UPDATES:

S5 Box

ZOGAM.COM Login

Kum thak leh hanciamna

KUM THAK LEH HANCIAMNA
(Paunak 3:1-12)
-Rev. Dr. J.M. Ngul Khan Pau

jmpaupu

Neu lai-in Khristmas leh Kum Thak hong tun ding kingaklah mahmah in hong tung hak kisa mahmah hi. I leitung kum hong tam pian leh hong tun nawh kisa leuleu hi. Topa Pasian in Ama hehpihna tawh kum khat sung zong tomsa mahmahin hong zangsak hi cih ken ka ngaihsut ciangin lungdamna tawh ka kidim hi. David Kham cih bangin, "Lungdam luankhite'n nang hong phat zel," kei zong hong cisak hi. I kum hong tam semsem sepnop a tam semsem hangin cidamna leh kal kicin zawhlohna tawh kidim leuleu in ki-om hi. Neu lai-in hun tampi i neih hangin sep ding tua zah in tam kinei khollo hi. I khangham ciangin sep ding hong tam mahmah a, hun zeek hong haksa mahmah hi.

Kum Thak leh Hanciamna cih tutung in i thalaknading leh kum khat sung hong makaih ding deihna tawh kong gelh hi. Paunak sungah kumpi Solomon in pilna tawh kisai limgelh mahmah hi. Nisim nuntakna ah lawhcinna, daupaina a deihte'n hih hih laibu nisimin sim leng i lampi hong tangsak ding hi. Dr. Ben Wati in, "Late sungin Topa tawh bangci kizop ding leh thunget ding dan hong theisak a, Paunak in mite tawh bangci kizop ding cih hong theisak hi," na ci hi. Nang zong Topa lamlahna a zui na hih leh haksatna a om hangin na phulsuak zo ding hi. Tua bek hi loin matutzawhna hong pia ding hi. Bang hang hiam cih leh Topa in ama thu a zui mite tungah thupha pia loin om lo hi. I zuih ding leh i hanciam ding nam gukte hih a nuai-a bang ahi hi.

1. Topa thuhilhna ka mang ding hi (Aneu 1-2): Kumpi Solomon in a tate a thuhilhna ah kong thuhilhte mangngilh kei unla, ka thugente mang un, na ci hi. Tua bangin thuhilhna a zuih uh leh khansauna, lungnopna leh daupaina ngah ding ci hi. Topa thuhilhna zui kei leng khansihna, dahna leh lawhsapna tawh kinungta ding cihna hi. Tuni in Topa thu a sim bek hi loin ama thuhilhna bangin a zui nuam hih ding hanciam in. C.T. Studd tangthu ah: zan khat ihmu loin Lai Siangtho simin tusuak hi. A zi in, "Bang ci na Lai Siangtho bu na ban-phen keei a, a cih leh, a ma'n, 'Pasian in hong sawl thuhilhna ka zuih loh a om hiam cih a zong ka hi hi," ci hi. Topa hong thuhilhna lei-ah kiasak loin a zuipah dingin hanciam in.

Pasian thumanna in thupha ngahna hi cih i Lai Siangtho sungah i mu hi. Thuman lohna zong samsiatna tawh kizui hi. Abraham tawh kisai ama thumanna hangin thupha ngah ding cih hih bangin na kiciamteh hi. "Na suan-leh-khakte thupha ka piak bangin leitung minam khempeuhte in thupha a ngah nadingun hong ngen ding hi. Bang hang hiam cih leh nang in ka thu na mang hi," (Pian 22:18). Thumanna in galzawhna pia hi. "Ahih hangin note in ama aw limtakin ngai in keima gen bangin na gamtat uh leh na galte uh tungah gal ka hi ding a, na langte uh tungah lang ka hi ding hi," (Pai 23:22). Khansauna leh gamsung nuntakna kip nadingin zong thumanna kisam hi. "Tua ahih ciangin note leh note' khit a na tate uh tungah thu hong nuamin, Topa na Pasian un a tawntung a hong piak gamsungah na khan uh na sausak theih nadingun tuni-a no kiangah kong gen ahi ama thukhamte leh thupiakte na zui ding uh hi," (Thuhilh 4:40).

Thumanna in meihal biakpiakna sangin manphazaw hi. "Topa in meihal biaknate leh biakpiaknate Topa' thuman' ding zah in deih ahi hiam? En in biakpiakna sangin thuman ding hoihzaw a, tuutal thaute sangin thungaih ding hoihzaw hi," (I Sam 15:22). Kumpi Uzziah zong ama daupaina leh lawhcinna thusimin a thumanna hi. "Pasian zaqhtak ding ama tungah a hilh Zekhariah hun sungteng amah in Pasian zong hi. Amah in Topa a zon laiteng Pasian in amah daupaisak hi," (II Khang 26:5).

2. Topa Pasian ka it ding hi (Aneu 3-4): Topa in thupha hong piak manin amah it i hih leh tua itna pen hong huh man hi a, itna siang hilo hi. Naupang no khat in, "Ka pa it mahmah ing bang hang hiam cih leh sum ka kisap simin hong pia hi," ci hi. Sum leh pai, inn leh lo hong piak manin itna pen eimah kikhualzaw itna hi a, hong piapa itna taktak hilo hi. Tulai i nuntakzia tawh zong kituak kasa hi. Nuntakna nuamzaw thupha delh in gamdang i tung uh hi. Tuate i ngah ciangin a thupha bekbek buaipih in hong piapa kimangngilh baih mahmah hi. Tham loin thupha khawng i ngah ciangin ngahtaak i kisak zong kiphatsakna hi a, Topa Pasian mai-ah zakdahhuai mahmah ding hi. Topa a it mite thumanna leh cihtakna tawh gamta uh a, amau nisim nuntakna ah tuate mangngilh lo uh hi. Tuate amau nisimin nuntakpih uh hi.

3. Topa Pasian ka muang ding hi (Aneu 5-6): Kumpi Solomon in lungsim khempeuh tawh Topa muang ding leh nangma theihna ah kinga ke'n na cihi. Lai Siangtho siamte'n hih bangin na gen uh hi. Solomon kumpipa a cing galkapte ama zumpi mai-ah ding uh hi. Amau khut ah teipi tawi-in ding uh a, nai khat val bang tang loin a din zawh uh ciangin gimpian uh ahih manin teipi tungah kingai kawm uh hi. A sawtna ciangin a teipi zong koi thei hi, ci uh hi. Tua a muh ciangin kumpi Solomon in nangma "teipi" tungah kinga kei inla, Topa tungah kingazaw in ci hi. Mai kum sungah gelna na neihte zong Topa huhna leh gualzawhpihna loin bangmah piang lo ding hi. Solomon mah in, "Mite in bangbang a geel zongin Topa' deihna bang bekin a piang ding hizaw hi," na ci hi (Pau 16:1).

Amah a muangte Topa in a lampi uh tangsak ding ci hi. Israelte zong a lungsim uh muanhuai hileh Egypt panin Canaan gam ni li bek paina lampi hi. Ahi zongin amau muanhuai loh manin kum sawmli sawt hi. Laibu gelhpa in, "Topa Pasian in Israel mite Egypt panin a lakkhiat ding zan khat bek kisam a, ahih hangin Egypt lungsim amau panin a lakkhiat nadingin kum sawmli sung sawt hi," ci hi. Egypt lungsim a pua kuamah Canaan gam lut lo uh a, lampi ah bah khinsak in Egypt mitkha tawh a bawl thei nawnlo khangthak, khangsawnte bek gamciam tungsak hi. Na lampi a tangsak ding leh matutna hong pia ding Topa muang in, amah muantak hi.

4. Topa Pasian ka lau ding hi (Aneu 7-8):Nangmah a pilin kingaihsun tawm kei inla, Topa lauhna hangin a sia peel in. Tua hileh nang adingin damna zatui tawh kibang ding a, na natnate hong damask in, na guhte adingin zong damna hi ding hi, cih i mu hi. Mikang pau ah fear cih pen zahtak ci-in kilet hi. Hih pen a siangtho lauhna, zahtakna hi. Topa tua bangin a zahtakte'n siatna peel hamtang uh hi. Tua bek hi loin, Topa lauhna pen pilna bulpi hi a, lungnopna bulpi hi (Pau 1:7). Israel mite'n zong Topa lauhna hangin siatna a pelh laiteng uh thupha sang uh a, ahih hangin Topa' lauhna hong neih nawn loh uh ciangin siatna namkim tuak uh hi.

America zong thukham sawmte paikhia-in Khristian gimnam peuhpeuh deih lohna tawh hong gamtat ciangin khuamialna a zuan gam hong suak hi. Kum zathum sung khawng pilna leh khantohna tawh a nungta gam ahih manin a kiam lam kimupah lo kha ding hi. Ahi zongin siatna kipahtawi-in hoihna kideih lo gam hong himawk hi. Topa a lau mitein numei leh pasal kikal vaite ah kikem a, gamtat siangtho tawh nungta uh hi. Tua bang gamtat hoihna in mihing nuntakna manphasak a, innkuan kipsak hi. Rom gam hong kiam ding ciangin numei leh pasal kikalah kikepna cih bang om loin amau ut bangin hong gamta uh hi. Mi a tamzaw in 'hoih hi' a cih man bekin gamtat hoih suak tuan lo hi.

Hitler in Galpi Nihna laiin Judah mite a thah ziahziah pen mipi in 'hoihsa' himawk hi. Tua bang gamtat pen a hoih hituanlo hi. Tua hi a, tuni a hoih a kisa - pasal leh pasal kikholhna, numei leh numei kikholhnate zong bangzahta in a hoihlam in i gen hangin 'hoih' kici thei lo hi. America Supreme Court in phalna a piak hangin hih gamtatna pen 'hoih hi' cihnading om hi tuan lo hi. Tulaitak-a abortion (naukiatsakna) zong tualthahna hi a, bangzah in a hoih lamin i gen zongin 'hoih' ngei lo ding hi. Topa lauhna hangin gamtat siangtho neih ding thupi penpen hi.

5. Topa Pasian ka neihsa tawh ka zahtak ding hi (Aneu 9-10):Na neihsa na anpalte tawh Topa zahtak in. Tua hi leh na ansalte an tawh hong dimlet ding a, bel dimletin lenggahzu na nei ding hi. Hi lai a zahtakcih kammal pen honourhi. Topa Pasian neih leh lam hong piapa ahih manin ama tungah lungdamkohna in piakkik ding thu ahi hi. Neih leh lam piakna tawh Topa biakpiakna pia leng ama tung panin thupha hong pai ding hi cihi Lai Siangtho in na gen khinzo hi. Na ansalte hong dim ding a, na koihna belte hong dimlet ding hi, cih thuciam om hi. Bang hangin pia ding ihi hiam cih leh na neihsa khempeuh ama tung panin na ngah ahih manin lungdam kohna in piak ding ahi hi. Hauh nopna, sumbawlna bangin a meet ding lametna tawh piak ding hi masa lo a, lungdamna kohna ahih manin phal takin piak ding ahi hi. Tu kum thak sungin piakna lamah kalsuan ning na ci hiam? Na piakna na behlap sawm hiam?

Rick Warren in piakkhiatna tawh kisai-in thu li ngaihsutna hih bangin na gen hi. (i) Thupha i ngahte midangte tungah luansak ding hi (Pian 12:3). Thupha i ngah ciangin ei tung bekah ah om suak ding i ngaihsut leh sawt hong om lo ding hi. Ahi zongin midangte thupha piaknadingin Topa in mi a muan ding zong hi. Tua dingin nang hong zang nuam ahih leh phal takin zeek in, lungdam takin piakhia ziahziah in. (ii) Midangte tungah thupha i hih leh Topa in ei kisapna khempeuh hong vaihawmsak ding hi. Mite adingin thupha i hih kei leh eima neihsa zong a sawt loin hong bei lel ding hi. (iii) Midangte tungah thupha i bawlte eima tungah hong kileh kik ding hi (Luke 6:36). (iv) Thupha tamsem i ngah leh a tamsem pia dingin hong kilamen hi (Luka 12:48).
6. Topa Pasian hong ukna leh taina ka thudon ding hi (Aneu 11-12): Topa in ta taktak bangin hong bawl leh na hoihnadingin hong tai-in hong thuhilh (discipline) ding hi. Na pianthak ni a kipanin Topa' sanginn (school) ah a kah na hi hi. Sangnaupang hoih om a, sangnaupang hoih lo zong om hi. Na sih madong tua sanginn ah a kah na hi a, haksatna na tuah ciangin Topa in lesson laisim haksazaw hong pia cihna hi. Job zong ama tuahkhakte Topa' khut sung panin hong pai thute hi a, haksa sa mahmah hi. Ahi zongin Topa tungah khasiatna nei loin kipngitnget ahih manin a tawpna ah laizawhna graduation thupi mahmah Pasian tung panin ngah hi.

Hebrew 12:5-11 sung i et ciangin Topa thuhilhna discipline thu limtakin kigen hi. Topa thuhilhna a thuakzote' tungah lungdamna lianpi piak ding kamciam om hi. Topa in a it mite a it manin tai a, a tai mite mi nuamsa hi; tua bang thuhilhna thupi in ngaihsut ding hi, ci hi (Job 5:17, Mang 3:19). Topa in ama thukham a hilh leh a taihilhna a ngah mite mi nuamsa ahi uh hi (Late 94:12). Topa in thupha hong pia hen. //

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING