UPDATES:

MABAN MUHNA

MABAN MUHNA

By LT Ngaihte

LT Ngaihte New

Ka khawte (New York te..!) khe a apai ciang ua kin taktak a kalsuan fetfet ua, bangziak a kei kapai cia atungin kintak in kalsuan lengle,bangtan hiamnung a ka ngeina bang a awl khakha a paijel ka hiam,cih ka kidong sek hi. Amau awl khakha in kalsuan sawm mah le uh ahih theilouh tuk ua,kei kintak a kalsuan ka sawm cia lohcing zoulou ka hi cih ka phawk hi.Kei kalsuan sau zaw in, amau a kin zaw. Ken kalkhat ka suan kal a amau nih bang suanman dan ahih ciang ua,ki gamlat tulh tulh a om hi mawk hi.

Aziak di ka ngaihtuah leh keimah khankhiakna gui (roots) ah ka mukhia hi. Singtang gamlak,taam-ataam lak a paipan ka hi a, a ngilsa tawn a paikha loute lawi ka hi hi.Loupa sahtak in atuam mai hilou in, hon nasak thei ganhing tuamtuam tampi omna lak ahi.Huaiteng ban ah, khedap neilou,khevuak siksek a pai ka hihman in, zumlehhiam ban ah ganhing hon kei pah theih ding om seuhsouhna mun ngen ahi.Ka khe suan nawn in koitak sikkha ding ahi hiam cih theihsa omlou hi. Ka kalsuan khempeuh ginna tampi toh kithuah ahi hi. Ka sik khak nawnna ding mun ka et masak ngai gige hi.Huaiziak a kal kintak a suan theilou a na khangkhia ka hihi.

Huaiteng ban ah, vuahpi leh huihpi te a pan ki daalna ding bei, 'sialpi thuak' a thuak ngatngat a khual zin mi kana hi.Hawktui lampi a hong luang te pal kawm a khevuak a lam taam lak a pai kihi hilel hi.Tubang a ingaihtuah kik ciang in, khenuai bang zau thei hi. Khenkhat natna ziak a khenuai khangkham cih te pawl zong om lai.Adiakin, huaibang te a din singtang khualzin haksa sem lai hi.

Tulaitak a ka khawte leuleu, lam ngil hinhian, siangthoutak leh liantak,vuah leh huihpi te den phaklouh na mun a khedap nem thihthiah toh lampai te a hi mwk uhi.Hucibang te a din,lampam sikkhelh ding lauhhuai lou a,a sikkhak nawn na ding uah bangmah lungngaihna nei lou ua,huaiziak tak a kintak a kalsuan thei uh hi zaw hi.

Apaina ding uh a et uh ngai lou,huaitoh kisai a lungngaihna ding om himhim lou ahi phot hi. Apai kawm un,angaihtuahna uh thildang ah phatuamtak in zangthei uhi. Ka muhdan in, lawmlehvual mundang a omte toh kithuzakna hun leh lai kikhak hun in zang uhi.A piankhiak uapan, khevuak a loupa tung a pai kha ngei lou himhim atam zawtham hiding uhi. Hucibang mi omdia zong gingta lou ding uh hilai hi.Inn a nekdi omkei leh Hotel a va nek ding hilel ci thei khop a khosa te a hi uhi.Paithei tung insung a I tai belbel dan sunzom a,alet nung tan ua,pai zatzat uh hi lel hi. Numei, khedap sang gengen bun te nasan in hon makhelh khelh uh cih va puaknat luatding hilou sa phing ing. Ahita zong in, amau hon muhdingdan leh koih dingdan uh ka ngaihtuah cian,mitsip huai mahmah ding hi.

Hiai teng kon kupna ziak in bang ngaihtuahna na nei a ? Eilawi in maban ding sau imuh batlouhna uh,kilang thei in na ngaihtuah hia ? Ahitak in, damsung kum pen, 'khantawn' na kici a,sau mahmah kisa hi. I khankhua abei cia,bei petmah dan a kikoihna om hi.I khankhua a silh lehten teeng a,nek lehtak neih ding cih hipen mai hi.Huaiban bangmah na ki geel kha lou hi. Ki geel banlou,miallua,bangmah muhtheih hinawnlou,himai hi. Inkuan a peem vialvial te na kihi nawn lai a,munkhat a kikhual tak a khosak om ngeilou hi.I inlam leh nekzondan in zong hon peem saksak hi leuleu ding.Huaikhong ka ngaihtuahcian,tua ka sepna inn bang,kum 100 val hita,hoih mahmah lai.Eilam ah kum 100 sung in,inn bangzah vei ilam thak di uam cih bang hon ngaihtuah sak hi.

A tawpna ding in, gamlehnam vai a I ngaihtuahna u zong,mi atan na tung zou nailou mah ahi,ka ci nuam hi.Lunggeel vengveng thei a khosa ki tawm mahmah lai cihna ahi. I thugin khempeuh,Biakna hin khovel khosakna hileh, damsung daihding lel mah na hi ua,I tate, tute adia sep leh bawl ding bangmah ki ngaihtuah lou,a khosakna ding ua bangteng nutsiat ding sawm ihi hiam I cih cia,inn leh lou mah hi lel.A hon luahtouh ding uh gam adia bangmah ki hihkha thei nailou hi den hi.Tu hun nanung icih uah,neukhat vei kha dek panpan,huaileng,hi tatak nai lou, a 'gu-lau' kihi pan phet hi. Nau vei a veina om panpan ta,nau vei te mahmah in pan hon la uh ahihtak cian, hong piangkhe mai sam nalou ding hia, ci'n ka ki ngaihmuangsak hi. THPPI !

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING