UPDATES:

S5 Box

ZOGAM.COM Login

Jesu Khebul Ah

JESU KHEBUL  AH (Luke 8:35)    By Rev. J. M. Ngul Khan Pau.
jmpaupu

    1986 July kha in Billy Graham Evangelistic Associationte inntekna tawh International Itinerant Evangelist Conference Amsterdam ah ka kihel kha hi. Evangelist tulsawm khawng kipai khawm dingin kituat hi. Ni khat Dr. Billy Graham in How to make an altar call cihthulu zangin thusinna hong neihpih a, hunzatna a zawh ciangin mite’n amah khut len dingin pai uh hi. Kei zonghih ciang hamphatna hong pia leh Pasian mizat ama khut len dingin ka pai hi. Mi tam mahmah a, ka cih nading ka thei kei hi. Ahih hangin ka mai a mite Mikang vive hi pian ahih manin lian thei mahmah uh a, amau kikawm kalah ka lut koikoi leh a sawt lua loin Billy Graham mai ka tung vat hi. A khut ka len a, thank you bek ka ci man hi.

    Mi thupite tawh hun ngah ding haksa mahmah hi. Khut let ding pen hanciam mahmah ahih kei leh ngah zawh ding bang hi lo hi. Ei zong mi thupi khat i hih kei leh mi lian mi lal tawh kimuh ding zong a hi thei lo hi mawk hi. Jesu Khris in nangleh kei hun hong pia in, ama kiangah om nading mun hong pia hi. Manlah lua cih bang nei loin, ei-zia tawh kituak in hong ngak hi. Ama khebul ah tung mite in hih a nuai a hamphatna ngah ding uh hi.   

    Jesu khebul - maisakna mun hi (Luke 7:38): Mawhna tawh a kidim numei in Jesu khebul tung peuh leng ka gimna tawlna teng beikhin ding hi, cih ngaihsun in Topa annekna munah pai-in a khebul va tung hi. Mawhna neilo Pasian Tapa kiang hong tun ciangin, a mawhna kiphawk lua a hih manin a khitui in Jesu khe buaksuk a, a sam tawh a nulsiang hi. Topa’ khe a nulsiang zawh ciangin nam a, paknamtui tawh a zut hi. Tua bangin anne a tu Topa khebul ah hih numei in a bawl ciangin, nopmawh, kihhuai ci loin, ama mawhna tampi maisakna pia hi. Mawhna tampi nei numei in a maisakpa itna lianpi mah tawh khah loin a khebul ah na tu hi. Bang zah in na mawhna a lian zongin hong maisak nuam hi. Ama kiangah pai in pulak leteh maisak lungnopna na ngah ding hi.

    Jesu khebul – damna ngahna mun hi (Matt 15:30): Damlo tampi, khebaite, mittawte, khezawte, leh a pau thei lote Jesu khebul ah hong koih uh hi. Tua khempeuh Jesu in damsak hi. Ama khebul hong tung mite dam loin ciah kik lo hi. Tua ciang a tun nadingun upna leh lametna tawh hong kalsuan uh hi. Topa in amaute khat nangawn lawhsam in koih lo hi. Dam nadingin Jesu khebul mah i tun ding kisam hi. Khalam, lungsim ngaihsutna leh pumpi damna ama khut ah om hi. Khebul i cih ciangin kiniamkhiatna kammal zong ahi hi. Kiniamkhiat kawmin ama khebul a tung peuh mah amau lametna sangin manphazaw in damna ngah uh hi. Bang ci bangin na dam kei zongin hong damsak thei hi. Cancer leh AIDS natna nangawn a damsak Topa hi. Cidamna lam siavuante’n hi thei lo ding a cihte uh zong a dam kiksak Pasian hi. I theih ding khat in ama kiang upna tawh a paite dam a, amah a zuan lote’ amau natna panin na damsak tuan lo hi.

    Jesu khebul – thusinna mun hi (Luke 10:39): Bethany khua a Martha inn ahJesu leh a nungzuite tung uh hi. Topa Jesu in tua innsung ah Pasian Gam thuhilhna nei a, Mary in ama khebul ah thungai in a om hi. Ama khebul pen a nungzuite’ tutna mun hi a, Mary zong tua munah na tu hi. Jesu in a nungzui ding numei pasal na khen lo hi. Nungzui 12 sngah Mary a kihel khak loh hangin ama nungzuite hamphatna na ngah hi. A khebul in thusinna mun hi. Topa khebul ah thusin dingin a tu mite mi hampha ahi uh hi. Thusinna loin khatohna om lo a, tua ciangin thumanna loin zong khantohna om lo hi. Khebul i cih ciangin Jesu tawh kinaih mahmah cih na zong ahi hi. Thusin nadingin hong sinsakpa’ tawh kinaih leng kitheibaih hi. I kigamlat leh theihhak se hi. Tua ahih manin Mary in a Topa naih mahmah a tu in ama tung panin vangam thu na sin hi. Topa kam panin a pusuak thute lei-ah kia loin a theih nadingin kinaih thei penpen ah tu hi. Topa naih nuam mite ama’n zong naih hamtang hi. (Jeim 4:8).

    Jesu khebul – thungetna mun hi (Mark 5:22-23): Synagogue makaipa’ Jairus in a tanu sih leh hin kikal a om a muh ciangin Jesu khebul ah khukdin-in a tanu dam nading ngen hi. Cihmawhna, lungkhamna, mihing huhna tawh bang mah piangthei nawn lo dingin ciangin Pasian kipan thei zel hi. Mihing lamah lametna I neih khempeuh bei kiuhkeuh cih ciangin ama vangliatna tawh na lamdang bawl hi. Synagogue makai khat adigin Jesu khebul a bawkkhup cih pen thulian mahmah thu hi. Hihin zong mite’n bangbang gen in hong zahko uh zongin phamawh kei, ka tanu dam nading ahih peuh leh hih ngamloh sepngamloh ka nei kei ding ci-in ahaksatna Topa tungah ko hi. Topa in ama lampi khek in Jairus inn lam zuanin hong pai hi. Topa Jesu khebul ah na haksatna tawh hong pai in, ama’n na ngetna hong za ding a, na muh ngei loh na lamdang Jairus mah bangin hong bawl ding hi. A tanu damlo bek hi loin a si khinsa, Topa’n nungtasak kik hi. Na innsung ah na lamdang piang ding na deih leh a khebul ah vatun in, hong nial loin na upna sangin a lianzaw hong bawlsak ding hi.

    Jesu khebul – lungdam kohna mun hi (Luke 17:16): Phak sawmte’n cih nading thei loin amau teng lawm bangin kikhawl uh a, Jesu kiang zong naih ngam loin a gaalkhat panin cidam nading na ngen uh hi. Topa in na, “Pai unla, siampite va ki-ensak un,” ci hi. Amau thumang ahih manun dam nai lopi-in na pai uh a, lampi ah dam uh hi. Dam cih a kimuh uh ciangin, siampite kiang zong pai loin amau lak a khat hong kileh kik vingveng a, Topa’ khebul ah lungdam ko-in a boksuk hi. Topa in, “Mi sawmte’n damna ngah hi lo a hi hiam? A dang kuate koi-ah om ahi uh hiam?” ci hi. Lungdam ko dingin a damsakpa’ kiangah zong pai nawn lote i mawhsak kha thei hi. Amau zong a zi leh tate maw, nu leh pate kiangah kilak nuam lua uh ahih manin lungdam lo hi loin a masa ding nunungsak kha hi ding uh hi. Topa khebul pen lungdam kohna mun dingin a hoih penpen ahi hi.

    Jesu khebul – tawlngakna mun hi (Luke 8:35): Dawi in a bawlsiat leh inn nangawn ah om thei loin hanmun khawng ah amah leh amah suang tawh ki-at in ompa, Topa in a sung panin dawite a hawlkhiatsak hi. Dawite in zong amau om nadingin vok hon omte ngen uh a, tua ni-in tua vokte mualtung panin tuipi sungah tuak lum cih thu i mu hi. Topa vangliatna in tua dawi tampite thu a piak ciangin tua mipa tung panin pusuak uh hi. Tawlngak nading mun nuam ah zong a tawlnga ngei lo mipa ama sung panin dawite a paikhiat khit ciangin puaksilh in, lungsim pill eh ciimtakin, Jesu khebul ah tu hi. Tawlngak nadingin a muanhuai penpen mun a hih leh Topa khebul hi. Hih mipa zong dawi in a gimsak nateng panin tawlnga nuam hi ding a, a damsakpa Jesu khebul ah tu hi. I neu lai-in i lauh ciangin i nu leh pate khebul khawng ah tu leng i lungmuang hi. Topa khebul bangzah takin a muanhuaizaw tam,  tawldamna taktak ama khebul ah kingah ding hi.

    Jesu khebul – biakna mun hi (Mang 1:17): Nungzui Johan in Topa a thupitzia a muh ciangin a khebul ah misi bangin puksuk hi. Tuuno bangin hong pai Jesu Khris in humpi bangin vaihawm ding hi. Ama hihna taktak theician leng zahtak ding, it ding, a thu zuih ding haksa lo ding hi. Topa khebul pen Johan adingin biakna mun hoih penpen suak hi. Hih in tawntung gam lim tawh zong kibang hi. Topa ahihna bangin I muh ni ciangin ei zong ama khebul ah i bia nuam ding hi. Amah in Pasian ahihna nusia in nang leh kei hong zongin, tua hehpihna leh tatna hangin vantung gam a tung thei bek kihi ding hi. Topa omna peuhpeuh amah biakna mun hipahpah hi.

    Thukhupna: Topa khebul mah lungkimhuai pen, lungnophuai pen, cidamna, thusinna ahih manin ama khebul mah zuan tangtang ni. Leitung mi liante khebul na ngah zawh loh hangin, tawntung Pasian khebul ah nang adingin mun om tawntung hi.  Ama thugen kammalte ei adingin damna hi a, lungtaisak thute ahi hi. Topa khebul ah thungetna, lungdamkohna, tawlngakna leh biakna nei dingin zuan ni. Ama’n na nuntakna thupha hong pia hen.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING