UPDATES:

Nisin Thuhiltu

Nisin Thuhiltu - 24 April 2017

Nisin Thuhiltu - 24 April 2017 | via Zogam.com

Career Planing Program Session leh Certificate piakdawna nei

Lamka, April 23: A chiata tarik 20th April ni a khan District Co-Operative Office, Tuibuong ah Indo Global Social Service Society (IGSSS) Churachandpur leh Quest Alliance saina' Career Planing Program Session a um a, zia hun a chun, Mr Kaplianlal Thangluai, Assistant Manager, IGSSS in "If not you, who? If not now, when? ti thupi mang in nungak tangval mi 65 chiakhawm te ziltilna leh chona a nei hi. Chun, National Agrotech Research and Processing Society (NARPS) leh IGSSS kithua in Khanglai mi 29 (first batch) mani kito del theina ding thiamzilna- Mushroom Cultivatioin and Carpentry- (Skills Training) a la chai ta te kiang in certificate piakdawna a um a, NARPS Program Coordinator Mr Paulalzom Neihsial leh NARPS Chairman Joseph Khaute intekna leh mapuina' Micro Small and Medieum Entreprise (MSME, Govt of India) in issued a bawl Certificate te hawpdaw in a um hi. Certificate te chu Quest Alliance (NGO) a pat palai Ms Debolina, Mr Augustine Ngatuba leh Mr Sinil te'n piakdawna a nei ua, IGSS a pat Mr Kaplianlal Thangluai leh Mr Thongminllun Haokip te'n Certificate hawpdawna hun chu a uap ui.

nt24april2017

LYF in Diamond Jubilee mang zo

Lamka, April 23: Lutheran Youth Fellowship (LYF) General Headquarter, Manipur Evangelical Lutheran Church (MELC) a kiphudaw nung kum 60 tinna a lawp chu tuni'n a nipi ni'n a mang ui. Sunma dak 10:00 in Shesei Zou, Chairman, ADC Chandel in Diamond Jubilee MELA/Khutthiam Thilbawl hawndawna a nei a, Rev TC Khup in Pathian' kiang ah a latna nei in, telchuam ah um, khawtang leh kochuam lawiupa te'n MELA etna nei in, vanman bithiat umlo in khuthiam thilbawl suklat ah um te ki ngam dan dan ah chawk thei ding in, a kawi ui. Sunma dak 10:30 in LYF kum 60 tin hiat zingna ding ah suangphu, Diamond Jubilee Suang, (Retired) chu Rev Dr Hangminthang, Bishop MELC, Lutheran Youth Fellowship in a hawnna leh Pathian kiang ah a latna a nei hi. Zia zaw a chun, telchuam ah um te'n Jubilee Dak khetna 60-vei a nei ui. Biakna hun a hileh Zamlunmang Zou@Pupu Zou in amapui a, Upa Thangkhokam, Deputy Moderator, MELC in pauchapna tawh hun hawnna nei in, Upa S Zamkhanpau, General Secretary, LYF GHQ in lawiupa ala mualliam ta te suunna amapui a, (Retired) Rev. Dr Hangminthang, Bishop MELC in Jubilee Message gen in, P. Tunzamang, Chairman, LYF, GHQ in Jubilee Thupuan puandawna a nei hi. Chun, Rev. Nengkhanlal, Moreh in pauchapna tawh hun matna a khak hi. Nitak kikhawp hun ah Rev Dr Ginkhanmung, DS Lamka in "Here I am, Send me O Lord" ti thupi mang in thugenna a nei a, Diamond Jubilee competition chuam chuam ah prize hawpna a um hi. Upa V Lawmsang, Moderator MELC in LYF Diamond Jubilee matna a khak hi.

nt24april2017b

Division Naupang Khawmpi neidi
Lamka, April 23: Baptist Children Department (BCD), Lamka South Division in a hung tung ding June 30 a pat July 2, 2017 sung Gospel Centenary Hall, New Lamka ah Primary a pat Senior tiang pantheina ding Division Naupang Khawmpi thupi tak nei ding a hi. Zia ding tawh kisai a chun, kisak lawkna a chiatha zing a, Division lawiupa te'n khawtin ah BCD lawiupa te kiang ah Division Khawmpi bituk, naupang khat ah Rs 10/- zel leh lawiupa khat ah Rs 50/- bithiat bawl in, Khawmpi hun ah Division sung ah BCD um zosia Category 3 (A, B, C) a khen in, kidemna chuam chuam a umna ding in panlakna a nei zing ui.

 

Asia ah Biak-Inn lian pen latna nei di

Zunheboto, April 23: Asia a ding ah Biak-Inn lian pen hi ding ah kigen, Nagaland a um Sumi Baptist Church Zunheboto (SBCZ) kum 10 ting tavang lut ah sak a hi zaw in hawndaw thei ding in a um tai. Sumi Baptist Church, Zunheboto a hileh tuipi level a pat 1864.9 m ah va sangto a hia, Biak-Inn area chu 23, 73,476 Sq.ft a hi zo hi. Biak-Inn hi a dung 203 ft, a vai 153 ft leh a sang dan 166ft a hia, zia hi inn sawng 8 nei building tawh kibang phial a hi. Mi 8,500 dawl ding ah kisiam SBCZ sung a hin damlo, mo te van theng na ding, chaksang, office, conference, training, baptisma chansakna ding leh a dang dang bawl thei na ding ah pindan chuam chuam kawi in a um a, a kigawm ah pindan 27 a um hi. Kum ting tavang lut ah kisa zia Biak-Inn lopi tak sakna hin Rs. 36 crore a lut hi. Hiatthei khat chu, mihiam 15,000 val umna Zunheboto town ah zia bep hi Baptist biak-inn umsun a hi.

nt24april2017c

Aizawl ah inn-sawng khat chim

Lamka, April 23: Hunthar Veng, Vaivakawn, Chanmari West, Aizawl ah gua-zuk ziak ah lei/leisiat a chip ziak in innsawng khat a tawltha suk hi. A kihiatdan in, B Sairengpuii inn-thang ah Rovi inn, RCC Building sawng thum a sang, hun sawttak a pat a dengdel ziak ah lua ngamlo ah um chu tuni sunma dak 11:45 vel ah chimtha a hi. Inn a chipthak tawh kitawn ah a kiangnai tuam ah inn um te ding ah le lauthawn um in a kigen a, inn chipna van nen te sukthianna nasep vengsung mipi te'n nei un le a kigen hi.

nt24april2017d

Governor leh Chief Minister mapuina Khongjom Day kimang

Lamka, April 23: Manipur Governor Dr. Najma Heptulla leh Chief Minister N. Biren Singh mapuina'n tuni'n Battle of Khongjom (1891) ah thina a la tuak martyr te hiatzingna ding ah kumsin leh kimang sek Khongjom Day mat in a um hi. State-level function chu Khongjom War Memorial Complex, Khebaching, Thoubal district ah mat in a um a, Governor Dr. Najma Heptulla, Chief Minister N. Biren Singh, Manipur Legislative Assembly Speaker Y Khemchand, Deputy Chief Minister Y. Joykumar, Ministers, legislator, bureaucrat, civil leh police official te banah mipi tamtak te'n Khongjom War Memorial,Khebaching ah zana piakna leh pakcha piakna a nei ui. Khongjom river ah Tarpan piakna a le a um a, martyr te zanna suklatna leh chawisanna'n Manipur Rifles contingent te'n guard of honour, general salute, reverse arms, sounding of last post, two minutes' silence, slope arms leh order arms piakna a nei ua, Khongjom War Memorial, Paona Brajabashi's memorial leh Khongjom river ah hun matna a ki chai in, Chief Minister N. Biren Singh in Delhi ah meeting uap ding a hi tawh kitawn in hun matna mun a nusia a, Governor Dr. Najma Heptulla leh Deputy Chief Minister Yumnam Joykumar te'n memorial complex ah main function chu chief guest leh functional president hina tawh a uap ui. Dr. Najma Heptulla in a thugenna a chun, martyr leh freedom fighter te hiatzingna ding ah memorial siam ding pawimaw in a gen a, gal hangsan te suunna leh zana piakna chu tu hun ah khangthak te'n poverty, illiteracy, khanto lona, kikhen chuamna leh society ah dawi umlo thil te a dodalzaw tak uh leh lul diak ding hin a gen hi. Manipur sepai te'n colonial British sepai te hangsan tak ah ala do dan uh leh panlakna ala neidan teu taklatna nei in Khongjom war heroee te'n galvan hawitak tak chawi British sepai te gam sung humbitna ding ah a la do uh chu thupi mama a hidan a gen hi. Gal hangsan thina la tuak te ziak ah tuhun ahzalen tak ah khawsa thei ihiu ti'n le a gen a, amau panlakna chu tuhun ah khangthak te'n a phalam ah zui ding pawimaw in a gen hi. Deputy Chief Minister Y. Joykumar in a thugenna a chun, Khongjom War a umna ziak chu lengpa chate kituaklona ziak ah piang in a gen a, zia gualma a chu tuhun ah kipumkhatna a umlo a, ki chuam kawina a um zing leh thil dawi umlo tak tak piang zing thei ding hin a gen a, kipumkhat ah panlakna a um ding amau a pat zildaw thei a hidan taklang kawm in Khongjom Day ah famta gal hangsan te hiatzingna hun mat ah a um tawh kitawn ah sepai hiatphaklo thina a la tuak te le geldaw ding pawimaw in a gen hi.

nt24april2017e

MLA Ad. Ashab Uddin in AJWJU demand sukpitin piak ding ah thutiam bawl

Jiribam April 23: All Jiribam Working Joumalists' Union (AJWJU) in tuni'n Jiribam Assembly Constituency MLA leh Parliamentary Secretary (MOBC) Ad. Ashab Uddin kimupi in demand point 4 kizikna memorandum piakna a nei ua, zia hun a chun, All Jiribam Working Joumalists' Union (AJWJU) communication facility hawizaw sem a um theina ding ah demand a bawl teu chu sukpitin piak ding a hidan gen in thutiam a bawl hi. AJWJU demand te a hileh Jiribam district ah District lnfonnation Officer (DIO) kawi ding, DDK lmphal a ding ah high frequency modulation umsak ding, Radio Station chuam kawi ding, AJWJU Office sakna ding plot piak ding ti a hi. AJWJU member te tawh MLA Ashab Uddin in kihona a nei hun un, zia ah demand te chu Chief Minister N Biren kiang tut hiding leh demand sukpitin theina ding ah panlak theina chan ah panla ding hin a gen hi. MLA Ashab Uddin kimupi AJWJU member te chu President Ng. Biswajit Singh, Vice President- A Lukhoi, Secy - Genstson Rongmei, Finance Secy, Md. Mahin Laskar leh Auditor M. Romeo te a hiu.

nt24april2017f

Bomb sukpuak ah um
Imphal, April 23: Kua a hi hiatlo pawl khat in Konthoujam Mamang, Kabul Village ah Chingeilui Kabuimi (52) w/o Changon Kabui chenna inn ah tusun dak 12:00 in hand grenade khat a seplut ua, himaleh bomb puak ziak ah thina tuak leh liamna tuak hiat a hi puai. Bomb puakna tawh kinai cha um inn gate ahileh mun khenkhat bomb hal leng in a sepsiai. Zia gual thiltung chu a um tawh kitawn in Patsoi Police te'n bomb puakna mun del in thil umdan suizuina a nei ngal ua himaleh kua te'n bang ziak ah chenna huang sung ah hand grenade a sukpuak uh a hem ti hiat chian a hi puai.

Kakching ah War Memorial sak hiding: Arts & Culture Minister
Imphal, April 23: Anglo Manipuri War, 1891 ah Kakching Manao Ching, Kakching district ah thina a la tuak Manipuri war heroes te hiatzingna ding ah war memorial siamdaw hiding a hidan tuni Khongjom Day matna uap Arts & Culture Minister L. Jayentakumar in a hi. Health and Family Welfare, CADA, Law and Legislative Affairs mawpuakna le tuk, L. Jayentakumar in khanglui te'n gam leh gua venbitna ding ah panlakna a nei teu chu thupi mama leh galvan hawi tak tak chawi British sepai te thagum ah thitiang ah a la do a hidan uh taklang kawm in Wangkhei Meiraba ah War Memorial leh museum kithua sak hiding in a gen hi. Zia hun matnachu Mayanglambam Gourachandra Singh, Founder Director of the Peoples' Museum Kakching, Mayanglambam Rameshwor Singh, President of the BJP Kakching district leh Sh. Shyamjai President, BJP Kakching Mandal te'n le a uap ui.

Gate 1, playground 1, building 1 ah School pani um

Imphal, April 23: Manipur Education Minister Th. Radheshyam in state sung ah quality education a um theina ding ah panlak hiding a hidan tangko zing maleh tak sua tak tak a hi diam ti a gen lawk haksa mama hi. Govemment servant khenkhat in diklo tak ah nasep a neinau tuni'n suklat in a um a, zia chu ahileh Council of Higher Secondary School (COHSEM) in diklotak ah affiliation a pawm piak- school pani gate 1 kikawp, campus 1 kikawp a hi. lmphal Times reporter in Thoubal Wangma Taba, Thoubal District ah building khat, playground khat banah entry gate khat umna signboard pani The Fancier Higher Secondary School, Thoubal kiti leh New Era Higher Secondary School Thoubal kiti kitak khawm a mu tawh kitawn ah thil umdan a kan zui tawh kitawn ah COHSEM in guideline kal ah affiliation a piak a hidan hiatdaw ah um a hi. The Fancier Higher Secondary School,Thoubal chu 2004 ah kiphutdawk, affiliation No. 1/96/96-HSC(Vol.lll)2004/05 a hia, school thak Era Higher Secondary School Thoubal kiti chu a hileh tukum 2017-18 academic session ah class kipan ding ti a hi. Campus khat, building khat sung ah school pani a umkhawm chu banggual guideline tawh kituak ah umsak a hi diam ti hiat a hipua, school lui a umsa ah thuneitu te'n school thak a umna ding ah objection bangma a neilo uh chu ngaitua kham tak a ting hi. Chuleh, khualna kituptak umlo ah COHSEM in affiliation pia a hidan le muthei in a um a, ziagual ah Manipur ah education system a chia zing leh quality education kiti chu gamla mama nalai ding in a kilang hi.

Nisin Thuhiltu - 21 April 2017

Nisin Thuhiltu - 21 April 2017 | via Zogam.com
Source: http://zogam.com/news/172-nisin-thuhiltu/3803-nisin-thuhiltu-21-april-2017.html


Centre in Manipur ah Tribal Welfare a ding ah Rs 22.6 crore sanction: Union Minister Jual Oram

Imphal, April 20: Union Minister for Tribal Affairs Jual Oram in tuni’n Chandel District a pat District kisiam dawk thak Tengnoupal District ah BJP foundation day celebration a uap a, ama’n a thugenna a chun, 2016-17 fiscal year sung ah Manipur ah Tribal Welfare leh Developmental Programme chiapina ding ah Centre in Rs 22.6 crore sanction bawl a hidan puang in, zia sum te chu Hill area ah market-shed sakna, sericulture infrastructure siamhawina, skill development umtheina ding panlakna leh hospitals siamthakna mat hiding in a gen a, Centre ah BJP mapui NDA government in gamsung ah bailam tak ah tun phaklona tanggam te ah development nasep chiapi ding ngaikhawk mama a hidan a gen hi. Prime Minister Narendra Modi leh a cabinet minister te’n India ah District 707 um te lak ah District 300 chuan suakta a hidan le a gen a, Centre ah BJP mapui NDA government in kum 3 tinna a mat tiang ah gam sung ah District zosia chuan suak ding a hidan uh taklang in, May 26, 2017 a pat January 26, 2018 sung chu kum 3 tinna ah mat hiding in a gen hi. State Assembly election result dungzui ah BJP vaihawm theina ding ah a umna chung in mipi te kiang in kipakthu genna le a nei a, mipi te lungtup mualsua theina ding ah state government thak in panla zing ding a hidan a gen in, Prime Minister Narendra Modi in District mipi te kiholimpi ding leh grass root level ah development a um theina ding ah a lo theilo ah pan a lak ding pawimaw a hidan a gen zing tawh kitawn ah Tengnoupal District pha a hidan a gen hi. Chun, District a phakna ziak pipen chu district mipi te tawh holim khawm ding leh a demand uh leh khantona a um theina ding ah panlak ding dawina ziak hin a gen hi. Zia hun matna a chun, Central sponsored programme-Jan Dhan Yojana, Pradhan Mantri Ujjwala Yojana (PMUY), clean India Mission tawh kisai ah panlakna um te le taklatna a nei a, Kuki Chiefs’ Association, Tengnoupal district in DRDA office a chuam ah sak ding, Tengnoupal leh Moreh siamhawina ding ah special package piak ding, Tengnoupal district ah infrastructure siamhawi ding ti te panna, memorandum piak uh le sukpitin a hitheina ding ah panla ding hin a gen hi.

 

 

Ph. D degree muthak

Lamka, April 20: Ms Grace Kim Khaute d/o Gin Khan Chin @ GK Chin, IP&TAFS, Financial Adviser, NEC & Buangi in 18th April 2017 ni a khan Department of Education, Mizoram University nuai in Doctor of Philosophy, (Ph.D) degree a mu thak hi. Ama Thesis a hileh “Constructivist Approach to Teaching -Learning; Knowledge, Attitude and Practices of Elementary School Teachers in Mizoram” ti a hia, Prof. B. B Mishra guide bawlna nuai ah (Ph.D) mu a hi.

 

Tribal Movement ni 600 tinna nit ding

Lamka, April 20: Joint Action Committee Against Anti-Tribal Bills (JAC-AATB) in Tribal Movement ni 600 tinna nit/mat ah a umna ding tawh kisai in thusua a bawl a, zia dungzui a chu, Manipur Congress Government in Anti-Tribal Bills 3 a passed ziak ah Thingtangmi te’n ei leh ei kivaihawmna ding phutna nei ah kiphinna a chiapi chu April 22, 2017 leh ni 600 tingta ding a hidan a taklang hi. Tribal Martyr-te lak ah luang 8 te’n tuni tiang ah kinawptuana leh thupi tak ah vui ah a um ding uh ngakzing nalai a hina chung ua Thingtangmi te kiphinna ni 600 hiatzingna ding ah Joint Action Committee Against Anti-Tribal Bills (JAC-AATB) in Tribal Movement kipatdawna mun Lamka, Salpha Pumbuk ah April 22 sunma dak 11:00 a pat Mipi’n Suunna leh Anngawl pauchap khawmna nei ding ti a hi. Zia hun matna a chu Pastor MC Pau Khan Tuang in pauchapna tawh hun hawnna nei ding a hia, Tribal Martyr-te zana piakna um ding leh H Mangchinkhup, Chief Convener, JAC in keynote address bawl ding, Rev V Khamvum, Principal, Grace Bible College in 600th Day thucha genna nei ding a hi. Chuleh, Pauthianmuang, Lecturer, Grace Bible College in ‘Mass Fasting Prayer’ mapui ding, Tribal Martyr-te za (respect) etsakna zia hun matsung a chu business establishment, dukan/dawr leh education institutuion zosia kikhawk ding leh lampi ah gari taisak hilo ding in JAC-AATB thusuak in a taklang a, himaleh Press & Media, Electricity, Medical, Airport Pickup leh Drop, program guanggalsa, a chiatha zing exam um te huamkhalo ding in a taklang hi. Chun, zia gual guanggalna um te chu mipi te’n zui chiat ding ah chialna bawlkawm in Tribal Movement ni 600 tin mat hun ah dawi umlo buaina a tunlona ding ah panla chiat ding le mipi te chialna a bawl hi.

 

Tutha April tiang ah Malaria vei mudaw thak neilo

Lamka, April 20: Malaria Department, Churachandpur in tutha April 15, 2016 tiang ah Malaria vei mudaw thak neilo a hidan a taklang hi. Malaria vei hiding ah muanmaw Department in Malaria Clinic leh Testing Centre chuam chuam ah thisan sample 532 etthakna a neina’, Positive leh Plasmodiaum Falciparum (PF) mudaw umlo a hidan SMO, Regional Health & Family Welfare, Imphal leh Director, Health Services, Government of Manipur ah report a piakna a chun Malaria Department, Churachandpur in a taklang hi.

 

CCI Coordinator ah sem ding kidawi

Lamka, April 20: Centre for Community Initiative (CCI), Nehru Marg in Vocational Rehabilitation Unit (VRU) ah sem ding Coordinator khat la ding a hi. Lunglutna nei te’n Office kai hunsung suma dak 10:30 a pat sunnung dak 4:00 kikal ah April 28, 2017 tiang ah CCI Administrative Office, Nehru Marg ah CV leh Passport khat tawh kidawtna lekha piaklut thei ding ti a hi. Chuleh, Coordinator Post ah sem ding chu thiamna lam ah a niampen ah Graduate hiding thalaw Rs 5,000/- hi ding a hi

 

Police team in Lampi pam ah van zuak te nawdawk

Lamka, April 20: Tedim Road zul ah Footpath chung ah meh leh thil chuam chuam zuak ah chu-te tuni, April 20, 2017 in Police Team khat in Drive bawl in in a naw dawk ui. Drive hun ah Additional SP mapuina’ police team in Sielmat lei a pat Tedim Road zui in, lampi tawh kinai tak ah van zuak tamna New Bazaar area tiang ah Footpath chung ah van zuak te nawdawk in tuban a zuak kit a um ua leh Action khauhtak lak hiding in thuhilna le a nei ui. Drive ahileh Lamka khawsung Smart City ah siamdaw ding tupna chiapi ah um hin a kigen a, Lampi tawh kinai talua van zuak um te ziak ahTraffic a buai sek banah a et le kilawmlo a hina chung ah ziagual panlakna chu um hin le a kigen hi.

 

2-Day National Seminar zo thiang

Lamka, April 20: Rayburn College Auditorium, New Lamka ah zani April 19, 2017 zingkal lam dak 9:30 ah ni 2 sung um ding 2-Day National Seminar on Forest for Sustainable Development in Manipur kiti hawn ah um chu chiatha zawm in tuni’n a zo thiang ui. Tuni’n Seminar hun session II ah khen in a um a, session masa dak 9:30 a pat 12:00 chan, Room 1 ah Dr. Thathang Vaiphei in a mapui a, Room 2 ah Dr. Zothanchhingi Khiangte in seminar a mapui hi. Zia zaw a chun, Room 1 ah Rev. Dr. Khen P. Tombing, Lalhriatchhungi, Dr. Seilenkap Haokip, Dr. Lianboi Vaiphei, Dr. Ksh Premchandra Singh leh K. Thangliankhup te’n thupi chuam chuam mang in ziltilna hun a mang ua, Room 2 ah Prof. Salam Irene, Chinmuanthang Guite, Khamsuanmung Tombing, IFS, Dr. Prahlad Basumatary, Prof. D. Kuolie leh K. Vungzamawi te’n ziltilna hun a mapui ui. Second Session ah Room 1 ah Dr. Ksh. Premchandra Singh, Dr. David J. Baite, S. Kamminlun Vaiphei leh Paukhankhual Tonsing te’n ziltilna hun a nei ua, Room 2 ah Prof. D. Kuolie, Dr. Lalzagou Neihsial, Dr. Danney Chara leh Partakson te’n thupi chuam chuam mang in ziltilna hun a nei ui. Zia 2-Day National Seminar chu V. Hangkhanlian, Minister (Agriculture, Veterinary & Animal Husbandary) in Chief Guest hina tawh uap ah zani a hawn a hi.

 

PCI in PCI Day 2017 mang

Lamka, April 20: Presbyterian Church in India (Reformed) PCI (R) in kum 33 tinna, PCI Day 2017 matna tuni, April 20, 2017 in Mualkoi Presbyterian Church in a nei hi. PCI Day matna chu Rev. T. Liankholal, Coordinator (Missions) in a hawng a, Rev. H. Chinthiansong, Coordinator (Ministries), Elder T. Thangzakhup, Founder Member in PCI Day tawh kisai taklatna nei in,  Elder Langkhanpau Guite, Moderator, General Assembly leh Rev. M. Khamlianmang, PYF Coordinator te a pat thugenna a um hi. Elder T. Thangzakhup in PCI (R) kochuam leh PCI Day tawh kisai a genna a chun, kum 1910 ah I gam ah Pathian thupha hunglut pan in a gen a, “The North-East India General Mission” (NEIG Mission) nuai ah thingtangmi te um khawm vek, Presbytery 5 kikhen, Simtum Presbytery chu Evangelical Convention Church (ECC tu ah EBC) ah kisang in , ECC a pat PCI (R) phutdaw ah um kit in a gen a, Presbyterian Church in India (Reformed) kochuam chu mimal leh ki tuaklona ziak ah piangdawk hizawlo ah NEIG Mission nuai ah Reformed gindan chiapi nawpna ki phutdawk a hidan a gen hi. Presbyterian Church in India (Reformed) a hileh Presbytery 4 a kikhen a, Lamka Presbytary nuai ah Biakinn 13, South Lamka Presbytery nuai ah Biakinn 7, Singngat Presbytery nuai ah Biakinn 12, Thanlon Presbytery nuai ah Biakinn 9 a um a, a pumpi ah Biakinn 90 vel um ti a hi. City Church Delhi leh Bangalore ah le um, Meitei Mission Field leh Tedim Synod Mission Field nei a, Kochuam inn kuan 2,000 vel a pat member 10,000 vel um ti le a hi. PCI Day tuzan kikhawp hun in Rev. Khen P. Tombing, Chief Coordinator in Pathian’ thutak genna a nei hi.

 

Tonic Sol-fa Workshop chiatha zing

Lamka, April 20: Gilead Tlang, Kawnpui ah zani’n Tonic Sol-fa Workshop a la kipan a, April 19-22 sung um ding zia workshop a hileh Evangelical Organization Church (EOC), ECCI pumpi huap ah EOC Ministerial Board in a sai a hia, zani, April 19, 2017 zan ah Pastor S.L. Minlun Neihsial, Local Pastor, Central Church (EOC), Hill Town in a hawnna a la nei a hi. Zia workshop a hin khua chuam chuam a pat lunglutna nei hunkhawp pang uh hi’n a kigen hi.

 

CM Secretariat identity card issue zosia cancel

Imphal, April 20: Secretary to Chief Minister, N. Ashok Kumar in tuni thusua a bawlna a chun, Chief Minister’s Secretariat in issued a bawl identity cards zosia chu cancelled bawl ah um a hidan a taklang a, zia chu tawh kitawn in Chief Minister’s Secretariat in issued a bawl identity card chawikha zosia’n a piaklut ding uh pawimaw a hidan a taklang hi. Chuleh, Chief Minister Secretariat in issued a bawl chawi ding dawl te a ding ah fresh identity card a thak ah issued hiding in le a taklang hi.

 

12th Civil Services Day mat hiding

Imphal, April 20: Conference Hall, Secretariat South Block, Imphal ah 21st April ,2017 zingkal lam dak 10:30 a pat 12th Civil Services Day mat hiding a hi. Zia hun chu Manipur Chief Minister Nongthombam Biren Singh leh Th. Biswajit Singh, Minister PWD/RD & PR/Textile, Com. & Industries/power/AR & Traning/IPR te’n Chief Guest leh Functional President hina tawh uap ding a hiu.

 

Govt schools ah masanglai teaching system a um pawimaw: Dy CM

Imphal, April 20: Manipur Deputy Chief Minister Yumnam Joykumar in tuni’n Langol, Imphal West ah Wangdei Primary School sakna ding in foundation suangphuna a nei hi. Ama’n a thugenna a chun, government school te ah masang ah teaching system umsa te chiapi thak ding pawimaw a hidan a gen a, masang ah Government Schools te ah teaching hawi mama leh homework, class work leh weekly examinations te regular tak ah chiapi hisek maleh tu modern hun ah ziagual chu um ngai talo in a gen hi. Masang ah Government school ah kai te’n competitive examination ah position lua zing un le a gen a, zia chu teaching system hawi ziak hin a gen hi. Chuleh, tuhun ah tuition culture leh private schools ngaisanna chu ngaikhawk mama hin a gen a, student te kingakna thei tak tak ding ah learning method umlo in a gen hi. Chun, Sarva Siksha abhiyan (SSA) nuai ah Langol Area ah kisa ding chu school lawting tak hiding ah kinepna nei a hidan a taklang hi. President of Wangdei Meitei Leikai Union Chingangbam Shamungou in le zia hun matna a chun thugenna a nei hi.

 

IFCD & YAS Minister Letpao Haokip in project chuam chuam entha

Imphal, April 20: IFCD & YAS Minister Letpao Haokip in tuni’n Parliamentary Secretary (IFCD) Rameshwor Meetei, Parliamentary Secretary (YAS &Edn) K. Robindro, Parliamentary Secretary (RD&PR) leh MLA of Sekmai AC Heikham Dingo Singh te tawh state project chuam chuam - Singda Dam, Koutruk ah National Sports University umna ding leh Dolaithabi Barrage Project te enthakna a nei hi. Zia hun a chun, Minister Letpao Haokip in Singda Dam maintenance hawilo mama in a gen a, IFCD official te chu Singda Dam maintenance enzui thak ding ah thupiak neikawm in footpath, monogram, railings te repairing pan ding in a hiatsak hi. National Sports University umna ding mun etthakna anei hun ua Letpao Haokip in a genna a chun sports university umna ding ah gam pawimaw 400 acres ti himaleh tu ah gam um chu 325.90 acres hin a gen a,Prime Minister Shri Narendra Modi in a vaima theipen ah sports university foundation sungphuna nei ding a hidan le a taklang hi. Dolaithabi Barrage Project etthakna a nei hun in Minister Letpao Haokip in construction works 96 percent te zaw thian ah umta hin a gen a, bandh/blockade um mun ziak ah construction work dawigual tak ah umlo a hidan leh a hun tak ah project ki zo theilo ah um a hidan a gen hi. Chuleh, a kisaipi contractor te chu kituptak ah panlakna nei ding leh a vaimathei pen ah nasepna zawthian a hitheina ding ah panla ding in chialna a bawl hi. H. Deleep Singh, Commissioner (YAS); Ksh. Pritam Singh, Chief Engineer, IFCD; K Kirti, SE, Thoubal Circle-II leh Songput W. Albert, SE, Irrigation Circle-II banah IFCDleh YAS official te’n le Minister team chu a zui ui.

 

Diklo tak ah gam kek te chung ah action lak hidi: Letpao Haokip

Imphal, April 20: IFCD Minister Letpao Haokip in tunitak lam in Imphal River kiangnai tuam ah um - Hatta Golapati leh Sanjenthong area te etthakna a nei a, zia hun a chun diklo tak ah Imphal River pang dungzui ah gam kek leh inn kisa te chung ah Revenue Department tawh kithua ah action khautak lak hiding in a gen a, Hatta Golapati lampi ah inn kisa thak leh phalna bei ah Sanjenthong kiangnai tuam ah innsa pawl le um a hidan uh IFCD Minister Letpao Haokip leh a team te’n Imphal River tuam khualna a nei hun ua hiatdaw in a um hi. Chuleh, Sanjenthong ah permanent ding gual ah police picket kikawi chu pawmlo a hidan a gen a, police picket chu a pawimaw hun bep ah mat ding ah kawi hizaw a hidan a gen hi. Chuleh, Imphal East, Deputy Commissioner kiang in diklo tak ah gam kilakna leh inn kisakna tawh kisai in report a dawn a, detail report piaklut ah a umzaw tak leh action kipan ding hin le a gen hi.

 

 

CM mapuina Review Meeting nei

Imphal, April 20: CM office chamber, Imphal ah Administrative Secretary te’n Chief Minister N. Biren Singh chairman hina nuai in a Review Meeting a nei ua, zia hun a chun, state government in first ni 100 sung ah a sepdaw leh panlakna a nei te dinmun tawh kisai etthakna a nei ui. Review Meeting chu Addl. Chief Secretary Shambhu Singh, Addl. Chief Secretary (Home) Suresh Babu, Principal Secretary (Finance) Shri Vineet Joshi leh department chuam chuam ah Secretary, Commissioner leh Director te a pang ua, Chief Minister in ziagual meeting chu tha sin leh um zing ding in a gen hi.

 

Gari accident ah mi 6 liam

Imphal, April 20: Lilong Tarei Makhong, Imphal ah tuni, 20 April nitak lam dak 1:25 in Passenger pua Diesel Auto khat leh A-Star car khat a kiphutua ua, ziana a chun mi 6 te'n liamna a tuak ua, liamna tuak mi 6 te lak ah mi 3 te chu serious mama un a kigen hi. A kigendan ah Diesel Auto chu Imphal a pat Thoubal lam zuan ah tai in a kigen a, A-Star car a hileh opposite direction ah tai hin a kigen hi. Liamna tuak te chu Lilong PHC tut vek a hiu a, zia nung a chun, Hospital chuam chuam ah a liamnau zil ah refered bawl in a um ui.

 

Kum 10 sung dawtlo ah um Lampi siamphatna nasep pan

Imphal, April 20: Shree Shree Govindajee temple a pat Mahabali Kabui village, Imphal East District kikal ah hun sawtpi lampi hawilo ah a la um zing chu Impact TV news in 10 April 2017 ni a thak ah taklatna a nei tawh kitawn ah thuneitu (authority) in repairing work panta ti a hi. Yaiskul MLA Thokchom Seityabrata thupiak dungzui ah repairing work pat ah um in le a kigen a,BJP Yaiskul Mandal, Secretary Choudhuimayum Alok Sharma in thuthak lakhawm mite kiang ah a genna a chun, kum 10 sung lam zia lampi chu dawtlo ah kikawi a hifan a gen a, tu ah repairing work pat ah a um tawh kitawn ah area mipi te haksatna nasatak ah a dawn zangkhai tu hiding in a gen hi.

 

 

Minister Biswajit Singh in 30th TKS General Conference uap

Imphal, April 20: Thongam Biswajit Singh, Minister - Rural Development & Panchayati Raj, Public Works, Information and Public Relations, Administrative Reforms, Power, Commerce & Industries in tuni’n AS Khathing Memorial Ground, Tashar Village, Ukhrul district ah 30th Tangkhul Katamnao Saklong General Conference cum Sports Meet inaugural function uap in thugenna a nei a, ama’n a thugenna a chun, khantona leh society sung ah kituakna a um theina ding ah kipumkhatna (unity) pawimaw in a gen a, tanggam ah um te leh Phaigam ah um te kigawm ah Manipur kiti kisiamdawk a hidan a gen in state sung ah khantona a um theina ding ah kipumkhatna pawimaw a hidan a gen hi. Mihing te ki chuam kawina leh kibatlona chu mimal lunggel a pat piang in a gen a, kihiatthiamna kitaksan tuana leh kihepituana a pun sem theina ding ah panlak khawm zing ding dawi a hidan a gen hi. Chun, khaw zosia electric meivak tunsak ding leh inn neilo te inn sak piak hiding ah tuma a la gensa chu a thak in a taklang ki hi. Minister Biswajit chu Parliamentary Secretary PHED leh Printing & Stationary ER Leishiyo Keishing te’n le a zui ua, kithuapina ding in programme saitu Tangkhul Katamnao Saklong te Rs 1 Lakh piakna nei in, programme host bawl Tashar Katamnao Long Rs 50,000 piakdawna le a nei ui.

 

 

Nisin Thuhiltu - 20 April 2017

Nisin Thuhiltu - 20 April 2017 | via Zogam.com

 

*Chief Minister Biren Singh in corruption dodalna mipi panpina dawn; Police recruitment results puan hidi*

Imphal, April 19 (Nisin Thuhiltu): All India Radio Imphal saina tuni, 19 April 2017 in Maharaj Chandrakirti Auditorium, Palace Compound, Imphal ah' 'Yenningthagee Eshei' (Spring Music Concert) a um a, inaugural function hun chu Manipur Chief Minister N. Biren Singh in Chief Guest hina tawh a uap hi. Chief Minister in a thugenna a chun, mipi te state sung ah nekgukna (corruption) dodalna panla chiat ding in chialna a bawl a, Manipur chu talent lam ah tasamlo himaleh corruption ziak ah basam tak ah um zing hin a gen hi. Zia chu tawh kitawn ah state sung ah khantona daltu corruption dodalna mipi'n kituptak ah pan a lak thak ding dawi a hidan a gen a, Government lui in police recruitment a chiapi dan te chung ah candidate leh nu leh pa te lunggel dan, tu ah State Government thak in hiatpi mama a hidan taklangkawm in recruitment process etthakna kituptak a um zaw tak leh a vaima theipen ah coalition Government in police recruitment result puang ding hin a gen hi.Nekgukna (corruption) kiti chu mipi lak ah kipan masa hin a gen a, tunung ah nekgukna kiti a um kittaklona ding ah mipi te'n corrupt activity a chiapitalo ding in le chialna a bawl hi. Ama government in tunung sawtlo ah State security personnel tamtak lakbe ding a hidan le a gen a, himaleh recruitment um hun ah gawlgukna a pat kikawi kang ding in mipi te a chial hi. State sung ah developmental project chuam chuam chiapi ah um te dinmun (work progress) limlak (photo) te a hun sin ah Government website ah taklat ahiloleh sum /fund release hilo ding a hidan le puang in kikhelna (change) kiti mimal (self) ah a kipat masat ding pawimaw in a gen hi. State government in transparent leh administration thiangtho tak chiapi zing ding a hidan le a gen a, All India Radio, Imphal ah van mat pawimaw leh haksatna um te tawh kisai chu Prime Minister Narendra Modi leh Union Information and Broadcasting Minister M. Venkaiah Naidu kiang tut ding leh a vaima theipen ah sukfel hiding a hidan taklang kawm in State Government in Mumbai ah guesthouse/bhavan sakna ding ah panlakna nei zing in a gen hi. Guesthouse/bhavan sakna ding a chu State Government masa'n a mun ding sufelta in a taklatna a nei hi. Zia hun matna a chun, Prime Minister Narendra Modi in Radio Programme a chiapi 'Mann Ki Baat' gual ah Chief Minister N Biren Singh in le All India Radio, Imphal ah tha sin leh minute 15 sung thugenna nei ding AIR Imphal in offer a bawl le a pawm (accept) a, zia chu tawh kitawn ah thasin leh minute 15 sung All India Radio, Imphal ah Chief Minister in thugenna nei zingta ding ti a hi. Works, IPR, Power, RD&PR & Commerce and Industry Minister Th. Biswajit leh National School of Drama, New Delhi Chairman Ratan Thiyam te'n le zia hun matna chu Guest of Honour leh Functional President hina tawh a uap ua, Th. Biswajit in a thugenna a chun, radio chu state government in works/activity leh welfare schemes chuam chuam a chiapi te promote a bawlna ding ah medium hawipen in a gen a, IT leh social media lam ah masawnna nasatak um zing maleh mi tamzaw'n radio ngai zing nalai in a gen hi. Ratan Thiyam in a thugenna a chun, state government thak in state sung ah art & culture banah tourism lam a pua phat ding pawimaw sa a hidan a gen a, zia a pat chu khantona thak um ding ah kinepna nei a hidan a gen hi.

NT-20april2017

*Minister V Hangkhanlian in Chief Guest hina tawh Seminar uap*

Lamka, April 19 (Nisin Thuhiltu): Rayburn College guanggalna tuni, April 19, 2017 zingkal lam dak 9:30 in Rayburn College Auditorium, New Lamka ah ni-ni sung um ding National Seminar of Forest for Sustainable Development in Manipur kiti hawndaw in a um hi. Zia hun chu V. Hangkhanlian, Minister (Agriculture, Veterinary & Animal Husbandary) in Chief Guest hina tawh a uap a, Professor Aadya Prasad Pandey, Vice Chancellor, Manipur University Professor in Guest of Honor hina tawh uap in, N. Mohendro Singh, Academic Adviser, Rayburn College in Functional President hina tawh a uap ban ah Rev. Dr. Khen P. Tombing, Principal, Rayburn College in Chief Host hina tawh a uap hi. Seminar hawdawna ding in Guest te'n Candle detna a nei ban ua thugenna le a nei ua, zai zaw ah chun Plenary Session a kipan hi. Zia hun chu Prof. D. Kuolie, Professor & Head of Department, Linguistic, Nagaland University in a mapui a, Prof. Dr. Lal Dena, Department of History, MU, Prof. Salam Irene, Department of History, MU leh Dr. Sonzalian Naulak, IFS, Chief Conservator of Forest, Government of Manipur-te Penelist in a pang uh ahi. Sunnung lam ah Technical Session hun Room ni in a mang ua, Room 1-na Prof. Salam Irene in mapui in, Room 2-na Prof Dr. Laldena in a mapui hi. Room 1-na ah Dr. Zothanchhingi Khiangte, Dr. Immanuel Zarzosang Varte, Dr. E. Lamalakshami Devi, Dr. Sudhir Kumar, Dr. A. Ningombam leh Dr. T. Basanta Singh te'n thupi chuam chuam mang ah zilsakna a nei ua, Room 2-na ah Dr. Ch. Tania, Dr. Kh. Rishikanta Singh, Aruna Beemrote, Dr. Romila Akoijam, RS Telem, Dr. Thajamanbi Yumkham leh Lalhriatchhungi te'n zilsakna a nei ui. Functional President Professor N. Mohendro Singh in zia hun ah gam kiti sung a um ding ah pawimaw tui leh thingkung ahi a tia, gam a thing leh tui chu gamkeu leh thaichi tutheilona suak ahi dan a gen a, thing-leh-lo tamzaw sem phu zel pawimaw ahi dan a gen hi. Guest of Honor Professor Aadya Prasad Pandey in mihing hinna ding ah huithiang pawimaw hi'n a gen a, thing-leh-gua te'n huithiang hun pia a tia, khawvel chengtheina mun hawitak a hitheina ding ah thing-leh-gua kepbit pawimaw ahi dan gen in, zia ding ah telting thak ah um Minister tawh pangkhawm a Manipur thingtang gam tenna tak suaksak pawimaw ahi dan a gen hi. Chun, Chief Guest Hangkhanlian in "Suan Ni Maw" ti laa kha sakawm a thingkung i phukphuk ziang uhi thil kituak hilo ahi a tia, zia Seminar tungtawn a Dan bawlpawlte a ding ah lampi kawkmutu hoitak a hung hi ding a dawisak thu a gen hi. Aban a genna chun, Manipur a BJP Government in Salpha vuinailo a umte vuidaw ahi theina ding ua panla ahidan a taklat bana Chief Minister le Lamka hungpha ut ahina tawh mipite lungthim kihawngtak a um pawimaw ahi dan gen in, District sung lampite siamphatna ding ah nasep chiatha zing leh maban a le lampi chuam chuam siamphat ahina ding ah survey bawl hizing leh Government a DPR piaklut hiding ahi dan a gen bana Churachandpur a Hill Campus bawl ahi theina ding ah ama hitheina chan chan ah panla ding ahi dan a gen hi. Seminar ahileh zing leh sutzawp hiding a hia, sunnung dak 3:00 in hunkhakna leh Cultural Extravaganza hunmat hiding ahi. Zia hun chu leh Brigadier Ajay Kumar, Commander, 27th Sector, Assam Rifle in Chief Guest hina tawh uap ding a hia, Colonel DS Murty, SC. SM, Deputy Commander, 27th Sector, Assam Rifle in Guest of Honor hina tawh uap in Rev. Dr. Khen P. Tombing, Principal, Rayburn College in Function President hina tawh uap ding a hi. Seminar hun ah District sung a College chuam chuam a Student leh lunglutna nei mi tamtak a pang ua, zia Seminar chu North Eastern Council (NEC), Shillong in sen leh so um cheng a tuak uh hi'n a kigen hi.

NT-20april2017b

*DC, SP leh CMO te'n Indo- Myanmar boder pillar etthakna nei*

Lamka, April 19 (Nisin Thuhiltu): R Sudhan, IAS, Deputy Commissioner, Churachandpur District, Superintendent of Police Churachandpur District, Kimngaiching Simte, Chief Medical Officer (CMO) leh Official hun khawp te'n tuni'n Primary Health Centre (PHC), Behiang, S Zezaw leh Singngat banin Indo- Myanmar boder pillar etthâkna a nei ui.

NT-20april2017c

*Police in Drive nei; Phalna bei ah Petrol kizuak te matpiak*

Lamka, April 19 (Nisin Thuhiltu): Rakesh Balwal, IPS, Superintendent of Police (SP), Churachandpur thupiak dungzui in Police te'n khawpi sung mun chuam chuam ah Drive nei in phalna bei a Petrol khawlai a zuak bana nganza (cannabis) hi leh zuaktu a mandawk ui. Tu sun ah Police team khat in khawpi sung a phalna bei a Petrol zuak check a bawlna'u chun Hmar Veng ah Petrol litre 22 a lakpiak ua, zan nitaklam a Khumujamba Meitei Leikai a buluna'u ah kum tinglo nganza chep mi 7 leh nganza zuaktu khat a mandawk ua, a thil hawilo bawl uh chawlsan ding ah gawtna pia in a chiasak uh ahi. SP Churachandpur in Churachandpur hi Manipur a ding ah khawpi lian a nina a hi tawh kitawn a, Smart City khat a hisak ding in pan a la, zia bawzuina ding a chun Additional SP, OC leh officer chuam chuam te'n khawpi sung a drive nei zel uh ahidan a kigen hi.

NT-20april2017d

*CCpur District Hospital ah naupang damlo tawm deu*
Lamka, April 19: District Hospital Children Ward ah naupang damlo admit ah um te chu khua a hun kithen dung zui ah hawilam a manaw tak ziak un, a tam zaw pawt sak in a um ua, zia tawh kitawn ah tulai tak ah naupang damlo a dan a um deu ta ahi. Tulai khua kithen, khua lum, vawt tite nicheng phial in a kitheng danglam in, a kal lak ah hui leh gua kithua ban ah thei chi chuam chuam um pat hun tawh kituak in, naupang tamtak chu ti sa, lu-na, hii-tang, sungkhaw, awm bing ti te ziak in tuma deu a pat District Hospital Children Ward ah naupang tamtak admit ah a la um uh ahi. Chun, nu leh pa te le naupang te etkawlna lam ah neu khat pilvang pawimaw a hun lai tak ahi tawh kitawn ah a nek leh chak, tui thianglo/so lo dawn tite haw bawl lo ding ah ziltil a, thei hai, thei thuk chi chuam chuam te mawk neksak nai lo a, a khaw hun kitheng dungzui ah naupang etkawl dan ah pilvang thak ding ah panlak ding ahidan a pawimaw ahi.

*LYF in Diamond Jubilee lawm ding*
Lamka, April 19 (Nisin Thuhiltu): Manipur Evangelical Lutheran Church (MELC) nuai a Khanglai Pawl, Lutheran Youth Fellowship (LYF) General Headquarter in Along With Jesus ti thupi mang ah LYF kiphudaw nung a kum 60 tinna Diamond Jubilee lawpna a hungtung ding April 21 apat April 23 sung in MELC HQ Church, Zomi Colony ah nei ding ahi. LYF Diamond Jubilee lawpna April 21, nitak dak 6 in kipan ding a hia, zia hun chu Upa V Lawmsang, Moderator, MELC in LYF Diamond Jubilee lawpna hun hawngdawk in, Music Secretary, LYF GHQ leh Music Committee MELC in a guanggal Diamond Voice Solo Final Round um ding a hia, VIP Dr Steve Minlun leh Dr Langlunthang te a pat Pathian thugenna um ding a hi. April 22 sun kikhawp hun ah Pastor Kapsuankhup, Shillong, in "Abide in Me" ti thupi mang a thugenna nei ding ahia, Rev Thangliankham, DM incharge Youths in LYF Diamond Jubilee Souvenir hawndawk in, P Khamminlun, Vice-chairman, LYF GHQ in LYF chanchin chawmkim suklatna hun nei ding a hi. Sunnung dak 12:30 in seminar um in tin, zia hun ah Suanlian Tunung in Self Realization, Pupu Zou in Help yourself to help others ti thupi mang in seminar hun la ding a hiu. April 22, nitak kikhawp hun ah Rev. Kamminthang Taitom in How Beautiful Are The Feet Of Them That Preach The Gospel" ti thupi mang in thugenna nei ding ahi. LYF Diamond Jubilee nipi ni zingkal lam dak 9 in Shesei Zou, ADCC Chairman, Chandel in Diamond Jubilee MELA/Khutthiam thilbawl hawng in, Rev TC Khup in Pathian kiang ah latna nei ding ti ahi. Chun, zingkal lam dak 10 in Retired Rev Dr Hangminthang, Bishop MELC in Pathian min in LYF Diamond Jubilee suang hawndawna leh latna nei in, telchuam mi 60 in Diamond Jubilee dak khetna le nei ding a hiu. Upa S Zamkhanpau, General Secretary, LYF GHQ in phamtate suunna mapui ding a hia, Retired Rev Dr Hangminthang, Bishop MELC a pat Jubilee message gen um ding a hi. Nitak kikhawp hun ah Rev Dr Ginkhanmung, DS Lamka in Here I am, send me O Lord ti thupi mang a thu genna hun mang ding a hia, Diamond Jubilee ding tawh kisai a kitaitekna chi chuam chuam ah kipakman te hawpdawna hun um in, Upa V Lawmsang, Moderator MELC in LYF Diamond Jubilee lawpna hun khakna nei ding a hi.

*YPA Unit election zaw thian hita*

Lamka, April 19 (Nisin Thuhiltu): Young Paite Association (YPA) New Lamka Block nuai a Unit umte'n kitelna a nei uh sunzawm in a tawpna ding in tuni, April 19, 2017 zingkal dak 7:00 a YPA Vengnuam Unit in kitelna a nei ui. Election ahileh YPA New Lamka Block nuai a Unit 12 umte a term uh a bei tawh kitawn a 2017-2019 sung vaipaw ding kitelna a chiata April 12, 2017 apat a nei pat uh ahia, April 18, 2017 ni chan a zawthiang ding ti himahleh YPA Vengnuam Unit Election neini dia bithiat ni a mithi a um ziak a tuni a nei a um hi'n a kigen hi. Election ahihleh Block lawiupate' mapuina nei ahia, zia hun ah Candidate ding Proposal System a chia in Candidate 31 Nominate a um in, zia kipat a chu mi 15 teldawk in, mi 15 te'n Cabinet Member ding mi 6 teldawk kit in midang 9 cheng Executive Member ding in guat in a um hi. Zia dungzui a YPA Vengnuam Unit 2017-2019 sung vaipaw ding in President: H. Ginkhotuan; Vice-President: T. Lianzachin, Secretary: M. Tualchinpau, Asst. Sey: T.Thangthianzem, Finance Secy. N. Tuanminthang leh Treasurer: G. Tualzathang telting a hiu a, Executive Member ding in T. Mungpu, N. George Lal, H. Chinthuam, T. Nangbiaksang, Muanlian Phaipi, L. Ginbiakmang, T. Donglianlal, K. Ginzalian, S. Thongmung guat in a um ui. Zani khan YPA Vaal Veng Unit leh YPA Kanaan Veng Unit kitelna ah 2017-2019 sung YPA Kanaan Veng Unit vaipaw ding in President P. Nengthianmuan, Vice President H. Ginzadal, Secretary G. Thangzasiam, Assistant Secretary M. Pauzalam Guite, Finance Secretary El-Nathan Guite leh Treasurer ding in Thangtual te chu telting a hiu a, Executive Member ding in B. Ginbiaklal, Zammuanlal Guite, S. Pausong, S. Ginzakap, Genkhanlun, Chinsonlian, Pumdoulian T. Khamson leh V. Songkhohau guat in a um uh ahi. YPA Vaal Veng Unit vaipaw ding in President ding in H. Ginpau, Vice President Lammuanthang, Secretary Ginthianmuan, Assistant Secretary Thangzamuan, Finance Secretary T. Liankhosiam leh Treasurer ding in T. Thangbiaksang telting a hiu a, Executive Member ding in S. Biakson, Pumkhopau, G. Paumuan, Ginsanglian, M. Biaklal, Paukhansiam, Ginhauthang, L. Thangkhankap leh Daizakhup te guat in a um hi.

NT-20april2017e

*CMO/Ccpur in PHC 4 ah Worker di guat*
Lamka, April 19 (Nisin Thuhiltu): Village Health Sanitation Committee in dawtna lekha a la piaklut dungzui in, Chief Medical Officer (CMO) CCpur in PHC 4 ah ASHA Worker ding in mi 4 a guat thak hi. Zia dungzui ah guat thak ah um te chu ahileh Henglep PHC nuai ah Nu Kimneingak w/o Lamkhualian of Saimoulien in Nu Kimlalven mun lua ding a hia, Saikot PHC nuai ah Nu Tinhat w/o Paumuanlian of L Gangpimual in Nu Chinneilam mun lua in, Thanlon PHC nuai ah Ms Chinzahat d/o Liankhup of Bukpi in Late Chingkang mun a lua ding ban ah Town Area nuai ah Nu Nengneilhing w/o Thongtinsei of B venguom in Ms Chinneithem mun a lua ding ti ahi.

*Ex-servicemen Rally um ding*
Lamka, April 19 (Nisin Thuhiltu): Headquarter veng a um 25 Assam Rifle Town Commander in thusua a bawlna chun a hungtung ding April 22, 2017 in HQ IGAR (S) ah Assam Rifle ex-servicemen Rally um ding ahidan a taklang ahi. Zia Rally ah Assam Rifle pension sa (ex-servicemen) a tam thei pen pang ding in chialna a bawl a, Rally a chianuam leh pangnuamte a ding in zingkal dak 6:00 in 27 Sector Assam Rifle, Tuibuang ah gari kidaw ding ahibana Rally ah pang ding te'n zia hun a lap uh ngai ding hi'n a taklang hi.

*Product pun theina ding ah lo-bawldan san pawimaw: Dy CM*

Imphal, April 19 (Nisin Thuhiltu): College of Agriculture, Central Agricultural University (CAU), Iroisemba, Imphal ah tuni'n Agricultural Inputs Distribution Function a um a, zia hun chu Deputy Chief Minister Shri Yumnam Joykumar Singh in chief guest hina tawh a uap hi. Deputy Chief Minister Yumnam Joykumar Singh in a thugenna a chun, agricultural lam ah masawnna a um theina ding ah tu ah a pangai lobawldan (farming) chu farming techniques thak ah san ding pawimaw in a gen a, tumasang ah kum taktak Jhuming leh Terrace Cultivation kichiapi te ziak ah tuhun ah environment challenge nasatak um leh mihing damtheina sukha a hidan taklang kawm in lobawldan method chu tuhun tawh kituak ah san ding pawimaw in a gen hi. Y. Joykumar Singh in Central Agricultural University in Tribal Sub Plan-Project nuai ah farming lam masawn theina ding ah panlakna nasatak a neina chung in pakchat thu le a gen a, hill leh valley ah Double Cropping leh Cash Crop Cultivation nasatak ah chiapi thak ding pawimaw in a gen hi. Central Agricultural University ah Vice Chancellor Dr.M.Premjit Singh in a thugenna a chun, North East state 5 Arunachal Pradesh, Manipur, Mizoram, Meghalaya leh Nagaland te ah Tribal Sub Plan-Project chiapi ah um in a gen a, Manipur ah -Churachandpur, Chandel , Machi, Phungyar, Saikul leh Kangpokpi District te huap ah project chiapi ah um a hidan a gen hi. Zia hun matna a chun Hill District chuam chuam ah phu/tu ding thingno 9 saplings) hawpna le a nei a, thingno hawpdaw ah um te lak a chun thei (fruts) - lemon, orange leh grapes te le a pang hi. Hun matna chu Director of Research, CAU, Imphal Dr. C. A. Srinivasamurthy leh Dr. J.M. Laishram, Dean, College of Agriculture, CAU te'n le a uap ui.

*Manipur Congress MLA 4 in le BJP zawpbe ding gua*
Imphal, April 19 (Nisin Thuhiltu): 11th Manipur Legislative Assembly election 2017 ah Congress party chu single largest party himaleh government form zo lo ah a um nung in Anti-defection Law kihiatlo sak in Congress MLA te'n BJP zawpna ding ah panlakna nei zing a hidan uh taklat in a um hi. Thudawnna'n a taklat dan in, April 17, 2017 ah Congress MLA Ginsuanhau Zou leh Chandel district ah Congress ADC member 14 te'n BJP a zawp nung ua, tuni 19 April ah Congress MLA 4 te'n chief minister leh state BJP president K Babhananda Singh panna BJP leader te kimupi a, BJP zawp ding ah kidawtna siam un a gen a, tunung sawtlo ah Congress MLA 4 te'n BJP a zawp ding uh ginchat um a hidan a taklang hi. BJP zawm nuam ah kidawtna siam Congress MLA 4 te lak a chu - Md Nasir, former works minister Ksh Biren Singh, MLA L Lukhoi leh MLA Borjen Singh te le pang ua hiat a hi. A langkhatlam ah Manipur Pradesh Congress Committee (MPCC) in defection Congress MLA Ginsuanhau leh Shyamkumar te dinmun tawh kisai genkhawmna neikha nailo un a kigen a, legal expert te thuhiat ah Anti-Defection Law tawh kituak ah action lak ding dan buaipi zing un le a kigen hi.

*Manipur lawyer te'n kiphinna sunzawm*
Imphal, April 19 (Nisin Thuhiltu): Manipur ah lawyer te'n state advocate general ding ah non-local mi state government thak in appoint bawl ding ah lemsakna a neina chung In kiphinna a nei zing ua, zia chu tawh kitawn in High Court Bar Association of Manipur (HCBAM) in High Court of Manipur complex ah sit-in-protest a nei nung un tuni'n Bar Council of Manipur (BCM) in Uripok Cheirap Court Complex , Imphal ah sit-in-protest a nei kit ui. State advocate general post chu tunaicha Thokchom Ibohal Singh a retired tawh kitawn ah a awng ah um zing a hia, State advocate general thak ding guatna Manipur Judicial Service Rule 2005 dungzui ah Bar Council of Manipur (BCM) member a hi ding ti chu Manipur ah lawyer te demand a hi.