UPDATES:

HINKHUA A HAKSATNATE MAITUAH DIING DAAN

HINKHUA A HAKSATNATE MAITUAH DIING DAAN
~Vanlallian Valte

vanlallianvalte new

Khovel ah zaw nuamsa gige hiam, dah den thei kuamah a om kei. I kipah mamah lai in haksatna’n hon bawm zel. Neizou a, niang-le-tai te le haksatna theuneu lou toh khosa ahi uh. Huchikawmkal ah, zawng leh genthei te’n le kipahna puan seng louh tantuan nei thei veve uhi. Apoimoh pen zaw kipahdan siam (anachang theih) leh haksatna maituah dan siam ahi mai. Khovel ah haksatnate om lou hileh ningkitel huai mahmah diin um ing. Taaksapna te suk buchin nopna lungtang neih mah bang a haksatnate hih vaiven tup chintenna lungtang hon guan tu bel niteng hinkhua a haksatna i tuah zel te mah lah ahi ngal a - laphuaktu’n "Ka haksatna zong pahna na suaksak zel..." ana chi namah a!

Lungngaih vungvung i chih bang le tutna kipei thei te bang lel ahi - Sepdi hon guan mahleh bangtanmah hon tun lou hi. Haksatna suk vaiven dan a om leh ba' lungngai di? Tal dom zen a lungkhamna in phatuamna nei lou ahi chih chian na pi ba' khuisa den di ihi ua le? Eimah kisiam tawm hiin Sian lemgel haksatna te’n lungkim siamdan leh siamphat theihna zaitha tuun tel hi. Pathian theih louh a thiltung omlou kia thamlou in thuak zoh louh diing i tung ah tungsak lou (LST).  I lungkham-mangbatnate hon ngaihkhawk pih ahi.

Nidanglai in khua khat ah pasal naupang khangdawng dek pan a om hi. A khotheih chiil in a nu’n sihsan. Pianpih sanggam a nei kei. A nu’ melput theitum baan kei mahleh, tunnu anglum nopdan leh a khamuanhuai dan bel mangngilh moh hi. Pawl 05 a sin di kum in a pa'n beisan nawn! Tanau nai nih kia nei hi. A paneu Phaipi ah leh ani Kawlpi ah om ua, kithuzak lou uh. Khatvei, apaneu in Phaipi lam ah paipih tum mahleh, aman – pianna vangkhua, nu-le-pa kivuina mun, leh khanvual teng kimna nusia nuam lou hi. A behte uh inkuan khat pang bel in khosa.

Endih le, khatvei naupang in khosikpi natna namai lou vei in gim mahmah hi. Damsuah diin kuaman gingta lou ua himahleh, lamdang takin hong damkhia. A khut leh khe te zeng man dektak hi.  Ahia, ngeina bel zou nawn lou in zoi; deih bang in zang gina thei lou hi. Siamsinna mazap guibang zom thei vual ahi nawn kei. Khut nasep sem thei lah ahi sam kei hi. A bawl theih sun kholai pawt ahia, lawm ngai a avialdiandian ziak in “Diangpu” chia minloh in om. Khosung a asia-apha; thilhihna teng ah tel kim zou hi. A mibatlouh; laisiam louh; leh, tagahna ziak in mite simmoh leh nopneh in om. Mi’n nuizabuuk suah mah le uh ngaikhawk lawmlawm lou. Hoihna a neih bel: sung-le-pua a mahni kisiam phat tupna lungtang aneih ahi.

Sava a mat lamtak zaw theih ahi chiah kei a hiven, gophel toh dainawl a sava beng guntuh hi. Huchiin ni khat, a vialdian na ah chikmah a amuh ngei louh a mu ta. Pasal khat in sing kapi a khauhual theh-awk tum a buaichihtaka buai hon tuak hi. Mipa’n theh-awk moh hial ahih chia, singkung a kah touh hon pan. Tolhkhe puat zel. A khuuk peuh tat sipawt niaunuau hi. Diangpu in vanaih khong, “Khekhing-baai na hihlam thei in, na khe hoih lam nasan tat se vek nichin in…abang bawl a kinei himhim na hiam?” chi hi. Baaipu in, “Pathian’ hamsiat - piansualna; mite muhsitna; leh, leitung haksatnate pan suahtakna omsun – awklup tum kei voi!” chiin dawng hi.

Diangpu’n deihsakna luanglet toh hilhpil tum mahleh Baaipu in thusim mahmah tellou hi. “Na theihchet nop leh…” chiin belta thum; tuithei khat; allu pum khat; aktui pum khat leh singteh hon tawi tiltil hi. Thuk thum tung ah thil thum te suangsou bibilh hi. Ngaidih, akhauh lenlan allu pen nemta; suanmin ma a akehtam thei – tui a luang mang thei aktui pen khauh litlet hi; belta 3na a kisuang singteh pen tualsingpi teh ana hi hiven, akisuanna tuisou zia nasan khengdanglam – sandup sak ki-keih hi. Gim namtui suah heuheu… A khiat khit-khit ua, khiat khin sipsip uhi..... “Ka gennop na theihsiam ka gingta. Unau, tuisou tuak sapsap, nang bangchiin na maituah a le?”

Theihtuak: Tangthu pen phuahtawm ahi.
VV' Laidiip/22022017

• “No problem can stand the assault of sustained thinking." -
Voltaire.
• "Those who never suffer darkness cannot appreciate light." - Christian Barnard.