UPDATES:

INTELLIGENT DESIGN (New Year Message, 2015)

INTELLIGENT DESIGN (New Year Message, 2015)
By Vungzamuan Valte, Columnist Zogam.com

 

Intelligent design (ID) is the view that "certain features of the universe and of living things are bestvungzamuanvalte buktep explained by an intelligent cause, not an undirected process such as natural selection."

Misiam te`n leitung kibawl khiakdan,  ni, kha leh aksi, za-awng, vandum, huih leh tui, sing leh lou, ganhing leh mihingte asiamtu om a, siamtu ngaihtuahna leh deihdantak a thil tengteng hong omkhia ahi chih musuah thakthak uhi. Theory tuamtuam, Big Bang, Evolution, Selection of species, Survival of the fittest  chih khong omtham mahleh, thil himhim a control tu leh thuneihna sangpen tawitu om ahihdan suisuah semsem uhi. Etsakna dingin, universe kichi khatvei thu a piang phut hilou in, awlawl a kibawl, leh kibawl lellel, banah beihun nei ding ahihdan suikhia uhi. Ni in gas kuangthei pansan in, nisa bawlden hi, huai gas a beihun om mahmah ding hi chih mihingte sutdan ahi hi. Pa Pathian in, leitung a bawl lai in, ni leh kha, tui leh louhing, huih leh vuah, khovaak leh khomial, mihingte leh ganhingte asiam hi. Tuate lak ah mihingte kipahpih penpen hi, A kibatpih a asiam ahih ziak un. Thilsiam tengteng omzeneitak a siam, deihna nei a siam, design mumaltak, plan feldiamsa a duan ahihdan kilang semsem hi. Hiai omdantak chu, Intelligent Design chi ua, Supreme Being, thil tengteng tunga thuneitu ,a deih dandan a omsak theizel, mangsak theizel ahi hi.

Toupa Jesu zong leitung ah hong tualkum hi, plan leh policies mumaltak, tup leh ngim nei a mihing hongsuak ahihdan kichian mahmah. Huai, a plan leh design pen semsuah dingin kipekhia a, tawlngalou hial in panla in, kisin in, sihtanpha a gin-omna lenkip ahihdan A hinkhua ah muhtheih hi. Huaiziakin, I leitung khosakna leh hinkhua himhim ah, intelligent design om ahi hi, Pathian batpih a siamte ihih man un. A mawkna a siam hilou, leitung luahdim ding leh kikhahpung ding, banah omzeneitak a hinkhua zangtou ding, leh gahsuah mihing ihih ding ahi hi. Huai dingin, aneupen apat alianpen tanpha kingaihtuah ngitnget a, I kisintouh det uh kul ahi hi, ki-etthakna, kibawlphatnate, pianthakna chipah kei le zong, Christian Khualzin hinkhua I neih zelzel uh poimoh hi (introspection & retrospection).

Aw le! I hinkhua control tu lianpen ah lutni, Saptuam neitu Toupa Jesu ahi, Amah biakna dingin biakin a poimoh masa hi. Tuaziakin biakin bawl ikisial thei mahmah ngal ua, biakin lamna ah design leh plan mumaltak bawlkhiak apoimoh masa hi. A foundation, a layout, a sandan, a detdoudan, huih lutna ding, vaak lutna ding, tutna kirep dingdan etc. (blue print) feltak a duan`khawl masak poimoh hi. Ahi, sum muhna leh senna hisap masak sipsip zong a kul leh poimoh ahi hi. Tuaziak mah in, sum kibituk, nitha, ngapzah,  kha khat lawh etc. kibawlkhia a, temporary a kikhop theihna ding nasan kilam malawk hialthok hi. Ahi, kinoh hehu a thil isai chiang in, lohsapna, lungkiakna leh haksatna tunthei ahi chih I phawk u`zong kisam hi. Awl awl a nasepna leh, a detdou ding mah hisap kawm a kalsuanna in, kipalpuktheihna, batsaptheihna leh thazoitheihnate thaimang thei hi. I plan loulam daih a paikha, kinak, kisel, leiba ek-ok etc. pumpelhtheihna dingin hihheehuu lou a, kum 5 tankhong biakin lamna ding a hunpiak poisaklouh ding ahi hi.

Tuailaite hinkhua ah zong, plan bawlkhiak poimoh mahmah a, niteng leh hunting in, plan mumaltak aduanlawkte uh azuih chiang un, lohchinna gam manoh uhi. Plan omloupi a hinkhua zangte` maban limchilou hi, khasiatna leh lohsapna in tuisabuah thei laizang hi. Huaiziakin, sinlaite, zonglaite, sem lellel te`n, I niteng hinkhua zatdan kivelpha ni, kienthak ni. Hun leh nite amawkna a mangsaksak ihihkhak ding lauhuai takpi hi, a kikhelma in khanglou tek ni. Zi leh ta neithei dingin kisa ni, vakzou dingin kigingkhol ni, neih le lam kholkhawm ni, “zong in piakin na om ngei ding hi”. Biakin a hun zangtamlawte a sinnalam uah bahmahtel unchia, tuailaite lou a kikhop hitheilou, khawmpi hitheilou, moulop hitheilou, moukhak hitheilou, lengkhawm hitheilou, program ngen a dim, chiklai a laisim ding u`la, chiklai a nasem ding u`la? Dorkate nasan in tuailaite hawmthoh lua ahihna uah, kizatdingdan huntawk I kisin ua, mahni sia-le-pha theihna tan ah kizatdan I siam uh kul hi.

Nu leh pate dinmun ah, I ki-etthakna ding uh om leuleu hi. Insung kepna ah, gil a gah goutan I neihte I kem in, I kol u`hia? Lampi dik leh hoih I zuihpih u`hia? Leitung kitaitehna kia awlmoh a, dinmun leh hihna etlahnate`n I insung buaisak ahih le-bel, kisik in omzia neilou kha ding hi, a kikhel thei thil ahi hi. I niteng hinkhua, nektak zonna, sep le bawlte ah chihtakna, kuhkalna atel hia?  Pathian vualzawltak hinkhua ahi hia? Khopi vengtu aa pang, saptuam kemtu aa pang, hileh le, insung kepna ah I fail leh zaw; milohsam kihi veve dingdan ahi. Tuaziaktak in ahi, Pathian panglou in zaw khopi veng te`n a vengthawn naknak uh, Theihtawp suahte nasan lohsam dildel thei ua, e`n innsung kemloupi a lohching mahmah ding, biakin kaitam ziaka lohtak letsong I tate`n honkhu teltul ding uh isak leh, hizawlou maithei ahi. Nu omlou in, pa omlou in, innsung a thawmhau in adai mahmah ngal a! Lohsapna I pumpelh theihna dingin, Pathian ompihna ngen ni in, ahia… eilam ah hahkatna toh panlak ngai hi, Ahon vualzawl theitu in, mohpuakna Ahon piak semsuah peuh le, A vaan laukha hon sawlkhe ding a, kipahna toh I kidim ngei ding uhi.

Gam le Nam vaai ah, Pathian` deihdan a mihingte` mimalmal kisiam ahi hi, mimalmal tung ah, huai A Siamtu`n deihna nei hi. Hinna petu Pathian ahi, sihna aa vaihawmthei tu A siamtu mah ahi hi. Tuaziak in, I kivaihawmdan, I kivaipuakdan leh panlakdante ah khanlohna chikhat piangsak ni. Pawlpi leh Nam vai aa kigolhna ding thu, leh kigolhlouhna ding vaaite khendan siam ni, meima lianpi nei aa kituisabuah theihna apiangthei thute ah. Pawlpi leh mipite kikar ah, awngvang lianpi aom chiangin chihimlou a, patauhhuai lua hi, melmate kigolhgu ziau thei ahihna u`ah, pilva`n mahmah kisam hi.. Banah, mipite` soudom kawmkawm aa kalsuan poimoh lua hi, minautangte pawlpi aa kinga ahihziak u`n. Kimaituam sangin, thutak leh piichingtak a kihoulim ahoihzaw ngal a, kithunun theihna hoihpen zong ahi veve.

Plan leh design ichih chiangin, leitung ah gamteng in plan nei uhi, National Planning kichi hi. A hihfuhte khovel kitaitehna ah hatfefu hial uhi. Gamsung khantouhna dingin State, district, town etc. ah planning poimoh mahmah chiat hi, Gujaratte khankhiakna thuguk planning mumaltak aneih ziak uh ahi hi. Saptuam hat leh khangtou, pawlpi hat leh khangtou ichihte, vision nei a kalsuante ahinaknak uhi, plan mumaltek neite ahi uhi. Insung ah plan omlou in nekding nasan kisamthei hi. Mimal hinkhua ah, plan omlou in ahithei mawkmawk di hia? Zi/pasal neih hun ding, nasep/nekzonna ding, khosakna ding, tenna inn ding etc. hisapna omloupi inzaw, pat (cotton) bangmai a, huihmut mang leltak ding aa piangkhia kihi thahah louhial hi. Intelligent Design, omzeneitak a siam, lah ihingal ua, i hihtheih chiang om hiveh, destiny ichih. Bohthut a bohfuh ki-om tham mahleh, hisapna nei a kalsuante mah detdouse hi, a foundation mah poimoh veve hi.

Saptuam lohching, Tuailai lohching, nu/pa lohching hithei dingin Toupa vualzawlnate` tangtak I hi hia…chih ki-enpha thak chiat ni. “Semlou in ngawl hen”, “Hahkatte` Pathian in a vualzawl” chih thupiakte zangdik thei dingin; tu kumthak dinmun ah panla thak chiat ni. Nu lohching, pa lohching hithei dingin khanlohna thak toh Pathian ompihna sam ni. Pathian` Pahtak Inkuan hih sawm chiat ni.
 
Siamtu`n design nei a, Ahon siam hisam mahleh, nang` na kisinlouh a, na kiseklouh leh, vaan apat mana thiil thawnpiak hong kesuk tultul ding aa, na lam-et leh, huchidan himawk loudan ahi. Siamtu`n deihna nei aa, khut leh khe, zaktheihna leh muhtheihna, ngaihtuah theihna khuak Ahonpiakte` tungtawn in; Delh leng ka phalai diam? Chi`n takheh chithak chiat ni. Tuailai thahatte`, na sinna uah, na sepna uah… bangtak ahia… chi`n thathak suah un. A Gahsuah hinkhua suaksak ni.
 
Toupa`n Hon Vualzawl Chiatta Hen.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING