Jesu in hong lawn leh

User Rating: 0 / 5

Star InactiveStar InactiveStar InactiveStar InactiveStar Inactive
 

JESU IN HONG LAWN LEH | J.M. Ngul Khan Pau
jmpaupu

 

Leitung mihing a lian a neu in lawn ding ki-ut ciat hi. Mihingte bek lawn ding a ki-ut na hi loin ganhing leh singkungte zong lawn ding a lunggulh na hi gige uh hi. Damlote zong siavuante’n a et bek hi loin amau khut mahmah tawh a lawn uh leh dam baihzaw cih kimu hi. Naungek a kah ciangin a nu in lawng leh lungkimpah hi. Tua ahih manin itna tawh mihing a kilawn khak ciangin damna, lungdamna, kimaisakna, ki-itna cih bang piang hi.

Tuni in Thuciam Thak sung panin Jesu in a midangte a lawn ciangin bang piang hiam cih i en ding hi. Topa khut in vanglian in na lamdang piangsak hi. Nang Jesu in hong lawng hileh:

Na siangtho ding hi (Matt 8:1-3): Phaknatna in a gimsak, innkuanpih leh lawm leh gual tawh a kikhen, kum sawtpi sih leh hin kikal ah a om mipa in cih nading a theih nawnloh ciangin Topa Jesu kiang na zuan hi. Phaknatna nei mite mipi omna khawngah pai ngei lo uh hi. Ahi zongin tua ni in hih mipa in – ‘Topa kiangah pai leng hong niallo ding hi’ cih upna tawh hong pai hi. Jesu kiangah a gen a tom mahmah hangin thumanpha mahmah pulak hi. “Topa aw” thuhilh mawkmawk hi loin, Topa Pasian ahihna thei hi. “Nong damsak thei hi” hih mipa in Topa vangliatna nei ahihzia leh a kihkhuai, a lipkhaphuai phaknatna panin damsak thei ahih lam tel hi. Topa in tua ngetna nial loin, “Kong damsak nuam hi, na cidam ta in” a cih khit ciangin lawng a damna a ngahpah hi. Phaknatna nei mipa Topa in Ama khut teekteek tawh na lawng hi. Nang zong mawhna bangzah tawh na kidim hangin hong lawng leh na siangtho ding hi. Topa in hong lawng nuam hi.

Na dam ding hi (Matt 8:15, Luka 22:51): Peter sunghnu cisa natna tawh lupna tungah a lumcip Jesu in a lawn ciangin dampah hi cih i mu hi. Topa khut vanglian in hong lawng peuh leh natna bangzah in a gimhuai zongin dam ding hi. Amah tawh kikhawlte ading bekin damna hilo hi. Amah a man dingin a paite’ lak a siampi lian nasempa bil liamna zong a damsak hi. Topa khut in hong lawng nuam lo zong hi loin nang hong lawng nuam mahmah ahih lam nap hawk ding ahi hi. Kilawngsak leng pumpi dam lohna ahi zongin, khalam natna ahi zongin dam ding hi. Topa lawn ding na lunggulh hiam?

Na mit hong vaak ding hi (Matt 9:27-30): Mittaw mi nih in Topa Jesu damsakna lunggulh in ama kiangah a damsak nadingin ngen uh hi. Jesu in, “Na mit uh khua hong musak thei dingin hong um na hi uh hiam?” ci-in a dot ciangin amaute in, “Topa aw, ka hong um uh hi,” ci-in a dawng uh hi. Tua ciangin Jesu in amaute’ mit lawnsak a, “Na upna uh tawh kizui-in note tungah hong piang ta hen,” a ci hi. Tua ciangin amau mit uh kihong in khua a mu uh hi. Tuni in Topa in na khalam mit hong lawnsak kei leh mittaw mah na bang ding hi. Na innsung uh, na Pawlpi uh ahi zongin itna leh lainatna na nei kei ding hi. Tate nangawn itna i neih nawn loh ciang bel khalam ah mittaw mahmah cihna hi. A lungkhamhuai mahmah ahih leh nu leh pa khalam ah mitmial in innsung zong bang mah awlmawhna a om nawn loh ciang tua innsung mialna pen mialna taktak ahi hi.

Na launa bei ding hi (Matt 17:6-8): Mel kilamdanna mualtungah a nungzuite thum Peter, James leh Johan paipih hi. Tua munah amaute muhtangpi mah in Jesu mel kilamdang a, amai ni bangin taangin, a puante khuavak bangin a ngo hi. Moses leh Elijah tawh Jesu in kamkumna nei-in tua ciangin vantung panin, “Hih pa pen ka it, ka lung hong damsak mahmah ka Tapa ahi hi. Ama thu na ngai un,” ci-in Pasian aw hong ging hi. Nungzuite’n hih aw a zak uh ciangin lei lakah boksuk uh a, a lau mahmah uh hi. Ahi zongin Jesu hong pai-in amaute va lawng a, “Tho un, lau kei un,” a ci hi. Topa in launa panin hong kemin, i launa hong lakkhiatsak thei hi. La phuakte in, “Nang kiangah bang hiam ka lauh ding,” a cih bangun Topa i kiangah om leh bang lau ding ihi hiam? Tua hangin David in zong, “Sihna liim guam sung ka nawk hangin siatna ka kihta kei ding hi. Bang hang hiam cih leh kei tawh na hong omkhawm a, na molhtum leh na ciangkhut in kei hong lungmuangsak hi,” ci hi (Late 23:4).

Na suakta ding hi (Marka 7:31-35): Bilngong leh pau thei lo mi khat Jesu kiangah hong paipih uh a, a damsak nading a ngen uh hi. Jesu in tua mipa’ bilte gel ah a khutme guangin tua ciangin a khutmete cil nuhin a lei a lawnsak a, “Kihong in,” a cih leh kihong lian hi. Hih bangin khuaza lo, pau thei lo mipa in ama pumpi buainate panin a suakta hi. Jesu in a thupi mahmah a gen khit ciangin, “Zak nading bil a neite in hih thu na za ta un,” ci hi (Matt 13:9). Zak nading bil i neih hangin Topa mah in hong lawnsak kei leh khalam thu bang zah a kigen hangin i za thei kei hi. Bilngong mah i bang uh hi. Lungdam koh ding phat nading tampi i neih hangin pau thei lo mipa mah bangin gen ding i thei kei hi. Lungdam sangin phun ding, i lungdam loh nading tam kimuzaw hi. Tua bang mi na hih leh na suakta kei hi. Topa in hong lawng leh na gen ding lah hong bei lo ding a, na zak thute lamdang nasak zong bei nawn lo ding hi.

Na nungta kik ding hi (Luka 7:11-15): Nain khua meigongnu tapa neihsun vui dingin hong paipih mite Jesu in a muh ciangin hehpihna tawh kidim a, tua meigongnu kiangah, “Kap kei in,” ci in va hehnem hi. Tua ciangin pai-in a hankuang va lawng a, misi puate zong a khawlpah uh hi. Tua ciangin Jesu in, “Tangval aw, tho in, kong ci hi,” a cih ciangin misipa zong thoto in hong pau pah hi. Tua ciang Jesu in a nuntaksak tapa a nu kiangah a pia hi. Hankuang sunga om khinzo tangvalpa zong Topa in nungtasak kik hi. Lametna bei khin, kah ding teng zong kap khin zo ung ci kha ding uh hi. Ahi zongin Topa adingin haksa lo a, nuntak kik ding lametna om lai hi. Nuntakna a neipa adingin sihna pen a baihno khat in nuntakna tawh kheksak lel hi. Kha nuntakna thu-ah kimu thei leng khangno tuailai tampi hankuang sunga omsa mah bang ding  uh hi. Zatui, zavui kisutna, zu leh sa hangin lametna om nawn lote zong Topa in hong lawn dingin naih peuh leng na nungta kik ding uh hi.

Na thupha ngahna hi ding hi (Marka 10:13-14): Topa Jesu leitung hong vak lai in nu leh pate’n a tate uh Pasian in ama khut tawh lawngin thupha a piak ding na hanciampih uh hi. Tua hangin naupangte Jesu in a lawn ding deihna in hong paipih uh a, nungzuite’n kham uh hi. Tuni dongin hih upna kimu koikoi lai hi. Pasian mizatte bangin i tate hong lawnsakin thupha hong piaksak leh a piangpah dingin kingaihsun hi. Hih ngaihsutna pen i zat tohtoh dingin hoih kasa hi. Topa’ nasem a kitam hangin Topa in a zat mi tamlo hi. Pasian khut in hong lawn ding leh a mizatte hong zang ding hi. Tua hangin i tate Topa in a zat mite’n thupha piaksak ding hanciam ni. Zu leh sa tawh a kidiah ma-in Topa thu mahah kidiah masa leh lamzangzaw ding uh hi. Topa in hong lawn leh thupha na ngah ding hi.

THUKHUPNA
Jesu in nang hong lawn leh kilamdang teitei ding hiteh. Topa tawh tonkawm leng nuam e cih la pen ah, “Mit tawh na kimuh theih loh hang, Na kilawn theih loh hang, Kei nong lawn lam, Nong suk khak lam ka thei,” a cih bangin Topa in a lawn peuh mah mite’n tel mahmah uh hi. Topa lawn ding na lunggulh hiam? Na nuntakna na cimtak hiam? Na thaksuak nuam hiam? Nuntakna manphazaw na lunggulh hiam? Topa kilawngsak in, tua hileh na nuntakna manpha mahmah ding hi.