Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

‘Bharat Ke Veer Ultra Marathon’ tai te CCpur tung ding

Lamka, April 17 *(Nisin Thuhiltu)* : Bollywood actor Akshay Kumar-sponsored marathon, “Bharat Ke Veer Ultra Marathon” kiti sepai martyred te zana piakna leh chawisanna ding ah organised kibawl chu chiatha zing in Mizoram a pat Singngat lampi zui ah 19th April 2018 ah Churachandpur tung ding un guanggalna a um hi. Zia thu zik ahi tiang ah Keifang (Mizoram) tung a hiu a, 8th April 2018 ah Frontier Headquarters, BSF Guwahati tung, 9th April ah Shillong, 14th April ah Tripura, 17th April ah Mizoram, 19th April ah Manipur tung ding ti a hi.

“Bharat Ke Veer Ultra Marathon” ahileh December 1, 2017 ah DIG, BSF, JS Oberoi in Attari-Wagah Joint Checkpost, Punjab ah flag-off a la bawl a hi. Marathon in states 24 leh Union Territories 7 te cover vek ding tu April thasung ah JCP Attari, Amritsar, Punjab tungkit zo ding ua guanggal a la hi’i. Marathon ah tai te ahiuleh marathon runner minchia mama, Samir Singh leh a team member 6 te a hiu a, Samir Singh ahileh farmers’ family apat Kanaheda village , Mandsaur district, Madhya Pradesh mi a hi.

“Bharat Ke Veer Ultra Marathon” kipat ding kuan ah Samir Singh in a genna a chun, nikhat ah km 100 tuam taidawk sek ding leh target a zawna ding ua tha 5 tuam bei ding in a gen a, society leh gamsung venbitna ding ah hinna chân sepai te zana suklatna leh lungsiat suklatna 15,000 km sang ah sauzaw tai ding ah kipumpiak a hidan uh a gen hi.

CDSA mapuina Annual General Body Meeting um ding
Lamka, April 17 *(Nisin Thuhiltu)* : CCpur Dist. Sports Assn. (CDSA) mapuina’ a hung tung ding May 1, 2018 zingkal lam dak 11:00 leh Lamka Football Ground Gallery, CDSA office ah CDSA nuai affiliated club te tawh Annual General Body Meeting um ding a hi. Zia ding tawh kisai a chu Affiliated club te’n agenda ah genkhawm ding pawimaw a sak te’u April 25, 2018 ma ngei ah CDSA kiang ah pelut ding in Secretary in hiatsakna a bawl hi. Chun, CDSA affiliated club te’n zia General Body meeting chu ngaikhawk ah pankim gua chiat ding in le hiatsakna leh chialna a bawl hi.

SHALOM in OD helpline siamdawk
Lamka, April 17 *(Nisin Thuhiltu)* : SHALOM in FHI 360, Project Sunrise nuai ah District Overdose Response Team member ding area chuamchuam in member 23 a guatthak hi. Zia chu tawh kitawn in Helpline number 8119050881/7423918414le a kawi hi. Overdose a um hun ah Helpline number a chu SHALOM thuhiat thei hiding a hi.

Gari No. MN02G.0001-9999 kikal piakdaw hiding
Lamka, April 17 *(Nisin Thuhiltu)* : Grace Lailhizo, District Transport Officer, CCpur in thusua a bawlna a chun, Director of Transport, Govt. of Manipur in thusua abawl dungzui ah CCpur district ah gari (vehicle) reigistration Code No. MN02G.0001-9999 kikal piakdaw hita ding in a taklang hi.

Malaria vei mudaw thak neilo
Lamka, April 17 *(Nisin Thuhiltu)* : Malaria Department, Ccpur in Malaria Clinic leh PHC chuamchuam a damlo Malaria vei hiding ah muanmaw te thisan test a bawl zing uh tawh kitawn in, April 1-15, 2018 First Forthnightly sung ah damlo 237 thisan a testnau ah positive mudaw neilo un a taklang hi. Thalui, March 2018 sung ah Malaria vei ding ah muanmaw mi 880 te thisan test a bawl hun ua, Positive mudaw thak neilo un SMO, Regional Health & Family Welfare, Imphal leh Director, Health Services, Government of Manipur ah report a piaknau a chun a taklang hi.

NFSA nuai ah Singngat agent te’n annchang ladawk
Lamka, April 17 *(Nisin Thuhiltu)* : National Food Security Act. (NFSA) nuai ah thasin leh annchang hawpdaw a hisek dungzui ah tu tha April 4-7, 2018 sung ah Saikot AC/Sub-Division leh Thanlon AC/Sub-Division ah Rationing Agent-te’ kiang ah HQ Veng ah um FCS Godown ah anchang hawpdaw ah um himaleh bandh leh thil chuamchuam ziak ah chawlsak ah um in, M. Ginzasuan, Dist. Supply Officer (DSO), CCpur & Pherzawl Dist. in Release Order (RO) leh anchang hawpdaw hun ding a bithiat thak tawh kitawn in April 13, 2018 in Parbung & Sangaikot AC/Sub-Division ah Rationing Agent-te’n RO ladawk in, Seppatni April 16, 2018 in HQ Veng ah um FCS Godown in anchang a la dawk ua, Seppatni ma in Singngat AC/Sub-Division ah Rationing Agent te’n RO ladawk in tuni April 17, 2018 in anchang a ladawk ui. Tuni, April 17, 2018 in Henglep AC/Sub-Division ah Rationing Agent te’n RO a ladawk ua, April 18 & 19, 2018 ah anchang ladawk ding a hiu. April 18, 2018 ah CCpur AC/Sub-Division ah Rationing Agent te’n RO ladawk ding a hiu a, April 20 & 21, 2018 ah HQ Veng ah um FCS Godown ah anchang ladawk ding a hiu. Block zosia a ding ah NFSA anchang quota hung zat ahileh, Saikot ah Quintal 3746.45; Tipaimukh/Parbung ah 611.80 Quintals; CCpur ah 2536.50 Quintals; Thanlon leh Mualnuam ah 911 quintals; Singngat ah 2290.40 Quintals leh Henglep a ding 1914.50 Quintals a hi.

Paris ah posting ding

Lamka, April 17 *(Nisin Thuhiltu)* : Grace Neihsial IFS (B) w/o N Neihsial IDAS (Retd) MEA, New Delhi sem chu France khawpi Paris ah posting/ transfer ding in order a suak hi. Zia chutawh kitawn in ama'n New Delhi nusia, 19th April 2018 ah Paris zuan ding hi'n a kigen hi. Ama ahileh tumasang in, Thimpu (Bhutan) leh Tokyo (Japan) in le a la posting hi.

Red Cross Road ah Thabalchongba

Lamka, April 17 *(Nisin Thuhiltu)* : Thengra Leirak area ah Nungak pawlte’ guanggalna’n zani nitak in Red Cross Road ah Cheiraoba matna’n Thabalchongba thupitak a um hi. Zia hun achun, khawpi sung mun chuamchuam ah Meitei community apat nungak-tangval tamtak chiakhawm in a lâmkhawm ua, Imphal East District sung ah um, Irilbung apat Band Party te’n Music a bawl ui. 2018 kumthak (Cheiraoba) matna’n Lamka ah mun 7 in Thabalchong bawl in a um a’, a masa pen in Khumujamba Meitei Leikai, zia zaw chun, Nghathal, Thingkangphai, Phailian, Mandop Leikai, Khuga Tampak leh Yaiphakol ban ah zani nitak ah Thengra Leirak ah bawl ah um hi’n a kigen hi.

NARPS/LBI, CCpur in Training Certificate piakdawna nei

Lamka, April 17 *(Nisin Thuhiltu)* : Natural Agro-Tech Research and Processing Service (NARPS)/Livelihood Business Incubator (LBI), Tuibong saina’ DIC Complex ah One Month Electric Wiring Training a nei uh zo in, tuni’n Certificate of Training Completion hawpdawna DIC Complex mun ma in a nei ui. Zia Certificate chu Dawnga, Supervisor, DIC/CCpur in trainee te kiang in piakdawna a nei a, Joma Neihsial, Programme Manager, NARPS/LBI, CCPur in training report piakna nei in, Pastor Sehlal, Co-ordinator, ECA - RDD in trainee te Exhortation speech leh Blessing a nei hi. Zia training chu March 12 - Arpil 12 sung ah um a hia, ECA - RDD in sponsor a bawl a hi. Training sung in trainee mi 16 te PS Kapliana Vaiphei, Instructor in ziltilna a nei hi. Hiatthei khat chu, NARPS/LBI, Churachandpur in a chiata kum 3 masang a pat a khan, Training chuam chuam - Mushroom, Spice, Electrical Wiring leh Carpentry training ti te a la pe zing a, sponsoring agency/organisation a um lai sia training a piak zing thei uh ti a hi. Chuleh tunai chaa khan le IGSSS leh Quest Alliance te sponsor bawlna nuai in Carpentry, Mushroom leh Spice training a la pebawk hi.

Public consultative meeting uap ding ah chial
Lamka, April 17 *(Nisin Thuhiltu)* : United Peoples’ Front (UPF) leh Kuki National Organization (KNO) in zing (April 18, 2018) zingkal lam dak 11:00 ah YPA Hall, Hiangtam Lamka ah public consultative meeting a neina ding uh tawh kisai in Calvin H, Convener leh TS Haokip, Co-Convener te’n News mangcha’n Civil Society Organization chuamchuam - Student Organization, Philanthropic Organization, Women Organization, Kochuam, Chief Association apat puitute leh lunglutna nei zosia pang ding in chialna a bawl ui. Public consultative meeting hun a chu, UPF/KNO in India Government leh Manipur Government tawh tripartite political talk a neizawm zelnau tawh kisai mipi kiang ah taklatna neikawm ah Identity issue tawh kisai chipchil tak ah genkhawmna um ding, puitu chuamchuam te a pat leh a chiakhawm mipi te a pat maban panlak dingdan leh ngaidan genkhawmna le um ding a hi.

Seilienmang , EM, ADC/CCpur in haina lekha pia
Lamka, April 17 *(Nisin Thuhiltu)* : Seilienmang, Executive Member (EM), Autonomous District Council, Churachandpur in a hina apat haina lekha, Khaipao Haokip, Chairman kiang ah tuni, April 17, 2018 in a pia’i. A haina ziak ahileh, kum 1 vel Chairman hina dinmun luata maleh, tuni chan ah MDC-te meeting khatvei le neipilo leh Executive Member (EM) khat a hina dawl ah Education in-charge ah kawi ah um himaleh, Chairman in ama dawidan bep ah vaihawm zing, Administration leh sum-le-pai thu ah transparency maintain lo, EM khat-le-ni thugen zui ah chia ahi ti’n a gen hi. Chun, Khaipao Haokip nuai a EM khat ah um sang in, member maimai ah um ding telzaw hi’n a gen hi. Dawtna khenkhat a dawnhuna ah, Chairman ding ah Ex-Chairman, Langkhanpau muang pen ahi’dan a gen a, ama’n Chairman a puak sung ah Community chuamchuam khenchuam neilo leh kituak tak ah siam/pua hi’n a gen a, chuleh tha cheng ah member te meeting khatvei-nivei neipi zing hi’n le a gen hi. Administration hi’n sum-le-pai hitaleh transparency maintain zing in a gen a, Council Sitting hun sin ale devotion neipi zing thei mi a hi ziak ah dawizaw hi’n a gen hi.

Kuva-che/na pua pickup -truck 2 mat ah um
Lamka, April 17 *(Nisin Thuhiltu)* : Forest Department, Southern Forest Division, Churachandpur in zani nitak in Kuva-che pua Pickup truck 2 a man a, Head Office, Imphal in a pedawk ui. Forest Department in thu a hiat dungzui ua, zani nitak dak 8:00 vel ah Buallian khua’n truck khat a man ua, zân sawtnung ah Muallum khua ah truck khat mankit in, kuva-che a kigawm ah bawm 35 pha hi’n a kigen hi. Manipur Governor in Manipur High Court thutanna dungzui a, April 13, 2018 ni a Manipur State sung a kuva-che puaktua lumlet ding khâpna ala siam dungzui ah Forest Department in a bawzui a hi.
Forest Department in District Police kithuapina ah zia mawpuakna hi a lak uh ahia, thuthak a um masia enzui ding uh hi’n Forest Department ah official khat in a gen hi. Kuva-che matdawna ding tawh kisai a chu, Churachandpur ah Forest Minister, Th. Shyam Kumar giakden hial in a kigen hi. Kuva-che ahileh flight (lenna) a puak ding ah kichûn le a um a, puaklut ding khâp ahi ziak ah lenna puak theilo ah um, zia te chu pickup truck mang ah Guwahati apat Mizoram haw ah puak ah um hi’n a driver te’n a gen ui. Kuva-che matdaw ah um sia chu tuni mama’n RO, Zamkhogin mapuina police venbitna nuai in Forest Department Head Office, Sanjenthong, Imphal puaktung in a um a, zia pat chu court tut hiding hi’n a kigen hi.

UPF/KNO Public Consultative Meeting uap chiat ding ah HI in hiatsak
Lamka, April 17 *(Nisin Thuhiltu)* : Hmar Inpui, General Headquarter in thusua a bawlna a chun, April 18, 2018 zingkal dak 11:00 ah YPA GHQ Hall, Hiangtam Lamka, UPF/KNO Public Consultative Meeting um ding chu Hmar Inpui, General Headquarter nuai ah affiliated body te’n ngai ngaipaw ah pangkim chiat ding in hiatsakna leh chialna a bawl hi. LRS Puruolte, Joint Secretary, (in-charge) Information & Media, Hmar Inpui, GHQ thusua in a taklatna a chun, January 17, 2018 ni ah thupukna umsa gual ah Nomenclature leh UPF/KNO in Territorial Council demand in kuama nam kawkchuam neilo, a sung ah cheng unau nam chuamchuam te’n a pawmthei chiat ding ah a min phuak ding ti a hidan gen in, a tam theipen ah UPF/KNO Public Consultative Meeting uap ding in a hiatsak hi.

LPG Ujjwala Diwas mang ding
Lamka, April 17 *(Nisin Thuhiltu)* : M/S Vangsei Indane Gramin Vitrak, K. Salbung in April 20, 2018 zingkal dak 11:00 in Kholmun Community Hall ah LPG Ujjwala Diwas mang ding a hi. Zia hun chu, Thangso Baite, MP, Lok Sabha; TN Haokip, MLA; James Doujapao Haokip, MCS, SDO Tuibong; Kuki Inpi Churachandpur, Kuki Chief Association, Churachandpur; KSO Churachandpur, KKL GHQ, KWU, Village Chiefs leh Social Worker hunkhawp ban ah IOCL apat Official te’n uap ding a hiu. LPG Ujjwala Diwas matna kawm ah beneficiary banghem zat te kiang ah LPG connection piakdawna um ding hi’n le a kigen hi.

Ex- Minister T Phungzathang Tonsing zi tha’n suang kisiam thak hawng

Lamka, April 17 *(Nisin Thuhiltu)* : Salem House, Hebron Veng, New Lamka ah famta Chhungi Tonsing thi champha kum 7 tin nitna leh tha’nsuang kisiamhawi thak hawnna tuni’n a um hi. Zia hun a chu, famta Chhungi ngainatu tamtak te chiakhawm in, H Pumshong Hangshing in hun matna a mapui a, famta Chhungi pawsal, Upa T Phungzathang Tonsing a pat thugenna le a um hi. Pastor H Jamkhanpau, local pawsal EBCC Hebron New Lamka in thamuanna thu gen in, siamhawi thak ah um famta Chhungi thansuang thiansua a nei a, a nutsia a insungmi te a ding in pauchap piakna a nei hi. Hun matzaw in Upa T Phungzathang mapuina, a ngaina tu a chiakhawm te’n famta Chhungi tha’n ah pakcha piakna a nei ua, Upa T Phungzathang in a zi famta Chhungi tha’n suang hawnna a chiakhawm mipi te chung ah kipakthu genna nei in, a chenna inn suksiat piak ah a um lai ah mi a ding ah bangma susia thei ding hilo, a zi tha’n suangdaw suksiat ah a um khak chu khawksa mama in a gen hi. Famta Chhungi Tonsing tha’n suang ahileh Manipur Assembly in a pass 3 Bill dawilo ziak ah kiphinna a um hun ah kiphinna nei te’n Churachandpur ah Tribal MLA te chenna inn a hal piak hun ua, suksiat ah um a hi.

Futsal Championship quarter final kipan
Lamka, April 17 *(Nisin Thuhiltu)* : Lamka Core in Futsal Championship 2018 a sai uh chu chiatha zing in, tuni (April 17, 2018) nitak dak 6:00 apat Quarter Final kihelna a kipan hi. Futsal Championship 2018 a chun, Team/club 60 a pang ua, pool match kihelna apat knock out round ah team 20 kaito in, knock out round a kichai tawh kitawn ah quarter final kai team/club 10 a um hi. Tuzan ah kipat zia kihelna chu media partner - Tulluo.tv, Hornbill Cable Network, Skynet leh Angles Vision te'n live coverage bawl zing ding a hiu.

Lelte Award 2018 sâng mi pathum te vaidawnna nei

Lamka, April 17 *(Nisin Thuhiltu)* : Chanmari YMA Hall, Aizawl, Mizoram ah a 27-veina Lelte Award 2018 hawpdaw ah a um hun ah Manipur CCpur district apat award sang laa thiam mi thum-te Churachandpur a hung tun kit tak uh tawh kitawn in tuni’n a vaidawnna a um hi. Mi pathum te vaidawnna hun chu, Young Paite Association (YPA) Hebron Veng unit in amapui a, YPA New Lamka Block leh Paite Zai-awi Pawl te’n Chibil Lelte Award 2018 sang numei laa thiam pathum te Buallian khua ah vaidawnna nei in, paak khi awksakna a nei ui. Buallian khua ah hun a matpi zaw nung un, gari banghem zat tawh Lamka khawpi sung a fan piu a, LV Lane New Lamka ah Vungmuanching-te Inn ah kipakthu genna a nei ui. Lelte Award 2018 sâng, CCpur district apat mi pathum te ahiuleh - Paite community a pat Ningmuanching of LV Lane New Lamka, Hmar community a pat Christina Roneikim Shakum of Khawmawi, Tuithaphai leh Kuki Community a pat Hoineilam Haokip of Pisgah te a hiu a, Lelte award dawng te ahiu leh Gospel ah Gospel Singer of the Year (Male) : Vanlalmalsawma (Sawmtea), Gospel Singer of the Year (Female): Zoramchhani, Album of the Year : Rimawi Ropui Ber (C.Lalzarmawia), Music Video of the Year : Ka hming a hria (Amtea), Choir of the Year : BCM Choir, Pavalai Zaipawl of the Year : BMP, ITI Veng hi uhi. Lengzem ah Singer of the Year (Male) : Israel Lalbiakrema, Singer of the Year (Female) : Feli Fanai, New Artiste of the Year : Kimkima, Music Video of the Year : Zoram Rohlu (PUC Various Artists), Album of the Year : Awmhar Lunglen (Lalenkawli Pautu), Traditional Singer of the Year : R. Lalhmangaihzuali (Zualbawihi), Song Composer of the Year : PL Engmawia, Musician of the Year : Lal K Sailo, Band of the Year : Avora Records leh Album of the Year (Ṭawng Dang Album Hla) : Ka vahvaih nak (Zualbawihi) te a hiu.

NT 18April2018b

HPC (D) cadre Rs 3 lakh chiat piak ah um

Aizawl, Apr. 17 *(Nisin Thuhiltu)* : Mizoram Government in Manipur pansa Hmar People’s Convention (Democratic) demand Sinlung Hills Council sukpitinna ding ah April 2 , 2018 ni ah State Guest House, Aizawl ah Memorandum of Settlement chung ah suai a kaipi nung ah HPC (D) Armed Cadres leh Council Members 114 te galvan tawh Mizoram Government khut ah 13 April 2018 ni ah a kipiaklut uh tawh kitawn in, HPC (D) cadre te chu rehabilitation package ah Rs 3 lakh chiat piak in a um ui. Mizoram Home department thusuak in a taklat dungzui in govt khut ah ki-surrendered cadre te chu a chenna khua chiat ua chiata ti a hi.

Police Recruitment Board siamthak ah um
Imphal, April 17 *(Nisin Thuhiltu)* : Manipur Governor min ah M. Yaiskul Meitei, Decretary (Home), Government of Manipur in thusua a bawlna a chun, Manipur Police Department nuai ahkum 2013 ah Police Constables (Male/Civil) ah sem ding mi 2000 lakna ding ah direct recruitment kibawlna chung ah a saitu Class III Departmental Promotion Committee (DPC)/Recruitment Board siam thak ah um a hidan taklang in, High Court’s thupukna leh order dated 5/4/2018, W.P.(C) No. 627 of 2016 (K. Jaycee Singh & others –vs- The State of Manipur & Others) dungzui ah kisiam thak hi’n le a taklang hi. Zia chu tawh kitawn in K radhashyam Singh, IPS, DIG (range-III) Manipur chu Chairman ah guat in a um a, P Manjit Singh, IPS, Commandant, 2nd Bn. MR, Imphal leh L Nandakumar Singh, MCS Joint Secretary (Edn-S), Govt of Manipur (Govt. Nominee) te chu Member ding ah guat in a um ui.Recruitment Board kisiamdawk thak te'n DPC process a zawthian ding uh ti a hi.

CM Secretariat in Vineet Joshi thakdawna nei

Imphal, April 17 *(Nisin Thuhiltu)* : Chief Minister’s Secretariat organised bawlna tuni’n Principal Secretary to Chief Minister & Principal Secretary (Planning, Finance, Education-S), Vineet Joshi thakna programme a um hi. Vineet Joshi, 1992-batch IAS officer, Manipur cadre ahileh kum 5 sung, Director General of National Testing Agency mawpuakna tuk ding ah tunaicha guat ah um a hia, mawpuakna thak piak ah um a zawp ding tawh kitawn ah thakdaw ah um a hi. Mr. Joshi thakdawna hun chu Chief Minister N. Biren Singh, Agriculture Minister V. Hangkhanlian, Chief Secretary Dr. J. Suresh Babu, Principal Secretary (Tourism) PK Singh, Media Advisor to Chief Minister Irengbam Arun, Secretary to Chief Minister N. Ashok Kumar te’n a uap ua, N. Biren Singh in a thugenna a chun, Joishi kipiakzawna leh panlakna te thupi mama a hidan gen in, State Government in pawimaw zing ding a hina chung ah kithuhiatpi zing hiding in a gen hi.

MPSC (Main) Exam 2016, answer scripts etthak hiding
Imphal, Apr. 17 *(Nisin Thuhiltu)* : Manipur Press Club, Imphal ah Keisam Kishan, Co-convenor Group of Aspirant Candidates in tuni thuthak lakhawm mite kiang ah a genna a chun, Supreme Court order dated 12/04/2018 dungzui ah MPSC (Main) Examination 2016 ah answer scripts chu a vel ah etthak hiding in a taklang a, enquiry committee in answer scripts etthakna nei ding hi’n a gen hi. Chun, enquiry committee in candidate 1068 te answer scripts hapta 6 sung ah vel etkitna a zawthian ding ti a hi.

Chief Secretary appointment thu ah kiphinna nei
Imphal, Apr. 17 *(Nisin Thuhiltu)* : Democratic Students’ Alliance of Manipur (DESAM) All Tribal Students’ Union Manipur (ATSUM) leh Apunba Ireipak Maheiroi Singlup (AIMS) in tuni’n protest rally nei in, state government in seniority dungzui ah Chief Secretary ding a guatlona chung in a lung-awilo thu a taklang ui. Chun, senior most native IAS officer te Chief Secretary ah appoint bawl ding phutna le a nei ua, Adimjati Complex, Chingmeirong ah Hill districts leh Valley district ah student te chiakhawm in zingkal lam dak 11.30 in THAU ground - North AOC leh Khuyathong in rally a chia ui. Rally a neizaw un, THAU Ground Thangmeiband in joint meeting le a nei ui.

User Rating: 0 / 5

Star InactiveStar InactiveStar InactiveStar InactiveStar Inactive

Chief Minister in “Meeyamgi Numit” ah complaints 600 tuam ngaithakna nei

Imphal, April 15 *(Nisin Thuhiltu)* : Ngaina gual in Chief Minister N. Biren Singh in “Meeyamgi Numit” a hi tawh kitawn in tuni’n Chief Minister’s Secretariat, Imphal ah zingkal lam dak 9:00 a pat nitak lam dak 1:00 tiang in ama kiang ah haksatna tut nuam te a kimupi hi. Mi 1500 tuam tea ma mimal tak ah kimupi in complaints 600 tuam ngaithakna a nei hi. Zia hun chu lemchang ah mang in Directorate of Information and Public Relations (DIPR) in mipi te muthei ding in state government sepdaw leh bawldaw um te public screening a bawl hi. Health Department leh JNIMS officials te chu Chief Minister kiang ah medical assistance, reimbursement leh health care tawh kisai ah haksatna tut te enzui ding ah duty sak in a um ua, Departments dang - Minority and Other Backward Classes, Social Welfare leh Police Departments te le haksatna Chief Minister kiang tut te kithuapi ding ah kawi in a um hi. Chief Minister’s Secretariat in Meeyamgi Numit ah Chief Minister kimupi nuam mipi te umna ding a chun, bangkim arrangements a bawl bawk a, refreshment tiang piak in a um ui. Chief Minister kimupi te lak ah BB Paul Mental Development Home (Special School), Mongshangei ah students leh teacher te’n Chief Minister kimupi in Government aided Institute ah Special School heidaw ding ah Cabinet in lemsakna a neina chung in kipakthu a gen ui. T. Anita Devi, Principal, BB Paul Mental Development Home (Special School) in a genna a chun student 175 te enrolled um a hidan gen in, school in vocational training leh co-curricular activity chuamchuam - carpentry, tailoring, yoga, dance leh music etc neipi sek in a gen hi’n le a gen hi.

Senapati Dist. HQ ah state Cabinet Meeting um ding
Imphal, April 15 *(Nisin Thuhiltu)* : Manipur ah BJP-led coalition Government in “Go to the Hills” ti thupi nei ah District Headquarter chuamchuam ah Cabinet Meeting a nei sek chu chiapi zawm zel in, 16th April, 2018 ah Chief Minister Nongthombam Biren Singh chairman hina nuai ah Senapati District Headquarters ah State Cabinet Meeting um ding a hi. Churachandpur district headquarters ah Jul 8, 2017 ni a khan Imphal pawlam ah Manipur Cabinet Meeting akinei masakna pen ding in Cabinet Meeting a la um a, zia nung a chun Chandel, Tamenglong in le a la um hi.

Chin State ah Khokhuon (Baite) Village melchikna suangphu hawng

Moreh, April 15 *(Nisin Thuhiltu)* : Suantak suan leh pak te lak ah a lianpen Ngengu suan - Boklua, Lamtam, Khawkuan, Tungnung , Nantal, Phuchil; Manipur gam ah cheng Khokuon chate Kholui Khosak melchikna ding in 13th April 2018 a khan, Myanmar Chin State, Khokhuon (Baite) Village in melchikna suangphu hawn in a um hi. Zia hun chu Holkhopao (Head of Khokhuon/Baite clan) in Chief Host hina tawh uap in, Jamkhomang, President, SPO (Suantak Peoples Organisation) , Saya Holkhomang (SPO Secretary), Jamthang (VPC President, Moreh), Saya Seiyang (VPC Secretary, Moreh) te'n khuallian hina tawh uap in suangphu hawnna a nei ua, Rev. William Khaitual (SRBA General Secretary in Pathian kiang in a latna a nei hi. Hiatthei khat chu, Vaiphei Peoples' Council, General Headquarter in geneological tree a chiapi dan ah Suantak in chapa 6 - Ngengu, Neilut, Hinnun, Nunzawng, Daitong leh Vanglok nei; Ngengu in chapa 5 -Buklua, Lamtam, Khokuon (Baite), Tunungnung, Nantal leh Phuchil (Phiamphu) nei ti a hia, amau lak a chu tu ah Baite kiti Khokuon suan leh pak te Khokhuon (Baite) Village a chu 1560-1660 sung ah a la cheng, zia chu a hiatzingna ding ah suangphu ah um hi’n a kigen hi.

Horticulture, Medicinal & Aromatic Plant Training zo

Lamka, April 15 *(Nisin Thuhiltu)* : D. Khuala Vaiphei, District Prohect Director, NERCORMP CCpur leh a team te’n achiata 12th -14th April 2018 sung ah Tuilaphai Cluster (12 April), Leijangphai Cluster (12 April) leh Sinzawl Cluster (12 April) ah Horticulture, Medicinal and Aromatic Plant training a nei uh chu a zo thiang ui. Zia Training chu D. Khuala Vaiphei in tukum 2018 a pat districts zosia Avocado, Soursop leh White Sanalwood te chiin/phu thei ding ah official proposal a piak, NERCORMP in official item a pang theita ding ah approval a bawl tawh kitawn ah Churachandpur District ah tukum introduce hita ding a hi ziak ah chiapi ah um a hi. NERCORMP CCpur panlakna chung a chun, khua chuam chuam ah mipi training ah pang te’n kipakthu a gen ua, Medicinal leh Aromatic Plant kiti amatna a la hethiam hilo hunsawtpi a pat ala chiing ah tuhun ah a ga nethei ta ding leh nekhawlna bailam mama ding a hidan a gen ui.

Paite Numei Pawl (PNP) vaipaw ding telna nei

Lamka, April 15 *(Nisin Thuhiltu)* : Young Paite Association (YPA), GHQ mapuina’n tuni nitaklam in YPA GHQ Office, Hiangtam Lamka ah Paite Numei Pawl (PNP) vaipaw ding kitêlna a um hi. Zia hun achun, YPA Block 3 in palai ding ah a sawl uh mi 12 te’n amau sung a vaipaw ding têlna a nei ua, President ding in Vungzahoih, Vice President - Ngaikhannem, Secretary - Manbiaklun, Assistant Secretar¬ - Muannou, Fianance Secretary - Mawi Vangluah leh Treasurer ding in Mary Donsonching a têlting ui. Member ding in Zamkhanching, Zenmanching, Manngaihkim, Liannem, Rose Mary, Chingneihlian, Lunching, Niankim, Niangngaihching, Chingnunhoih leh Mangmuankim guat in a um ui. Paite Numei Pawl ahi’leh YPA GHQ in a phûdaw ahi dungzui in, thusua ding zosia ah YPA GHQ Letterhead mang ding ahiu.

Gas apply bawl thei
Lamka, April 15 *(Nisin Thuhiltu)* : Pradhan Mantri Ujjwala Yojana (PMUY) scheme nuai ah Gas connection bawl nuam, SECC 2011 census ah min umkhalo numei kum 18 chunglam (BPL) sungkuan, ST, AAY & PMAY a hi ua leh Gas connection apply bawl ding a hi.

One Day Awareness Program on Poppy Plantation
Lamka, April 15 *(Nisin Thuhiltu)* : ST Chullouphai Community Hall ah tuni, April 15, 2018 nitak dak 1:00 in One Day Awareness Program on Poppy Plantation kiti a um hi. Lunkhomang Khongsai, MPS, Additional SP Churachandpur in Awareness Program hawndawna a nei a, Resource Person in ama leh George Munluo, Advocate a pang ua, Poppy Plantation kiti thilkhâm ahi ban ah, government Dan tawh kituak ah gawtna piakthei ahi’dan tawh kisai ziltîlna a nei ui. Resource Person, Lunkhomang in a genna ah, Poppy chingte tawh kinawktua ah, a lobawlna uh suksiatpiak ding ah kuan sek maleh, a lungthim nawplo zing hi’n a gen a, ziagual ah khua hausa leh mipi tawh awareness program a umthei hi, panlakna hawitak ahi’dan a gen hi. Poppy ching te’n school fee hapitak ah khang ahi ti’n suanlam siam maleu, zia thaichi chîn hi chawndan gual ah a chia theng khak ding lau-um ahi’dan a gen hi. Advocate Munluo in a gendan in, Section 8(f) NDPS nuai a Poppy chîng phallo leh a chîngtute kum 10-20 kikal suangkul tâng thei ahi ban ah, sum lakh 2 liauthei ahi’dan a gen a, chuleh, chîng phallo bep hilo ah, police ah report pelote le maw uh ahi’dan a gen hi. Mipite ngaidan lakkhawm ban ah dawtna tamtak genkhawmna nei zaw ah hun khak ahi.

Manipur Maoist students’ union te vauna bawl
Imphal, April 15 *(Nisin Thuhiltu)* : Manipur rebel group Maoist Communist Party’n tuni’n Manipur University Teachers’ Association (MUTA) , Manipur University Students’ Union leh Manipur University ah research scholars te University’s infrastructure construction a ding ah contract works buaipilo ding leh kikawi kang ding in hiatsakna leh vauna a bawl hi. Chun, rebel/arm group dang te le contract works chungthu ah teaching community te vaulau lo ding in chialna bawl hi. Maoist thusua in a taklatna a chun, tu ah hiatsakna kibawl chu last warning hita a hidan taklang kawm in MUSU leh MUTA movement demna a bawl a, contract works del student union/association suakta hi’n a gen hi.

PAL, CEO ding ah Francis Onkhohao Haokip kaisang

Lamka , April 15 *(Nisin Thuhiltu)* : Hyderabad-based Pragnya Advisors Private Limited (PAL), Chief Executive Officer (CEO) ding ah Mr. Francis Onkhohao Haokip S/o Peter Ngamkhothang Haokip,Chief of S.Haijang, Churachandpur guat ah a umna chung in, Kuki Students' Organisation (KSO), Churachandpur District in kipakpi thu a puang kawm in, a kukalna leh a nasepna a kipiakzaw ziak ah ziagual panmun chu changthei ah a um chu student tamtak te ding ah ettawn tak hi’n a taklang hi. Mr. Francis Onkhohao Haokip ahileh 2005 ah IIT-Delhi a pat B.Tech (Electrical Engineering) zo, 2008 ah IIM-Bangalore ah MBA zo, June 2010 ah Chartered Financial Analyst Institute, USA ah CFA Level 1 passed, IIM Bangalore ah PGDM (International Student Exchange, IESEG School of Management from France) a la zo a hi. NTPC, Delhi (2005-07) ah Manager, Corporation Finance Dept ah a sep nung ah Security Exchange Board of India (SEBI), Mumbai (2009-10) ah sem leh June 2010 ah Financial Analyst hina tawh Pragnya Advisors Pvt. ah sempan, tu ah Chief Executive Officer (CEO) ding ah kaisang a hi.

Komrem Students' Union in kipakpi
Lamka , April 15 *(Nisin Thuhiltu)* : Komrem Students' Union Imphal (KRSU-I) in Chungneijang @ 'Magnificent' Mary Kom in 21st Commonwealth Games, Gold Coast,Australia ah gold medal a lakna chung in kipakpi thu a puang a, a kipiakzaw leh a kukalna ziak ah gold medal la thei a hina chung ah khangthak, a biktak ah Komrem khangthak te’n ettawn tak leh tilkhotu hi’n a gen hi.

Gundung lui ah JCB mang ah nasep phal hilo: GRPC
Kangpokpi, Apr. 15 *(Nisin Thuhiltu)* : Gundung River Protection Committee (GRPC) in Gundung lui (river) ah JCB mang ah nasep thilbawl nei ding phal hilo a hidan taklang in, amang teitei a umlo leh action khautak lak hiding in a gen hi. Nehkam Kipgen, General Secretary, GRPC in a genna a chun, Gundung lui zul ah um khua-hausa te leh labourer te tawh August 13, 2017 ah joint meeting a nei hun ua, Gundung lui (river) ah JCB mang ah nasep thilbawl chawlsan ding ah lemsakna nei a hdian uh taklang in, JCB banah electric current /dynamo ah sanga mat le phal hilo in a gen a, committee hiatpina bei nasem thilbawl um theilo ding in a gen hi. Joint meeting thupukna duzngui ah dan lo gual tak ah nasem thilbawl a um leh Rs. 30,000/-liausak hiding in a gen hi.

Three Day Conference on Classical Language Status kipan

Imphal, April 15 *(Nisin Thuhiltu)* : State Guest House, Sanjenthong ah tuni’n Art & Culture Minister L. Jayantakumar Singh in Three Day Conference on Classical Language Status in respect of Manipuri Language kiti hawnna a nei hi. Chief guest Minister L. Jayantakumar Singh in a thugenna a chun, khawvel chiadan ah community zosia’n identities chiat venbit ding leh sukminthan ding dawi chiat a hidan gen in, Manipur mite’n pau leh ham kum lui mama te venbitna mawpuakna liantak nei in a gen hi. Hun matna uap Education Minister Th. Radheshyam Singh in a thugenna a chun, Meitei pau chu 8th Scheduled, Indian Constitution ah kipansakta a hidan gen in, Classical Dance leh Art & Culture te ziak ah khawvel mite hiat kihi ahih ti’n le a gen hi. Chuleh, Classical Languages lak ah Manipuri pansakna ding ah haksatna umlo ding hi’n a gen hi. Zia hun matna chu L. Saratchandra Sharma, language Activist leh Utam Singh, Director Art and Culture te’n le a uap ui.

Kum 40 nung ah Manipur mimang mudawk

Imphal, April 15 *(Nisin Thuhiltu)* : Manipur mi kum 40 sung a tunna hiatlo ah um Khomdram Gambhir chu police te’n tuni’n Mumbai in a mudawk ua, hapta kit leh Imphal ah a insungmite kiang tut hiding in a kigen hi. Police thusuak in a taklatna a chun, Khomdram Gambhir chu kum 7 sung Manipur rifles ah sem, a insungmite hiatsaklo ah kum 1978 a khah a inn uh nusia, tuni tiang a tunna hiatlo ah um ti a hi. Khomram Kulachandra naupa (younger brother) in police te kiang ah a genna a chun, Gambhir in inn a nutsia masang ah numei khat zi ah nei maleh tha 3 sung a kichen nung ua kikhen kit uh hi’n a gen a, a zi tawh a kikhenzaw nung uh tha 2 zaw ah a inn uh nusia’n a gen hi. A insung mite’n a hawl zing uh tawh kitawn ah Mizoram ah um a, hiat a hitawh kitawn ah a nu leh pa’n a va hawl ua leh mun dang ah a la kichawn dawk, zia a pat chu a tunna hiatlo ah um zing ti a hi. Khomdram Gambhir a kimudaw dan ahileh street photographer Firoze kiti'n video a lak, YouTube ah October 2017 ah upload a bawlna a pat hiatdaw thei ah um a hi.

User Rating: 0 / 5

Star InactiveStar InactiveStar InactiveStar InactiveStar Inactive

District Administration saina District Level ah “Ambedkar Jayanti” kimang; Minister V.Hangkhanlian in “Gram Swaraj Abhiyan” hawng

Lamka, April 14 *(Nisin Thuhiltu)* : District Administration saina’ tuni zingkallam dak 9:30 in DC office kiang ah um District Training Centre (DTC) ah Gram Swaraj Abhiyaan, District Level Celebration of “Ambedkar Jayanti” kiti Ambedkar pian champha hiat zingna mat in a um a, Chief Guest in V.Hangkhanlian, Minister (Agri/Vety.&AH.) a pang hi. Chief Guest in a thugenna a chun, Ambedkar kiti tu ah kimang India danbupi (constitution) siamdawna ding ah drafting committee chairman a hidan taklang in, Indian constitution “PA” (Father of Indian Constitution) ti ah um hi’n a gen a, Society sung ah social evil paithak a hitheina ding ah Baba Saheb Ambedkar panlakna taklang khawm in Ambebkar in kuama kal a nasemlo, ‘social evil’ dodalna nasatak ch chiapi hi’n a gen hi. Gamsung khantona ding ah lunggel hawitak nei Baba Saheb Ambedkar nungzui ah kalsuan ding leh khangsawnte a ding ah kisanna hawizaw sem a um theina ding banah society siamhawina ding ah lekhabu siamdawktu, ngaituana sautak leh khawtang siamhawina ding ah lekhabu hawitak tak ziktu hithei chiat ding ah panla ding in hun matna uap student leh khangthak te chialna a bawl hi. Chun, State Government in Chief Minister N Biren Singh mapuina nuai ah ‘Go to the Hills,’ ti a chiapi zing tak nung ah tu ah ‘Go to the Village’ mission chiapi ding ah kisaklawkna nasatak nei a hidan gen in, ‘May 1 ah Go to the Village’ mission hawn hiding in a gen hi.

Zia ah hun matna a chun, V.Hangkhanlian, Minister (Agri/Vety.&AH.) in Churachandpur district ah “Gram Swaraj Abhiyan” kiti 14th April -05th May, 2018 sung ah chiapi ding, “Sabka Sath, Sabka Gaon, Sabka Vikas” ti tangko kawm ah migenthei te panpina ding ah India government flagship pro-poor programmes 7 - Pradhan Mantri Ujjwala Yojana, Saubhagya, Ujala scheme, Pradhan Mantri Jan Dhan Yojana, Pradhan Mantri Jeevan Jyoti Bima Yojana, Pradhan Mantri Suraksha Bima Yojana leh Mission Indradhanush te a mu ding dawl in amutheina ding leh migenthei te dinmun kanzuina ding tawh kisai hawnna le a nei hi.

Hun mat sung in Shyamlal Poonia, IAS, DC/CCpur leh Ajay Arora, AC to DC, Churachandpur te’n le thugenna nei in Dr BR Ambedkar chanchin leh India a ding ah a panlakna a taklang ui. Hun matna chu Khaipao Haokip, Chairman, ADC, Ccpur; Paukhanlian, EM, ADC/Ccpur; Rakesh Balwal, SP/Ccpur leh Churachandpur DLO te’n le a uap ua, Bijapur ah Prime Minister Narendra Modi in a thugenna live telecast kibawl chu a chiakhawm DLO te’n a en ui.

A langkhatlam in “Ambedkar Jayanti” matna kawm a chun, District Social Welfare Office, Ccpur in CMST, NSAP leh Old age pension tawh kisai in stall a hawng a, District sung ah SDO zosia’n Aadhaar enrolment camps bawl in, ST certificates le issue a bawl ui.

"Aw Lalpa La Lemguatna Hi”- Vol. II Album hawng

Kangvai, April, 14 *(Nisin Thuhiltu)* : Kangvai Community Hall ah tuni, 14th April 2018 zingkal lam dak 11:30 in Famta Rev. V. S Liankhawpau (1917-1975) Mrs Lamtinkhawl (1927-1999), Seltinthang (1945-1981) Mrs Nemttinniang (1945-2014) leh Mr K Pyar 1976-1998) te hiatzingna ding ah kisiam, "Aw LALPA LA LEMGUATNA HI”- Vol. II kiti Gospel Music Video Album hawn in a um hi. T. Thangzalam Haokip @ TT Haokip, MLA Henglep, A/C leh Chairman, Hill Areas Committee (HAC) in Chief Guest hina tawh Album hawnna a nei a, Rev. B Lala, Bialtu Pastor in Pathian kiang ah Album latna a nei hi. Zia hun matna chu P Vaiphei (IAS), Principal Secretary, Govt. of Manipur leh Mrs Ngaineiniang, (Representing Kangvai Village Chief) te’n le uap in thugenna a nei ui. "Aw LALPA LA LEMGUATNA HI”- Vol. II ahileh Mr & Mrs Pauchungnung Vaiphei, Associate Prof., CCpur Govt. College & Vhinboi Liapvung in Produce a bawl, K Chung Vaiphei, Director hina nuai ah shooting kibawl, a sung ah laa 15 um a hi. Artist te ahiuleh- Tracy Ngaihching, Mary Vaiphei, C. Lalvenhawi, Murphy Mang & Manglianlal te a hiu.

Secretary (Health), Govt of Manipur in Dist. Hospital pha

Lamka, April 14 *(Nisin Thuhiltu)* : Sumant Singh IAS, Secretary (Health), Govt of Manipur in tuni’n Churachandpur District Hospital ah CM gi Hakshelgi Tengbang scheme chiapi ah a umna tawh kisai etthâkna a nei hi. Dr Kim Simte, CMO/CCpur; Zenngaihlun, DPM/NHM, CCpur; Dr Jiri Pudaite, DNO; Dr Jamthianlal, DFWO leh Dr Nengkhanmang, Dy Supdt, District Hospital ban ah Augustine J Khongsai, SDPO, Thanlon in a kithuapi ui. Zia hun achun, CMHT card nei ah damlo Damdawi-In a etkawl ah umte le ve’na leh holimpina a nei a, CMHT card Holder khenkhat in Damdawi-In ah damdawi umlote pharmacy dang ah amau sum ah damdawi a kichawk uh ahidan a hil ziak un, tunung ah CMHT card nei, damlo etkawl a umte’n amau sum sên sak talo ding in hiatsakna a bawl a, a sênsa cheng ule Reimburse bawl ding in a hiatsak hi.

CMO/CCpur kiang a Sumant Singh in a genna a chun, Janaushadhi a damdawi umlote a list hawitak ah bawl a, Pharmacy lian 3 leh 4 tawh kizawp ah, Janaushadhi a damdawi umlote zia mun a chun District Hospital in RKS fund mang ah la sek ding in a hiatsak a, damdawi kilate chu CMO leh Medical Superintendent in Red Seal mang ah certified a bawl sek ding ahi ti’n le hiatsakna a bawl hi. RKS fund ah District Hospital in kumkhat ah 2-vei Installment ah Lakh 10 musek ahi ti’n a gen a, tulaitak ah RKS fund umsa kimangzota ahi’dan hiatsak ahi dungzui in, Dr K Rajo Director /State Mission Director of the National Health Mission, phone in a kihopi ngal a, kâlkit seppatni chan ah District Hospital, CCpur ah RKS fund ding a account ua Rs 5 Lakh thunlut ngal ding in a hiatsak a, District Hospital a CMHT mangte lak ah District Hospital hawipen ahidan a gen hi.

Thyroid test a thawn ah bawl
Lamka, April 14 *(Nisin Thuhiltu)* : Rengkai Road ah um Dr Chinkholal Thangsing in a etkawl Centre for Hope in India gamsung ah Pharmaceutical Company lianpen Abott Company tawh kithua in tuni’n damlo 150 val te Thyroid test a thawn in a bawl piak ui. Mi 150 val Thyroid test bawlna ding ah thisan lakkhawm ah um te chu tuni mama’n Abott Company in Mumbai ah laboratory ah test ding in a pawsuk ua, a result ahileh hapta kit Kiginni leh suak ding hi’n a kigen hi. Centre for Hope in Lamka ah Thyroid a thawn a test a bawl uh a khatveina hinalai in a kigen a, himaleh tunung ah thasin leh khatvei zel a thawn ah test bawl sek ding un Dr Chinkholal Thangsing in a gen hi. Tuni ah Thyroid test bawl piak ah um te chu private clinic ah test bawl sak ding hileu mi khat chung ah Rs 750 vel seng ding uh ti a hi. Himaleh Mumbai leh Lamka kikal ah a result kithawttuana ding leh thisan puakvelna ding ah Rs 100 lak ah um, zia chu a thawn tawh kibang in a gen hi. A langkhatlam ah zia gual test bawl piak ah a umna chung ua chun damlo tamtak te’n kipak um a sakthu’u a gen ui.

Lok Adalat ah case 34 sukfel piak

Lamka, April 14 *(Nisin Thuhiltu)* : Manipur State Legal Service Authority in thupiak abawl dungzui in District Legal Service Authority in tuni zingkal dak 11:30 apat in CJM Court, Tuibong ah Lok Adalat a bawl hi. Zia hun a chun, Bank tawh kisai ah buaina nei sukven piak thei dinmun ah um nalai mi banghem zat te buaina sukven piak un a kigen hi. Tuni ah Lok Adalat um hunsung ah Case a sai uh chu Vijaya Bank ah bat nei mi 16 leh Canara Bank a bat nei mi 91 a kigawm ah mi 107 a hiu a, zia te lak a chun case 34 a sukfel piak ua, case sukfel ah um te a pat in Rs 89,700 a mukit sak ua, Rs 10,77,200 ahileh thakit May tiang ah a dit thian ding un case a sukfel piak ui.

Joint Fellowship nei
Lamka, April 14 *(Nisin Thuhiltu)* : Evangelical Baptist Convention, Lamka South Division ah Division Missions Committee (DMC) leh Tualsung Baptist Missions Committee te’n tuni zingkallam dak 10:00 apat in EBCC Vengnuam, New Lamka ah Joint Fellowship a nei ui. 1st Session ah hun matna Upa VL Biaktluang, Member DMC in amapui a, Upa L.Velson, Member, DMC in pauchapna tawh hun patna nei in, Upa S.Sawnzapum, Vice Chairman, DMC in vaidawnna thu a gen a, khawtin te a pat report piakna um in, Pumshong Hangshing, Secretary, DMC in DMC Year Plan luidawna a nei hi.

Second Session ah Upa N.Vungzathang, Chairman, DMC, EBC Lamka South Division in program amapui a, Upa T.Paukhansiam, Missions Coordinator, EBC in ‘Tulai tawh kituak a Mission nasep dingdan ’ ti thupi ah nei in thugenna a nei hi. Rev. V.Nenglian, DS, EBC Lamka South Division mapuina discussion hun a um a, Upa G.Tualzakap, Member, DMC in hunkhakna leh ankuang latna nei in, a chiakhawm mipi te’n annekkhawmna a nei ui. Hiatthei khat chu, Division Missions Committee, EBC Lamka South Division in kum 2018-2019 budget ding in, muna lam ah Mission field project 4,40,000 a kawi a, Bialvena ah 30,000, khawmpi ah 20,000, Division Aid ah 3,00,000 leh a dangdang ah 10,000 a bithiat hi. Budget zosia chu a vek ah a kigawm in Lakh 8 a ting hi.

KKP D. Phailian Pastor Bial in Blood Donation Camp bawl
Lamka, April 14 *(Nisin Thuhiltu)* : Mizoram Synod: Manipur Area, D Phailian Pastor bial a Khristian Khanglai Pawl (KKP) in tuni, April 14, 2018 zingkal dak 11:30 apat in Blood Bank, District Hospital ah Blood Donation Camp a bawl ui. Blood Donation Camp ahileh ST Satboi, Bial Leader, KKP D. Phailian Pastor Bial mapuina’ bawl ahia, zia hun achun, mi 40 chiakhawm lak ah numei 4 leh pasal 24 in damlona ziak ah thisan pawimawte a ding in thisan uh unit 1 chiat, a thawn in Blood Bank ah mat ding in a piau hi. Thisan pete nek ding in Thangneu, Jubilee Branch in nekthei a tuak a, Rev. Joseph Lalnunmawia, Bialtu Pastor leh Ph. Thianneilal, Pro Pastor te’n le zia hun chu a uap ui. Blood Donation Camp tawh kisai H. Thanglallem, Assistant Secretary in a genna ah, KKP D. Phailian Pastor Bial in kumbul apat vai a sawm uh, tuni sem buting thei uh ahi’dan a gen a, minphatna dawi ziak hilo in, damlo thisan pawimaw leh midangte hinna hukhinna ding ah khanglai mikiphal te’n pan a lak uh a hi’dan a gen hi. Zia hun ah chiakhawm cheng leh thisan petute chung in kipakthu a gen a, khanglaite midang panpithei zel di’n Pathian in malzawl ding in a dawisak thu a gen hi. KKP, Mizoram Presbyterian Church Synod (MPCS), D. Phailian Pastor Bial nuai ah Branch 4 a um a- Jubilee Branch, Compound Veng; Bible Hill Branch, Rengkai; Centenary Branch, Kashmir Veng leh Bethany Branch, Gouchinkhup Veng ahi.

Ui neitu kipuang ding ah hiatsakna bawl
Lamka, April 14 *(Nisin Thuhiltu)* : Tuni nitaklam dak 4 vel in, Vengnuam South a um Dr Ding Tombing chênna In kiang ah Ui (Dog) vawm khat in lamzawt lai Khamgoulal of Goukhenpau Road, Vengnuam South keng a pet a, a Ui ahi’leh miphachuamngai khenkhat in a man ua, lampi kiang in a khit ui. Ui tawh kisai YPA, New Lamka Block in thupuan ala bawl dan in, ui neitu umlo gual ah tha’zak ah umte kua hem in a tha’lup khak leh a neitu’n bangma gen theilo ding ahi’dan thupuan ala bawlsa ahia, tuni ah mi pettu, Ui neitu a kinthei lam ah kipuang ding in a taklang hi.

ATWU in pauchap khawmna nei ding
Lamka, April 14 *(Nisin Thuhiltu)* : All Tribal Women Union (ATWU) in tuni thupuan a bawl dan in, gam-le-nam tawh kisai tunung sawtlo ah consultative meeting umding ahi’ziak in, a hung tung ding April 16, 2018 nitak dak 6 apat zan khawvak ah ATWU pauchappawlte mapuina, Zion PCI Biak-In, Sahei Road, Vengnuam ah pauchapna nei ding ahiu. Zia ding achun, kochuam pawlchuam khen ahipua’, pauchap pawl leh mimal lunglutna nei zosia pang chiat ding in chialna a bawl hi.

YPA Gamphajol Unit hawnna nei

Lamka, April 14 *(Nisin Thuhiltu)* : Young Paite Association (YPA) ghq in tuni zingkal dak 11 in Gamphajol hausapa Letsei Guite chenna inn ah YPA Gamphajol Unit hawnna nei hi. Zia hun matna chu H Paulian Secretary, Rehabilitation & Relief YPA Lamka Block in amapui a, T Khailianthang, President YPA Ghq in Unit hawnna leh thugenna a nei hi. Sumpi Hanghal, President YPA Lamka Block in Unit thak lawiupa te kitiamsakna nei in, TK Mang Guite in van chuamchuam piakdawna a nei a, Thangzangam Guite, President YPA gamphajol Unit in thugenna leh a cabinet member te introduce bawlna a bawl nei hi.YPA Gamphajol Unit interim vaipaw ding ah guat ah um te a hiuleh - President: Thangzangam Guite; Secretary: Seitinlal; Finance secy: Thangsei Guite; Treasurer: Ngaineilam; Member: Thangminlal Guite; Val-Upa: Upa Jakhothang leh Adviser: Letsei Guite te a hiu.

Paite Zai-Awi Pawl (PZP) in kipakpithu puang
Lamka, April 14 *(Nisin Thuhiltu)* : Paite Zai-Awi Pawl (PZP) in tuni ah kipakpina thupuan a bawl uh kimu dungzui in, Mizoram ah Lelte Weekly News in kum cheng ah a sai sek uh, The 27th Mizoram Music Award, Lelte Award 2018 kiti, April 13, 2018 nitak ah puandaw in a um a, Chibil Award (Paite Community) apat Ningmuanching d/o G Chinkhenkham of Hebron Veng, New Lamka ban ah Hoineilam Haokip (Kuki Community) leh Christina Roneikim Shakum (Hmar community) te’n zia award a dawnna chung ua PZP in kipakpi thu a puang hi. Maban hun lemchang masa pen ah Paite community sung apat Award dawngtu, Ningmuanching kipakpina hun matpi gua uh hi’n le PZP thusuak in a gen a, nam chawisang thei zel ding Lamka apat award dawngte kiang ah PZP in dawisakthu le a puang hi.

Shining Star in champion hina la

Lamka, April 14 *(Nisin Thuhiltu)* : Federation Club Of Zion (FC Zion) Zion Veng, New Lamka saina’ a chiata, April 6,2018 a pat kipan Men's Open Volley Ball Tournament chu chiazawm zel in Group Match cheng zawthiang ahi nung in, tuni nitaklam dak 3:30 in final mat a um hi. Zia hun a chun, Shining Star leh United Kuki Sporting Club te a kihel ua, Shining Star Club in point 24/25 ah zawna chang in, kipakman Rs. 10,000 leh Certificate a dawng a, UKSC in kipakman Rs. 7,000 leh Certificate a dawng hi. Final kihelna chu Chief Guest hina tawh T. Singneng in a uap hi.

ZSF leh Zillai GHQ in kipakpi
Lamka, April 14 *(Nisin Thuhiltu)* : Zomi Students Federation (ZSF), GHQ in Australia ah a chiatha zing Commonwealth Games, 2018 ah MC Mary Kom in boxing ah Gold medal a lak chu kipakpi mama a hidan taklang in, MC Mary Kom chu mi tamtak tîlkhotu ahi ti’n a gen hi. Zia ban achun, Assam Governor in April 9, 2018 ah Assam Human Rights Commission (AHRC), Chairperson ding ah Justice Tinlianthang Vaiphei @ Justice T. Vaiphei (Retired Chief Justice of Tripura High Court) a guatna chung ah kipakpithu taklang in, T. Vaiphei chu society hawina ding ah nasatak ah panlatu leh student-te a ding bîk ah hinkhua ah mi ettawntâk ahi ti’n a taklang hi. Zomi sung ah ziagual chanmun chang masapen ahi’ziak in, ki-atpi um hi’n a gen hi. A langkhatlam ah Zillai General Headquarters (Vaiphei Students Association) inle kipakpina thusua bawl in, Assam Human Rights Commission, Chairman ding ah Justice Tinlianthang Vaiphei, Retired Chief Justice of Tripura High Court guat ah a um chu kipakpi mama in a gen hi.

CM in Pherzawl District ah Ginger Festival uap ding

Lamka, April 14 *(Nisin Thuhiltu)* : Ginger Festival Organizing Committee, Pherzawl District te'n tuni nitaklam dak 3:00 in Rengkai HSA Complex ah Ginger Festival ding tawh kisai in press conference a ko ua, zia hun achun, Ginger Festival in a tup leh ngimte taklatna a nei ui. Lalringum Inbuon, Chairman, Ginger Festival Organizing Committee in a genna ah, Manipur ah um ngai nailo, Parbung Village, Pherzawl District ah April 20-21, 2018 sung ah The First State Level Ginger Festival cum Business Summit kiti um ding ahia, zia hun achun, Manipur Chief Ministe, N. Biren Singh leh Cabinet Minister ban ah MLA khenkhat pang thei ding uh hi’n a gen hi. Ginger Festival in a tup leh ngim ahi’leh, tanggam a lobawl, a diak ah kivakna ding ah Thîng (Ginger) lei bawltute a ding ah, a zuakdawna lam tu sang ah a hawizawk leh kinepna tâk zaw a umtheina ding tupna ziak ah festival mat ding a vaisawm uh hi’n a gen a, Central leh State Govt. in Thînglei bawl a kivakte haksatna a hiatpi semna ding uh tupna hi’n le a gen hi. Manipur Chief Minister, N. Biren Singh in 'Go to the Hill leh Village' mission a taksua banah Manipur State sung ah kilkawchawng pen ah um, Parbung khua a Ginger Festival matna a uap ding a kinep thu a gen a, ahin April 16, 2018 ah thuchian kihe ding hi’n a gen hi. Pherzawl District ah mi 80 percent in Thînglei bawl in kivakna’n a mang ua, a tangpi’n Thîng 1000-2000 metric ton kikal piangdawkzo hi’n a gen ua, himaleh a zuakdawna rate/price a dukdaklo ziak in lobawlmi tamtak in kum khat a nasepna uh kinepna chan tungzo ngailo hi’n a gen ui. Tulai tak in Pherzawl district ah Thîng ser(kg) khat ah Rs. 8 vel man hi'n a kigen hi. Program ahi’leh, April 20, 2018 zinglam dak 10:30 Session-I ah Festival hawnna program umding ahia, Chief Guest in Manipur Chief Minister, N.Biren Singh hiding ahi. Chief Host inVungzagin Valte, MLA, Thanlon & Chairman MTDC; Functional President in Th. Shyam Kumar, Minister, Horticulture hiding ahi. Program sung in Ginger Product exhibition, competition ban ah cultural program, cultural dance leh a dangdang umding ahi. April 21, 2018 zingkal lam ah Chief Guest, Th. Bishwajit Singh, Minister ( PWD, Rd & Panchayati Raj, IDPR, Industries & Com, Adm. Reforms); Guest of Honour in T. T. Haokip, Chairman, HAC; Functional President in V. Hangkhanlian, Minister. (Agri. Vety & AH) leh Chief Host in Dr. Chaltonlien Amo, MLA Tipaimukh hiding ahiu. Program sung in Seminar-cum-workshop le umding ahi. Festival sung ah Laltuoklien (pistol puokruk), Mami Sinate, Lawmnakim Hrangate, Eljay Ngaite, Christina Shakum, Hossanmawi Songate leh Ginger Choir te’n zaila awi ding ahiu.

Meithal lem mang ah sum demand mi 2 kiman

Lamka, April 14 *(Nisin Thuhiltu)* : Tangmual khaw kiang ah um, Immanuel khawpi ah Immanuael Khopi hausapu, Chinsuonpau kiang ah meithal lêm mang ah sum Rs. 10,000 demand bawl mi 2-te, tuni'n khawsung mipin a man ua, CCpur Police khut in a pedawk ui. Mat ah umte ahiu leh, Thenkhongam Mate s/o Henkholun Mate of D. Leikot leh Soilengen s/o Khupkhanpao of D. Leikot ahiu a, CCpur Police te'n mi 2-te tuni nitak in District Hospital ah medical check-up a bawlsak ua, custody ah kawi ding in a pui ui.

Zillai Delhi in One Day Sports Meet nei

New Delhi, April 14 *(Nisin Thuhiltu)* : Zillai (Vaiphei Students’ Association) Delhi Region in tuni’n CSS Ground, Chanakyapuri ah One Day Sports Meet 2018 a nei hi. Zia hun a chun, Group item ah Football, Volleyball, Tug of War, Relay Race chuleh Individual Item Naupang leh piting a category ah khen in ki kigualsiakna chuam chuam a bawl ui.

Nitak lam ah Prize Distribution ceremony nei in, Zillai Ex-President leh Zillai Delhi Advisor Thanglemlian te’n Group item prize Cup leh individual item ah Gold leh Silver Medal piakdawna a nei ui. Naupang sports uap zosia chu consolation Prize dan ah Tiffin khat chiat present bawl in a um ui.

Swachhata Pakhwada 2018 campaign
Lamka, April 14 *(Nisin Thuhiltu)* : District sung ah thianthona ding tawh kisai ah Swachhata pakhwada 2018 kiti, April 2, 2018 ah District Hospital ah hawndaw ahi dungzui in, District Health Society (DHS), CCpur saina’ mun chuamchuam ah thianthona tawh kisai in Swachhata pakhwada 2018 campaign nei in a um hi. Zia dungzui achun, April 13 nitak in Saidan khua Community Hall ah Swachhata Pakhwada 2018 nei in a um a, Dr Kim simte, CMO CCpur, Dr. Jire L. Pudaite, Medical Officer, Dr Chingnunsiam, DNO, Ccpur leh Deepa Balwal te’n Saidan khawsung mipi 150 val te ki-etkawlna mun - PHC, CHC, PHSC leh District Hospital ban ah mani taksa leh Inkim-Inkiang suk thiangtho ding dan tawh ziltîlna a piau a, step 7 mang ah khut sawpthiang ding dan le ziltîlna a nei ui. Swachhata Pakhwada awareness ahi’leh April 4 apat April 9 sung in facilities, community leh school based ah nei in a um hi.

Thangso Baite, MP in Jubilee Suang hawng

Lamka, April 14 *(Nisin Thuhiltu)* : K. Khomunnuam khua leh Biak-In kum 25 tinna, Silver Jubilee lawpna, tuni April 14, 2018 zingkal dak 10:30 in K. Khomunnuam khua’n a um hi. Zia hun chu, Thangso Baite, MP, Outer Manipur in Chief Guest hina tawh a uap a, TN Haokip, MLA leh President, MPCC (I) in Guest of Honor hina tawh uap in, D. Khaipao Haokip, Chairman, ADCC in Functional President hina tawh a uap ban ah, James Doujapao Haokip, MCS, SDO Tuibong in Special Guest hina tawh a uap hi. Zingkal dak 10:30 in Jubilee Suang hawnna a um a, Doujaneh Tuboi mapuina’n pengkul mutna a nei ui. Chief Guest in Jubilee Suang hawnna nei in, telchuam mi 25 in Jubilee dak khetna a nei ua, Rev. Father Genna Vaiphei in Jubilee Suang latna a nei hi. Biak-In sung ah hun matna ah, Jangkam Kipgen in vaidawnna thu a gen a, Th. Thangboi, Chief of K. Khomunnom apat thugenna um in, Guest of Honor in Souvenir hawndawna a nei hi. Guest-te apat thugenna le a um a, Seingam Haokip, Chairman, Jubilee Committee in huntawp a kipakthu gen in, Rev. Father Genna Vaiphei, Secretary, Diocessan, Churachandpur District in pauchapna’n hun a khak hi. Chief Guest, Thangso in a thugenna a chun, tuhun ah khua tamtak in Silver Jubilee lawm zolo a tam lai ua, khaw hausa mapuina ah ziagual ah kituak tak ah lawpkhawm kiti hi thilnuam ahi atia, khawsung a khantona a um theina ding ah kuama dang mawpuak hilo in, eima’n mawpuakna la a, mipi a pangkhawm phatleh khantona um ahi ti’n a gen hi. Chuleh, K. Khomunnop mipite kithutuak dan uh ettawntâk a sak thu a gen hi.

Governor in Moirang ah 74th Anniversary of Flag Hoisting Day matna mapui

Imphal, April 14 *(Nisin Thuhiltu)* : Indian National Army (INA), Martyr’s Memorial Complex, Moirang ah tuni’n 74th Anniversary of Flag Hoisting Day mat in a um a, zia hun a chun Manipur Governor Dr. Najma Heptulla in India puan-lap kaipalna nei in, freedom fighter Netaji Subhash Chandra Bose mapuina nuai ah India a ding ah gal a la do, thina tuak galhangsan te zana piakna hun amapui hi. Dr. Najma Heptulla in a thugenna a chun, Manipur ah sanamahism sakhua zui te ding ah kumthak “Cheiraoba” ni tawh kituak a hitawh kitawn in state mipi te“Cheiraoba” wish bawl in, a chiatha zing Commonwealth Games, Australia ah MC Mary Kom in women’s 48 kg boxing ah gold medal a lak chu kipakpi mama in a taklang hi. British vaihawmkhumna a pat India mipi te zalen theina ding ah Netaji Subhash Chandra Bose mapuina I.N.A te’n Manipur ah panlakna a nei uh chu khangthu tepte thei ah um, ki at-um leh kiletsakpi kham a hidan gen in, Purna Swaraj, Quit India, ‘Do or Die’ leh ‘Delhi Chalo’ ti te thupi nei ah India sepai te panlakna chu ettawn tak a hidan a gen hi.

Zia hun matna chu Minister, Art & Culture, L Jayantakumar Singh; MLA Moirang & Govt. Chip Whip, P. Sharatchandra Singh; Commissioner, Art & Culture,Transport & Power, M Lakshmikumar Singh; Member of Lok Sabha , Prahlad Singh Patel lehNetaji Subhash Chandra Bose suapi chate lak ah khat Chandra Kumar Bose te’n le uap in thugenna a nei ui.

Hiatthei khat chu freedom fighter Netaji Subhash Chandra Bose mapuina nuai ah India National Army te’n British Rule sukbeina suklatna ding ah 14th April,1944 ah I.NA. Martyr’s Memorial Complex, Moirang ah India puanlap khaidawna a la nei uh a hi.

Society siamhawina ding ah panlak khawmna pawimaw: CM

Imphal, April 14 *(Nisin Thuhiltu)* : District Administrations of Imphal East leh Imphal West saina’ tuni’n Sangai Hall, Hotel Imphal ah Samajik Nyaya Diwas (Ambedkar Jayanti) mat in a um a, zia hun chu Chief Minister N. Biren Singh in Chief Guest hina tawh a uap hi. Chief Minister in a thugenna a chun, society dinmun siamhawina ding ah panlak khawm chiat pawimaw a hidan gen in, khantona ding leh masawnna ding ah state government panlakna um te chu kithuapi zing ding in mipi te a chial hi.

State Government’s ‘Go to Village’ mission in social harmony siamhawi ding, migenthei te ding ah government scheme chuamchuam um te thezaktu leh mipi hiatthiam saktu a pan ding a kinepthu gen in, government officials te chu titak zet ah panla chiat ding in chialna a bawl a, Central Government’s ‘Gram Swaraj Abhiyan’ leh State Government’s ‘Go to Village’ mission a lawtin ding dawi hi’n a taklang hi. Dr. Ambedkar in India a ding ah a panlakna tawh kisai Chief Minister in a genna a chun, Indian Constitution siamdawna ding ah architect a hidan gen in, caste system leh nam niam te kawichuamna dodaltu hi’n a gen hi.

Hun matna uap, RD & PR Minister Th. Biswajit in a thugenna a chun, Central Government sponsored schemes chuamchuam - Saubhagya, Ujala Scheme, Pradhan Mantra Jan Dhan Yojana, Pradhan Mantri Jeevan Jyoti Bima Yojana, Pradhan Mantri Suraksha Bima Yojana, Mission Indradhanush leh Beti Bachao Beti Padhao etc te a hiding gual tak ah phatchuampi theina ding ah panlakna um zing a hidan gen in, April 14 - May 5, 2018 sung ah, ‘Sabka Sath, Sabka Gaon, Sabka Vikas’ ti thupi nei ah Gram Swaraj Abhiyan chiapi hiding, zia hun a chu
Deputy Commissioner leh a nuai ah a seppi te’n grassroots level ah mipi te kimupi ah a haksatnau leh a pawimaw teu banah government scheme a hiding gual tak ah a tun leh tunlona tawh kisai enzui ding uh hin a gen hi.

Zia hun matna chu, Chief Secretary Dr. J. Suresh Babu, Wangoi AC MLA leh Vice Chairman of Manipur Infrastructure Development Agency (MIDA) O. Lukhoi, Saitu AC MLA Ngamthang Haokip leh Khurai AC MLA L. Susindro, high ranking officials te’n le a uap ua, Chief Minister N. Biren Singh mapuina’n Dr. Ambedkar zana piakna a nei ui.

Minister N. Kayisii in Senapati District ah Gram Swaraj Abhiyan hawng

Imphal, April 14 *(Nisin Thuhiltu)* : Senapati District Head Quarters ah tuni’n Samajik Nyaya Diwas (Social Justice Day) mat in a um a, zia hun chu N. Kayisii, Minister of Tribal Affairs & Hills and Fisheries in Chief Guest hina tawh uap in, Gram Swaraj Abhiyan hawnna a nei hi. Minister Kayisii in a thugenna a chun, nam niam Dalit Dr.Ambedkar in gamsung a ding ah a panlakna thupi mama ahidan taklang in, Dr.Ambedkar in chu Republic of India a ding ah Law Minister masapen leh Constitution kituptak siamdawktu hi’n a gen hi. Zia ah hun matna a chun, Kayisii in District Social Welfare Office, Deputy Commissioner’s Office, UIDAI leh Banks in a bawl stall chuamchuam kihawng te etthakna nei in, a kisaipi departmental official te leh mipi te holimna a neipi a hi. Zia hun matna chu Athem Muivah, IAS, Deputy Commissioner, Senapati leh S.P. Peter Khrasi, IRS (Retd.), President Mao Council te’n le a uap ui.

Smokeless Village ding ah khua 573 kiteldawk
Imphal, April 14 *(Nisin Thuhiltu)* : Ministry of Petroleum and Natural Gas - Sapka Saath Sabka Gaoo ka Vikas Sammelan thupiak dungzui leh Ministry of Rural Development panlakna nuai ah 20th April, 2018 leh Gram Swaraj Abhiyan matna kawm ah Manipur ah “Ujjwala Diwas” kiti nei hiding in Stephen Chinkhanson Guite, Manager - LPG Sales, Imphal, Silchar Area office, IOC in thusua a bawlna a chu a taklang hi. Chun, Manipur ah khua 573 te chu meikhu pawtlona khua (Smokeless Village) sua ding ah identified kibawl, khua 573 a chu 100% Domestic LPG provision/conversion chiapi hiding 5th May 2018 tiang sukpitinna ding ah panlakna neihiding in a gen hi.

Khamthei case ah retired DSP khat mat ah um

Imphal, April 14 *(Nisin Thuhiltu)* : Retired Deputy Superintendent of Police, Abdul Latif, 63 of Dewlaland Kabow Leikai chu Imphal West, Narcotics Affairs of Border (NAB) in zanitak a khan khamthei ah sumkawl veina tawh kisai in ama’n hi.

Khamthei ah sumkawlvei mi khat Manzil Ahmed Laskar kiti mat ah a um nung ah khamthei ah sumkawl veina kigawl ah retired Deputy Superintendent of Police kigawl ah hiat a hi tawh kitawn ah mat ah um hin a kigen hi. Manzil Ahmed ahileh Kaimai, Tousem, Tamenglong ah um 23 Assam Rifles te’n April 10 a khah ‘World is Yours’ (WY) tablets, 11.34 kg (1 lakh tablets) tawh a la mat uh a hi. Zia gual ah khamthei tamtak matdaw ah a umnatawh kisai chu NAB in khualna a nei zing tawh kitawn ah Abdul Latif le mat ah um hi’n T. Brinda, deputy SP, NAB in a gen hi.

Senapati district HQ ah April 16, 2018 leh cabinet meeting um ding

Kakching, April 14 *(Nisin Thuhiltu)* : District Administration Kakching saina Kakching Municipal Council (KMC) conference hall ah tuni’n Samajik Nyaya Diwas (Social Justice Day) mat in a um a, zia hun chu MAHUD & Town Planning Minister Thounaojam Shyamkumar in khuallian hina tawh a uap hi.

Minister Thounaojam Shyamkumar in a thugenna a chun, Imphal Municipal Corporation leh Municipal Councils chuamchuam ah post ah um te lua tu ding lakna ding tawh kisai cabinet meeting ah genkhawm hiding tunung sawtlo ah Municipal Councils staff sukpun hiding in a gen hi.

Chun, April 16, 2018 leh Senapati district headquarters ah Chief Minister chairman hina nuai ah cabinet meeting um ding hi’n a gen a, zia hun chuleh Municipal Councils nuai ah post awng te lua ding lakna ding tawh kisai ah thupukna siam hiding in a gen hi. Kakching Women’s Market sakna ding tawh kisai ah demand um te dinmun a genna a chun No.1, Kakching Bazaar ah market sakna ding a vaima theipen ah entha ding hi’n a gen hi.

‘Samajik Nyaya Diwas’ matna tawh kisai a genna a chun, Father of Indian Constitution, Dr. B.R. Ambedkar panlakna chu ettawn tak a hidan gen in, ama nungzui ah welfare activity chuamchuam chiapi ding pawimaw in a gen a, Dr Ambedkar’s birth anniversary chu thilpha bawl nawimang thei leh hiatmil thei a hilo dan kilang in a gen hi.

Zia ah hun matna chu, Dr. Y. Radheshyam, Chairman, MANIDCO & MANITRON, MLA Hiyanglam A/C; N. Sanjitkumar Singh, Chairperson, KMC; Neilenthang Telien, Deputy Commissioner, Kakching district; Smt. Y. Victoria, SP Kakching, elected members, State Government official te’n le a uap ui.

Page 1 of 23