Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

BSNL internet broadband dukdaklo

Lamka, Feb. 14 *(Nisin Thuhiltu)* : Churachandpur District ah BSNL internet broadband dukdaklo ziak in Indian Postal Service in dawigual ah na’sem theilo in a um ui. Internet tawh kisai ah Post Office a staff te’n a gendan un, tha khat vel chiata apat internet dukdaklo ziak in, internet mang ah nasepna zosia chawlsan phawt hi’n a gen ui. Lamka khawsung ah Post Office main branch ahileh Tuibong in a um a, Nasir Ahmed, Inspector of Postal Service in Imphal apat enkawl in, a nuai ah Chinmuanthang, Post Master leh staff 18 vel a um ui. Branch Office ahileh New Lamka, Chiengkawnpang leh Salem Veng ah um ahi.

CMHT phatchuampi ding te minkhumna tawh kisai entha
Lamka, Feb. 14 *(Nisin Thuhiltu)* : Chief Minister-gi Hakshegi Teng-bang (CMHT) tawh kisai in tuni, nitak lam in Medical Superintendent, District Hospital office chamber ah CMHT tawh kisai ah a phatchuampi thei dingte min khumna tawh kisai enkhawmna a nei ui. Manipur Government in a thawn ah test chuamchuam 57 bawlthei ding ah a patdaw, District Hospital a bangcheng umthei ding adiam tihaw le etkhawmna a nei ui. Zia hun achun Jitender, Project Director, CMHT, Manipur, Shyam Lal Poonia, IAS, DC Churachandpur, Dr. Kimngaihching, Chief Medical Officer, Churachandpur, Dr. Vumchinpau Tonsing, Medical Superintendent, District Hospital, Churachandpur leh Hospital Staff-te a pang ui.

ZEO/CCpur in hiatsakna bawl
Lamka, Feb. 14 *(Nisin Thuhiltu)* : Zonal Education Officer (ZEO), Churachandpur in SSA nuai ah Upper Primary leh Primary Teacher-te a ding in thusua a bawl hi. Thusua dungzui in SSA nuai a sêm, Upper Primary leh Primary Teacher, ZEO Churachandpur huapsung a sêm, buaina chuamchuam ziak a EIN/CPIS a min khumlut nailote’n lekha pawimawte February 19, 2018 chan ah petlut ding in hiatsakna a bawl hi. Lekha piaklut dingte ahileh; Matriculation Certificate(a kisaipi DDO in attested a bawl), Appointment leh Posting Order, Joining Report, Corrigendum (a umleh), Transfer Order (a umleh) leh Transfer Order (Transfer-te a ding) ahi.

TCP in diesel auto-te ding ah rules kisiam check bawl

Lamka, Feb. 14 *(Nisin Thuhiltu)* : Traffic Control Police(TCP), CCpur in khawpi sung a traffic thawveng zawk ding dawina ziak ah passenger pua, Diesel Auto changlam pang (right side) kawtkhak ah passenger lut leh pawt theilo ding ti ah thupiak a bawl uh etzuina in, tuni’n diesel auto-te check a bawl ui. Zia dungzui achun, tuni nitak lam dak 4 vel apat diesel auto-te check bawl in, thupiak zuilote a liausak ui. Traffic Control police in traffic hawizawkna ding leh, gari dang tawh kipel buailona ding ban ah, passenger-te bitna ding dawina ziak ah thusua a bawl ahi.

Mi 2 in Tata Football Academy selection mu
Lamka, Feb. 14 *(Nisin Thuhiltu)* : Churachandpur khawpi sung a football academy lak ah challang mama, The Shepherd's Football Academy neitu T. Khamminthang apat a kihiat dan in, a chiata Feb 7-8, 2018 ah Khuman Lampak Artificial Turf Ground ah AMFA saina nuai in Tata Football Academy (TFA) a ding ah under 17 trail selection neina ah, The Shepherd's Football Academy apat mi 2, Khupkhanson Tunglut s/o Tualzachin of Lamlian Veng, Bungmual leh Thangsonlian Ngaihte s/o LK Mung Ngaihte of College Veng, New Lamka te'n final selection a di'n lawtinna a chang ua, Khamlemsiam s/o Ginbiakmuang of Vengnuam, New Lamka ahileh waiting list ah um hi'n a gen hi. Final selection ahileh Jamshedpur ah april thatawp ah kuan ding ahiu. Chuleh, a chiata Feb 9-11, 2018 sung in Chennai khawpi ah Mahogany FC Academy a ding in under 13 trail selection um hun in, Khamlianthang s/o Ginzamuan of Dorcas Veng, New Lamka in final selection ah lawtinna chang in, tunung sawtlo ah Mahogany FC Academy join ding hi'n a gen hi. The Shepherd's Football Academy ahileh naupang te'n football kihel dan diktak a zui ua, lawtinna sang tak tawh khawvel hiatphak ah kihelthiam a hung hitheina ding uh tupna in, T. Khamminthang in a chiata May, 2017 kum ah ala patdaw ahia, March apat session thak patna ding ah a kisingsak laitak ahi. Feb 17, 2018 apat form hawmdaw pat hiding hi’n a gen hi.

Exam dingte thakdawna leh malzawl dawtpiakna nei

Lamka, Feb. 14 *(Nisin Thuhiltu)* : Young Learners School (YLS) in tukum 2018 ah pawl sawm exam dingte thakdawna leh malzawl dawtpiakna tuni’n YLS auditorium ah Valedictory Program 2018 hun a mang ui. Zia hun achun, School ngainatute ban ah, pawl sawm exam ding student nu-le-pa-te a pang ui. Miss Ramtharmawi Assistant teacher leh Miss Lalromawi Assistant Teacher te’n pawl sawm exam dingte introduction leh memento piakdawna nei in, award hawmdawna leh student te’n candle lighting ceremony le a nei ui. Rev. Dr Lalrosiem Songate, Principal, Evangelical College of Theology(ECT) in student-te kiang ah tîlkhona thu genna leh Pathian kiang ah pauchappiakna a nei hi. YLS in tukum 2018 ah BOSEM nuai ah exam ding pawsal 56 leh numei 56, a kigawm ah student 108 a nei hi.

Jan. 2018 ah gari thak 453 registration bawl a um
Lamka, Feb. 14 *(Nisin Thuhiltu)* : January 2018 tha sung in Disrict Transport Office, Ccpur ah gari thak chi chuamchuam 453 registration bawl thak in a um hi. Kumlui a pat January 2018 tiang ah gari thak 3,183 registration bawl in a um hi. Zia a pat a chun, DTO/Ccpurrevenue collection Rs. 19,56,877/- a tung a, January 2018 tiang ah revenue Rs. 1 Crore, 66 Lakh leh 45,227 a mudawk zo hi. January 2018 sung ah gari thak DTO/Ccpur ah registration kibawl te lak a chun, Heavy Truck 14, Light Goods Vehicles 25, Heavy Bus 1, Maxi Cab 4, Diesel Auto 33, LMV/Car 99, Jeep/Gypsy 29, Bike/Activa 244 leh a dangdang 4 a pang hi.

IPPI 1st round ah Naupang 25,937 in polio dawn
Lamka, Feb. 14 *(Nisin Thuhiltu)* : District Family Welfare Office, CCpur in January 28, 2018 ah Ccpur District sung ah IPPI booth/centre 435 ah IPPI 1st round a nei hun in, naupang kum 5 nuailam mi 25,937 in polio a dawn ui. IPPI 1st round target ahileh naupang 21,365 a hia, target sang ah 4,572 ah tamzaw naupang te polio dawnsak a hiu. IPPI Second round ahileh March 11, 2018 ah um ding a hi.

KKP in General Conference nei ding
Lamka, Feb. 14 *(Nisin Thuhiltu)* : Presbyterian Church of India, Mizoram Synod: Manipur Area nuai ah Khristian Khanglai Pawl in March 9-11, 2018 sung ah Kangvai biak-inn ah “Khawitak ah um la hem?” (Thilsiam Thu 3:9) ti thupi nei ah General Conference 10 veina nei ding a hi. Khawmpi sung in Rev. C. Zorammawia, Rev. R. Lalawmpuia, Rev. Kamkhotinthang Neihsial leh Rev. Jerry Zolian­sanga ten thugenna nei ding a hiu a, Chinlianhat in, “Tulai Thiamzilna leh KKP” ti leh Dr. Asem in, “Damtheihna – Nek-leh-chak leh First Aids” ti thupi nei ah seminar mapui ding a hiu. Chun, Upa Liankhothang in, “Kouch­uam paukam matdan’ ti leh Rev. Malakia Lalnunfela in, “Thianthona - Youth, Sex & Marriage’ ti ah seminar mapui ding, Rev. Khupneithang in, “Masawnna” ti leh Rev. Khaisonthang in, “Pathian bel hinkhua pawimawna” ti thupi nei ah semnar paper present bawl ding a hi.

February 20 ah Class X board exam kipan ding
Lamka, Feb. 14 *(Nisin Thuhiltu)* : Board of secondary Education (BSEM) in tukum ah High school Leaving certificate Examination 2018 nei hun ding (routine) a suadaw dungzui ah February 20 ah HSLC exam kipan ding a hi. HSLC exam routin dungzui ah February 20, 2018 ah English subject ah exam kipan ding, February 24, 2018 ah MIL leh Additional english hiding a hi. Chun, February 27, 2018 ah Science, March 8, 2018 ah Social science; March 13, 2018 ah Mathematics, March 17, 2018 ah Home Science, Commerce, Computer science, Higher Mathematics, Thang-Ta, Fine arts, Eshei Nongmai leh Manipuri Jagoi subject ah exam zo ding a hiu.

Civil Service Free Coaching ah Class vala

Lamka, Feb. 14 *(Nisin Thuhiltu)* : Zillai CCpur Block (ZCB) in Civil Service lunglut-te khualna CCpur Govt. College ah ‘Zillai Civil Service Free Coaching’ a sai uh chu chiatha zing in, mun chuamchuam a pat guest lecturer in officer chuamchuam ten Class a la zing sek ui. Zia chu tawh kitawn in tuni’n VLK Vaiphei, Deputy Commandment, BSF in coaching ah pang te vena nei in, student-te topic chuamchuam mang in tilkhona anjei hi. Chun, Coaching ah pang te student-te banah Zillai lawiupa te thingpi dawnpi in, Zillai lawiupa te tilkhona a nei hi.

Gucha te’n M Lianngul Inn bulu’u

Lamka, Feb. 14 *(Nisin Thuhiltu)* : M Lianngul h/o Khanvung of Beaulahlane chenna inn tuni’n gucha pawl khat in a bulu’u a, inn sung ah lut in van lak ding hawlna’n room chuamchuam ah lut in Almirah panna van kawina chuamchuam a kalsiau a, van tamtak phezak in a um hi. Gucha te gamtatna chu nitak dak 5:00 vel ah inn neiten a hiatdaw uh hin a kigen a, inn neite’n police ah report hun ua van bangzat mang a hi hiatchian hilo maleh torch light 2 leh sum Rs. 8000 val gukmang ah um in a kigen hi.

Zomi Namni Football final ah LSC leh Lenlai Club
Lamka, Feb. 14 *(Nisin Thuhiltu)* : CDSA leh Zomi Namni organising committee nuai ah Sports department saina Lamka Football Ground a Zomi namni Football tournament ah tuni’n Semi final match tawpna a um hi. Zia hun a chun, Lamka Sporting Club (LSC) leh Avoi FC a kihel ua, LSC in 3-0 ah gualzawna chang in Final a kai hi. Final a kai tawh kitawn ah LSC in final ah Lenlai Club maitua ding a hi. Final match ahileh 17th Feb. 2018 ah um ding a hi. Lamka Sporting Club (LSC) leh Lenlai Club chu Zomi namni football tournament 2015 ah le final ah kisituasa a hiu a, Lenlai in 1-0 in LSC a la zo maleh, tukum 2018 ah LSC leh Lenlai Pool D ah umkha gel a hina chung ua opening match in Lenlai in 1-0 a la zo puai. Zomi Namni football tournament final chu Chief guest hina tawh LM Khaute, IPS, DGP Manipur in uap ding, T Guite IPS, Addl DGP Manipur leh Rakesh Balwal IPS SP/Ccpur ten Guest of Honour hina tawh uap ding leh Khatkhotong Baite, Chairman Organizing committee in Chief Host hina tawh uap ding a hi.

Ann-ngawl pauchapna nei
Lamka, Feb. 14 *(Nisin Thuhiltu)* : Ninevi Revival Crusade ministries in khawpi sung a biak-inn chuamchuam ah ann-ngawl pauchapna a nei uh sunzawmto zel in, tuni CBA Central Church, Gouchinkhup veng, New Lamka ah a 23 veina ann-ngawl pauchapna a nei ui. Zia hun achun, mi hunkhawp tak chiakhawm in zingkal dak 7 apat nitak dak 1 chan ann-ngawl pauchapna a nei ui. Ninevi Revival Crusade Ministries ahileh Evangelism, Revival and Missions ti thupi mang ah phudaw ahia, Lamka khawpi leh Ccpur district sung ah halthakna a tun ah, Hukdampa Messiah tuak ding ah kimansa umding dawina ziak ah ann-ngawl pauchapna nei sek uh hi’n a kihia’i. February 21 ah EBCC, V Munhoih, New Lamka ah neikit ding ahiu.

Shija Hospital in Manipur ah ‘HEALTHCITY’ project chiapi ding

Imphal, Feb. 14 *(Nisin Thuhiltu)* : Shija Hospitals & Research Institute Pvt. Ltd leh Sun and Sands Enterprises Pvt. Ltd. in Chief Minister N. Biren Singh uapna tawh Chief Minister’s Secretariat ah tuni’n Manipur ah ‘Shija Health City’ siamhawina ding in MoU suai a kai hi. MoU suai kai hun ah Chief Minister N. Biren Singh in khangthu tepte thei ding ziagual kinawptuana suai kai ah um chu NorthEast Development Summit 2017(NEDS 2017) gasua a hidan gen in, government in state pawlam ah investor te tawh MOU suai kai ah um te sukpitin theina ding ah panla zing ding a hidan gen in NEDS 2017 hun ah sector chuamchuam ah invest bawl ding ah state vena nei investor chuamchuam in lemsakna nei a hidan uh gen in, government sector ah thil zosia bukim theilo a hina chung ah private sector sukhat ding pawimaw a hidan gen in, PPP model ah state mipi te phatchuampi thei ding ah nasepna pawimaw in a gen hi.
Chief Minister in Shija Hospitals & Research Institute Pvt. Ltd. leh Sun and Sands Enterprises Pvt. Ltd. chu MOU suai kai thei ah a umna chung in pakchat thu a gen hi.
Dr. Palin Kh., CMD of Shija Hospitals in a thugenna a chun, Manipur in human resource, geographical advantage, India’s Act East Policy, Tourism, Sports lam ah masawnna a nei bak ah Japan leh Singapore panna gam chuamchuam in Manipur a pat nurses leh paramedic te pawimaw a hidan a gen hi.

Rahul Narvekar, CEO of Sun & Sands Enterprises Pvt Ltd in a thugenna a chun, Maniour ah start-up entrepreneurs 100 te company’n siamhawi ding a hidan gen in, Manipur in medical tourism lam ah lemchang liantak nei in a gen hi. Kerala banah Manipur in India gamsung ah training bawl nurse haupen ah gen in, nurse te chu Japanese pau (language) tawh training piak hileu bailam tak ah Japan leh gam chuamchuam ah sepna muthei ding uh hin a gen hi.
employment in Japan.

Shija HealthCity Manipur ahileh 200 acres mega project ahia, estimated project cost ahileh Rs.3,500 crores val a hi. Project thiltup ahileh healthcare leh education dinmun siamhawi ding 2300 bedded hospitals, student 250 tiang ziltheina Medical College, Dental College, Nursing College, Hotel & hospitality management institute, Cancer Hospital, Drugs leh surgical consumable manufacturing plants, Residential Complex, Shopping complex, Ambulance leh Helicopter Services etc te siamdaw ding ti a hi.

Minister for Health and Family Welfare L. Jayantakumar Singh, Minister for Water Resources & YAS Letpao Haokip, Chief Secretary R.R Rashmi, Principal Secretary to Chief Minister Vineet Joshi, Commissioner (Health) Sumant Singh, officials of Shija Hospitals & Research Institute Pvt. Ltd. leh Sun and Sands Enterprises Pvt. Ltd. ten zia MoU suai kaina hun chu a uap ui.

Boarder Area Development Programme nuai computer training khakna nei

Imphal, Feb. 14 *(Nisin Thuhiltu)* : Planning Department, Government of Manipur sponsored bawlna nuai ah Institute of Cooperative Management, Imphal in organized a bawl, tha 3 sung, certificate course on Computer Application under Border Area Development Programme chu tuni’n khak in a um hi. Training ahileh November 14, 2017 ah kipan a hi. Training khakna hun chu Prof. Dr. N. Mohendro Singh, Eminent Economist in khuallian hina tawh a uap a, ama’n a thugenna a chun, a hawi thei ding pen ah kihiat matna a um leh lemchang simsenlo piang thei a hidan gen in, tukhang ah Computer chu hinkhua bak khat gual hita hin a gen hi. Thil zosia ah Computers kimangta a hina chung ah computer in pawimawna tamtak nei in a gen hi. Director of ICM, Dr. N. Ranjana Devi ten a thugennau a chun Chandel leh Tengnoupal District border areas a pat student 39 te training ah pang un a gen hi.

