UPDATES:

Incest

lealyanthawmteHiai thu hi ka gelh utna a sawt ta a. Ahihjiakin, simtute ahih kei leh a mi nautaang, khotaang, saptuam leh pawlpi te'n i bil dawh uh ngai law napi in..a thupi leh a thu ziak mah a,  a nung ngat san leh ki theih mawh bawl leh, ken vei a kava gelh lenglang ziaka a bang phatuam taktak di le omdi adiam maw kachih ziak in kaki sum nilouh hi. A ziak chu a kua kua hileh, i theih luat leh i kinaihpih luat hiam, i tanau,sangam te kia lou, tu chiang in i nam thil bang ahih leh.. midang theih a mawk gen bang kilawm lou leh hihdi hilou ahi chih ngaihdan omta mawk in. A pil huai pen hilou chih dan a kha.

A huai thilte - sualna hi aw, siatna ahih keh, i sahkhua zuih tawh kituak hiam leh lou lam a en nawn lou in. Mi khenkhat in hamphat na zon ziak a pawlpi kiphut tom zual lah, a mi leh nam min bang lou zozen sam ten a mi nautaang tung a sih leh hinna tung a hon thuneih khum ek mawk uh thutuam hitaleh. Hiai a ka hon gelh di zaw, khotaang sung a, mahni mimal, mahni innsung, leh i tanau, beh leh sungkuan kal thu hikha ding in. Sualna pen dik ahi i chi het kei ua, himahleh sualna thei na pi a daih dide pen sualna ahi chih a thei leh thei ut le ki om nai samlou hiveh.

Hiai thu ka lungsim a hon kam gige, kum 2008 in hong kilang nawn a. Eilam leh eimi te lak a kipan thuthang leh thiltung te ziak hi lou in. Gam changkang leh mingou te gam a thiltung khat thu pan. A min ka gen mai inle, ana bildawh deuh a, niteng chanchinbu simte leh khovel mun tuam tuam a thiltung lunglut ten na theih mah mah uh ka ging. Huai tuh, Austria gam a khaw lian law lou Amstetten kichi  a om in mum 2008 April kha a - kum 73 a upa Josef Fritzl in a tanu Elisabeth, kum 24 sung a inn nuai ua kalh khum leh, ta 7 a neihpih nung a, mat khiak a a om thu ahi.

Josef Fritzl in a tanu nu Elisabeth kum 11 ahih apan thanghuai tak in ana kipolh pih sek a. Elisabeth hong upa hiai hiai in leh hong piching di hita,  amah a hong khosa thei di leh khahsuah maidi ahi chih hon thei ta hi.  Huai tawh kiton in, aman le a  tenna inn nuai uah pindan leh omnang  bawl beh in, huai ah ann huan inn, kisil na, giah na inn te bawl in, nikhat chu Elisabeth kiangah a thil bawlna ua panpih dia sam in - a kong khak khum in, pawlam apan chabi a kalh khum hi. Huai chu 1984 kum  leh Elisabeth kum 18 ahih kum leh kum 7  bang ana kipolhpih nung ahi.

Hiai tangthu gensau a ngai kei. A kih dak huai in, mak sak kia lou, hichi bang tel a  Pa ten Tanu te tung a hichibang thil hih utna neih hi maksa leh theisiam lou kitam law di in ka ging. Kei le uaite lak a khat kahi. Himahleh, ei lak bang a ki endi hita le, i thu gen leh gelh teng a Bible bang pansan ut te ngen leh Sakhua mi ngen ihih uh thei kawm in..hon kum zual leng.  Genesis a Lot'a  leh a tanu nih ten a thil hih uh thei i tam di uh. A diksakna di in, huai lai a pasal dang omlou leh a 'chii/suan' humbit nadi uh hih tuak hi. Lota' le zukham hilai eivoi.

Hilele Leviticus lam in hon sim touh nawn leh.. hichi bang thil chiing te aadi in, dan khauh a khauh leh sihna tanpha piak di chih thupiak om leuleu hi. Hiai Bible a thil omte ka hon zeh lut na pen ahih leh, ka gen sa mah bang in, i mihin zia lam thu ahih chiah, i ginna leh i biak sahkhua pansan ut ngen a, huai pansan a i ngaihdan, muhdan leh i khovel etdan te bawl a tam zaw kihi mawk inchin. Ken tua, i ginna pel, i sakhua pel  leh a tu a tu  leh i leitung hinkhua, i niteng hinkhua, i sungkuan ua thiltung, i ki theih mawh bawl te, i theih utlou, i gen ngam louh te tamlou hon gen tum kahi. Thepthup get a.

Awle, chiang deuh fawk in gen le..Pa ten ta te lup pih, kipolhpih kha Sappau in INCEST akichi a. Eipau in bang ichi duam ah. Eilak kia a thil tung leh om a hi zenzen kei chih bang le theih hoih kha ding in leh, sah khaw dang be te leh society/culture teng a thil tung leh om ahi. Vaaite hi aw, Meitei te hi aw, Sap te hileh, hiai kha thil mak leh lamdang hi het lou in. Hilele, hiai a ka kup ut pen chu midang, namdang, society&culture dang lak a le om hiven chi mai a, eilak a omsak ahih keh, a om a le ki theih mawh bawl mai kha thil dik di ahi diam?..chi ut zawk na ahi. A poisa lou leh ahi di mah aka chi pawl i om unle kon theisiam. Na theihsiam louh na uh.

Himahleh, ken le hem theih zeuh zeuh kana nei a, min lawh leh gen di hial a theihchiang kanei kei. Hilele ka theih chiang mahmah chu, EILAK ah le tuni tan a thiltung ahi. Poi kasa a, hiai thu gelh sau di hileng, sap gam bang a Upa tam tak PAEDOPHILE kichi..naupang neu chik chik tawh thang tak a kipolh ut na nei tampi om ua. A tehkhin nadi kia lou, a mimal a katheih, khotaang a dinmun hoih tak tak nei, mi zah tat huai, lah India leh Cambodia khong a tagah khoina a sum tamlou thoh a, huai a naupang te va ki polhpih tam pet mah uh ahi. Hiaithu a tuam hitaleh.

Ka gen mah bang in, eilak ah le ana om a, a om lel a, hong om lai di ahih ziak in. Hichi bang kilawm lou lua ahi chih thei ni in. Hiai thu gelh in, ahih ut te a khaam teuh keidi chih le thei ni. Huaiziakin, i tanau, sang gam sungkuan te bangchi khosak uh hiam chih ki theih tuah a, hichi bang thu muanmoh huai ahih keh gin lelh  a om leh a thei te in pan la thei le kachi mahmah a. I gam a hiai thu a dan leh thupiak hi ka thei chiang khol kei, himah leh ka theih chiang mahmah khat chu.. huai a Pa hiam in a Tanu ava lup pih in hinna khat suse dim dem ahi. Bang ziakin?

Numei naupang, a tamzaw kum ching lou hisek uh (kum 18 nuai)..a ngaihtuah na uah 'Hiai gen khe leng kuan hon gingta di? Kei mi duhdak lou keive le. Ka diklouh ziak eivoi. A siang lou kahi. Ka tuah di mah eivoi. Kei kuan hon deih nawn di lah hilou a '..chih ngaihna piang in. Amau apan thuzak hak a haksa kha ding hi. Himahleh, hichi bang thil tun na ah, a innsak, innkhang ahih keh tanau, beh, sungkuan ten thu theih kinei thou hi a maw? Huai te iim leh ki sel lou in, thil diklou lua ahi chih thei in pan la thei le kachi ngei. Hinna khat humbit hikha di ihi.

A tawpna di in... hichi bang dinmun a omkha leh omthei numei tenle.. hiai thugelh nasim uh ka gin het louh kar in -  nang mawh na hi zen zen lou ahi chih kithei unla aw. Bangmah hihsual na nei het kei. Na hoih in na fel lua chih thei in leh a hon iit leh deihsak tu tamlua ahi uh. Mi teng kiang na gen ngam keileh, na lawm hoih hiam, na saptuam Pastor kiang ah hiam gen in. Zum het lou in. Hiai hi na tung a thil dik het lou hih a om ahi. Hon panpih ut leh hon kithuah pih di tampi om ahi.

Amasa pen in kei...Lealyan Thawmte nang hon panpih dia mansa kahi aw.

 

COMMENT (7) PHA TA..  
  •  
  •  

#7#7 zopaalching » 2013-01-05 20:59

Hichidan ken leng ka na thei kha a, numei naupang' nu leh pate i hilh pah leh effective mahmah. a kente lah a na sautun man mahmah ua, zongsang uh, pasal khat peuhpeuh in khoih thei mai...aloh ngaihna om nawnlou...!!! Saptuam level a leng seminar khawng a gen dia hoih thil aiii...

  •  
  •  

#6#6 lemthei » 2013-01-05 16:54

Hiai a sanggampa Lealyan Thawmte thugelh kipahpihhuai sa ing. Hibang ngimngim nunga, asiik hiam (mikiat thei)te suihmol nunga gelh khiak cih theihmai, thugelh in zdc (zogamdotcom) user-te leh zdc paw-lam tanpha ah gen (impact) nei teitei di'n um ing. Tua di'n Toupa thupha! Lungsim a lang zauh thu khenkhat -

1. Tunai, mi picing ngen kikhopkhawmna ka telna khat ah, speaker pa'n, "Tulai i gam siatdan pen numei luppih ut pasal khenkhatte'n numei kum cing nailou (puberty stage)te enlah uh..! Tuate a lupkhawmpih uh ciang'n, si (numei ngeina sipawt) nei nailou uh ahihman in a gaai diing patauhhuailou hiphot hi. Tua numei kum cing nailoute leuleu in lah mobile mantam pipi bang deih, pasal / papi khat in tua bang mobile mantam leisak or guan kawm a a' sianthouna uh sukbuah sak ek zel uh hidan ahi," ci. Tamai aw...!

2. Mihing pen a siamtu om, a siamtu nei ahi, cih kuama'n i nial uh uphuailou. Hiai thu, Bible a kigen sanga kingakna taak zaw source dang omlou diing hi. Tua ahihman in Bible (Living Words) pansan a hihvakna/siamth akna tangte mah inntek-panna leh huai Thu Hing a ki-base a thil et vengveng a sukven sawm ahihleh, tua ah vaiven guihna ahihhial ke-le a dose/ growth sukkiamna lampi om diak leh kilawm sa ing. Huai cih cia'n designation, viz. Reverend, Pastors, Elders, Evangelist, etc gen ka hi tuankei a, Thutak (A tung in Thu a om...) leh huai Thu phattuampih ngiatsa mimalte (tua sung ah Evan. Elders, Pastors, Reverend etc zong tel kha diing) gen i hizaw hi.

3. "No God, no Peace. Know God, know Peace" cih khat om hi. Sehnel gam ah gari hektu khat a gari hongmit in khawl hi. Hih theih tawp asuah hang'n, a gari pan hing thei nawnlou, beidong kisa in kuiku ngiau..! Pasal khat gari dang in hongtai, a haksatna na gen. Tua pasal pa'n, sawt khoihlou hial - gari hon pat leh hing mawk! "Nang kua na peuhmah a?" "Kei maw, Ford company neipa/bawlpa". Ford gari bawlkhepa in a gari bawl theisuak mahmah lel hi. Mihingte zong hongsiamtu Pa'n hong theisuah banga hong theisuak dang mi kuamah omlou hi. Amah tawh / Amah ah mabang pan le'ng, "Is there anything too hard for the LORD?" dawnna tak i khangthakte hinkhua ah - a kisesa lak ah hi in, a kise lellel lak ah hi in, a kise thei dinmun a ding (dinmun dengdel) khangnoute lak ah hitaleh - i mu diing cih uphuai i sa hi. Ama'n ahon limsak gige ziak in. TOUPA HOIH HI.

  •  
  •  

#5#5 Tribalgirl » 2013-01-05 01:39

Lealyan Thomte in hon gelh khia a,kipah huai mah2. Hichibang khong kha awareness tampi i neih uh poimoh kasa. Victim tampi i om ding uh chihleng haih vual ahi kei a,hilele tunia huaite a dia thukhah nop ka neih chu,''You Are Not Alone'' chih ahi. Thil zumhuai leh minsiat huai chia i ngaihtuah sungteng uh, dik lou ahi chihleh a hih tu/hih lel2/maban ah te a di bang a le DIKLOU ahih na lang ngei lou ding ahih na ah, tuni in hichibang tuak i om leh, genkhiak a panpihna laak hunta. Panpih muh theihna neih bang le hun mah mah ta. Ahia, tuni in nang leh ken i hih theih sun2 chu,hichi bang mi te judge,et tuam,tuam koih,mu sia etc te neih louh a,mihing nang leh kei bang2 hithou uh ahi i chih theih hunta. I hope that someday, we can provide a safe haven for them... :-)

  •  
  •  

#4#4 tukkilh » 2012-12-30 10:07

hoih gelh mahmah chia..... INCEST, PAEDOPHILISM, HOMOSEXUALITY etc etc te khah eilak ah le ommahmah din ka gingta, hong kilangkhe mengmeng lou le hithei. Banah, CONSENSUAL le hihetlou maitheilai, a victim pen in lungsimlam, ngaihtuahna lam a nakpi tak a thuak le hithei, traumatic mahmah bang le hithei.Hichiban g thuak bang i omzenzen leh... PANPIH theiding OM (le), OM (hunta). Thukholai theih thoh mai in mahni lungsim ngaihtuahna ah decision khat la in Vai ana hawmkhum in siam/siamlouh ana tan a koihdan khat/etdan khat a et maimai hun hinawnlou... a thuak a om leh PROACTIVE tak apanpihding. Huaidia kalsuan masa ULyan in Arti-cool mahmah non gelh a kana kipahpih petmah. Banah, Approach theih nahi chi na hon taklang a kipahhuaidiak. Mihing khat lekhat kipanpihtuah di mah hi hang. Siamna, Pilna i neihziak hiselou, "a shoulder to Cry on" chihdan maimai bang le a huntak a dia nakpoimohlua/ph atuamlua hikhathei mawle Traumatic Experiences tuakkha te a dia..... huaisa thuukzaw~ dan le dun, khalam, lungsim ngaihtuahna lam ah le a na counsel thei om di hi ve hang aw maw????

  •  
  •  

#3#3 aihnake » 2012-12-30 01:57

I like the conclusion sentence. Me too

  •  
  •  

#2#2 Lyan Thomte » 2012-12-29 21:01

liked the attitude..STS !!!

  •  
  •  

#1#1 STS » 2012-12-29 20:43

Hoih mahmah ei. Mitampi ading in mit vaksaktu hong hileh ka chi petmah hi. "...Lealyan Thawmte nang hon panpih dia mansa kahi aw".
Kei le mansa kahi aw.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING