Saptuam Lamtouhna

User Rating: 0 / 5

Star InactiveStar InactiveStar InactiveStar InactiveStar Inactive
 

SAPTUAM LAMTOUHNA
(‘Inn-gua hahlou a gam-gua hah’ cih a om thei diam?)
By Upa Chinsum, Columnist Zogam.com

chinsum

Ccpur ah Commercial sex workers 95 om, AIDS orphan 241 om;
AIDS ziak a meithai 102, huan, AIDS toh kisai in 460 si.
(Frontier Weekend, 22-28 March 2003)

Thupatna: I opkhum, Manipur simlam district a Tanchin Hoih kipahhuai hong lutna, a hon paw-lutte’n Mizoram apan Tuivailui kaan-a Senvon (Manipur) leitang a “Aw Pathian nang ma’n Tangthu Pha n’on pia” (B.La. 21) a sak ni uh 7 May 1910 hidana gen ahi. Pasian in ngaihkhua hontuah, A hon deihsakna lian hi. Ama’n I kuul khempeuh thei hilai.

    Khrist Jesu a lamtouh “Saptuam (Church)”, misi khaw kulh kongkakte’n a zawhlouh uh ahi. Amah bel, suangpi kipna tawh leng genteh ahi. Hichibang in – ‘A pilpa’n Suangpi tungah innlam a…’, ‘Ka Suangpi na hi aw ka Hondampa…’, ‘Amaute zui, khalam Suangpi-a a dawn chiat ngal ua; huai Suangpi tuh Khrist ahi’, cih leh adg. dg.

    1 Kor. 10 ah ‘Israelte Tanchin akipan Vauna’ chih I mu. Tang 6na ah, “Huan, huaite tuh ei diinga etzui diing ahi, thil gilou a’ lunggulh bang ua I lunggulh samlouhna diing in.” bung 3:10 ah, “Pathian in hehpihna honpiak bang zel in innlam heutupen piltak bangin ke’n suangphum ka lem a, midang in a tungah inn a lam uhi. Himahleh mi chih a tunga a’ lamdan uah pilvang chiat uhen,” A chi hi.

    Pathian in hehpihna honpiak bang zel a Suangphum lepkhitsa (Khrist) tunga innlam, Saptuam lamtouhna, a’ lamdan ah pilvang diing a thuhilh I hi. Bung 3:10-23 sung thupi dia ‘SINSAKMITE MAWHPUAKNA’ a hong kichih leh, pilvan diing tawh kisai, minautangte sangmah inle, sinsakmi leh Makai dinmun a dingte ‘chibiik’ abang. Ahihleh, Tangthupha deihhuai pai zel inla… chi-a pan I laak lai in, Suangphum lepkhitsa tunga I Inn lamna leh lamdan ah bang I chi a?

    Pau upa in – “Inn-gua hahlou a gam-gua hah” ana chih a bat khaak theih diam? Mahni’ innsung sanga paw-lam mite leh paw-lam vai awlmawhzaw; mahni hinkhua, TOUPA mel-vaak a ki-enchian loupi-a midangte leh innkuan-pihte mawhsa mawk! Thil tengteng kituak taka gaakkhawmtu ITNA ahi chih thei, hilele, midangte’ silhthuah diing ‘itna’ nei mahmahlou. Khamuang-loupi in ‘khamuanna thu’ gen ek; Hinna-a genlou, kam a gen (lip service!) chih bang omtheih ahive.

    Hiai I thei diing uh – Saptuam sanga innkuan om masazaw ahi. Huaiziakin, Pathian naa leng innkuan sunga sep masak diing ahi. Innkuan hoih a omlouhna ah ‘Saptuam hoih’ a omkei himhim. Unau, I lak ua Tanchin Hoih honglut champha93na zang dia I kisak lai-in I’ hinna, innkuan khawsa, & society dinmun I ki-enpha diing uam? Tuni a siatna leh mindaina I tuah zouzaite innkuan-a lu-pen dia KHRIST zatlouh ziak ahithei ahi aw. Suangpi kip tunga innlamte’n bel khawvel khelhnate tuahdan a siam uhi. Ets. Abraham te, Mosi te, Joshua te, leh adng. dg.

    John Wesley’ nu Susana Wesley in, “Setan in innkuan sung ahon douna a ka vualzawh leh ka suakta diing chih ka thei. Hiai khelhna gaal dou di’n innkuan ah Toupa naa ka seem diing, huai mah Amah hon sapna ahi. Ka Toupa deihdan hihbuchin louh ngal hih diing dang ka neikei,” chi top hi. Saptuam heutu diing in leng innsung kemsiam mi ahih diing chih ahi. (1 Tim. 3:4). “Mahni innsung paikan a biakinn leh lenkhawmna-a khami hih pen belam kongkhaak a lut lou-a a danga lut tum bang ahi,” Pastor Vanlalzuata, ‘NA INN AH KIIK IN’ chih laibu gelhtu, in chi hi.

    A khatna ah, Pathian in ‘nang teekteek hong-it/hongdeih’ ahi. Bible siamte’n, Adam minkhiakna tuh ‘mihing’ ah, a chi uh. Adam’ suan-le-pakte a pungkin uh hia, a number uh a tam hia, chih thu sang mah inle Pathian in Amah dungsun-a A siam “mi” (nang leh kei) A’ hon itna ngaihsuttham leh suut tuakpi ahi.

= Leitung buppi nei in pe leng zong, Ka hinna taang di’n hon saanglou diing.
= Hong it law veh aw… Nang teekteek hongdeih!
= Mi khial khat kisiik tungah van-a mi a kipak zaw diing uh.

    A nihna ah, A’ itna phattuamnapih, Kha Siangthou a chiamteh na hong hihkhit chia’n na (Khristian) khualzin kipatna tuh “Khrist-a zungkaai leh lamtouh a om in” ahih phot diing ahi. Huchia, Khrist batna nei-a khang in. Sawltak 12 te’n Hondampa JESU sapna za in a zui ua, huchi’n sawtlou nung in, Jerusalem khua khawng-ah, Judia leh Samari gam khua tengah, kawlmong pha in A’ Thu theihpihte ahi uh, chih LST ah kimu kei veh aw, unaute.

    Singnou, zungkaai leh khan hoih a a’ khanna di’n bangbang a poimawh a? Hun banah – singkung pichingsate poimawh bangthou – pouna mun lei hoih, huih, nisa leh tuite a poimawh. A poimawh zah uh leh a piakkhiak zah uh bel a kibang kei. Singnou leh singkung’ sekdou dan leng a kibang kei hi. Thahatna hilou, thilhihtheihna in leng hi samlou, ka Kha in ahizaw, sepaihte TOUPA’N a chi (Zekaria 4:6b).

    A thumna ah, kuankhiakna, theihpihtu a panna. I Pathian, a kuankhia Pathian ahi (Phil. 2:3-11). Hiai, “theihpihtu-a panna” topic ahi tuni a I kikup nop tak. Kin pai sim sawm I hi. I tutna-khau kaaigaak ni eih! Nang leh kei A’ hon tatna naa seem bukim Tapa Pathian in, A’ thawhnawn nung van-a piitouh ahih madeuh in, Nungzuite kiang ah –

1.    Na tung uah khamuanna om hen;
2.    Pa’n Honsawl bang mah in nou ka honsawl ahi;
3.    Kha Siangthou tang un, chi hi. (Jn. 20:21-22)

A.    KHAMUANNA: Toupa kia in hon piaktheih ‘khamuanna/tawlngakna’ deih in akua-akua I phesim chiat. Huchibang lak-ah, khamuang-loupi a Toupa gam naa a kihel, inntek-pan mahmah chih a om thei diam? Om thei tham e. Lusuunna inn a hehneem dia kuan, Saptuam Upa khat in, “Tuni-a I sigaalna uah inntek-lamte’n a hon neemzaw uh,” chi hi. Inntek-lamte a’ kha uh muang hive’n! Na khamuan theih keileh Pathian deihna mun ah na omkei chih kiphawk in.
Tumging tumsiam mi thupi, Kumpi David in tuh, Kipak kawm in TOUPA naa seem un, Serve the LORD with gladness, chi chiah hi (Sam 100:2a). David mah in, Toupa kianga kiphathu gen leh, Tungnungpen aw, Na min phat a lasak tuh thil hoihtak ahi, na chi hi (92:1). ‘Khamuanna’ chih leh ‘Kipak kawm a TOUPA naa sep’ chih Thute suut detdet in I mimal hinna chiat ah kibulh sin le, chi’n simtute I kichial. Oswald J. Smith in, “Na neih louhpi na pekhe theikei diing hi,” a chi.

B.    SAWL A OMNA: Sawl a omna gen leh ngaihsut khak ahihchia’n, ommun kisuanna, taksa mahmah sawlkhiak a omna mi khempeuh lungsim-a lang thu ahi. “Eite tan dia hong kuankhia, I Makaipa JESU. Ama’n, khawvel tengteng ah pai unla, thilsiam tengteng kiangah Tanchin Hoih hilh un,” honchi ahi, I hon chih lai chia’n, A’ Thu theihpihtu chiatchiat lak-ah leng, tha-le-ngal tawh kuankhia – mahni’ khaw-lam, tanaute lak leh pa inn akipan pawtkhe chiahte mah zaw lunglai luahtu ‘khatna’ ahi lua uhi.
Ahi-a, kuankhiak/sawlkhiak ek pen hia a thupi or poimawh, ahihkeileh, ‘gahsuahna’? chih kidotlouh theihlouh Thu ahi. Piikhetu Mosi in Toupa mahmah tawh tonnaa ngai-poimawh. Amah munluahtu, gaalkap Commander-in-chief, Nun tapa Joshua leng Mosi mah bang-a paipi & zuihtumtanei Heutu ahi. Genesis 39 – tuailai Joseph aa di’n, khemna tuihual a saan laitak ahi, a chih theih diing. Hiai bung 39na sunga lungkhoih mahmah bel – “Toupa Joseph kiangah a om” 3vei kigentuanahi (t. 2, 21 & 23).

    Hiai thu I kikup lai in, Tanchin Hoih li-te a sawl (send) a om mite, NUNGZUI 11 te hi uh ahi chih phawk chiang mahmah le’ng uthuai I sa. Amaute, tulai pautak in gen le, I Toupa Jesu mahmah etchetna nuai a Amah nungzui di’a laak a om, Toupa Jesu mah tawh kinai kha-a ton dente, leh Toupa mah in muantham a A ngaih mi tamloute (selected few) ahi uh. Amaute teelkhiak hong hihdan uh, kisinsiamna a laakdan uh, leh zat theih di’a kiman hong hihdan uh hiai thugelh sung ah I suutkhawm man kei diing, hitamahleh, ngaihsut zom in nei chiat le’ng, chi’nSawlkhetu Muanhuaipamin in I kichial ahi.

    Pastor E. Paukhanlian in S. Korea a M.Th. degree lazou, India honglut kiik in, “Kei bang, mi khenkhatte’n M.Th. zouthak chi’a saangpi-a hon nakoihkha maithei na un chin, tu’n, heutute’n peon naa khat hon leen sak le uh leng kipak taka seem diing ka hi,” a chi hi. A thupi ngei maw! Unau, nunglam a omte mangngilh a malam a om pen, h.t. Khrist Jesu a om Pathian sapna sang kipahman mu di’aka taai lai in I Toupa’n, “Sisan a Ka leisa, Ka ta it aw, Na hong tunna, na ngahna chiangchiang ah muanhuai in kip peuhmah phot in,” (Phil. 3:16) chi in honghuau.

    [‘…phot in’ chih pen tawmkam or ngaineu in sum-le-pai, tha-le-zung tawh, kuankhiakna leh sawlkhiakna lam ah I na phatuamngai law-kha uh a hikei maw, unau? KANA khua-a kiteenna ah Jesu leh A’ Nungzuite chial ahi uh. Jesu leng A hawh. Tua mun ah, Jesu’ nu Mari phatuam-ngaihna bang in thil paisuak hitaleh, Kana khua Jesu thil lamdang hih masakpenna mun leng ahi kholkei hial diing! A sawlkhetu Saptuam or Pawlpite (minlawh tuam omlou in), I dinna lai uh leh lungsimput dan uh I ki-enpha chiat diing uam?]

    Mosi in a’ unaute a itdan, suut thamching ahi. A’ nam-le-gam itna Pathian tawh itkhawm/tonkhawm ahihman a “missionary thupitak´honghi ahihdan bang phawk tuak e. Piikhetu, Israel namte’ Hondamtu ahihna di’a lampi a’ tot I ngaihsun kha ngei uh hia? Leitung siamna-pilna zil theihna tan a zil dan bang, leitung’ neih-le-lam leh kiningchinna beina mun, Toupa Pathian lou ngal suan diing leh belh diing a omlouhna GAMDAAI a a’ training dan bang, leh tua tengpi a tot zawh nunga a’ final mission – Kumpi Pharo tawh kideek-tuakna a neihdan uh…

    Khros lampitawna pai, mi khat in – AW NAANG BANG IN NEEM LOU HI, TOUPA GAM NASEP ZAW…chi ngiaungiau phet sam hi. E’n la, bang I chi a? Ngamthawh mahmah, lah ginna-a haat hetlou, sekdou hetlou chih khawng I bang uh hia, unaute? Pastor Ginneithang Ngaihte in, EBCC Delhi Papi Bible Camp-95 ah, “Pathian deihna apan na pial khiak hunhun, sau simtak pai mahle-chin leng, a tawpna ‘gahlou’ lai diing ahi. Huaiziakin, mihing ut-thu in phu teitei ke’n la, Pathian deihna (A’ lampi) ah ding phot lechin, na lungtang deihlam honpe diing ahi,” a chi. Ei, Ccpur District a Khristiante KOI SANTAK AH I ding ua le? Toupa Pathian in michihte hong enchian in, Hong siangsak hen aw!

= Tunglam akipan pilna bel, a tuung in a siangthou phot a, huai khit in kituah a ut a, a nunnem a, a chih nuam a, hehpihna leh gah hoih in a dim a, khentuam a neikei a, a lepchiah kei hi. (Jakob 3:17).
= Pathian naih un, huchi’n Ama’n A honnaih diing. Khialte aw, na khut uh silsiang un: lungsim bulbal neiloute aw, na lungtang uh hihsiangthou un. (Jakob 4:8)
= Pathian pilna ah bel, khawvel in a pilna zanga Pathian a theihtheih louh nungin thugen haihuai zanga a gingtate hotdam tuh a kipahlam ahi. (1 Kor. 1:21)


C.    KHA SIANGTHOU NGAAKNA:
= Huan, ngai un, Ka Pa thilchiam na tung uah ka honsawl diinga; himahleh, tunglam a kipan thilhihtheihna-a silhsaka na om masiah uh khawpi ah om kinken un, a chi a. (Luka 24:49).
= Huan, Amah a biaua, kipak petpet in Jerusalem khua ah a kiik nawnta uh; huan, Pathian biakinn ah Pathian phat in a om-om uhi. (24:52, 53).
= Huaite (Nungzuite) tengteng numei kuate hiam leh Jesu’ nu Mari tawh, Jesu unaute tawh, lungsim munkhat a, phatuamngai tak-a thum in a om nilouh ua. (Nasepte 1:14).

    Hiai, a tunga kigen hun leh mun ah, Sawm-le-khatte aa di’n khemna (temptation), h.t. ‘awlmawhna leh kipumnawhna’ haat viau di’n ka gingta. Hichibang khawng in – “I Makaipa I mu chianta. Amah mah tawh ton in nungzui kisinsiamna “discipleship course’ le I zou chiang lua uh. A’ hon-got naa pen khawl thei vual ahikei; it-huai khate mangthang thang uh… Kipan ni!” Toupa Thupiak lah khawpi a OM KINKEN diing (thilhihtheihna-a thop ahih masiah uh) chih hi trats!

    A tunga I taaklat hun poimawh (crucial) tak ah, Heutupa nuai-a kisinsiamkhin na-na chu, ‘Kithoihna saang in THUMAN a hoihzaw’ chih zang diktute in a hong pang uh e. Hallelujah! Ahihleh, awlmawh-hau mihing lam apan dotna om thei, huchi’a a om kinken sung ua sihna lam a puak manga omte. Leh thah a om di’a mansate kua’n suakta sak diing ahi hiam? Sam 46:10 leh Matthai 6:33ah a’ dawnna om e, guai.

    Hiai a I muh, Nungzuite OM KINKENDAN leh naupang hon omkhawm lak a ‘om kinken un, bawite’ I chih gentup a kibat mel kei khopmai. Nungzuite om kinken dan –

Khatna: Amah a bia uh. (Johan 4:23, 24 simbeh mah in).
Nihna: Kipak takin Jerusalem ah a kiiknawn uh. (Luka 8:38, 39 simbeh mah in).
Thumna: (Pathian biakinn ah) Pathian phat in a om-om uh. (Sam 100 simbeh mah in).
Lina: Lungsim munkhatpu in, phatuamngai tak-in, thum in a om nilouh uh. (Luka 22:31, 40 simbeh mah in).

Thukhitna: Awle, Toupa Pathian biak diing bangtaka biakna, mahni inn chiat a kiiknawnna, Pathian phat hinkhua, leh lungsim munkhatpu-a phatuam ngaitaka thumkhawmna chihte PENTECOST tunna dia Nungzuite hun zatdan ana hilel tak ahi. Unau it, “nang” banchi’n hun mualliam zelte na zang a? I biak Pathian lah zan leh tuni leh tangtawn a “danglou”/”a-ngeingei” Pathian hi-a maw… TOUPA’N, A’ Thu pansan a saulou I kikup uh, I poimawh bang unthupha kong honna hong suaksakta hen aw. Amen!

Pathian kianga Kiikna:
“Pathian ma-a kiiknawna I chih hih, it’s very very personal… Khelhna khat a Pathian kiang na kiik in tuh, huai khelhna ziak in na khelhna dangte tengteng leng – na khelhna ngaidam hilou a ‘nang’ hon ngaidam ahihziak in – hon ngaidam thei ahi.”(Rev. Dr. Ginneithang Ngaihte).
Revival Diktak:
“Biakinn” hi mi hoih leh mi siangthoute inn di ahikei a, khial kisiikte inn ahi. Na siamna leh na pilnate, na hoihna-a Pathian na zon leh na mu ngeikei diing. Laam I ut uh maw? Kipah I ut uh maw? Revival tan I ut uh maw? Revival/Halhna hih a mantam eive, unaute. Na khelhna nitenga nakimuhsuah hih revival diktak ahi.     (Evan. Timothy Tuolour).

-------
[CHEPTEHHUAI: A tunga thu, April 2003 vel a gelh, koimah a suahkhiak nailouh thugelh hi. Singkuang sunga laidal dang tawh omkhawm vamu, mi kuahiam khat adi’a vualzawlna hithei cih ziaka tangpi simtheih di’a hon kikoihkhia ahi. TOUPA’N A’ Thu vualzawl hen aw! – Upa Chinsum].