State Assembly 4th Session ah demands for grants 6 a ding Rs. 14,620,174,000 passed

Imphal, Feb. 14 *(Nisin Thuhiltu)* : 11th Manipur Legislative Assembly, 4th Session ah tuni’n House in Demands for Grants 6 a ding in Rs 14,620,174,000 a passed hi. Zia te chu Demand No. 4-(Land Revenue ,Stamps & Registration and District Administration) Rs. 118,82,25,000/-, Demand No. 5-(Finance) Rs.1281,58,94,000/-, Demand No. 28-(State Excise) Rs. 17,77,35,000/-, Demand No. 29-(Sales Tax, Other Taxes/Duties On Commodities and Services) Rs. 6,95,64,000/-, Demand No. 49-(Economics & Statistics) Rs. 16,79,09,000/- leh Demand No. 50-(Information Technology) Rs. 20,08,47,000/- a hi.

Deputy Chief Minister leh in-charge of Finance Yumnam Joykumar in Demand for Grants chungchang genkhawm hun ah MLA Kh Joykishan Singh dawtna siam a hilchianna a chun, Labour Cess fund te chu Construction Workers’ Welfare Board khut ah piakdaw hiding in a gen hi.

Question Hour hun ah House Leader, Chief Minister N Biren Singh in MLA Dr. Chaltonlien Amo dawtna siam a dawnhuna a chun, Government in hill districts/areas ah helicopter services phase wise ah chiapi ding a hidan gen in, Phase –I in Imphal-Moreh Sector leh Imphal-Tamenglong-Jiribam Sector cover ding, Phase- II in Imphal-Tipaimukh, Imphal- Henglep, Imphal-Thanlon leh Imphal-Parbung sector cover ding a hidan gen in, helicopter services patna ding date ahileh Ministry of Civil Aviation in approval a bawl nailona chung ah bithiak thei hinailo in a gen hi.

MLA O. Lukhoi Singh dawtna siam, CAF & PD and Revenue Minister Karam Shyam in a dawnhuna a chun, full-fledged revenue Districts pani ah Imphal West District khenzakna ding ah guanggalna bangma umlo a hidan gen in, Government in district kisiamdawk thak te administrative leh a pawimaw thil chuamchuam te a sukfelna ding ah manpower leh infrastructure tasam nalai in a gen a, zia ziak a chu district kisiam dawk thei te sukpitinna ding ah hun lut nalai ding hin a gen hi.

Demands for Grants genkhawm hun a chun, MLA Kh. Joykishan Singh, MLA K. Ranjit Singh, MLA K. Meghachandra Singh ten thudawtna a siam ua, MLA Surjakumar Okram, MLA O Lukhoi leh MLA Th. Lokeshwar Singh ten ngaidan genna a nei ui.

Zero Hour hun ah MLA O Lukhoi in Inner Line Permit tawh kisai genlatna a nei a, Government in zia chungchang chu ngaitua zing ah suklat in a um hi. Speaker Y Khemchand in ILP issue chu Appropriation Bill genkhawmna a um hun takleh detail tak ah ILP issue chu genkhawm hiding in a gen hi.

User Rating: 4 / 5

Star ActiveStar ActiveStar ActiveStar ActiveStar Inactive

District Library dinmun tawh kisai genkhawm

Lamka, Feb. 13 *(Nisin Thuhiltu)* : Lamka Public Ground sak ah um, District Library hawitak ah function ahitheina ding in tuni’n District Administrator mapuina a mun mama in genkhawmna a nei ui. District Library ahileh 1982 kum vel ah hawndaw hi’n a kigen a, mun chuamchuam ah kichawn velvel in, tuhin zia mun hih kituptak ah lua ahi. Hawitak ah etkawl hileh, mipi tamtak a diak ah Churachandpur Government College ah zillai te’n phatchuampi mama ding ahiu. Library ah kawi ding lekhabu Kolkata apat Raja Ram Mohan Roy Library Foundation in a pawimaw dungzui in a hung thawt sek a, himaleh a enkawltu umlo ziak in a hung tun gualgual in a um zing hi. State Library a Chief Librarian in Imphal apat enkawl in, sêmtu ahileh Tamenglong apat Hurike, Peon leh Moses, Chowkidar ahiu. Library pualo leh hiatphaklo ah hun sawttak a um nung in, a enkawltu diktak hawldaw butlo ah um in, tuhi’n District Administration panlakna ah pua thei ah hung um ahi. Autonomous District Council in Power Devolution in enkawl intin, Council nuai a semtu, Library tawh kisai ah lunglutna neite etkawl sak hiding ahia, March 1, 2018 chan ah function man ding ah puaphat hiding hi’n a kigen hi. Meeting hun in, Shyam Lal Poonia, DC Churachandpur, Rakesh Balwal, IPS, SP Churachandpur, Khamsuanmung Tombing, IFS, DFO, Southern Forest Division, Churachandpur, Kammuanlal, CEO, ADC Churachandpur, T. Paukhanlian, EM, ADC Churachandpur leh Rajesh, Finance Officer, ADC Churachandpur-te a pang ui.

Lung-awilo suklatna ACDDAOA in auto service chawlsak

Lamka, Feb. 13 *(Nisin Thuhiltu)* : All Churachandpur District Diesel Auto Owners Association(ACDDAOA) in a sepkhawmpi uh mi 2 kinapped ah umte puaknatpi ziak in tuni district sung a Diesel Auto kuama tailo ding ah hiatsakna a bawl dungzui un, khawpi sung ah diesel auto ah passenger pua muding a um pua’i. Thiltung tawh kisai leh maban panlak ding dan genkhawmna tuni’n ACDDAOA Office, Bethel Veng, New Lamka ah Line tin ah President leh Secretary, ban ah ACDDAOA ah Cabinet Member-te’n a nei ua, chanchin thak saite’n le a vabildaw ui. C. Sawma, President in a gendan in, diesel auto line bangjat hem ah thingnuaimi te’n sum a dawt dungzui ua, a dawldaw khamkham uh Rs.30,000 peding ah February 6, 2018 ah kuan, Lianpau, President, Kaprang Auto Line leh Haopu, Vice President, Zolzam Auto Line-te anchâk ding ah hentang ah ala um uh ahidan a gen hi. KIO/KIA in Rs. 1,00,000 demand a bawl lak ua Rs. 30,000 peding ah kuan auto driver panite a puimang lai ua, phone mangcha ah kihona ah, sum demand le mikhat ah Rs. Lakh 10 ah kalto in, a kigawm ah Rs. Lakh 20 a piak ding ua hiatsak ahiu a, auto driver-te’n kingainiam tak ah kiholimpi in, Rs. 3,00,000 chawi in February 10, 2018 ni ah hentang ah umte va puidawk uh hi’n a kigen hi. Hentang ah umte dam tak ah tha’daw ahina chung ua panlate chung ah kipakthu le a gen hi. Nam a ding ah kipedawkte’n ziagual ah haksa tak ah nekkawm hawlte subuai talo ding in dawt a bawl a, piak ding ah kilawm a um leh sumsiallo ahidan uh gen in, himaleh association in a zawloding chan ah thagum ah kivaulau kawm ah kidawt hi chunggik um a sak thu le a gen a, maban ah a umkit ding dawilona ziak ah tuni tailo uh ahidan a gen hi.

Motivational Road Show bawl zawm
Lamka, Feb. 13 *(Nisin Thuhiltu)* : Joint Artistes for 70th Zomi Namni Celebration 2018, in zing February 14, 2018 zingkal dak 11 apat khawpi sung mun chuamchuam ah Motivational Road Show neikit ding ahiu. Zingkal dak 11 in Kangvai ah kipan intin, a zaw leh Sumkong Kaimun, Tuibong, Sielmat Lei, Rengkai Bazar, Saikawt leh New Lamka ah nei ding ahiu. Kuki Artistes Progressive Union(KAPU), Zou Artistes Union(ZAU), Vaiphei Artistes Association(VAA), Hmar Artistes Association(HAA), Mizo Zaimi Inzawmkhawm(MZI) leh Zogam Artistes Association(ZAA) apat lasathiamte’n laa sading ahiu. SHOW neina ding munte ah khawtualte’n pan nasatak ah lakpi ding in chialna a bawl ui.

Measles-Rubella Campaign tawh kisai ah training kipan

Lamka, Feb. 13 *(Nisin Thuhiltu)* : District Family Welfare Officer(DFWO), Churachandpur in tuni, February 13, 2018 zingkal dak 11:00 in CMO Mini Conference Hall, CMO Complex ah Measles-Rubella(sênsi natna) Campaign tawh kisai ah ni 9 sung training a bawl ding chu a kipan hi. Tuni’n training-na ah Autonomous District Council(ADC), Churachandpur nuai a Block chuamchuam ah School a sêm, Headmaster/Headmistress-te a pang ua, Dr. Jam Thianlal, DFWO Churachandpur, Liankhozam, DE & MO, DFWO leh Seiboi Mate, District Program Manager(NHM), Churachandpur te’n a ziltil ui. ADC Churachandpur nuai ah, Henglep Block ah School 41 a um a, Samulamlan Block ah School 34, Thanlon Block ah 22, Singngat Block ah 27, Tipaimukh Block ah 5 leh Churachandpur Block ah 41 a um hi. Tuni training ah pang headmaster/headmistress-te kiang ah hûtlo( Albendazole Tablet) a student neizat dungzui ua piak ahiu a, zing leh district sung ah PHC ah Medical Officer cheng pang ding ahiu a, WHO leh UNDP team te’n ziltilna nei ding ahiu. Zingkit February 15, 2018 ah Henglep, Thanlon, Sinzawl, Singngat, Behiang leh Zezaw PHC leh PHSC a sêm, Female Health Worker te’n training nei in, WHO leh UNDP apat team te’n ziltilna nei kit ding ahiu. February 16, 2018 ah a mun ngaima ah, Saikot, Sagang, Parbung leh New Life Trust ah PHC leh PHSC a sêm, Female Health Worker te’n training nei kit in, February 17, 2018 ah Female Health Supervisor, Pharmacist leh NYK volunteer-te ziltilna pia hiding ahiu. February 21, 2018 ah Male Health Supervisor, Male Health Worker, Multipurpose Worker leh Pharmacist, training ah pangkhalote pang ding ahiu a, Dr. Robert Zou leh Seiboi Mate te’n ziltil intin uh, February 22, 2018 ah GNM Training School ah student BSN Volunteer Nurse-te le pang in, Dr. Steve Minlun leh Ven Langel te’n ziltilna nei in training zawthiang ding a hiu.

CCpur District Sport Academy
Lamka, Feb. 13 *(Nisin Thuhiltu)* : CCpur District Sport Academy in Under 14 football coaching a ding selection a bawl lai ah selection ala mu, student 39 in national standard level football coaching a nei zing ui. Zia dungzui chun, lunglutna neite a ding in registration Rs 500 pia in, coaching nei hun zingkal dak 6 apat nitaklam 4 kikal in coaching fee piak ngailo in home ground, Gangpimual ah pan thei ding ahidan hiat ahi.

CEO/ADC CCpur chung ah Defamation Case file

Lamka, Feb. 13 *(Nisin Thuhiltu)* : 16 New Lamka West ah MDC, CT Lian in tuni, February 13, 2018 in Chief Judicial Magistrate Court, Tuibong ah T. Kammuanlal Simte, CEO/ADC Churachandpur chung in Defamation Case a file hi. CT Lian in a gendan in, a chiata February 5, 2018 ni ah New Lamka West bialsung ah school umsun ah sêmtu, teacher transfer tawh kisai ah dawt leh hiatsak ahilo ziak hi’n a gen a, hun chiasa a le memberte tamveipi thulaklo leh dawt ah kawilo uh a hidan gen in, mipite’n MDC ding ah telting maleh, Manipur Government in thulaklo tak ah a kawi, dawilo etsakna ah a bawl hi’n a gen hi. Chuleh, mimal kihuatna leh banghem dang ziak hilo ah, thil a chia dingdan diktak ah maban ah a chiading dawina ziak hin a gen hi.

NT 14feb2018b

Aganwadi Centre ah hutlo (Albendazole) neksak
Lamka, Feb.13 *(Nisin Thuhiltu)* : India Gov. in kum 1-19 kikal naupangte lak ah hut chikhat Soli Transmitted Helminths (STH) kiti beisak ding tupna’n tukum in Feb. 13, 2018 chu National Deworming Day (Naupangte Hutlou neksak ni) a puang in, gamsung pumpi ah naupangte kiang ah Hutlou (Albendazole) neksak in a um hi.
Zia chu tawh kitawn in Feb. 12 in Mata a Vungzagen Higher Secondary School ah National Deworming Day hawn in a um a, Lamka leh a kim ah Anganwadi Centre chuamchuam te’n tuzingkal in naupang school kainailo-te hutlo a nek sak ui.
Albendazole tablet ahileh school leh anganwadi centre chuamchuam ah neksak ding ah hawpzak in a um a, school kainailo te anganwadi centre-te ah neksak a hiu a, naupang a nelo a umlona ding ah Feb. 20, 2017 leh Mop-up programme um kit ding, zia hun a chu a nekhalo ten neksak thei ding a hi.

Bengaluru ah Zomi Namni Sports nei

Lamka, Feb. 13 *(Nisin Thuhiltu)* : Bengaluru ah Zomite’n a khatveina ding in Zomi Namni football tournament tuni kipan in, zing ah zo ding ahiu. Bengaluru Zomi Namni celebration committee intêkna nuai ah Magnum Arena, Sarjapur Main Road, Carmelaram, Hadosiddapura, Chikkakannalli ah nei ahi. Zia tournament ahin Bengaluru sung a um Zomi football club chuamchuam 8; Simsung FC, Gimnei FC, The Veteran FC, Zouheisa FC, Laizom FC, Young Guys FC, ZFC leh Kaihlam Hello FC-te a pang ua, football match 15 um intin, zing leh football match 15-na ah final kihelna um ding ahi.

Audit zaw leh ADC teachers’ te thalaw piak hiding:Dy CM

Imphal, Feb.13 *(Nisin Thuhiltu)* : 11th Manipur Legislative Assembly session ah Opposition Member Kh. Joykishan Singh in Autonomous District Council (ADC) nuai ah teacher te thawlaw piak ahilona chung ah Calling Attention Motion moved a bawl, Deputy Chief Minister Yumnam Joykumar Singh a dawnhuna a chun, Autonomous District Council (ADC) nuai ah teacher te thalaw (salary) tu ah a chithazing audit process zaw a hi tak leh release hiding in a gen hi. Finance in-charge le hi Joykumar Singh in, teacher te thalaw kipiakna chung ah a fello um a hidan taklang in, expenditure a khel a val ah um in a gen a, financial year 2016- 17 ah thalaw Rs. 15.67 crores/month tung, tu financial year (tha 7-8 sung) ah Rs. 33.29 crores/month tuam tung leh financial year masa tawh et ah Rs. 233.72 crore lam kiseng pha, zia chu double ah sangzaw tina suak in a gen hi. Himaleh tu financial year ah Rs. 247.77 crores bep bithiat ah um in a gen a, a khel aval ah thawlaw ah sum kiseng chu government in a etzui ding pawimaw in a gen hi.
Deputy Chief Minister in a genzawm zelna a chun, Commissioner (Taxes) Hrishikesh Modak leh Deputy Secretary (TA & Hills) Maibam Kamala Devi banah Under Secretary (Finance) L. Fimate te mapui Audit team in a khel a val ah thalaw piakna sum kiseng (expenditure) tawh kisai chu khualna kituptak ah nei ding, audit zaw takleh Government in teacher te thalaw piakna a fello um te chung ah panlakna nei ding, a pawimaw dungzui ah a kisaikhakpi te chung ah action la ding leh thalaw piakna nei hiding a gen hi.

April 1 a pat surrendered militants te ding ah policy thak chiapi hiding:CM

Imphal, Feb. 13 *(Nisin Thuhiltu)* : 11th Manipur Legislative Assembly, 4th Session ah tuni’n Demands for Grants 5, Rs 14,780 503,000/- passed in a um hi. Demands for Grants 5 passed ah um te chu - Demand No. 7-(Police) Rs. 1422,21,02,000/-, Demand No.24- (Vigilance and Anti-corruption Department) Rs. 3,92,65,000/-, Demand No. 31- (Fire Protection and Control) Rs. 13,85,45,000/-, Demand No. 32-(Jails) Rs. 23,49,16,000/- leh d Demand No.33- (Home Guards) Rs. 14,56,75,000/- te a hi. Demands for Grants passed ah um te chungchang genkhawm hun in, House leader, Chief Minister N Biren Singh in April 1, 2018 a pat surrendered militants te ding ah rehabilitation policy chiapi hita ding a hidan gen in, stipends kituptak leh skill development training piak hiding un hin a gen hi.
Police personnel te chu thingnuai ki surrendered te chung ah gamtatna kilawmlo tak neilo ding ah chialna bawl in, thingnuai ki surrendered te simmaw bawl leh kilawmlo tak ah bawl police personnel te chung ah action khautak lak hiding in a gen hi. Chief Minister in society ah chamna leh muanna a um theina ding ah police-public relationship a hawi ding pawimaw in a gen a, police official kua hitaleh gulgukna chiing, a chung ua FIR te kibawl te mawk kawi mai hilo ding in a gen hi. MLA Md. Abdul Nasir in state sung ah khamthei addict leh khamthei ah sumkawlveina uang mama ah a kilatna tawh kisai ah dawtna a siam, Chief Minister in a hilchianna a chun, government in khamthei chung ah gal puang a hidan gen in, Police te chu khamthei dodalna chiapi ding leh Narcotics Cell sukhatna ding ah thuneina piak a hidan uh a gen hi. District zosia khamthei dodalna ding ah fast track court umsak ding ti himaleh manpower kidailo ziak ah um thei nailo hin a gen hi.

Government in sepna neilo te lemchang siampiak nuwam: Radheshyam

Imphal, Feb. 13 *(Nisin Thuhiltu)* : Labour & Employment Minister Th. Radheshyam Singh in state sung ah sepna neilo khangthak te ding ah lemchang siampiak ding Government in ngaikhawk mama a hidan State Assemnly ah Opposition Member Surajkumar Okram dawtna a dawnhuna a chun a gen hi. Minister Th. Radheshyam Singh in May 2017 ah State Mission on Employment, Housing & Drinking Water approved ah um a hitakdan gen in, figure 1,50,000 per annum kisiam chu Employment Exchanges’ data leh programme dungzui ah etthak ding, panlakna um te Chief Minister chairman hina nuai ah Governing Council in enzui ding hin a gen hi.Minister in skill development leh employment guarantee programme a ding ah additional budgetary grant siamchuam ah umlo, tu ah siamchuam ding pawimaw nai tadilo in le a gen a, tu ah budgetary allocations nuai ah le sepna neilo te ding ah lemchang piak theina ding um in a gen hi.
Opposition Member K. Ranjit Singh dawtna siam, Health Minister L. Jayentakumar Singh in a dawnhuna a chun, government in a tam theipen ah mipi te health care support bawl ding, senior citizens leh differently abled persons te chu a thawn ah etkawl ding ngaikhawk mama in a gen a, senior citizens leh persons with disabilities te ding ah JNIMS special OPD Counter hawn ah um, natna chi 57 test bawlna a thawn hiding ah kikawi hin a gen hi.

Water Resources Minister Letpao Haokip in Opposition Member Md. Abdul Nasir dawtna siam a dawnhuna a chun, Government in tunung ah tuilet ziak ah haksatna um te a umtaklona ding ah panlakna leh guanggalna nei a hidan gen in, Dolaithabi Barrage Project chu Prime Minister Narendra Modi in March 2018 leh Imphal a phak hun ah hawndaw thei ding ah umta, canal system leh distributaries system te December, 2018 ah zawthian thei hiding in a gen hi.

Police ten meithal 3 leh gari 9 mandawk

Imphal, February 13 *(Nisin Thuhiltu)* : Imphal East Police in tuni, Awaching (Khetri Bangoon Mamang Ching Khunou), Imphal East ah cordoned leh search operation a bawl hun in single barrel meithal pathum leh gari 9 a mandawk hi. Zia hun a chun numei 101 panna mi 203 te verified bawl in, numei 10 panna mi 21 te chu ID proof neilo ziak in police station tut in a um ui. Chuleh, document kituptak umlo, Alto car 1, bikes 6, Activa scooter 1 leh Dio scooter 1 a mandawk ua, single barrel meithal pathum, licenses expired sa le a man dawk ui.

Civil Service lunglut pawsal khat in naupang 1 a tha nung ah tha 1 val suitcase ah kawi

New Delhi, Feb. 13 *(Nisin Thuhiltu)* : Northwest Delhi’s Swaroop Nagar area ah in-lua ah um Civil Service exam a ding ah kisingsakna nei kum 27 ah upa Avdesh Shakya kiti pawsal khat chu tuni’n pawsal naupang khat tha ziak in Police ten a man ui. Police thusuak in a genna a chun, Avdesh Shakya (27) in January 6, 2018 a khah zia pawsal naupang chu that ah a in-luana sung ah suitcase ah a kawi, thakhat (one month) sunglam a kawi nung ah a nam siat tawh kitawn ah thiluang chu mudaw ah um hin a gen hi. Avdesh Shakya chu police ten thudawtna a nei hun un naupang pa thattu a hidan kipuang in, pawsal chapang pa nu leh pa ten Avdesh Shakya tawh a chapau kiholo ding leh ki thualo ding ah gakna a siam ziak ua, zia gual kithana chu piang hin a kigen hi.

DCP (Northwest) Aslam Khan in a genna a chun, Avdesh Shakya chu a inn ah kiman dawk a hidan gen in, a kipuandan ah naupangpa luang chu munkhat ah paimang ding leh naupangpa pa Karan Singh chu sum demand bawlna phone call bawl ding tiang ah guanggalna nei, tunaicha a umna kichawn hin a gen hi. Avdesh Shakya chu Karan Singh te inn ah chia zing sek, a chapa tawh kithua sek himaleu a ziak hiatlo ah naupangpa pa Karan Singh in a chapa tawh a kithua ding uh a zakda nung ah, January 6, 2018 ah naupang Ashish chu Avdesh Shakya kiang ah vachia, a nu leh pa’n a kimutua ding uh a phallo a hidan a gen leh Avdesh Shakya chu lungna, naupang Ashish chu meklum ah a luang chu suitcase ah a kawi hin a gen hi. Naupang Ashish a tha nung tiang a chu Avdesh Shakya in Karan Singh te vetha zing hin police thusuak in a gen a, Karan Singh in a chapa tunna hiatlo ah a um nung ah police station ah missing persons’ complaint a bawl hin a gen hi. Chuleh, police ten naupang Ashish chu a hawl zing ziak ua, a luang paidawk theilo ah um, a inn kiangteu in gim namsia um ah a gen tak ua leh tualthattu Avdesh Shakya in sazu thi um ah gen sek in police thusuak in a gen hi.

Tualthattu, Avdesh Shakya ahileh western Uttar Pradesh a pat mi a hia, civil service exams ding ah lekha sim ah in-lua ah um, preliminary exam thumvei bawlta leh 2 vei UPSC mains examination ah pangta hin a kigen hi.

User Rating: 0 / 5

Star InactiveStar InactiveStar InactiveStar InactiveStar Inactive

Union Home Minister in Zomi Nam Ni 2018 uap theilo ding

Lamka, Feb. 11 *(Nisin Thuhiltu)* : 70th Zomi Nam Ni Organizing Committee 2018 leh a nuai ah department chuamchuam um te’n tuni sunnung in Hill-town, Lamka ah meeting a nei ua, zia hun a chun maban panlak dingdan tawh kisai panna’n thu chuamchuam a genkhawm ui. Meeting tawh kisai a thupukna chuamchuam a siamteu H. Pauzalal, Secretary, ZNN-OC 2018 in a genna a chun, Khatkhotong Baite, Chairman hina nuai ah meeting nei ah um a hidan gen in, organizing committee te dawidan zil ah Delhi ah khualzin Th. Khamneithang Vaiphei, Secretary, Zomi Council leh H. Pauzalal te’n Delhi a khualzinnau tawh kisai ah report piakna a nei hun ua, Zomi Namni Chief Guest ding ah chial ah um Union Home Minster Rajnath Singh in Feb. 20, 2018 ah meeting pawimaw tak Inter-State Council Meeting amapui ding ziak ah Zomi Nam Ni matna uap theilo ding ah report piakna nei un a gen hi. Chun, Lamka Football Gound ah Zomi Nam Ni Football fournament chiatha zing chu Feb. 17, 2018 ah final match um ding ah lemsakna a nei bak ua, organizing committee in Zomi Nam Ni matna ding tawh kisai ah flag kizuak chawtu te zosia chung ah kipakthu genna nei a hidan uh a taklang hi. Chuleh, Zogam Artist Association (ZAA) mapuina nuai ah joint artist te’n Zomi Nam Ni matna ding tawh kisai ah mipi sukphulna ding ah motivational road campaign a nei uh sunzawm ding leh mipi’n kithuapina piak chiat ding ah lemsakna nei uh hin a gen hi.

CBYF Quadrennial Conference 2018 mang zo
Lamka, Feb. 11 *(Nisin Thuhiltu)* : Chin Baptist Youth Fellowship (CBYF) in Feb. 8, 2018 a kipat Tangnuam CBA Biakinn ah “Khris Nungzui Muanzia” (Matthai 16:24) ti thupi nei ah CBYF Quadrennial Conference 2018 a nei uh chu tunitak biakna kikhawp tawp in a zo ui. Rev. Dr. Sut Khan Thang, Exe. Secy. CBA in CBYF Quadrennial Conference 2018 khakna a nei hi. Tuni zingkal lam dak 10:30 in biakna kikhawpna Pastor Dong Sian Pau in pauchapna tawh a hawng a, Central Church, Sinai leh Tangnuam te’n lapawl sa’n, Rev. Dr. JM. Ngul Khan Pau in thugenna a nei hi. Sunnung dak 1:00 in Ordination Programme a um a, zia hun a chun Hyderabad a Pastor ding LP Tuang ordination piak in a um hi. Nitak dak 5:30 a biakna kikhawp hun ah Rev. Dr. JM. Ngul Khan Pau in thu genna a nei a, Central Church LBYF mapuina’ Closing Ceremony a um hi. Chin Baptist Association nuai ah India gamsung ah Biakinn 16 um hi’n a kigen a, khawmpi ah mun chuamchuam a kipat tamtak a chiakhawm ui.

