UPDATES:

Lametna Meivaak

2015 MDC ELECTION BEI TOH KITAWN IN:
LAMETNA MEIVAAK
By L.T. Ngaihte, Columnist Zogam.com
LT Ngaihte New

Anga veina MDC Election zoh ahih toh kitawn in, hiai tungtang a ngaihdan tamlou gen le uthuai sa ing. Election beita ahihman in, candidate khat gupna a lak adik non kei ding,huai lauhziak mah a,election bei ngak ihi zaw.

Tuipi gaal apan en lel ka hihman in, apaidan, mite gamtat khohei leh kizat dante uh bangmah theih ka nei kei a,huailam gen ut a nei leng ka hi kei. Candidate te lak a khat CT Lian hansanna leh malakna ziak a igam a lametna meivak hong taang zek hi a ka theihman in,kipahna leh thanopna kana nei hi. Hucilou dang I gam a thiltung te ah lametna ka nei nawn kei,pawlpi tuamtuam omte leng,ki mekmat gawp ahihtak ziak un, suanding leh belh ding om hi’n ka thei nawn kei.Huaiziaktak in, mimal a kimuhsuahna leh panlakna ka na enen a,khangthakte lak ah,sumlehpai ngaihnatna leh huai thang a awkna apan,asuakta thei ding leh zuihtak om ding hiam,cih kana bil doh mahmah na ahi. Huaimah tuh, igam a dia poimoh pen hin ka mu hi.

Internet tungtawn a FB houlimna te leh group tuamtuam houlimna te kana en jel a,gamlapi a ka omna sawtta ahihman in, mintak zang leh minkhem(fake) zang hile u leng, kei adin a ki lamdanna luat a om kei a, athugen te uh ka ngai poimoh zaw hi. Hun tampi FB a thukigelh te simna in ka zang a,huaiziak in, laibu dang ka simnop,bazaar a mantam pipi a ka leite na ngawn, simzohlouh in a om uhi. Phetlou in, inteknu ngaih a FB haipih leh thildang ngaihtuah lou sakna om zaw mah hi.

Khangthak atam zaw in I gam a thil paidiklou omte,amu ua, ahi bangbang in a genkhe nuam ua,moh asak te uh a taklang nuam ua,bawlhoihna dia ngaihdan a neihte uh aluikhe nuam uh.Hucibang atutmun ua ahihtheihna utuh internet tungtawn ahi. Hucia pan a hon laktak ciang un, thunei tute hetkha leh genkha ahihman in, a thuneihna uh(genkhe se dah ni) tuamtuam pansan in,vauna leh taihilhna a hon hih ua,tuailai te, mulkimhuaitak a kithah leh soisakna musa te, alau ua,alampi omsun a atheih uh,minkhem(fake id) zang in thu a gen uhi.Ngaihdan leh puaknat neih a, a genkhiakna ding neihlouh thil haksapi ahi a,lungtang a ngaihtuahna dim,sungkhe theilou a om nilouhna in,kingaihsiatna leh mahni kimuhsitna tun thei a,huai in khamtheih tuamtuam kia tunlou in,suicide natan gah neithei hi. Khangthak te ngaihdan genkhiak theihna omsak/bawlsak tuh nulehpa mohpuakna ahi.Hucibang in, a khosakna ding uh- gamlehlei, muanna leh bitna a dim omsak/bawlsak leng nulehpa te mohpuakna bulpi ahi.

Sum deihlou I omkei a, ahihziakin, damsung a apoimoh pen a ngaihna- thil tengteng huai pansan a sepkhiak dia koihna, kumbangzah apan hiam I lungsim ua cii kituh pen, khangthak ten cimtak mahmah ta uhi. Sum sang in, tuinek hoihzaw, meivak hoihzaw leh lampi hoihzaw te a deihna uh sawtpi ahi ta. A nulehpa te un huaite na ngaihsak lou. Amau gamloupi vaigam khong a sawlkhiak thoh maimah.Amau lah nuamsa lou uh, anulehpan lah nuamsa lou. Agam uh,a inn uh hon ngai uh,hong kik ut uh.Amau gam mah a khosak a nekzon ut uh.A hawmpi petmah a hong mu uh. A nulehpa te un,zuau gen a na khoilian ahi uh cih muta uhi. A ngaihdan uh genkhiakna hun leh mun bawlsak lou, a kam uh henbitsak. Bangmah a gen ngamlouhna ding ua lauhhuai leh mulkimhuaipi a khosa.Biakna hin khawtang hileh thudikna sang a sum muhtheihna ding kia ngim a kipina a dim. Tualthat te leh Biakna makai te khut kilen, kizuakte leh upate asun azan a kithuah. Tuabang amu,khangthak te a din, taina ding lah omlou,bukna ding lah omlou. Nulehpa hihdan dikloupi mah zuih ding lah hithei salou uh. Tawl ahuai ngei mai.

Hucibang kaal ah, tangval khat,leitung pumpi a laisinna mun hoihpen,akumakum a khekkhiak zohlouh United Kingdom a siamna va sin zou,huaimun a sepna sunzom in om leleng omthei, CT Lian kici khat,atung a tuailai te ka genbang in, agam,apianna leh a khanletna gam a khosak ut in,a hong kik vengveng a,I gam dinmun hoihtak a en vengveng in,pilvangtak in,I poimohpen uh- gam puah a hon sawm hi. UK apan hong kik,Delhi EBC Biakin basement a kikhopna hon neihpih lai in, amah apan gamla lou ah ka tu a, kua ahia,koi apan ahia,bang tum ahia cih theihetlou na pi in, phatuamngaitak in a thugen ka ngai khia hi. A tangpi in, aman dotna a bawl a,a utut in ka dawng uh ahi tangpi hi. I gam a basic problem te abul-abal a sui cu a hi deuh pen. A pa u Dr.Zamzachin ahi cih lel ka thei a,huai apan a mihinna ka en a,adiktak a gen in, a thilsui leh gente ah,ka lung a lut kei hial hi. Kikhopna tawp in,a tunna a bangci paikik ding hiam cih ka dot leh,’Delhi a DTC bus tam hilou hia,Pa Kam’ aci a,huai apan,haksatna poi ngaihlou, mimal buaina tung a leeng deuh himhim ahi, cih ka phawk hi.

MDC a tup mawng hidin le ka ngai kei a,panpihngai leh hihtuak a sakte hon sep jelna a mipi palai hih poimohna om sa a,hong kipan hi din ka gingta.Huaipen thukhat hileh,a malakna tuamtuam te, election a sum lou a teelcing dia mipi a chouna mahmah thupi kasa hi. A nasep a langsakta ahihman in, a ngetna agik mahmah hi. Ngeingaihlouh vual ahi kei. Lauhlouh vual leng ahi kei.Pharisai leh Laigelhmite hunlai a Jesu kici in,’kei mah cu thutak leh hinna ka hi’ acih bangphial a,gintak huailou ahi. Mahatma Gandhi in nitumsenglou gam ukpa British Kumpi thautang leh thagum bei hilhel a achouna bang tuk ahi. Hiai mipi te chouna gikmahmah ipi cinsak ua leh igam maban ahoih dia, tuailai te a din lametna leh kithalopna thupitak a tun dia, amah bang a sumlehpai te sikha hilou,tangval-nungak tamtak in,singtang dawn apai in,thudiklehtang toh pan honla ding ua,I gam a khangtou ding. Thudik a hat ding a,diktatna in igam ah vai a hawm ding. Huaihun ciang in,maingaltak in, ihihna a puang khe ding a,kisuanglah lou hial in I mahni inn ah I teng dia,igam zosiktui I dawn dia, akigen minthang zohuihkhisiang I diik dia, ut leh utlou in khoval hoihna zou in,damsung I zang dia,hon Siampa Pathian pahtawi in a omta ding.

Huai itun theihna ding a lamsial,thudik leh nasephoih pansan a mipi hon choungam omsun Tv.CT Lian nungthuap ciat din hoih sa ing.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING