UPDATES:

S5 Box

ZOGAM.COM Login

Mizogam aa Paite te maban

Mizogam aa Paite te maban
Written by Vungzamuan Valte, Columnist Zogam.com

vungzamuan valte new 
GAM NEITU HIHNA: Khangthu suidan tuamtuam omtham mahleh hia laibu “A History of The Mizos” kichi Brig. B.G. Verghese, AVSM (Retd) leh Pu R.L. Thanzawna, M.C.S (Rtd.) te`n abawl uh (Part I pek 101 ah) hichidan in chiangtak in kigelh hi.

“The Paihtes had their first village at Chimnuai (Chinwe) south of Tiddim on the road Tiddim-Mualbem. The name of this place comes first in the Vuite (Paihte) Sakhua chant. Being attacked by the Sokte and Falam clans, Paihte had joined the Thangur chiefs……..In the early part of the 16thcentury, Boklua was believed to have lived in a village called Thangluang, Boklua was the son of Ngeknguka and Lakiri. Sihsinga son of Boklua had a son named Ralnaa, a Paite warrior. The Lusei settlers at Seipui khur were at war with the Paihtes……in the fight Chhuahlawma son of Ralnaa was captured………The one from Hualngo tribe who captured young Chhuahlawma had no sons of his own, so eventually adopted a son and was given a Hualngo wife……Paites and Hualngos became friendly, presumably after the birth of Zahmuaka…. Zahmuaka married Paite women named Lawileri…”

Huchi in Suahlawm (Chhuahlawm) suan, Zahmuak in Zadeng, Palian, Thangluai, Thangngur, Rivung, Rokhum te suangsawn a, Thangngur in Chawnglul leh Thangmang suang hi, Thangmang in Sailo suang a, Sailo in Chungnung, Chenkual leh Lianlul te suang hi. Hiai khangthu apat nialvuallouh in Paite te Mizogam neitu ihichiang khopmai ua, Sailo te kha Paite sisan ngoihngoih ahi uh, chih pomdan kiptak aomta hi. “Paite in Mizoram” chih laibu, Tribal Research Institute, Aizawl te bawl ah, Paite khenkhat in Palian lalte zui ua,Bulpuia in Keihak mualdung aluahtung lai in Dapzarte vengkhat ah omsak ahi chih kigelh hi. Rev. Liangkhaia gelhdan in, Palian Lal Buara leh Bulpuia  nungjui Paite Lal Sianphung Sianthuam, Kim-am tapa Paunek, Thuamkham Sianthuam, Vumhang Sianthuam te Dungtlang ah teng uhi, chi hi. Huchi in, Bulpuia tapa, Hulian heu toh Chipui ah khosa ua,Tlutpawrh Sailo suan ten Hulian nuaimang hiau uhi. Khenkhat te Chin Hills apat Mizoram ah Vanlaiphai lamdeuh a kilutsuk hihtuak pen hi, Sialsuk leh a kimvel a khua omte Paite te tenna khua anahi ngei hi. Awl Awl in Hmar lam ah pemtou ua, Manipur a Thangching taang manoh leh Sialkal lam manoh toh alang alang ah pemkual hehu uhi.

Hauzel Lianzamang laibu, “Guite Hausate leh Khangthu” ah hich`in kigelh hi: Khanthuam Sukte leh pawite pangkhawm in Mangsum Guite Teikhang ah 1816 kum in sim gawp ua, Mangsum tapa Kamlian heu in sungkuan hunkhop Champhai ah Vanhnuailian Sailo bel uhi. Kamlian pen Mualpi ah pemnawmpah mahleh, Hengou Naulak heu tamkuamtak te`n Sailo lalte bel ua, Hiangmun, Bukpi, Damphung leh Nausel khuate sat uhi. Thangsing te`n Sailo lal Pawibawia Selam ah bel ua, huchiin Khodungsei leh Ngoupa gei a Khuangnungbawk kichi ah teng uhi. Kamzamang Guite Mimbung ah 1899 in khosa a, akhua inn 300 val pha hi chi hi. Kamzamang a pemkhiak nungin Singvung Hauzel in Teikhang leh Selam gam Hausa hihna len a, 1910 in Selam khua ah pem hi. Ngaithang Zalut (sawmpau) in Mimbung Hausa hihna len hi, himahlehMarch, 23, 1946 apat Hausa hihbei ahihtan Galkap Khuptong khut ah Aizawl Borhsap Mac Donald tungtawn in Mimbung Hausa hihna piak ahi hi. Hun tuamtuam ah, Paite mite Lushai Hills gamsung ah lut hun om zelzel hi, a khente Chin Hills ah leh-kik ua, a khente North Cachar Hills lamzuan ua, a khente Vangaitang ah, a khente Tipaimukh lam ah, a khente Meitei gam ah. Huaiziakin, Mizogam ah kumtamtak paita apat Zahmuak suante nungzui pawl, Sailo lalte pangbel pawl, gal ziaka tailut pawl, kial ziaka tailut pawl, gal leh sa a kimatnate ziaka Duhlian pau zangte khua leh tui suakpawl, adim aha ki-om ahi hi. Runlam,Sawlengkhuateah Paite te tengngei ua, Sialsuk khua ngialhouh Paite namte tenna kichi ahi, 1930`s lai in sungkuan hunkhop Lamka lam zuanin hiai khua apat pemkhia uhi (V. Gousiam).

Huchi in, Paite te tenna leh a bubitna deuhte uh hiaite ahi hi, Selam, N.E. Khawdungsei, Kawlbem, Vaikhawtlang, Khawkawn, Chiahpui, Mimbung, Hiangmun, Teikhang, Khuangphah, Ngur, Kelkang, Lenisenzo, Sesih, Mualbawk, Lailiphai, Ngaizawl, Vapar, Murlen, Daido, Khawlian etc. Mizogam mun tuamtuam ah kithehdarh in, tunichiang chiang inchu Aizawl leh akiim leh kiang ah, Champhai, Hnahlan, Tualcheng, Ngopa, Serchhip, Kolasib, Khawbung, Sihphir, Khawzawl, Lungphunlian, Lunglei, Saiha, Lawngtlai, Vanlaiphai, leh khaw dangdang ah “Kei ni pawh Paite kan ni a, a tawng chu kan thiam lou” chithei adim aha om uhi.

Mizogam ah Paite beh omte hiaibang ahi uhi: Guite, Thawmte, Khuptong, Laingek, Nekngen, Tunglut, Tangpua, Langel, Hualnam, Bawmkhai, Valte, Kullai, Hauzel, Ngaihte, Sona, Suante, Chilzang, Siahliap, Khuanghau, Dousel, Phaipi, Paukhil, Hangzo, Hangsing, Selman, Hatzaw, Sektak, Tonsing, Tombing, Naulak, Hatlang, Bukpi, Saizang, Lousau, Vualzong, Sihzang, Milun, Zahlang, Lamhau, Shoute, Buansing, Khaute, Suantak, Duhlian, Thangniang, Khupson, Vangteh, Thangngil, Hualte, Genjo, Samte, Vawmlang, Zawngngil, Zo, Zamang, Haukip, Lamkhai, Sukte, Suahsia, Satmun, Vaiphei, Thahdo, Thaute, Thanghau, Hilsia, Hanghal, Sianthuam, Songput, Thangnawk (Paite in Mizoram, 2011, TRI, Aizawl). Paite huapsung ah innsung pau chituam tuam om nawn leuleu a, Lamzang, Dapzar, Bukpi, Tuichiap, Losau, Teizang, Sihzang, Dim, Sukte, Saizang chihkhawng in kikhen nawn diudeu hi (Paite in Mizoram, 2011, TRI, Aizawl).

Huchi ahi a, Paite te Mizogam leilung luahtu leh neitu diktak ihihna uh phoukhiak thakthakapoimoh penpen ahi hi. Huchi kawm kawm in, Mizoram context ah, paite Nampi a ding in bang ahia I poimoh uh, bang chi-leh I khangtou u`n, I khawsuak zawsem di ua? Chih lunggelna ah nei in sut sin le chidan ihi hi.

Mizogam khua leh tui neitu I kichi ua, mite kar akhawsa tei ihina ah, I khan`khiak taktak theihna dingin kalbi poimoh tamtak aom hi, nam ah chiangin, hihna kitheichiang le, ki-unauna leh ki-itna kichituh bok le, huaite bak ah, I nam khangkhiakna dingin hiai anuaiate ensin leng maw:

Political dinmun: Nambing politics Mizogam ah hattak a saitheih ahi kei, political parties paidan I et vengveng chiangin, Central government ah kikhekna aom ziakin state sorkar a puksetei mawkmawk kei. Party nih hat-tak hiam, party thum leh li baak aom ngei vakkei. Hiai party te nambing viasaina ahibok kei uhi, minority teng kigawmkhawm a political party tuam din`khiak ding chih leng aom bok kei. Huaiziakin, namtuantual zawdeuhte huaikhawm theitu, bak ah development lam ngaipoimohte; leh Mizogam kipumkhatna kembit theutu political party khatpeuh,eite a dingin a hoihpen mai hi. Chin Hills lam politics huih leh Manipur lam apat NAM boruak mumallou chikchik, bangmah chiahpih di leng omloute khong ah kihnamhnoih lou in, kisusiangthou le ahoihpen hi. Paite Tribe Council, Manipur ah hattak a paipih ahi, Customary Law khong bawlkhiak ahita, hiai Paite pupa tawndanteMizoram ah District Council Court omsa hiven, court leh sorkar in ahon pompih theihna ding ngaihtuah in, sunglut bok le ahoih mahmah ding. A gamsung nambing deuh a I tenna bial uh aneu mahmah mai, district mumaltak chingtham leng ahikei, Sialkal Development Council omsapen phungvuh kawm a nasatak a panlak ding ahizaw, tawmchik tung ah nasadeuh in nasep sawm phot peuhmah le, maban ah sum leh pai tamzaw a phungvuhna in azui ngei ding, tawmchik tunga I gin-om ke`nchu sum nak akang baih mahmah chih leng theih ahoih. District council omsate bakchu Mizogam ah piakthak asawm meuhkei ua, I sualsuah kholkei ding uh, huiaziakin I bubitna deuhte uah MLA mumaltak neithei reng dingin kithutuak viau mai le, mundang Aizawl, Champhai, Kolasib etc. khong ah bohthut policy zatdan siam bok le, (ei bohna lamlam alom in boh siam le, nambing takmeuh in), political party hiam, candidate hiam phungvuh siam le, a damdoi hoihpen ahi ngei ding hi. Pilsiam in kiithutuak peuh leng, MLA 10 tan khong neithei dinmun ihi mai dua aw?

Government lam: State government ah nasemtu tamsem luthei le, I mi leh sate deihsakthei atam lamlam kiseksuah thei leng deihhuai mahmah hi. Development fund paidan khong enkai in, backward area leh namtuantual zawdeuhte dopkangna dia sum hongpaite a kihawmdan leh a zatdan lam ah pilvangtak in sorkar ah norna avangkim in neithei zelzel leng ahoih mahmah. District Headquarter neihna di a gamla sim viau mai, Sub-Divisional Headquarter tan bek Mimbung hiam, Teikhang hiam ah om teisam leh a deihhuai, sorkar nawkdan simpeuh le aom theilou omlou hi. Khantouhna kalbi taktak chu Lampi hoih ahi, Maniput gam toh teh inchu Mizogam ah lampi ahoihzaw, I bialsung uah nasatak in lampi puahhoihna nasepte sutzopsak apoimoh penpen ahi, Minipur toh kizopna Mimbung apat Tuivai, leh Burma lam toh kizopna lampi mumaltak sialsak ding ahi. Kizomtuah seuhsouh le, kipaituah hehu le, sum leh pai bawlna leh nek leh tak muhna hong olsam deuh ding a, mihing mahmah leng kingaihnatna hong piang ding ahi hi. Sorkar office om sunsunte puahhoihsak in, nasemtute mumaltaka I kaisak ding ahi bok. Hospital lianzaw leh changkangzaw, munlaili deuh bek ah, khat bek omsak zou le adeihhuai, mipi vantlang a dawnzangkhai mahmah ding a, Burma lam a unaute tanpha in azar azou ngei ding uhi. Khualzinna lampi nuam henla, khualzinmite tunna ding munnuam om bok henla, khualzinmite muhnop ding leh a lunglutna zawngte uh puahhoih dan siam bok le, I gamsung ah mi ahong lut zoihzoih ding ua, sumnak hoihtak asuak bok ding hi, Lengteng bangchu I kepbit khipkhep ding uh ahi. Hiaite semsuah thei dingin MLA, Minister bak ah sorkar office tuamtuam ah nasasemtu leh thuneihna sang neitu tamsem kipoimoh mahmah ahi hi, tuailaite ngaihtuahna ah aom ngei dingin koihphot peuhmah le.

Netak zonna toh kisai: Nekzonna ah kipanpihtuah siam poimoh mahmah a, workshop leh dawr-ngaktu, khutsiam thilbawl lam khong ah namdangte hiam, midangte hiam zat sangin, a zangtheite a dingin eimi mah zat ding ahi. Nekzonna khat peuhpeuh ah diktatna leh kuhkalna poimoh mahmah a, mite`n mi zulhzau-hon, chia ahon theih ding uh lauhhuaipi ahi, guktak laktak hat-hon, chia mite hontheih ding thil tengteng lak-ah ahoihlou penpente ahi, Paihte hou..chia mi minlohtheihna hial ah chu, ahoihlam hithei henla, a selam chu Tuikukte khong hithei leh adeihhuai khop mai. Thilkhaam, guihtheih leh siatna tuntheitesese khong zuak khollou a nekzon dan kizir lekalbi kilawm leh I Pathian Biakna toh leng akituak deuh mahna. Nekzonna hoihlou chingzongsangte ziakin I nam, midangte muhsit in aom kumkhua a, innveng leh innluahtu ding nasan in Paite (genkhiak chia Paihte) te zaw, chih kampau aom khak ding lauhhuai takzek ahi. Awle, siamna zongleI siamna toh kiphutawk nekzonna omlua ahi, a siam sanglou te`n kuhkal` suah le, Karimganj mistiri te nasep teng suhsak vek le, kizir le siamlouh di bang aom dia hia? Motor hek bang le zirzek le siam theih vek ahi, ei hihtheih dizenpi, mite adia koihvekna lungsim in hon nengniam niam ahizaw, mite nuai a kunreng bikdi ihi sam ua! Singtlang lounei a nekzonna abei hulhulta, sorkarte khap inle ahong om khong di, awlawl a thildang a kiheidan I zirsiam uh ngai petmah ahi, farm bawl hia, gan vulh, ngakul bawl hia, huanhai chiin vak, gawtuai, baibing leh adang dang toh nekzondan zirtheih om di hiveh aw, gua suantreuh mai le, baibing chingtreuh mai le, singthupi kung 100 nei le, a trin a bawltheihte kibawl le, ahoih viau kei di maw. Aw le, a zirsangloute a dingin sepaih pan` khong asekei, pension ahoih boksi, ngainep keihial ni.

Siamsinna toh kisai: Zirna lam puahhoih angai viau in ka theibok, sorkar schools ah kinga deuhvek ihi ua, mission school tamlouchik leng aom, hilehle tulai dinmun toh kituak a siamna taktak standard aching zoukei. Aizawl, Champhai, leh gamdang ah ikikoih vek theikei, huaiziakin, pawl 12 tan zirtheihna mumaltak, hostel omtheihna hibok mun nih bek ah, I bialsung uah omthei leh a deihhuai. Mimbung bang ah chu College omkhe vuau maileh, a standard ahoih viau inchu Manipur leh Burma chauhlou, Aizawl lam apat naupang ahong leh kai daih du zuhia, etsakna inPatkai Christian College ah kai ut in, khua neuchik lam panin, khawpi lian taktak apat mitampi te`n anaih duaiduai uh ahi kei maw?

Minsekna tohkisai: Kisoisel nam ihi ua, I tempaina lam uh ahibok, aisa tuansual bangmai, a dawk masa di ki-kainiam zelte ihi uhi. Hiai chindan pangkailou tawpkhawk tawpsan thei le, kiphungvuh tuahdan zir le, kidomsang tuah le, kineng niam niam bik kei bok le. Kiphatna kampau bang le chiilkon viau kei mai le achihhuai. Mi hoihlouhnate khong phorhsuah theihchauh, leh I tuizawngtak uh ahihsung zaw, Nam changkang ihi ngei sinkei uh, hobby dang, hunawlzatna dang, chiamnuih chimthoi dang poimoh ikei ua, migensiat ringot a hun I zatmang mang sangu`n. MLA Election hitaleh, V.C kituhna hitaleh, kituh di mah ahi, kimelmak di hilou ahi chih khong I zirsuah uh ngai tlat ahi. Kumkhua a kimelma, kigensia sia mai, singbul tuak leh gen, suangbul tuak leh gen, khantouhvai lou hi. Demkailou taktak mihing aom kei, leitung hi bukimlouhna gam ahi, kigensiat phui chihsan le ahoih. Bakah, NAM thil himhim a sousing baih mahmah, nam tuam deuh hiam, I kiim I paam a omte toh I kikar achidam ding ahi, khat le nihte khutkhelhna ziakin Nam pumbuai thei ahi, police chetsakdan siam le, e`n khoih rok sek kei le ahoih. Sorkar lam hileh, saptuam lam hileh apoimah mah chu kiheksiat ihat ahi, lungkimtak leh kithutuaktak a vaihawm diamdiam sangin ki complaint tuah hehu I tempaina lam uh ahi, topsan rang le ahoih, kuamah a famkim omlou ihihna ah, kihek kihek ziaka daktor/nurse/pastor etc. chaan chaan ihi kha duam?

Social Organisation lampang: Philanthropic Organisation tampitak omthei himahleh Mizogam ah Young Mizo Association mah in nampumpi kaankhawm in kaankuah zoupen hi. Tribe based a ki-etkolna pen duhthusam himahleh, a gamsung kivaipuakdan etin, YMA a omkhawm mah namdamna leh namte kipumkhatna kembittu ahihtawntung ziakin, hiai pawlpi mah belbul in phungvuh le hoihpen ding hi. Lutthuk in, heutu hihna tanpha hiai phatuamngaihna pawlpi ah dinmun nei leng chihimzaw lel ahihna ah, nambing lungsim pulou in, ahniak tam lamlam zuitadih mai leng ahoih hi. Awl awl in Mizogam a Nam tuamtuam omkhawmte ahong khanglou semsem ding ua, YMA in kankhawm kumkhua khollou ding hi, huaihun chiangin chu YPA ichi hia bang ichi a, khat peuhpeuh apoi omlou ding hi. Tu leh tu inchu, mite laktuam theih leh malkhalh theih dingin vaihawm kei le, I thuakthawn lel sek si ua.

Literature lam a khan`khiakna: Pau leh ham lam ah, mitamzawte chiahpiahna rengreng ah, mahnipau pianpih a tualniam deuh naknak, Mizogam ah I pianpih pau zahpih leh zangtheilou I tamta, thil poitak ahi. Pianpih pau, Paite pau I mansak inchu hihna neilou isuak sin ua, I pau I tawisang ding uh ahi, akua akua in. Innsung ah chu I nam pau zangthei chiat le duhthusam ahi, hiai thuguk hi zuithei chiat dingin kithuhilh le ahoih. Laigelh lam ah nasatak a panlak angai bok, huai dingin vengsung news, khawsung news, magazine leh tangthu tuamtuam gelhtheitu leh suahkhetu apoimoh ngoihngoih, michih mohpuakna ahia, I phungvuh ding uh ahi hi. Laibu Paite pau a kigelh, paite pau a mi laibu kilet, Paite khangthu, Paite te chanchin, Pupa tawndan, mithupite chanchin, tangthu kumluite, sakhuana, mimasate chanchin leh adang dang tampitak gelh ding leh gelhtheih aom ngei di, huaite suikhia in laibu ah guanglut le, ei chanchin ahong hiding a, ei khangthu ahong hiding a, sim theih leh muh theih a aom chiang in, neitu hihna in azui zel bok. I tangthu kumluite khong mite suhsak in I om u`hia? Kivel thak ni. Huchi in, hunin ahon pawsuah ding a, school subject a tawitheih, University a tawitheih chih khong piangsak le, tunung chiangin Mizogam ah pau tuamtuam te pau zirna ahong kihong ding a, university tanpha ah zirtheihna ahong om ding a, huaihun chiangin zir di mumaltak inei kei mai diah aw, lauhhuaipi ahi, kisakkhawl a trul khopmai le. Paite pau a kigelh I pau zirna dingin lehkhabu tuamtuam, newspaper leh magazine khong tam henla, asim ut leh asim peih ahong om mai ding uhi, ngaipoimoh chiat thei le.

Culture kepbitna: Christian hihna in I culture a mangsak sim mawk a, poitak ahi, huchiin nambing a saptuam din`khiak I tempaina lamtak uh ahi. Saptuam lam leh biakna lam ah chu kisoisel vak lou in, I tuitumna lam leh I omna lam chiat uah belh hlehle mai le ahoih pen. Ahia, saptuam tuamtuam I dinkhiak seuhsouh ziak un kipumkhatna a derthawng chihchu genlouh a maang ahi, Chin Baptist leh Zomi Baptist chihsese khawng mahtak. Mizogam society ah tuitum` taktak theihna dingin chu kohhran lam ah kibaptist thuk mahmah poimoh abangsim. Ahi, pupa ngeina, Pupa tawndan, paidan leh kivaipuakdan kinei chiat hiven, huaite kha I kepbit mahmah uh poimoh hi, I mansuah chiangin nam mangthang isuak sin ngal ua. Paite Indongta inei ua, hoih mahmah ahi, hiai hi I kepbit ua I zuih siausiau ding uh ahi hi. Insak inkhang, vengsung, khawsung kivaihawmna dingin leng ahoih a, anei leh neilou kikar leng a kankuah kawm a, khangthakte thununna dingin leng ahoih mahmah mai hi, indongtate vaihawmna himhim kizui a kizahtat chiat ahi hi. Pusa biakna, sumtawng biakna, tangthu kumlui, kicheitna, galvan, vanzat, leh laam chituam tuamte kembit in, midangte khong pesawn sawn kei thei le. Cultural society mumaltak nuai ah kivaipuakna om henla, hiaite phungvuh chauh hilou in, puahhoih semsem lai le, kembit bok le, huchi in nam ihihna mite kiang ah I phoukhe thei ding ua, lahtak in mi`n angai ding ua, ei-a ahihna (neitu hihna) chiangzawsem in taklat ahingei ding hi. Huchilou inzaw, I nam laam khong uh, I tangthu khong uh, I ngoute-kherh khong uh, namdang te`n kou-a ahi, achi nawnzel kha ding ua, I chaan kumkhau zel du zuhia. Khua chiat ah cultural troupe khat chiat bek omthei henla, khuallian aomhun leh hunpoimohte ah siamneltak in alahna neithei zelzel le hoih inchia. Drama khong leh lemchin lam khong uar zawmah le, soft power hong hi ding a, siamzou pouh le etnophuai asuak ding a, mite theih I hong hiding ua, I kizahpihnate thaimang ahong hita ding hi, Aizawl khawpi khong ah cable tungtawn leh mobile tungtawn in khahkhe zungzung zel le, I pau ahong laar ding a, ahon zirsak teisam ding ua, Paite pau in a raak chelchul mai kei du maw?Khuado Kut khong thupitak in zangsek le, (Chapchar kut sangin), Sialkaltlang ah hihchurchur zel mai le, ahong chiau heehuu kei du maw, Mizote?

Nam tawisangtu: Nekzonna mumaltak leh khosakna kichuptak, mite mitmuh a siangthou, sepna lam leh sep leh bawl a piching khap, te`n Nam a tawisang ua, hihlouh dingteng hih a kipumpei, vengsung leh khawsung chauhlou, mahni innsung nasan a hnoksaktak a khosa, insak inkhangte muh a zahpihhuai ngoihngoih, chihte kha Nam minsesaktute ahi chawk uh. Guktak laktak, khamtheih guihtheih chingzongsang ichih te`n Nam a minsesak bok uh, kithuhilhna leh kithunun zohna I kichituh takmeuh uh a poimoh hi. Mi` nam kara khosa ihihna uah, pilvangtak leh pilsiamtak a khosakdan kizirtir ding ahi. Hiai gam ah inntektak a I khosak theihna dingin, nekzonna mumaltak neih angai hi, huai dingin kuhkalna, taihmakna leh gin-omna I kichituh thakthak uh a poimoh khop mai. Dinmun neithei a khosakna in Nam a tawisang, mite tunglam ah len`sawm chiat mai le, I kiakna uh a sang deuh mah na.

Employment lampang: Mizogam ah sorkar zemsawk bangzah I om tehreng ua, kisut chiang sin le, chihtak meuh I om dua aw? Department teng khong ah tu ferfur mai le chu anuam awm mangtak eh aw, office khat pouh ah peon hileh driver hileh, ana om tei rengreng uhchu nuamtuam ahi, alupen khong om ferfur mai le chu aw, anuam awm. Sepna muh a haksa ta, siamna mah apoimoh pen, huai siamna mah in sepna ape-thei (merit based), MPSC tungtawn in, chi ua. BDO, SDO, DC, Director, Secretary leh adang dang Paite te a ding ahikei chih omlou hiven, Pu Haukhum Hauzel nungjui di Mizogam sungmi omlou tel, a rapthlak viau kei maw, amah pension daihta a`ihkha. Pu Jelshyam bangchu, ahon omlouhsanna kum tamtak ahita, huchibang bokin, Pu Thangthuam leng ahizel. Ki-enthak ni, lehkhazirna lampang ah kisathak le, I school te uh puahhoih thak le, khovel lah beipah chuang lou di a, kikhellou hiveh aw.

Mimbung, Kawlbem, Vaikhawtlang, Teikhang leh mun khenkhat ah career guidance centre hongkhia in, employment news khong koih thei le ahoih bok di. Sepaih chingthei dingjenpi ahuntak a kuankha lou, vacancy tuamtuam aomlam leng theilou, basic qualification leh apoimoh tuamtuam, staff selection, UPSC, MPSC, NDA, Bank, Insurance, BPO etc. exam tuamtuam piak dingdan leng theilou adim ahaa a omte khualna in, Siamsin Pawlpi hia, V.C. te hia, Sialkal Council te hia…khat peuhpeuh in hiailampang vaisai le uh ahoih mahmah ding. Sepna ichih a apply hunbinei ahia, kum beita (age limit) om atamzaw ahibok, ahuntak a vaisai poimoh ahi. Pawlsawm, sawmlehnih leh B.A. pass tei urh boksi, sepna zonnachang thei rengreng lou a leng omtheih ahi. Pawlsawm ka zoh chiangin banglam zir leng ahoih dia, sawmlenih zohin koilam ka nawk dia, chih khong theihsa vek poimoh tlat ahi. Sorkar hnasem innkuan khat ah khat beek omthei le chu, nam changkang ber, leh Mizogam neitu ihimai kei dua hia, nam dangte nei vettakkei bok le!

Awle, tutrum a dingin chu, I hunsak phot mai du zuhia. Ka kipak tlat.
Author Note: Thelnah, SSPP Hqrs. Aizawl, 2014 a ka article gelh ahi

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING