camp nei ding ahiu. Zia hun achun, midangte’ hinna humbitna ding ah bialsung mi a tamtheipen in thisan pe ding in chialna a bawl ui.

Staff quarter sakpatna ding ah suangphuna nei

Lamka, April 12 *(Nisin Thuhiltu)* : Mizoram Synod Manipur Area in tuzingkal dak 7 in Manipur Area Office Campus, Compound Veng, D Phailian ah Mizoram Synod Manipur Area office staff quarters sak pat ahitheina ding in, suangphuna leh Pathian kiang ah latna a nei ui. Zia hun achun, Mizoram Synod Manipur Area office staff quarters building committee, office staff leh kochuam mapuitute a pang ua, Rev Kamkhotinthang Neihsial, Coordinator, Manipur Area in hun matna a mapui a, Rev Joseph Lalnunmawia, Incharge, D Phailian Pastor Bial in vaidawnna thu gen in, Jubilee kochuam lapawl sakna a um a, Upa Kaikhokam, Work Supervisor in Mizoram Synod Manipur Area office staff quarters sakna ding tawh kisai report chawmkim piakna a nei hi. Rev C Zorammawa, Administration, Secretary Manipur in suangphuna leh Pathian kiang ah a mun latna a nei hi. Rev Kamkhotinthang Neihsial, Coordinator Manipur

Area in kipakthu genna nei in, Rev Jerry Zoliansanga, Incharge Lamka Pastor Bial in hun khakna pauchapna a nei hi. Upa Kaikhokam, Work Supervisor in staff quarters bawlna ding tawh kisai a genna ah, Synod Manipur Area Office bawlpat lim in office building ti’lo building dang sakna ding gam awng umlo himaleh, Pathian mapuina zal ah gam lianzaw nei in a um a, kochuam semtu leh mapuitute umtheina ding, staff quarters bawlna ding ah Synod Headquarter ah dawtna dungzui ah, Synod Headquarter in Rs. 87,20,000 lemsakna a bawl dungzui in, tuni’n nasep patna ding ah suangphu’na leh a mun ding Pathian kiang ah quarter mun ding latna nei ah um hi’n a gen hi. Aban a genna ah, quarter bawl kipatna ding in Synod Headquarter in lakh 50 sanction a bawl dungzui ah nasep pat hiding hi’n le a gen hi. Quarter ahileh feet 84x33 a lian, a sawng hiding ahia, a nuainung pen ahileh gari kawina(garage) ah mat ding ahi. Executive Secretary, Executive Secretary Senior leh Junior ban ah Chowkidar um ding hi’n a gen hi. Tuni mama ah quarter bawlna nasep pat ngal ahi.

DC/CCpur thupiak dungzui ah vawkbuk khat phel

Lamka, April 12 *(Nisin Thuhiltu)* : Shyam Lal Poonia, IAS, DC Churachandpur in thupiak a bawl dungzui in tuni’n Government School tawh kizawp leh PHSC kiang ah um, Vawk bûk khat phel in a um hi. Thu kihiat dan in, a chiata March 22 leh 24, 2018 sung a government department chuamchuam ah nasep a umte etthakna nei ahi hun ah, school thuneitute kiang ah Vok bûk phel ding ah DC in thupiak a piaksa hi’n a kigen a, za’ni tiang ah phel hinailo ahi ti a hiat ziak in, Thangboi Gangte, MCS, SDO Churachandpur kiang a thupiak a piak dungzui ah ,SDO leh a team te’n tuni a mun vapha in, Village Authority hiatpina ah a Vawk lakdaw piak a, a buk phelpiak uh hi’n a kigen hi. District in thianthona tawh kisai ah nasatak ah pan a lak zing lai ah, ziagual ah school leh PHSC mun ah Vawk kivak hi District Administration in ngaikhawk a panla hi’n a kigen hi.

Annual State Level Tribal Cultural Festival kimang ding
Lamka, April 12 *(Nisin Thuhiltu)* : Tribal Research Institute, Imphal in a hung tung ding April 16-17, 2018 in Annual State Level Tribal Cultural Festival kiti TRI Complex, Chingmeirong, Imphal ah mang ding a hi. April 16, 2018 ah zia hun matna chu N. Biren Singh, Manipur Chief Minister; N. Kayisii, Minister (Fisheries, TA & Hills); Loishi Dikho, Minister (PHED, Printing & Stationery); Letpao Haokip, Minister (Water Resources, YAS), T Thangzalam Haokip, Chairman, HAC; Thangso Baite, MP, Lok Sabha (Outer Manipur); Samuel Jendai, MLA leh Dr. J. Suresh Babu, IAS, Chief Secretary te’n khuallian hina tawh uap ding a hiu a, April 17 ah hun matna ahileh Y. Joykumar Singh, Deputy Chief Minister; Th. Biswajit Singh, Minister (Works, RD & PR, Commerce & Industries, Power, AR & Training, IPR); N. Kayisii, (Minister, Fisheries, TA & Hills); V. Hangkhanlian, Minister (Agri. Vety & AH); Nemcha Kipgen, Minister (SW & Corporation; MC Mary Kom, MP Rajya Sabha; Awangbow Newmai, MLA leh K. Leishiyo, MLA te’n khuallian hina tawh uap ding a hiu.

A pawsal thiluang puakna’ ama leh a chanu’n thina tuak
Imphal, April 12 *(Nisin Thuhiltu)* : RIMS Hospital ah zani, 11 April 2018 zan ah damlona ziak ah thina tuak Huirom Rakesh (43) s/o Late Huirom Moba of Sekmai Parao chu a insungmite’n a luang inn zawtpi lai un, a luang puakna ding ah a reserved uh diesel auto bearing registration number MN/0L/ 9530 leh truck bearing registration number MN/01/3934 kiphutua in tuaksiatna a tung a, ziana a chun thiluang puak ah um Huirom Rakesh (43) zi (wife) Huirom Ongbi Kanao (35) leh a chanu tha 9 ah upa in zia tuaksiatna chung a chun thina a tuaksawn ui. A langkhatlam in a chateu lak ah Huirom Priya (15) leh Huirom Vicky (25) te chu liamna ziak in Raj Medicity tut in a um ua, a dinmun uh serious hi’n a kigen hi. Thudawn a taklat dan in, zia tuaksiatna mun chu Tendongyang, Sekmai hi’n a gen a, thiluang puak ah um Huirom Rakesh (43) chu damlona ziak ah RIMS hospital tut himaleh damzo lo ah hospital ah thi, a thi tawh kitawn ah a chenna’u Sekmai Parao a zawtpi zinglai ua, lamkal ah tuaksiatna tung sawn ti a hi. Zia tuaksiatna tun hun chu zan dak 9:00 tuam hin a kigen hi. A langkhatlam ah thina tuak insungmite leh mipi tamtak te’n Sekmai Police Station mai, Sekmai area ah lampi khaktan in, truck driver chung ah action khautak lak ding phutna a nei ui.

Women Market ah JCILPS in pawsal van zuak 10 kaidawk
Imphal, April 12 *(Nisin Thuhiltu)* : Joint Committee on Inner Line Permit System (JCILPS) Women Wing in tuni’n Ima Market Kwairamband Keithel ah pawsal van zuak mi 10 a kaidawk ui. Khawvel ah women’s market thupipen ah kigen, Ima Market ah pawsal van zuak kaidaw ah um te chu non-local mi a hiu a, mi 10 te lak ah mi 1, Bihar state a pat mi’n Manipur Government issue bawl Adhaar Card nei in a kigen hi. JCILPS Women Wing Convenor Memcha Leima in media persons te kiang ah a genna a chun, pawsal van zuak kaidaw ah um khenkhat chu traffic police te’n license a piak uh, khenkhat in numei license neite a pat a laksawn uh a hidan a gen hi. Government authority in non-local mi, pawsal te tiang in women market ah van zawk theina ding ah phalna a piak chu lamdang a sakthu gen in, Ima market min susia a hiu ti’n a gen a, state government chu ILPS implement ding ah chialna bawl kawm in,non-local te van zawk theina ding ah arrangement dang a siam ding a nawp thu a gen hi. Chuleh, Ima Market ah pawsal van zuak um theilo ding hi’n a gen hi.

Thingnuaimi ki-surrendered te lung awilo; dakkal 36 sung general strike puang
Imphal, April 12 *(Nisin Thuhiltu)* :Thingnuai surrendered te’n government chung ah a lungkimlo thu’u a taklang ua, thutiam ah um te sukpitin piak ahiloleh April 15 zan a pat dakkal 36 sung general strike chiapi ding a hidan uh a taklang ui. Manipur Press Club ah All Manipur Surrender Welfare Association (ANSWA), Vice President, Abdul Latif in thuthak lakhawm mite kiang ah a genna a chun, hindan pangai mat ding nawp ziak ah government khut ah kipelut a hidan uh genkawm in, government in Surrenderee Re-habilitation schemes nuai ah thutiam a bawl te supitinglo in a gen hi. April 14 tiang ah a muding dawl uh a mulo ua leh kiphinna pat ding ah lemsakna nei un le a gen a, tu leh tu surrender cadre 105 um te lak ah 41 te office kaizing hi’n a gen hi. CID department in khualchilna kituptak a nei banah a pawimaw dungzui ah procedure um te sukpitin a hi nung tiang ah Surrenderee Re-habilitation schemes nuai ah a thil muding uh mulo ah a um zing uh chu lamdang a sakthu le a gen hi.

User Rating: 0 / 5

Star InactiveStar InactiveStar InactiveStar InactiveStar Inactive

Zomi Council cabinet member thak ding te’n kitiamna nei

Lamka, April 11 *(NISIN THUHILTU)* : Zomi Council ah Chairman ding telna neizaw a hitak tawh kitawn in tuni, April 11,2 018 sunma dak 11:00 in Zomi Council Complex, ZC Veng, New Lamka ah Cabinet Member ding guatna leh kitiamsakna a um hi. Zia hun a chun, John K. Ngaihte, Chairman, Zomi Council a chiakhawm palai te muakna bawl in, H. Pauzachin, President, TCU General Headquarter in pauchapna tawh hun hawnna a nei a, Election Commissioner te mapuina tawh cabinet member ding telna a um hi. Chun, General Secretary, Speaker, Deputy Speaker, Secretary (Administrative Affairs), Secretary (Finance) leh Secretary (Information) ban ah Secretary (Treasury) te ding ah nomination paper la te lak ah Secretary (Treasury) a ding ah nomination paper Election Commission kiang ah pelut a umlo ziak in zia post tu ding chu a awng in a um hi. Zomi Council Cabinet Member ding ah guat ah um te ahiuleh- General Secretary - Nangzakai Suante s/o (L) S. Nengdoulian; Speaker - Dr. R. Sanga s/o Aithanglian, Deputy Speaker - K. Khupdoulian s/o (L) Chinsuanpau, Secretary (Administrative Affairs) - Paukhogen Gangte s/o Sata Gangte, Secretary (Finance) - B. Ginsuanmuan s/o (L) Singchinzam leh Secretary (Information) - Kapmuanlal Mate s/o (L) Zamkhongam te a hiu. Secretary (Treasury) post awng ah um ahileh Chairman mapuina Cabinet Member te’n a ngaitua ding uh ti a hi. Cabinet Member thak te chu John K. Ngaihte, Chairman, Zomi Council in kitiamna a neisak a, Tribe chuamchuam a pat palai chiakhawm te’n guatthak ah um cabinet member te zathuap ding etsakna’n a khut changlam chiat uh tung in, Pastor N. Vumsong, Local Pastor, EBCC Khominthang in Cabinet Member thakte te pauchap piakna leh tilkhona a nei hi. Chun, Chairman, John K. Ngaihte in maban panlak ding dan tawh kisai genlatna a nei a, Khatkhotong Baite, President, VPC General Headquarter in pauchapna tawh hunkhakna a bawl hi.

N.Molhoi ah Poultry Project Unit hawng

Lamka, April 11 *(NISIN THUHILTU)* : North Eastern Region Community Resource Management Project for Upland Areas ( NERCORMP ) Churachabdpur in tuni, April 11,2018 zingkal lam dak 8:00 in NEC funded NERCORMP Poultry Project Unit khat a piak uh chu N.Molhoi khua, Tuibong TD Block nuai ah Thiansuana/ inaugurate a bawl ui.

Zia hun chu S.Thenlaljoy Gangte, MCS, Assistant Commissioner to DC Churachandpur in Chief Guest hina tawh uap in Poultry shed ribbon cutting bawl in a hawndawna a nei a, ama’n a holimna a chun, Manipur Govt. chopna nuai ah MBA full time zet London tiang ah zilzo thei ahi ziak in finance toh kisai holimna anei hi. A man, John F Kennedy thugen leh Warren Buffet chanchin apat in development um na ding ah financial management basic 3 genna a nei hi.

D.Khuala Vaiphei, District Project Director, NERCORMP Churachandpur in Functional President hina tawh zia hun chu a uap a, ama’n a thugenna a chun, Chief Guest Thenlaljoy chu officer mi fel, efficient leh NERCORMP ngainatu ahi dan taklatna nei in, Poultry Project Unit enkawl ding ah ngansia ah um PNGO staffs Ngamlal Haokip leh a lawite leh N. Molhoi NaRMG te pakchat thu a gen hi.
Zia hun mat sung a chun, NERCORMP Officers Thawngkhenmung Hanghal AAO, Jagadish Laishram, PTO, Jamkholal Lhungdim IDO leh PNGO Chief Functionary Ngamboi Hanghal te’n le thugenna a nei ui. A kihawng thak Poultry Project Unit chu Rs. 6,90,000/- bei a akno 800 vakna ding hi’n a kigen hi.

Anngawl pauchapkhawmna nei

Lamka, Apri 11 *(NISIN THUHILTU)* : District sung pauchappawl chuamchuam kigawmkhawm, Ninevi Revival Crusade Ministries in tuni, April 11, 2018 zingkal dak 7:00 apat PCI (R) Biakinn, Mualkawi ah a 31-veina ding in Anngawl pauchapkhawmna a nei ui. Zia pauchapkhawmna hun a chun, Rev. Thangzalun, NTBC, Zogam Road in Gospel Revival Message genna a nei hi. Ninevi Revival Crusade Ministries in maban April 18, 2018 ah EBCC College Veng ah a 32-veina Anngawl Pauchapkhawmna nei kit ding a hiu a, April 25, 2018 ah a 33-veina tinna ding ah ICI Church, Rengkai ah nei ding a hiu. Ninevi Revival Crusade Ministries in pauchapna a nei hun ua a thil dawtpipen uh ahileh Churachandpur District sung ah kochuam chuamchuam um te kituakna ding leh nam chuamchuam te kal ah chamna leh muanna a um zing ding ti a hipen hi.

Ropiang free eye screening leh optical camp nei

Lamka, April 11 *(NISIN THUHILTU)* : Ropiang Foundation Trust, Churachandpur in district sung a Govt. school ah kai naupangte’ lak a Free Eye Screening & Optical Camp a nei chu chiapi zing in tuni, April 11, 2018 in school pathum - Thangkhai Govt. High School, Pearsonmun, Vungzagen Higher Secondary School leh SSPP Residential School in a sunzawm ui. Zia hun a chun, Dr. Chin Guite, Eye Specialist in mit lam a buaina neite en in, Ginzaching, Ophthalmic Assistant mapui Volunteer te’n mit tawh kituak ding mitbel etchianna a nei ui. Hiatthei khat chu, Ropiang Foundation Trust in Free Eye Screening & Optical Camp a neina ding a chun District sung ah Govt. school 10 a teldawk a, April 9, 2018 ni ah Vimala Raina Govt. High School leh Phungkhothang Govt. High School ah Camp bawl pan in, zani a khan Churachandpur Govt. High School, Gandhi Memorial High School, Lanva Model School leh New Lamka Upper Primary School in a bawl a, school 10 lak ah school 7 ah Free Eye Screening & Optical Camp neizo ta ti a hi. Shekhawati Hospital, Jaipur leh Barala Hospital & Trauma Centre kithuapina tawh zia gual Free Eye Screening & Optical Camp chu a sai uh, maban ah private school ah le nei ding un a kigen hi.

Voluntary Blood Donation Camp –cum- Awareness Campaign

Lamka, April 11 *(NISIN THUHILTU)* : Swacchata Pakhwada Swacchata Se Siddhi 2018 matna kawm in tuni April 11 sunma dak 11 apat in Ccpur Govt. college room number 3 ah District Health Society, Ccpur leh Goodwill Mission Service GWMS saina’ Voluntary Blood Donation Camp –cum- Awareness Campaign a um hi. Zia hun a chun, Dr Ricky vanlallawm Guite, Principal Ccpur Govt. college in pauchapna tawh hun matna a hawng a, Dr Chingnunsiam, DNO in voluntary blood donation camp cum awareness campaign nei ah a umna ziak genlang in, Lunkhomang Khongsai, Additional SP Ccpur leh Dr Phirthanglien Buhril, DMO CCpur te’n thugenna a nei ui. Zia Awareness campaign a chun, Dr Vijayanta kshetrimajum MO Blood bank, district hospital in “importance of voluntary blood donation” ti thupi ah nei in thugen a nei a, Career guidance hun ah P Khamsanglian, Chairman Zo Agro Famers Producer Company Limited in entrepreneurship tawh kisai genna a nei hi. Voluntary Blood Donation Camp cum Awareness Campaign a chun student 120 a pang ua, student 20, pawsal 12 leh numei 8 in a thawn in thisan donate a bawl ui. Voluntary blood donation camp ahileh District blood bank kithuapina tawh a bawl uh a hi.

Kinepna-II Premiere show leh album hawnna um ding
Lamka, April 11 *(NISIN THUHILTU)* : VPC Community Hall, Bethel Veng, New Lamka ah April 13, 2018 nitak dak 6:00 pm leh Khawvaiphei Film company Limited in a siam “Kinepna Song (Album) Releasing –cum- Premiere Show” um ding a hi. Zia hun chu Henlianthang Thanglet Vice President NPP Manipur State Unit in chief guest hina tawh uap ding, Pauchungnung Vaiphei, Associate Professor, CCPur College, Thanglalsiam M. Com, General Secretary ,YVA leh Vungkholal Executive Engineer te’n Guest of Honour, Functional President leh Chief Host hina tawh uap ding a hiu. Zia hun matna chu, P. James in mapui ding , Khaithianlal, Director (Kinepna-II) in vaidawnna thu gen ding, James Thangluai, Producer (Kinepna-II) in thugenna a neiding banah khuallian-te a pat thugenna um ding a hi.

One Day Awareness Programme –cum- Registration Camp on ZED nei

Lamka, April 11 *(NISIN THUHILTU)* : DIC CCpur saina’ tuni sunma dak 11:00 apat in M. Songgel community Hall ah CCpur leh Pherzawl district a ding in One Day Awareness Programme –cum- Registration Camp on Zero Defect Zero Effect (ZED) kiti a um hi. Zia hun chu District sung ah sumkawl vei mi tamtak te’n a uap ua, Boishi Singson, LBI, CCpur in hun matna amapui hi. Theinlaljoy Gangte, MCS AC to DC CCpur in Chief guest hina tawh hun matna a uap a, A Sadananda Singh, General manager, DIC Ccpur in vaidawnna thugenna nei in, Theinlaljoy Gangte, MCS AC to DC CCpur in Ccpur & Pherzawl District a ding ah One Day Awareness Programme –cum-Registration Camp on Zero Defect Zero Effect (ZED) kiti hawndawna a nei hi. Awareness hun ah Manik Gupta, Assistant Director QQCI leh Ravi Kant Kumar, Assistant QCI te’n a chiakhawm mipi te ziltilna nei in, mani khutsuak/bawldaw thil te a pat sum mutheina ding tawh kisai ah Govt. a pat panpina dawi te’n online registration bawl in, hun tawp ah PC Thangchhuana Supervisor DI DIC CCpur in kipakthu genna nei in hun a mang zo ui. One Day Awareness Programme –cum-Registration Camp on Zero Defect Zero Effect (ZED) ahileh DIC CCpur in Directorate of Trade, Commerce and Industries Govt. of Manipur leh ZED Division of Quality Council of India QCI kithuapina tawh organized a bawl hi’n a kigen hi.

L’OREAL India Private Ltd official 2 in thil umdan entha
Lamka, April 11 *(NISIN THUHILTU)* : L’OREAL India Private Limited apat official 2 in tuni, April 11, 2018 in Churachandpur a hung pha’u a, nitaklam dak 3:00 in UCO Bank building chung ah um, Infinity Unisex Salon & Institute etthakna a nei ui. Official pani te chu Prabhakar Deka, Senior Business Development Executive leh Akshay Gupta, L’OREAL Professional Distributor, Imphal te a hiu a, amau Infinity Unisex Salon & Institute neitu Chingbiakkim Hangzo@Kim Hangzo kihoupih in L’OREAL Product tawh kisai genkhawmna a neipi hi. Prabhakar in Media Briefing a bawlna a chun, L’OREAL product chuamchuam kimatdan enchian ding leh Imphal a Distribution Point keklianna ding tawh kisai ah Churachandpur pha a hidan uh a gen hi.

56th PTC General Assembly speaker ding Langkhanpau Guite
Lamka, April 11 *(NISIN THUHILTU)* : Paite Tribe Council, General Headquarter in “Nam kipumkhatna” ti thupi nei ah April 27, 2018 leh Mata community hall ah 56th PTC General Assembly –cum- Election 2018 nei ding a hi. Zia hun a chu Assembly speaker ding ah Langkhanpau Guite, MDC & Ex Officio Member, CWC, PTC GHQ a guat a, Deputy Speaker ding in John K Ngaihte, Vice Chairman, CWC PTC GHQ leh Chairman Zomi Council a guat hi. Hun mat sung in H Nengsoong, IFS retired & Ex-President PTC GHQ in “nam tidam” ti thupi nei ah thugenna nei ding, V Hangkhanlian, Minister Agriculture, Veterinay & Animal Husbandry leh Vungzagin Valte, MLA Chairman, MTDC te’n le thugenna nei ding a hiu. Electon hun ah Election commissioner te mapuina PTC GHQ ah kum 2018-2021 sung ah vaipaw ding telna um ding, teltin thak ah um te Rev V Khamvum, Principal, Grace Bible College in tilkhona leh pauchap piakna nei ding a hi.

Disbursement Function of Pension –cum- Gratitude nei

Lamka, April 11 *(NISIN THUHILTU)* : Churachandpur & Pherzawl District Education Employees Union (CPDEEU) in tuni sunma dak 11:00 in ZEO Office Complex ah Disbursement Function of Pension –cum- Gratitude PCG; Death -cum -Gratitude hun a mang hi. Zia hun a chun, PCG leh DCG sâng ding te banah CPDEEU nuai ah mapuitu leh member te a chiakhawm ua, Lalhmasawn Vice President, CPDEEU in hun matna mapui in, hun mat sung in, Kaikhanlian, President, CPDEEU in PCG leh DCG hawpdaw ah a um dan leh CPDEEU chanchin chawmkim genna a nei hi. Chun, Nehkhohao Haokip, Secretary, CPDEEU in CPDEEU lawiupa te introduce bawlna nei in, Pension cum gratitude PCG leh Death Cum gratitude DCG hawpdawna a nei hi. Pension cum gratitude PCG leh Death Cum Gratitude hawpdawna ahileh prevised leh revised in a kikhen a, Prevised ah Gouzamang PT of Bukpi High School, Lalthienzo AGT of Rengkai High School, Khumvel PT of Lungthulien Junior High School, K Bihari AGT of P Munlian Junior High School, S Bihari of MT of Ngarian Junior High School leh K Kunjababu Singh, SGT of Ngarian Junior High School-te a hiu a, Pension cum gratitude PCG in Rs 5000 chiat a sâng ui. Prevised Death cum gratitude ah Late Chinzachin Grade IV of Lanva Model High School leh Late Thianneilal Grade IV of Ccpur Govt. High School te a hiu a, a insung miteu kiang ah CPDEEU a pat a galna Rs 30000 gel piak in a um ui. Revised Pension cum gratitude ah Thangte Grade IV of Lungthulien Junior High School, nengthang AGT of hanship high school, lalsangliani AGT of lanvent singh AGT of Molphei Junior High School, lalhlunsung AGT of P Munte Junior High School, Onkhosei Grade IV of Leisang Junior High School, Lalzamvel PT of Pherzawl High School, Zamkhosuan Guite PT of Lungchin High School, Nianzadim Grade IV of Vimala Raina High School, Niangzahoih PT of Tuibong Junior High School, Dardinglien PT of Vungzagen High School, Dizachin PT of Vimala Raina High School, CL John HM of Gandhi Memorial High School leh Niangboi PT of Saikot High School-te te a hiu a, Rs 10000 chiat a sâng ui. Revised death cum gratitude DCG ahileh late Kammung Of Sungdoh Junior High School in a sâng a, a insung mite kiang ah CPDEEU in a galna’n Rs 50,000 a piai.

Kangvai ah Swachhata Pakhwada 2018 Program mang

Lamka, April 11 *(NISIN THUHILTU)* : District Health Society (DHS), Churachandpur saina’ tuni, April 11, 2018 sunma dak 11:00 a pat Kangvai Community Hall leh Kangvai Higher Secondary School ah Swachhata Pakhwada 2018 Program mat in a um hi. Zia hun a chun, Kangvai khawsung ah thuneitu te, khawsung mipi, ASHA Worker, ASHA Facilitator, Angawadi Workers CDS-NGO team ban ah Swachhata Pakhwada team-te te a pang ua, Dr Chinnunsiam, District Nodal Officer, Churachanpur in hun matna mapui in, Swachhata Pakhwada tawh kisai taklatna a nei a, Dr. Jire L. Pudaite, Medical Officer, CMO Pool in thianthona tawh kisai ah ziltilna hun nei in, Deepa Balwal w/o Rakesh Balwal, IPS, SP/CCpur apat thugenna a um hi. Hun mat sung in Dr. Chingnunsiam mapuina’ step 7 mang ah khutsawp ding dan kiziltilna le a um a , Community Hall ah hun amatzaw un, Swachhata Pakhwada team te’n Kangvai Higher Secondary School in, thianthona dinmun tawh kisai etthakna a nei ui. Zia school etthakna a nei hun ua chun, Mid-Day Meal kihawpdan lungtun umlo a sakthu’u a gen ua, numei leh pawsal toilet kikawp sak ah um le lemchanglo in a gen bawk ui.

ZSP saina legal awareness programme
Lamka, April 11 *(NISIN THUHILTU)* : Zou Sangnaupang Pawl (ZSP), CCpur Govt. College Branch in District Legal Service Authority (DLSA) tawh kithua in tuni’n CCpur Govt. College ah ‘one day legal awarenesss programme a nei ua, zia hun a chun resource person in M. George Zangkholian, (BA, LLB), Advocate leh Dr. Ricky Vanlallawm Guite, Principal, CCpur Govt. College te a pang ui. Chun, ‘Right to Information (RTI) Act’ leh Right to Education (RTE) Act’ tawh kisai thupi ah nei in kiziltilna hun a um hi.

Medical canteen siamthakna nasep zothiang
Lamka, April 11 *(NISIN THUHILTU)* : Tukum bul January 17, 2018 apan District Hospital Ccpur huangsung a ding a mun pawimaw mama Medical canteen keklet leh siamthak ah um chu zawthiang in a um hi. Medical Canteen kisiam thak chu Governing Body, Rogy Kalyan Samiti in October 25 & 26, 2017 ah DC/CCpur tawh meeting a nei hun ua Hospital thiantho sakna ding tawh kisai genkhawmna a nei hun ua lemsakna a nei uh a bawzuina a hi. A langkhatlam in Hospital visitor regulation & hospital security, hospital thianthona tawh kisai, security-te nasep dingdan leh hygenic food supply banah Color Coded bed sheet tawh kisai le siamthak in a um hi.

Thokang ah a pat kiven ding: Malaria Deptt.
Lamka, April 11 *(NISIN THUHILTU)* : Malaria Department, Ccpur in zani a kipat April 13, 2018 tiang ah district sung ah Malaria natna pawtu, thoukang-no (larvae) piadaw theina ding mun te etthakna (survey) bawl ding ti a hi dungzui in, khawpi sung mun chuamchuam ah thoukang-no piandaw theina ding mun te dingte etthakna a nei hi. Chuktui luanhun kipan kipan kitta ding a hina chung ah pilvang chiat ding leh innkim-innkiang ah tui kivei den umsaklo ding, tuikhawlna a sit kituptak umsak ding leh kivanna nei chiat ding in Malaria Department in mipi te chialna a bawl hi.

Ni 8 sung police custody um ding
Lamka, April 11 *(NISIN THUHILTU)* : Churachandpur Police in a chiata April 9, 2018 sunma dak 11:30 ah galvan zuak ah kipei leh thingnuaimi te kiang ah galvan pesawntu Letpao Haokip (56) s/o Paokhongam of Mongjang Village, CCpur a mat uh chu zani a khan CJM ah dinsak in a um a, Court in ni 8 sung April 17, 2018 tiang Police Custody ah um ding in lemsakna a nei hi. Letpao Haokip (56) ahileh Police leh Assam Rifles in chiata April 6, 2018 ni ah Country made Pistol 1 & Magazine 1, Chinese Hand Grenade 2, Nokia Handset 1, Airtel Simcard 1, Aadhaar Card 1 leh Rs 250 tawh Thenmang Haokip (49) s/o Paosei Haokip of Changpikot Village, CCpur a matdaw uh tawh kitawn ah ama kipuan dungzui a galvan kawi te chu Kwakta a mi khat kiang ah a piaksawn ding, Kwakta ah a piaksawn ding chu phaizang thingnuaimi khat kiang ti ah a kipuan tawh kitawn ah galvan ah sumkawl veina pang Letpao Haokip le mat ah um ti a hi. Police in zia case tawh kisai a chun, FIR No. 30(4)2018 CCP-PS u/s 25 (1-C) Arms Act & Explosive Substance Act nuai in case a ziklut hi.

CM in Imphal lui (river) sukthianna nasep ettha zawm
Imphal, April 11 *(NISIN THUHILTU)* : : Chief Minister N. Biren Singh in Water Resources Minister Letpao Haokip & Revenue Minister Karam Shyam te tawh zani, Koirengei leh Moirangkhom kal ah Imphal lui (river) sukthianna nasep etthakna a neizaw nung in tuni’n Haoreibi Makha Leikai - Kyamgei area ah nasepna a entha kit hi. Zia hun a chun, MLA Yaiskhul AC Thokchom Satyabrata, MLA Keirao AC L. Rameshwor, DC Imphal West Ningthoujam Geoffrey, Chief Engineer of Water Resources Ksh. Pritam leh State Government nuai ah high ranking official hunkhawp te’n le a zui. Thuthak lakhawm mite kiang ah Chief Minister in a thugenna a chun, Imphal lui sukthianna nasep 70 percent zaw hita leh chuuk (rainy season) masang ah a vatsia zawthian hiding in a gen hi. Chun, Kongba, Nambul, Thoubal lui sukthianna nasep le tunung sawtlo ah kipan ding hi’n Chief Minister in a gen hi.

Chief Minister N. Biren Singh chu Imphal lui (river) sukthianna nasep entha himaleh a chiatha zing Commonwealth Games ah Manipur boxer Mary Kom final a lut chu kipak mama hin a gen a, zia bep chu hilo ah Indian Hockey team te CWG 2018 final kihel thei ding ah a um uh chu kipakpi mama hi’n a gen hi. Minister for Water Resources Letpao Haokip in mipi te chu lui (river) ah nin buat leh ni’n pai ti te chiinglo ding ah chialna bawl in, civic sense nei tak ah khawsa chiat ding in chialna a bawl hi.

Deputy Chief Minister “Bharat – Myanmar Seema Chintan Baithak” hawng

Imphal, April 11 *(NISIN THUHILTU)* : : Deputy Chief Minister Yumnam Joykumar Singh in tuni’n Department of Art & Culture, Conference Hall, Palace Compound, Imphal ah ni 2 sung um ding “Bharat – Myanmar Seema Chintan Baithak” hawnna a nei hi. Zia conference chu Seemantha Chetana Mancha, Purvottar te organised bawlna nuai ah um a hi. Deputy Chief Minister in a thugenna a chun, Manipur in Myanmar tawh gamgi sautak kikawp ah nei a hidan gen in, Manipur-Myanmar kal a hawi ding a nawpthu a gen a, border areas siamhawi ding pawimaw in a gen hi. Gamgi tuam ah drug trafficking, militancy leh infiltration etc te chu genkhawm ding leh a sukven theina ding ah panlakna nei ding pawimaw in le Joykumar Singh in a gen a, border management kituptak a um ding pawimaw in a gen hi.

Deputy Chief Minister in a gen belapna a chun, border area ah cheng te ding ah border roads, connectivity, infrastructures -schools leh hospitals ti a um ding pawimaw in a gen a, diklo tak ah gamgi kantan ah dawi umlo nasep thilbawl piang sek te border force- BSF etc te kituptak ah etzui sak ding pawimaw in a gen hi.

Hun matna uap, Manipur Chief Secretary Dr. J. Suresh Babu in a thugenna a chun, North East ah Border Areas Development Programme (BADP) nuai ah gamgi tuam siamhawi hiding, Union Government in -border fencing, boundary demarcation leh border pillars chungchang ah buaina um te a vaima theipen ah sukven ding dawi a hidan gen in, Ministry of External Affairs (MEA) in Myanmar tawh kihiatua ah gamgi tuam ah buaina um te sukvenna ding ah panla zing hi’n a gen hi. Zia hun matna a chun, All India Convenor of Seemanta Chetana Mancha Gopala Krishnan in Myanmar tawh relation hawi tak a um theina ding tawh kisai genna a nei a, Arunachal Pradesh, Nagaland, Mizoram leh Manipur border district a pat delegates tamtak te’n conference chu a uap ui.

Page 1 of 23