Manipur Express

User Rating: 0 / 5

Star InactiveStar InactiveStar InactiveStar InactiveStar Inactive

Rapid Action (Mobile) Team meeting om
Lamka, Jan-7: DC’s office chamber ah tuni nitaklam in ui keih (dog bites) tawh kisai Rapid Action (Mobile) Team member te’n meeting nei uh a, maban ah nasepding dan kikum uhi. Jt Director, Vety inleng ui keih tawh kisai panla in tunitan in ui 700 vel kap (vaccinated) a, CEO/ADC nget dungzui in DC/CCpur in 407 gari 1 zangsak ding a, huai gari zang in khawlai a ui kikhahzan te puak hiding hi. Meeting hun ah ui keih tamtak omthu genkhawm uh a, Rapid Action Team te’n New Lamka area leh NKT area poimawh ngaihdiak ding in thupuk uhi. Jt Director Vety leh CEO office ban ah khawpi sung ah Mobile vaccination koih ding in thupuk uh a, SDO/CCpur in DC office tawh kithuzak a mipi theihsak ding, CMO in ui keihsa te etkolna enkai ding leh Dist Hospital a casualty ah ui keih tawh kisai damdoi kiningching leh medical team mansa a omding in thupuk uhi. Medical Supt Dist Hospital in ui keih ziaka si leh liam te DC kiang ah report bawl a, PHC leh PHSC a doctor leng report bawlding, SDO/CCpur in Village Authority te thuzak a, mipi lak ah ui kikeih saklouh ding puanzak ding leh Rapid Action (Mobile) Team te Maniram Sharma, IAS, Addl DC/CCpur in enkai ding in thupuk uhi.

HPCL in YPA Gen HQ adi’n Tata Sumo Ambulance pekhia
Lamka, Jan-7: Hindustan Petroleum Corpn Limited (HPCL), Guwahati in Corporate Social Responsibility (CSR) project tungtawn in Young Paite Assn Gen HQ kiangah tuni in Tata Sumo Ambulance gari pekhia uh a, HPCL ai-oh a hongkuan Lalawmpui Ngaihte, Area Manager, HPCL Guwahati in S Chinngaihpau, President, YPA Gen HQ khut ah gari chabi pekhia a, Rev. L. Khamkholun, Director (M), EBC in Pathian kiang ah lan hi.
Lalawmpui Ngaihte in a genna ah, phatuamngaihna ziaka pawlpi adia theihtawp suah a nasem heutute pahtak siam a poimawhdan gen a, heutute thuman dan siamkawm a atung uah vuina(khasiatna) ding zon ding hilou chi a, kithuman dialdialna mun ah vaihawmtute leng siam un kilang zel hi’n gen hi. Pawlpi makai heutute’n mipi theihlouh ding in mimal ah sen-le-pan tamtak nei uh hi’n leng gen a, mipi adia a fel chiang un innsung enkol manlouh hun leng nei zel uh a, amaute kithuahpih siam poimawh chi hi. LPG tawh kisai a genna ah kumtenga tampi thelthang gige pen etkai theihna ding in govt. in DBTL Scheme ah bank account tawh kizopsak ding sawm hi’n gen a, huai hunchiang in registered customer te’n kumkhat in cylinder 12 mu ding uh a, subsidized rate in gas cylinder laktheih nawnlouh ding a, customer te’n full rate (Rs. 700/800 vel) in gas dealer (agency) te kiang ah sumtang(cash) pe ding uh a, gas man val teng dealer te’n mahni account ah sum thunkik ding uh chi hi. Huaiziakin midang kuahiam in ei min a gas a lak leh leng ei account ah sum honglut ding a, solkal in thildiklou omte khitsiangna dinga apat hi’n gen hi.
Paukhanmawi Guite, Gen Secy, YPA Gen HQ in HPCL tungah kipahthu gen a, H. Mangchinkhup, EM/ADCC in YPA Gen HQ sik-le-tang a athugenna ah YPA nasepna pen phattuam ngaihna ahihman in, pipute hunlai a tawh kibang hi’n gen a, YPA nasepna pen phutluih dan a ngaihtuahlouh ding chi hi. Haksatna leh lungkhamna thuakte YPA in a panpih hun ah midangte adia vualzawlna tungzel chi hi. Tuhun in siamsinna poimawh pen a, mahni nam mite adia phatuam ding leh i mi-le-sate’ phungvuh thei ding khop a lawhchinna neih poimawhdan gen hi. Aman agenzelna ah gamsung a sum hongsin Bank tuamtuam te’n leng gam puahna dia pan alak theihdan uh ngaihtuah hiding chi a, YPA in tunung in bawhzui ding chi’n gen hi.


Thangso Baite, MP in hong ding
Lamka, Jan-7: Thangso Baite,MP(Lok Sabha ) Jan 8, 2015 zinglam dak 9:00 in Kangvai Community Hall ah Saansad Adarsh Gram Yojana (SAGY) kichi hongkhe ding hi. Huai hun ah line deptt-Agriculture, Horti & SC, Medical/Veterinary/Forest, PHED, PWD, Electricity, ICDS, Education, PMGSY, DIO, Sports, Social Welfare, CAD & DP a officer-te telding in DC/CCpur in theisak hi.


National Integration Camp kipan
Lamka, Jan-7: Nehru Yuva Kendra/CCpur saina in tuni’n CCpur college nung a Youth Hostel ah National Integration camp kipan a,Kamsuanlun, EM/ADC khuallian apang in hong a, Functional President in Sahib Singh, Zonal Director, Nehru Yuva Kendra Sangathan (NYKS) pang hi. H. Doungel, DYC/NYK in vaidawnna thugen a, Nalbari Team, Assam leh Shillong Team, Meghalaya apan NYK/Youth representative te'n cultural dance leh cultural song present uhi. Chief Guest in NYK/CCpur saina a National Integration Camp 2015 atel Youth/NYK Volunteer te'n cultural exchange tungtawn in kituahna, ki-itna leh kipumkhatna a pian deihthu gen hi. Huai ahstate tuamtuam apan paikhawm e’n nam dangte tawndan zilkhia a, phattuampih din deihsakthu gen hi. Huai ah Shillong team mi 10, Assam team mi 15 ban ah Kangpokpi team, Bishnupur team, Imphal team, Thoubal team, Tamenglong team leh CCpur team apan mi 150 tel uh a, mi tuamtuam 10 velin thupi tuamtuam zangin sinsak uhi. Jan 10, 2015 nitaklam dak 3:00 in hunkhakna leh certificate hawmna om ding a, DC/CCpur in Chief Guest hihna tawh uap ding hi.


Kha 1 sung in gari 111 kibehlap
Lamka, Jan-7: District Transport office ah Dec 2014 sungin gari thak 111 ki-registered a, huaite heavy goods vehicle 1, light goods vehicle 3, maxi cab 1, jeep 4, car 11, van 1, auto rickshaw 11, bike/active 79 tel hi. Huailou in DTO office te’n Dec 2014 sungin revenue Rs.10,54,625/-mukhia uh a, April-Dec 2014 sungin revenue Rs.1,07,25,787/- mukhia in govt ah challan in submit uhi. April-Dec 2014 sungin DTO office ah gari 1465 registered thak hi a, medium bus 3, heavy goods vehicle 3, medium goods vehicle 7, light goods vehicle 12, maxi cab 17, jeep 59, car 198, van 3, auto rickshaw 74, bike/active 1077 leh adang (others) ah 12 tel hi.


2014 sung in case 146 register
Lamka, Jan-7: CCpur district Police-te’n Jan-Dec 2014 sungin case tuamtuam 146 registered uh a, huai lak ah IPC case 128 leh IPC sanga neuzaw deuh LSL case 18 registered uhi. IPC case nuai ah tualthahna case 13, kithahsawm (attempt to murder) case 10, kidnapping case 6, road accident case 10, guta case 28, sum kilaksak (extortion) case 1, kikhemna (cheating) case 5, preparation for decoity case 21, burglary case 8, assault case 6, mics IPC case 6, Arson case 2, forgery case 3, rioting 1 leh rape case 5 tel hi. Huai ban ah LSL case nuai ah 18 om a, huaite Arms Act case 4, unlawful prevention Act case 5, ND & PS Act case 2, Explosive case 3, PG Act case 1 ,Foreigner Act case 3 tel hi’n kigen hi.


Tempawng a siatliam in om
Lamka, Jan-7: Meltheihlouh pasal bangzah hiam in tunitak dak 7.30 velin Zogal Hall, Zoveng ah lampi a pailai Ginpau (27) s/o Tuangouthang of Zomunnuam khoih liam uh hi. Ginpau innkuante gendan in meltheihlouhte’n tempawng in alu(head) satliam uh a, mun liantak kek in kikhui mahleh sisan khawlthei pahlou a, sisan apawt nasat ziakin khua phawklou hi’n gen uhi.


Galvan tamtak mukhia
Lamka, Jan-7: Jan- Dec 2014 sungin security force te’n CCpur district sung mun tuamtuam ah galvan tamtak mukhia in Police-te’ ah pekhia uhi. Huaite pistol (9mm pistol, country made pistol, 7.65 mm pistol .22 mm pistol ) avek in 25; magazine 20, atang 55; AK tang 77; SLR tang 6; M-16 tang 15; 5.56mm MA-III MK-II rifles 7, magazine 14 leh atang 19; SBBL thau 1; SBML thau 1 leh atang 50 ban ah kenwood set 1 hi'n kigen hi.


YPA Dorcas Veng in ui 4 kaplum
Lamka, Jan-7: YPA New Lamka Block in New Lamka area ah ui(dog) khahzan kham bikbek uh a, YPA Unit 11 te’n amau vengsung chiat ah ui khahzan omhiam chih enzui uhi. YPA Dorcas Veng Unit te’n tuni’n amau area sungah ui kikhahzan om hiam chi’n vengsung dapkual uh a, thau (single barrel) zangin khawlai a ui kikhahzan 4 kaplum uhi.


Mentally Retarded Assessment Camp
Lamka, Jan-7: Andhra Pradesh state a Secunderabad pansan National Institute for Mentally Handicapped (NIMH) pawlin Jan 16-17, 2015 sung Dist Hospital a New building ah Mentally Retarded-te ading in Assessment Camp sai sawm uhi. Huai ah Special Educator leh Parent-te a din leng training om ding a, Assessment camp a certificate a piakte uh tungtawn in Disability Certificate ngahtheih ding hi.


SSPP complex ah admission
Lamka, Jan-7: Suangdoh High School ah tukum a zilnuamte a dingin SSPP complex, Bungmual ah leng Jan. 10, 2015 akipan zinglam dak 10:00 leh nitaklam dak 2:00 kikal in admission bawltheih a. old student te’n passport copy 2 leh new student te’n Transfer certificate, mark sheet leh passport copy 2 tawi in Enrolment Fee Rs.100/- piak a nu-le-pa tawh admission bawltheih ding chihthu om hi. SSPP Block President Pausonthang- 08131884126 leh Secretary Chinkhen- 08729942261 kiangah leng thuchian kan theih ding hi.


SUUNNA :
Jamginkhai (47) s/o (late) Thankhum of Hausa Veng, Bungmual tuzing dak 3.15 velin Shija Hospital ah kalna in si a, tuni in Bungmual hanmual ah kivui hi.

TUNI THUPI:
“Unaupihte aw, thu kia in it kei ni, lei kia in leng it sam kei ni; thilhih leh chih taktakin hizaw hen..”
-1 Johan 3:18

manipurexressicon

User Rating: 0 / 5

Star InactiveStar InactiveStar InactiveStar InactiveStar Inactive

DC/CCpur in panla dingin Rapid Action Team bawlkhia
Tuni kia in leng Ui in mi a keih case 3 om

Lamka, Jan-6: Lamka khawpi leh akim lak ah hun bangtanhiam paita akipan Ui in mikei chih thang mahmah a, Ui in a keih ziakin mi bangzahhiam in a sihlawh banah tukum bul akipan Ui in a keih ziaka buaisia leh damlou nasatakin kibehlap, tuni lelin leng ui-keih thak mi 3 damdoi inn puaktung hi uhi.Ui in akeih ziaka sihna tanpha tuak om ahihdan thuthang a om vengveng lai in leng niteng phiala thiltung a om lailai ziakin patauhhuaisa in tuni nitaknung in District Magistrate Lunminthang Haokip in Order suah a, tua dungzui in ui in akeih tawh kisai enkai ding leh khawlaka vakthap uite enkai dingin Rapid Action (Mobile) Team (RAT) kichi phuankhia hi.
Hiai RAT kiphuanthak nuai ah a poimawhna munmun delhthei pah dingin Mobile Team leng 3 om hi. Hiai Mobile Teamte ahihleh Medical department apan Team 1, District Council apan Team 1 leh Veterinary Department apan Team 1 chiat hiding hi.District Magistrate thusuak in a gendan in RAT nuai ah district sung adia office lian mahmah ngen 5 om a, tuate houpihtheihna ding helpline number leng taklat hi a, amaute mawhpuak tuam chiat mahleh a tangpi in Ui vakthapte kaihkhawm ding, Ui in akeih khakte kintaka damdawi a kap ding, a poimawhna mun a zat ding Ambulance leh medical staff poimawh bangbang mansa a koih ding , Vaccination centre mun 3- CMO office, Venerinary Office leh CEO District Council office a hon ding chih hi a, tuate banah SP in a poimawhna mun ah Mobile teamte panpih ding in security personnel-te sawl ding leh SDO/CCpur in mipi vantang theih dia thupuan bawl ding chih ahi hi.
District Magistrate akipan kizadan in ui in akeih himhim kintaka etkol ahihtheihna ding leh ui keih ziaka sihna hial tuak a om nawnlouhna ding in hibang panlakna kipan hi a, kuapeuh ui in a keihkhak a om ahihkei leh a theikha khempeuh in kintaka RAT nuai a om office-te a kinaihpih penpen thuzak ding in ngen uhi.Tuni a Uikeih ziaka damdoi inn puaktung a omte ahihleh, Khenpau( 65) of Bungmual; Soson(30) of Tuibuong leh Thangsuanlun( 2) of Gangpimual hi uhi. Damdoi inn apan thutut kizadan in amaute ui in akeih thak ngen hi uh a, damdawi akap ahihnung un a innlam chiat uah paisak hi uhi.

Sl. Designation Helpline Nos
1. SP Office 8413015102
2. CMO 825056494
3. Vety Office 9863184109
4. District Council 9862159042
5. SDO/CCpur 8732066037

JAC te’n DC/CCpur kiang ah memorandum pia
Lamka, Jan-6: Lamka to Singngat/Behiang Bus Owners' Association (LSBBOA) te'n zan akipan Lamka- Singngat kikal bus tuanman(fare/bahara) Rs.60 akipan Rs.90 a hihsak ziakun zan zinglam in Singngat bazar ah mipi kikhopna om a, huai ah Joint Action Committee(JAC) Against Bus Fare Hike kiphutkhia uhi. JAC makaih in tuni’n gari 50 val zangin Singngat apan Lamka ah mipi’n rally neikawm in DC/CCpur kiangah tuni sunnung in memorandum pia uhi. Singngat area adiakin Tangpijol, Haizang, Singngat leh Singngat Thadou Veng apan mipi’n DC muh sawm uh a, DC office chamber ah District Transport Officer telin makai bangzahhiam in DC mu uhi. DC in kihou dingin LSBBOA makaite zawngsak mahleh kuamah muhzawh hilou uh chih ahi hi.

JAC Against Bus Fare Hike te’n DC kiang ah memorandum pia uh a, India gam pumpi ah petrol leh diesel man akiam lai in Bus Owners Association te'n Lamka- Singngat kikal km 32 vela gamla adin Bus tuanman Rs 60 akipan Rs 90 a a khansak uh pawm theilou uh ahihdan gen uh a, mipi gawtna hi chi’n pang uhi. District Administration in mipi haksatna theihpih a, govt. dan tawh kituaklou a bus tuanman bikhiah Bus-te’ permit cancell sak ding in ngen uhi. DC/CCpur in Singngat area mipite haksatna poisak pihthu genkawm in bialtu MLA tawh kihou a, mipi haksatna hihvengna dingin ni 3 sung hun peding in mipite kiang ah ngen hi.

Ui nei tengin kapsak di'n theisak
Lamka, Jan-6: Lunminthang Haokip, IAS, Dist. Magistrate/CCpur in tuni a thusuah abawlna ah Tuibuong a District Vety office ah office kaihun sung in ui nei tengin damdawi a kapsak dingin theisak a, khawlai ah ui himhim zalen taka khahzan om thei nawnlou ding hi’n leng order suah hi.
SP/CCPur (8413015102); CMO/CCPur (8258056494); Jt. Director Vety & AH (9863184109) 4.CEO/ District Council (9862159042) leh SDO/CCPur (8732066037) hi uhi. Amaute’n Mobile team tungtawn in 24X7 sung khawlai a ui omte pikhe thei ding uh a, ui keih tawh kisai ah anti-rabies vaccination, leh CMO in Ambulance service ngaihtuah ding a, CMO/CCPur office banah Jt. Director Vety & AH leh CEO/District Council office ah Vaccination Centres hongkhe dingin leng theisak hi.


DORCED ading interview om
Lamka, Jan-6: Central Dorcas Sub Committee saina in tuni zinglam in New Lamka a Dorcas Hall ah Dorcas Child Educational Dev(DORCED) Project nuai a chawm a om ding naupang-te interview om hi. Huai ah naupang 40 telkhia uh a, huaite Vangai Divn. ah 2, Mizoram Divn. ah 2; Thanlon Divn. ah 8, Singngat Divn. ah 8; Lamka North Divn. ah 8 leh Lamka South Divn. ah mi 12 hi uhi.


Nitak nung tan inleng mipite lampi ah kipunkhawm
Lamka, Jan-6: Singngat-Lamka kikal gari bahara Rs. 60/- pen Rs. 90/- a khansak ziakin mipi lungkimlou te’n tuni zinglam dak 10.00 velin Lamka honzuan uh a, gari 50 vel zang in mipi tamtak hong kuan te’n DC kiang ah memorandum pia uh a, tunitakin New Lamka ah kipunkhawm in lungkimlouh thu tangkoupih uhi. Nitak nung in ADC Chairman tenna inn kong ah om uh a, kihouna nei ding in ngak uh hi’n kigen hi.


Sports Academy adin selection test
Lamka, Jan-6: National Sports Academy,Imphal ah academic session 2015-16 a lut ding telkhiakna ding in Jan 13, 2015 zing dak 7:30 akipan Tuibuong Peace Ground ah Preliminary Selection Test om ding hi. Huai a telthei dingin class V passed (pasal & numei) April 1, 2015 tana kum 11-12 kikal hih ngaiding hi. Sports discipline ah Archery, Boxing, Judo, Taekwondo, Wrestling leh Weightlifting hiding hi. Preliminary selection test ah -800 m tai (run); 6 X 10m shuttle run; pull up; vertical jump; 30m flying start; standing broad jump leh bend & reach test tel ding hi.Huai a telnuamte’n DYASO office ah Jan 12, 2015 tan Rs. 100 pia in prescribe form laktheih ding a, thuchian kimzaw leng DYASO office ah kantheih ding hi.


Ui keihthu Consultative meeting
Lamka, Jan-6: Lamka leh akim lakah ui(dog) in mihing akeih tawh kisai thubuai tam ziakin Dr Thangchinkhup Guite, CMO/CCpur makaih in Jan 9, 2015 sunnung dak 1:30 in CMO Mini-Conference Hall ah Consultative meeting om ding hi. Huai ah CMO nuai a doctor-te, Dist Hospital a Doctor-te, DFWO, PHC a Medical officer incharge-te leh Nurse-te telding uhi.


Ui khahzan om theilou din enzui
Lamka, Jan-6: YPA New Lamka Block in New Lamka area ah ui ziaka si, damlou leh thubuai tamtak a om ziakin kuaman ui leh ganvulh khahzanlou dingin puang uh a, ui khahzan teitei a om a banghiam thiltung a om leh ui neitu in mawh paw ding hi’n taklang uhi. Zan zingsang in n YPA New Lamka Block makaih in Unit 11 a makaite’n New Lamka area ah drive nei uh a, ui kikhahzan 2/3 mukhia uh hi’n kigen hi.


Ui keihte’n Hospital zuandin theisak
Lamka, Jan-6: Ui in a keih kuapeuh in akinlam a Dist Hospital a OPD ahihkei leh Casualty a doctor -e kiang naihpih a, treatment bawl dingin CMO/CCpur in mipi theisak hi.

Aizawl telin Mizoram ah Wine Shop 12 honkhiak hita ding
Aizawl, Jan-6: Mizoram state sunga zuzuaknate kiang ah tunung sawtlou in state govt. in license kichiantak pe ding a, tunaichin a legislation kibawlthak ‘Mizoram Liquor Prohibition and Control (MLPC) Act 2014’ leng current fiscal sunga zat hiding chi’n Excise and Narcotics Minister R Lalzirliana in tuni’n gen hi. Lalzirliana in agenzelna ah zuzuakte kiang a license piakna ding ahihleh PSU tuamtuam - Mizoram Food and Allied Industries Corporation ( MIFCO) banah mimal khenkhat kiang a leng bawlsak hiding a, huai dungzui in Mizoram sung ah Bonded Warehouse 3 vel koih hiding chi hi.
Mizoram in alangtang a zuzuakna a phal dungzui in state sung pumpi a zuzuakna liantak honkhiak dingte govt. in enkai ding a, huaite bel Aizawl ah 4, Lunglei town ah 2, Dist. headquarter 6 ah khat chiat honkhiak hiding hi. Thusuak in agendan in Mizoram a MLPC Act-2014 zat hita ding ahihman in zuzuak theihlouh dia legislation kibawl ‘Mizoram Liquor Total Prohibition Act, 1995’ pen phiatmang hita a, kum 17 sung vingveng Mizoram in zuzuakna a phallouh nung in alangtang in khawpi tuamtuam ah govt. theihpihna tawh zuzuak hita ding hi.
Excise and Narcotics Minister R Lalzirliana in Mizoram mipite kiang ah zuzuak nuamte leh zudawn nuamte’n permit la masa ding in theisak a, govt. akipan permit neite kia in zu dawn thei ding uh a, amaute’n zu a leitheih ding ban uah a inn uah leng zu koih thei ta ding uh chi a, Dist. chih a Excise and Narcotics Department te office ah permit laktheih ding chi hi.

TUNI THUPI:
“Khem in om kei un, Pathian zaw khem vual ahi kei; mi’n a tuh bangbang uh a at ding uhi.”
-Galatia-te 6:7

manipurexressicon

User Rating: 0 / 5

Star InactiveStar InactiveStar InactiveStar InactiveStar Inactive

CEO in Manipur a final Photo Electoral Rolls suahkhia
Imphal, Jan-5: Election Commission of India (ECI) in January 1, 2015 akipan vote neithei dingte telin January 5, 2015 in final Photo Electoral Roll suah dinga a bikhiah dungzui in Chief Electoral Officer (CEO) O. Nabakishore in tuni’n Manipur a Assembly Constituency 60 a final Photo Electoral Roll suahkhia a, huai dungzui in Electoral Registration Officer (ERO) tengin leng amau bial a chiat suahkhia uhi.

CEO thusuak in a gendan in mipi leh voter (elector) te banah political party-te’ representative te’n ERO leh AERO office tuamtuam ah final Photo Electoral Roll (supplement) copy enthei ding uh chih ahi hi.CEO thuysuakin a taklatzel dan in recognized National leh state political party teng adin Assembly Constituency chiat a final Photo Electiral Roll (printed hard copy) leh PS CD-ROM version in PDF format(in soft copy) 1 chiat manbei a piak hiding in taklang hi. Himahleh ECI akipan thupiak dungzui in recognized political party-te kianga piak ding CD-ROM (soft copy) pen PDF format (voter/elector-te lim tellou) piak hiding chih ahi hi. Huailou in Assembly Constituency 60 a final electoral rolls,2015 leng CEO official website: www.ceomanipur.nic.in ah uploaded ahih banah ECI website www.eci.gov.in ah leng mipi in a et-theih ding ua om hi’n taklang hi.

MDC- te informal meeting nei
Lamka, Jan-5: Langkhanpau Guite, Chairman, ADC/CCpur in ama office chamber ah tuni sunnung dak 2:00 in kumthak 2015 adia masapen ding in MDC member te informal meeting neihpih in singpi dawnpih hi. Huai ah kumlui 2014 leh kumthak 2015 office kai hun ma a Jamkhanpau, MDC/Thanlon’ nu leh Kamsuanlun, EM/ADC’ pu sih suunthu puang uh a, ADC nuai a development scheme telin thu tuamtuam genkhawm uhi.


1st round IPPI om ding
Lamka, Jan-5: India gam pumpi ah January 18, 2015 in 1st round Intensified Pulse Polio Immunization (IPPI) om ding a, February 22, 2015 in 2nd round om ding hi. CCpur district a IPPI om hun ah booth 435 ah Divisional Superviser 19 leh Sectoral Superviser 86 duty ding uh a, naupang 36,679 vel zengdalna (polio) damdoi (OPV) vial 2872 dawnsak ding uhi. CHC leh PHC a Medical officer tengin IPPI tawh kisai Veccinator teng training pesawm ding uh hi'n kigen hi.


Kum 1 sungin positive 51 mukhia
Lamka, Jan-5: District Malaria office te’n January-December 2014 sungin damlou mi 12,431 sisan test uh a, huailak ah malaria positive 51 mukhiak uhi.Huaite malaria PF 38 leh PV 13 hi’n gen uh a,. July 2014 kha in malaria positive 14 kimukhia a positive tamna pen kha hi’n gen uhi.


India's Got Talent adin selection mu
Lamka, Jan-5: India's Got Talent kichi reality television series (Colors television network) ‘3rd Audition Round’ a telthei dingin Bethsy Gangte telkhiak in om a, January 13-14, 2015 sung in Kolkata a Audition neihna ah vatel ding hi’n kigen hi. Guwahati ah tuma in 2nd Audition ah Bethsy Gangte vatel a, huai hun ah telching in om a, NE akipan vatelte lakah amah telkhiak a om hi’n kigen uhi. Bethsy Gangte in tunaizek in Huihchim Best Female Artiste, 2014 Award sang ngei hi.


AE (Manager) 2 in join thak
Lamka, Jan-5: Electricity deptt/Manipur a AE (Manager) muthak Tuangkhanson leh Tingneilhing Khongsai te'n CCpur Division a Electricity office a sem dingin tunai zekin joined uhi.


An-ngawl a thumna om ding
Lamka, Jan-5: Halleluiyah Prayer Band, Town Area, CCpur-te makaihna in January 8, 2015 zinglam dak 8.00 akipan in Tuibuong a ZPCS Church ah an-ngawl a thumkhawmna 235veina om ding hi.
Huai ah Rev Limjathang, Adviser, HPB Town Area in lemna thugen ding a, Evan Thonkhansuan in thumna hun ah makai ding a, T. Letkhongam, Fin Secy/HPB in kipah thugenna hun zang ding hi.


Addl SP apan SP/CBI in kaisang
Lamka, Jan-5: T. Thangzalian s/o (late) T. Nengchin of Chapel Lane, Hiangtam Lamka in Kolkota a Karunamoye mun ah kum bangzah hiam Addl SP/CBI a sep nungin SP/Central Bureau of Investigation (CBI) in kaisang a, Nizam Palace, Kolkata ah Dec 31, 2014 in joined hi.


Ui hai in mi 100 val kei liam
Lamka, Jan-5: Kumlui a uihai natna (rabies) om nung in Nov-Dec 2014 leh tukum 2015 bul akipan mi 100 val ui in keiliam hi’n kigen a, amaute district hospital ah damdawi kapsak in om uhi. Jan 1-4, 2015 tan in mi 22 kei liam a, amaute casualty ah puaklut nungin damdawi kap a om in paisak hi uhi. Thukizadan in ui keih tamzawte gimsia in omkei mahle uh a sihlawh bangzah hiamte banah mi tamkhop in thuak lel uh hi’n kigen hi.


Ambulance piakkhiak hiding
Lamka, Jan-5: Hindustan Petroleum Corpn Ltd (HPCL) official te’n January 7, 2015 sunnung dak 2.00 in Hiangtam Lamka a YPA Gen HQ Hall ah YPA Gen HQ makaite khut ah Ambulance gari pekhe ding uh a, Rev L. Kham Kholun, Director (M)/EBC in latna nei ding hi.


AMCTA in Principal room kalhsak
Lamka, Jan-5: All Manipur College Teachers' Assn (AMCTA) pawlin Manipur govt ah khalawh khangsak ding leh demand tuamtuam a bawl uh govt in a lemsaklouh ziaka lungkimlou in strike sunzom zel uh a, tuni’n College tuamtuam a Principal' room chabi kalh uhi. CCpur govt. college a Principal’ office room leng AMCTA pawlin chabi kalh uh a, BA/BSc/BCom 3rd Semester Examination bel ngeina bangin student-te exam uhi. CCpur college a Lecturer khenkhat apan kizadan in CCpur college ah singtangmi lecturer mi 2/3 kia in AMCTA join uh a, govt in rule abawl zuih ding, kha lawh leng pung ding mah hi'n gen uh a, Lecturer tamzaw tham in AMCTA strike theihpihlou uh hi'n gen uhi.


Biometric photo lakna khawl ding
Lamka, Jan-5: SDO/CCpur office ah Biometric photo limlakna pailel a, software update dingziak in Jan 6, 2015 akipan in biometric photo lakna khawl ding a, software update zawh hunhun in photo lakna kipan nawn dingin thu kiza hi.


PTC Gen HQ Executive meeting
Lamka, Jan-5: Hiangtam Lamka a PTC office ah tuni zinglam dak 11:00 in PTC Gen HQ 3rd Executive meeting om a, Jan 20, 2015 a Mizoram Chief Minister Lalthanhawla in Sialkal Development Council a honkhiat ding tawh kisai PTC HQ in Mobilised team bawlkhia uh a, huai a tel ding in Jan 19, 2015 in gari 3 zangin Mizoram ah zin ding uhi.


SUUNNA :
L.Nokpau (92) h/o Ngaivung of New Lane, Bungmual tuni zinglam dak 9:00 velin teknat in si a, tuni’n Bungmual hanmual ah kivui hi.
Lamsonmung @ Michael (40) s/o T.Liankhohau of Lailam Veng tuni nitaklam dak 5:00 velin bathroom sungah sisa in kimukhia a, Jan 6, 2015 in Lamka hanmual ah kivui ding hi.
G. Thangkhanlal (50) of Tangnuam tunitak dak 7:30 vel in BP stroke ziak in si a, Jan 6, 2015 in Tangnuam hanmual ah kivui ding hi.

manipurexressicon

Page 1 of 42