ECA Youth Deptt. in Golden Jubilee lawm zo
Lamka, Feb.11 *(Nisin Thuhiltu)* : Evangelical Churches Association (ECA) nuai ahYouth Department te’n Feb. 8 nitak apat Tuibong a Peace Ground ah ‘Being Renewed; Psalm 103:5’ ti thupi nei ah Golden Jubilee a mat uh chu tunitak in a zo ui.
Golden Jubilee matna ah thugenpi in Rev. Dr. Michael Gabbert, Senior Pastor, Evergreen Baptist Church, USA a pang hi. Feb. 10, 2018 zingkal dak 7:30 in Molnom khua ah Dr. Michael Gabbert in Golden Jubilee suang a hawng a, telchuam ah um mi 50 te’n Jubilee dakpi khetna nei in, Golden Jubilee matsung in competition leh seminar le um in, seminar ah Resource Person in Upa Tongkholun Haokip, Dy. Registrar IIT in ‘The Indispensable Ministry of the Holy Spirit’ leh Rev. Dr. J. Lamboi Haokip in ‘Christian Youth’ thupi mang in in seminar paper present a bawl ua, tunitak in Upa Henkholun, Moderator ECA in Jubilee lawpna a khak hi.

Culvert hukbing thei ding ah nin kipai

Lamka, Feb.11 *(Nisin Thuhiltu)* : Zion Veng, New Lamka ah um Young Paite Association (YPA) Zion Veng unit office kiang a lamlian ah culvert kibawlna mun ah hun banghemchan chiata a pat nin pai ah a um ziak in, anamse mama a, mihing a ding a damthei huailo in a kilang hi. Chuktui luan hun ah zia zia nin kipai sek te chu tui in tawkmang thei sek maleh tu ah tui luanglo a hina chung ah nin kipai te chu mipha chuam ngai pawl in suthiang ah nin paitalo ding leh hiatsakna thusua bawl zing sek maleu phachuamlo hin a kigen hi.

TSP GHQs in exam dingte pauchap piakna nei

Lamka, Feb.11 *(Nisin Thuhiltu)* : Thangkhal Sinlai Pawlpi (TSP), General Headquarters in TBC Tangnuam Biak-inn ah tuni’n Board Exam dingte pauchap piakna programme a mang ui. Zia hun matna chu Elco Kamlianlal, Vice President TSP GHQs in amapui a, programme hun sung in Khaisuanlam, President, TSP GHQs in vaidawn thu genna nei in, Khaiminlian, Manipur Education Services in exam dingte tilkhona thu leh exam hun ah hiatding pawimaw chuamchuam te genna a nei hi. TSP President in exam dingte kiang ah thilpiak a piak banah Pastor Hangmuanlian, Director, Youth & Mission, TBC in Exam ah pang ding te pauchap piakna a nei a, Hauminlian, Joint Secretary, TSP GHQs in kipakthu genna nei in, Rev. Khaikhanthang, Director, Tanglian leh Tuhun (Gospel film) in hunkhakna a siam hi.

TBC in M. Tanglian PCI (R) laklutna nei ding
Lamka, Feb.11 *(Nisin Thuhiltu)* : Thangkhal Bible Church (TBC) ah M. Tanglian PCI(R) kochuam laklutna programme Feb. 15, 2018 leh um ding a hi. Khaikhanhau, Chief of M. Tanglian & Thangkhal Tribe Council (TCC), President panna, innkuan bangzat a hem te’n TBC kochuam zawm ding a hiu. Pastor Chinminlian, Executive Director, TBC in zia hun chu a tamtheipen in uap chiat ding in chialna leh hiatsakna a bawl hi.

Disaster Management Training um ding
Lamka, Feb. 11 *(Nisin Thuhiltu)* : District Disaster Management Authority, Churachandpur in February 12 a pat February 14, 2018 sung ah District Training Centre, Tuibuang ah Disaster Management tawh kisai ah Training bawl ding a hi. Training hun ah District sung a kisaikhakpi, civil society organization, NGO, Institution leh Village Authority-te pang ding ah hiatsak a hiu. Thuchian kimzaw, Gin Muan Ngaihte, AC-II, DC Office, Churachandpur kiang ah Contact No. 8414-991-784 ah thuhiat leh kanchian thei ding a hi.

Ngaina gual ah office, school kaizawm ding ah State Home Department in thusua bawl
Imphal, Feb. 11 *(Nisin Thuhiltu)* : State Home Department in 12th February 2018 zingkal dak 6:00 a pat KCP (MC) Nongdrenkhomba group in dakkal 42 sung bandh a puan chu kuama’n support bawllo ding in mipi te chialna a bawl a, state government in thil dawi umlo a tunkhak ding venna ding ah panlakna nei in a taklang hi. Rehanuddin Choudhury, Home Secretary suaikaina press release in a taklatna a chun, government semtu te ngaina gual ah office kai chiat ding leh nasem chiat ding ah hiatsakna bawl in, office kailo a um leh action lak hiding in a taklang a, KCP (MC) bandh puan chu dan-kal (illegal bandh) a hi ti’n a gen hi. Mipi te chu ngaina gual ah nasem thil bawl ding ah chialna bawl kawm in, students leh teacher te le ngaina gual ah school kai zawm ding in chialna a bawl hi. KCP (MC) Nongrenkomba group kiti chu a chiata kum 4 masang ah government khut ah ki surrendered leh State leh central government tawh kinawptuana nei ah MOU suai a la kai, kum 4 sung, cadre te stipend leh onetime payment Rs. 2.50 lakhs chiat piak ah a la um, KCP (MC) Nongrenkomba group leader in kum 4 sung designated camp ah a um nung ua, KCP (MC) Nongrenkomba group kiti a la sukbei, KCP (MC) Nongrenkomba group te kitiamna neidan tak ah zia gual letter head kiti chu a mat thei taklo ding uh, a group le umtalo a hina chung ah KCP (MC) Nongrenkomba group min ah letter head kisiam leh kimang chu dan-kal (illegal) a hih ti’n Rehanuddin Choudhury, Home Secretary suaikaina press release in a taklang hi. Zia chu tawh kitawn ah KCP (MC) Nongdrenkhomba group min dakkal 42 sung bandh kipuang chu state government in ngaikhawk mama in le a gen hi. A langkhatlam ah KCP (MC) thusua in a taklatna a chun, thingnuaimi MoU suai kai group te demand tawh kisai State Assembly ah genkhak leh sukpitin ding guat ahilona chung ah bandh a puan uh hin a taklang hi.

Khudei Khunou Village ah PHC kawi hiding: Health Minister

Imphal, Feb. 11 *(Nisin Thuhiltu)* : Health and Family Welfare Minister L. Jayantakumar Singh in tuni’n Chief Guest hina tawh Chandel District ah Khudei Khunou Village, Foundation Day Cum Platinum Jubilee (75 years) Celebration a uap a, ama’n a thugenna a chun, Khudei Khunou (Khotle Yulran) ah Public Health Centre (PHC) hawn hiding in a puang hi. State sung ah health sector siamhawi ding pawimaw a hidan gen in, Health Facility kituptak a um ding pawimaw in a gen hi. Tanggam ah medicinal plants um te value nei mama a hdian uh gen in, market tut theina ding ah panlak ding pawimaw in a gen a, zia chu hileh lobawlmi te mai hilo ah state revenue kibelapna hiding in a gen hi.

State Government in state sung ah Medicine factory siamdaw ding leh resource um thei zosia lak khawm ding ah guanggalna a neina chung ah Central Government thuhiat zing hin a gen hi.Maring community in Art leh Dance lam ah hausakna a nei dan uh gen in, Maring community in indigenous song leh dance a nei te chu nam dang te a sang ah niamzaw lo hin a gen hi. Zia hun mat sung a chun, Minister Jayantakumar in Platinum Jubilee Celebration suangphu leh Khudei Khunou Village chanchin kizikna lekhabu hawnna le a nei hi. Chun, hun matna chu L. Modun Charang, President Maring Uparap Assembly(MUA) leh Willington Tonsin, Executive Member, Education & PHED, ADC Chandel ten le a uap ui.

CPM in Manipur ah 7th Pay Commission thu BJP thudawtna siam
Imphal, Feb 11 *(Nisin Thuhiltu)* : Left Front party ten Manipur ah BJP government chu 7th Pay Commission chiapilona chung in dawtna a siam hi. Election campaign hun ah Prime Minister Narendra Modi in state mipi te ama party’n vaihawmna a chan thei ahileh 7th Pay Commission chiapi hiding ah a tiam himaleh tuni tiang ah chiapilo ah a um chu ngaithiam lo uh hin a taklang ui. Chief Minister kiang ah lekha thawt Manipur Government Services Federation (MGSF) president, M Rajendra Singh suai kaina’n a taklatna a chun, February 27, 2018 tiang ah 7th Pay Commission chiapi ahilo ahileh Left Front “cease work strike” pan ding in a gen a, tunitiang ah 4th Pay Commission chiapi ah um leh state in hun sawtpi a pat 7th Pay Commission demand a bawl hita hin a gen hi. 7th Pay Commission recommendations chu state sung ah chiapi hileh state government in additional Rs 1700 crore a puakdaw ding himaleh zia chu State budget 2018-19 ah suklat hikhalo in a taklang hi.

Sunjwan terror attack: Jawna 5 leh minautang 1 thi
Sunjwan (Jammu), Feb. 11 *(Nisin Thuhiltu)* : Sunjwan Army camp attack bawl ah pang Jaish-e-Mohammed (JeM) thingnuaimi 3 kaplup hita a hi banah attack na’ army jawan 5 leh minautang 1 in thina tuak hi’n Army official te’n a gen u’i. Galvan hawitak tawh kithuam thingnuai pawl khat in Kiginni zingkal mattak ah 36 Brigade Jammu & Kashmir Light Infantry camp ah lut in attack a bawlna ua Junior Commissioned Officers (JCOs) 2 pang ah Army personnel 5 in thina a la tuak ua, thingnuaimi te lak ah a thumnapa chu Army van ah kivan in a dang 2 te gual ah galvan haiwtak pua hi’n defense thupuangtu’n a gen a, thingnuaimi te a pat AK-56 rifles, Under Barrel Grenade Launcher, meichang leh grenade hunkhawp mudaw ah um hi’n a gen hi. Attack a chun numei leh naupang 6 pang ah mi 10 in liamna a tuak ua, zialak ah nupi khat chu nauvawp hi’n a kigen hi.Liamna tuak lak ah kum 14 naupang khat luchang ah meichang lut in ama dinmun chu lauthawng um hi’n thupuangtu chun a gen hi. Jammu-based Army PRO Lt Col Devender Anand in, family quarters te a pat a lua te puidaw ah um in search operation a chiatha zing hi ti’n a gen a, innkuan hunkhawpte camp sung ah um nalai uh a hina ah amau bitna ding ah Army in theitawp sua hi’n a gen hi. Camp hi a hileh tha 15 chiata a khan le attack in a la um kha’i. A chiata November 29, 2016 a khan thingnuaimite’n Army's Nagrota camp ah lut in officer 2 pang ah Army personnel 7 a la kaplum ua, operation bawl a hina ah security force te’n thingnuaimi 3 a kaplum u’i.

Tripura ah thaguam suana politics theng hun hita: Amit Shah
Agartala, Feb. 11 *(Nisin Thuhiltu)* : Bharatiya Janata Party (BJP) in Tripura ah thagum suana politics chu khantona tawh sâng ding hi’n party chief Amit Shah in tuni’n a gen hi. Mohanpur ah election rally na’ a thugenna a chun, BJP in Tripura ah vai hawm leh kum 5 sung ah state chu model state khat suaksak ding hi’n a gen a, state mipi te chu vote khelo ding ah vau aum hi’n a gen hi. Ni 2 state vena nei Shah in a hileh Chawmanu leh Teliamura ah le election campaign a bawl a, tuni zingkal ah Bamutia a pat Mohanpur a zawt a chun road show a nei malalm hi. Tripura Assembly election a hileh a hung tung ding February 18 leh um ding a hi.

A langkhat lam ah Union Finance Minister leh senior Bharatiya Janata Party (BJP) leader Arun Jaitley in tuni’n BJP vision document suadawna a nei hi. Tripura assembly election masa kha party in North-east state dang te a pat zathuapna dawnglo in, a hinla party in state zosia’ panla in zathuapna leh tawsawtna kaikhawm hi’n Jaitley in a gen hi. Tripura mipite’n hun sawttak a pat vai a la hawm, Communist Party of India (Marxist) dodal ah kiphinna nei in, CPI (M) chung ah lung-awilo mama uh hi’n a gen hi. A hung tung ding February 18 ah Tripura assembly a ding election um ding a hia, March 3 leh result puandaw hiding a hi.

Nov 2017 a pat I&B Ministry official 155 ki transfer
New Delhi, Feb. 11 *(Nisin Thuhiltu)* : Ningkum November tha a pat Indian Information Service official 155 te a sepna mun ua pat transfer in aum hi. July ah Cabinet lepthakna ahi hun ah Ministry of Information and Broadcasting (I&B) mawpaw ding ah Smriti Irani guat ahi zaw tha 3 nung ah zia gual chu um a hia, a hinla zia gual transfer chu nidang ah a la um kha ngailo hi’n a kigen hi. Ministry ah senior official khat in a genna a chun, Minister Irani in official te kimupi in thupukna te chu ama mimal tak ah a genkhawmpi a, mun chuam ah kichawn ding tawh kisai ah haksatna a um ahileh ama kiang ah hiatsak uh hi’n a gen hi. Nikhat thu ah transfer tampen ni a hileh February 7 a hia, zia ni khan officer 48 te chawn in a um u’i. Irani masang ah I&B minister a la tû, Venkaiah Naidu in le official te New Delhi a pat chawndaw ding phasak thu a la genlang kha maleh zia gual lawm ahin a la bawl diak puai. November 2017 a pat transfer ah um official 155 te lak ah 15 chu capital pawlam ah chawndaw ahia, a lianpen tele hawi hidiak lo in Director General level official 4 banah Additional Director Generals 36 leh Deputy Directors 60 le transfer ah um lak in a pang u’i.

Kaziranga ah a kî lak ding ah chingpi khat kaplup ah um
Tezpur (Assam), Feb. 11 *(Nisin Thuhiltu)* : Sakapte’n Kaziranga National Park ah chingpi khat kaplum in a kî zammang pi uh hi’n senior forest official khat in tuni’n a gen hi. Kaziranga National Park Divisional Forest Officer Rohini Ballav Saikia in, zani znankhang tuam ah Sitamari area kiang Polokata ah zia thilsuak chu tung hi’n a gen a, chingpi kî chu a lak zaw ua sakap te zammang ngal in a mun a chun .303 rifle kikap dawna nung chang 5 mudaw ah um hi’n a gen hi. Saikia in, senior forest official dang te tawh tuni zingkal ah zia tak mun chu va pha in etthâkna nei uh a hidan genlang kawm in forest leh police personnel te kithua joint team in sakap te hawldaw leh matna ding operation pan uh hi’n a gen hi. Thiltung chu tukum sung ah chingpi kaplup ah a um a 2veina a hitai. A chiata January 14 a khan Daflang camp area sung Bagori range ah chingpi anû khat kaplup a la himaleh a kaptute’n a kî a la kilak man puau.
Zia thilsuak a tung masang cha Assam Governor Prof Jagadish Mukhi in law enforcing agency te kiang ah Kaziranga National Park ah chingpi kâp vênna ding ah panlak thei chan a lading in a hiatsak hi. Kaziranga National Park leh kî khat nei chingpi ziak ah Assam chu khawvel in a hiat khat hi’n a gen a, sakap te’n chingpi a kaplup uh chu a gamsa chung bep hilo ah state kisaktheipi chung ah attack bawlna hi’n Governor in a gen hi. Golaghat district authority te tawh zani zan ah review meeting a nei hun ah Governor Mukhi in zia thu hi a gen a hi. Chingpi kâpna thilsuak chu chu tawm hiai hiai ta maleh chingpi humbitna ding ah security agency te kiging zing ah a um uh kûl hi’n a gen hi. Chun, Governor in district police thuneitute kiang in, state dang te tawh district kigamgitna te chu thawveng tak suak sak ding in a dawn kawm in, district sung ah chamna leh muanna a um theina ding ah security force te panlak dan chu lungtum um leh kipak um a sak thu a puang hi.

NPP in Meghalaya ah government siam di: Conrad
Shillong, Feb. 11 *(Nisin Thuhiltu)* : National People’s Party president Conrad K Sangma in, tukum Meghalaya assembly election ah NPP in gualzawna chang ding leh government kit chu party amau party in siam ding hi’n tuni’n kimuang tak in a gen hi. North Garo Hills ah Gokul kiti khua’ rally a nei hun ua a thugenna a chun, Sangma in, election hun ah NPP in seat mu tampen ding leh state ah a government thak ding chu siam ding hi’n a gen hi. NPP a hileh Centre leh Manipur ah BJP tawh kizawp a hi banah North East Democratic Alliance (NEDA) ah pang khawm himaleh Meghalaya Assembly election a chun a chang in a ding ua, seat 53 ah candidate a kawi hi. Sangma in a genna a chun, NPP in a gammi diktak te leh minority te a ding ah panla zing in, Meghalaya bep hilo ah NE India pumpi ah khantona umsak theina ding ah Centre tawh pan lakhawm zing hi’n a gen a, NPP chu North East mipite leh minority te a ding ah pan nasatak ah la, famta Purno Sangma in a la phudaw hi’n a gen hi. Zia kawmkal a chun, senior BJP leader Rajiv Pratap Rudy in, Meghalaya assembly election a ding ah party dang te tawh pre-poll a hiloleh post-poll alliance siamlo ding hi’n hialchetna a bawl hi. Tuni’ Shillong ah hhudawt khat a dawnhuna a chun, BJP in election chu a chang ah tet ding hi ah Rudy in puandawna nei kawm in, gualzawna chang thei ding ah kimuang huntawk uh a hidan a gen hi. Seat 60 umna Meghalaya Assembly a ding election a hileh tutha tarik 27 leh um ding a hia, March 3 leh result puandaw hiding a hi.

BJP-NDPP Alliance nawl ding ah Nagaland Congress in mipi chial
Kohima, Feb 11 *(Nisin Thuhiltu)* : Nagaland Pradesh Congress Committee (NPCC) in thusua a bawlna a chun, 2018 assembly election chu political partite vaihawm ding kichuna hilo bep hita lo ding leh maban hun hung tung zel ding te a ding ah Nagaland politics kibulphuna hung hi ding a hina ah Nagaland khangthu a ding ah tepte kham ting ding hi’n a taklang hi. Congress party in sakhua zalenna leh mipi vaihawmna diktak chu dinpi zing in, a langkhat lam ah Hindutva force te ai-aw ah pang BJP leh a kizawppi NDPP pang hi’n a gen a, amau in vaihawm nailo uh a hina ah tuhin Hindutva force te pawm ding leh nawl theina ding ah dawitelna nei nalai ti’n mipi te kiang in a gen a, amau vaihawmna hileh zia gual dawi telna chu um talo ding leh ama thunuai ah um ngai ta ding hi’n hillawkna a bawl hi. NPCC in zia ah mipite dawitelna chu humbitna ding ah hun dang gual ah sakhua zalenna leh mipi vaihawmna diktak chu tangko pi zing leh dinpi zing hi’n a gen hi. Party in Nagaland mipi te kiang ah BJP-NDPP alliance chu Hindutva forcete thupiak gual ah tawi uh a hina ah ala nawl ding in a dawn hi.

HPC(D) Leader in kihona a lawtin ding a kinepthu taklang

Aizawl, Feb 11 *(Nisin Thuhiltu)* : Hmar People’s Convention (Democratic) leader Lalthalien Hmar in Mizoram government tawh tha kit leh Hmar te issue chung ah political level talks hun ah kiho lemna a um thei ding kinem a hidan a taklang a, himaleh kihona pang ding delegation member ding te sufel nailo uh hin a gen hi. Mizoram Home minister R Lalzirliana in a taklat dungzui ah HPC (D) leh Mizoram Government in March 5,2018 leh Aizawl ah political level talks nei ding a hi.

Russian passenger lenna tuaksia; mi 71 thi

Moscow, Feb. 1 *(Nisin Thuhiltu)* : Russia, domestic Saratov Airlines in operate a bawl Antonov An-148 kiti passenger lenna, capital's Domodedovo airport a pat Urals city Orsk zuan ah kipan dawk chun Russia khawpi Moscow kiangnai Ramensky district ah tuni’n tuaksiat a tuak a, ziana a chun lenna sung ah chuang mi 71 ten thina a tuak ui. Russian news agency te taklatdan ah zia lenna tuaksia a chu passenger 65 leh crew member 6 chuang a hiu a, mit ah mute gendan ah lenna chu len zinglai ah kang (burn), lengzawm theilo ah ketha hin a gen ui. Tulak cheng ah Russia gamsung mun chuamchuam ah vuk a kiak nasat mama nachung ah khua muna hawitalo in a kigen a, Russian khutsuak Antonov An-148 lenna tuaksia chu kum 7 ah upa hita a hi.
A langkhatlam ah zia lenna tuaksiatna ziak chu hiatchian ahilona chung in Investigative Committee of Russia in criminal investigation bawlna a nei a, Russian President Vladimir Putin zia tuaksiatna tawh kisai chu khualna nei ding ah "special commission” order sua a hidan Putin's spokesman Dmitry Peskovin a gen hi.

Syria in Israeli kidona lenna kapthak piak
Jerusalem, Feb. 1 *(Nisin Thuhiltu)* : Iran-backed positions Syrian in anti-aircraft missile mang in Israel kidona lenna F-16 fighter jet khat a kapthak piak a, himaleh pilot 2 te chu parachute ah kichawmtha’n a suakchau hi. Zia kapthak ah um Israel kidona lenna chu gamgi tuam ah Iran-backed positions Syrian te chung ah bombing raid bawl, a kinungle lam ah kikaptha hin Israeli official thusuak in a gen a, Syrian anti-aircraft missile in a kap khak nung ah northern Israel ah kidona lenna chu ketha hin le a gen hi. Zia nung a chu Israel in second leh air raid nasa bawl in, Syrian air defence systems panna Iranian sepai te munpi 12 leh Syria ah Lebanon's Iran-backed Hezbollah group te umna mun te chu target in a nei hi. Lebanon's Iran-backed Hezbollah group in zia ah Israel lenna kikapthu chu hunthak a hidan suklatna leh Syrian airspace ah Israel kidona lenna a mawk len kit taklo ding etsakna hin a gen hi.

CMHT enrolment bawlsa te’n a health card ding uh kilak theita ding

Lamka, Feb. 11 *(Nisin Thuhiltu)* : Chief Minister-gi Hakshegi Tengbang (CMHT), Manipur phatchuampi thei ding, BPL innkuante’ minkhumna District hospital ah OPD Building (First Floor) in a chiatha zing sek himaleh District Hospital ah Health card print na ding smart card printer umlo ziak in, Imphal lam ah enrolment kibawl zousa te thawtsuk vek ngai in, nasepna lemchanglo tak ah um in a kigen hi.

A langkhatlam in, January 30 tiang ah Enrollment bawl mi 872 te Health card ding tuni in a tung a, minkhumna mun, OPD building 1st floor a, NCD Clinic kiang ah CMHT enrolment bawlsa te’n a health card ding uh kilak theita ding a hiu. Zialo a chun, min khum kha nailo te’n le minkhum thei zing ding a hi.

Enrolment bawlzaw tak leh CMHT Health Card piak hiding a hiu a, card neite’n empanelled network hospital-te ah a sum (cash) ah hilo in ki etkawlna Rs. 2 lakh tiang govt. in kithuapina muthei ding a hiu. Zia scheme phatchuampi thei ding te chu, migenthei diak ah kihia, Social Economic Caste Census (SECC) 2011 data ah tetpte ah um, BPL innkuan, Disability Certificate leh Widow (Methai) te hiding a hiu. Enrolment bawlna ding ah Aadhaar card (Xerox copy) chawi ngai, AAY Card holder, Widow (Meithai) Certificate leh Disability Certificate neite’ a ding ah enrolment fee Rs. 50/- piak ngailo ding, zia gual neiilo te ding a chu enrolment fee Rs. 50/- hiding a hi. SECC 2011 Data ah umkhalo Aadhaar card nei ah enrolment bawl ding te a hiuleh DC hiatpina leh verifying officer in approval a bawl leh enrolment bawlthei ding a hiu. CMHT Health Card nei te’n damlona tawh kisai a ah ki-etkawlna Rs. 2 lakh tiang govt. in panpina peding, Rs. 2lakh chunglam chu damlo inkuan ten a kisen ding uh a hi. Scheme ahileh natna/damlona zil ah Primary, Secondary & Tertiary (Critical Care) category ah khen in a um a, Primary & Secondary Care te’n Rs. 50,000 tiang panpina muthei ding, Tertiary (Critical Care) adiak in Cardiovascular Disease, Kidney Diseases, Cancer, Neurological condition, Liver ailment, Neo-Natal Diseases leh Burns (Meikang) ten Rs. 2lakh tiang muthei ding leh Scheme phatchuampi te’n allowance chuamchuam le muthei ding uh hin a kigen hi. State sung ah damlo khat in kum khat ahRs. 3000 tiang transport allowance ah mu thei ding, khatvei chiatua lumletna Rs. 300 zel muding, transport allowance chu Rs. 2lakh in huamkha ding a hi. Zia gualma a chu, State pawlam ah ki-enkawl ding te’n le Rs. 2 lakh apat hospital in ki-etkawl sung ah mat ding, ni khat ah Rs. 1,000 tiang zel Rs. 10,000 chan muthei ding a hiu.

Page 1 of 20