UPDATES:

S5 Box

ZOGAM.COM Login

Zi leh pasal mohpuakna: Pumkhat Hinkhua Nih

ZI LEH PASAL MOHPUAKNA: PUMKHAT HINKHUA NIH
-L.T.Ngaihte,Noida.

ltngaihte
April 12,2014 ( Kiginni) in EBCC Dwarka Biakin ah Rev.S. Vung Minthang leh azi makaih in Nu-Pa Seminar nikhat om a,hiai hun ah Pathian lemsakna in kava tel thei uhi. Huai hun ah dotna mawl cik lah dawn baihlam lou hial,Salam leh Khalam kaal gamgi om mah hiam ? cih ka va dong hi.Heutupa hon dawnna tuh,omtuam ahih aleleng,aki douding ahihsang un,akiphungvuhtuah ding ahi zaw uh,cih ahi,Huaituh saptuam thugin le hituan lou in,amah in athugelh a azat dan ahi.Hiai dotna pen,Nu-Pa Seminar adia poimohlou bang sim mah leh,ka ngaihtuahna a om alianzaw deuh a genkhiak ka ut hi.

Thubul: Kristian Kitenna ah,Bible deihdan a pai ahih bang in,pasal khat leh numei khat hong kiten ciang un, ‘pumkhat’ ahong hita uhi.Mi nih hong kimat uh, hong ki gawm un, pumkhat hong hita uh, cihna ahi.Hiai tuh Bible gendan mah ahi. Pumkhat ahong suah mah uh lamen leh gingta a Biakin a nasa tak a kitengsak jel ihi uh. Huci ahih nung, Nu mohpuak, Pa mohpuak ci a va khen nen touh jel tuak mah ahi diam ? ci nuam dan ka hi. Hicidan in en le:

Nidang thilomdan: Numeite mihing picing ale na sim lou uh,vote bang le neisak lou uh.Pasal te kikhopna a le teltheilou uh,inn a om a kholak vakkhe lou dia kulkhum ana hi uh. Pasal thuthu a aom di,a seel louh himhim di,paulou-phunlou a a khosak di, adeihlam apasal cih dandan hi mai.Inn sung a hahsiang di,nek leh tak limtak a abawl di,apasal duh hunhun a a duh bangbang a piak ding,khawtang thil cih phetlouh insung thu bang le bangmah a gen theih hilou,kholak pawt leleng,midang ava houlim pih le phallouh hilai.Ei singtang dawn a khosa te lak a le huci mah ahi.Lamzang Pa tak a kingai bang tuh taptung a han-gamgam ana sep himai. Kisil ngei lou,Zabel tep zihzeh,khut leh khe te nin kisa lua a zawl kelkel hial,takkolh na lak bang vom mitmet.Puansilh bang leng asiang lua sang a anin mah silh ut zaw,sam hiat cih bang numeina a ngai,asam bang niin kisa a khauh giugeu. Hiai tengteng pasal na a ngaih hi tazen hi. Kisil siang a,puansiang silh a,sam hiat deuh te ‘numei huai’,tulai pau a ‘tuai’ icih te hisak uhi.

Tulai thilomdan: Khantouhna a hong hat dungzui in, tuciang in thilomdan kilamdang mahmah ta hi.Khantouhna ana ngah masa, Industrial Revolution kipatna tumlam gam(European) te ah kikhekna muh masak ahi pahpah hi.Numei te zalenna nasatak in hong khang a,tuciang in, pasal te sang a hihtheihna hauzaw ahi uh cih imvuallouh hita hi.Italy a ka omkhak uh kum 27 bang ahita a,huailai pek apan in nungak in amah tenna inn a lamkhiak masiah pasal nei nuamlou uh hita hi.Pasal in zi nei a,azi inn a aten ciang in,huai inn apan hawlkhe thei tu thei mahmah a,hawlkhiak a omlouhna ding in,a inn neinu kipahna a zong pah hi. A tom a gen in, insung thuneitu hong kikheng hita hi.Hiai khong ziakin, kikimna(equality) cih hah gen in hong kigen a,huai in numei ten pasal te a nuainun law kha ding uh cihlam gen lehlam hi zaw maimah ta. Tuciang in tumlam gamte kia hinawn lou in,India gam te tanpha ah,inkuansung a tantuam mohpuakna om nawn lou in, apoimoh bangbang sem tuak a khosa tampi ki awmta hi.Nek bawl ah, TV en ngei ten nek bawlsiam, meh huansiam,an huansiam te a tam zaw tham pasal te a hi uh,cih thei mahmah ding uhi. Hucibang in,kiceina(fashion) bang ah leng,puankhui siam tamzaw tham pasal te a hi. Delhi natan ah,metro sung hin,shopping mall te a na hoh leh,numei bangbang a kicei te tangval te a hi zawta uhi. I taklatnop tuh,tulai hinkhua ah mohpuakna tuam a beita,inkuan lamna ding in zilehpasal a poimoh bangbang semdia akiman ding uh ahita,cih ahi.Mehhuan dan theilou,anhuan dan theilou pasal te tuh ‘mi phalou’ a ngaih hi ta uhi.A lehlam ah, pasal meh huan siam,nek bawl a lunglutte mite zahtak leh deihgoh ahi zawta uhi.Tuaban ah, pasal kicei siam, siangthou leh smart neikha te zi hampha ahi uh.Mohpuakna tuam omlou,pangkhawm ding, pumkhat ding cih te tulai ‘thil’ ahita uh.Hiai ahih toh kitawn in, zi sepna hoih nei,loh tam,pauthei,thil theithei,milak a omdan siam,mite zahtak,gari tuamtuam khoih thei,bike nasan siamtak a tuang thei, lenna pilot, fighter pilot, sumlehpai zeek siam,incei siam leh naupangte lai hilh thei cih te,nidang a pasal hih zawk angaihte, a etlahhuai leh etton cing hizaw ta uhi. Ngeina dan a innsung a maisel a ki numei sak lawte ahi nawnlou ua ngaih hizawta hi.Zi, pasal te hih theithei hihthei tuh dinmun hoih nei hita hi.

Salam-Khalam: Jesun a nungzuite kiang, ‘kei ah om gige un’ ana ci a,huaituh Kristian na hihna uh na omna teng uah om gige henla kilang gige hen acihna ahi. Biakin nakai ciang cauh un Kristian na hi ding uh,insung kuan kikhop na neih ciang cauh un Kristian na hi ding uh,cialpi a na kuan ciang uhiam,na tel ciang un ka thuna zui ding uh aci thahah kei hi. Vote khia a na kuan ciang un, office a na om ciang un salam na hi ding ua,kristian na hihna uh latsak le a ngai kei di,aci zenzen kei hi.Kristian na hi gige ding uh,koi peuh ah om le ucin le,ci ahi zaw. Huci ahihnung, salam-khalam icih veu uh,bang igenna uh hita ding ? Ei leh ei hun lemtang kibawlna maimai hilou di hia ? Pathianni a Biakin kai cia khalam thil hih dan a kikoih in, vote khia a kuan ciang a salam thil hih a kingai di idi uam ? Huci hileh Jesu thugen izui kha di uam le ? Insung kikhopna neih sung khalam thil hih dia kikoih, a zoh cia nekguk didan khong kikum. Dr.Jekyll and Mr.Hide dan deuh a,a poimoh dan a khalam puan silh in, I ut hunhun a huai suahkhia in,salam puan silh zel. Thankik bang a I omna mun zil a khala leh salam kheng tuah zatzat ihi di uam ? A kheng siamsiam a sang kah zou a ngai zaw mah. Thutak gum a dingte genhak,citciat leh mihai dan a koih ihi zawta uhi ? Bible in bel, vote khiakna mun bang a le,Pathian deihdan a va hih lel ding,office bang ale,heutute cihdan sang mah a Pathian deihdan a va om lel ding a hon deih ahi.Huaituh Pathian hon lametna niampen ahi. Huaiding a,mimal a pan neukhat bek I lak ding ahi,kuamah in ei adia pan la theilou ahih man in.Kabul ka nutsiat ding in,Office in khakna a hon bawl ua, ka thugen masa pen ah, Pathian kepna leh kithuahpihna ka tantung a kipahthu ka gen masa pen a,midang in Ambassador a cihcih na lak uah,himahleh, mi tam zaw in khut a na beng uhi.Ambassador pa anihna ka pia a,athei siam ahi ngei dia,kei tungtang a hon genna apan,zahtakna hon nei ahi cih ka thei khia hi.Huai tuh ka hihtheih niampen ahi lai.Biakin hilou,Reception Hall ahih ziak a Pathian kiang kipahthu gen louh ding cihna hilou hi. Salam thil hi tuan lou hi.I hihtheih niampen ihih in leng Pathian akipak mahmah hi.Thil hoihlou tampi na ngolh zoh ke leng, khat bek ngol himhim phot le cin maw,ci dan ihi. Zi leh Pasal mohpuakna khen tuamtuam angaihlouh mah bang in, salam-khalam thil khen tuamtuam ngailou hi.Kullou hi.Ahihding dan zong hilou hi. Zi leh pasal kaal omlou ding,kimat ding ahi zawk mah bang in, salam-khalam kaal leng omlou ding ahi,I ci hi,Kristian diktak a ding in.Toupa Thupha !
(130414)

COMMENT (3) PHA TA..  
  •  
  •  

#3#3 thang_samte » 2014-04-17 00:31

The Lord God said, “It is not good for the man to be alone. I will make a helper suitable for him.”

  •  
  •  

#2#2 puthil » 2014-04-14 16:03

Eiten sa leh kha I zatdan uh ahihleh Laisiangthou a 'Sa deihdan leh kha deihdan' kidou leh kituak thei lou chih lampang hizaw lou in, adiak a thumna bang neih hun chiang in kizang tam deuh a, I zatna tangpi ahihleh niteng I taksa a hinna omlai in apoimoh nek leh dawn tel in leh akhanglai te bang taksa khanna, a teklamte bang hatlai seplai theihna leh adg adg; uap in leh khasiangthou a omsa himahleh tua in hon taisan lou a, hon luah a, hon ompihna ngen ki hitangpi ding hi.

  •  
  •  

#1#1 zamuan » 2014-04-13 17:44

Bang hiam khat chu va mu ahi ngei di, chanchinpha chihdan deuh. Nupa chu pumkhat ahingeingut ua, Numeite lu chu pasal te ahi. Himahleh angkawmna ziaka kikhenna om thei chih Tou Jeisu'n gen hi, tua hileh pa nih in numei khat pumpi a om na lamlam, a paina lam lam a paipihtuak lutlut ahi duam? Pasal tampi neite leh Nupi nei thithe te nasa na unchia lut luat in.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING