UPDATES:

S5 Box

ZOGAM.COM Login

Aw I Lak Ah Kua Hiam Thukan A Taima?

AW! I LAK AH KUA HIAM THUKAN' A TAIMA?
~Vanlallian Valte

vanlallianvalte new

Unaute, kumbul a ding pan kiangkiang i kisak leh mawnglawk te bang palh khin diing hi nawn man ta. 2015-16 sumkum paikheng a, sumkum thak a lut leh maban nasep leh kizatna ding gel zom thei a honpi Toupa thupina pia in kipahthu gen kawm in Amah' pina khut ah kilaan thak ni.

Sepdi neilou a om thil nuam lua ahi kei hial!. Sep di ngah a i buai phili leh hun paisot bang hi. Haksatna, lungdon, mangbatna-lungziinna hiam, taksa zawngkhalna i tuah hun in leh thil ngaklah tuntun i neih chiang in bel hun kivei sawt mahmah sak in om hi.

"Leitung nuntakna ka gelgel chiang,
Tom lua e tom lua sang e;
Hihhang lungkhamna ka tuah hun chiang,
Zankal khat zong sawt lua sa'ng..." - Htp V Paukhansiam

Naupang kansuut: Ka innpipa a naupan lai in ommoh' leh kansuut thuah chi uhi. Mei-aam, sek a suk dalh phok nuamsa mi ahi. Inkiim ah vasa thaang kam sek. A thaang siah a, aak va awk lai tak et mittaihuai sa. Sakei a faifuk theih leh theihlouh khawng thei nuam mahmah hih chituak.

Siama Hauzel: Nu, bangziaka aak in khedap a buh louh a? Dumde koi ah a ihmu dia aw? Tete Zomi: Nu, ka pipi in bangziak a, suang (balke) ne dia hon sawl mawk ahia?

Numei naupang fel leh kansuut Daisy Ngaihte kichi a om. A ningkitel sim chiang in, "Ka bp a sang sin!" peuh chi phelphal hi. Tukum Easter Sunday biakinn kaai pailam ka ton khawm kha ua, anu kiang ah electrict post kawk kawm in, "Huai bang a?" chia a dot leh, anu'n "Electrict pose" ahihdan hilh hi. "Lem a la dek ua eita?" chi thouthou!

Kansuut, kimkiang a thiltung te ngaihven le thil kithei diing hitah. Thil thei le apilpa/apilnu khat kihi mai di ahi. "Ei khawng gen-le-sak kitoklok di om kei!" chi kei ni, tuimal neuchikchik in Mata Dam bawl ahih phawk ni. Huai tuichin deem-duum pi i phattuam pih lawmlawm khol kei ua chih thu chauh!

Thuduh: Khua khat a meithai khat a om. A lungsim kokkawlek lai mahmah hi. A thuduh dungzui in khosung thu thei lumlet. A thutheih te kua phattuam pih di a om khol kei a hiven: (1) Huai nu leh huai pa kingai (2) Hua'n huai toh kop (3) Huai te ki-khen uh. (4) Huai minu selsul zaw zawlgai hitawk di e! (5) Huai nu'n nau hihke nawn (6) Gintaak louh pipi in le aangkawm uh hi vial veh aw!

Thei lem kipang: Thil thei loupi, thei viau dan a le om theih nilouh ana hi. Vaigam ka om khiak kipan a tuni chiang dong, vaite mizia ka zehuat chimmoh khat: Munkhat zotna di theichian lou in dong le, a thei lou piin le, "Ken le ka thei chiah kei a, midang dong mai ve..." chih sangsiah in kawkmuhna lam hon nei gun uhi. Midang dong nawn le, kithei sak tak a, i kipatna lam peuh hon kawkmuh zawmah – lung-ap huai pi ahia, "Dong lou himai leng!" kichi kha naak. Vaite eng ken!

Kimkiang a thiltung sa, tung lellel leh hong tung mohlou dite ngaihven, thukan tak a kansui touh i mohpuak uh ahi – khantouhna deih taktak bang sim ta hileng kilawm. Thutak gum a ding diing eite hi hang.

"...Lou lingneite lak ah na haichite uh pawi kei unla, na lou kaihlouhte uh kaita un." – Jeremia 4:3 (BSI)

-Voltage 24042016-