UPDATES:

August 31, 2015 leh a thunung: Lametna vak muh di a om diam?

AUGUST 31, 2015 LEH A THUNUNG: LAMETNA VAK MUH DI A OM DIAM?
By Kimbawi' Pa

kimboipa

August 31, 2015 ahi a, huai ni in Manipur Legislative Assembly ah Bill zakdahhuai 3 a ki-passed hi. A min le ka luak a suak a, gen ngai in le ka koih kei hi. Huchi'n singtang mite' lungtang ling bang a sun in, a diak in Lamka khawpi ah thangpaihna nasa tak a piang a, huai ni a kipan a hiai Bill 3-te' ziak a misi 9 i neih loh uhi. MLA leh Minister, chihte' in kihal le ka lunglutna ahi kei a, ka gelh a ngai kei. A tung a ka thugelhte le ka lunglutna ahi kei a, thumapi omlou a gelh hial kilawmlou ka sak ziak a k'on gelh himhim ahi.

A patna omlou a maban sutzop theihlouh ahi a, tua k'ong kipatna ziak ahihleh a tung a ka taklat a kipan a singtang mite' lak a JAC hong kibawlkhia leh Manipur sorkal hong kipatna ziak a 'HIAMKHAM' singpi leh gan gohna hong om ziak ahi. Ei khristiante' laibu siangthou ah leh 'sisan suak lou a ngaihdamna omlou' chih i ginna uh ahi. I pi-pute uh khristian ahi kei na ua huai mah a na zui uhi. 'Gan sisan' chilou in hausa inpi a mohpaih a om pen 'sasat', huai tuh 'sa goh' ahi thouthou, huai a liau sak zel uh. Huchi'n 'zawl thu' hiam, 'khutkhelh thu' hiam ah kilemna zubel bul ah a gen veng uhi. Tua Manipur solkal in a hon heldan (approach) uh toh kibang in i pom d'uam ka ngaihdan a nuai ah k'on taklang zek dia, eite kingaihtuah dia hoih ka sakte k'on taklang zek di.

'Zawl thu' hiam 'khutkhelh thu' hiam a singpi leh gangoh a thupha tawi dia kuante a indongta a om thei teng toh a kuan sek uh. Tua Manipur solkal a dongta hong kuante' lak ah danbawltu (legislature) khat le a om kei ua, a sikha ngen uh a hon sawl uhi. Pu-pa ngeinadan hileh a thusapi Governor bang a hong hoh di ahi. A hong hoh kei hial lele Chief Minister sik a Minister hiam, Speaker hiam bek a hong hoh di ahi. 'Zawl thu' hileh ngaihdan khat ka nei, hilele luang kikham hiaizah a om nung a indongta khat le kuan lou a, a sikhate (servants) hon sawl uh ngaihsiam haksa ka sa sim hi. Himahleh mipite'n JAC i neih un a pom leh hiai ka thugelh a kipan kuamah in hehna di'n ngai kei un. Kei le a heh ka hi kei.

A hihleh ei lam ki-en ni. Hiai 'HIAMKHAM' bawlni ka thei na a ka gen kei di. Manipur solkal in a siahlohte uh toh i JAC-te a kihou ni uh ahi. Facebook ah ka sim a 'Angels' Vision' News ah ka en hi. 'Angels' Vision' a ka etna ah huai lemna ni a thugen H. Mangchinkhup' thugen kia a hong suak hi. Mi dangte' thugen zak di omlou in thupuangtu in a gensak hi. Huai a H. Mangchinkhup in a thugen ah 'stakeholder pin UNC, ANSAM, KSO, HSA, etc.etc' toh consultative meeting neih a, huai a kipan a dialogue kipat di, chih a gen hi. A dik, stakeholder pihte toh kithuzak mah di ahi a, consultative neih a, kuamah kitaisan lou a pankhawm di ahi.

Huchi'n tua i buaina uh a hong kipan a, Mr. Ibobi in le 'Press Communique' a hon suah a, Bill 3 ki-pass-te a lungkimlou na om uleh a point hon taklang un, amendment bawl ngai a omleh huai dia mansa ka hi, chih FB a ki-post ka comment na a 'singtangmi advocate i neihte uh samkhawm un la dawnna pia un' chi'n ka comment a, a ngaihsak a om kei uhi. Tuni tan in huai, kei chihdan in 'The Three Infamouse Bills' a selkalh tu di singtang mite' lak a omlou i bang uhi. Huai ahihleh bangziak a thangpai a luang hiai zah vui di nei? Thangpaihna a tok thoutu' moh ahi kei dia hia? Huai kua e?

Ibobi in huai bang a thusuah bawl a, a dawng di omlou, haihuai ka sa mahmah hi.

'HIAMKHAM' ahih ngal leh k'on gen lai di. Kei khanglang hiai gen dia chitna nei hi kei mahleng a hon sun/vut mahmah a gennop ka nei hi. I lak ua heutu a i neihte uh sum a lei a baihlam mahmah ua, huai poi ka sa hi. Tua JAC makaite' maban di ka gen ngam kei, a hong bing tawp di ka lau mahmah hi. Unau Kukite'n sadar Hills district a demand ua, sih tanpha a, muh mateng an-ngawl di, achi ua, a heutute uh Ibobi in a sam a, sum bangzah pia ahia, ka thei kei, a heutute uh 'moral ground' in a kitawp vek uh.

Sum hia? Gam? Mihing?

Tua 'HIAMKHAM' sung a consultative om dite ah singtangmi advocate-te leh i lak ua philosopher leh scholar-te uh na consult kei uleh a lohsam di ihi uh. Dot dite dot a, a thu uh lak di. JAC memberte'n a hihna uh political career a advantage dia a lak louh di uh, mipi a dia a sep di uh ka deih ahi.

Khanglang na hon chi maithei uh, solkal a sepna nei khat ka hi a, sum delh in ka hai nai tadih kei.

'THE TEST OF LEADERSHIP IS TO LEAD; AND TO LEAD VIGOROSLY' John F. Kenedy.

COMMENT (1) PHA TA..  
  •  
  •  

#1#1 Kamkei » 2015-11-11 16:09

" A bill a point deih leh deihlouh tuam bang mah om kei a; Singtangmite leh Singtang gam adia zat louh di" chih ahi ka deih uh.......... chi in Ibobi dawnna piak a hoih diam? Hill Areas Committee le ki involve lou ahih bok hnen!!!"

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING