UPDATES:

KNLD Series-II | CIHDANSIAMPA LENNA

KNLD Series-II | CIHDANSIAMPA LENNA - Kabuliwallah
LT Ngaihte NewCihdansiampa thilhih siamdan pen maimai lou ahih man in, nna asep khempeuh ah, midang te sepsang a baihlam zaw in sem khe thei zel mah hi. A haici tuh a,enkawl a ngatngat hi hetlou na pi in, agah midangte muh a kilawmtak a na lou gaih jel hi laizang hi.Aciamteh tak mahmah khat bel, apian a a nulehpa’n akvomsa gouzen a amin aphuahsak pen uh,kuamah in thei ban nonlou in, hiai hihna(title) piak a om,Cihdansiampa pen kia a theih hi hialta hi.

Khovel a thil thupi te tancin dangte mah bang in, hiai hihna(title) ahong pian khiak dan gendan ci tuamtuam om hi. A koipen dik hiam cih I omna leh I etna mun ah kinga hilel ta hi.Mi thupi dangte tangthu mah bang in, niteng zan teng in Cihdansiampa hong kipatna leh a nasep khiak te kibehlap tou jel lai hi.Huciahihmanin, akip akoi a suut khiak leh gelh khiak vek thil haksa leh namen lou ahihman in, a kigen dan tangpi leh a author hibang ahi:

• REP Theory : Hiai REP Theory kici pen amukhepa Sir Rex Peapy min la a kiphuak khia ahi. A kigen dan in, hicibang hial a theory ( kingakna tak thudik) amah min a koih hial a tup leh ngim hingei lou hi. A naupan apan in,laisiam leh taima a theih ahihlouh hang in,ciamnuihna ding tasam ngei lou a,amah a theihsakna tung bang hial in leh Tangtung a thugen bang hial in,huailai pek apan na gen khe thamta kici hi.Eimi te lak a nuihciam lam thil himhim a,mi masa leh suan huai. Ban ah,authority on nuihciam hi pha,akipatna leh a khan letna mun theih ahih louh hang in,eimi lak a Pheisbuik hong kilat tung apan,nelsiah leh kitheihmohbawl vual hilou a hong minthang khia ahi.Akigen dan in, tuciang a khovel leh leitung pumpi uap suak a nuihciamthu kizopna ama patkhiak hin ki gen hi. Amah laigelh tampi te a pan tua igen nop ‘Cihdansiampa’ thu hong kipan khia ahihman in,Rex in I society leh I nam adia thilthupi tak hon tun a hi I ci lou thei kei. Eimi Pheisbuik lam sui taktak te a pan kiza dan in, Nuihciam in huihkhua laibu ah pek tam luahpen hin ki gen. A poimohna mun a zat ding leh simdia mek-khiak(download) tampen zong Nuihciam mah ahi ci uhi.

• Cihdansiampa thilhih dan REP Theory in a gendan tak,muhkhiak zoh hikei mah leh,mithadah om maimai theilou bangzah hiam in Pheisbuik apan muhkhiak nawn lamen in niteng in pang uhi. Muhkhiak ahih hunhun in, mipi nautang simtheih ding in,mek-khe nawn ding uhi. Athupaidan tangpi ataklatna bang un hibang ahi:Cihdansiampa thadah leh zongzaw ahihhang in, amah adia lemtang hun theithei mah mah a,kuamah in amuanmoh ma in,a ut pen semkhe geih zel ci uhi.Huai bang hunlem ngaihtuah a nisa nuai a leng ihmumu thei, a ngaihtuahna a a lunglut vanglak ciang a,khovak-khomial in bangmah gen neilou,a om khakna nana a kuamah sukbuai zohlouh a om thei ahi kici hi.Hiai pen hunremcang a zonna ahi. Laigelh sim hiam, TV et hiam apan ziltheih te hilou, lungsim tawngnung pen a ngaihtuah vengveng na apan a,nasepzia muhkhiak hi lel zaw hi.

• Lamgei a nupi nikteng a baltou a bung vihveh sang in huai nupi mah hakai khuk kocik leh thuktak tou a,huai sung a bung viveh in, Cihdansiampa ngaihtuahna ah, hun lemtang hoihzaw,bit zaw leh baihlam zaw pia ahi,cin mu hi.Hicibang a adeih leh duhthusam a thil omkhakna zong in,midang ngaih a bangmah hihlou bang mah leh,alungsim in khawlhun neilou in pan la hi.Huaiziakmah in,hun sawtkuam a lupna tung a thallup tang zizen a a khuak a charge khit ciang in, vai hamsan hun in a thou a,gamlak nai khakha - numeite singpuakna lam peuh ah,hun lemtang zong in a vakvak hi.Cihdansiampa ngaihtuahna ah, hicibang a hun lemcang om te,ama bawltheih leh geelkhiak ahihlouh man in, kuhkalna leh lametna toh zonkhiak ding hi lel in ngaihtuah a tha leh zung a sen te zang a Pathian vualzawlna hong luanglut cin a ngai a,alungsim ah kisiamlouh tanna himhim a om  ngeikei hi.

• Nek leh taak zonna ah leng,ama ngaihtuah dan in, sepna mimal min a nei a, sun teng a office kai a kuante,thapaih sak a sa lel a,sawlkalna hin private hileh,hucibang nasepna te koltaanna in a ngai lel hi.Ama ngaihdan in, hucibang a nasem ten leng,asepna ua mimal punna ding zongngen mah ahi ua, mundang a punna omtheite zong manlou uh hizaw ci hi.Huaiziakin, sepna neihlou a, khat peuhpeuh a tel theivek lah mohpuakna nei tuam hetlou a khosak a,huai a sum leh pai muhna hun remcang ngak atup leh a lamet hi zaw hi.Asepna a dinmun hoihlou pen piak ahih in leng,Chihdansiam ahih ziak a tuacibang dinmun piak hizaw in ngai thei hamtang hi.

• Contractor te kiang, officer te kiang leh Chowkidar te kiang a hoh jel a,singpi apiak te uh a dawn zel a,a gei a om officer liante lunglutna lam thute uang tak in ava gen a,azak khak hin a zak khak louhte natan,a gei a mi kipahna ding ahihnak leh siamtakin a gen zel hi.Lushai ten ‘fakder’ acih uh amin hoihkei sim bang mah leh,kuapeuh – saptuam lam hin,politician hin,val-upa hin,tualai nungak –tangval hi le uh,fak-der ut ngen ahi uh cih mu ciang lua ahihman in,kidam hetlou in,a veilam apa fakder a, ataklam apa kipahna ding ahihnak leh aveilam pa nasia tak in gense leuleu hi.A cetdan siam leh kamzolna ziak in, Contractor in Engineer apan certificate amuh khiak ciang in, a gei a singpi dawn a ana kipahpih mahmah dan a om,Cihdansiampa kiang 10% bang pe nuam hial thei hi. Contractor pa’n suaikaihna ding kolom a poimoh dektak ciang in, Cihdansiampan a khut in kolom khat an ape phei a,huai lel amuh ciang in,Contractor pan,adikloupi mah a asummuh kilh bangzah hiam piak khiak cauh toh hong kituak mahmah thei zel hi.

• Biakin a social work ding akicih ciang in, salung-sasin bangzah hiam kilep kha thei ding cih chance mu in, zingkhat nanana a hong phalvak thoh a, sabawl ding in hong kisa a,zingkhang in Pastor pa inkong a va kiu a,sasin-salung koihna ding baltin ava ngen khenkhan zezen hi.Pastor zi in apasal kiang, ‘hiai pa kua amai a,felna mai zen e’ aci a,Pastor in, ‘mi taima,all-in-all khat ahi’ ci in azi kiang gen hi.Agintak bang un, sagil vakhuah khin,asa lim tata,bangzah hiam baltin sung a koih in,Pastor pa in a va khai lut a,Pastor pa zi toh hong kiseh khen ua,aman belkuang khat a sibang niuniau in,zingciang a ameh huanding tawi in ainn uah akipai a,a ihmut a va sunzom nawn hi.Tanu dang ten ‘Cihdansiampa le a mang hiau ale’ ci lel uhi. Bible in nasemtu tuh loh mutak ahi’ ana cih a dik tou jel! Saptuam a lunglut kici ten lah,asep lam sang a agenlam lunggulh zaw gige ahih ciang ua,hiai sa seer khat/nih omna ngaihsut a neih lel zong khamitlouhna in ngai uhi.Phatuam leh ‘on hand’ mahmah sak ziak in,saptuam committee ah ‘local-upa’cih min a pe hial uhi.Cihdansiampa lunggulh tan geih mah ahi jel.

• Khawtang ruaithehna ding hong om ciang in, Cihdansiampa’n hiai thiltung ding toh kisai a pan lak didan zan khat a ngaihtuah nung in,mitangpi peihlouh ding a agintak nna pen a hon boh a,huai department a heutu dinmun a hon luah hi.Huai dinmun apan,akithuahpih,ama phakna teng phakhaloute lak ah,alungsim uh buaisak ding in,thil hihdan tuamtuam leh a lokna ding te abaan gen a,alomte buaipetmah uh ahi cih atheih ciang in,a lawmte kipahna ding in ‘ken hon ngaihtuah fel vek na veng’ ci a,alawmte lawkna ding teng amah angsung a huilut in,nna a hon sem khia hi.Khotang makai,nalhtak leh piitak a kilat sawm ten,bangzah hiam piakbeh ngai ahih le zong,neitak bang a sakhau apan sawkkhe jel uh ahi,cih Cihdansiampan a theih na sawtpi nahita hi ven.

• Cihdansiampa zankhang lungsim ah, tuni ciang in, ‘politics’ cih cauh a gingta a,tua a dinna mun apan ama utziak hilou,mipi leh gam pumpi deihna ziak a,utlousim hileh kilawmtak a, politics  a tuahlut dingdan kia a ngaihsun hi. Huai tupna atangtun theihna ding in,lampi a suang tengteng lehkhup ngai leleng,azi atate toh pang a lehkhup vek sipsip sawm in panla hi.Saptuam lam hin, khotang thil hin, mimal inkuan sung natan ah,a thilhih khempeuh in huai political power lam focus hi den tahi. Amah lungsim ah ‘it’s a matter of time’ hi lel hi. Cihdansiampan, mi kum 20 bang Minister ahih a bangmah mipi adia a sep kei ua leleng,kuamah in mohsa thei lou lai uh ahi cih a tangval tung apan na thei khin hi leuleu hi.Mipi teel cih pen,khoih theih ding ahih cia,mipi bei thei zel,kingakna ding ahihcia,sangtampi om thei jel ahi cih zong ana thei cian mahmah manzel hi.

• Cihdansiampa hinkhua leh tuallenna thusim tampi kiselgu om lai ahi cih imvuallouh ahi.Tuate bang cik hun in a hong kilang dia cih kuamah in ciangtak in agen thei nai kei.Hilezong, a hong kilat khiakni om ngei ding. Tutan in bel,I gam ah Cihdansiampa bang mihing te ading in, bangmah dang sang in lohcinna leh lohcinna leh lohcinna ngen hi tontung phot hi.

**************(280613)************

COMMENT (4) PHA TA..  
  •  
  •  

#4#4 Archi_lun » 2013-07-17 13:06

LOL... nuihzat huai lah hi lah dah huai i society pai dan..lol

  •  
  •  

#3#3 SameTime » 2013-07-05 13:15

"mithadah om maimai theilou bangzah hiam in Pheisbuik apan muhkhiak nawn lamen in niteng in pang uhi" ... haha nalh ka sa lua. Simnuam mahmah e, gelh zom thei zel diing in cidamna Toupa'n hon pia hi.

  •  
  •  

#2#2 dawnkai » 2013-07-03 12:35

KNLD !

  •  
  •  

#1#1 aihnake » 2013-06-29 21:20

Chidan e paKam le. Chihdan le na hong siam na e!
Ka sim tu'ng in ka sim buar chuar a kick ka man kei... nihvei kasim nawn in ka man pan. A thumvei na in ka bil hong puak lek aka hiam.

Nuam lua, hon gelh zom zel in paKam.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING