UPDATES:

S5 Box

ZOGAM.COM Login

'Ka inn a piang in ka gou aluah ding'

LT Ngaihte NewAbraham,a min masa Abram ci a theih, tuh Juda mi ahi a,Pathian mitmuh a fel famkim leh thumang ahihman in,Juda te tengteng suangtu bulpi ahong hita. Jesu Kris tatna nasep ziak in, ei Jentel a koih,Juda sahkhua zuilou a kristian sahkhua na zuite natan in,suangtu bulpi a I ngaih uh ahi.Juda nam taidalh te lak a na telkha khat ihi hiam cih bel, hun leh ni hong paijel ten hon taklang semsem ding.

Amah hunlai adia,Zawlnei kamsang hial ahihlouh hang in,a mimal diktatna,cihtakna leh ginomna te ziak a Pathian toh na kinai mahmah mi ahi. Phetlou in, mihing khat hingal a Pathian ‘thuhilh’ leh ngaihdan na kuppih a,Pathian ngeingei in leng,athu, alak ahi.

Abram tuh Terah tapa thum te lak a upa pen ahi a,a sanggam ten zi leh ta aneih hang un, amah zi Sarai a ciing a, ta anei thei kei uhi.Hicibang dinmun a a ngaihtuahna paizel dingdan I ngaihsut ciang in, vangtah kisakna leh miphalou kisakna te alian mahmah din a gintak huai.Lungngai leh mangbang a aomlai in,atenna khua Haran ah Pathian in hicibang in ahoupih hi: ‘Na kho lama kipan leh na tanaute laka kipan leh na pa inn akipan pawt inla, gam ka hon etsakding lam ah pai in,Huciin,cii thupi mahmahin ka hon bawl ding a,vual ka hon zawl ding a,na min leng ka hih thupi ding,huan nang vualzawlna na hi ding.Nang a hon vualzawl peuhmah ka vualzawl dinga,hon hamsiat peuhmah ka hamsiat ding, nang ah lei a namcih ten nuam asa ding uh’ (Gen:12) ci in. Sap ahih bang in, anaupa tapa Lota toh,azi leh atanau te toh Kanaan zuan in a zinkhia uhi.Pathian minlou jel leh athu mangzel a maban sawnjel ahihman in,Pathian a tung ah akipak hi.

Pathian thuciam leh a thuhuilhna mang a azin kual zelna lam ah,Abram hici dan a ki ngaih tuahtuah mah hisam din a gintak huai hi: ‘Ta lah nei lou ing a,lah, Pathian in cii thupi leh namliantak suangtu ding na hi ci jel a,bangci tangtun theih mahmah ding adiam aw, ka inn a ka ompih ka gou teng kempa lah Damaska khawmi hi lel a,amah toh sisan kizopna nei lou ka hih ciang ua,ka gouluahtu ding,namtampi pa kipatna ding koi a om thei ding ahi ta a..’ peuh ci ding in ka ngaihsun hi. Hucibang a a om lai in,Genesis 15 ah Pathian in a houpih nawn a ‘Abram,lau ken, kei na phaw leh na kipahman thupi tak mai ka hi’ aci.

Hiai houlimna a Abram in Pathian kiang a phuut ‘ka inn a piang ka gou luah ding ahi’ cih tuni a ka gen ot nop ahi.

Eilawi bang hileng,Pathian thil bangkim hihthei in nam lianpi pa ahon bawl ding, cii tampi suang ding a hon bawl ding ci maizen leh,eilam ki mangngilh in, I maban ding teng leng khual man lou in, ‘hihen aw, hipah tingteng heh aw’ I ci pop pop kha ding un a gintak huai. Huaiziakin, Abram hi mimal a leng pil mahmah hitah e cih a phawk huai mahmah hi. Cii tampi suang a, nam tampi suang tu dia teel ahih ngal leh,a tu ata khang leh a tusawn te leh a suan omtou jel ding te na ngawn amah sisan a piang ahih touh jel ding uh ahi cih a deih a,azi toh ta nei kei mah le uh,huai tuh a phuut ta hi. Pathian in leng diksa mah hiding hiven,azi Sarai kum 90 a cinnung in a gaisak hi.A baan zaw theihsa in koih nawn phot ni.

 

Insung a piang mah in goluah a insung a etkawl ciang in,bang cibang thil atung a ?

 

  • Inn mahmah a it in a ngaina
  • Insung a teng mite a it in a khotuah
  • Insung paidan te a zui
  • Inkuan in a ngaihsanthil(value) te a ngaisang
  • Insung amah a bangtak in a ngai
  • Insung mabaan ding ngaihtuah in a lungsim a seng
  • Insung mite haksatna leh kipahna te a thei
  • Insung mite’n amah a zahtak uh
  • Insung miten amah a it uh
  • Insung miten amah thu amang uh
  • Insung tanau-lainate a thei a adon
  • Insung a ding in a hinna a pe ngam
  • Insung a ding in a neih leh lam te a pe ngam
  • Insung leh amite hoihna ding in pan ala gige
  • Inn kim leh kiang te toh kituahna a zong
  • Insung leh a mite a humbit
  • Inn ah a om
  • Insung vai etkolna ding in thagum/hiamhei  a zang ngei kei

 

Juda suan khempeuh te’n tuni tan dong in, aomna mun khempeuh uah, Abraham insung tawndan leh ciindan,thu-up leh sinsak te ginomtak in zui tou jel lai uhi. Huai mah tuh Juda te lohcinna leh thuak-hatna bul ahi. Juda ahihziak lel ua sawi leh gawt a aom ciang un leng, apu uh Abraham kiang a thukhun leh ciam te ziak in,a ginna hiam ahihna uh hiam tawpsan omlou uhi.A omna gamgam uah,Israel lalgam a Jerusalem tunding nawnna ding ngaihtuah kawm in khosa uhi. Babulon sal a ta’n lai ua,a kiciamna uh leng,thupi mahmah hi: ‘Jerusalem aw, kon mangngilh a leh, ka khut taklam in a thilsiam mangngilh hen.Kon theih gige kei aleh,ka lei ka dangtawng ah belh bikbek hen,ka nopsakna pen sang a Jerusalem ka deih zawk kei aleh’(Sam 137:5-6).

I insung enkawl ding a midang khat koih a haihuai dan gentam a ngai kei. Mohpuakna taisanna ahi. Pathian thu awilouhna ahi. Hucibangzel in, I gamsung vai leh khantouhna te,ei hihlouh a midang in hong hihsak ding ua I gintak leh gingta khial ihi ding. I tenna mun lou, mundang khat,koitak hiam a,ei ading a na om di cih bang I gintak khak zenzen lele,gingta khial ihi ding.Sihnung thugin leh damlai thugin kibang a ngai ihih khak ding alauhhuai,hiai tungtang ah.Nam leh gam itna icih bang ahia cih bang leng etthak tuak a diam ka ci.I dinmun kibang, haksatna ituah kibang,I pau iham kibang,I khosak-tawndan, zawn dan,hauhdan kibang zenpi a,inveng te toh houlim theilou hita zen hang a.I thugin bang leng a tuam omlou pi.I nek duhdan te na ngawn kibang suak vek. I tung a vaihawmte leng kibang.Ahihziak a,I khawtangpi hoihna ding toh kisai thilte a,ki tuak theilou mawk. Gam leh nam it kici makai te lak a nih leh thum kingeihlouhman lel houh hia ? Ahihkei leh mi bangzah hiamte duhgawlna ziak ? I phualpi sawlkal inlah,eite kituak a deih khat ngen a I tonkhawm hun ngak lel hita. Government hicikhop a hoih,mipi-nautang dopkang sawm a pan laktheih teng la, nei hang a,ei leh ei kaal kilemlouhna neu cikcik te ziak a,sawlkal hoihna bangmah lawkpih himhim neilou a om ihi uhi.Ahihkei leh,ei inn hilou mi inn khat a om a kingai a, I utdan teng a gamta maimah ihi hia ? Ka gouluah ding tuh ka insung a piang ngelngel ahih ding ahi,Abraham bang in I ci thei ding uhia ? Kisuanlah huai lou. Pathian lemsak deihdan ahi. Ahijel lai ding.

COMMENT (1) PHA TA..  
  •  
  •  

#1#1 aihnake » 2013-08-22 15:11

paKam aw, ka sim suk diu diau a kei mah ki mah kingaihtuah kawm in, mimal vai veng/khosung leh i nam vai ah hiai bang chihtakna lunglel lou a Pathian thilchiam abram tung a, inam igam heututen lesson thak bang a hon lak thak uh leh role model hong hih adeih huai. Inam makai te nou te din ka thum ngiit nget hi.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING