UPDATES:

Kum 5 Hipi

KUM 5 HIPI

(THE PLAGUE OF 5-YEARS)
Lian Samte, Columnist Zogam.com
liansamte    
Hun sawttak dahsa, toh-hing, a sakminthang MDC, thuvaileng hat mah ahi ding e. Zogam kuam leh I suan Zokhopi Lamka, eih, Churachandpur—eh, Lamka mah hizaw hia?—kia hilou, vaigam, Zomi-Zota heinate kia leng hilou, tuipigal gam Zomi omna khempeuh a suliing deldel hial aka. Nepal ziinling toh genmat le, a gal a entute bawn huchia a liin didip leh, a lailung, epicentre—Lamka—a omte bel khosikpi vei bang hial ding mah ahi ve vua.
A rengreng thu ah, hiai han-a-pan-in-thou-nawn-ta MDC kha bang a le? Chidaih le! A theilou omkei hang maw? Amahchu, huailam leh a powers-&-functions te uh gen sawm ka hi hauh kei. Theih le ka theikei ;-)
Ka gen nop zawk bel, politics gimnam himhim I lawpdan uh khat a om a: Kum 5 hal zel a hong tung kimawlna chikhat, a gau kum 5 sung mah I thuak zel, thu ahi. Huai tuh ‘election’ ichi uh.

Election hii a leen nakleh I Zogam pen chimul thou pah, hik pah sesu, kha tang dia mansa, limpawlte bang a ret-chet-chet chi pah at-at! Hiai pen a sia chihna hipah lou in, I electoral-immunity system uh hatlou chihna a’i lel ve.

Eilawi, nupi-mawlpen tan in leng, politics i theidan uh khat om inchin. Huai tuh ‘election’ ahi. A tua mah advan-take in politician kichite’n leng ‘beyond election’ in politics ‘khel’ khollou uhi. Eigam kia ahikei. Vaigam leng ahi thou. Election hon naih chiang in sepsuah bang hon nei nual ua, programmes & policies bang hon guang phiing ua. Kum 4 paisa sung a bang ana hih adi uam, a hih ding uh bang hong tamlaw phiing, zohlouh, sep manlouh, maban lakloh bang hauh in hon hau zenhouh ua. Ahi a, i sihma bel maban omden ding mah hiven maw. A nna teng uh hon zou mawk le uh diklou zel dia, ahi ding mah bel hizel akhu.

Huchikawmkal ah, mipite’n, ina theih dia ka deih tuh: Ei a ding in politics chi nih a huntawk hi. 1. Electoral politics, leh 2. Welfare politics. Ban hilchet bel ka sawm kei. A theilou om khang. Kihaibawl dah ni!
Electoral politics pen kum 5 a khatvei thil keleu ahi. Nnapi khat bel hi. I thupi ngaih ua, a kumtawn daih ‘welfare politics’ sang mah in I limbawl zaw uhi. A himhim in, kum 5 a khatvei hizel toh kum 5 sung tawlnga lou a I phatmoh koi a poimoh zaw dia?

Election poimoh lou ichi sam. Hilele, eilawi zaw a ‘vai’ a buailou in a ‘mi’ a buai bang hive hang aw. Bangziak, bang deihna a vote khia, chih sang a, kua ahia ka vote, ka behpa hia, ka innkhangpa, chih buaipih zaw. “Hikei,” chichi tuh zuau gen. Chet mai ale!

Huaiziak mah ahi di. Telching a omte le hong chin hial chiang un a U e, a nau e, a Paneu e, a Papi e, a Gang a Ni e, abeh-aphung e, chih ding mah hong tam in, mipi nna sem manlou, ‘innsung’ nna toh buai den maimah uh eivoi. Innsung vai a suk fel ma ua election hun tung man zel. Huiha!

Mipi nnasem dia telching, innsung vai kia a buai khop, mipi mohsakna a tang mah kei d’ua. Alangkhat ah bel, amau le vote a zon lai ua beh-zon, phung-zon, tanau-zon mawk uh eihchia, ahiding mah le hizel thou, chio. Kisuanlahna bang le zaw nei thei sam uh aihbang. Sung-te, Pu te, Pi te, etc., suk lungkim di tamlua. Huchikawmkal a mipi a ding nengkai hong om theih zel bang le nak kipahhuai lua hiin maw.

Mipi te le I dikkei deuh a hi. I innsung mahmah a anntang ip bang hong kitun hial kei leh election phatuamlou chi mawk. Nak hai! Kum 5 sung anntang bag 1 kham ding kisa I diam ka chi ve. Huaisang in, kum 5 sung nuamtak a nek muh theihna ding lampi hon bawlsak in, chithei zaw le, mite’n, “Hampha, hampha” hon chi ding uh hiven. Chinese thupil in, “Mi khat ngasa na piak leh khatvei nek ding pia na hi a; ngabet ding dan na sinsak leh a damsung nek ding pia na hi,” chi hi.

Etsakna di’n, anntang bag khat sang in, tui bang hoihtak in hong kai mawk letuh. Gimtak a tuitawi i nungak te tawldam ding. Electric bang hoihtak in hon pai mawk leh, electric van zang a nekzong leh zatna tuamtuam a phatuam te a dia navak law ding. Lampi te bang hoih in hong hoih law mawk leh, i Zodawn a huanhai-theigah leh gamlak hauhsaknate baihlam tak a khopi tholhlut ziahziah a sumsuah theih ding. Hiai teng mah le hiziang lou ahi mimal hamphatna, Suana Pa?

Tua i buaina uh bel, hiai ‘basic infrastructure’ te a mantheih khuk omlou. Tukpi chiang a buannawi, gari tai theilou, lauhhuai. Khal chiang a tuktui luanna lampi te kuak gawp, gari tai theilou zel. Hihih, thei takhang! Anntang ip khat mah meet zaw leh kilawm ka sa, ke’n le. Politician te a dia nuam mah di avoi. Ke’n le ka apply ut. A syllabus hon hilh dih ua :-)

Eilawi tuh khotang hoihna pen mimal hamphatna dan a ngai thei hetlou chi ihi ua. A dan a bel, mimal khosakna tuh mimal mohpuak hiinchin. Hilele, mimal khosakna leh nekzonna nuamzaw om theihna dia vai sai leh lampi sial tuh i telching politician te ahi uhi. Huchi hilou a, politician te’n mimal khosakna ding hon nak bawlsak luat chiang ua khotang masawnna ding bawl manlou/bawl theilou uh aka hia.

Politician khenkhat, a mawl zawdeuh te chimai ni, hehna louh di’n, te leuleu ahihleh, mimal hamphatna tam a bawlkhiak zoh peuh uleh election nawn chia a vote-tu ding tam himawk eihchia mipi hoihna ding sang a mimal tan ding bawl nuam zaw zel uh. Vote bank investment, chihsak suk. I gam politics bel tua dan a pai hilai tadih a’ihchu.

Huchilou hileh, ei gam leng mi gam sang a a tuantual zawkna ding thu a omkei. Sinzawl apan simlam hoi in dakphei le, sun in langva inn pak sisia, zan in electric vak zihziah. Bang gam gen ihia le? I suahpih Zosuan Mizogam mah hilou di hia. Nung lam hoi in dakkik le aidak buk leh khanglui khovel, phutuan toh khosak lai ni te kimu dipdiap. Lung bang leng nawn dek zezen. Hilele, phatuam hetlou! Amau sa kap ding ninem chiang in scooter khawng in kuan ua, lamkiang khawng a koih in gam vak san uh. Hong kik chiang ua sa toh gari a hong kileh nawn bhengbheng! Ei chu ‘cycle sia’ le kigumang di hileuh tel!
Zogam nuam heisa’n hong pal hen...

Huai eivoi, politics! Mizo te eisang a pilzaw tuanlou. Hilele eisang a haizaw hetlou uh, he, he!
Welfare politics pibawl zaw hilehang, khotang hoihna, changkanna leh masawnna om zaw ding. Huai tuh mimal hinkho nopna, heisuk-heitouh noptuamna, nektak zon leh sumzon-paizon lamzanna, milak a maitanna leh thangphatna ahi.

Eibang in, “I come from Lamka city,” kichi nuam ta salou!

“Na khopi uah hong hoh leng bang chiamteh tham, thupi, et theih om dia?” chih dotna seppihte a pan hong pawt mun viau. Gen ding chu tam khollou. Hilele, lungsim in bel, “Leivui” chia ana dawng pah zazat hi zozen.
Tour package hoih taktak (LTC achihte uh) Tour Operator te’n hong ensak sek ua. Assam, Mizoram, Tripura, Arunachal Pradesh chihte Northeast a di’n a langsar mahmah uh. Manipur ut a chih chiang un bel hon dot tam ma ua kihepkhiak hiau kha a damdawi hoihpen himai. A huchihkei leh thunaloulou a igam pauhial ngai inchin, khelhna khukpi a kilut kha nak!

Vaigam te hon theihdan khat tuh ‘weather’ nuam chih ahi. Ahuai le, sing-le-gua teng sat gai, hal gai ihchia ‘weather’ nawn mahmah lou. Lum gawf. Vaigam degree toh kibang ta. Sa veuvou. Hon bi tentun.
Hiai khawng mahmah aka, politician navak deuh a deihhuaina. Electoral politics siamtak a sai kawmkawm in welfare politics hon vek zeek thei di. Mipite leng ana kihai law nawn kei henlan, igam lum-le-vot, inek-idawn, isilh-iten, izat sum-le-pai, idiik huihsiang tanpha politics ahihlam thei lehang.
Hunkhat lai in: Lamka, Lamka, chi in/I kiang a te’n gal hon don uh/Lamka vangkhua zaw maw/Nuamlua Paradise chi uh!

Tu’n lah vanglai ni te ‘malai tang’ ta. Pianna gam simthu lel ding chile’ng, ka kiphatsakna Jesu, leivui leh elektik-pailou chih hitel zouzen. Kalaisai!

Electoral politics maw welfare politics? Koi zawk in khotang leh mimal hamphatna hon tun zaw a? A kuaison himhim le nuihzathuai sim. Mawl huai. Dah mah tel hang!

Wednesday, 06 May 2015

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING