UPDATES:

Dawn ding a kakun suk a leh...

LT Ngaihte NewLeitung hinkhua ah gintak banglou thil tamtak ituak toutou uhi.Ituah ma a I lungsim a ngaihtuahdan ina neihkhak ziak ahi pen a, ahitak in,I lungsim toh kikhem tuah hi zaw in kilang hi. Hiai lavual gelhtu bang in leng, tui dawn ding om dia gingta in,dawn dia a kunsuk leh,tui ana omlou hiam hih tuak hi.I lungsim a lametna nei masa lou hileng bel,lamdangsakna hiam,lunghihlouhna hiam om tawm mahmah ding bang hi. Ahihziakin,lungsim ngaihtuahna pen om maimai theilou petmah khat ahi a,alang alang ngaihtuah in, leitung muncih mualcih tun lahna lah neilou in,phe tengtung gige hi. Hiai ngaihtuahna phe vengvung pen tawldamsak na tuh sapten ‘meditation’ ana cih uh ahi.Tibetan te makai Dalai Lama in, ‘khovel a meditation hoihpen tuh ihmut ahi’ ana ci a,I ngaihtuahna tawldam hun omtheihna tuh ihmut lai ahi pen a,ahihziakin, ihmut hun tawm khakha ahihman in, sunkam lai bang in leng,tutna tung hiam,lupna hiam a bangmah ngaihtuah lou a, khawl tawldam hithiat,taksa ading kia hilouin, lungtang(hearts) adia le thilhoih mah mah leh ciintuak ahi.
 
Lungtang om maimai theilou nei a,thil ban ngaihtuah a, I muh ngei nailouh te na ngawn om dingdan hisap nei ihi uhi. Hisap (koihna) dan khat kinei ciat hi. Mitdel bangzahhiam Saipi mute akigen jel bang in, I hisap dan te bel kibang vek khollou ding hi. Tuciang in, laisim theih ding atamta a,sappau a kigelhte bang leng eipau tuk a theisiam ta i hi ua,huan TV bang om,Internet bang om,mobile phone natan a muhtheih leh ettheih tamta ahihman in,I thil muhdan uh atangpi in,hong kisoirual thei sim ta ding hi.Thil hi’n mihing hileh, ikoihna a na hoih luat ciang in, lunghihlouhna  na ding tamzaw hilel hi, atak a ituah khak ciang in. Huaiziakin, thil himhim, mihinpihte tel in, a hoih lawzen dia hisap(koih) louh ahoih zaw pen ding in ka gingta hi. Huaiban in, nidang a na hoih mahmah,na ngaihnat huai mahmah te leng,damsung tiltuah ten soisa den ahihman un, nidang a ahoihna uh mah toh muh na kigintak leh,na lung a kim kei den ding.Sapten ’time and tide waits for no man’ acih ban uah, ‘time and tide spares no man’cih uhi. Mi melhoih tak leng hoih den lou,mi damtheitak leng damhoih denlou,bukimlouhna khovel ahi,acihna uh ahi.

2005 a Israel ka phak masak un,Golgotha(luguhmun) en ding in,Getsimani Huan apan ka pai ua,ka lungsim in,mualtung a Kros 3 ana om ding in, alaita pen liandeuh ding, a pang a te hoihlou deuh ding leh neudeuh ding dan in ka hisap hi.Hiai pen,laibu khenkhat a Jesu sihna kigenna a a omdan,ka neulai pek a kana muhkhak,ka lungsim a belh den ahi.Amual bang leng,ka khawlui uh Lawibual gam a Sakhi Mual ka cih pian sim a,mual nuam hiu hiau, tawldam theihna mahmah ding dan in ka koih zaw mah a,hucilou ding in ka ngaihtuah thei kei hi. Ahi a, amun kava muhtak un, innsung khat ana hi a,anuailam a kumsuk ngai ana hizaw mah hi.Hisap dan toh akibang kei cih cu nepte ahi.Lungkimhuai lou sakna tan bang kinei,khem zoh a om bang kisak theih phial ! Ahihziakin, kei hisap dan pen ana diklou lua hi zaw,gam khantouhna dan toh hiai mun kepbit ngai ahihdan khong ana ki ngaihtuah khalou. A tung apan kei na ngaihtuahdan a na om ngei lou himhim leng hi zaw mah ding, a mual atang te bang leng,kei ngaihtuahdan bang na hi hetlou zaw ding,ana hi zaw hi. Jerusalem bang ahih leuleu leh,Solomon Temple pen,a rong bukim a a lim kimu mun mahmah ahihman in,ka hisapdan mah bang houh kavasa a,lungkimlouhna ding ka mu kei.

I khanletna in I ngaihtuahdan bawl zaw hi peuhmah in cia. Kei bang,ka khotheih apan ka pa Upa ordain na hita ahihman in,amah kamaitang zahtakna ban ah,amah ziak in Upa dinmun bang dinmun sang mahmah hin kana koih hi.Taksa kum a naupang kha bang cu huaidinmun len thei dia na koih lou mawk. Ka muhna ana niam lua ! Mimal hinkhua bang a leng,nek leh tak, silh leh teen ban a tep leh muam te natan a kidek zou mahmah te ading a na koih. Kei bang a kidek zoulou te tanphak leh luah phak ding mawngmawng a na koih lou kahi.Aihleh,tuciang a,Biakin sung lutdikuan laizial dik suksuk a lut,biakin kong mahmah a Kuva hai sekhia a lut a Upa hi ngal cih khong te ka muh cian,’dawn ding a kakun suk aleh...’cih a ka phawk khe jel.Pastor cih bang,ka neulai in Kaihlam Nuai tengteng uap din Pastor khat cauh a om a,ahong phak nikhua in cu Pathian bangphial a na kingaisang hi. Ka na hisap dan a,mi citak leh ginom,thudik gum a thil diklou mawngmawng dal bikbek ding ua ka koih te a hi uh. Ahihziak a amau ten tuciang a Pulpit sung a ciamnuih zamoh pipi,ken kholak a ka genkhiak ngamlouh te natan hon genkhe mawk ta uh. Nekgul-takguk(bribe)a piak bang uh hon gen khia uh ! Kei leltak bang in, ka nu leh pa ziak mahmah a,hicitan sawlkal na semtana ing a,bill diklou hiam nekgukna himhim ana hih ngeilou hing a,tua saptuam Upa ten,sawlkal a Bill diklou pipi bawl a sum lakhe au-au uh cih te ka muh ciang in,’dawn ding a ka kunsuk a leh...’cih hong lang zel.

Hucibangzel in, BA/MA ka sinlai a Indian History ana simsim ka hih man in, nam makai te bang leng,Mahatma Gandhi te khong bang deuh a,laisiam,laisim taima,thil thei,kingainiam,neihlehlam thupi bawllou,mipi hoihna ding a amah mah in anngawl,huai le a poimoh leh a sihtanpha ngawl dia kipia, te khong bang deuh ding ua na koih kha jel ! Adamsung in,inn leh lou aneih lam le akigen kha kei,car a nei cih mongmong le om kei.Governor te mudia a kuan cian le,khe in a pai lel mai hi.Tulai a huci lawmlawm om di zaw agintak huai kei,ahihziak in,ei muhphak ciang a nam makai dinmun luahte I et leh,Pu T.Gwite in a damlai a ‘hicih phungphung tel in a..’ acih pian sim in,mipi nautang phattuamna dia Sawlkal in sum akoihte natan laksak in, amau leh a sungkuan te uh tenna ding,  inn lian pipi a lam ua,a crore a crore in sum a seng ua, apawlam a a gam mite uh,nekding gina neilou,dawn ding tuisiang leng omlou, naupangte laisim na dia eletrict meivak na ngawn omlouh lai in, amau a pucca building suang uah Air conditioner toh,distilled water toh,inverter toh ,niang leh tai in a om uh cih bang ka muh ciang in, ‘dawn ding a aka kun suk a leh..’ ka ci lou thei kei.

Delhi a laisim dia ka tuntung lai un, Zomi idea a hong kituh a, nomenclature dia pomtuak ahihdan a kisui ciang in,amalam a min ipuak khak te sang mah a,ihihna genkha zaw leh I insungpa min lou ngekngek ahi kici in,adiakin,student lam in,hoih kisa hi. Zomi Ideology pen ki unauna genna ahi a, kinakna ding leh kidouna ding himhim a om kei.Apoimoh pen tuh,midang a theisiam nailou te theihsiam sak ahi pen.Huaituh social education hiam awareness icih ahi. Mipil leh zahtakhuai ten,aban a gen sawn in,a thu omdantak taklang in,gen le hang, a gingtalou ding omlou ahi. Gintaklouh vual leng ahi kei.Laigelh a pang toh,a thugen a pang toh,hiai min zang a thathak lak ding,Non-mizo,non-naga teng lak bek a minkhat-sakhat pu a om ding lampi ahi.Thukipahhuai leh lametna ahi.Kinakzakna ding leh tualgal pianna ding ahi kei. Ahihziakin, kum tamlou nung in, zin hawm hiam aw kua hawm hiam,hiai min kilawm leh ngaihtak mai pansan in,akigawm ding, apang khawm ding te lak mah ah,tualgal hong om a,unau leh unau kithahna tan ahong tung. Min kilawm leh ngaih pansan in,mi bangzah hiam in amau noptaalna ding zong in,kithana maimai hilou,ganhing bang a kisoisak nate ahong tung. Huaite ka muh a ka zak ciang in,’dawnding a kakun suk aleh..’ka ci lou thei kei.

Atawpna in, Pathian Thu (gospel) I gam a hong tun akum 100 cinna I lawm ua,huai lopna in ganhing bang leng aza asim akithat. Pastor I cih ten a kilual a thumna nei in,thudik gum a thusia dou ding in Pathian kiang a kilaan uh. Saptuam muncih a om ten,hiai gospel hong lutna lawm in,tha leh zung tampi a seng uh. Kristian picing mahmah dia lamet theih te ihita uh.I cih bang in, ilak uah ‘Kristian ka hi kei’ aci om hetlou ding hi. I vek ua kristian hita hi hang.Kumteng in Pastor leh Upa ordain a sawm a sim in a ki behlap gige. Saptuam te nasepna leng a kibehlap jel.Huci hina pi in, I khotang uah siatna a sang deuhdeuh.Setan bang a popular mahmah ! Unau kal a kithahna, nam min sial a kithahna te saptuam te na ngawn in a mohpaih ngam kei uh. Saptuam  in a mohpaih louh te tuh,adik leh tang a ngaite ihi zawmah uh.Bible zui nonlou a saptuam zui ihih tak man un.’Thudik lam gei ah a kual’ ci’n Zawnei Isai in kum 4000 paita in a na gelh. Eilawi in lamgei lel ale kual sak nawnlou in, muhbat nonlouh din I koih dap ta ua,thudik ci a I pom uh a lem lel,ataktak hikha non dek lou pi ahi ta.Tualthah na ngawn mohpaih theinon lou thudik gum saptuam te ihi ta uh. Anung zui ikicih uh Jesu Kris mel ,ilak uapan gamla lawta ahih man in, amai lim(mask) maimai I gaal muhta uh.Hiai te ka muh a ka theih ciang in, ‘dawn ding a kakunsuk aleh,khem in ka om maimah..’ka ci lou thei kei.

::::050413::::

COMMENT (4) PHA TA..  
  •  
  •  

#4#4 thangzamuanguite » 2013-04-30 01:32

pu aw, igam inam christian ichi na a hiven, vuaktanga om helhol ding aki utlouh man lela christianity puansilha nei mai2 hilim hang

  •  
  •  

#3#3 dawnkai » 2013-04-08 11:45

lam-etna sanglua hiam , thil gintak baihluat khak sek hi , Laigelhtu in acih bang in , lunghihlouhna leh lungkiak dim demna hon tun tu ana hilel tak sek hi. Vachi dek le, Ginna / gintakna leh upna omlou in lah maban suan theih hikei zel ven maw ? ?

Nikumlam in , Zawlbuk Magazine kichi khat ah VVF/paite Homeguard chihdan piansim article khat ahong om ziak in Paite khawzang ki gulau in public meeting bang hong ki organise zih zeh hi ven, naupang/tangval tuailai tampi hon tokthou sim dan in hong om he-ha hi. Ei bang le tuailai hisam akihihman in , kihi gel-gal sim sam hi. Huai lai vel in , ka U te khat in hichi in hon gen hiau hi , " election hong om dia , tua thugensiam mah mah , nagintak mah mah uh heutu dan a om te kha .. elction khawng ah hong ding sawm ding ua etc.... hong veng / dai mai di ahi " achi lel a , i gintak keisim leh hong huchi tatak ngut a .. ka U thil puakdan siam leh balanced kasa mah mah lim ve ! akim akiang a hi veng vung te kha daitak a ana en thei ahihjiak in .

Thil teng lah va houngaih luat vek di lah hihtuak chiah kei , va thupi bawlluat pah di le lah akiak na di hetsa chih sim sim pawl bang om zel.. history repeat itself chihmah le dik den den himai ei, huai sung in lah Tuivai aluan ngei in luang , leitung lah akipei ngei in kipei ..

  •  
  •  

#2#2 Vangngaihk » 2013-04-06 14:17

Hicibang hun a thil poimoh hi a ka theih tuh, khawtang hin,politics hin sahkhua lam hileh,makai dinmun lente a kingak pumlum louh ding, eimah i puksiat louhna ding a pan nalak ding cih ahi.Huai ding in, mimal mohpuakna, khawtang thil ah hin, politics ah hin sahkhua na ah hitaleh personal conviction i cih sek uh,mimal a pomna kiptak na neih ngai hi.Makai khat i gintak mahmah leh ina muan mahmah,igintak dan banglou pi ahi cih imuh khiak cia, ei napuksiat theih mawk ahi.Hucibang mi tampi omta hin ka mu.Adiakin,sapt uam makai ana gintak mahmah uh,thilhongtung te ziak a,mi hoih loupi ahi cih a theih khiak ziak ua,saptuam nasepna a lunglutna mangsak a,ngaihsak nonlou om tham hi.Hucibang zel in,politics a tup leh ngim hoihtak nei sa a,makai ana zuih un,a gintak tan uh pilou leh manoh pihlou ahi cih atheih khiak ciang ua,politics a le lunglut nawnlou hithet cih tampi om nawn hi.Tuacibang in khawtang thil ah leng ahi vek hi.Hiai dinmun hi,lam citeng a tungkhin sim le ibat ziak un, mimal a panlak thakna,heutu te i gintak leh i lamet bang kei mah le uh,amau ziak in ka pukse kei ding ci a pan lak ten-tan kisam mahmah kasa hi.

  •  
  •  

#1#1 yesty » 2013-04-06 12:07

Dik mahmah kasa. Khovel a thil himhim i va theih chiang dedeuh chiang in bangmahlou mai, Kumpi Solomon in ana gen bang in Thilteng bangmahlou mai, ana hihdan kiphok jel. Mihing tamzaw ten , heutu hih ut tam zaw ten mahni punna di mah ngaihtuah den uh na hilel...A limching( drama) pian a ki pai laihlaih hilim ahi.Pathian toh kal bangle ginna a mi masa Abraham te, leh thukhunthak hun mah a leng tua Ginna mah toh muhtheihlouh Pathian na mu a, na hinpih taktak tu Diktatna/Damna ngah lel didan hive aw. Tulai khovel thiangjau tak lak a saptuam na hinpih a status dan khong a ngai tampi ki omta, denlam chia," Topa Na min in dawi tampite ka delh khe ve awi" chih kunkun dite tampi ki omta...

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING