Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

RTA AWARENESS CAMPAIGN NEI

Lamka, June 20 (Nisin Thuhiltu) : Traffic Control Police (TCP), Churachandpur siana nuai ah Road Traffic Accident (RTA) Awareness Campaign chu TCP Office, Churachandpur Police Station ah tuni’n M. Kumarjit Singh, Additional SP (Operation) in hawnna a nei a, zia hun ah a thugenna a chun, mipite accident a pat a bit ding uh dawina ziak ah Awareness Campaign chu nei a um hi ah taklang kawm in district sung ah TCP nasepna kuama sap in kithuapi chiat ding in le chialna a bawl hi. Mipi bitna ding gelna ah Awareness Campaign nei a hi tawh kitawn in mipi’n le mani bitna ding ah panla in two-wheeler a chuang te’n helmet khuk ding leh gari a tuaksiat hun ah mani kizenna thei na ding First Aid Kid kipuak chiat ding in le a gen hi. Campaign hawn a hi tawh kitawn in TCP personnel te’n Additional SP leh OC Traffic malatna’n Police Station a pat lampi zui in paungaina mang in mipi bitna ding thupuan a bawl ua, Tedim Road-Nehru Marg Junction ah gari a taite kiang ah Road Safety tawh kisai kizikna pamphlet a hawm u’i. RTA Awareness Campaign a hileh “Your Safety, Our Priority” ti thupi tawh nei a hia, Pamphlet ah helmet khukding; kham pum ah gari heklo ding; Traffic Rule zui ding; pilvangtak ah lampi kan ding; phalna mun a gari ngak ding; gari hekkawm a phone matlo ding; la kinoh leh kipan vak in ti leh mipi bitna ding thuzik tamtak a um hi.

AADHAR SPECIAL DRIVE
Lamka, June 20 (Nisin Thuhiltu): Shyam Lal Poonia, IAS, DC/CCpur, in tuni thusua a bawlna a chun Churachandpur District huapsung Sub- Division 8 ah MANITRON te'n Biometric enrolment leh Aadhar generation tawh kisai Special Drive pan ding a hidan uh taklang kawm in Aadhar enrolment thak (fresh) te ding ah a fee umlo ding himaleh correction ahiloleh modification bawl nuam te'n Rs 25 a piak uh pawimaw ding hin a taklang hi. Chuleh, Manipur Home Department thupiak dungzui ah NPR ah detail um te bep Aadhar capturing ah enroll hithei ding un a gen a, population kum 5 nuailam te le Aadhar enrolment bawl theita ding uh hin a gen hi.

BIOMETRIC KILAKNA UM
Lamka, June 20 (Nisin Thuhiltu) : Henglep Sub-Division a ding ah Biometric kilakna tuni’n SDO/BDO Henglep Office ah pat in a um a, zia na a chun sunma dak 11:00 a pat sunnung dak 4:00 kikal sung kilak thei ding a hi. Biometric kilanuam te’n Domicile/ Residential / Passport/ Voter ID/ Ration Card/ Driving Licence/ Photo ID Card/ Bank Statement/ Passbook ti te lak ah khat penpen chawi ah kilak thei ding a hia, Henglep Sub-Division a ding ah Biometric kilakna Chingmunglian in ensui ding hi’n Chunglenmang, SDO/BDO Henglep in hiatsakna thusua a bawl hi.

NURSE THAK TE LAKLUTNA LEH TRAINING NEI

Lamka, June 20 (Nisin Thuhiltu) : District Hospital, Churachandpur a sem ding Nurse khenkhat laklutna leh training kithua chu tuni’n MS Conference Hall, District Hospital ah nei in a um a, Joining Report pia Nurse te’n self introduction a nei ui. Dr. Thangchinkhup Guite @ Dr. T. Guite, Hospital Consultant, Churachandpur District Hospital in Training hawnna a nei zaw ah a thugenna a chun, government sepna mu kiti vangphat a hi lai ah CCPur District ah thingtang lam hilo ah District Hospital ah sem ding kiti chu vangphat um diak a hi dan a taklang a, hospital ah sem thak te’n haksatak ah sepna mu a hina ua ginum tak leh kukal tak ah sem ding in a tilkho hi. Zia hun matna a chun, Sister Niangpi, Nursing Superintendent leh Dr. T. Nengkhanmang, Deputy Superintendent, District Hospital te’n Hospital chia dan tawh kisai ah nurse thak te ziltilna hun le a nei u’i.
NT 21june2017b

ANCHANG HAWPDAWK

Lamka, June 20 (Nisin Thuhiltu) : National Food Security Act (NFSA) nuai ah April tha quota ding anchang chu tuni zingkal dak 7:00 a pat in FCI Godown, Chengkawnpang ah hawpdaw in a um hi. Anchang a hileh tuni’n Thanlon Sub-Division a ding hawpdaw a hia, zia hun a chun Thanlon SDO/BDO etthâkna nuai ah Thonlon Sub-Division sung ah Rationing Agent te’n amau quota ding chiat a kilak ui. Zing, June 21 leh Parbung Sub-Division a ding hawp daw hi ding a hia, SDO/Parbung in April leh May quota la ding a hi. Parbung Sub-Division sung ah NFSA nuai ah Rationing Agent leh SK Oil Sub-Dealer te hun March 31, 2017 ah a bei ziak in Agent leh Dealer thak ding lakma ah NFSA tawh kisai SDO/Parbung in mawhpuakna tu phawt ding a hi.
NT 21june2017c

CHILD HEALTH SCREENING NEI

Lamka, June 20 (Nisin Thuhiltu) : Rashtriya Bal Swasthya Karkyakram (RBSK) programme nuai ah RBSK Staff te’n Aganwadi worker te kituapina tawh Bungmual YPA Hall ah tuni’n Child Health Screening leh Referral Card mat ding dan ziltilna a nei ua, zia huna chun Bungmual khawsung ah naupang kum 6 nuailamte damtheina etsak (Health screening nei) in a um ui. Child health screen hun ah RBSK a pat doctor 3, Dr Rentibala (Team leader), Dr. Irish leh Dr Rojita te’n nurse leh pharmacist te kituapina tawh naupang kum 6 nuai lam te damtheina a entha’u a, damtheina lam tawh kisai ah hospital chia ngai te a ding in RBSK Card fill-up piak in, card a chun ki-etsakna ding Hospital taklat ah um in zia hospital a chun a thawn ah ki etsak thei ding a hiu. RBSK a hileh central government in nuapang te a ding bîk ah a bawldaw a hia, naupangte chu gam a ding ah golul a hina ua natna chuam chuam ziak ah a thi ding uh vengna ding ah kibawldawk a hi.
NT 21june2017d

ADMISSION KIHAWNG
Lamka, June 20 (Nisin Thuhiltu) : Lamka College, New Lamka ah 2017-2018 academic session ah subject thak kikawi - Commerce, geography leh sociology zilnuamte a ding in admission a kihawng a, subject dang English, Political Science, Economics, History, Education leh Mizo subject la nuam te a ding in le admission a kihawng nalai hi.

UNDER-17 TOURNAMENT KIPAN

Lamka, June 20 (Nisin Thuhiltu) : Vanglai Sporting Allies (VASA) saina nuai ah 2nd (L) Siam-Chin-Thang Memorial Tourney 2017 (Under-17) chu tuni’n P.T Sports Complex, New Lamka ah tuni’n a hawnna nei in a um hi. Zia hun chu Shyam Hanghal, I-League Player in Chief Guest leh Muanlal Phaipi, President, VENUS in Guest of Honour hina tawh a uap gel ua, Pastor T Songkhanthang, Local Pastor, Khominthang EBCC in sunna leh pauchapna hun la in tournament hawnna le a nei hi. Chief Guest, Shyam Hanghal in a thugenna a chun, football le thingtang mite a ding ah nek hawlna chikhat suakta a hi dan taklang kawm in football lunglut tamtak a um lai ua khenkhat te chu mi tampi lunglutna a hi ziak ah kihel mai mai ti le um hi’n a gen a, lawtin tak tak na ding ah titkna leh kukalna pawimaw mama hi’n a gen hi. Football bep hilo ah thil dang dang a le gasua thei tak tak na ding ah panlak pawimaw hi’n le a gen a, tournament ah kihel ding te’n game spirit nei tak ah a kihel ding uh dawisak thu le a puang hi. Guest of Honour Muanlian Phaipi in tournament saitu VASA te pakchat sak thu puang kawm in player te’n tournament board leh mani sang ah upa zaw te zadan thiam tak a kihel ding uh dawisak thu a puang hi. Tournament opening match ah Pool C a pat Hiangtam Lamka Football Club (HLFC) leh Sir Aloysius Memorial Team (SANMT) te kihel in 1-1 ah a ki drawn ui. Zing, June 21 leh match 3 um ding a hia, sunnung dak 1:30 ah NFC leh LFC, dak 2:45 ah JAFC leh CFC banah dak 4:00 ah FC 2017 leh UKB te hi ding a hi. Tournament ah winner te’n Rs. 10,000 leh trophy sâng ding a hiu a, 2na la te’n Rs. 5000 leh trophy a sâng ding ban ua Individual ah top scorer, Man of the Tournament leh Best Keeper ti te um ding a hi.
NT 21june2017e

AGRICULTURAL LAND VENBIT DING PAWIMAW: CM N BIREN

Imphal, June 20 (Nisin Thuhiltu): Department of Revenue, Govt of Manipur saina ah tuni’n Manipur State Film Development Society (MSFDS) Auditorium, Palace Compound ah Manipur State Conservation of Paddy Land and Wetland Act, 2014 tawh kisai in one-day interaction programme of local & district level monitoring committee kiti a um a, zia chu khuallian hina tawh uap in Chief Minister N. Biren Singh in thugenna a nei hi. Ama’n a thugenna a chun, sustainable development a um theina ding ah lobawlna gam te venbit ding pawimaw hin a gen a, tui-lo leh wetlands te suksiat ah a um zing chu thil khawk tak a hibak ah local, district leh State level committee member te social ah kimang mi leh titna nei tak tak te guat ah um a hidan uh a gen hi. Manipur chu nek leh chak lam ah ama leh ama kitodel thei ah a um ding le pawimaw in a gen a, agricultural lands leh wetland te venbitna bei ah ama leh ama kitodel thei state hilo ding in a gen hi. Agriculture Minister tawh kithuhiat zing kawm ah state sung ah double-cropping a um theina ding lampi ngaitua zing hin le a gen a, Imphal, Kongba leh Thoubal lui (river) te ah lo tui pethei ding dam neu bawl ding ah ngaituana um hin a gen hi. Lamphelpat ah lo leh wetland le suksiat ah a um zing chu da um mama ah genkawm in Imphal West DC chu a pawimaw dungzui ah panla ding ah hiatsakna bawl hin le a gen a, a pawimaw dungzui ah tui-lo suksiatna leh lam kek ah a umna chung ah action la ding ah hiatsakna bawl hin a gen hi. Loktak Lake venbit ding chu tu Government nasep ding te lak ah pakhat hin le a gen a, Bishnupur DC chu MLAs, DC, LDA official te leh elected Panchayats leader te panna committee khat siamdawk ding ah hiatsakna bawl hin a gen hi. Zia hun matna a chun, Revenue Minister Karam Shyam, Agriculture Minister V. Hangkhanlian, Commissioner (Revenue) Th. Chittaranjan te’n le thugenna a nei ua, District chuam chuam a pat DC, SDO leh department director te’n le a uap ui.
NT 21june2017f

COMMUNITY MI KHAT HILO, NANG UH MLA KAHI: IFCD/YAS MINISTER LETPAO HAOKIP

Chandel, June 20 (Nisin Thuhiltu) Indoor Stadium, Chandel district headquarter ah tuni’n local committee saina felicitation cum interaction programme a um a, IFCD/YAS Minister Letpao Haokip in mipi kikhawp khawmna a thugenna a chun, local mite’n mun dang ah khualzin mi te leh semtu ding ah posting ah um te kituptak ah lamtua ding leh vaidaw ding bak ah kithuapina piak ding pawimaw hin a gen a, zia chu hileh district khantona leh masawnna kituptak nei ding hin a gen hi. 41-Chandel (ST) AC MLA Letpao Haokip in a gen belapna a chun, Chandel mipi te Chandel khantona ding ah panla chiat ding ah chialna bawl in district khanto pen leh a masawn pen ah a pan theina ding ah panla ding in le mipi te chialna abawl hi. Chuleh, community khat a pat mi hilo, mipi te MLA hizaw kahi ti’n le a gen a, haksatna nei te ka kiang in hung unla, I haksatnau sukveng khawm hitiu ti’n le a gen be bawk hi. Chandel Deputy Commissioner Krishna Kumar; Chandel SP, Kamei Angam Romanus leh DLO hun khawp in zia hun matna chu a uap ui.
NT 21june2017g

IMPHAL LEH HILL DISTRICT AH ONE STOP CENTRE KEKLIAN HIDI: MINISTER NEMCHA HAOKIP

Imphal, June 20 (Nisin Thuhiltu) : SocialWelfare and Cooperation Minister Nemcha Kipgen in tuni’n Thoubal Mini Secretariat complex ah Sakhi One Stop Centre etthakna a nei a, zia hun a chun tunung sawtlo ah “One Stop Centre (OSC) chu government thak vaihawmna ni 100 a tin zaw tak leh District ah keklian hiding leh target ah Imphal leh Hill District nei ah um a hidan a gen hi. Social Welfare Minister in a kisaipi official te leh staff te le kiholimpi in infrastructure dinmun etthakna le a nei a, DC, Thoubal in hun chawmcha sung ah One Stop Centre (OSC) function thei ah a umsakna chung in pakchatthu a gen hi. One Stop Centre (OSC) chu rooms 10 - administration, dormitory, kitchen, toilets, counselling room, video conference room, police, medical leh waiting room tawh staff 20 nei a hi. OSC chu privaye leh public ah numei haksatna tuak tuak te a ding bik a hia, medical, legal leh psychological support piakna kimang a hi. Ministerial team lak a chun Principal Secretary J.C. Ramthanga, IAS, DCThoubal L. Nabakiswar Singh, IAS, Director, Social Welfare Jacintha Lazarus leh department official te a pang ui.
NT 21june2017h

TUILET ZIAK AH INNKUAN 300 VAL BUAI

Imphal, June 20 (Nisin Thuhiltu): Manipur phaizang bial ah tuilet in kiam lam manaw maleh tui a ki dil naklai ziak in chenna inn 300 tuam chu lua thei a hi nai puai. A chiata hapta khat a pat gua a ha zuk ziak ah Imphal khawpi ah tuilet um in mi 4000 val te hindan pângai sukha hi’na kigen hi. Mayang Imphal lak ah tuilet ziak in thiamzilna mun 9 te chu hapta khat a kikhak ta, mipi te’n state government a pat relief kining ting ngak zing uh hi’na kigen hi. June 14 a pat gua hattak a zuk ziak in Mayang Imphal ah tuilet in tamtak in a thuaklaw ua, government in Chabung Company village ah relief camp khat a guanggal hi.

GAM THU AH KHUA 2 KIBUAI
Tengnoupal, June 20 (Nisin Thuhiltu): Tengnoupal police station huapsung ah khua kinai 2 - Khudei Khuman leh Machi Khun a cheng te kal ah tuni’n buaina a la piang in chenna inn khenkhat le hal in a um hi. Gam thu ah khua 2 te a kibuai ziak in khawsung a cheng te kal ah buaina um in matchak chuam chuam tawh kingim tua in ziana chun numei khenkhat te’n liamna tuak uh hi’n a kigen a, state police leh Assam Rifles personnel hunkhawp te’n a mun del in buaina vas u veng uh hi’n le a kigen hi.

MUSTER ROLL EMPLOYEE TE’N REGULARIZED DING AH DAWN
Imphal, June 20 (Nisin Thuhiltu): Wabagai Buffallo Farm ah muster roll employee te’n state government kiang ah kum tamtak haksatna a tuak teu hiatpi ding leh a sepna chu regularize bawl piak ding in a dawn u’i. Muster roll employee te gen dan in farm a sem ding mi taksapna a um ziak ah amau chu lak a um in hun chawm khat chu thalaw tawm cha bep piak himaleh 2004 a pat thalaw piak hitalo in haksa sa mama uh hi’n a gen ua, Okram Ibobi in kum 15 Chief Minister panmun a lua sung ah a sepna uh chu regularize bawl ding ah dawtna nei a hi banah a kisaipi department official te tawh tam vei tak kihona um ta maleh bangma taksua hilo hi’n le a gen u’i.

3RD INTERNATIONAL DAY OF YOGA
Imphal, June 20 (Nisin Thuhiltu): June 21 leh International Day of Yoga mat a hina ding ah Guinness World Record mu ding tupna tawh Yoga Training and Research Centre Manipur, Sagolband Tera Keithel in Diabetes Awareness Lesson, SAI-NERC Indoor Hall, Takyelpat ah nei ding a hi. Chun, L. Radhakishore Singh, Chairman, KVIB/MPCB, Govt. of Manipur, Dr. M. Homeshwor Singh, Director, Directorate of Environment, Govt. of Manipur, K. Sunita Devi, Zilla Parishad Member, Mayang Langjing, A. Gojendro, Pradhan, Phayeng Gram Panchayat, Imphal West leh Dr. Y. Bajao Singh, President, YRTC,Manipur te’n khuallian hina tawh hun matna uap ding a hiu.

UNION MINISTER JAVADEKAR MAPUINA REVIEW MEETING NEI; MANIPUR AH SCHOOL 120 SAKBE HIDI

Imphal, June 20 (Nisin Thuhiltu): Union Human Resource Development Minister Prakash Javadekar mapuina’n tuni’n Cabinet Hall, Chief Minister’s Secretariat, Imphal ah Manipu education sector dinmun tawh kisai in review meeting a um hi. Zia meeting a chun, Chief Minister N. Biren Singh, Education Minister Th. Radheshyam, Central Government, Joint Secretary pani leh Principal Secretary (Education-S), Commissioner (Higher a& Technical Education), Directors of Education (S) leh Higher and Technical Education banah Education department nuai ah official te a pang ui. Meeting hun ah titna nei mama te teacher ah pansak ding, manpower status, teacher te transfer & posting etc genkhawmna a nei ui. Prakash Javadekar in a thugenna chun, education sector ah ki khenchuamna umlo ah mi zosia kibang tak ah kawi ding pawimaw hin a gen a, kidemtuana leh kingaw tuana kampau mat haisan ah Government in mipi te thil dawi leh lungtup mualsuana ding ah nasep a pat ding pawimaw hin a gen hi. State mipi’n khantona leh masawnna, kivaihawmna pha leh kivaipuakna hawi ban ah corruption-free administration a hiding dawi a hidan uh gen in State Government in mipi te kinepna a thawn ah kawilo ding in a gen hi. Education kiti chu khantona a um theina ding ah a bulpipen hin le a gen a, kituptak ah
education system puaphat leh siamhawi ding pawimaw hin a gen hi. Chuleh, action plan final bawl ding leh genkhawm ding chu review meeting thiltup a hidan gen in, educational institute umna ding mun telna political interference a umlo ding pawimaw in a gen hi. Review Meeting zaw in Hotel Classic, Imphal ah Union Minister for Human Resource Development Prakash Javadekar in press conference ah a thugenna a chun, Primary leh upper primary school panna school thak 120 tunung sawtlo ah sak hiding in a gen a, state government lui in kum 10 -15 sung ah a sepdawlo thil tamtak Chief Minister N. Biren Singh mapui state government thak in ni 100 sung ah sem dawk hin a gen hi. Mipi te kithuapina tawh state government thak in state sung ah chamna leh muanna, corruption free umsak a hidan le a gen a, Manipur in khantona lam manaw zing hin a gen hi. Central government state sung ah quality education a um theina ding ah sum leh pai, tha leh zung ah kithuapina pezing ding a hidan le a gen a, mun lemchanglo tak ah school umsak a hi ziak ah school 40 sang ah tamzaw student umlo a hidan mudaw thak ah um a hidan taklang kawm in State government chu a pawimaw dungzui ah panla ding ah mawpuakna piak ah um hin a gen hi.

User Rating: 0 / 5

Star InactiveStar InactiveStar InactiveStar InactiveStar Inactive

DLC MEETING UM

Lamka, June 19 (Nisin Thuhiltu): Shyam Lal Poonia, IAS, DC Churachandpur mapuina nuai ah tuni’n BRGF Resource Centre, DC Office, Tuibong ah District Level Committee (DLC) Meeting a um a, zia hun a chun District sung ah Border Area Development Program (BADP) tawh kisai Annual Action Plan (AAP) 2017-2018 genkhawmna um in member chiakhawm te’n belap ding pawimaw a sak teu le a genkhawm u’i. Meeting a chun District sung ah District Level Officer (DLO) hunkhawp te a chiakhawm u’i.

CCPUR MARATHON TAWH KISAI AH MEDIA BRIEFING NEI

Lamka, June 19 (Nisin Thuhiltu): District Administration leh District Police kithua in maban a International Yoga Day leh Churachandpur Marathon 2017 nei ding tawh kisai ah tuni’n DC Office Chamber ah Press/Media Briefing a um hi. Churachandpur SP, Rakesh Balwal, IPS in a genna a chun, United Nations Organization (UNO) in June 21 chu International Yoga Day ah a puan tawh kitawn in District Administration leh District Police kithua ah zia ni chuleh zingkal dak 6:00 a pat Peace Ground Auditorium ah thupi tak ah mat hi ding in a gen a, zia hun chu mi zosia’n damtheina ngaikhawk ziak ah uap chiat ding in a chial hi. Hun matna ding a chun Nehru Yuva Kendra (NKY), Churachandpur leh Pitanjali Yoga ban ah District Social Welfaire te’n le kithuapina pia ding uh hi’n le a gen hi. District Administration leh District Police in khawtang ah khamthei a dodalna tawh kisai a Churachandpur Marathon 2017 chu a hung tung ding June 26, 2017 leh sai ding vaisawm hi’n le a gen hi. Marathon a hileh Category 2 - Junior (Under 18 boys & girls) leh Senior (Open boys & girls) a khen in, Pawsalte S. Kotlian a pat Lamka College chan (Kilometer 10) leh Numeite K. Salbung a pat Lamka College chan (5 km) taiding uh hi ah phuangdawk kawm in zia na ding ah registration bawl masa mi 300 te kiang ah T-Shirt hawitak piak hiding in le a gen hi. Marathon ah kipakman mi 12 kiang ah a sum a piak hiding leh a taitung masa mi 4 kiang ah Rs. 2,000, a ban mi 4 kiang ah Rs. 1,000 leh amau nung mi 4 kiang ah Rs. 500 piak hiding uh hi ah puang kawm in a taitung masa mi 100 te kiang ah Certificate leh Medal piak hiding in le a gen hi. Marathon a pang zosia Health Department in Free Health Check-up bawlpiak thei ding a hi ban un Live Music le um ding a hi ti’n le SP in a gen hi. Shyam Lal Poonia, IAS, DC Churachandpur in Churachandpur Marathon 2017 chu District sung a khamthei, chep leh muam a pat sukthianna ding tup ah sai a hiban ah a thupi ding ah “Choose Life; Say No to Drugs” mat hi ding in a gen hi. Marathon tawh kisai ah lunglutna nei te’n SP/CCP office ah office hunsung in Rs. 100/- pia in participation form lathei ding a hiu a, June 24, 2017 nitaklam dak 5:00 chan in form lakna ma piaklut kit thei ding a hi.
NT 20june2017b

ZILLAI KANGVAI BLOCK IN SDO THAK VAIDAWNNA NEI

Kangvai, June 19 (Nisin Thuhiltu): Zillai Kangvai Block (ZKB) lawiupa te’n tuni’n Kangvai Sub-Divisional Officer (SDO) / Sub-Divisional Magistrate (SDM) ding ah posting thak Mr Joel G. Haokip, MCS reception programme a neipiu a, zia hun a chun Kangvai SDO Office in amat notice board piakdawna le a nei ui.
NT 20june2017c

DIC AH ONE DAY AWARENESS PROGRAMME

Lamka, June 19 (Nisin Thuhiltu):: National Agro Tech Research and Processing Society (NARPS)/Livelihood Business Incubator (LBI) saina ah tuni’n DIC, Tuibong ah a 8-veina, One Day Awareness Programme on Apiculture & Mushroom Cultivation kiti nei in a um a, Paolal Haokip, MDC, Secretary, NARPS in thugenna nei in training pat a hi. Training hun ah Hussein Choudhary, Instructor, LBI in Mushroom Cultivating tawh kisai a ziltil a, PC Thangchhuana, Supervisor, DIC in Apiculture (Honey Processing) tawh kisai ziltilna a piai. Zia training a chun mi 20 tuam a pang u’i. Livelihood Business Incubator saina ma in DIC Tuibong ah gua leh tîng mang ah khutthiam-thilbawl kizilna a chiatha zing a, Tongthang Haokip in a ziltil hi.
NT 20june2017d

EDUCATION EXPO 2017 KIPAN

Lamka, June 19 (Nisin Thuhiltu): Ni 2 sung um ding Education Expo 2017 chu Synod Hall, IB Road ah tuni’n a kipan a, zia hun chu Quest Group of Institution, Gulzar Group of Institute, GNA University, SGT University tite a pat palai hunkhawp te’n a uap in amau University chiat uh tawh kisai hiat nuam nei te a holimpi u’i. University chuam chuam te’n North-East State te a pat kipan student te phatchuampi thei ding chuam chuam um in student 85% chunglam mu te Merit Scholarship piakthei leh SC/ST student te a ding ah Scholarship a saipiak thei ban ua direct admission le bawlthei hi’n a gen u’i. University te a chun professional course chuam chuam - MBBS, BDS, Engineering, Nursing, Pharmacy, Physiotheraphy, MBA, MCA, Fashion Designing, Air Hostess, BBA leh a dang dang te zil thei ding a hi. Education Expo a hileh zing leh sunma dak 11 a pat nitak lam dak 5 chan um kit ding a hi.
NT 20june2017e

NEWS REPORTING TRAINING KHAKNA NEI

Lamka, June 19 (Nisin Thuhiltu): State Institute of Journalism (SIJ), DIPR, Government of Manipur saina nuai ah um ni 7 sung Basic Course in News Reporting chu tuni zawthianna leh khakna nei in a um hi. A chiata June 12 ah kipan training a chun Dr. Hangpi Manlun, Sothing Shimray, Awonshang Ningsen, Rupachandra Yumnam, Sapam Dilip leh Sobhabati Samon te’n thupi chuam chuam pansan in ziltilna a piau a, tuni a ni tawpni a hi tawh kitawn in Field Visit le nei in training a pang te’n Field Visit ah a mudan uh tawh kisai Report piakna nei in training khak a hi. Lalrongbawl Hmar, District Information Officer, Churachandpur in training khakna nei in Training a pang te kiang ah Participation Certificate piakdawna a nei hi. 7-Day Basic Course on News Reporting Course zilna a chun Churachandpur a pat mi 26 a pang u’i.
NT 20june2017f

NATJANG KHAWMI TE’N A KHAU’U ZUAN KITTA

Lamka, June 19: A chiata 30 May 2017 ni ah Natjang khua KNF(N) cadre te’n Kuki Tribal Union (KTU), Self Style Chief-in-Command Mr Mr. Khailun Haokip a puimang nung ua NSCN-IM cadre te’n puimang ah KTU leader tha-suak ahiloleh Natjang khua mi te sawisak hiding ti ah vauna a bawl ziak ua a khua’u um ngam talo ah S. Molcham Village, Churachandpur ah hung zam dawk te HQ IGAR (South) nuai ah Brigadier Jai Singh Bainsla, Commander 9 Sector Assam Rifles in 18 June 2017 ni kimupi ah thil umdan a kan zui bak ah Kuki leader te tawh thil umdan genkhawmna anei nung ua panlakna a um tawh kitawn in tuni’n Natjang khawmi te’n security te venbitna tawh a khuau a zuan ui. Public Relations Officer,Headquarters Inspector General Assam Rifles (South), Imphal thusuak in a taklatna a chun, a khuau zuan kit Natjang khua mi te chu security piak a hibak ua a kilena diu gari arrange bawl piak ah um hin a gen a, Assam Rifles te activity le sukhat thak hiding in a gen hi. Natjang khua a hileh Saikul gamkai, Senapati District ah um a hi.
NT 20june2017g

UNAU MEET LEH MSDVRU HAWNNA UM DI
Lamka, June 19: Centre for Community Initiative (CCI) in a hung tung ding June 24, 2017 leh Malsawm Ability Resource Centre (MARC), Pearsonmun ah a 6-veina Unau Meet-cum-Inauguration of Malsawm Skill Development and Vocational Rehabilitation Unit (MSDVRU) nei ding a hia, zia hun chu Nemcha Kipgen, Minister (Social Welfare & Cooperation) leh V. Hangkhanlian, Minister (Agriculture, Veterinary & Animal Husbandry), Manipur te’n Chief Guest leh Functional President hina tawh uap gel ding a hiu.

BADMINTON CHAMPIONSHIP UM DI
Lamka, June 19: Churachandpur District Badminton Association (CDBA) saina nuai ah a hung tung ding June 27 leh 17th District Level Badminton Championship 2017 um ding a hia, zia na ding a chun lunglutna nei te’n CDBA Office leh Kammin Badminton Store ah Entry Form la in June 24, 2017 chan ah pialut kit thei ding a hiu.

PHC AH SOLAR HAWNNA LEH MLA KIPAKPINA NEI

Lamka, June 19: MANIREDA nuai ah Behiang PHC a solar thahatna ziak ah mei piakdawna ding kibawl chu zawthiang a hi tawh kitawn in tuni’n bialtu MLA, Ginsuanhau @ GS Haupu, Chairman, MANIREDA in a hawnna a nei a, Dr Steve Tungnung MO incharge malatna’n MLA leh a team te’n PHC ah room chuam chuam etthâkna a nei ui. Jangnuam ah tuni’n MLA Ginsuanhau kipakpina hun mat in a um a, Rev S Nengkhanmang in MLA leh a lawinu a ding a ding ah tilkhona leh malzawl dawt piakna a nei hi.
NT 20june2017h

INDIA TO SPAIN ROAD TRIP THAAK DAWNA

Imphal, June 19 (Nisin Thuhiltu) : Chief Minister N. Biren Singh in tuni’n Hotel Classic Grande, Imphal ah India to Spain road trip flagged off bawlna a nei hi. India team member 8 te chu numei pani mapuina ni 63 sung ah gam (country) 16 pha ding a hiu a, zia chu 20,000 kilometres tuam gari tai ding uh ti a hi. Team member lak a chun, Myanmar, Thailand, China, Mongolia, Russia etcte le a pang ua, Mumbai based company - EMBARQ Motorworld Pvt. Limited te organised bawlna nuai ah India to Spain road trip chu nei a hi. Chief Minister in road trip ah pang ding te chu lawting tak ah guanggalna gual ah a chia ding uh dawisak a hidan a gen a, Manipur hawina khawvel gam chuam chuam ah thezak ding leh kipumkhatna leh chamna thucha thezaktu a hiding uh dawi hin le a gen hi. Founder & Director, EMBARQ, Mrs. Medha Joseph in road trip tawh kisai a genna a chun, gam chuam chuam culture, time zones leh weather etc te hiat chian theina ding tupna hin a gen hi.
NT 20june2017i

ASSAM TUILET IN KHUA 170 CHUM

Guwahait, June 19 (Nisin Thuhiltu): Assam District 5 ah tuilet nasa mama in khua 170 te tui in a chum a, min khenkhat ah gua zuk ziak ah lei khobang chim thupi tak tak le a um hi. Zia ziak a chun mi tamtak ten haksatna a tuak ui. Official thusuak in a taklatna a chun, Brahmaputra lui tawh kizawp mat lui neu tamtak te chu danger mark ah tui tam in a gen a, thaichi tamtak le tui in chup him a higen hi. Darrang district ah mi 55,000 lam te chu tui let ziak ah haksatna tuak in a um ua, Udalguri leh Sonitpur district ah releief camp siamdaw in a um hi. Chun, State Water Resource minister Keshab Mahanta in tuiletna mun chuam chuam te etthakna nei in haksatna tuak te dinmun ethakna a nei hi.
NT 20june2017j

