UPDATES:

Ka Hapi Aw, Mangpha

Ka Hapi Aw, Mangpha
By Vungzamuan Valte, Columnist Zogam.com

vungzamuan valte new

Siamtu deihna bangin ahungeih in leitung khawvak no`ng mu a, na hong suahdok ding lai in, haksatna lianpi toh, mualvum a sing le suang bulomte nawkkhia in, si-le-sa suahkhephung hial in no`n nawkdarh hemhuam hial a, athuak ahaksa tel mai. Mittui luang zawih zawih kawm in kon vaidawn a, lametna lianpi toh nang` zattheihna tampi om ngei dingin kon lam-en gige hi. Gintak bangtakin nong` khanglian a, melmuh phaklouh a kiselgu himah lechin, sekdoutu dingin na muanhuai mahmah hi. Ka kingakna suangpi na hi a, na ute kum sawmnih vel a upa himah le uh, na pangbel in, na kankuah zou mahmah hi. Huihpi vuahpi thuaktu leh daltu nahi ngitnget a, kei a dingin ka khuampi leh ka ansukna khawlbu nahi ngitnget hi. Ginomtak in na nasep ding a honkipete na sembuching zelzel a, napa kipahna nahi tawntung hi, nahong suahkhiak ding lai a ahaksatnate, khitui naptuite na nulhul a, dougal lai ah kawlchiang tawitu bangin pasalpha takin napu a dingin muanhuaina nasuah hi.


Aw, nang` sekdou` haat, leh muanhuaitak a, sehrep haitai khiallou pa aw, na hinkhua hon zangphatuam takngial ing maw! Na ute` daitheutu leh sik le saa, akhing asaa, aguh asa`, athak a al, asuang asing, ataak anip, amau agua, auih athuuk, amuat akha, singgah leh theitang, kuva leh roti, ann-gaw leh ann-kaang, I ginseng kei di, na mohpuakna lian in hautak hinamaizen tel e! Ka gim ka tawl chih ni omlou hial in, na sep ding aa hong kiguanlut te himhim gin-omna toh nana haitai ziizia zel a, aser in buk dek hitale bukseng ahi kei hial ding, na sepgah hon siik himaizen lechin, bang ka lohta dia….kamsan sesa leh maitai takin, ka gil na suvah pingpeng zelzel hi. Kumsawt a na nasepte ziakin hinna siktui, tha le zung, sisan leh guh te nahon pia hi. Na tung ah kipahthu gen in aseng kei ding, gen ngaihnase leng a om kei hial hi.


Na hinkhua ding theikhawl hileng zaw, suang tuka taak hon gawisak sak louhial ding hi inga maw! Puakfok a na gawi chiang in ka biang bang akham a, ana velvul hial hi, na thuakgim dingdan hon hisap pih khalou kei set voi, na theihsiamna buuk ah hon khiaksak mai in aw, bawi. Khavei zaw ka gim lawtel mahmah ta chi chin-a, kei ka ommoh manin na deihlouhpi kon hailuisak zenhouh a, ka khabe puakluk khop hial leh, ka lubuk ah siktum lianpi` a khetsuk buk banghial in ahon tuum thuum dum hial hi. Liing loih hialmah lechin, na dingtang thak zelzel a, na khepi leh khezungte na khauhsak thak thithe hial hi, aw anaa… ka chih chiang in kisuanglah kawmtak in, nag` leh nang` nakisudam zelzel a, kon mangngilh nawnpah zel hi. Na melvakna dingin mouth fresh leh munphiah kon tat zualzual sek na a, na foundation hihsetu asuak leltak uhi, kon theihsiam louhnate ah hon ngaidam mahmah in aw.


Kibungbuleh in, kigulpi ludin hial mahleng, na thuak ana lua chih ka thei a, kei thuak len aneep tuan diak kei hial. Achih-a-chih ngaihna na om nawn himhim kei. Taiteh a tehkhiak a, paihkhiak vawvawk ding a hoih na ka...ka bilbuk a tumging kilawmlou taktak leh ngaihtaktak natum nilouh sek a, kei a dingin a aphuai lawtel mahmah hi.


Ka khuisa vungvung zel a, ka thum hut hut zel a, ahunin ahon phaak chiangin zaw, achih ngaihna omlou hial eive, he nu, he pa, ichih hangin phatuam lou a, pipi pupu ichih chiangin a thuakdan nepdeuh zel hi; BUNGBU VEHVUH kawm a, AW TOUPA, AW TOUPA..chih chih in, ihmutlim honpe tuanlou lai hi. Kuahiam gendan takleh, MARALYN…te khong hong kidoh le u`le; himahmah loungaltel eive, chia ekbuk lutsan mai ngai ding ahi. Ekbuk a gas hoihlou teng diik khitnung a leng phatuamlou chu; KHAINI, TUIBUK, RAJA, CHUNU (NOT SUNUH), LEH KAANI..hon taat mahmah mai un….achi leng om uhi. A tak gam ah zaw, ana vongvong tel mai, mou neih ni khong in huchidan thuakkha himaizen le, neih mama a maak ngai maimah ding akei maw!!


Kumsawt a hinkhua kitul ding chimah leng, ana lawtel mahmah ta, nagim lawtel mahmah ta, na zungkaihna lam a ngot gaivekta chih achiang mahmah, kah le hagawina hinkhua na thuak a, kei napu a ding mahmah in le thuakzoh chii ahinawn himhim kei. Natsia natuak a, duattak a kep malak ah, asa, avot, ataak aduai, kuvatang taak taktak leh, sipirit nam vevute tengteng, na huatdan theisiamloupi in kon tuinilh kha nilouh a, natchhawkna nasan in ahon chawk zoutakei hi. Aw, vaitamen hoih penpen piak a hong khagdawng thak theiding hilechin zaw, ka chi ruairuai mai, bangteng a ki-khel vekta. Ahun atun chiangin, naa nathuakte in kasin, kalai azel a, ka khuak nasan a pei-amhai gaivekta hi. Ihmut mohna asuak a, khitui naptui toh no`ng piankhai dek lai mah bangin ka thum kumkhuata hi. Khut leh khe baai hial in, na naathuak dante kon thuakpih a, nang leh kei a dingin, kikhen louh theihlouh asuakta hi.


Ki-it in, ki-ngai mah le, thil tengteng in hunbi nei ahi ua, eigel I kikholh lainite nitumkuan ahita chi-a ka ngaihtuahna akum asawtta hi. Himahleh, itna mittoh kon en teitei a, nikhat tei khovak kipahhuai I mu-em ding a, nang` leh kei I kitul ding chih lam-etna lianpi toh mitmul sauzen in honngak sawm mah leng, ahi thei nawn mahmah kei. Anaaa.. ka chih vongvong chiangin nuamtaksa na bang maimah a, hon pampaihta nahi chih ka chian mahmahta hi. Ka zi, ka tate mai ah non zahlaksak gige a, kisumzoulou in, mite mai nasan ah, maisan pempuam in non koih naknak hi. Zanihmut haksa hontuntu nasuakta a, kei a dingin leitung hinkhua nangtoh zat nilouh pen, kah leh ha-gawina mun asuakta hi. Leitung nangawn a meidil haksatna chiam nilouh dingin NA HON PHAL TEL A HIA? It leh ngaih tampite a mualliam nung un, a pai masa omlou theilou ihihna ah, nang zong taangtawn taangtawn a dingin mangpha chih nii, kawl a nisuak a hong taangta hi. Tuni meuh inchu, deihthohtak leh, hawmthoh tak kawmin, I hin`khawm sung a, kei a dia na nasepte, a ton a ton a food processing na bawl leh, leilok khial zeuhzeuh mi himahleng, mite theih theih ding a kampau awsuak mahmah na direct fuh gige ziakte in, kipahthu gensenglouh kon baa a, I kimuhnawn mateng a dingin mangpha ichi hi. Ka kamsung a nahong pou sese kei deihtelna hikeimah leh, ka hatunglam atawng penpen aw, namun a awng heuhuau tave. “Thankik aw, nang` hahoih leh kei hasia kikhek ni”, chihmawk in omjia nei nawn tuan ding lah hilou a, chisese kei maini maw, pou nawn thei ding a, na zung nengchik bek zong nawse tellou nahih maimah chiangin. Mangpha aw, bye ka hapi aw!!

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING