UPDATES:

Mit tawh mawhna

jmpaupuMawhna tungah gualzo nuamte adingin hong kipat tungin na do pah leng zawh baihpen hi. Khaici bang hileh hong kek khiat tung, hong po tungin na botkhia pah leng bohkhiat baihpen hi. Ahi zongin zung hong neih ciangin buaipih pan leng haksa bek hi loin a zung na thuklut lua thei hi. Mawhna pen lupna nuam mahmah bang hi a, a lupsuk ding a baih mahmah hangin thohkhiat ding baih hetlo hi. Mawhna nutsiat ding hanciam mahmah ding kisam a, mawhna bawl ding pen tua zah in hanciam ding kisamlo hi. Mawhna hong lutna pen i khuamuhna tawh zong kisai mahmah ahih manin mit tawh mawhna ci-in kong gelh hi.

Gul that ding hileng bang hun in thah baih pen ding hiam,cih dotna a kidotna ah a dawngpa in, “A tui sungah a om lai-in thah baih pen hi,” ci hi. Tua mah bangin mawhna zong hong kipat tungin nusia leng baihpen hi. Mi pawlkhat in mawhna nusia nuam mahmah napi mawhna in amau lencip khin ahih manin kisuutkhia theilo uh hi. Banghang hiam cih leh mawhna hong kipat tungin nusia loin amau nuntakna ah picingsak khin cihna hi. Pasian thu leh Kha Siangtho vangliatna tawh cih loh kuamah in mawhna zungpi panin kidokkhia zolo ding uh hi.

 

Gualzo Nuntakna (Victorious Living)

E. Stanley Jones in a laibu Victorious Living ah mit tawh khemna zawh theih nadingin siksan giat gelh hi. Tuate hih a nuai ah khat khit khat kimu thei hi.

Na nasep khat peuhpeuh ah mit tawh khemna na tuak ciangin khekpah lian in. Banghang hiam cih leh nasep ngeina na khek theih leh na ngaihsutna zong kikhek ding hi. Tua ngaihsutna hong kikhek ciangin mit tawh khemna a zo nahi hi. Mi pawlkhat in a sep ngei uh sem kawmkawm in zawh sawm uh a, zawh sangin guallelhna thuakzaw uh hi. Nihna, nang bek na om a ngaihsutna hoihlo hong lut leh paikhia inla mi tawh va kikhawl in. Midang tawh kiho, kikhawl leng tua khemna i ngaihsut kimangngilhpah hi. Tua khemna zong lawmte kiang pan lehngaihsut kik leng zumhuaisakna, nuizathuaisakna bang kinei thei hi.

Thumna, na ngaihsut lim leh mel in mawhna khukah hong tunpih ma-in Singlamteh lim leh mel tawh khek in. Mit tawh mawhna a tamzawte lungsim mitkha lim leh mel tawh i ngaihsutna ah hong kilangin sawtpi hong luah khit ciang tua mawhna in zung na kha man hi. Mawhna lim leh mel a khekkhia zo ding Singlamteh vangliatna hi. Na ngaihsutna ah nang adingin a hong thuaksak i Gumpa leh Topa sisan luanna leh sihna Singlamteh luahsak leteh a dang lim leh melin hong nusia ding hi. Lina, Na ngaihsutna ukzia siam in. Ngaihsutna pen pumpi ki-uk mah bangin uk theih hi. Tua bangin a uk a kem siamte'n thu hoih bekbek ngaihsun uh ahih manin amau lungsim na siangtho hi. Television na etnop loh ciangin na mekmit mah bangin na ngaihsutna a hoihlo hong lut ciangin na mekmit in. Tua bangin ukzia siam leteh gualzawhna leh nangmah ki-uk zawhna na nei ding hi.

Ngana, na ihmut ma-in a siangtho, a hoih nate ngaihsut in nei in. Banghang hiam cih leh i ihmut sung na ngawnin tuate ngaihsutna in i lungsim na kem ding hi. Zahmawh ngaihsun in ihmu leteh tua zan in tua lam bekbek na lungsim ah hong om ding hi. Na mang in zong zahmawh lam mah na man ding hi. Pasian phatna leh hoihna tawh ihmu leteh zankhua in na ihmut sung nangawnin Topa phatna tawh na zang ding hi. Gukna, exercise tampi la in. Kimawlna lam leh thasanna (exercise) limtak a neite, a ngahte in khemna hong lut nading hun pia manlo uh ahih manin nangzo, dalzo uh hi. Ahi zongin television khawng bek en in sun nitumte in exercise ngahlo ahih manin a lungsim uh mawhna lamin kaizo mahmah hi. Thalakna, thahatna ding vaite in mawhna do zawh nading tha hong guan hi.

Sagih, gualzawhna na neih nadingin lawm hoih nei in. Lawm hoih in i nuntakna zo mahmah hi. Tua mah bangin lawm hoihlo in zong siatna tawh hong zo mahmah ding hi. Giatna, Ngaihsutna hoihlo hong om ciangin thungetna thakhat mah in neipah in. Thungetna tawh dopah leng mawhna zong lungsim sungah khawl tawldam man lo hi. Thungetna in vanglian in gualzawhna hong pia ding hi.

