UPDATES:

News

1st Paite Cultural Festival

Lamka, Jan-14: Mission Compound ah Jan 17, 2014 zinglam dak 9.30 in ‘1st Paite Cultural Festival, 2014’ sai in om ding a, Cultural Festival Pa in HN Amzathang pang ding hi. Chief Guest in Health Minister Phungzathang Tonsing; Inpipa in L Tualkhanhau, General President, PTC/GHQ; Intekpa in T. Singneng, ex-President, PTC pang ding a, Zintuntu in Letboi Valte, Chief of Zenhang Lamka; G. Thangkhosuanmung, Chief of Hiangtam Lamka; Thanchhung, Chief of Pearsonmun leh V. Zenzathang, Chairman, V/A Mission Compound pang ding uhi.

Paite Cultural Festival Program Committee a kipan in Zogam.com member teng hon chial uh ahi.

 

Paite-Culutural-Festival-Program-Page 1

Paite-Culutural-Festival-Program-Page 2

 

Zogam Thupuak | 13 July 2013

zogam thupuak logoZYA makaite’n joint meeting nei
Lamka, July-12: ZYA Gen HQ a Executive member teng, ZYA Lamka Block a President & Secy ban ah ZYA Lamka block nuai a Unit 11 apan President leh Secy tengin tuni zing dak 7:30 in joint meeting nei uh a, huai ah ZYA Lamka Block hon ding thu leh lopding thu telin thu tuamtuam genkhawm  uhi. Huai hun a  khuallian ding in  Health Minister Phungzathang kimuhpih ding uh a, ama’ hunlem  neih dan in ani leh a mun bikhiah dingin thupuk uhi. ZYA Gen HQ a President T.Goukhomang in ZYA Lamka Block a makaite vanzat ding tuamtuam leng pekhia hi.

Police te’n Jail ah KNLF koih
Lamka, July-12: Police apan kizadan in  46-A/R te’n July 2 in Jolzam khua ah KNLF cadre Thangminlun Singson (26) s/o Lutkhomang Singson of Gampiphai, Motbung mankhia in 9mm pistol (country made) 1 leh magazine 1 mukhia uh a, Moirang Police ah a piak uh  CCpur Police te’n a case lasawn uh a,  CJM in July 10, 2013 tan Police custody a omdin phalsak hi. Police te’n zan in CJM court ah dingsak uh a CJM in Jail a omdi’n a thutankhum ziakin Police te’n Jail ah koih uhi. Police te’n huai thu ah FIR No. 58 (7) 2013 CCP-PS U/S 400 IPC & 25(1-C) A.Act registered uhi.

CD 4 kits (reagent) hunkhop tung
Lamka, July-12: Manipur Network of Positive People (MNP+), SASO & CARE FOUNDATION in Union Health Minister leh Director General of National AIDS Control Organisation (NACO) ah Manipur leh Northeast telin Uttar Pradesh, Maharashtra leh Delhi a ART treatment centre tuamtuam te ah CD4 kits (reagent) neih dan taklang dingin ngen uhi. Huai ziakin  NACO in tuni’n Delhi apan Special Flight in Manipur ading CD 4 kits (reagent) hunkhop hong thon a, Dist Hospital   a Anti-Retroviral Therapy (ART) a zatding CD 4 kits (reagent) hunkhop leng hongtung hi’n  Dr F.Thienkhogin, DACO/CCpur gen  hi.

NACO guideline dungzui in ‘people with HIV/AIDS’ te’n 350 CD4 cell/mm nuailam CD4 count atun chiang in ART zat pat ding hi a, CD 4 kits (reagent) te people with HIV/ADIS te’n ART damdoi nethei ding uhiam chih test-na dia kizang hi’n kigen hi.

Lungthulien ah Medical Camp
Lamka, July-12: Dist Health Society/CCpur saina in July 13, 2013 in Lungthulien PHSC ah ‘Free Medical Camp’ om ding a, Dr H.L Liensang, CMO/CCpur in hongkhe ding hi. Huai  ah Dr Baby makaih in doctor khenkhat in damlou en ding uh a, damdoi leng manbei in pe ding uhi.

ASHA te’ lak ah hawmkhe ding
Lamka, July-12: Dr HL Liensang, CMO/CCpur in tuni’n Lamka apan Parbung CHC zuan a, Parbung CHC leh Lungthulien PHSC inspection bawlding hi. CMO/CCpur in Parbung CHC nuai a ASHA member 15 te’ kiang ah Mobile handset, Uniform leh ASHA passbook hawmkhe ding a, a zinkhiak sungun  Dr F.Thienkhogin, DACO/CCpur in CMO i/c len ding hi.

Free Hepatistic B/C screening
Lamka, July-12: Dr Ginzaniang leh Chinlunthang, Advocate & Social worker  saina in July 13, 2013 zinglam dak 10:00 apan sunnung dak 1 kikal Zoveng ah Free Hepatitis B/C screening om ding a, kits om dungzui in mi 200 tan test theih ding hi.

CDCTA General Assembly
Lamka, July-12: CCpur Dist Council Teachers’ Assn(CDCTA) pawlin July 13, 2013 sun dak 12:00 in Rengkai Community Hall ah General Assembly nei ding uh a, Langkhanpau Guite, Chairman ADC/CCpur khuallian hiding hi. Huai ah Functional President in Mannuamching, CEO/ADC pang ding a, CDCTA member te’n thu poimawh tuamtuam genkhawm ding uhi.  CDCTA member pension khin mi bangzahhiam kiang ah Pension- cum- Gratituity (PCG) leng hawmkhe ding uhi.

Tui in check-dam phusia
Lamka, July-12: Vuahzuk ziakin Lanva lui naktakin khang a, tuni in Pearsonmun khawsung a Lanva lei nuai a protection wall kibawl kichimkhia in, lei(bridge) foundation siatlouhna dinga kum 2 paisa a check-dam kibawl leng kisia hi.

Waiting Shed bang hihsia               
Lamka, July-12: Lamka Building Society(LBS) in New Bazar a Waiting Shed abawl uh pawlkhat in a bang(wall) hihsia uh a, melhem takin koih uhi.Huai  Waiting Shed omna Bazar lai a om ahihman in mipi vantang leh gari ngakte’n tawldamna dinga zang in phatuam mahmah hi’n gen uh a, huchihlai in khel gamtatte’n 2vei a hihsiatna uh hita hi.

Workshop on Project Writing      
Lamka, July-12: Indira Gandhi Institute of Post Graduate Education and Research centre saina in Axis Bank building 2nd floor (opposite Airtel Office) ah July 15-16, 2013 sunnung dak 12.30 akipan NGO leh organization tuamtuam makaite adingin Project Writing tawh kisai workshop om ding a, Resource Person in Dr. Chinkholal Thangsing, Founder President, Touch of Foundation telin mi tuamtuam tel ding uhi.

B.Vengnuom Y/U in thusuah
Lamka, July-12: B.Vengnuom Youth Union (BVYU) a President Jamkhokai Doungel leh Secy Daniel Haokip te’n Press Release abawl uh tungtawn in a taklatdan un July 8, 2013 nitak dak 9:30 vel in Thangminlen Haokip s/o Jangkhai Haokip of B.Vengnuom leh a tanau mi 2 tawh Chiengkon a om apu damlou veh a kiklam un Zoveng culvert mun ah S.Kapkhanmuan Ngaihte(ZSF President) leh mi 10 vel in ana khamkhawl uh a, helmat zang in Thangminlen Haokip’lu  khen uh a,a gari zat Honda Pleasure(MN-02A-1748, Chessis No. MBLJF 16EO9FL 15897 (silver colour) ana tol mangsak uh chi uhi.Azing in Zenhang hausapu kiang apan  lakdi’n theisak uh hi’n gen uh a, hileleng Zenhang hausa pu’n theikhalou hi’n gen a, huaitak in Police a FIR bawl nung zekin Police te’n gari kihalsesa in  Station ah pawlut uh chi’n thusuak ah taklang uhi.Thiltung  B.Vengnuom Youth Union in lungkimlouhthu puang uh a,  ni 5 sung a thil omdan hihfel ding in  hun pia uh a, huchi ahihkeileh BVYU in mawh  pawlou ding a,S. Kapkhanmuan Ngaihte( ZSF President) mawh paw ding chi’n  ah taklang uhi.

Police apan kizadan in bike kihal tawh kisai in July 9, 2013 zinglam dak 11:30 in Steve Letminlal Haokip (25) s/o Jangkhai Haokip in Police Station ah complain bawl a, Police te’n FIR No. 62 (7) 2013 CCP-PS U/S 384/34 IPC registered uh chihthu om hi.

&&&&&&&&&&&&&&&&&&&&&&&&&&&&&&&&&&&&

IMPHAL NEWS
Chief Minister tuni’n Delhi ah zin
Imphal, July-12: Chief Minister O. Ibobi in tuni’n Imphal nusia in  Delhi ah zin a, UPA Chairperson leh Congress President Sonia Gandhi in Food Security Bill tawh kisai genkhawmna a tel dingin a sap ziaka zinkhia hi’n kigen hi. July 13, 2013 in Chief Minister leh Congress PCC chief teng kimukhawm in Food Security Bill tungtang genkhawm ding uh a, huai ah O. Ibobi leng tel ding hi. Congress in govt a bawlna state a CM teng leh PCC chief-te kimuhkhawmna ah Union Minister hunkhop leng tel ding uh chihthu om hi. Chief Minister Ibobi bel July 17, 2013 in  Imphal hongtung kiknawn ding hi’n kigen hi. i.

Imphal zuan Rajdhani suam in om
Imphal, July-12: North AOC a Inter-Bus service Assn pawlin tuni’n press conference  sam uh a, Nagaland state sung Petima mun ah meltheihlouhte’n  Imphal zuan Rajdhani bus (No. MN04/8512) suam in passenger-te taksatung apan Rs. 20,000 laksak uh ahihdan taklang uhi. Bus driver Nanao in a gendanin mi bangzahhiam in gari khamkhawl in a sungah lut uh a, passenger-te vaulau  kawm in sakhau uh check in sum amuh peuh uh laksak uh chi hi. State govt. in kintaka panla a, passenger leh driver-te bitna pe dingin leng Assn. Executive Member Anil Kumar Meitei in ngen hi.

Manipur mi in Mr World 2013 ngah
Imphal, July-12:  Greece khawpi Zakynthos ah zanlam zekin International Natural Bodybuilding Association (INBA) saina in ‘Mr World 2013’contest a contestant 150 lak ah Dr Ngangbam Shanti kumar Meetei in ‘Mr World 2013’ title la hi. Dr Shantikumar tulelin Taiwan khawpi Taipei ah om a, aman 'Mr Universe' leh 'Mr Asia' chihte leng title ngah khin a, Taiwan National Body Building Championship 2013 leng ngah hi. Khangthak, bodybuilding lam lunglutte’n khamtheih himhim hihlouh ding ahihdan Dr Shantikumar in gen hi. Aman De Lin Institute of Technology, Taiwan ah English professor sem a, Taiwanese Chinese citizen khat tawh kiteng in  ta 4 nei uh a, July 27, 2013 in Imphal hong pha ding chih ahi  hi.

Royal Palace piakkhiak sawmlou
Imphal, July-12: Manipur Cabinet thupukna dungzui in state govt in kep leh puahhoih dingin  Manipur Lengpa omna mun ‘Sana Konung’ lak dingin thupukna om mahleh  Sana Konung Semgatpa Lup in piakkhiak hilou ding chi’n puang uh a, naktaka dal ding uh hi’n gen uhi

Mine(bomb) tawh mat in om
Imphal, July-12: Moreh ah galvan zuak a kipei om chih thuguk zak  dungzui in 26 sector nuai a 9 A/R te’n zan in Moreh a General Ward No. 2 Dalpatti mun ah search operation bawl uh a, huai  ah border fencing lam zuan apai pasal khat ginlelhhuai sa in thudotna ah Pumkhanlian @ Lianpu (40) s/o Ongou of Ngamphalong, Tamu hi a, amah apan anti-personal mine 1 leng mukhia uh a, Imphal Police te’ khut ah pekhia uh hi’n kigen hi.

Numei bawlsiatna deihlou in lampi zui
Imphal, July-12: Indian Crime against Women Organisation pawlte panlakna in Sega Road Takhellambam Leikai airport a Crime Women office apan Lamyanba Shanglen tawn in student tamtakin  Palace gate tan lampi zui uh a, huaizawh in public meeting nei uhi. Student te’n placard tuamtuam tawi in state sunga numei bawlsiatna kibehlap  mawhpaih kawm in slogan tuamtuam sam uhi.

MLA-te criminal case nei omlou
Imphal, July-12: Supreme Court  in ‘Representation of the People’s  Act’ dungzui in MP/MLA himhim  nekguk leh dan bawhsiatna tawh kisai a mawhpaih a omte  ahihna uh tawpsak theih dinga thupuan abawl dungzui in Northeast MLA tamkhop awk mahle uh Manipur apan kuamah omlou chih ahi hi. Thusuakin agendanin Assam MLA 13 in criminal case nei uh a, Arunachal Pradesh ah 2, Meghalaya ah 1, Mizoram ah 4, Nagaland ah 1, Sikkim ah 1 leh Tripura ah 6 om hi.

HTC in panla di’n nawh
Imphal, July-12: Hill Tribals Council(HTC), Moreh in (late) DK James of Laiching Minou, Chandel district thahna tawh kisai tunitan panlakna gahsuah omlouh lamdang sakthu puang kawm in muanmawh a om leng matkhiak mai theih ding ahihlai a tutan  kidiah ziakin thudik a vaihawm hihen, chi’n govt. nawh uhi.

Loktak Lake puah hiding
Imphal, July-12: Rajesh Kumar,IAS, Principal Secy(Tourism) in Rs. 140 crores zang in state sunga tourism dinmun puah hidi’n gen hi. First phase in Sendra leh huaikim ah Rs. 90 crore bei in 5-star hotel, student park, shopping mall, banking leh thil tuamtuam bawlkhiak hiding a, khualzinmi(tourist) te etlah tham hiding chi hi. Aman agenzelna ah Takmu-Sendra kawmtuahna ah lampi hoihtak bawl hiding  a, khualzinmite’n mun tuamtuam a et theihna ding un huaikim ah Rs. 50 crore zangin electric car koih hiding chi hi. 

Lamka mipi te sousang!

Numei leh pasal vuaktang a om lemlak thehzakte ziakin buaina sousang
IRB personnel 4 matkhiak in om: mipi thangpaite’n PS buden


Lamka, June-30: Khuga Dam area kim ah numei leh pasal kilawmlou taka bawlse kawma lemlak June 25, 2013 nitak dak 7:00 velin social media (internet) tungtawnin khahkhiak hi a, hiai tawh kisai in Police te’n IRB personnel 4 a matkhiakte uh mipi khut a pekhe dinga phutna in tuni nitaklam in Lamka Police Station kong ah mipi tampi kipunkhawm in buaina piang a, mipi leh Police-te kinawhtuahna thupitak piang in Police te’n round tamtak blank fire bawl uh a,mi ahunkhop leng aliam om hi.


Tuni sunnung in Hiangtam Lamka(Vengnuam) a CCpur Joint Women Organisation(CJWO) office ah meeting aliamteom a, huai ah student organisation-te leh civil society leader hunkhop tel uhi. CJWO President Sawmi in agenna ah thil tungtawh kisai innsung dongta a kihoulemna om leleng CJWO in hichi maia koihlou in a case enkaitou ding hi’n gen a, complaint bawltu social activist CT Lian Guite leng thuap touzel ding uh ahihdan puang hi.CDSU te’n leng thiltung tawh kisai in CT Lian leh CJWO te’ panlakna kithuahpih leh support uh ahihdan gen uhi.


Huchih lai in, CJWO lam apan kizadan in Khuga Dam a IRB omte’n numei leh pasal sex a kipawllai leh vuaktang a omlai photo la in social media(internet) tungtawn a khahkhiat louhna ding in Rs 1000 la in sumdawnna a nei zel uh hi’n gen uh a, IRB te’ thilhih hoihlou Pathian in awinawnlou in hiai teng tung ahi chi uhi. Numei leh pasal vuaktang a omlai lem khahkhiat tawh kisai SP/CCpur in a genna ah thiltung a serious mahmah ziakin police in ngai serious mahmah chi a, FIR kibawlsa pansan in U/S leng khek lamdang leh a poimawh bangbang a bawl zel hiding chi hi. Aman a genbehna ah Police-te’n a thuaktu (victim)te’ statement hoihtak in la ua, tuzing in Khuga Dam ah spot inquiry bawl in amun mahmah ah thil omdan suizui in 1st IRB personel 4 leng tuni sunnung dak 3:25 a matkhiat hi’n gen a, govt dan (law) dungzui a vaihawmkhum hiding chi hi.


Police te’n IRB personnel 4 te’ tungah FIR No. 51 (6) 2013 CCP-PS U/S 354/341/34 IPC registered uh a, apoimawh bang in U/S behlap touhzel hiding chi’n SP in gen hi. Khuga Dam a om 1st IRB te’n numei leh pasal vuaktang lim a khahkhiat thu uah matkhiak a om Hav Thyam Chaoba Singh(47) s/o (late) Th Khongnem Singh of Khong Ahanbi, Thoubal; Ningthoujam Dokendro (43) s/o N.Pishak Singh of Shyam Chirag Mayai Leikai, Hav T.Sonlian Tungdim (26) s/o Ginlianmang of Mata leh Hav Nengsuanmung(35) s/o (late) L.Gouchin of Sahei Road, New Lamka hi uhi. Nitaklam dak 5:00 vel in mi bangzah hiam in Mata khua zuan in Hav T.Sonlian’ te inn petrol zangin halman zek uh a, mipi’n phelhmit in inn halsawmte’ laka tel 1 mankhia uhi.


Police station ah mat a om IRB personnel mi 4 te’ statement police te’n a laklai un Police Station gate bul ah mipi’n mat a om mi 4 te mipi khut a pekhe ding in phut uhi. Nitak dak 6:20 velin mipi’n Police Station suangin deng uh a, Police leh IRB te’n tear gas leh blank fire bawl uhi. Nitak dak 10 tan in leng mipi sousang mahmah in police station gate suang in kiden huan uh a, gate tung a kitak Lamka Police Station sign board a densiat banuah, police station lutna gate bul mei in haal uh a, police station sunga traffic police te’ office leng mei in halman uhi.


Police te’n blank fire abawl ziak un Thangnunmuang(26) s/o G. Khanthong of Zenhang Lamka thautang in a tawbou veilam kha in pailet a, Obed Thangtansang (25) s/o Khamzapau of Zenhang Lamka leng thautang leng in a lusip nawkkha a, Lulun @ Mika (18) of New Lamka leng liam a, amaute Dist Hospital ah admit in om uhi. Aliam mi 6 vel lak ah midangte bel a serious louhziak un dressing bawlzawh in Doctor te’n paisak uhi. Tuni taka Police station a buaina ziak in Imphal leh Moirang apan Police commando te’n gari 10 vel zangin Lamka hong delh uh a, nitak dak 11.00 velin Police station tung uhi. Nitak dak 11.00 velin mun khenkhat ah patau dak tanpha a khen ding pawl om a,mun tuamtuam apan mipi hon in Police station a zot nawn ziakin Commando hong tungthakte’n nitak dak 11.15 lakin thau tamvei kuamtak kang ging uhi.


Tuni nitaka thil om ziakin Assam Rifles-te telin Para-military force tamtak leng Police Station ah om uhi. Thiltung zakphet in Ginsuanhau, MLA (Singngat A/C); Langkhanpau Guite, Chairman, ADC/CCpur; Kamsuanlun EM/ADCC leh student makai tamtakin police station delh uh a, mat a om IRB personnel-te mipi khut a pekhe dia ngen mipi thangpaite tanpha tawh kinawktuah kha uh a, himahleh akhawnungin awl-awl in vengthei hi. Huai hunah, nungak-tangval mi 5,000 valin police station tanpha luh sawmin kiphin uh a, Tipaimukh road leh Tedim road ah mipi pumdim uhi.

MORE NEWS: http://www.zogam.com/news/zogam-thupuak/1823-zogam-thupuak-1-july-2013.html