UPDATES:

S5 Box

ZOGAM.COM Login

Ka Gari Accident thu

Cycle heekthei sam mahleng motor cycle bel ka na heekthei kei hi.Delhi a motor cycle heek ding chih innkuan pihte muan ngamna leng kitangkha lou ahihman in ka na sintum  kei hi. Car ka neih main  driving school ah ni 14 bang zilsam mahleng mi bang in ka siamthei pah kei hi. A gendan un motor cycle hekthei saten manbaih uh a, dikding in leng ka gingta hi. Huchin ni 14 ka zilzoh in thalopna a dim ka himai ding e, car ka va lasam ta hi.

Kisiam nailou deuh ahihman in ka lawmpa Mangkhum ka kiang ah tuangsak in aheek ka zilzel hi.Nikhat amah a hong man thei kei a, ken leng zingkal khat lakhia in ka va taikhia hi. Ka koihkik deklam in inbang khat ka vaphu ek a, side langkhat kuak dekdak hi. Kisinna neitou zel in Pathian ni khat kikhawm ding in ka  tawlkhe nawn a, a malam side langkhat smart salua ka hihiam, bus khawllai  ka va phu a, Okhla workshop lam ka tungdaih hi. Insurance om mahleh sum singkhat phalou deuh ka seng ban hi.

Sunday kikhawm ding in Mangkhum toh ka kuan nawn a, thautui thunding chi in South Extention Part II a HP petrol pump lam ka manoh pih hi.A mun ka tun dek ka engine ka sisak mawk a, ka start nawn le ka ma petrol hon thunsak dipa a petrol pump metre reading box  toh ka phubelh hi. A khe tul  a dulh helhal a, bihari te ahihziak a, na sa taktak hia chih theihlouh in hong kap ta hi. Enlah lohding dan kithei tuanlou hi.

Hospital ah pawding chih leh a  manager pa uh ngak ding a chi tinten mawk uh a, pilvang kisa sim uh hia, police te 100 number ah ana call ua, PCR van hong tungpah uhi. AIIMS trauma center ka phut khak pa puak in omta hi.Chimoh kisa gendi lah theilou, I vaipau siamlouh toh kiding belbul mai hi. Hiai hun ah zaw car ana kineikha dah maile zaw hiai bang teng kituak lou di hia.. Vualzawlna hilou vuallelhna hizaw ding eive maw chin ka om leiluai hi.

Mangkhum in “Bangmah chilou ding I hi, lungkham ke’n” chin hon khamuan den hi. Chimoh beidong kisa in UKamsuan ka phone leh inn a repairing work omding ziak a kikhawm lou ana hizenzen a, hon awlmoh in hong taitou pah hi. Amah hong tun in lungsim bang nuam deuh hi, Police ten Home Ministry apan ahihdan atheih un zahtakna toh etbawl pah uhi. I buai mahmah hun a zaw Pathian in panpihtu ding hon bawlsak zel hita e chih muhtheih in hong kilang mawk hi.

Huaini a Dwarka EBC biak inn a taksap awnghu dan a projector enkai ding a Pastor pan muangtak a hon sep ahi. Himahleh ka lungsim ngaihtuahna bangmah omlou, om dedu petmah ahihman in hong kikhawm manlou ding ka hihdan leng ka gen tuan kei  a, ka ngaihsut kikchiang in ka kisuanglah mahmah hi.

AIIMS trauma centre ah ka bihari phutkhak pa Police ten a va pawlut ngei ua, hichibang accident case te “medico-legal” case a gelhlut ana hi. Hiai medico-legal case neihkhak ding lauhhuai petmah ahihdan  police ten gen hi. Ka naunu leng huaini a shift duty ana omchet ziak in a report bang hihiam chih ka ensak ua, ‘normal” chih hon hilh in lungmuanna hong lian tuan  hi.

Huchin policete hon lemgel sak bang in case file louh a kihoulem ding in Hauz Khaz Police station ah ka vat u threpthrap uhi. Bank a sem ka hihdan gen kha chitchiat ka hihziak in sum haupi ding khawng in hon gingta ahimawk ding ua, Rs 30000 tak hon ngen uhi. Tam sa law mahmah  ka hihman in ka hehdek sim mawk a,  Usuan leh Mangkhum in  “ei a hehding pen hilou ihi” chin hon khou hi.

A hon ngetzah uh h pehial lou in kihou lem in case file lou ding in suai ka kaita uhi. Accident man tam a, chin zongsat huailou hetlou hi.Ka phut khakpa damhoih hia, a zing a semnawn pah hia bang chi hia chihleng ka theizui nawn kei a,damding in ka koihmai hi. Himahleh huai mun ah chu petrol thundin tuni tan ka kuan nai kei hi.

Ka  ngaihsut kikchiang in vangtah bang sim mahleng ka phut khakpa toh kihoulem thei chihbang hamphat huai ka sa hi. Ban ah  hong buaipih tawntung  UKamsuan huai ni a biak inn ana kailouh sese Pathian in kei panpih ding a na  koih ka chi hi. Hiai article tungtawn in UKamsuan tung ah lungdamthu naakpitak in ka gen hi. Amah kia hilou, Mangkhum le! Amaute ziak in Pathian min pahtawi in om hen aw!

Khopi a khosa ihihna uah thil peuhmah a aggrieved party ihih ngeingei leh police 100 dial pah ding hihdan ka mukhia hi. Hiai call pen mawk beisak theih hilou, monitoring omden ahi. A complaint tu in a lungkimna tan a gelhthoh a piak kei leh call closed theih himawk lou ahihdan in police ten gen uhi.

Tuahsiat pen kikhel zenzen lou himah leh mihing in I siamding bang a siamlouh ziak a zong hithei hi. Kei leng ka siam ma in maingap lawtel keileng hiai bang tuaklou maithei ding hiveng.! Tuni chiang in bel huailai sang in siamzaw deuhta ka hihman in huailai a bang chi hek ka tel de aw chih khawng ka ngaihsun sek hi.Khenkhat in nuihzat huai hon sakpih uh hiam maw chiamnuihna in gen ua, i experience taktak le zaw nuihzat huai hetlou ahi chih kithei chiang kilkel hi

.
COMMENT (10) PHA TA..  
  •  
  •  

#10#10 adule » 2012-07-06 03:07

khaih na mai mai lou dan nahi maaw lompa!!

gari heksiam na dia khat vei accident ngai tei tei chi hive un tun tuh na nak siam ta mah di !!

vaite loi otdan kha mai mai lou aka !1



hiai ziak ahidi maw na no bang na khek !! :lol:

  •  
  •  

#9#9 moxiac » 2012-06-25 07:02

Na thil gelh ka sim leh ka lungsim a om mawk khat , nang thil gelh toh kituak lo deuh chu bang hilele ka ngaihdan mawkmawk khat.. gari ka hek theih na kum 15 bang val ta na a, accident di hun in hon phak in zo(hundang a khatvei le ki puk le ki puk ngei lo pi) sih lang sanga tam zo thamtham in accident belbul theih mawk hi. Tuahsiat na i chih I siam leh I siam louh ziak ahi kei.

Vai te na suk khak pen kha poi mahmah khat eive ..hilele eimi hon panpih thei ding a om hamphat mahmah na eive. Nidang in lawmte Mizo te khat in leng nitak a bike a ka pawt ua leh vai te khat hon phu kha, a tung bang a na le sa lo, damdoi in tun tak in a si hong bang zezen. Phu ta lolo hicih d lam thei le phut lup vet din a hoih na e chih ut huai phial d khop a huat huai uh mah ahi :D

  •  
  •  

#8#8 rimkus » 2012-06-21 15:09

Vaite khah lei a lei kou sek uh eimahvoi, neuchik hilehle, ,,, Anuai ah Heutupa@mangno hon gen te kha ka AMEN thei mahmah ve.

  •  
  •  

#7#7 tawtorot HD » 2012-06-21 14:58

puson, na gari na siam toh kiton in alui man d k chi he3. anyway, two wheelers siam ziaka 4 wheelers te maingal ph2 louh d chih hng kilangsak mh2 ei..

  •  
  •  

#6#6 pearl » 2012-06-21 12:16

Na hon gelh hoih lua...

  •  
  •  

#5#5 mangno » 2012-06-21 01:13

Hiai a pan i zil theih hi a ka theih chu: Saptuam lam ah panna nei lou in, social (for eg SSPP) lam ah ki helna nei kei leng le, i society kipawl na him2 a iva ki hel/tel a, mi i ki theih sak ngai ahi.... khopi khawng ah i om chian a poimoh mah2. Etsakna: Zoson/David bang u kamsuan in a theih ngei louh hileh, eimi hileh leng va kuan khol lou mai thei, mi gina lou/society lak leh biakinn khawng a muh ngei louh chih dan lungsim nei mai thei maw... Hiai apan i zil khaik poimoh kana sak gige: I society lak/i mi isa lak a kihel di/Pathian thu ah hat zou lou hilengle eilam kipawl khawm na dan a ngaih a kikhop di... kei ka om..chih bek midangte' lak a ki theih sak poimoh ahi...

  •  
  •  

#4#4 mangno » 2012-06-21 00:22

Neu apan, petrol in Rs. 7/8/- khawng ahih lai a scooter khawng ana hek kha ing a, driving chu huchi tel a ka zil lam ka thei kei vanglak. Delhi a ka tuah khak...Moti bagh fly over nuai ahi, kei fly over a left la dia tai, punjabite khat embassy a driver bike a hong tai in, fly over nuai a U-turn om sek hiven, u-turn la dia ka ma ahong tai mawk...eile ki ging man lou phusuk kha...a liang guh kitan, damdawi inn a tonpih, sen-lepai teng seng, maban aki etkol nang sum pia... Medico Legal case or police a FIR a bawl louh nang ua...call theih teng2 call, a hong hoh thei teng hong hoh uh. Ka gen nop chu, Delhi/khopi khawng ah bang hiam i tuah ni in, ei mohna hikei leh le, ei hon panpih thei di poimoh mah2 ahi... Pilvan ziak a tuah louh di chih hi tuan lou hivaw....

  •  
  •  

#3#3 kgualnam » 2012-06-19 14:30

Car kazillai non phawksak kachi. Katate adima tuang neihnaih uh Red light a khawl, hong kihongta, first gear a koihin accellarator tum zutzut a kasiikleh le taingeilou, kanunga Gari tengin hon horn khum uh, atawpa agari ua pan hongkum khia a kakianga hongdingdim uh "Kya kar raha he" hochi loiloi uh, bangziak hiam kachihleh Gari Engine anamit himaimah... he..he.

  •  
  •  

#2#2 Kumthei » 2012-06-19 07:44

Theih leh zil di tam pi hong lak ciai. Heu2pa'.

  •  
  •  

#1#1 thanglian » 2012-06-18 21:52

Na thiltuah non share a, thupi mahmah e
Midang hileh, gen utlou a ki iim di hizomah lai ahi
I thiltuah, a tuam deuhte ki share in, huai hun in hichih khaleng chihte ki share theizel le chu, a tuakkha i om chia, a gamtat didan kithei deuh di ahi
Gari accident bang i tuah leh le, pawng pau hetlouh di achi ve ua. Kei' hihkhelh hi chihdan le bangmah va gen selouh di himai, a khonunga i awkna di hikha thei. Pautamlouh di chih himawk dan eive, va genveng thei di ihihkei vanglak leh maw.
Insurance company te le huaimun a call pah ngaldi. Huaiziaka i insurance policy paper te hoihtaka gari a kep a, huaia a contact number uh le chiangtaka gelhkhiak di.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING