UPDATES:

Hero

Mizo National Front (MNF) te hong kipattung laivel a kinaupang mahmah lai hina pi in, pawl khat in ka khua uh suntanglai a ahon pelh khak uh ka thei gige hi. Adiak a ka mitkha a manglou tuh,alak ua khat in thaulian mahmah(LMG) kici pua a,adang khat in sahang lu lukhu in zang hi.Huaite hong kilat sawtlou in,army lawikhat hong tung ua,Mizo helte om hidia gintakna nei in,thau pe khe ding a nawlna om a,ka khote unlah piakdi neilou uh hiding hiven,singkhuah in a ban zep uhi.Hucih hunlai mah in,eilam sepaih deuh a ikoih Home Guard kici te hong pai leuleu ua,alak ua tel ka khawte uh,Lamzagin(Ginta) kici khat santen a si, gaalna hong nei uhi. A han gei ah ‘thau-lam’ kici lahna nei uh a,kou naupang bangzah hiam ava mukha te bang in,ka ngaisang pet mah uhi.Army te hihngeina dan leng ahi dia,athau uh aliangtung a tungin,bang zahvei hiam a a gin uhi.Kou bang ahih leh lau leh thupi sakna toh kidim a na en ka hi uhi.

Tuacibang te neulai a mukha ka hihman un, kei leh ka zawlpa (ka Pu le hi) kivual leh kithuahthei, lawite lak a thuhat mahmah ka hihman un,ka lawmdang te ka samkhawm ua,ka muhkhak uh,thupi leh ngaihsan huai a ka ngaih uh,sepaih te omdan cing in,nitak lam teng in,ka kimukhawm uhi.Nitak annek khit a kisap khawmna din,khutkawi mut gingdan tuamdeuh in ka mut ua,huai ging a kizaknak letuh,anne lai hin kisil lai hileng,taikhiak mai ding cihna ahi.Huai ah,thau lem ka bawl ua,singsui siam deuh pa a neikhate bang a hampha mahmah uhi. A bawldan tuamdeuh a hihthei te bang pahtak leh ngaihsang ahi tou jel uhi.Huailai in,thau toh sepaih lamdan tampi ka sin khia uhi.Home guard te hihdan a, ‘gande shas,baju shas,salame shas’ cihte ka hih sam uhi.Hucia mi 10 le cinglou naupang hai kisukhawm,thaulem maimai tawi bang leng,kou a kimuanna ve tak om in,kuamah laulou kihisim khin hi.

Hucihlai in, nitaklam khat Hanmual gei lak a tangsam lak a kidou dan kineih in lamlian pang tuak a pang a,buai mahmah a ka omlai un,Home guard group khat lampi a hongsuak tou ka mu ua,kana kap panta uhi. Ka kapdan utuh,thaulem a ngim in,agin bang leng ka kam ua koumah in gingsak, ‘pung,pung,pung’ aci toh,’thre-thre-threk’aci toh lamsak lamkhang ah ka suak ua,Home guard ten hon nuihsan ua,a hon en lel uhi.Ahihziakin, a heutu pa un, ‘hicibang a na hih jel ua leh,army te bang na kap kha le ucin heh ding uh ahi’cin ciamnuih cihtak in hon hilh a,huainung tuh ka hahbawl nawn kei uhi.

Hiai ka neulai omdan uh ka hon taklat apan in,mihing in bangmah I theihlouh lai in le ‘etton’ na kinei gige hi cih ka taklat nopna ahi. Eimah in le huaipa enton ka hi cih kithei manlou phial a, ahihdan, a kampau, a khut vei dan, a kalsuan dan, a mit-hah,a samkhoih dan,etc te na kicing kha thei hi.Mihing ngeina mah ahi.Lemcinna(acting) bang khovel a industry liantak a hi him hi. Sappau a ‘hero’ icih kinei ciat hi,mikhat kia I damsung a ineih kei tak leleng,ikhanlet dungzui in I ‘hero’ ki khengkheng thei hi.Ahihhang in, ‘hero’ nei lou himhim omthei din gintak huai lou hi.Sapla minthang mahmah ah hicin a na gen hi:

Did you ever know that you're my hero?
You're everything I wish I could be.
I could fly higher than an eagle,
'cause you are the wind beneath my wings.
(Nang hon enton ka hi cih na thei hiam?
Ka ut khempeuh tangtunna nang na hi,
Muvanlai san zong leng sang zaw ing,
Nang ka kha nuai a non dom ziak in)

Sapte mah in ‘history repeats itself’ ana cih uh tangtunna leng himah ding hiven,tuni ciang a naupang ten a hero ua azat uh kuate hita mai hiam cih sut ut ihi.Kou neulai a hero ka neih bang un,tulai naupang ten leng hero nei uhi. Ka picinnung natan a ka neih lai bang in,ka khanvual pihten leng nei lai ding uhi.Kou neulai a ‘thaulem’ a lungkim ka hi ua,tuni naupang te a ‘lem’ a lungkim nonlou uh hih tuak hi.Aziak hidia ka muh tuh, kou neulai a thau ‘taktak’ khong tankhak ngei dia kikoih lou, atawi te leng Army leh training neisa te ngen a kikoih ahi.A hi leng a hi mah hi.Tuciang a bel,I lawi I vual in tawita uh.A ‘taktak’ neih theih luat hita mawk ! Tulai Lamka leh singtang naupangte ut mahmah hidia ka gintak tuh ‘thau hoihtak AK/pistol neih a,huai te ziak a midang ten hon zahtak di, I utut soisa di,I ut nana a hoh di, I ut tantan pawt di,laisim le ngai lou,sum neite kiang thaulawng pansan a nget di,nungak lah deihdeih luppih theih,heutu lian te natan in hon zahtak di uh,hon koih maimai thei lou ding uh,khosung makai ten le koihna tan hon nei ding uh,saptuam ten lah bangmah hon lohngam lou ding uh,YPA te natan I thuthu a om di’cih ahi. Atatak bang le hikha dia gingta ka hihziak in, ka om anuam het kei hi.
Ahihziak in,ka gintakdan atung a ka taklat tuh ‘alou theilou’ hi in ka mu.Aziak te:
• I lak a makai ettontak dinmun a dingte nekgukna a ki bual ziak un,
• Tangval thautawi khempeuh lauh leh kihtak ahih ziak un,
• Thautawi khempeuh te gamtatna adik leh louh gen lou a mekcimit ahih ziak in,
• School gina omlouh ziak in,
• Ane gu kha loute a dia sum leh pai ahaksat mahmah ziak in,
• makai ten negu ahihziak ua en le nekguk di cih ngaihdan aom tak ziak in,
• Saptuam natan a negu leh cindan hoihlou a sum mute vaihawm dinmun luah thei ahih tak ziak un,
• Hoihna leh diktatna a kielna sang a hauhna leh sumlehpai a ki elna ahih mawk ziak in,
• Siamna-pilna zon sang a sepna sum a leikhiak theih ahih maimah ziak in,
• Negu te mah,sepna leikhete mah athupi leh belhtak,ettontak a ngaihna a om tak ziak in,
• I lak a thutak gen leh zui a kilang mi atawm mahmah ziak in.
• Pathian thu-awina I muhkhelh ziak un,
• Biakin kai kisiamtan na lel a izat tak ziak un,
• Ei a pawl iki bawl kei leh pawl dangten hon zou ding uh cih ngaihdan I neih ziak un,
• Min hon khoih ma a en khoih ding cih suahtakna lampi a ingaih ziak un,
• Midang khempeuh muanngamlouhna I neih ziak un,
• Internet facility te nupa kipawlhna sianglou te lel etna dia ingaih khak ziak un,
• Kha mi taktak,Pathian zat theih di a tawm ziak in.
Tua I naupang te pawl (gang) ki bawl te etton kuate ahia ? I contractor sum duh mahmah te etton kua ahia ? Thau toh thuneih sawm te etton kua ahia ? Biakin kimuh khawmna lel mai a tangsak te etton kua ahia ? Zudawn a kholak a buaina bawlte etton kua ahia ? Numei-pasal kaal a thangtat a khovak lai natan a gam tate etton kua ahia ? Etton khat cu nei ciat ding uh hi ve aw...etton a omnuam mahmah te zaw makai dinmun a ding te hi nuam mahmah zel uh eive.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING