UPDATES:

S5 Box

ZOGAM.COM Login

Bangcibang mi makai ding i poimoh ua

BANGCIBANG MI MAKAI DIN I POIMOH UA
By LT Ngaihte, Columnist Zogam.com

LT Ngaihte New

Tulaitak a Manipur singtang mi ten bangcibang makai poimoh ihi uhiam cih ngaihtuahna ah,hiai bang teng kana ngaihtuah hi:

1.Tuaidawng - Singtangmite makai ding icih ciang in, Phaijang a inn nuamtak a tutna nuamtak a tu a,kholak bang leng car hoihtak a taitai ding cihna hilou pah hi. Amin mahmah in a gen khit bang in,,singtang gam a omding leh zinkual ding, apoimohna a giak a khosa ding cihna hi zaw hi. Gamlak a khualzin,khe apai a azu-asa nuai a vialdian ding cihna hi zaw hi. Huaiding in, taksa mahmah a tuaidawng, thahat ahih kisam hi. Taksa a upa te tua cibang a pangzoulou ding uh ahih man hi. Ka tuaidawng lai in, singtang hah zin mahmah pawl ka hihi. Zing nisuah apan khe a gamlak lampi taam taktak tawn a, khawmial dong khe a zin, nikhat mai hilou,ni thum bang hucia zin ngei kana hi. Ahun lai in nuamkisa sim mahleh, ka taksa hong upat dungzui in, kum 50 ka hong phak nung bang, nikhat singtang a khe a khualzin na ding om leleng,a zoulou ding ka hi khin hi. Tuaidawng lai in, kidamthei deuh teitei a, natna hik ten zong hon subuai zoulou hi.I lungsim ngaihtuahna leng hat a,I ut omleh hihzou dia kikoihna leh muanna om a,huaidungzui in ki zou jel hi. Huaihun mah tuh ma ikaih hun ding hi pen hi. Theihna leh tuahkhak te apoimoh,ahihziakin,kamkia in nna asem thei nawn kei.

2.Laisiam – HH Dalai Lama in 'education is the key to survival' ana cici na mah a,Missionary te honglut a thil thupi a hon tut uh,Bible thutak sang mah in le Laisim theihna lampi a hon bawl uh ahi.Pathian thu I cihcih hang un, Pathian deihdan a hing kuamah ki om lou hi.Ahihhang in laisimna in nakpi takin ngaihtuahna leh omdan ah masawnna hoih a hon tun a,tuciang in,laisiam in,leitung a a asiampen te khosakna a khosa,a nek uh ne,a muh te uh mu bang ki om ta.Sepna hoih pipi nei a,khawpi tuamtuam a zahtakhuai tak a khosa ki tamta. Laisiamlou ki om nawn lou, asiamlou cih te na ngawn in nidang a laisiam masate theihna sa tamzaw a thei ngen kihita hi.Laisiam makai icih ciang in,huaite tung a Ph.D course hiam siamna bik neite khong hong hih ngaita hi.

3.Thudik gum – Sum kia lou a leng,khosakna bawl theih, negu khelkhel lou a ale lungkimtak a hin theih ahi cih thudik khong gum ngam ki om panpan ta. Hithei mah ahi cih a tak a ensak theih pawl bang le om panta. A negugu te a lungkimlou te na hi zaw uh, anegu te mah in adang le deih beh tou jel uh, cih bang le atak a langsak thei pawl om ta! Thudik pen, ami genlou a tangtak a lamgei a na om, azang khakha tuh a hat leh a puktheilou hi zaw cih bang le phawk panpan ta ihi uh. Dikloutak a hauhna te nitaklam khat a kangtum thei ahi cih bang le atak a mu kha pawl ki omta. Thudik gum a hangsan tak a pang te mah mipi'n zahtak a,mitsuanta cih bang le kituak khata. Hiai galvan muanhuaipen zang a I gam bawl ding mi ipoimoh uh ahi.

4.Lamet hau – Tuciang in, tapkawtawng apan zong,khovel mun tuamtuam a thiltung te kithei thei ta hi. Nidang a ikiang a om ngeidia I gintak louhte om theita hi. Damsung a I neih khak ngeidia I gintaklouhte ki nei kha ta hi. Ahi theilou di' cih om nawnlouh na gam ahi panta.Hiai hun ah, lametna bawlsiam papa tuh ahampha ding suak mawk hi. President Abdul Kalam cihbang in, lametna icih ngaihtuahna nuam lel hizawlou in,muangtak a zan a hon ihmusak lou thei thil ahi'achi. I vei ding, tutpih theih maimai hilou khop a I lamet ding,hucibang hauh mahmah ding ahi. Hucite ahi tulai a makai dia poimoh.

5.Thil kaikhawmthei – A omlou omsak thei ihih ding ahi. Tulai a kithang mahmah Facebook bang a omna sawtnai lou cik ahi. February 4,2004 a ki mukhe pan ahi. Huaima a hicibang kikawmtuahna omthei dia ki gingta lou.Gingta leng zong,atamzaw alampi di thei bun lou te ihi uh.Ahihziakin, tuaidawng mahmah khat in hon mukhia a,singtangdawn apan hin New York khawpi hileh,a zang om teng a sum ana mu jel,tua bel zatsenglouh nei hita hi. Football Team hat leh siam mahmah te leng mi khat lel in a omsak uh ahi. Movement thupi leh minthang te leng,mi khat a kipan hi jel hi. Hucibang mi ahi I poimoh.

I lak enle,aki selgu I deihbang mi tampi om ngei din ka gingta. I pensioner te, I mi upa te khong zaw a hatlai ni te uh zangkhin ahita ua,a theihna uh dot khiak a,phatuam a zat ding te hilel ta uhi.Tuailai a tung a kigen hihna nei tampi a om ding,tuate lak a lunglutna nei khatbek hong kipan leh pitek-putek te lungmuang in a tu ding ua,naupang te siamna zong in school tuamtuam te ah hong kai ding uhi.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING