UPDATES:

Mihoihlou Mah Poimoh Zaw Ihi Ta'm Maw

Mihoihlou Mah Poimoh Zaw Ihi Ta'm Maw
By Lian Samte, Columnist Zogam.com

123

Hiai kampau ngaihsun pak dih: “Politics ah lunglut kei mahlechin politics in nang hon khan tuanlou ding hi.”
Barack Obama gen di khawng abang maw? Teuhlou. Jesu pianma pek a Greek mipil khat, Pericles kichi in agen hi daih eive.

Politics tuh mihoihlou te a ding dan a nawlkhin in om nak. Migilou bukna tawpkhawk (Last refuge of a scoundrel) chih in om hial. Ei, za-a-za Christian lak ah leng tuabang ngaihdan ahi thou. Politician te tuh nekguk hatte, zuauhatte, setan-vanzatte, tuiluang omlouhna a le siklei bawl di chiam ngam te, lawkna zong hetlou a mipi nnasem hinapi vah hulhul te, etc., dan in ikoih uh.

Gel sau lai le’ng, igam-ikhotang pen mihoihlou te chalai hilim lou ama? Mihoihlou te’n utut hih. Mihoih te kinungtawn-tawn, tawn mang. Thilhoih gen-gen, sem tuanlou. Mihoihlou te’n hih pahpah. Mihoih te phunphun.
Shiv Khera in a laibu, ‘You Can Win’ ah, khotang siatna pen mihoihlou te ziak hilou in mihoih te’n bangmah ahihlouh ziak uh ahi, chiin gelh. Dik di’n ka ging tlat.

I huan a kel tang hawl lou in, a neipa’ fellouh dan sermon khum le bang achi dia? Huai hilou a, kel va delh sosolh ding, i puantumten kiphel tadong a hawl ding. Huchih kei leh, i huanhai teng suse vek ding ei setvoi. Tuabang chet eihchu. I gam a kelpa ommoh te i hawllouh a, a-ut adah ua i gamtat sak mawk leh i innsung hong tan hial chiang ua zaw nanzoh vual hilou di e.

Mihoihlou te hawlhawl ding, i khotang-innsung tangsak lou ding. Chance pelou ding. Nawk-nawk ding. Mihoih te’n mun teng luah ding. Hileh, mihoih teng in vai hon hawm dia, igam hong nuam law ding, hiii...kei zaw ka dah (chi kawi-thah)!

Tua bel, a mihoih teng biakinn kai dandan. Mihoihlou te’n buaina bawl-bawl, kikap-kithat, bandh-curfew om saksak. Chance pe tam lua ikei ua hia. Huchih chia lah koilak biakinn kai, mahni innlum a le giak ngamlou dekdek, teklei-baang sahsah delh a sawm giahna di zong doidoi.

Mihoih teng ikihuchi koihdap vek leh, hoihlou-leh-hoihlou hong kimakaih le uh ngol gawp lou di uh amaw? Ke’n zaw mihoihlou te sang a mihoih lua te mah buaihuai sa zaw hiveng aw (khatvei-vei)!

America te le kithat-that thou uh, tokohuk le ei sang a tamzaw uh, sualna le nei sangzaw uh. Huaite I copy raurau leh, a hoihna lam uh le copy di ahi. Amau bel siatna thupi tak kal a ahoih percentage tamsak zaw himhim ahihman un a gam uh khovel-vangam suaksak uhi. Hai sapsap di’n le America te tan bek pha le akei di, maw, Pu Kakap!

Ahimhim in, ei a mihoih te le midem hatlua hi di ika ua. Hoih luat bang le ahoihlouhna khat ahi. Politician te bang negu-tagu chichi settawk!

Ke’n tuh I heutu te hong hausa el-ol vek uhenla, milak ah leng sithuailou in hong om uhenla. Zinlian leh zahhuai  khawng dawl zangzang uhenla, thupi ruau mai le uh ka chi. Heutu te hong huchih deuh ruauh uleh mipi a dia le nuamtuam hiv’aw. Ima le vang. Amau le chethei. I nampi inle phattuam pih zaw tham, huchite!
Huchi hilou a, heutu hingal, hi nepnup, zawng-a-zawng chihkhawng a mipi te a dia thil zumhuai ahizaw. Suanhuai lou uh. A hauhsak ding uh. A chettheih ding uh. Mipi te leng hon makaih, hon huai zoh ding uh, hilel. Nna leng hah sep a asep di uh. Huchite tuh mi’n ‘powerful’ achi uh. Heutu powerful deihlou kua om a?
Huchilou a, anek kia ne, nna lah sem lou, chih te tuh, thuneihna mipi khut a om ei lel voi, thoukang bet in beng le veng hiau mailou di?

Hilele, theih di tuh, power kha ‘sum’ a kiteh ahi a. Khovel thil kia hilou in sahkhua thil ah leng. Huaiziak mah aka dollar nung a itai duaiduai ua, budget khawng a ikidem at-at uh. Amihoih te kia I omkhawm chia buaihuai zaw hiveh. “Toupa hoih hi, Toupa lian hi…” chi lalat khempeuh in, lungsim guk a lah mihoihlou te lam mah naih duihduih thou. Ka kihdak!

Mihoih te biakinn a I lamlam kal in khovel I tenna tuh mial (mihoihlou) vaihawmna in hon tuam zou ta. Anuai ah mihoih te nasan lungmuang tak a hoih-le-hoih kichian theilou, biak-le-be theilou in I om dekdek uh! Hoih le phatuamlou khezou!

Hiai, chettheihna power, ‘sum’ tuh heutu te’n ahauh mahmah ding uh ahizaw. Zat senglouh a hon neih chiang ua mipi’ a ding hong luang khe pan di aka hia.

Alehlam ah, mihoihlou te le ina mihoihlouh-louh leh a gau ithuak chia zaw nase tel de. Lottery hauh a hau guih, azing a bi-inn luah nepnawp chih bang thil nuam liai lou ahi. Tua inn thupi taktak, hoihna tellou, dikna tellou a kilam te eng ke’n. Mihoih honpi a hong khanloh chiang in sahang humham bang ahi ding a, asukkhakna chiangchiang a lumleh liapluap mai ding hi.

18th Century France na gel ngei maw? King Charles leh azi te’n a nopsakna ni uh tum di’n a ngaihsun kei hial ding uh. Himahleh, mipi a phawng halh kha laizang ua. Mipi sousang in a ngawng uh tansak in, alal-inn thupi te uh ‘public property’ suah maimah uhi. A nungzui te inn thupi taktak te leng manbei hiam tawm chikchik a zuakmang, ahihke’h suksiat in om uhi. A sung a om tengteng toh! Tua innpi kilawm taktak ineih te denchiang in a huchi kei ding chih kua a gen thei? Agam leh adiktatna zong masa un, ICICI (ichichi)!

Ei society ah leng mipi ihmu hong khanloh ni chiang in tu-tuh. Tuni a diklou tak leh lektak a hihte tung ah a thangbaihna hon sungbaw sin ngal a. A rapthlak lutuk! A rapthlak lutuk!

Hiai hun haksa na pumpelh theihna ding un mihoih te dingsuah unla, mihoihlou te mun tangsak nawn kei un. Lamlianbawlpa’n leng anekkhop di toh paikhawm thou ahihman in, akpi thaisiat zoh ngang-louh ding in bawl henla; Diklou tak a atan va duhgoh te’n haak uhen. Diktak a duhgoh te bel atan ding ua kilawm piak hi uhen. (Diktak a mi tan va duhgoh chih le om a set diam maw? Khi, khi, khi...!) Huchibang in, vaai-dangdang te ah leng hi hen. (Gelhlouh Bung 10, Chang 8 apan laksawn ahikei. Daih mai-a!)

Huchi hilou a, mihoihlou te’n mun a tan zel uleh, igam tuh a zawng deuhdeuh lai ding a, Information Technology toh, hi-fi gadgets toh, smartphones toh, changkang deuh in imangthang sin uh ahi.
Helpawl lam a hauhsakna akhang sem ding. Aziak bel, huai Greek mipil, amin le bang azok, sumkuang chih le tel, Aris-turtle (Aristotle) hia le? Huai pa’n, “Zawnna tuh helna leh sualna’ nu-le-pa ahi,” chi hi. Jesu hunlai Galilee, Nazareth, etc., te bang le helpawl tamna leh hatna (hotbed of insurgency) ahi uhi. Huailai a helpawl minthang deuh te tuh Nazarenes, Sicarii, Zealots, chihte khawng ahi ve vua. Huaiziak a Jesu bang le underground leader dia muangmoh zeih uh, ahi nalaiset ei!

Igam-inam it taktak ikichih chiang in, mihoih te hong khanglou ding ua, politician-mihoih tamsem ihong dingsuah dia, nna hon sem ding ua, igam hon puah in hon suhausa ding uh. Huai hun chiang in, “Lamka, Lamka, chi in, ikiang a te’n gal hon don in; Lamka vangkhua zaw maw, nuamlua Paradis...” chi nawn ta ding uhi. Politician-mihoih neihna ding tuh mipi-hoih khut ah a om. Mihoih te hong pil uhenla, helpawl (ngong taktak) leh mihoihlou te khutnuai apan suahtakna dak hong gingta hen. Jubilee! Jubilee!

Huchia, khangsawn-khangsawn a le ipil kei leh, 2020 AD chiang in tuailai te’n, “I tun-le-zua lung mawl in, pianna gam giabang zun di’n...” hon chih khum nawn datdat mai ding uh eihcu! Huai ding in na kiman hiam, sanggam?

Sappau in khin zeih awle: “For what’s the point of breeding children if each generation does not improve on what went before.”  (Hilary Mantel)

—:Monday, 18 May 2015:—

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING