UPDATES:

S5 Box

ZOGAM.COM Login

LEITUNG MIHING NAM THUM

LEITUNG MIHING NAM THUM
(I Korin 2:14-3:1)
- Rev.Dr. J.M. Ngul Khan Pau

jmpaupu

Zig Ziglar in a laibu You Can Reach The Top a cihsungah mihing lungsim puakzia (attitude) nam nga om hi ci-in na gelh hi. Tuanam ngate khat khit khat na en ni. Khatna, amah leh amah a ki-etzia (self-esteem) ci hi. Hih pen nang leh nang na ki-etzia leh ki-sa’nzia, manpha na kisakna leh mantawm na kisakna thu hi. Nihna, itna leh itzia tawh kisai thu hi (attitude oflove). Midangte i muhzia leh itzia tawh kisai hi a, hih in zong i lungsim puakzia hong kimusak hi. Thumna, upna tawh kisai lungpuakzia (attitude offaith).Pasian na upna in midang na etzia hong kilamdangsak hi. Lina,lametna tawh kisai lungpuakzia (attitude of hope). Hih in mailam i etzia tawh kisai hi. Lametna tawh nungta mite’ lungsim puakzia leh lametna nei lote kikal kigamla mahmah hi. Ngana, midangte maisakna tawh kisai lungpuakzia (attitude of forgiveness). Hih i gen ciangin a beisa hunte tawh kisai hi. Midangte’n nang tungah bang hiam hong cih manin tuni in vangik na puak hiam? Na maisak a tam leh na mailam a veng ding hi. Na maisak a tawm leh nang leh nang vangik a kiguan nahi hi. Mite mawhna maisak lecin na vanpuak hong kiam ding hi.

I Lai Siangtho simna mun i et ciangin sawltak Paul in mihing nam thum na gen hi. Hih nam thum sungah mihing i hih leh kihelloh a pelmawh hi.

I. LEITUNG MI(I Korin 2:14)
‘Leitung mi’ i cih ciangin i pianpih mihinna, Pasian thu tawh a nungta lo, leitung mihing ngeina bangin nungta cihna hi. Hih bang mite sungah mihing ngeina bangin mi hoih mahmah zong om a, mi sia mahmah zong om hi. Amau hoihna leh siatna tawh kisai loin amau sungah Pasian Kha Siangtho a ten ngei loh manin leitung mi kici hi. Hih bang leitung mi i cihte Lai Siangtho in hih bangin na gen hi.

•    Amah siatna lam manawh mi hi: Leitung mi in mawhna lamnaih leh tua lampi
tot ding mansa in om tawntung hi. Tua hi a, mawhna bawl pen ama adingin a haksa hi loin a pianpih lungsim puakzia tua mah hipah hi (Late 58:3, Isaiah 48:8, John 8:44, Efesa 2:3).

•    Amah siatna lamah kikai, ki-uk hi (Efesa 2:1-13): Mawhna in sila bangin a
talkaih, amau deihtelna zong nei thei nawn lo mi tampi om uh hi. Mawhna nangawn bawl zo nawn lo zah dawngin cimtaak napi’n ahih hangin nusia thei loin mawhna in kai koikoi hi. Hi bang mite mawhna sungah saltang bangin om uh a, Pasian sangin a teelzawk uh mawhna in gakcip hi.

•    Amah khuamial sungah om hi (II Kor. 4:4, 1:18): Dawimangpa in mit mialna
pia in sihna khukpi lam zuan veve mi tampi om hi. Mawhna a kihhuaizia zong mu loin mawhna hangin a tate tungahgimna tung nangawn mu thei lo papi tampi om hi. Innsung mial tampite hangin gamsung siatna piangsak khangnote khalam khuamuhna nei loin hong khangkhia uh hi. Nu leh pa khalam a mitmialna hangin a tate uh khuavak lampi hilh thei lo bek hi loin hih leitung nuntakna ah zong lampi lak thei lo uh hi. Tua mialna pen mialna lian mahmah ahi hi.

•    Amah hell sunga dingin mawhpaihsa hi (Late 9:17): Sihna khukpi hell sunga
dingin mawhpaihsa mite ahi uh hi. A siangtho Pasian kiangah mawhna tawh kitung thei lo ding a, mawh maisak mite bek tung ding hi. Hell khuk sung tun nadingin mawhna tampi bawl ding kisam lo a, mawh maisak nadingin hong kipia Pasian Tapa Jesu sang loin ama siansakna nialna hi. Hell khuk sung na tun leh Pasian mawhna hi loin nangma mawhna hang hi ding hi. A dam nading Pasian in hong vaihawmsaksa om napi na thupi simloh man hi ding hi.

•    Amah kha thu-ah a sisa hi (Efesa 2:1): Mi tampi leitung nuntakna ah lawhcing
mahmah napi’n khalam lamah a si uh hi. Naga ulian khat tawh ka kihona ka phawk hi. “Leitung sum leh pai tampi ka neih hangin bang hangin lungkim thei lo ka hi hiam?” hong ci hi. “Lungsim bawlpa’ om lohna pumpi ah lungkimna om thei lo hi” cih ama kiangah ka genpih hi. Khalam thu-ah a sisa, Pasian tawh kizopna nei lo mite pumpi ah a nuntak lai hangin a sisa na hi gige uh hi.

II. KHA SIANGTHO NEI MI(I Korin 2:15-16)
•    Amah Kha Siangtho sungah nungta hi (John 16:13, Galati 5:16):
Topa Jesu, Gumpa leh Topa in i sa’n ciangin eite lungsim sungah Kha Siangtho hong teng hi (Gal. 4:6-7, Johan 1:12-13). Tua hangin lungdamna, mawhmaisak kitelna, midangte’ itna leh amau ading lunghihmawhna bang hong neisak hi. Tua bang lungdamna hangin laphuakte’n, “Vantungnopna ka lungsung hong dim hi,” cih ahi zongin, “Kikheel khin zota ing, ka pianthak ni a kipan,” ci-in amau lungdamna na gelh uh hi. Tua Kha Siangtho in thuman thutak a nungta dingin lunggulhna hong neisak a, nidangin zuau tawh a nungta mi zong tua nuntakna nusia dingin ngaihsutna pha hong neisak hi.
 
•    Ama’n Kha Siangtho tung panin sin (Job 23:12, Johan 14:16-17): Huhpa,
lamlakpa Kha Siangtho in eite sungah hong tentak ciangin eima deihna mihing lui leh Topa Kha makaihna hangin mihing thak eite sungah hong om hi. Tua hangin Pasian thu duhna leh deihna kinei hi. Kha Siangtho ka nei cici napi’n Pasian thu duhna leh deihna aneih kei leh Topa Kha Siangtho tawh tengkhawm lo hizaw ding hi. Naungek piangtung in a nu leh pa tung panin thu leh la a sin bangin Kha Siangtho tung panin sin ding tampi i nei hi. Nungzui masate’n leitung na lumlet zo uh cih thu i sim ciangin amau pilna leh siamna hang hi loin Topa Kha Siangtho vangliatna hang cih i thei hi. Tuni in i pulpitte panin Pasian vangliatna tawh thugen sangin leitung pilna tawh i gen tam manin i lungsimah ‘hoih mah ei’ cih tawh kiciah a, i nuntakna kilamdang tuan lo hi. Zaknop ding sangin nuntakpih ding thu i kisamzaw hi.

•    Amah Kha Siangtho hangin suakta (Rom 12:2, II Kor. 3:17): Topa Kha
Siangtho omna ah suahtakna om hi. Tua suahtakna pen ci leh sa deihna picinsakna dingin suahtakna hi loin Ama deihna picinsakna dingin suahtakna cih hizaw hi. Pumpi a suahtakna a om mah bangin kha leh lungsim ngaihsutna ah suahtakna om hi. Topa deihna bangin gamtat nopna bek hi nawn loin gamtat zawhna ding Topa Kha Siangtho in hong makaih hi. Mi a pianthak ciangin suahtakna nei hi cih i thei hi. Mawhna kolpi panin suakta ahih manin tua suahtakna mawhna bawlna zang lo ding hi. Na hoih, gamtat hoih bawlzawh nadingin suakta cihna hi. Tua hangin galte itna, hong bawlsiate maisak zawhna, midang itna cih khawng Kha Siangtho hang ahi hi. Midangte it ding leh maisak dingin suakta cihna hi a, na maisak zawh het kei leh tua suahtakna a zang khin zo lo na hi ding hi.

•    Amah Kha Siangtho tawh kidim (Efesa 5:18): Topa Kha Siangtho in hong
luah bek hi loin amah tawh kidim ihih ding i kisam hi. A hawm in kuamah kinungta thei lo hi. Mi vaksuk vakto na muh leh amau zong a luah a kem om cihna hi. Tua hangin ei sunga om bangin kigamta ciat hi. Nupite’n nau hong pai ciangun a duh ngei loh uh ann peuh theigah peuh hong duh bangin Kha Siangtho in mi a dim ciangin a duh leh deih hong tuam hi. Kha Siangtho tawh kidim mite amau leh amau dim a hih lam uh a kitheih sangin midangte’n na theizaw uh hi. Bang hang hiam cih leh vangliatna, itna leh na lamdang khawngte amau nuntakna panin hong piang hi. Amau pianpih hi lo, a luah Kha vangliatna hang hi.

III. CI LEH SA LUNGSIM NEI MI (I Korin 3:1)
•    Amah guallel nungta hi: Piangthak ahih hangin Khris in ama nuntakna ah
thu a nei nawn lote pen lungkimna nei lo uh hi. Pasian thu leh la ah zong lunglut nawn loin leitung vai-ah a kizat uh hangin zong lungkimna nei tuanlo uh hi. Hih bang mite Laodicea pawlpi bangin lum lah lum lo, vot lah vot lo cih bang nuntakna hi. Pasian thu sungah nuam a sak lai uh a ngaihsut uh ciangin lunglenna a neih uh hangin tua nuntakna sungah lut kik ding ngaihsun zo lo uh hi. Leitung vai-ah kizang in a nuam sa bangin a om uh hangin amau lungsim tawngah lungkimna nei lo uh hi. Tua hangin gualzo nuntakna tung thei mahmah lo uh hi. Guallel nuntakna tawh nisim zang uh a, mawhna neucik zong zawh ding ngaihsun zo lo uh hi. “Hong thahatsakpa Khris hangin na khempeuh ka hih thei hi,” cih khawng a thu in a theih uh hangin a taktak in zang thei lo uh hi. Pasian thu in amau nuntakna mun ngah zo lo ahih manin a vangliatna zong mu lo uh hi.

•    Amah Kha Siangtho huhna tawh gamta lo: Kha Siangtho in a luah hangin
ama ci leh sa deihna tawh a gamta, Topa tungah a vai ap loin a nungta mi ahi hi. Hih bang mite’n khalam vai tel thei loin zong lunglut lo uh hi. Ama ngaihsutna mah thupi sak, amau thukhensatna mah ah kinga, Pasian kiang panin huhna kisam kisa lote ahi uh hi. Tua hangin vai khempeuh amau sai-in amau lungpilna bek tawh kimakaih a, amau nungzuih lungkimhuai lo hi. Ahih hangin, amau leh amau kiphatphat in Topa tungah lungdamzia ding zong phawk in nei lo uh hi. Kha Siangtho tawh gamta lo ahih bangin a sep uh leh a gente uh ci leh sa vai mahmah hi. Pasian vangliatna muh ding zong lamen loin, tua bangin vangliatna zong tuhun ciangin om dingin tuat lo uh hi. Tua hangn na lamdang amau nuntakna ah muh nei lo uh hi.

•    Amah Kha Siangtho tawh galdo khawmlo (Efesa 6:10-17): Ci leh sa lungsim
 tawh Lai Siangtho a sim manin khalam gal nei ahih lam zong kiphawk lo hi. Mit tawh muh theihte bek a om taktak in tuat a, mit tawh muh theih loh khempeuh a om loin tuat hi. Tua hangin dawi leh kau khawng Khristian hihma in om leh zong tuhun ciangin om dingin um lo hi. Tua bek hi loin khalam galdona zong Khristian i suahtu’ng bek a om dingin sang uh a, tuhun ciangin hih bang thu leh Lai Siangtho kituak loin ngaihsun uh hi. Ahi zongin Paul in khalam galdo dingkiciantakin hong hilh hi. Kha Siangtho huhna tawh do ding hi a, eima siamna leh khuak pilnatawh kido thei lo hi. Kha Siangtho namsau zat ding hi a, eima pilna namsau tawh bang mah phatuam lo hi.

•    Amah mite’ tungah kinga (II Kor 3:2): Ci leh sa lungsim nei mite pen mite’
tungah kinga mahmah uh hi. Korin khua Khristiante zong Sawltak Paul tunga kinga pawl, Peter tunga kinga pawl leh Apollo tunga kinga pawl cih bangin na om uh hi. Mite etteh dingin zat ding hi a, upna taktak pen Khris tung bekah ngak ding hi. Hi bang mite’n amau pawlpi thupina leh siamnate peuh gen in nei-in Khris hoihna leh thupina lim gen lo uh hi. Mite’ a hat ciangin a hat bangin om uh a, mite a thanem ciangin amau na thanemzaw sem uh hi. Hih bang mite’n kiphatsakna in a makaite uh zang uh a, tua makaite hangin amau nangawn thupi in kingaihsun uh hi. Ci leh sa lungsim leh Kha Siangtho vai kilehbulh mahmah ahih lam na ngawn khentel thei lo uh hi.

•    Ama’n kikhenna piangsak (II Kor 3:3-7): Ci leh sa lungsim nei mite’n pawl
khenna piangsak uh hi. Khris kumpi gam sangin amau pawlpi denomination gam thupizaw in ngaihsun uh ahih manin pawlpi mi tam nading hanciam in ahih hangin nungzuihna lamah a tam nading don kha vet lo uh hi. Mite tawh kikholh ding leh kipawl ding thupi in nei thei lo uh hi. Tua hangin kideidanna, kituam bawlna, siangthozaw kisakna, siamzaw kisakna, Pasian itzaw kisakna cihte nei thei uh hi. Midangte hansuah a thapiak sangin mite’ hoih lohna muzaw uh hi. Tua hangin ci leh sa lungsim nei kici hi.
Topa Pasian in Kha Siangtho ukna lungsim a nei dingin hih thului a sim mi khempeuh tungah Ama thupha hong piata hen.Amen.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING