UPDATES:

Football stadium khat bek nei zoulou te

Football stadium khat bek nei zoulou te
By Vungzamuan Valte, Columist Zogam.com

vungzamuan valte new

I gam dinmun uh, I et chiangin khasiat huai lua hi. 1980 ma in Manipur khopi Imphal ah State Level a Administrative Training Institute omkhinta hi. Police training centre (tua Institure) Panggei ah om nawn leuleu hi. Industrial Training Institute kichi Takyelpat ah 1970 apat omkhinta hi. Forest Training Institute kichi Sekmai gei ah om nawn leuleu hi. Cottage and village industries training centre Porompat ah koih hinawn zel hi. JNU centre Kanchipur a om pen, Manipur University in 1983 in bawlkhiak hinawn leuleu hi. Regional Medical College kichi Lamphelpat ah koih ahi a, upgradation om toutou in Regional Institute of Medical Sciences tungtou velvualta hi. Manipur ah Centre for Electronics Development 1990 in bawlkhiak ahi hi, Imphal mah ah koih hijel hi. Manipur ah Agriculture research lam poimoh sa ua, centre govt. in Lamphelpat mah ah ICAR regional centre bawl khe zel hi. Sericulture hileh, Mithum farming experimental centre te phaizang mah ah koih hizel hi. JNIMS kichi zong Imphal mah tutphah sak zel uhi.

Manipur mite sports lam ah kivan mahmah ua,1980`s in Imphal ah Sports Authority of India in Centre bawlkhia hi. Tekyelpat ah SAI complex thupitak bawlkhiak hi a, boxing, cycling, wrestling, weightlifting leh discipline tuamtuam ah India minthang sak hialmah hi. Hiai SAI complex thupi semsem a, mi tampitak coach leh sportsmen seksuah in tunitan in Manipur product misiam tampitak sports discipline tuamtuam ah sepna nei leh milian India gam pumpi ah omta uhi. International level competition tanpha ah judge dinmun lenthei dingin siamna sangtak neita uhi. National Games tanpha zintun zou in kisekkhia ua, National Games Village leh National Games Stadium thupitak Imphal mah ah om leuleu hi.

Manipur University pen Central University kaitou a, Imphal mah pansan lel hi. Manipur ah Agriculture University bawlkhiak hileu leu a, Imphal mah ah koih hizel tel hi. Union government in Manipur mite` sports potentiality thei mahmah ua, tu`n Manipur ah Sports University bawlkhiak tupna nei in 2014 in Crore 100 sanction pia uhi. Hiai Sports University zong Phaizang a koih ding chitaget zel uhi (Kakching).

NIIT lah tangzoulou, ANM training centre leltak I tantawk hi kumkhua tel hi. Ahih leh, sports ngaina chiat chiat bang ding a I district sung bek a SAI Complex khat bek omlou ahia le?

Football I lunglut ua, sihngam in I pang uhi. A entute lah maimai lou, leivui khunuai leh buannawi lak a kimawlte lah maimai lou, kisual ngap a pang tinten te kihitel tawk ahi hi.

Sihtheihna dinmun ah kidding naknak a, government theihphak in ki omlou lailai tel hi!
Gari dingkhawm teltulte et in, hiai kimawlna mun khat bek nei zoulou dingin I kilawm lailai tel uhia?
Mizoram ah district teng teng in artificial turf football ground bawlta uhi.
Ei gam ah sports lam phungvuhna ding sum hongpailou atuam diam? Khasiat huai lua hilou maw, lawmte?

Mi toh ki compete ni, tuailaite, khangthakte makaih ni, ichih leh sports facilities, recreation facilities leh institute of learning sangzaw I bawlkhiak poimoh lua hi.

Footbal Academy zaw chizawzen khang, a Nursery bek bawlkhe theilou I duam?
Heutute hong kingaihtuah unla, pan honla un, kikhel saulua ahita!

LAMPI OMTHEITE:
1. Football I lunglut chiat uh chih genlouh a mang ahi, Lamka mawltual ah Gallery bek bawl
theihlouh a diam, bawl theih lawtham tham hi.
2. Football pen physical mahmah ahihna ah, a kimawlte leh a entute kinathei mah ahi uhi, gallery
wing tuamtuam a entute sekkhawm kul ahita chih mit a muhtheih ahi hi. Manlang in panla ni.
3. Manipur ah Sports University om ding hita, department khat bek dan in, football academy bek I
koih teitei poimoh hi.
4. Sports Authority of India in Centre khat bek akoih kilawm lua hi.
5. Complex hoihpipi omsa ahihna ah, a haksatna ding omlou suak hi.
6. Tuailaite a dingin lampi hoih leh nekzonna thamching piansak theihna dingin panlak theihna
hoihtak ahi hi.
7. Mary Kom I thei chiat ding uhi, amah bang mihing tampi kipiangsak thei ahi chih thei ni.
8. Kimawl mi kia hilou, physical training specialist, coach, umpire leh a dang dang tampi kiseksuah
thei ahi hi.
9. Adang behlap mai un, a tam lua.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING