UPDATES:

S5 Box

ZOGAM.COM Login

Ka Lei Pathiante Kiang a Laithon

KA LEI PATHIANTE KIANG A LAITHON
~ Vanlallian Valte

vanlallianvalte

Henu-Hepa,1955 kum a na thrian uh Phamta V.Tlangluai, Zading leh Sialkal tlangdung khual leh tual a misiangthou pungkhawm te theihpih in Vaikhawtlang vangkhua a Pastor Thangkhuma mai ah na kikhutsuih ua, a champha 60 veina mu thei a hon pi Pathian thupina ipia hi. Solkar nna ka sep kum 21 chin toh kituak hlauh zawmah. Hiaitan non dampih uh angtang kisa'n hampha ka hihlam mangngilh di ka lauhpen ahi fou.

Damtak leh kichiangtan lou a hiaitan na kiten uh thupi kon sa. "Tiam tlat e!" na chih uh kha chitaktak mah na hi uhi. Tupa chiamnuih khah philphel te thawlen deuh in gensak le chu, "Na peih sawt thrianduun hrep ve uh, Zubelmual louma neih kum; Sakei Zaang lam a neih kum uh non phawksak reuh ve uh!" hon chih d'un ka gingta thok! Huai lai a tuisik le hinai rengreng si lou uh! Abul a kipat in, tukum EBC Church in thupi a kinei, "Pathian pahtak inkuan (Kol 3:18-21)" din tum tinten na hihlam uh ka phawkkhe thakthak.

Tunitan in Pathian kianga kipahthu genna, mangbat-lungzin thumna, annkuang thumna, zingthoh leh lupkuan thumna ka neih chiang in aguhgel nou hon sinsak bangbang ahi lai. Pathianni zing kikhopna ningkitel a, i sungkuan lapi uh, "Jesu muan a lungdamhuai pen" chih sak chiang bang a bil ka hum lai ka gel thak chiang in hai kisa in, sapkiik theih hileh chi velvul mahleng kongrou sulou hi.

Sunday school kailouh di khaptlat ahi sek. Thohlawm di naya 5, atampatawp in makhai non pia ua, cheng0khat siik bangchu mahajon deuhte tate thoh dia kikoih le hisimlim hi. Ni khat lawmte toh thohlawm thohlou a nektheih lei na dia zangdiin ka kithukim uhi. Mi khat in chu sungkuante' piaklouh bawn hilou, kisiamtan lou deuh ahi dia, thohlawm bawm gong sawk kawm in, sumsiik khe tuan lou; akam in, "Klang!" chi chitchiat. Lamsak Tomba te nektheih zuak him lawzen a. Ka omdan uh kua hon theih hikei mahleh, insung luut di lin lou ka om kei uhi.

Na von momnou 09 te uh pawlsawm chiang bek passik sak lunggulh in azu-ahaam; thousi-thouvai thuak in na pang uhi. A poimoh leh vaimiim zuak chianga dit dia sum thunglak lin lou diin maivun sahsak masa zen in na diangdok peih uhi. Ka pa sumdawng dia zindek zuih ka nget lai in non mantaang ua, hai kon sa hi. Paching a dia le thilnuam lua hilou, kei naupangsia zoh vual hilou ahihlam phawklou a kimuang huntawk hiveng... Ka pa'n hon it lou a hon zinsansan ahi chih ka lungput ana hi. Ana naak hihlouh khiak danmai!

Nunu toh loukuan pai vuahsia in hon lap a, alukhum in hon khuh hi. Lawmte toh ka tanchin uh ka gen leh nui viviai hi: Gial a kiatnasat chiang in guamdung ah hapta khat khawng zulmang lou a om hiven, Thanglianmang te toh gialtoh kawm a kangtalai pei di saat diin ka kuan ua, meivom kizialluum vutvut in khua mial zou hial hi. Vuahpi hong zu. Koule chihngaihna theilou in, "Mialna om nawnlou diing a hongpai chiang" chih leh, "Jesu'n zan suun suaksak ta" chih laa ngaihpipi a ka sakchiang ua hong vaak deuh, vuah le tawm zuk deuh hlek eive! Taktak.

Nu aw, ka pa Mizoram zin kar in leipi ah i kuan a huihpi leh vuahpiin hon nuai ek hi. Ka ngaihsang mahmah gal a khiangpi kung akapi a tuangkawm a sap laa solo na dia ka etlah mahmah sek khawng kibal duatduat hi. Loubuuk tung hong kihawk a, i belh pen lah lehlam-lehlam a awn doidoi hi. Hakvang in non ziallum a nang lukhum kikhuh ngiungiau in vuahpi leh gialtang na thuak hi. Thumna na neih in le kei a dia thum zawmah lai! "Ka pa om leh zaw..." ka chi vungvung a, nang le na lungsim in na chih louh taak leh.

Konvenson sikul a A, Aw, B, Ch degree ka ngah khit in, "Na u Thang (Late T Thangthuam' sikul, Model School ahihkeileh saap sikul le kichi ) ah kaita in" chiin non suan uhi. English medium omsun ahilai bok a, huai a kaite mite tung-et kihi deuh hi. A kou mahmah le kithaldaak deuh hiveh aw! Sappau a pau gina thei nailou nasan kisiamsak mawk. Lungchin, Ngalzang, Haicin leh Serbung kipan a hong zintung te English phuahtawm-kaihmaat in kon sermon khum taktak bang chu aw, buai thou sam uh hiin maw. "Hi ciah pha pan a Mangkam siam, ong lian leh pen duaisan ken cia!" peuh chi zawmah uhi. Sawt kihal lou in ka min bang hichiin kon translate hi: Heaven king big, extra people (Vanlallian Valte), ka paneu V Vanneithang in honphuahdan a lah Pathian letdan leh thupina genna kawm a kei hon vualzawlna tongsuah hi reng si.

Awle, gen nop tam mahleh kumnawn tubang hun chia diin limsiit phot ni. Pathian in damna hon pia a nougel ki-it semsem diin hon vualzawl hen! Amah toh kinaih semsem diin Sian in hon siam leh chih ka thumna ahi. Na hon itna, khotuahna, ka thumang louh laiS na-ngawn a non lungngaih tuntunna te uh 'ditdi' hileh chin kei na mahmah ing e maw tun-le-zua aw. Ka hihtheih sun, "Nunu, Pa ei...KA HON IT LUA!" chih hileuh tel lawmlawm veh!

Hiai zah in hialbawl phot ni. Zan khat zalmangpha

Na ta 09 lak ua a 05na
Vanlallian Valte
New Delhi
03092015

Biakna late 165
JESU MUAN A LUNGDAMHUAI PEN

Jesu muan a lungdamhuai pen
A thugen khempeuh taksan;
A thuchiam a kinga a muan,
"Toupa'n chi hi," i chih theih.
Sakkik:
Jesu, Jesu ka muang mahmah!
Muanhuai hi, ka chian gige!
Jesu, Jesu, manpha Jesu!
Bangkim a Amah muan ding!

Aw Jesu muan a lungdamhuai,
Sianna ding a sisan muan;
Ginna mawltak in ka bual a,
Sianna lui A sisan ah.

Aw Jesu muan a lungdamhuai,
Kei dia hin leh khelh tawp in;
Hinna khawlna pahna muanna,
Jesu ah ka mu, ka nei.

Nang k'on muan theih ka lungnuam hi,
Jesu Hondampa ka Lawm;
Ka kiang ah na om chih ka thei,
A tawppha'n n'on ompih ding.
es tamsim kon bawl pha thak