 

Lai Siangtho Genna

Lai Siangtho panin tamlo en lai ni. Mit tawh khemna i gen ciangin Eden huan ah gulpi in Eve mit tawh na khem masa hi. “Tua ahih ciangin singkung a hoihna, mi a pilsak dingin tua a gah a deihhuaina a muh ciangin a singgah loin a ne hi. Amah in singgah kimkhat a pasal pia a, a pasal in zong a ne hi,” (Pian 3:6).

Israel mite Kanaan gam hong tun ding ciangin Jericho khuapi a pal loh uh phamawh ahih manin tua khuapi kimah ni sagih sung lampai in umcih uh hi. Tua khuapi sung a lut uh ciangin van khempeuh lak loh ding cih thukhun om hi. A hi zongin Akhan in a ki-ap nate pawlkhat na la hi. Tua hangin Israelte'n gal hong lel uh hi. Joshua in Pasian cihna bangin a mawh mi hong zong a, Akhan tung tu hi. Amah in Joshua kiangah hih bangin a mawhna pulak hi, “A taktakin, Israel Topa Pasian tungah ka khial khin a, hih bangin ka gamta kha hi. Shinar panin vankia lakah puanhoih khat, leh ngun shekel zanih a gik, leh shekel sawmnga a gik kham tawn khat ka muh ciangin tuate iplahin ka lakha hi. Tu-in tuate ka puanbuk sung leilakah omin kisel hi,” (Joshua 7:20-21).

Kumpi David zong mit tawh mawhna hangin a innsung leh kumpi gam siatna tung hi. Galdo dingin kumpite'n makai in galphual ah vaihawmin gal a do lai-un, kumpi David Jerusalem ah na tawlnga hi. Sun a ihmu hong thokhia in a khuadak leh Bathsheba kipumsil galmuh hi. Tua numei melhoih mahmah hi. David in a mite samin tua numei thu a kansak hi. Tuanu tawh hong mawh in, buaina tua ni a kipanin a damsungin bei nawnlo hi (II Sam 11:2-4). David in et loh ding a etkhak bek hi loin tua a muh ngah nadingin vaihawm a, siatna leh dahna tampi a innsungah piang hi.

Kanaan gamah milim hoihlote panin Israel mite a kikep theihna dingun Pasian in Moses kiangah hih bangin thupia hi. “Israel mite tungah hih bangin gen in: Jerikho kantanin Kanaan gam na tun uh ciangin note mai panin tua gam a mi khempeuh na hawlkhia ding uh a, amau suan milimte khempeuh susia-in, a kisung amau milimte khempeuh na susia ding uh a, mualtung a a biaknate khempeuh uh na sumaimang ding uh hi,” ci hi (Gam 33:51-52). Milimte Israel mite'n susia kei leh amau mit tawh mu-in a biakkhak ding uh Pasian in phallo hi. Tua mah bangin kumpi David in zong, “A sia peuh mah ka mit tawh ka en kei ding a, lamkhial mite nasepna ka mudah a, tuate tawh ka kisukha kei ding hi,” ci hi (Late 101:3).

Bangmahin a kimanglo nate kei hong ensak kei inla, nangma thu omsa bangin hong nungtasak in,” ci-in thungetna Late gelhpa in na nei hi (Late 119:37). Zu tawh kisai khemna kumpi Solomon in zong hih bangin na gen hi. “Hai sungah a phuan seuhseuh gawl sungah a tumsuk hithit thei lenggahzu san et-in nei kei in. Atawpna ah gulpi bangin nang hong tu ding a, gul gunei in a tuk na bang ding hi,” (Pau 23:31-32). Zu panin gualzawhna dingin zu et-in nei kei in. Pasian in milim biakna panin a mite suahtak ding a deih manin hih bangin Ezekiel zangin na hopih hi, “Hong kihei unla, na milimte uh nusia un,” (Eze 14:6). Milim biakna zong mit tawh mawhna mah na hi mawk hi.

 

Thukhupna

Topa Jesu in mit tawh mawhna panin i suahtak ding kisapna a genna ah, “Tua ahih manin na mit taklam in na mawh nading hong piansak leh khelkhia inla pai in. Na pumpi bupin hell khuk sungah hong kikhul sangin na pumpi na khat pelem leh nang a dingin hoihzaw lai hi,” na ci hi (Matt 5:29). Mittang khelkhia taktak dingin Topa in hong hilh hi loin hell khuk sung hong tungsak ding nate panin na mit na kepcing ding hong hilhna hizaw hi. Topa Pasian in i khuamuhna mittang ama thu simna, ama phatna lasakna, ama bawl nate puahphat leh bawlhoihna in hong zangsak hen. Irish mite la khat in, “Nang ka khuamuhna hong hi in,” a cih bangin Topa i khuamuhna hong hi hen. 

COMMENT (1) PHA TA..  
  •  
  •  

#1#1 Kamkei » 2013-03-22 21:05

Pasian thupha... hibang te pen thu-um mite a ding in manpha ei...

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING