Bangalore Zinna

User Rating: 0 / 5

Star InactiveStar InactiveStar InactiveStar InactiveStar Inactive
 

Bangalore Zinna:
By David Son

davidson new
Akoi a phoren zinzou lah kihisam lou ahihchiah I zinkhakna sunsun te kigennuam law sam hi.Lamka mu ngeilou bang kihileh muh masakna pen ah Police Station sak a traffic point limlak pihdia etlah huai ka sak mahmah ahi. Tukum in khualzinna ding hun lem ka mu a, Bangalore ka zinkha hi.

EBC BANGALORE KIKHOPNA. Ka hotel tunna apan hilh a a ka omdan in dakkal khat khawng a gamla hihtuak a, huai hisap a a ka kuanleh minute 15 in ka tung a, Sunday traffic tamlouh ziak hihtuak hi. EBC Bangalore Pastor T Tunson , ka khua uh Bungmual a Class II ka zillai a ka heutu uh , a handwriting nalh ka sak mahmah ahi. “THE” blackboard a gelh nalh law petmah ,tutan in ka mitkha ah mangnai lou hi.

EBC Bangalore kumnih chinna lopna aneihlai un leng ka va kikhawm kha a, tuni ka kikhop khak nawnna ah Sunday School Pastor in sinsak hi. Sinlai toh kisai interaction nuamtak zui a , Siam Valte in “Setan in Pathian thu tungtawn a Jesu Khris khem a, eite'n I hinkhua ah Pathian thu tungtawn a khemna tuak thei gige ihihlai un, Bangchi dan a Pathian a pan ahih leh lou theihchet theih ding hiam? “ chih dotna nei hi. Very valid question !

Bangalorete hifi deuh, kicheina sang mahmah a ka nakoih mawk ahi. Ahihhang in kikhawmte lak a huchidan a kicheina lam uangbawl lua ka muhet kei hi. Theih mahmah lawmte bang Chappal bun in hong kuan uhi. I neih bangbang a kichei kia hilou a I comfortable dan a kichei a , I lungsim put Pathian biakna thupi tak khat eive chih ka musuah hi. AC nuai a kikhawm kihilou ahihman in kholum lai a khedap buh threpthrap bang le tawlhuaipi khat ahi. Huaiziak in kicheina uangbawl mahmahte sang in innlam a sungte uh panpih zouzaw ding in ka gingta hi.

CHINKHENTHANG SAMTE TOH KIMUHNA: Thado Gal 1997 in Chinkhenthang Samte toh hoihtak in ka kithuahkha uhi. Comic book a Zogam Hero Dozakap ngaisang mahmah a, Zogam phurpih mahmah ahihman in “kei Dozakap “ kichi zel hi. Huchin Pawl Sawm ka zohtuak in omna mun kibang nawn kei mahleh laithon khawng kikhak tuah zel in ka om ua, tunung chiang a zogam zun ding chih a lunglutna pen leh gentam pen hi.

1999 kum a Infamous Rayburn Incident ah ka lawm bangzah hiam in damsung a mangngilh ngeinawn louh ding thiltuak uhi.Hiaiziak in Khekhen inleng Dozakap chih min deihnawn hetlou ahihdan laithon in hon gen hi. Naa sa mahle uh tamzawten lungsim ah “FORGIVENESS” neithei uhi. Bangalore ah ana khosa a, zi le ta nei in om chih ka theihna sawtta mahleh tu tung in amah vehna ding hunlem ka mupan hi.

Zogam Dozakap lungsim pen Pathian Galkap lungsim in kikheng vilvel hi. Nidang AK 47, M-16 thautang chih gelh a kikum gige te pen tu in Pathian thuBible chiltui kaizen in ka kikumthei uhi. Na naupan zahpih in omkei hen chih zaw dikngial e, Bangalore saptuam ah Missions Chairman hihna leen a, Pathian thu naakpi tak a ana sui detdet ahihdan ka houlimna apan ka mankhia hi.

Lunglutna kibatpihte toh houlim anuam petmah hi. Kihouna hong limsang dedeuh in Bible version tuamtuam hon pholhkhia a, Niteng Kros puak I chih eimah hinkho lui kilhlupna ding a puak ahihdan amah hon gen in ka chiang pan hi. Amah apan Bible simding dan ka zilkhia a, hoh fuh ka kisa petmah hi. Huchin ann nekhawm in ka hotel tunna lam ah giakding in a inn uh ka nuse ta hi.

JUSTIN THAWNZAKHUP TOH KIMUHNA: Chihtakna leh kuhkalna example zongleng Justin Thawnzakhup kawkgeih theih mai di e! IIT Delhi ah B Tech a zoh in Pune ah sem a, Mumbai ah kisuan hi. 2008 a Mumbai a seplai in ZCF kikhopna ah khatvei ka kimukha nawn uhi. Huchin IIM Bangalore ah MBA hon zoukhe nawn hi. “Khup , kong hoh nuam, na inn gamla hiam?” chia ka phone leh gamla khollou a chi hi. Huchi gamla law khollou ahihleh chin auto ka la a, fare Rs 200/- bang tungmawk dan ahi. Bangalore Auto tuan mantam mahmah eive!

A roommate pa pailai tak tuakkha ka hi a, deih hileh car hoih penpen neizou ding dinmun a khosa ahi. Himahleh YAMAHA luideuh, a gin bang nalhsim zezen khat in Restaurant ah ann nedin hon taikhiak pih hi. Houlim bang a siam mahmah a, nu-le-pa zahtak a poimoh dan, lohchinna ding a hinkhua principle neitak a khosak a poimoh dan gen hi. A hinkhua zat dan ka muhna tan ah a nulepa lallukhu khusak den hi.

LENNA TUANNA: Neihteng kisuuk zen a Indigo zou hamhamte lak a khat ka hihziak in Air India ka tuanna thupi ka sa lawmawk hi. Row khat ah mi kua tuthei a, Pa Kam ( LT Ngaihte IFS) in a thugelh lui khat ah first class a sawngtung ahi chihbang muhnop huai chi ka sa! Ei “cattle class” tutna lam zotna ah executive class te tutna a nop chitdan kimukha hi. Leenna tuang chiatchiat Executive class a tuangkhak ding uthuai se hi. College kailai a Bus khamzen tuanlai toh teh in lenna tuan chu nuamzaw deuh hi. Tulai a siamsin ding a Indigo ziahziah zouten sepna neihchiang a Executive class a tuangzou din hong hahpan le uh deihsakhuai hi. Aziakbel Executive class melmu khalel Zomite condemned lah kihisam lou a..