CM BIREN IN PRADHAN MANTRI NATIONAL DIALYSIS PROGRAMME HAWNG

Imphal, June 19 (Nisin Thuhiltu): Manipur state sung renal (kidney) disease ziak ah damlona tuak te kithuapina ding in tuni’n Chief Minister N. Biren Singh in Pradhan Mantri National Dialysis Programme hawnna Mini Auditorium, JNIMS, Imphal in a nei hi. Zia function Directorate of Health Services, Manipur leh SHS, National Health Mission, Manipur in joint ah organised a bawl a hi. Chief Guest in medical practitioner te’n damlo te chu hepina nei tak ah a etkawl ding uh pawimaw in a gen a, profession chuam chuam tamtak um te lak ah medical profession chiapi te’n damlo te kiang ah “sorry” ti theilo a hidan uh a gen hi. Public in doctor leh nurse te mi pawimaw tak ah a kawi uh chu a manlona ding ah doctor leh nurse te’n panlakna a nei ding uh pawimaw in le a gen a, mipi te’n government hospital te damlo etkawlna ding ah muantak leh taksan thei ah a kawi zingtheina ding ua medical practitioner te’n pan a lak ding uh pawimaw hin le a gen hi. JNIMS leh RIMS ah government in Pradhan Mantri Dialysis Programme pan ding leh tunung sawtlo ah district hospital te ah chiapi hiding in a gen hi. Zia hun matna a chun, Chief Minister in RIMS leh JNIMS Director te Rs. 25 lakhs gel cheque piakdawna le a nei hi. Hun matna chu Minister for Health and Family Welfare, L. Jayantakumar Singh, Parliamentary Secretary (Health and Family Welfare) S, Subhaschandra Singh, Commissioner Health, Shri Sumant Singh, Director, RIMS, R.K. Dinesh, Director, JNIMS, L. Deben ten le a uap ui. Pradhan Mantri National Dialysis Programme ahileh renal (kidney) disease ziak ah damlona nei te kituptak ah etkawl ahitheina ding ua District hospital te khutmat kituptak piak ding leh damlo te subuailo ah hospital te’n damlo te a etkawl ding uh ti a hia, funding a hileh centre government in a piak vek ding hi a hi.

GALVAN CHI CHUAM CHUAM TAWH KCP -LAMPHEL CADRE KHAT KI SURRENDER

Imphal, June 19 (Nisin Thuhiltu): Chief Minister Secretariat, Imphal ah tuni’n Kangleipak Communist Party –Lamphel, (KCP -Lamphel) cadre khat a ki pedawk (surrender) a, Chief Minister N. Biren Singh panna, DGP Manipur, L.M. Khaute, Additional Chief Secretary (Home) Dr. J. Suresh Babu leh police top ranking official te’n homecoming ceremony a neipi ui. Chief Minister N. Biren Singh in a thugenna a chun, thingnuaimi a ki pedawk (surrender) ten nekhawlna a mat thei ding ua skill development programmes piak hiding un a gen a, June 30 leh zia skill development programmes chu kipan ding hin a gen hi. State government thak muang ngam ah cadre banghem zat te a ki piakdawna chung ua a ki pedawk cadre te chung in kipakthu a gen a, Ukhrul district ah attack kibawlna te chu nasatak in demna a bawl hi. KCP -(Lamphel) cadre a ki pedawk chu Soraisam Modhuchandra Singh alias S.M. Meitei (45) s/o S. Dinamani Singh of Thangmeiband Yumnam Leikai a hia, Self Style Commander of KCP Lamphel faction a hi. Chun, 9mm pistols 2 leh magazines leh 9 live round panna meichang leh meithak te piakdawna le a nei hi.
NT 20june2017k

AGRICULTURE MINISTER IN FERTILIZER PIAKDAWNA NEI

Imphal,June 19 (Nisin Thuhiltu): Agriculture, Veterinary & Animal Husbandry Minister V. Hangkhanlian in Agriculture Director Shri Rajendro Singh leh AFO Shri Kulabidhu Singh tawh tuni’n Agriculture Godown, Lamphelpat, Imphal ah lobawlmi (farmer) te har (fertilizer) piakdawna a nei ui. Official thusuak in a taklatna a chun, state agriculture department in fertilizer kining ting tak nei stock nei a hidan taklang kawm in state pawlama pat puaklutbe hiding in a gen hi. Chuleh, a pawimaw dungzui ah lo bawl mite’n Agricultur department ah la zing thei ding uh hin le a taklang hi.
NT 20june2017l

ELECTRICITY DEPTT AH SEMTU KHAT CHAKTHING GU KIMAN

Imphal, June 19 (Nisin Thuhiltu): Langol Reserve Forest area, Manipur Zoological Garden, Iroisemba kiangnai in tuni’n State Electricity Department ah semtu khat bim (logs) a puakna Forests Department official ten a man dawk ui. Forests and Environment Minister Th. Shyamkumar in matdaw ah um bim te etthakna a nei a, zia nung a chun thuthak lakhawm mite kiang in thil um dan taklatna a nei hi. Minister Th. Shyamkumar mat ah um chu State Electricity Department ah linman ah sem hin a gen a, zingkal dak 5:30 ah kiman dawk hin a gen hi. Matdaw ah um pa chung ah legal action lak hiding a hidan taklang kawm in, chakthing (pinewood tree) te a bawng bawng ah tan a, Langol Reserve Forest area ah um Power House ah a kawi, puakdaw a guat hun ah kiman dawk hin le a gen a, bicycle mang ah zia thing kitan bawng te chu puak a guat hin a gen hi. Minister Shyamkumar in ziagual chu a um kittaklona ding ah a kua kua’n panlak khawm ding pawimaw in a gen a, diklo tak ah forest reserve area gam keklo ding in le dawtna a siam hi.

STATE GOVT IN HILCHIANNA A PIAK PAWIMAW: CONGRESS SPOKESPERSON

Imphal, June 19 (Nisin Thuhiltu): Manipur Congress Spokesperson leh Thangmeiband MLA, Khumukcham Joykisan in tuni Thangmeibang Sinam Leikai ah Naharol Leishemba Club foundation laying ceremony hun ah a thugenna a chun, state Govt chu NSCN-IM leh Indian Govt (Manipur panna) kal ah ceasefire dinmun hilchianna bawl ding in phutna a nei a, tunaicha NSCN-IM cadre te’n Ukhrul ah civilian 2 a thana’u tawh kisai le hilchianna a bawl ding phutna a nei hi. Govt. in ceasefire suksaube lo himaleh Manipur ah NSCN-IM designated camps a um chu banmg ziak a hi em? ti’n le dawtna a siam a, Govt in bang ziak ah Manipur Legislative Assembly monsoon session tu tiang ah umsaklo a hi em ti dawtna le a siam hi. Joykisan in a vaima theipen ah Govt in monsoon session a umsak ding leh budget tawh kisai ah debate a um ding pawimaw in le a gen hi.

STATE GOVT. IN ENQUIRY COMMITTEE SIAMDAWK
Imphal, June 19 (Nisin Thuhiltu): State government in Modernisation of Police Force for 2013-2014 nuai ah M/S Applied Communication & Control, New Delhi ah digital radio sets leh repeaters chawkna ding ah sanction a bawl himaleh order ki bawl tawh Police department chuam chuam ah digital radio sets leh repeaters piak ah um te a ki tuaklona chung in state government in tuni'n khualna nei ding Enquiry Committee a siam dawk hi. Zia nquiry Committee chu J.C. Ramthanga IAS, Principal Secretary in Chairman hina tawh mapui ding a hia, Anand Prakash IPS, ADGP (AP) leh Dr. S. Ibocha Singh IPS, IGP (Admn) te Member ding ah guat a hiu. Enquiry Committee in digital radio sets leh repeaters piak ah um te state government approve bawl tawh kituak ahi em, ahiloleh supply kibawl te chu brand leh specification diklo a hi em ti te khualna nei ding a hiu.

MOA CSO LEADER TE’N CM KIMUPI; ISSUE CHUAM CHUAM GENKHAWM PI

Imphal, June 19 (Nisin Thuhiltu): Moa a pat Civil Society Organisation leader - Mao Council, Mao Union, Mao Students Union, Mao Women Welfare Association, KDLBR delegation te’n tuni’n Manipur Chief Minister kimupi in Mao ah thiltung te leh issue chuam chuam - NH2 ah zalen tak ah traffic movement a um ding, southern Angami te Manipur gam a keknau, gari taitua te haksatna, SDO Officea function lo, Dzuko Valley lampi siamhawi ding, Mao ah Composite Check Post, Mao ah numei te ding ah marketing shed sak ding, tourism lam masawnna ding ah helipad leh guest house umsak ding, Dzuko Valley ah police station kawi ding ti te genkhawmna a nei ui. Chief Minister in delegation te thil tut chuam chuam te chu list bawl dawk in State Government in Government of Nagaland banah Government of India thuhiat ah panlakna nei ding in thutiam a bawl hi. A vaima theipen ah panlakna nei hiding a hidan taklang kawm in, a diak ah guest house, helipad leh Dzuko Valley lampi te siam hiding in a gen hi. Mao ah Police Station banah Check post le a vaima theipen ah umsak hiding in a gen a, L. Dikho, Minister (PHED), Manipur, Chief Engineer (RED/PMGSY), Commissioner (Revenue),DC (Senapati) te member hina Kaisii, Minister (TA&Hills), Manipur mapui Infrastructure development, Committee chu amun leh mual enzui ding leh 15th July, 2017 tiang ah Government in maban panlakna a nei theina ding ah report pelut ding in hiatsak in a um hi.

EDUCATION MINISTER IN LUMP SUM GRANT PIAKDAWNA NEI

Imphal, June 19 (Nisin Thuhiltu): SSA Hall, Babupara, Imphal ah Department of University & Higher Education, Manipur saina nuai ah Education Minister Th. Radheshyam in tuni’n Rashtriya Uchchatar Shiksha Abhiyan (RUSA) nuai ah Vocationalisation of Higher Education implement bawlna ding in lump sum grant piakdawna a nei hi. Zia scheme chu Set of Standards (SOS) tawh kituak ah skilled workforce masawn ding tupna chiapi hiding a hi. Chun, scheme dungzui ah College te’n main trades - IT, ITES, fishery, floriculture, horticulture, tourism and hospitality, retail management, Fruit Preservation Tech, Food Processing Technology, Computer Hardware Technology, Rubber Manufacturing Technology, Medicinal Plant, Journalism leh Automotive te a chiapi ding uh a hi. Hun matna chu Director, University leh Higher Education B. John Tlangtingkuma, Officials, Principals leh Teacher te’n a uap ui.
NDA PRESIDENT CANDIDATE DING BIHAR GOVERNOR RAM NATH KOVIND

New Delhi, June 19 (Nisin Thuhiltu) : Baharatiya Janata Party (BJP) President Amit Shah in tuni New Delhi ah press conference in Bihar Governor Ram Nath Kovind chu Presidential election ah NDA nominee hiding in a puang hi. Prime Minister Narendra Modi in mimal tak ah Congress President Sonia Gandhi, former Prime Minister Manmohan Singh te President thak ding ah Ram Nath Kovind nominate a a kibawlna tawh kisai hiatsak hin a gen a, party zosia’n Mr Kovind candidate a hiding chu support bawl chiat ding uh hin a gen hi. 23rd June 2017 leh Mr. Kovind in nomination file ding hin le a gen a, himaleh Vice President ding ah ku guat ah um a hi em ti ah dawtna a dawnhu thei nai puai. Prime Minister Narendra Modi in NDA nominee Ram Nath Kovind chu President mipi tak leh gamsung khantona ding leh mipi te haksatna tangko leh siamhawitu a hi ding kinepna liantak nei hin a gen a, Mr Kovind chu insung haktak a pat hung kipan, a hinkhua public a ding ah mang leh migenthei te khualna nei tak ah panla zing mi khat a hidan a gen hi. Mr Kovind in Constitution a hiatthiamna te leh ama mimal lemhiatna te chu gamsung in nasatak ah phatchuampi ding hin le a gen hi. Mr Kovind a hileh Uttar Pradesh, Kanpur district a pat mi a hia, senior lawyer leh BJP leader, Scheduled Caste community a pat mi le a hi. 1st October 1945 ah piang, traditional Indian caste system dungzui ah nam niam pen Dalit leader leh politician, BJP Dalit Morcha (1998-2002) President lui leh All-India Koli Samaj President lui le a hi. Chuleh, Uttar Pradesh a pat kum 1994-2000 leh 2000-2006 a khan Rajya Sabha member ding ah teltin a hi. A langkhatlam in tuni’n Ram Nath Kovind in NDA's presidential candidate ding ah puan a hitawh kitawn in political party zosia te support chang ding ah kinepna nei hin a gen a, party zosia electoral college member MPs leh MLA te support a dawn hi. Chun, Prime Minister Narendra Modi leh BJP chief Amit Shah a kimupi a, Prime Minister Narendra Modi leh BJP family te chung in dawisakna a chan ziak in kipakthu a gen hi.

User Rating: 0 / 5

Star InactiveStar InactiveStar InactiveStar InactiveStar Inactive

ZILLAI NEW LAMKA UNIT IN KIPAKPINA NEI

Lamka, June 18 (Nisin Thuhiltu): Zillai New Lamka Unit in tuzingkal dak 8:00 in amau unit sung ah sangtak ah tukum 2017ah CBSE, BSEM, leh COHSEM nuai ah Class X leh XII zo thak topper te chawi hawina a nei ua, topper pali- 1. Miss Lamngaijem d/o Genkholian, class X BoSEM 61.4%, 2. Mr Lalvenpiak s/o Lalkholun, class X CBSE 89.3%, 3. Miss Hoimercy d/o Ph.Manga, class XII 73.3% leh 4. Miss N. Paklun d/o Ginti nthang, class XII CoHSEM 61.4% te kiang in memento piakna leh tilkhona a nei ui. Zia hun matna chu Zillai New Lamka Unit lawiupa te banah Zillai Churachandpur Block President leh executive member hunkhawp ten a uap ui.

LALCHA SITLHOU LUANG MUDAW HITA
Kangpokpi June 18 (Nisin Thuhiltu): A chiata 3rd June 2017 ni ah Kangpokpi district ah Champhai sub-division huapsung ah um Keithelmanbi village kiangnai Gundung (Imphal river) in a tawmang Paominlal @ Lalcha Sitlhou (34) s/o Lunsat Sitlhou of Kaochangbung luang hawlna ni 5 sung a um nung in tuni’n Heingang kiangnai ah mudaw in a um hi. A luang mudaw ah a um tawh kitawn in JNIMS, Imphal ah Postmortem bawl in a um a, Postmortem bawlzaw ah a chenna khua tut in a um hi. Khaochangbung ahileh Keithelmanbi kiangnai Gundung lui gal ah um hi a hia, Lalcha Sitlhou ahileh Gundung lui kan a guatna tui current hattak in a taw a hi.

7- DAY BASIC COURSE IN NEWS REPORTING KHAKNA UM DING
Lamka, June 18 (Nisin Thuhiltu): Department of Information & Public Relations (DIPR), Manipur nuai ah State Institute of Journalism saina Lamka Press Club (MHJU), HQ Veng, Churachandpur ah 12th June 2017 ni a pat “7-Day Basic Course in News Reporting” training a la um chu zing 19th June 2017, nitaklam dak 2:00 leh khak ah um ding a hi. 7-Day Basic Course in News Reporting” a hileh Meghachandra Kongbam, Director, Information & Public Relation, Govt of Manipur in hawnna a la nei a hi. Training ah mi 26 a pang ua, resorce person chuam chuam in Journalism tawh kisai in ziltilna a nei ui. Closing function hun ah training ah pang mi 26 te kiang ah certificate piakdawna um ding a hia, Churachandpur ah Editors,cable operators, correspondent ten le uap ding uh hin a ki gen hi.

ASSAM RIFLES CCPUR BATTALION SAINA SOCIAL AWARENESS PROGRAMME UM DING
Lamka, June 18 (Nisin Thuhiltu): Assam Rifles , Churachandpur Battalion te saina ah 27 June 2017 leh District Training Centre, Tuibong, Churachandpur (opposite DC, Churachandpur Office) ah Churachandpur district ah chengah cheng te a ding ah Social Awareness Programme um ding a hi. Zia awareness programme hi district mipi te kal ah kihiatthiamtuana leh kipum khatna banah ah maban ah lam chuam chuam ah panlak khawm theina ding tawh kisai genkhawm ah um ding a hi. Agriculture, Sericulture,Fisheries, Animal Husbandry , Veterinary, Horticulture, Krishi Vigyan Kendra te panna government department chuam chuam in stalls le hun matna mun ah hawng ding a hiu a, “AADHAAR CARD” siamna tawh kisai ah le stall hawn ah um ding a hi. Join Indian Army kiti stall le hawn hiding a hia, zia chu khangthak sepai lut nuam te khualna hiding, Leimakong ah 03-10 October 2017 sung ah Recruitment Rally a umna ding tawh kisai ah pre -recruitment training bawlna ding tawh kisai ti te kanna mat thei hiding a hi. Free Pre recruitment training a hileh July 1, 2017 a pat Tuibong Assam Rifles company ah kipan ding a hi. Lunglutna nei ten zia hun a chu registration bawl ngal thei hiding a hi. Chuleh, Ccpur Assam Rifles in 01 July 17 a pat HQ veng ah numei SSC exam peding ah kisingsakna nei te a ding bik ah special training pan ding a hi. Awareness programme chu Cabinet Minister of State of Manipur, Senior District Government officials leh Security Officer te’n le uap ding a hiu a, nauchaga te ding ah le Medical camp um ding hin a kigen hi.

VOLUNTARY BLOOD DONATION CAMP

Lamka, June 18 (Nisin Thuhiltu): Churachandpur Meetei Leikai Youth Club (CMLYC) saina’n tuni’n CMLYC Office Building, Khumujamba ah Voluntary Blood Donation Camp a um hi. Zia hun a hi Dr. Vijayakanta Kshetrimayum mapuina Blood Bank, District Hospital a pat staff te’n Doner-te a pat in thisan lakna a nei ua, a pawimaw dungzui in CMLYC in kithuapina a piau hi. Voluntary Blood Donation Camp ahihleh “The Great June Uprising, Unity Day” a 16-veina ahi tawh kitawn ah a nei uh a hia, Phachuam ngai numei panna mi 30 ten thisan Unit khatchiat donate a bawl ui. “Gamgi omlo ding” ti ah India Government leh NSCN (IM) pawl in “Bangkok Agreement” kiti June 14, 2001 ni ah kinawptuana suai a kai uh dawilo ah June 18, 2001 ni mipi kiphinna nei te sukthipna ding ah Security Force te’n meithal a than au ah kiphinna nei mi 18 kaplup ah um te hiatzingna ding ah kumsin leh June 18 ni “The Great June Uprising, Unity Day” ti ah mat hisek a hi. Voluntary Blood Donation Camp ahihleh NRHM, SBC Manipur in a sponsor a hi hi.
NT 19June2017c

LAWTINNA NEI STUDENT TE KIPAKPINA NEI

Lamka, June 18 (Nisin Thuhiltu): Sumtuh Tualkuan/Tualsuah Committee saina’ n tuni sunnung in Th. Chinzahau Inn, Chingkang’ Pa’ Avenue, Nehru Marg ah Sumtuh khawsuak tuchung Class X leh Class XII exam ah lawtinna nei te kipakpina leh pauchap piakna a um hi. Zia hun matna chu T. Tongkhomang in amapui a, Rev. T. Dongzadou in hun pat pauchapna nei in, lawtinna nei te puandawna nei in, Pastor Thangboi, SBC, Beulahlane in lawtinna nei te Pathian kiang in pauchap piakna nei hi. B. Dongzalian Simte, President, STC leh Chairman, Zomi Coucil apat leh Kamchinhau, Lecturer te’n tilkhona thu a gen ua, Pastor Th. Thangchinkhup, SBC, V. Munhoih in pauchapna tawh hun khakna a nei hi. Sumtuh khawsuak tukum in Class X ah student 18 leh Class XII ah student 14 in lawtinna a nei ua, Sumtuh khua ah nidang in inn 60 val um maleu tu’n a tamzaw te thiam zilna ngai pawimaw ziak in Khawsung ah innkuan 50 phalo deu um in Lamka ah thiamzilna ziak ah inn-lua ah tamtak um ua hiat a hi.
NT 19June2017d

NUPAN KHAT IN LENNA SUNG AH NAU NEI
Mumbai, June 18 (Nisin Thuhiltu): Lenna sung ah nau nei kiti um zep zeplo himaleh tuni’n nupan’n khat in Saudi Arabia's Dammam a pat Kochi zuan mi 162 chuanna Jet Airways flight (Boeing 737 ) sung in nau a nei ui. Lenna sung ah nau a nei uh tawh kitawn ah lenna chu Mumbai ah chawl ngak sak in a um a, nausen leh a nu chu Holy Spirit Hospital, Mumbai tut a hiu a, a dinmun uh hawi mama in le a kigen hi. Lenna sung ah nau piang chu pawsal a hia, lenna sung ah piang a hi tawh kitawn in Jet Airways in a dam sung ah a thawn ah Jet Airways flight ah chuang zing thei ding in a puang ngal a, feet 35,000 sang ah lenna a um laitak ah nausen chu piang in le airline thusuak in a gen hi.

KERALA AH KHAWSIK ZAT CHUAMCHUAM ZIAK AH MI 103 THI
Thiruvananthapuram, June 18 (Nisin Thuhiltu): January tha a pat Kerala ah mi 103 te’n khawsik (fever) chi chuam chuam te ziak ah thina tuak a hidan uh tuni’n taklat in a um a, ziana chung a chun Kerala government in mipi te mass sanitation drive ah panla ding leh government panlakna kithuapi ding in chialna a bawl hi. Health Department in a taklatdan in numei leh naupang panna mi 103 te’n H1N1, leptospirosis leh dengue ziak ah January 2017 a pat tuni tiang ah thina tuakta uh hin a gen a, total mi 103 te lak ah mi 53 in H1N1 ziak ah thina tuak leh mi 13 te’n dengue ziak ah thina tuak a hidan uh taklang kawm in a dang te chu khawsik chi chuam ziak ah thi a hidan a gen hi. Chief Minister Pinarayi Vijayan in ni’n lak ah thokang um te a pat natna chi chuam piang ding ah muanmaw hin a gen a, kim leh kiang sukthianna nasatak chiapi ding pawimaw in a gen hi. A langkhatlam in Opposition leader Ramesh Chennithala in tuni’n Chief Minister Pinarayi Vijayan chu a official residence in a kimupi a, zia gual ah damlona zat chuam chuam te chu dodalna ding tawh kisai in memorandum piakna a nei a, state sung ah khawsik ziak ah mi 117 te’n January tha a pat thina tuak un a gen a, mi 20,000 lam te state hospital chuamc huam ah khawsik ziak ah ki enkawl un le a gen hi.

PREZ MUKHERJEE IN MERCY PLEA PANI PAWM PIAKLO
New Delhi, June 18 (Nisin Thuhiltu): India President Pranab Mukherjee term a beina ding tha 2 sung bep umta himaleh ama’n April leh May tha ah mercy petition pani a kiang ah piaklut ah um te reject a bawl hi. Mercy petition piaklut ah um te chu pawngsualna (rape) leh tualthana case a hi gel ua, kum 2012 ah pawsal pathum - Jitendra alias Jeetu, Babu alias Ketan leh Sanni alias Devendra ten Indore ah numei kum 4 upa numei chapang khat a pawngsual nung ua than nau tawh kisai leh kum 2007 ah pawsal pani - Purushottam Dashrath Borate leh a kithuapi Pradeep Yeshwant Kokade te’n Pune ah nuemei kum 22 ah upa khat a pawngsual nung ua atha nau tawh tawh kisai a hi. Mercy petition tu te chun Preisdent thuneina leh hepina zaal ah thitiang gawtna piak ding ah local courts in thutanna a siam khum nung ah Supreme Court in le thitiang gawtna piak ding ah lemsakna a nei pumpel sak ding ah dawtna a siam uh a hi. President Pranab Mukherjee ahileh July 24 leh Preisdent office nusiata ding a hi.

INDO-CHINA TRADE RELATION SUKHAT NA DING TAWH KISAI GENKHAWM

Tianhe, June 18 (Nisin Thuhiltu): Minister of Commerce, Trade & Industry, Thongam Biswajit Singh in tuni’n Consul General of India, Sailas Thangal kimupi in India leh China kal ah trade relation sukhat thei na ding genkhawmna a nei ui. Minister leh state official khenkhat te’n Consul General chu a chenna, Lin He Zhong Road official residence, Tianhe district, People's Republic of China ah a kimupi uh a hi. Meeting hun a chun, Consul General tawh Indo-China, a diak ah Manipur leh China kal ah kizawpna siam hawi ding leh economic leh trade relation te le sukhat ding dan tawh kisai genkhawm a um hi’n Minister Biswajit in a gen a, tour hun sung a chun ngaidan hawi tak tak hunkhawp dawng hi’n le a gen hi. Manipur economy sukhat na ding ah China pawimaw dan taklang kawm in Manipur economy sukhat na ding ah governemt in ngaidan hawi tak tak te chu Act East Policy ah guanlut ding dan ngaitua ta ding ti’n le a gen hi. Manipur-China kal ah kizawpna siam hawina ding ah Yunnan province pawimaw hi ah Consul General in hilchian hi’n le Minister in a gen a, Beijing leh Delhi puihuaina nuai ah Manipur leh Yunnan kal siam hawi hileh lawtinna tamtak um ding hi’n le a gen hi. Bishwajit in Yunnan chung chang a genna’ a chun, a mun chu Manipur tawh kibatna tampi nei ahi dan taklang kawm in Manipur gual ah Yunnan a le nam chuam chuam cheng khawm hi’n a gen a, Manipur le Yunnan gual suak sak thei ding ah ettawn ding hi’n le a gen hi. Minister team a hileh Dianchi International Convention ah South & South East Asia Commodity Expo and Investment Fair, 2017 ban in Kunming, Yunnan Province ah International Sistership pavilion uap ding ah zin a hiu a, team a chun L. Lakher, Principal Secretary Commerce & Industry, M Luikham, Director Commerce &Industry, L. Inunganbi Devi, Corporator, Imphal Municipal Corporation Ward No. 18, L.Bashanta Sharma, Media Coordinator to Hon'ble Chief Minister Manipur leh Chandrakishore Singh, President, North East Federation on International Trade, Manipur Chapter te a pang u’i.
NT 19June2017e

MANIPUR LEIPEK KEKLONA DING AH HINNA A LA CHANTE ZANA PIA
Imphal, June 18 (Nisin Thuhiltu): Manipur leipek kek ding dawilo ah kiphinna ziak ah mualliam martyr te za etsakna’n nam chuam chuam a pat amau nam puan chiat ah ki zem mi hunkhawp te’n pakcha piakna a nei u’i. A chiata 2001 ah India government in National Socialist Council of Nagaland (IM) tawh ceasefire kinawptuana a nei uh chu gamgi khel lam pek tiang huapsak a la hi ziak in Manipur ah kiphinna nasatak a la um in mipi’n Manipur Legislative Assembly building, political party te office zosia banah chief minister leh MLA te chenna a la hal ui. Imphal a um zia kiphinna a chun, CRPF personnel te’n kiphin pawl te a kap na un numei 1 panna’n mi 18 te’n thina a la tuak ua, kiphinna chu a hapta sim ah a chiathak phat in BJP mapui NDA government in zia kinawptuana chu a zukkit hi. NSCN (IM) in North East sung ah Naga chenna khua zosia chu administrative unit khat nuai ah gawpkhawm ding ti ah a la phut maleh Manipur, Assam leh Arunachal Pradesh te’n a la nang in map zik thak ding chu a la dodal ui. Zia a pat chu Manipur Assembly in Manipur leipek keklo na ding ah thupukna chuam chuam a la siam a, Centre government in le ceasefire chu Nagaland khel sak hilo ding in a la phuangdawk zing hi. Manipur leipek kek ding dodalna’ thina tuak martyr te zana leh Manipur kek ding dodal a hi dan suklatna ding in June 18 chu kum sin leh United Committee Manipur (UCM) leh All Manipur United Clubs Organizations (AMUCO) te kithua in “Great June Uprising, Unity Day” ah mat a hi sek hi. Ningkum gual ah tukum in le martyr 18 te kivuina mun ah mi hunkhawp te’n pakcha piakna a va nei ua, zia hun a chun ruling leh opposition a pat minister leh MLA khenkhat te’n le pakcha piakna a va nei u’i. Memorial complex ah public meeting khat le sai a um in zia hun a chun civil society chuam chuam a pat leader te’n thugenna a nei ui. Hun matna a chun blood donation camp le nei in a um a, Manipur police personnel te pang in mi hunkhawp in thisan piakna a nei u’i.

TANKER DRIVER THADAWK DING AH MANIPUR DRIVER PAWL IN DAWN
Imphal, June 18 (Nisin Thuhiltu): All Manipur Road Transport, Drivers & Motor Workers Union (AMRTDMWU) in tuni thusua a bawlna’ chun, a chiata May 10 ah Dimapur a pat melhiatlo te’n a puimang uh tanker driver chu damtak ah thâdawk ding in a dawn hi. Melhiatlo te’n a la puimang uh tanker driver, Takhellambam James of Chanam Sandrok Mayai Leikai, Imphal East chu tu tinag ah a umna hiat a hi nai puai. James chu a innsung chawmtu ama bep um a hi banah ama puimang a hi ziak ah driver te’n NH-2 ah Imphal-Dimapur lampi haw ding chu lauthawngna nei uh a hina ah puimang a um chu damtak in humanity ground ah thâdawk ding in AMRTDMWU in a dawn hi. BPCL tanker driver James a hileh Dimapur ah 3 Mile leh 6 Mile kikal a pat puimang a hia, zia hun a chun Inphal lam zuan gua hita hi’n a kigen hi. Ama puimangna tawh kisai a hin, All Manipur BPCL Dealers Cum Transporters Association in state DGP LM Khaute kiang ah a thu um dan tut in Nagaland DGP tawh kithua ah James hukdaw theina ding ah panla ding in a dawn hi.

JULY 1 A PAT GST ZUI PAT HITA DING; GST RETURN FILING DÂN RELAX AH UM

New Delhi, June 18 (Nisin Thuhiltu): New Delhi ah tuni’n Goods and Services Tax (GST) Council meeting a um a, July 1, 2017 leh indirect tax regime thak mat pat ding in lemsakna a nei a, July 30 leh Delhi’s Vigyan Bhawan ah special GST launching bawlna um ding in lemsakna a nei hi. Finance Minister Arun Jaitley in meeting zaw ah thuthak lakhawm mite kiang ah a genna a chun, Goods and Services Tax (GST) Council in July 1 leh GST chiapi tak ding ah lemsakna nei maleh kisak lawkna lam a fel zawlo ziak ah GST chiapi a hi a pat tha 2 sung chu business tax return filing rule relax hi phawt nalai ding hi’n a gen hi. Chun, amasa tha 2 te chu company te’n online filing system thak a hiatthiam theina ding ua relax a um hi’n le a gen hi. Council in thupukna a siam dungzui in, August 10 ah sale returns file ding kiti chu September 5 hi ta ding a hia, company chuam chuam te’n GST Network ah August a ding sale invoice chu September 10 ma ngei ah file ding ti himaleh September 20 ah chawn in a um hi. GST Council in AC hotel chung ah tax a la ding chule sukkiam piak in Rs. 5000 - Rs. 7500 kikal man te chung ah tax chu 28% lak ding ti a la himaleh tu hin Rs. 2500 - Rs. 7500 kikal sung a ding ah tax chu 18% bep hita ding a hi. Lottery chung ah tax a hileh chi 2 ah khen a um in state sai te chung ah 12% ban ah state in phalna a piak te chung ah 28% hi ta ding a hi. Zialo chun, Council in anti-profiteering panna’n dân 6 a ladawk a, zia te chu mat ngailo ding hi’n Jaitley in a gen hi. Company leh trade chuam chuam in kisaklawkna tasam hi ah gen maleu GST chu khawdang sak be hithei talo ding ti’n Finance Minister in a gen hi. GST hawi tak ah zui pat a hi hun ah firm/company te’n thasin leh 3 vei return a file uh ngai ding a hia, thasin tarik 10 leh sales invoices, tarik 15 leh purchase invoices banah return 3 na chu tax bill khuatna hi ding a hi. Goods and Services Tax (GST) a hileh India in zalenna a mu zaw ah tax lam ah kithenna lianpen tut tu a hi ding ban in central leh state in tax chuam chuam a lak te gawmkhawm tu hi ding a hia, government in common market siamdawna ding, tax chung ah tax laksawn beina ding leh van man a tawm deuna ding tup ah a puakdaw a hi.GST Council next meeting ahileh June 30 le um kit ding a hi.
NT 19June2017

Page 1 of 7