UPDATES:

S5 Box

ZOGAM.COM Login

I Biak Pasian

I BIAK PASIAN (Matt 6:6-34)
- Rev. Dr. J.M. Ngul Khan Pau, Columnist Zogam.com

jmpaupu

Yangon panin Kalemyo lam zuanin April 21, 2015 ni-in ka lengto hi. Vanleng sungah Lai Siangtho ka sim, ka lungngaih dide lai-in Topa Pasian in Ama thu zangin hong hopih hi. Bang hang hiam cih leh, “Topa aw, na thumaan hi cih ka thei a, ka up loh hangin tangtung veve ding hi. Tua hangin na thu panin nong hilh nopte mu thei dingin ka mit hong honsak in,” ka ci hi. Ka simsim ngeina ahih hangin Topa in kei hong tel mahmah ahihna leh hong naih mahmah ahih lam ka muh nadingin Ama thu panin hong hopih hi.
 
Philip Yancey in The Jesus I Never Knew sunga a gelh bangin, Topa pen a thu in kithei a, ahih hangin amah tawh kikholhna taktak i tawm neih manin kha lamah kikeu hi. Topa ahihna bangin theician leng - bang zahtakin nuam ding hiam cih na ngaihsun ngei hiam? Leitung in hong zo khin zo lua ahih manin i lungsimah 'Pasian aw' kiza thei nawn loin, 'leitung aw' bekbek kiza ahih manin tua aw in hong uk hi. Na Khristian nuntakna ki-enpha lecin na lung a kim hiam? Midangte adingin thupha hi dingin Pasian in hong deih lai-in nang nuntakpih thukhun nei loin na om hiam?

Tunai in tangval khat in, “Pa Pau, ka sepna ah sum leh pai tam mahmah, tua bek lunggulh a kisem hileh lungkim takin sepmai ding hi. Ahi zongin ka nuntakna manpha takin zang nuam ka hih manin leh kum 70 khawng kong ka phak ciangin ka nunlui etkik ni ka neih ciangin kisikna ka neih loh nadingin ka nungta nuam hi,” hong ci ngeungau hi. Mihing Pasian tawh kizom dinga hong kibawl ahih manin tua kizopna i neih kei leh hawm kisakna tawh i kidim ding hi. Topa na thei taktak maw? Amah tawh na kihozawh a sawt zo hiam? Tua na nuntakna na ki-et ciangin na lungkimtakpi maw?

Topa in Lai Siangtho panin Ama hihna taktak hong muhsak thu nam nga khawng kong gen nuam hi. I Pasian pen a nungta vaihawm leh tuni mahmah a zong hong kem Pasian hi. Tua ahih manin i phawk loh hangin Ama’n hong kem gige na hi hi. Tua nam gukte in:

1. Pasian in mu hi: Topa Jesu in midangte huhna i piak ciangin mite muh theih dingin hih kei unla, kuama muh loh a na gamtatna uh a mu Pasian in note tungah thaman hong pia ding hi (Aneu 6). Tua mah bangin thungetna i neih ciangin mite muh dingin lampi kiang khawngah ngen loin kuama muh loh a i gamtatna a hong mu Pasian kiangah nget ding na ci hi (Aneu 6). Anntanna i neih ciangin mite muh ding ngaihsun loin kuama theih loh a hong mu Pasian tawh kizopna-a neih ding hi (Aneu 18). I gamtatna khempeuh hong mu Pasian ahih manin nisim i kampau, i gamtat kikep ding leh Topa Pasian in hong mu gige ahih lam phawk kawmin i gamtat ding thupi mahmah hi.
Hagar in Ishmael a paai zawh ciangin Sarah bawlsiatna hangin Hagar zong Abraham innsung panin hong taikhia hi. Gamkeu lakah tui nei nawn lo cimawhin a om laitakin Pasian vantungmi in na hopih hi. Abraham inn ah ciahkik dingin sawlna a ngah ciangin, Hagar in Topa Pasian min dingin Beer Lahai Roi “Topa pen, a mu thei Pasian na hi hi,” ci hi (Pian. 16:13). Hagar mah bangin na dawn ding tuithawl ah bangmah nei nawn loin na om lam zong hong mu Pasian hi. Tu mahmah in na pulak nop loh hangin na cihmawhnate a mu Pasian hi. Nang zong Hagar mah bangin “Kei a hong mu Pasian” na cithei nuam hiam?

2. Pasian in thei hi: Thungetna i neih ciangin thu-um lote bangin kam nainawng zang loin, thu tampi gen zong kisam lo hi. Ahangin Topa Pasian in na kisap uh na ngetma nangawnun thei khin zo hi (Aneu 8, 32). I kisapna hong mu bek hi loin hong theikhin Pasian i neih manin bangzahin i hampha hiam? I nget ding ei lam panin i mawhpuakna hi a, ama theih loh om lo hi. Pasian in hong thei mahmah ahih lam Late 139 sungah a kicingtakin i mu hi. Kam tawh i gen khiatma in i gen ding thute thei khin hi. Tua bangin hong thei ahih leh bang hangin thunget zong kisam ding hiam na cikha thei ding hi. Na tate adingin na neih leh lam khempeuh na phalsa ahi hi. Ahi zongin hong nget ding uh na lamen hi. Tua bek hi loin, hong ngetna bangin na piak ciangin “lungdam” hong cih ding uh zong na lamen hi.

Pasian in hong thei lua ahih manin ama kiang panin a taikhiat sawm peuhpeuh amau leh amau kigim bawl uh ahi hi. Zi leh tate’ kiangah panin amau theih loh ding nuntakna  zang papi tampi om kha ding hi. Ahi zongin Topa in nang leh nang na kitheih sangin hong theizaw lai hi. Ama kiang panin bukna ding Singlamteh cih loh om lo hi. Singlamteh a beel mite Pasian tawh kikalah patauhna nei nawn lote ahi uh hi.

3. Pasian in za hi: Nungzuite’n Topa kiangah nget khat bekbek nei uh a, “thungetzia” ding hong hilh in na ci uh hi. Bang hangin thungetzia ding na hilh hiam cih leh i Pasian in a “za thei” Pasian ahi hi (Aneu 9-13). Mi pawlkhatte in hih Topa thungetna, nungzuite’ zat ding bek in Jesu in a hilh hi, ci uh hi. Ken bel Topa in ken zong ka zat dingin hong piak thungetna hi ci-in ka sang hi. Topa Pasian a bilngawng lo ahih manin i ngetnate na za hi. Bil nei napi-in a za thei lo Pasian hi loin, na kikona aw malngat penpen zong a za, kam tawh na genkhiat loh na lunggulhna nangawn a za Pasian hi. Na ngaihsutna “phawkna” (conscious mind) leh “phawk milmelna” (sub-conscious mind) nangawn Ama’n telkhin hi.

Bil bawlpa in khuaza lo ding hiam? Kam leh lei bawlpa in a pusuak thute tel lo ding ahi hiam? A za thei Pasian ahih manin ka nget khempeuh hong dawn pahpah loh hangin hong za cih ka theih lungkimhuai hi. Suang leh sing bia hi leng hong zak ding ki-um ngei lo ding a, ngaih semsem in ka kiko hang zong hong dawng tuam tuanlo ding hi. Topa Pasian in na aw hong za bek hi loin na nget simin a bil hong dawh hi. Tua bang Topa na neih hampha na kisa hiam?

4. Pasian in vak hi: Mihing khempeuh, a zawng a hau in nisim i buaipih mahmah khat pen nek leh tak hi. Topa Pasian in nek leh tak nangawn zong na lunghimawh kei un, bang hang hiam cih leh van a vasate in nisimin ann zong tawm uh a, a bawlpa Pasian in annvak tawntung hi, ci hi (Aneu 25-27). Tua vasate sangin a manphazaw amah lim leh mel sun-a hong bawl mihingte hong kem ding, hon van ding ahihna i mu thei hi. Hong vak ding ahih manin bangmah sem lo ding cihna hi lo hi. Ahi zongin nek leh tak ding i buaipih laitakin hong bawlpa in zong hong pia ding cih hong ciamsa mangngilh lo ding hi hang.

Lai Siangtho sungah Topa Pasian in ann a vak mi tampite sung panin Israel minamte kum sawmli tawntung manna tawh na vak hi. Minam khat gilkial in sehnel gam ah annek hun ding kipelh loin a vak Pasian hi. Elijah zong Kerith luigei ah kibu dingin Topa in sawl a, “zing leh nitak simin sa minsa va-akte’n puak hi” (1 Kum 17:2-4). Va-ak in amau muk ah sa minsa zing leh nitak in puak ziahziah hi. Amau sa minsa cih thadah a uih nangawn a duh vasate hi. Tua bang vasate’n kamsangpa ann puak ahih uh leh nang zong Topa cihna munah om peuh leteh na tasam kei ding hi.

5. Pasian in kem hi: Unok pakte kuama muh loh in amau pona munah na pak zihziah uh hi. Topa in tua pakte kumpi Solomon in a kumpi puan tawh a kizep ciangin tua pak khat nangawn dem zo lo hi na ci hi (Aneu 28-30). Silh leh ten mihingte’n i lunghimawh ciat uh hi. A zawng a hau in silh ding i lunghimawh ciat uh hi. A hoih silh zo a om bangin puan gina nei zo lo leitungah tam mahmah hi. Topa in hong kempa, hong khualpa ahih lam i phawk ding deih hi. Hong kem leh hong khual hibang Pasian  nei ihih manin bangzahin hampha i hi hiam? Upna neu manin amah muang loin i gamtat hangin amah muanhuai loh hun nei ngei lo hi. Pasian in a bawlnate a kepzia i et ciangin lamdang i sa uh hi. Leitung mipilte’n, "hong piangtawm lel hi uh a, a bawl om lo hi," a cih uh hangin a kibawl nate i et ciangin a bawlpa, a geelpa om hi cih kimu thei hi.

6. Pasian in pia hi: Topa Jesu in, "Pasian gam leh ama dikna zong masa un, tua hileh na kisap uh adang nate zong hong piathuah ding hi,” na ci hi (Aneu 31-34). Lunghihmawhna tawh a kidim leitung mite adingin a dam nading thusim hih laiah hong hilh hi. Topa mah nambat khatna in koih photphot leng a dang kisapte hong pia lua mahmah ding hi. Ama’n hong pia tawntung a, a manpha bel a tapa Jesu Khris hong pia hi. Vantung gam Amah a um mite kiangah hong piakhin zo hi. Jesu sungah kisel khalam hamphatna thuphate zong hong pia hi. A tomin gen ni cileng, Pasian in hong piapa’ hi tawntung hi. Tuni mahmah in hih thu sim a thei dingin khuamuhna hong pia Amah hipah hi. Na muh theih singkung leh lopa, mual leh guamte ama bawl vive hi a, nang leh kei zat dingin hong pia hi. Tua ahih manin i Pasian in bangzah in hong it, hong khual Pasian ahi hiam? Phat dingin a kilawm tawntung Pasian ahi hi.

Thukhupna: Tuzing a ka laibu simna ah, innkuan khat in a pa uh khualzin tung dingin na ngak uh a, ahi zongin tung zo lo ahih manin a zi leh tate dah mai tawh lum uh hi. A zing ciang Zingsang Kiallap a nek laitakun a pa uh inndei tungnung panin hong kumsuk a, lamdang sa uh hi. Dahna mai khempeuh nuihna leh kipahna in dim hi. A pa uh zankim zawh ciangin na tung a, amau kuamah in a phawk loh dingun inndei tungnungah na giak hi. Tung khin napi’n amau a theih loh manun zingsang kiallap dong dahna tawh na kidim uh hi. Tua mah bangin Topa Pasian tel semsem leng, i dahna leh lungdam lohnate’ hong bei ding hi. Amah na muh loh hangin ama’n nang hong mu a, nang kiangah a om gige na hizaw hi. Ama aw na zak loh hangin nang aw za zo hi. Na deihte hi loin na kisapte ama’n hong pia dingin hong ciam zo hi. Hih bang Pasian ka neih hampha kisa ing.

Nang bang om lo hi
Nang bangin ka lungsim sukha om kei
A tawntung tawntung in ka zonzon hang mu ke’ng
Nang bang om lo hi.


*****

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING