UPDATES:

Ngeina Late

NGEINA LATE by L.T. Ngaihte (message delivered at the release function of Music Album ‘KON NGILHZOU DIAM’ by S.Chingnu)
LT Ngaihte New

Hun paisa saulou en le hang, I pu ipa in la ci tampi na nei lou uhi.La tuamtuam a neih hang un, tulai bang a I thupi gen mahmah uh Pathian La cih te lawi na neilou uhi.Aziak pen bangmah dang hilou in,tulai a ibiak Pathian na nei nailou uh ahih man ahi.Kristian sahkhua pen leitung ah kum 4000 val bang na om ta mahleh, eigam ahong tun kum 100 val zek hipan hi. Huaiziak in, tulai a Pathian phatna la I cih te ikhang thu adia la thak, I ngeina la te hilou pi, gamdang apan honglut hi lim hi.Solfa I cih bang, tonic hin staff notation hita leh, guiter, harmony, piano, sound box, microphone, keyboard icih te lawi ngial, zanlam zek a I neih khak pat uh ahi.Huaiziak in, hiai tengteng te,I ngeina hikha lou hi.

Ipu-ipa hun in, Dawite lauhna ziak in ana bia ua,khagilou pumlum ahi uh cih thei in, natna-satna leh vangtahna te dawite tunsak hi a gingta in, huaite atung ua atunsaklouh ding uh deihna in ana bia ua,saseh natan ana pia uhi.Kipahziak a phatna cih himhim a om kei. Lauhna ziak a kitatkhiakna ngen ahi. Dawizawl icih takpi te leng,kuamah ut a kipia leng hilou in,dawi ten amat thoh uh ahi.Dawite vualzawlna zong a,la phuak a, thuum kuamah a om kei uh. ‘Hon buaisak kenla,damlouhna leh vangtahna te hon pe mahmah ken’ cihna a kithoihna khong a bawl uh hi zaw hi.

A lawmpi a et in, I ngeina la te uh,Beh leh Phung la, Vualzohna la, Vualnopna leh Vualngaihla(zawlla icih te) hi tangpi hi. Hiai te ban ah,la lenglong kici  na nei uhi. Beh la I cih zong beh teng in aneih theih uh hilou hi, buh leh baal hau a khua leh tui te nekmang ding a luikhe zou (Tong) te lel in Behla phuak thei uh hi.Hucibang a behla phuak thei hial eimi lak ah tam hetlou leuleu hi.Hucimahbang in vualzohnala icih te zong, sa leh gal manzoute lel in sa thei leuleu uhi. Kho-mual a hanla sam vangvang thei tuh,ahuaini adia a champion icih te hita hi.Hanla zong sa maimai mat ciang in sam lou ua, melma galte baan ah,gamsa lauhhuai mahmah, Sahang, Gialbem,Vompi, Ngalhapak icihte lawi amat ciang lel un hanla sam thei uhi.Vualnopna la pen,lawm zupi nekni,Khuado ni,kitenni leh naulopni te in lamkawm in sa zel uhi.Zangtala,Sannemla icih te la minthang te a hi uh.La-lenglong sung ah,La kawila,Simai la, Zungla, Silap la,Tonla, Ailawngla,Latom la,Tual la,Ham la,Khuaila,Huihnung la,Lawm la, Dakbu la, Nau oihla cih te omsak theih ding hi.
Tuateng ban ah,Vualngaihla kici tulai a Zawlla ci a kisuanlahna neibang hial lah deih mahmah a i sak te uh ahi.

A tung a igen I ngeina la te atamzaw tangthu ahi ta uh. Zat theih nonlouh tampi a om. Record a neih thoh lel ahita uh. Ahihziakin,tunitan a beitheilou leh ngaihnat gige tuh vualngaihla te a hi.Hiai vualngaihla te Lusai pau la in ‘zawl’ la ici ua,adiktak in lawmngaihla  cih zawk ding ahi. Ngeina la te lak a suakta om sun leh tunitan a kibehlap tou gige tuh hiai vualngaih la I cih te a hi. Bangziak ahihiam ci le hang, amau te itna la ahihziak uh ahi.Itna icih ciang in tua ithugin thak Pathian Thu I cih zeen pen a, thu lianpen ahi.Bible in itna tellou in thilteng bangmah lou ahi ci hi. Itna loungal kuamah bangmah ba kei un a ci.Khovel leh a sung a thil tengteng nei in,thil hihtheihna tengteng nei mah leng Itna ka neih kei leh bangmah aphatuam kei, aci,Itna tuh dan zuihkimna ahi,aci,Itna thilpiak lianpen ahi aci.Khovel a mipil pen Solomon in,Itna in tatlekna teng akhuh, aci. Pathian in a Tapa neihsun khovel a honsawlna ziak khat lel om a,huai tuh Itna ahi.

Vualngaihla lunglen huaitak ana phuak tute,mi maimai hilou uhi. Ngaihtuahna ciim mahmah leh hat mahmah nei te ana hi uhi.Thilpiak thupitak ahi a,apetu Pathian mah ahi. Tuni a, hiai la tunkhawm(album) te aphuaktu atam zaw ka theih khak te a hi uh. Ka heutu muan penpen te a hi uh. Pathian thu a leng a suanhuai mahmah pawl bang le a om uh.  Khovel thu a leng mi suan huai mahmah te a hi uh. Atom a gen in khanvualtung a leeng te ngen ahi uh. Zahtakna ka neih khempeuh amau te kiang pe leng le,hun tawklou hilai te a hi uh. Ka kisak theih pih a, a ngaihtuahna te u mahmah thupi kasa a,ka lungsim ah a tul ngei kei uhi.

La hoihtak kiphuak in, thu gun penpen ki gen zong leh,mite ngaih a khum vengveng ding a sakhe thei poimoh jel hi. Hucibang mi vaang mahmah leuleu.I muh khak sunsun S Chingnu ahi. A album min dia Evergreen Songs by Evergreen S Chingnu’ cih di ka cih leh amah hong kisuanglah lua a, ahihleh,na deihdan bang hizaw hen kaci a, tun leng kisuanlah kampau tak in, ‘Kon ngilh zou diam’ cih amah hon tel ahi.Sapte cihdan in, hici kan a kampau ‘romantic’ om thei diam ? Agentu lam pang ah nakpitak a kiphahniamna a langsak a, a za tu adia gending beitop hial a thalpuk theihna, ahi. Amah toh mimal a ka kitheihna uh gen tham om kei a, ahihziakin,mangngilh vuallouhbangzah hiam om te lak a khat cu ahi peuh mah hi.Hun hongtung ding a leng, amah aw nem leh ngaihnat  huaitak apan vualngaihla tamsem I zak lai uh ka lamen hi.

Hiaiteng gen in, tu in, leitung mun khempeuh a vualngaihla ngaih penpen, aw khum penpen apan ngai nuam te a din, hiai Album ‘KON NGILH ZOU DIAM’ cih tuni October 11,2013,huaituh ka loinu, Chongroukhawl toh ka kiten campha 27 ni in, Delhi khawpi ah, kipaktak in, ka hong khia hi.

COMMENT (2) PHA TA..  
  •  
  •  

#2#2 thangzamuanguite » 2013-10-30 12:22

S.Chingnu hih eimi laka kana ngaihsang mahmah te khat ahi ka chilou theikei,alaate bang ka zak chiang in ka childhood memory ahon thaksak zel zel hi...nidanga ka neu lai ua ka innsak ua"Ei geel lungtuaka khol khom ding"chih laa asak chiang bang ua ,kou lawi insiam sa theilua va en heuhou sek uh ka hi........Huai bakah Sir LT ngaihte in alaa luite ahon sponser non,Heutunu chuh zomite laka legend khat hon suak pet mah ta hin ka thei a....hiai banga laa luite kepbit nanga panla tuh Sir Lt phat huai konsa mahmah hi...

  •  
  •  

#1#1 TSM » 2013-10-27 12:25

S Chingnu la te kha, radio , "tape-record player" leh loud-speaker/ta wtawrawt apan pawtkhia , a aw ging tuamdeuhte ana kiza masa, tua digital/stereo version hoihtaka a ngaihkhiak theih a hong om nuam lua. Hilele radio apan gingkhia nutnut te zak masak pen ahihziak adiam ah huaipen analhdan tuam riau...

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING