UPDATES:

S5 Box

ZOGAM.COM Login

Ka Gelh Utlouhte Ngen

“Hiai na top-up gen gige ule ka zaning, ui in a langlang ah a tuahkual a, konglai khawng ah a thehthaang nengnung a” - Nu Ngilhlou.

vl mangzouLaigelhtu tamtakte’n thu a gelh chiang un a bulpatna di’n mithupi, miminthang leh milawhchingte’ thugente taklang sek uhi. Huchibang a ahon gensawn (quote) te ukha amau’ thugelh ding tawh kizawitawn hi sese khollou hi. Ke’n leng top-up tawh kisai gensawm ka hikei a, zanlam deuh a Singngat khua ka vaphak a ‘Nu Ngilhlou thugen ahi’ chih ka va zak in nalh ka salua a, ka nui vakvak a, simtute’n leng nalh na sak uh gingta in ka hon gensawn ahi zaw hi. Aman top-up kichi kha diaper (huggies/stayfree/whisper) sa hi maithei…hahaha… huai, numeite’ zun hawng kha! Mihingte i nuih chiang in i sunglam naktak in kisoi a, huai in huihsia (carbon dioxide) tampi hon pump-pawt a, huai huihsia pawtkhete’ tha kheng ding in huihsiang (oxygen) tamtak kidiiklut nawn hi. Huaiziak a ‘nuih damtheihna’ ana kichi eihchu. Hileleng nuihlup theih ahi aw. Hiai lampang hon genvak sawm ka hikei.

Khatvei, weekend mang dia Singngat ka va zin uh chu Bolero a ka seat ngeimai ah ka tu nawn kekkuk a, lampi a siat mahmah ziak in a nuam liaikei. Ka driver uh a siam mahmah a, a dan om. Lamtawn a la khah (play) inchin nuam vanglak. Hileleng a la khahte kha gam-a kigamla thei. Lalruotmoi in ihmu dekdek a hon awi phot. Aban a guitar khatvei ahong kisai maimai a leng la kisa ding ka theih ziak a ka ngaihtuahna in field sik a hon dingsak, ka mitkha a Chinglianmang, Pa Khatzaneng, U Pauzalang, Pa Thianthang, U Thangpau leh Kiss Touraw te nupa khawng hong lang dundun i chih leh Paunou in Khattang Sawlbang Heina Ah chih la asakzawh a Jay Z hia, Akon hia, Eminem hia chih theihbutlouh hong rap ek, anawn a vaila peuh hong kisa, a ngaihna omlou. Combination om mawngmawng lou. La buhchiar himai. Hiai pen ka gentuptak ahi tuankei.

Hih ding poimawh a om ziak in Tuimajang khua ka va phasuak uhi. Guite Road lampi siatdan zaw genpeih leng huai nawnkei. Gen peihhuai nawnkei ka chihna. Kuan leh pailam inleng la ka ngaikhe den uhi. Huchibang lamsau paina ah la ngaihkhiak kawm nuamtuam mahmah hi. Hileleng a khah (play) tute ah ki-nga mahmah a, mipiching ngen 7 vual khawng in rap mai hilou, tulai a kithang, ahawk a hawkthawh, achang a kikou vongvong, akarlak a hum-ham thawk hial khawng ngen k’on ngaikhe reng uzaw, kahtha lamlam a suak. September, 2009 kum a Mizoram ka zin in Kawlkulh apat Champhai ka zanpai uhi. Driver in vai lalui ngen - Chalte…. Chalte…, Aa zare, azare ho mere dil…, Star film a la – Bolo bolo bolo na, Alisha Chinay’ la Made in India leh Tere masoom nahi zindagi chihte khawng ahon ngaihpih bang chu ahon khoihdan dangdai riau hiveh aw. Huaiziak in, i kiim i kiang a te’n banglam ngaikhe ut ahi ua chih bang leng khualpih di’n hoih mahmah hi. Eiloi’ siamlouh thiltak hi in ka ngaihtuah. Mi 2/3 omkhawmna khawng lel ah leng eimah ngaih-ut zawng pawngkhah vorvor in, Damdawi Inn tanpha ah damloute leh midang khual mawngmawng lou in mobile-phone i gingsak sek uhi. Hiai zaw ka awlmawhpen leng hi kholkei.

December 22, 2012 nitak in Assam Rifles te’n Hiangtam Lamka mawltual ah Advent Christmas chi in concert sai uhi (nidang a Advance kichi ka sak leh tulai in Advent ngen a chita ua, a dikzaw a hi’nteh). Pianken a hawkdak chih mahtak lawmte tawh ka va hawh ua, ka tuntung ua pat ka paitan uh ka nui charchar. Ground ka lutchiah ukha mi 1 in knockin’ on heaven’s door ana sa ruihruih. A khawnung zek a mi 3 hiam hong ding unchin, guitar khatvei hiam hon saiging pan uh i chih leh a lu uh hon sing ek-ek ngal mawk uh. Hahaha…. Eh-eh-eeee…. chinchi kei, a lu uh hon singpulh lemlum d’ua hon ngoh kha unteh, pai ni uh chi in ka lawmte ka zawn hi. Driver in car in hon taikhiakpih a, a lasak uleng ka zamang (faded) riairiai hi. Ka ngaihtuah zui a, a Advent Christmas un leng Bethlehem lam a-nga mahmah sam a; Jesu piandek in Joseph leh Mary in Bawngbuk kongkhak ava kiuh ua hia? Serafim te’n ‘a kipahpih mahmah leimite’ tung ah lemthu leeng hen’ chih la a saklai un a lu uh a huchi sin khol d’ua hia? chih khawng ka ngaihtuah na lam ah, concert a hawh ka hihlam uh bang ka mangngilh hial a.
Eimite’n concert leh thilhihna dangdang a la i sak chiang un track i zang tangpi ua, live music muhtam in a om kholkei hi. Track zui a sak leng ngaihkhiak nuamlaw mahleh, live music mahmah nuam ka sa hi. Kei hi thu leh la a lunglutmi ka hihziak leng ahi dia, concert/musical nite chihvel khawng ka pahtak lampang ahi vanglak hi. Bungmual a Zomi Nam Nitak bang chu nuam himai, zingkar a aw heu thaw akahia! Bangteng hileh, huchibang hunte ah i niam (uncivilized)na uh alang sek hi. Buaina bawl ding tawk om teitei. Abiktak a ei-le-ei ngen’ omna (compact area) na-ngon a leng kivengbit zouloute i hi uhi. Huan, a la/music a tui leh phur hilou, khamphur mahmah kitam theilua. Stage tung a mitsi duarduar a va dinkhiak, va laam khempeuh chihte, lasatu va hetkhak sese chih khawng midangte’ a dia mitsip-huai, programme su bolhlawhtu ahihdan i theih uh hunta ka sa. Maban ah, huchibang vai hon saitou zel dingte’n leng panlak hoih ding hi. Tanmun neilou chiang nanana chu stage tung ah alawnlouh ding uh, himai! Ka ngaihkhawkpen zaw hi tuankei.

Tulai, khangthak hun (chizen mahle’ng) ahihziak hia hiai lusing ahong lar mawk chih ka ngaihtuah sek hi. Lamb of God, Avenged Sevenfold leh adangdang te’ video ka en tei sek a, ke’n chu haihuai burbur ka sa hi. Dawi-le-kau, Setan, sisan suahna leh gawtmun lam hoi lawdeuh in ka ngaihtuah a, a aw te mawngmawng uleng gamsa ham bangmai, gen mumal neilou, khamtheih-aw lawdeuh in ka thei hi. Huaite mah in tulai khangthak leh tuailaite’ lak ah zung kai nasa mahmah a theih in om hi. Eilak khawng a lasak siam (la sasiam) leh tumging tumsiam (tumging-tum siam) te’n khamtheih tawh a polh uh ka chihna hikei mahleh, huai lampang line hi khamtheih tawh kinaih mahmah adiam chih in om hi. Ka neulai a khamtheih zongsang piangthak khat in Biakin a a testimony ahong gen ka theilai hi. ‘Khamtheih hihte naungek in a ngai ua, i don leh a tei mahmah uh’ achi hi. Aziak chu a khamtheih huu uh diik/thuak (feel) pha uh ahihman in (naungekte) huai in khim inchin tei uhi. Huan, ‘music a kingaihkhiak chiang in rong (colour) chi tuamtuam in kimuthei’ chi hi. Huaite’ ziak mah adiam, eilak tel a khawvel a tumging/lasak siamte khamtheih tawh kikungkaih a asih nak uh chih in om hi.

Bangteng hileh huai lampang saupi gen ngai ka sa kei. A late mawngmawng uh nalh ka saklouhdan, eipau a gendan ding ka theikei. Benny Khongsai inleng gen thei kei inteh. Ka chihziak chu, kei kha mi kam-uang mahmah khat ka hi a, ki-itna thu ka gelhnate khawng a a-nungak’ hoihdan khawng ka gen-uang nak thei sek a, genmawi siam leng ka kisa thou hi. Hileleng, kei’ sang a Benny kam-uang zaw – nungak khat hoih salua inchin Pathian’ bawlkhelh hi’nteh chitel eivoi! February 20, 2013 nitak in Bungmual ah hiai la – ‘Pathen Semkhel Lanu’ chih ahon bei taktak chu ka na hawknak uh eive aw, nuam himai. Inn ka painung a, Vannuai a hoihpen Susmita Sen (Miss Universe, 1994) leh Leisetchung a hoihpen Aishwaria Rai (Miss World, 1994) te na-ngon ‘ka ek’ chihngam na ding khop a nungak melhoih amuhkhak, hiai chiah zaw Pathian inleng siamkhial deuh hiau hiveh aw a chih chu kua ahi mahmah dia aw chi a ka ngaihtuah nilouh leh ka inteknu’ nungak-lai ana mukha hi phiangsan. Ka-te, ka-te, kitangkha lou dektak avele!

Ka gelh utlouh, ninhuai kasak khat k’on gelh thouthou ding. Traffic-fekfik. Tuni tan a leng traffic bawhsia mat ding hunkhop a om lailai tel lamdang ka sa. Kou Police-te na-ngon leng helmet khulou leh adangdang Sap-pa’n warning pe teptep ahi chih mipi’n theih ding in hoih hi. Ahimhim in helmet bang leng Police-te’ lak a bitna ding (Police safety) lel a khu hi lehang kilawm hi. Eimah mimal’ hinna a ding a bitna (personal safety) ding ngei in, ahoihdeuh mah khu thei lehang hoih mahmah di’n ka gingta hi. Huai ka chi na a, kei mahmah leng gari neu hek peihlou lampang chu ka hi, helmet khuk ka lit ziak in….haha…. Maktak zaw kihi veh aw, mihiangte. Bangteng hileh, thuneitu te’n tua sang mah in traffic rule hon khauhsakzaw uh henla, pei 2 nei gari a tuangte’n helmet khuk ngeingei ding, auto hekte’n awmphaw bulh ding, gari lian hekte’n jungle boot bulh ding khawng hon chi le uh. Pouh kichileh!

Tukum (2013) chu jubilee kum chihtheih hial leh kilawm hi. Koilam hiamhiam ah bang jubilee-li hiam om vengvung hi. Ke’n leng thilkhat phawkkhiak ka nei a. 1988 kum lak a ka khua ua nungak ka hel chiang un inn khat ah tuilum ahon hawm chiang un ‘tuilumsiang dawn uau’ ahon chi sese sek ua ‘tuilumsiang te inn ah pawt ni’ ka chih chiang un amun ka theisiam ngal mai uhi. Inn khat ah lah vai-anthuk keu gawivui tui tawh pawlh ahon hawm sek ua ‘asanchi dawn uau’ ahon chi zel uhi. Huchibang in nungak helna ah tuilum kidawn sek hi. Nitak khat, nungak helna a tuilum dawn a ka na chiak kheukhou uleh intekpa hong paiguih inchin, “Abang dangtakna na hi ua, tuilum dawndawn i chihte khawng zaw lengla deihhuai hi khollou ahi uh, nganja khawng a teep chiang ua adang uh taak hivial inchin” ahon chi tamai hi. Ka ngaihtuah chiang in huai tuilum dawn tungtang a ka maizumna uh kha tukum (2013) a kum 25 chin kum Silver Jubilee ana hi reng a, phavang lam a nasatak a lop di’n kei kia a One Man Committee kidin in thupukna ka la hi.

Huchi’n, a ni leh hun ding bel awl in ka hon puangkhe dia, huai ma a theih ding tamlou ka hon taklang ding. Huai Silver Jubilee lopna ding tawh kisai a gan thawh ut-te’n College Veng, New Lamka a heutunu Biakhoih kiang ah form a laktheihta. Gan thawhdan ding – (1) Kuama’n lamet nei a thawhlouh ding (2) Kiengsawn a mi’n leng thawh chih ziak a thawhlouh ding (3) Maipha zonna a leng thawhlouh ding. Huchi hilou a, kha leh thutak a thawhte bel a min uh hoihtak a chiamteh ahi dia, Silver Jubilee lop ni in a sumsen teng uh a leh 3 a ditkik vek ahi ding. Singngat a Augmentation of Water Supply Scheme, Rs. 2.05 Crore ngut sehkhiak a om tungtang khawng hon kigelhgelh sam hiven, a kisaipihte’n leng final bill a lakman uleh tamlou hon hawm nalou d’u hia (hehe… very ki-hope sang i-zi-nawt), amaute paakta lam in a kigelhkha kholkei a hiven. Poikei, kuate’ a hiam 10% khawng in k’on pham dia, keimah pocket apat mi’ sum in ka hon din thouthou di! Hiai pentak zaw ka lungkhampih kholkei.

Ka gelh utlouhte ngen gelh dia kuamah hon phutluih ka hikei a, kuama’n leng ahon vau kei ua, phone call leng ka dong kei a, ka innkong uah leng bomb ahong kikoih kei. Kuama’n hong samkhia in ahon maituam kei ua, ka kam in jawngtah tang leng ahon kei sak kei uh. Jawngtah ka duhduh tawh. Hiai ka thugen chiah chu a gingtalou na om uleh hong kuan ua, tuilehluan, akhaih, tuililut leng k’on ngam. 120 vei aw. Huchitan a leng mawhpaih a ka om leh Siampulian leh Vaihawmmite’ mai ah bawkkhup in siamtan a omlou ka hi chih pom in Burma sum Kyat Makhai ka liau dia, Siksakor thau penpen ka gou ding. Nitak chiang in Siampulian leh Vaihawmmite pahtakna in ka tate tawh concert turu deuhmai ka bawl ding ua, ka lu uh ka singkhe phialphial ding uh. Mipi lam chu lusin ziak a kisukbuai phal ahikei ding.

Gelh utlouh ka hau lawlai na a hun phot mai hen aw. Annek lim uau, na meh khawlak pawt uh samkhawm unla. Na hakar khawng uah tangsak teihtoih kei unla, i kiang naideuh khawng a na hong pau chiang ua nuamlou eihkha, na thingroupui meh gim uh.

 

@mangzouvl/May, 2013

COMMENT (2) PHA TA..  
  •  
  •  

#2#2 keelpatei » 2013-05-25 15:40

ALOUNIHTAK CHUH SHArom!

  •  
  •  

#1#1 vanlalrocket » 2013-05-23 16:22

"Tuilum siang..." he3 khemkhem sek mai!

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING