SUAHTAKNA-I

User Rating: 5 / 5

Star ActiveStar ActiveStar ActiveStar ActiveStar Active
 

SUAHTAKNA-I

By Vungzamuan Valte, Columnist Zogam.com

vungzamuan valte new

Sialkaltlang ichih chiangin Manipur leh Mizoram gamgi zuul a mualdung kilawmtak, leitung akibawllai a bawlfuh chiahlouh, sialngiat (rubber) halton bangmai, mual leh guam neuchikchik aomkhawm nennonna, Tuivai gal ichih chih ahi. Suahlam ah Tuimang lui in gamgi akhen a, huaigal lam chu Burma akichi. Sialkaltlang tumlam chu lengkir hi-awmtak in a kense vengvung khopmai, huai guam gallam, nitumna lam aa khua omte kha Khawkawn, Khawdungsei, Pawlrang, Bualpui, Ngoupa chihte Sialkal gallam ahita. Ngoupa khua chu Pu P.L. Thanga (IAS Retd.) pianna khua ana hi reng aka hia maw le. Khawdungsei erohchu Phamta Pu T.C Tiankham bang unaupa Khamkhanpau Guite bang a pianna uh ana hi taktak. Simlam ah khua tamtak Khuangphah, Hnahlan, Tualcheng, Vapar, Ngur chih khongte aom uhi. Abiktak in,Tuivai gal na paikai zoh in, na tal in lei sidek dek in na kaltou tou dia, atawp atawp in Mimbung khua na tung khong di zuhia. Mimbung khua chu maw! Pu Zelshyam Hauzel (Ex. Chief Secretary) pianna khua ahia, Pu Khamkhokam (EE Power)te unau a seiletna khua uh le ahi bok. Dr. H. Kamkhenthang pianna khua ahibok a, Pu Clement Larema, Paite kampau lak a B.E. zou masaber le hiai khawsuak ahi. Zingkar baihtak in Mimbung apat paiphei phei lechin zing annnek ma in Teikhang na tung pheirok di, siksakor in le a pai theih eihkha, Lampi ah Hiangmun le aom, Hrianghmun khong achi sak truhtruh du chu. Huchi in, mualpang, leh mualdung na zuizel dia kawn ah suahlam na liam inchu Kawlbem na tung dia, amah erohchu tumlam na liam inchu Ngopa na tung daih di zuhia. Kawn pelhpheina lam ah paizel lechin chu Zotlang khaw minthang takmai omna na tung dia, hileh le khua a omnawn hauh kei mai, gambuai ziaka (grouping lai) apawtsan uh, luahnawnlouh in a rauhsan hlenta uh eihkha maw. Pu Zosiama Pachuau (Ex. Minister) leh Pu Vanhela Pachuau Ex. Chief Secretary) te unau in Dapzar pau diktak a zirsuahna uh leh tunitan a Paite pau siamtak a apau theihna uh, apa’n zirtirtu a sep lai a azirtirna khua ahi reeng a. Pu V. Tualthang, Pu N. Khaizalian, Pu V. Sangthuam, Pu K. Thangsang, pu V. Thangzadinga, leh mipoimoh tamtakte genchimlouh khaw nuam, damtheihhuai, leh lunglenhuai ahih ber mai. Kawlbem khua chu pu Rohlun Hauzel khua ka chi ut thok, ana changkang ta khop mai ua. Lengteng gam erohchu, mualsangtak mai ahia, khaamkawm ah khaw kiselgu aom a, huaichu Pawiboia Sailo khua, Selam ngeimai ahih hi. Gam_ngawpi ahihziak in agam ahoih a, tui a himbik khop a, khua a vot bik bok a, khaw galmuang leh khaw thoveng chu ahi reeng aka. Khaampang a pai truangtruang ngai ahia, tunitan inle motor a tung mumal taktak thei hauhkei zuhia, kum 3 vellek paita in jeep road chu a sial-lut zoh hamham uhkha maw.

sialkaltlangdeklampang
Khatvei ka pi’n, (neulai in) Tuisalui naklam ahon kaanpih a, ka pa pute khua Selam ngeimai chu ahon hohpih chih ka thei changchang. Lampi ah ka pailai un vantung aging rumrum mai a, helicopter ahi ngei dichu, ka lau lua a, singluang nuai ah ka kibuksan daih. Selam ah chu ka khua a har lua a, nitaklam chiang in ka mentrei truai zel, ka pi’n chu nuam asa emem laitei, ama sungte kiang ahihziak ahireng si. Kawlbem apang Tuisa lui lam pan in paisuk chuanchuan lechin, na khuk a kihep hnokhnok dia, na kaihza tha a zoi bok dia, suangphok, lampikuak leh singbul suihkhak di atam viau. A toulam zawng a pai chu a tum in tum chhin rengreng koh, na mualphou nasa di. Na hamphat inchu lampi ah zawng hon, sakhi, sangal, gam-ak, vakgik leh adang dang na tuak treuh dia, selai na tawi inchu na hampha viau di. Aizawl a ka omlai un 1996 kum in ka hoh ua, vagik nupa khong, sakhi khong, leh tuisa sanga khong ka nek-trok uh kha maw. Tuisa lutsukna chu maw! paisuk paisuk ahiringot mai, pai’suk suk, bei ngei mahmah lou, tung tadi I kisak nunga leng thuksuk deuhdeuh, khezung teng polgaivek. I tungsuk chu aw, ka thaw suaisuai mai, ka dam sungsung na chilou theikei, a tui asiang boksi, sanga na duh leh kimat mai oh. Tuisa gal ah mual kikhung zenzon a om dia huai chu Vaikhawtlang te gam ahita. Hiai mualdung kantan in Burma lamte akhualzin sek uh eive, agal lehlam lek ah Tuimui, Tongchiin, Serbung, Tuimang khua, Vanzau khong aom dia, hileh le maw, Tuimang lui ah leilawn a om tlat keimai, na pal-kai angai di. Huai Vaikhawtlang te tlangdung chu aw, a sau a sau mai, Airport bawlna dia etlahhuai ngoihngoih mai ahi, agal lek ah, LUNGLENKHAAM  aom remrum dia, pa Liankhosiam in dawite a hawlkhiakna mun ahihkha, bangzah a chhambang lai duam a. Huchi in, simlam manoh le chin naichik ah Khuangphah khua na tung dia, Selam khua, Tualcheng khua na galmuh di zuahia. Khuangphah khua chu ka pianna khua ahia, pu H.V. Lalringa (IAS Retd.) pianna le ana hi reng aka hia mawle. Pa Thangthiang te, Pu Zarual te, pa Sumlian te, U Sangkim te, U Chhunkhum te, U Thangluah te, Pa Rothuam te.. atuallen na khua uh ahih hi. Khuangphah khua apat na pai’nawn inchu Hnahlan ahita mai, khuapi na lut sinta chih di ahi, mi le a changkang deuh ta uh. Hiai Hnahlan khua chu maw, Pu Haukhum Hauzel (Ex. Chief Secretary)) a pianna khua eive. Hiai gam ah hi, (Sialkal) sial apai nakviau uh ahihmel a, Sialkaltlang (sialte paina mual) chih ahi ringot mai, turutak ahi rengreng, Saikot chih toh ateh-kak-theih-ber-di-e.

Vaikhotlang a han poimoh takte, sa 289 mantu chu tututak ahi ringot mai..
hansuang
 
Pi-le-pute tuallenna gam, nek le taak kichiinna, gam thawveng leh zoutuisiang vot ngeihngeihte a luanna. Zouhuihkhisiang in sing le lou, ganhing leh mihingte lungsim kilawptak leh kidaihtak a aseem hiauhiau na mun. Gamsa chituamtuam zangsial, sai, sakei, savom, sangal, sakuh, sazuk, sakhi, sakel, saza, sial, zuu leh vate banah Tuimang sanga leh Tuisa sanga (ngapum, lengphar, ngavok, ngagul, nganal) himpenpen ten mihingte a chhawmna gam. Chhawkhlei, vaupak, suangkuahpak, saisuang, gamnahtang, paangpak, luaileng, meleng, gamsialngiat, gamkawlkai, gamhakai, theigaai, theihelhawt, theisungsan, vonva, gamtheihai, theibiangkai, theibatuktu, theihaa, sarzuuk..theihelhhawt, kawlsing, nahtang, sapthei, kawltu, kurtai, taatthei, theihe, theikha, theimul, theipi, suaklu, sek, singsia, leh singgah chituamtuam ten mual leh guam a luahdimna mun. Sialkhau, mau, bii, gua, chiing, tumpang, naat, pumpeng, tumbu, baibing, anbongteh, mawnglawk, banah tuaiterek, chiingziik, gawtuai, ching-iik, khangkhuh,  taangnaal, aidawng, aigechil, patung, papaak, patawktawnol, pasi, pa-uisin, tengkol, aisa, zawngtah, singthupi, phuinam, akhai, meh himpenpente a pianna. Nuam asa thei chelchal khop ua, perhkhuang tringtrang, phaiphuleng, tamngai leh nahpa mut in palak ten hunnuam a zang ua, nungak hel in chiakzen sek uhi, a hlim dardar thei tak uh aka, chaw.
Vaikhawtlang
Zawng, Ngau, zawngkuhpi, sihal, sachia, sa uak, zou ui, sangak, chingngia, thiallei, gulngan, gulsikkang, gulha, gulmuk, gulvankai, gulngawngsan, thangtom, tangkawng, Kaikuang, sumkuang, gulpi, savom sinkha, gulpi sinkha, leh gam-varak, va-ak, mupi, musi, chingpirinu, valuk, vabak, baak, valukang, vapar, varihaw, bawng-nupa, nahkhok, vahnun, tuklou, Tawmmanai, vachhuangchhuar, vasingdangtu, vahai, vagawlgek, Tol-lawt, varung, hanha, gam-ak, vagik, vahlah, vaki, vakhu, kawlhawk, vaphual, vakhiang, phialphiak, chongzong, vamim, baibek, piit, tektek, atam tel mai uh.
Miksisaa, khuailaigial, khuaithuum, khuaipi, khuaingal, khuailaigek, khuaisangak, khuaimu, khuaikai, khuaimitsawk, khuaimantep, thoupi, thouphurh, vaimite, thoukang, thousi, liit, maimompi, khuangbai, tangteuh, khuangpirit, uphok, khaukhup, uitawm, puchiil, uihik, sahik, tangngol, zuanbak, lungme, thereng, rengchal, vailamthei, chetchet, chepchep, vangvot, vangvotgial, hik leh khah a gah tutuna.. aa atam mai uh. Nektheih chitinreng a pianna, ankam, kampi…kamsan, bawng-ankam, kamkuak, vai-ankam, allu, maiteh, mai, dolhou, dokzik, ballung, balpi, kolbot, balke, hakai, besing, bekan, bekanthu, maipuang, mimtang, tangtang, buhman, zaitlai, buhpal, muvom, mazel, tangmaipi, tangmai nip, tangmai gam, gamtangmai, gataam, uumgui, uumgah, tui-uum, tuibuk-thei, kinawtna, sipi, sising, bee, sahou, sangahou, ai-thu, sihzouhou, ankamhou, gawtuaihou, besing, zanah, vaimin, vaimim man, kanpuak, singpi, siing, sang, sihzou, samphok, manta, mantakhaa, beguul, beteh, tangkha, ankhur, anthurhou, tomato, pat, thaksik, aakhai! A omvek mai uh ka chi. Kawlkai, baal, maipuang, maisan, vaimim, kuangngou leh lawhpi a luikhiak hloihloih theihna gam ahia, tangmai ma-ngai chihum toh kuangngou dimhmok a tunkhiak theihna gam, buhmansang sunn anntun chiachia ui hluah hluah theihna gam ahibok, agam hnianghnar tlat aka.
Pipute zaideih awihna gam, hunnuam a zatna mun uh, buh le baal, nek le taak a pianna, zuu chiteng a kitulhna uh, trinzu, buhmanzu, zuhaningkai, gatamzu, zupi, rakzu..aluup ua a Ton leh a Man’na mun uh.  Niang leh tai a aomna mun uh hi a, 1960’s in Mizogam buaina in haattakin nawk heehuu hial a, sun leh zan chih omlou, zanmial’ nuai ah kisan zawmah ua, zingkar baihtak chih omlou, pasal pichingte kaihkhiak, gawt, soisak leh hentan’na gam, kipuakman’na gam, sisan naisan luanna gam, melmate’tuallena gam asuakta. Bekbok hen, chih ziaka booth zum a suih zanzan tuahna gam, kidouphual a suak maimah hi.
 
lentlang
Tellou chihtheih hitalou, sepaihte’muanmoh kaina gam (helpawlte ann pia, giaksak, panpih) chihna ziak a thuakthuak ding himai, pasal pichingte field a toututsak, a kawng ua jungle booth toh bang toh suih zanzan na. Gamkuan khe nagmlou, nektak zong ngamlou, sepaih lah lau, MNF te lah lau, hinkhua a kidangta, nopbawl theih vual ahinawn kei. Huchikawmkar ah, helpawl ten hehpihna bei in mipite tung ah sum leh pai, nektak ding, giahna ding a phutluih gige ban uah a soisakna phualpi uh ahi zawmah hi. Innlum luahngamlou a gamlak a taikhiak duaiduai, zaan tampipi kiselgukna gam, Vanzau tantan galtaina hun, lenna lau a kah chelchulna gam, numeite’ haksat kholdiakna hun, leh khua kihalsak chuahchuahna gam, neih leh lam vaivut asuahna gam ahita. Vantung apat meikuang leng ten khuate a halkat duamduamna gam, ki-itna ki-lainatna a beina gam, hiamgamna gam, it leh ngaihte nusai a taisiat duaiduaina gam asuakta hi. Mangbathuai chihchu neepte ahi, pianna inn, pianna khua, lawm leh khanvualte, ni leh gang, pi leh pute tengteng taisan ding a, theihlouhna gam manoh a, dinkhiak hunlai khong zaw; aw! a ngaihhuai keitel mai. Pi Hangnem in, bawi! Damtakin pai un aw! hiai akpa na puak di, chia abawm zawl hinhen a ahon kuahsak litlet lai ka mitkha ah amang nawnkei him him.Maban ah chu Tuimang lam manoh ahi ringot mai, koilam hon tunpih di ahi ua, chih ka phawkpha rengreng kei uh, lungkhamna chih khong I theihlouh lai I hamphat lai ana hi eive, a diktak in chu.


Hiai bang in Phamsa Pu T. Thangthuam (IPS) in, pianna gam a ngaihnatna la in phuak hialthok hi:


NGILH LOUH PU-PA GAMJANG
1.    Nang ka pianna Sialkal Zougam nunnuam
Na sunga ngabang lengte nunnuam sawlbang hei
Tu in khimkhua bang jing na kungtung ah
Ningbang zoute sakmel vul ningniang e
        Ngilh louh pu-pa gamjaang Sialkal
        Zatam in na vang ningbang zou, nuamsa
        Kulsin daidam ah khaubang chiah dong in
        Ngilh ni omlou ding Sialkal zougam nuam
2.    Tang a pu-pa zatam kap in han-la
Tongluang in singdang lai ah lawibang thang uh
Gam vangla pan’ zatam gohtam simna
Tang, buh zatam leh sawmsial Aihna hi
3.    Tu in pu-pa sakmel pa bang mual in
Kulsin ah sambang hon jalsan mah le uh
Min manmohna lumsuang kuan long ding hiam?
Juapa jalna mualdawn tulsing lim nuam

4.    Zehzum lou ding kamkei dungsun seinou
Simlei nun ka ma-zap khuambang ding lou aw
Lungtangpha lia leh tangvual ki-san ni
I gam khimjing dai bang thengsak dingin

5.    Vualzawhna thupi mualdawn ah dingin
Nuai jinmang henkol bulh luainam bang sut ni
Aw nunnuam sawlbang ka heina gam nuam
Na nun zou te’n hon ngilh ngei ngei lou ding


Gam ngaihna zaw ana ngei mai, huai hunlai in Paite namte a dingin hunhaksa ahihziak in, a pawtkhe theite a dingin suahtakna ichi kha zawzen na a, tuchiang chiang inchu maw! Sialkal lamte a changkang zawsimta uh, neih le lam hileh, tuinek hileh, lampi hileh, silh le teen, bak ah, a khuate uh a vaak phengphung mai, I lehkik nawn duamduam mai duam le, chi rok le chaw! Non barakhaih em mai.