UPDATES:

S5 Box

ZOGAM.COM Login

PILVANG TAK A BOHTHUT

PILVANG TAK A BOHTHUT
~ Vanlallian Valte

vanlallianvalte new

"Risk-laa" chih thumal ngaihbaang lua hilou napi, hinkhua a nawlkhin theih vual louh paukam poimoh ahi. Khat veivei, risky sim mahleh risk laak a ngaih hun leh risk la ngam dia hangsan a poimoh hun om gun. 'Dawi in hon lok lou' chihna ahi. Naungek taangbaan len a ding thei pan kiangkiang in risk la hi, kalsuan kisin ta-tauh! Kipuuk suk veu mahleh thou nawn biambiam zel. Kitatliam lou. Amah hihtheihna chiang ah kiveng mahmah sam hi. Na limsak leh na limsak louh enkai kilkel. A thilhih khou lou zaw in, hon poimoh hunhun a huh dia mansa'n na om.

Risk assessment, risk laak leh risk management chihte - kiton helhel in pai uhi. Bohthut ma in, thupukna laak in gahpha leh lungvei a suan diing buuktuah touh den ngai hi. Naupan lai in khoubaang sangtak tung pan a Thangpu' ngakul hiam, Tutha lii ahihkei leh Tuivai lipi a zuankhiak viahviah khawng hun nuam ahi. Khoubaang in na tobou kiatdulh lou; taltang a suangtaak tauh buk lou; leh gilvun tuitung kiphengzeep puak dok lou diin na pilvang hi. Kulluut theihna dia tuiching kiningching huntawk om ahih lam thei a zuangdok na hi. Hih fuh leh nuam - a fuh kei leh tuike-nuih liailuai theihna dinmun ahi. Hihtheihna tan nei i hih lam hon mu sak.

Tanglai Israelte Toupa'n Aigupta sal kipan in pi khia. Kanan gam piak diing chiam hi. Paran Gadai a tun un Toupa thupiak bang in, Mosi in Israel nam sawmlenih a heutute lak a khat zel Kanan gam enkhe diing in sawl hi. Chiamsa Kanan gam hauhsakna mu chiat mah le uh, Joshua leh Kalep lousiah in Kanan mite zohvual lou in mu uhi. Chiamsa laak mai dia luikhiak hinapi in Toupa muang lou maimah uh. Ei bel Pathian in hon piaksa; pupa'n sisan a leisa; malai kipan a luah touh, gamlei zuun gina lou leh vengbit zou ngellou in om hang! Pathian kiang ah ngaihdam ngen in kituluut thak ni.

Peter tuitung a apai theihna zaw huihpi leh tui kihawt te akitheihmohbawl ziak hilou in, Toupa muanna leh thumanna ziak ahi. Muhtheih a pai hilou in, ginna a pai ahi. Himahleh, simlei haksatna kia mitsuan a, damlai huihpi leh tui kihawt honhon te tung a thuneihna nei, thilbangkim siamtu lam maimit a suan louh ziak in tummang dektak hi. Toupa sap di ahihlam phawk nawn kei ngial leh zaw, kichai vawt di hiven!

Albert Einstein: "A ship is always safe at the shore, but that is not what it was meant for."
Hellen Keller: "Life is either a daring adventure or nothing at all."

Voltage@24052016