UPDATES:

S5 Box

ZOGAM.COM Login

Limlang

zosonHun bangtan hiam ka selung ah vaibang thamden a, genkhiak di lah hon bom luailuai nuamlua bang omkha ding chin ka kidek a, himahleh khua hunte hong kivei a phalbi huih vot hong nun hiauhiau toh kiton in lungsim sa hehu a omkhak leleng khovot douna a phatuam ding chin ka hon gelhkhe phong hi. Kum bangzah hiam paita in news khat a mi khenkhat Paite pau a siamlouh dan uh hong kisuah a, suakkhak a omten nuamsa lou uh ahihman in buaipih ngai ana suakngei hi. Tun vaipau siamlouh a poidan hon gelhkhe nuam hi ing. Kei ngeileng vaipau siamlou ka hi chih kong kigen chiang masa hi. Ka siamlouh man in buaihuai hun omsek hi. Tua vaigam a khosa , tunung chiang a khosa ding a kisaten i siamkei leh tuaktou zel laiding I hi uhi.

Lamka a kipante paudang i siamlouh ziak in Imphal I tunphet chiang in mikhual suak lawpah I bang uhi. Adandan omlai ve, Manipur chilou a direct Outer Manipur chithei ding a hamphatna tang tampi I om ziak un Toupa min phat hang.

ST quota ziak liauliau a solkar sepna mu, kipak sim heuhau a sepna a hon join chiang un vaipau siamlouh a poidan theikhe pan tampi ki om hi. Qualification BA MA hitawk lechin le na nuai a sem vainu, vaipa na deih dandan a naa na sepsak theihna ding in amah theihsiam ding pau ana gen ngai ahi. Na tai ut leleng vaipau a na tai ngai hi. Na gennop teng na nuai a sempa’n a theihsiam kei leh hon zahtak ding bang tak in hon zahtak deklou ding a, seppihte lak ah na thupai ding bang in thupai hetlou ding na hi. Hiai pen Bank hin, North Block hin, Parliament a semten leng a gennop hetlouh hang un a tuah vek uh ahi.

Office a semte kia in buaina tuak I sa kha de aw..Khawlak pawtna ding in auto I dawp a, mel et a hon maingap simpah ahihman un rate sangdeuh hon genkhum uhi. Nang la a rate thei a inntek huntawk kisathou na hihziak in na deek a, vaipa dangnal in hon dawng ziahziah a, na hehtha hongsuak in kisel pih utmah le chin na vaipau in daihnawn kei a..Abuaisia chu na hipeuh mahve!Na vaipau theihteng in bei mah lechin auto pu, lai theilou nangawn na selzou kei mawk hi. Singtang lungsim hong suak in na khut bang na tumsim man a, hilele khopi a om chih kitheithak na hihman in “no boxing” bel na chithei sam hi. Hucin kinoh simta, sel zou mahmah lou na hihchiang in auto pu rate gen a lungkim ngellou a tuan maimah ngai hi

Khopi ah maban siamsinna zomding chi in nulepan neihval hihetlou in hon sawlkhia uh hi. College ah vaite toh na hong kaikhawm a, kumthum zoh in graduate degree khat na neita hi. Christmas hun ah innlam ngaihna gu inhon zen in innlam na pai a, Christmas ni in na hong kikhawmta ngut hi. Huchin vaite sepaih Christian nih le thum na biak inn ah hong kikhawm kha uhi .Local Chairman pa’n Kris a unau vaite hong kikhawm zenzen pen welcome hoih sa in nang a vaigam a omdeuh vaipau in kamkhat kamnih welcome na gendin honsawl ta mawkleh.. agenthei ding siamsin bangzah I omta zen di ua maw?

Na nungak nu, or na deih guk simsim nu toh DTC bus ah na hong tuang a, route busy sanlai a tuangkha na hihman in tutna na tangkei uhi. Himahleh ladies seat ah vaite pasal khat ana tu hi.Na duatluat pen tutna ding deihsak lua in vaipa kiang ah awn ding in a va ngen hi. Hon etchiang in Delhi khotual melpu lou nahih ziak hiam maw,tutna hon awn utta kei a, banghiam khat hon genkhum in hon ngaihsak nawn lou hi. Nang la heh kisa lua in na kisel pihdek a, himahleh na vaipau pack up thunsa pen hong bei a, na top up ngeilouh ziak bang mah genthei lou in na omta hi. Na hehsuak mahmah a, lah na lohtheih omtuan lou hi. Huai gentak louh in mi tamlam chance la in na lawmnu vai khut ommoh in ana sawkkha bang hileh,na kiang a miten hon support theihna ding in vaipau in bang na chigen maita diam maw? Huai tantan zaw hihet kei heh aw..

Government quarter luah in , mahni inn a teng hi in, mi innluah hile chin leng inn veng kinei gige hi. Innveng gilou deuh neikha ,khat veivei hon simmoh uh bang sasim, diklouhna bang a hon ngohkhak hun uh omthei. Heh kisalua kinakpih na sawmchiang in innvengnu’n sappau ana theita lou, a theihsiam na ding a vaipau gen ek sawm hang a na vaipau in daihta lou! Na dikna nangawn genthei ding a vaipau na theikei maimah a.. Pau theihlouh ziak in siam tansak a omlou in, mohna loupi sialpi vuah thuak a thuak ngai maimah hi. Hiai bang hun ah "Ka Office ua zaw vaipau kizang lou hi a …” chihte apply theihchet lou hi.

Ahi vaipau siamlouh zaw poi lawtel eive! Na melpuak pen Pathian hon siam ahihziak in etzual a mi hon koihdan uh na bawl lamdang thei kei hi. Himahleh na paukhiak dan a pan in mite hon zahtak ding le louh na bawlthei hi. Huaiziak in IAS, MBA etc tum a laisim tenten na hih leh vaipau siam poimoh ding a,huai sepna sangdeuhte tum ngamlou na hih ngial leh bel poimohna lian zawsem ding hi.

Vaigam a siamsin a Hindi siamlouh incomplete education ahi ..Zoson in a chi teutau ve

COMMENT (9) PHA TA..  
  •  
  •  

#9#9 lianchinkhup » 2012-11-12 20:48

Kei bang in leng India mallam khopi khat "Vaipau sinna skul" a kha 6 sung bek intensive deuh mai a hih ding ka lunggel laitak a hi a, hiai article in hon hanthawn mahmah ka sa hi. Meiteipau leh Vaipau khawng theih ngailaw petmah aka...English leh Paite kia tohzaw buaihuai deuh e...!!!

  •  
  •  

#8#8 siam.naulak » 2012-11-08 15:14

Uson na thu gelh dik mah2 e, Nu-leh-pa pil ki nei kha mah zo hi d ka neu lai a Kendriya Vidyalaya a hon khum unchin lut tung bang chuh vaipau ki thei mawng2 lou, heutute kia kipah thu gen dia kisa bang le word dik lou khong ki jang kha in huchia ki sin tou ek2 khat vei2 bang kisik or skul dang a kisuan khiak kia ki ut. But gamdang i hon pot khiak leh nak phattuam lo petmah, KV a kana kai khak kisik y het lou dan ahi chih bang ki thei khe hiai2 mai....:D

  •  
  •  

#7#7 thang_samte » 2012-11-05 17:26

tawm zaw ten atam zaw te pau sin ngai chih ana hi mawk dan ai maw...

  •  
  •  

#6#6 lemthei » 2012-11-02 17:39

Gelh fuh ban ah, laizomte itna diktak tawh gelh ahih uphuai; thugelh tungtawn a kalsang tawi di'a kisa bang om avele..waka waka.

"...Tua kipan namdangte pau siam ding, chih thupi neiin chialpina ka bawl sin hi." Congrats, Son!

  •  
  •  

#5#5 THOMAS » 2012-11-01 14:27

Dik lua. Tua kipan namdangte pau siam ding, chih thupi neiin chialpina ka bawl sin hi.

  •  
  •  

#4#4 Ding » 2012-11-01 09:58

Quote:
Vaigam a siamsin a Hindi siamlouh incomplete education ahi... Zoson in a chi teutau ve
teutau hetkei veh aw...
I omna munmun a omte pau siam di a poimoh luat ban ah ei gam a hong om a eipau hong kisinte bang le zahpih leh nuihsan hiam zawng in pai nawnkei le i pau mite'n ngaina thei pan di uh hivaw...

  •  
  •  

#3#3 sumchinmang » 2012-11-01 06:40

A dik mahmah ei

I om na mun a local te pau thaih chu maban vang mahmah ei mah ngut ve. Bangalore a om in Kannada pau mal khat le nih bang i pau theih le hon pak ta lua uh. Chennai bang chu Tamil pau thei lou adia haksat tuak sim.

I et vengveng leh Lamka a dawr kai Sardarji te leh Marwari ten nuihjat huai pi a eipau bng jiak a ana jil teitei uh adiam i chih leh a business ua dia phatuam petmah ana hi dan ei chu

  •  
  •  

#2#2 khekhen » 2012-10-31 18:20

a'i ngel mah ve :-) ;-) ;-)

  •  
  •  

#1#1 melmul » 2012-10-31 16:11

Dik na e..

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING