UPDATES:

S5 Box

ZOGAM.COM Login

Alpha leh Omega

Alpha leh Omega  | By: Vanlallian Valte
vanlallianvalteAlpha (Α /α) leh Omega (Ω/ω), Greek laimal a amasapen leh a nanungpen ahia, English alphabet a ‘A’ leh ‘Z’ bang ahi.  Laimal nih Alpha leh Omega te Toupa’ hihna taklatna ahihman in Kristiante chiamtehna: Kros leh Chi-rho khawng toh gelhtel khawm in om sek hi. Kristian pawltuamtuam in Toupa Jesu leh Pathian hihna genna in pom uhi. Paukam minthang takmai ‘Alpha leh Omega’ chih, Toupa Jesu Kilakna Bu pan a hong piangkhia ahi.
 
“Kei Alpha leh Omega, omsa, omlel leh hong om diingpa, Bangkimhihthei ka hi, Toupa Pathian in a chi hi.” (Kil 1:8) “…zoh ahita! Kei Alpha leh Omega, Abul leh Atawp ka hi.” (Kil 21:6) “Kei Alpha leh Omega, Amasapen leh Ananungpen, Abul leh a tawp ka hi.” (Kil 22:13).  
 
Rabbinic Literature, Juda sahkhua a Pathian minlohna khat  ‘emet’ (אמת – thutak) Hebrai laimal masa, laita leh nanungpen kigawmkhawm ahi. Islam sahkhua Laibu, Quran 57:3 ah al'Awwal (الأول), amasapen leh al'Akhir (الأخر), a nanungpen Pathian min genna in kichiamteh hi.  
 
Pau tualleng, ‘A - Z’ chih i nei ua, ‘thil theichian mahmah genna’ in kizang hi, etsakna diin, ni khat office kaitawp, seppihte khat kaisanna lawm in ka phaphet kei ua, inn ka mialtun hi.  Vaitunzu hon luup lou ua; ka nektheih puak nasan thudon lou uhi.  Ka tunhak ziak ka gen leh, lawinu’n, “Bangteng gen mahlechin na hihna A – Z in kon thei!” hon chi hi.  Ken, “Tamaizen aw… A - Z kia’n hon thei ken la; A AW B Ch(aw) in le hon thei ve!” ka chih thahah leh nuikhia lualua a, ka kisilna di tuilum a suan, khing gawp khin pen suangsa thak diing in anhuan-inn lam ah ‘catwalk’ phei zeihzeih zawzen hi.
 
Kumthak ni in EBC Dwarka Biakinn, New Delhi ah ka va kikhawm.  Tutmun hawmte’n mavual lam pek ah hon hawllut ua, tawlkhat teng dekkhuuk siipnat teuteu hial hi.  Himahleh, ka laadeih ngen hon sakpih tak un ka hong maingal pah hi.  Hunkemtu Upa Thiankhanmuan in “Amasapen in…” chimasa.  Praise and Worship Team leader in hon ‘amasapen in’ nawn a, kumthak thupuak gentu Local Chairman Upa Damsawmthang in le, “Amasapen in…” chi khiankhian hi.  Huai teng ah tawp mai lou a, thugentu - Pastor deihtak V Nenglian in, “Amasapen in…” hon chi kalkal.  Eilawi in ‘amasapen’ ngaihnatna nei ihi uh chih ka theih in kipahna’n ka pumdim.  Amasa di masa sak leng, a tawpna le hong dik ngeingei di ahihdan hon phawksak thakthak.
 
Sawtkuam paita in Kolkata, (huai lai a Calcutta, eipau a Kalkat), Salt Lake city ah sanggampa’ pangbel in heutupa Vungzagin Valte toh ka omkhawm kha uh.  U Gin in Bank PO a septung lai ahi. Khaloh a muh masak nitaklam in voksa hon lei a, ankam tuiawm di lei dia hon sawl hiveh aw... Baihlai thou hiven chia pawtkual cheuh sese. Frankie Lawmkima Sailo leh Lalmalsawma Colney toh va kimaikha; ka pawtna ziak mangngilh in ani nawn khomui kuan in inn ka tung hi.  Amasa di amasa a ka koih louh ziak in voksa ka ngolhloh a, U Gin in le a duh ankamtuihang hawp khial hi.

Kumthak lopna ah kiiknawn ni: Kikhoptawp in singpi sipisial deuhmai dawn a kichibai tuah khin - nuamtak a lenkhawmna in zui hi.  Laa, theih tawnsuak nei kei mahleng, ka sa tawnsuak thei vek hi.  Labu hon piak uh ka phen sese kei; lachang gentu leh ka theihna a ki-nga.  Laa tel nop nei mahleng, khatvei kia khawng haksatak a mipi sak nimnim lel di tel khak lauhthawn ziakin ka tawpkik zel!  Ahimhim in, Biakna Late leh Pathian Ngaihla kigawm 913 lel nei hang a, enlou a sak tawnsuak theih awmtak zaw hita hi.  Lathu i limsak louh luat pen uh; lathu kikhenkhen suanlam nawn kei ni.  A tamzawte mi phuah kilet ahi a, a phuahtute phuahdan, phuahna ziak leh thu omdan en a bawlthakzel tuak ommah ahi. “Tuipi luanglai sattan” chih bang le, khawlsak lel hilou a sattan petmah, leihul giugeu suaksak ahihman in dik zaw ahi, chiamnuih bawl a ‘fik hmok’ na diing thu a om himhim kei.

*****