UPDATES:

Zu, Suangmanpha Pua

ZU, SUANGMANPHA PUA | ~Vanlallian Valte
vanlallianvalteAw i lak uah kua ahia pekluum ana kimawl kha ngei himhim lou?  Kei ka hah kimawl thei ten hi. Khutzung leh mit a pankhawm siam ziak uh ahi diing e, ka pung deuh gige.  Lawm khenkhat pilkhel pipi om uh: pekluum kaap kha hetloupiin, “A thawi cheuh voi!” chia sihngam a pang peih om uhi.  Mikhat taget, a sungkuante nektak bawl kiman dek nailou himahleh, a punlai ahihpeuh leh, a naute kisamsak mawk sek, “Ann nek hunta, i nu’n kintakin hong pai in a chi ve!” chiin.  Mi huchibang mite zaw peklum in a hausa thei taktak tuan kei uh. Ken Amulspray buuk dim ka nei gige. Sailiim sawmnga leh kei pekluum khat kikheng pih di om den hi.

Suangpeehmun khosung lut kuan in chikmah a kangsat ngeilou luita nih kinaihtak in om hi. Khat Luinai, Paukhanlal te lui le kichi ahia; adang pen, Luigamla, Mangpite lui ahihkeileh Saaplui chia le minloh ahi.  Hiai lui nihte Tipaimukh Road nuai a culvert sung a kitholhlut in suahlam ah luangsuk ua Tuipilui mat uhi.  Luigamla a culvert ngial houh hawmlian- uku tampi bulhtuah a kibawl ahia, tuuktui luan hun chian’ tuilian in singluang lianpipi tuah paisuak honhon!  Lamsak a khoubaang kaltou in luinaak zuitou le, luipang ah sih khat, Sakhisih Lui kichi om a, sih bul ah theizawn (theithiit/theithiik) kung lianpi om hive’n, gahpha thei mahmah a, a phung kipan, a dawn pha’n gahdim tuttut chih ahi.
 
Hiai kuam toh kisai thuthang khat: “Nikhat, Luigamla kiang a khosa ‘labour’ tate  Sakhisih Lui ah va kimawl uhi.  Tuisung ah suangtang nih pekluum bang a luumpha mu ua, marble a zat diin tawm uhi.  Giksim ti-telh ahihtoh apate un lamdang sa in Lamka lam ah va ensak uhi.  Suangmantam chikhat zaw ana hipeuhmah a himahle bang pentak ahia, amanphatna bang, chih leh amanphatna zah toh kituak a leisak uhiam chihbel a thei omlou hi.  Puansilh-niiten thak tampi toh hong tungkiik uhi” chih ahi.  Ka kanchian hi. Mikuahiam huai mite’ te summuhna lam leh a vanlei uh kimil salou khat in gintakthu a gen paisawn zuau hong kibehlap ana hi leltak.  Daih de!
 
Na hun manphatak thuthang belhchian dawllou a kon heikual sak ditna dandeuh in a taktak, kapuzon te insung mahmah a ana tung khat kon gen di. “Gamlak leh Tuilipi khawnga khosa gulpi te suangmantam pua om uh a, nitak chiangin huai suangmantam taangpha mahmah hi. Ganhing tuamtuam in va boh ua, huaite gulpiin ana ne zel ahi,” chih mutute’ gen, midang kam a zaksawn leh tangthu khawng a simkhak lamtak ka thei.  Himahleh sazu suangmantam pua kigen lam ka theihna sawt nai lou.  Sawtpek a kipanin ka puzonte, Suangpeehmun khua ah ana teng ta uhi.  A inn uah nitak chiang in thilvak pua zu khat tuangtung, inkal leh khinpi tung ah vakkual sek hi.  A paina lamlam taang denden. A min diingin, ‘Zu Suangmanpha Pua’ saa uhi.
 
Inmun lemtaang zaw en in, lamsak, lamkhang leh paamlam veng gamla simpi bang ah kisuan hunte nei zel mahle uh, huai sazu in zui zel mawk hi.  Mat ana tum ngellou uh ahihman in hausak lunggulh khollou a d’uam ka chih ton tam hi.  Khatvei zaw ka sungnu’n etchian nuam in puanza khuh ngei ahi awm a, kigel suakta thouthou hi.  Ka va zin ni-khua in, hong kilaak mahmah leh ka chi tuntun a himahleh hong kodawk nuam lou!  “A kilat louhna sawt simta hive’n si le hita’n te!” chi uhi.  Zukua a siden bang hi maithei hia, puzonte innuai leh a huan khawng uh pawng toh di lah, khosung mite’n “Makpa Venglou!” hon chih di uh lauhhuai zel!
 
Huai khua ka veh nanungpen in, nikhat khosungmi, Gouzamang va gamvak hi.  Suntanglai piin hon tung thulthul a, “Banchi dan e Mang, hon tung baih na chia!” ka chih leh a tempawng suan mahmah, TATA sipiring siik hoihtak a kisek, a kisekna le sawt nai lou hon ensak a,  “U Lal, maupum lianlou ka vaitan leh tempawng lamdang tak a hong kibong mawk inchin, nuamsa lou a hong pai ka hi!” chi Rock mai akale!