Zomi-Kuki Kaal Thu Geel

User Rating: 0 / 5

Star InactiveStar InactiveStar InactiveStar InactiveStar Inactive
 

ZOMI-KUKI KAAL THU GEEL
- By Thangkhanlal Ngaihte

thangkhanlalngaihte new

August 31 2015 a Manipur Assembly in 'anti-tribal' bill thum Meiteite deihdan taka kiphatsak huaideuha a hon pass ua pan Manipur tribal te lak a unified movement om in tutan in paizom lai hi. Hiai movement in target nih nei hi viz., Manipur Government leh Meiteite'n tribal te nen niam sawmna nasep aneih te uh leh tribal MLA leh heutute hiaibang hun a ami-asa uh taisan/hum lou te. Hiaiziak in inn te ki haal in mi nautang mi kua in ki sihloh hi. Hiai bill thum te'n Manipur singtangmi seh nih/seh thum omte, viz. Naga leh Kuki/Zomi te hon gawm hi. Himahleh hiai hunsung a singtang mite kigawm a pangkhawm i bat lai un ei unau/suahpih kichi a pau kithei tuah leh beh-le-phung kibang Zomi-Kuki kal hoihlam nawtlou bang mawk hi. Bangziak ahi di?

II

Manipur a singtang mite lak ah Meitei tetoh kingeih lou peen Zomi kichi te kihi ding hi. Meitei pau le adangte sang a kithei lou zaw, ki sukha a le ki omlou peen hi. Hiai in tua i movement peen le Lamka a aki concentrate luatna bangtan hiam ah explain thei ding hi.

Hichi kaal ah Zomi kichi te'n Kuki kichi te Meitei tetoh kikawi, asanggam uh leh tribal pihte uh zuausan a amau community adi vested interest adia pang hidan a muanmohna nei uhi. Adangte'n Manipur government toh kisai, negotiation neilou di, Centre a paidi achih lai un amau Manipur Government' deihsakna zong mah ana bang uhi. Sadar Hills district demand bang ana gen uh, CM Ibobi bang Kut celebration a chief guest dia ana chial uh, a MLA te uh bang Zomi kichite banglou tak a social boycott nuamlou uh. Manipur solkar khutzat a pang a martyr te bang vui sawm deuh gige; atatak a semkhe zoule hilou khat. Kuki state demand chi a kikou kou, Meitei te' integrity rally khawng alah Manipur integrity kepbitna di support a banner vataak, suai vakai, thu vagen, chih hizeel.

Zomi kichite etdan in Kuki kichi te'n i buaina hun lemtang ala a Manipur Government apan favour bangzah hiam muhna dia ana zatsawm uh chih khawng ahi. Meitei lamte toh kibuai a i omlai a amau eikhua Lamka lak dominate sawm a pan ana la maimah uh chihkhawng bangzah hiamte muhdan bang hi. Hunkhop tak te'n martyr tetoh kisai complaint FIR nasan Police station a aki register zohlouh ziak Kuki officer te hum nopna dan in ngai nalai hi hang. Hiai ban ah tulel a Kuki community leadership Imphal a ki base te, amau mimal interest ziaka Meitei toh kizopna suksiat vuallouh ahihman in tu dinmun in Kuki leadership te Manipur government toh kisai a tribal interest gen ding in bel credibility neilou, gintak huailou himai, chih ngaihdan lian mahmah hi. Nampi zaw leh piching zaw dan a ki project, lah lungsim leh gamtat nampi lungsim puthei lou, chih Zomi kichi te'n Kuki kichi te amuh dan uh ahi. Churachandpur Meitei min pen eimi te min Lamka a khendi ahi chi'n demand ana om thamta a, Kuki kichi lamte apan in support omlou chauh lou, hon dal uh, chih akithei dan ahi.

Kuki kichi te'n Zomi chih peen "nationality" leh ethnic identity dia accept nuamlou; unau ihi ua, Kuki vek ihi ua, nam dangteng in huaidan mah in honthei ua, huai mah iki chih di uh ahi, chih hi masa. Huai ban ah, Naga toh problem lianpi om ahihman in Zomi kichi te'n Naga lam toh politics leh tribal-level a kithutuahna aneih chiang ua zadah uh. Asang gam mahmah uh Kuki te sang a Naga muangzaw, chih bawl. Genhak leh buaihuai hon sa uh. Kuki kichi te'n Zomi a pomlouh dungzui un Zomi-Kuki conflict (1997-98) peen le hou gen in Paite-Thadou conflict chizaw uhi. Zomi ichih peen Kuki nawlkhin a nelhsiah leh khenkhiak sawmna ahi chi in unau kal a ki betray na dan a ngai pawl om uhi.

Kuki-Naga conflict (1992-95) lai in Kuki in naaktak a thuak in inn-le-lou leh hinna tampi bei hi. Hiai hun ah Zomi kichi lamte'n asanggamte uh huh lou. Huai naak sang in gal ziak a hong tai Kuki kichite Churachandpur (Lamka) lak hong lut chiang un ana huphulh bawl, huaikhawng a kiheh suahna hong om in Kuki-Zomi conflict (1997-98) hong om. Hiai kha Kuki kichite etdan khat ahi. Hiai banah Kuki-Zomi conflict sung a Paite te Naga a va kipe lut uh chihle thuthang khat, mi tamtak in tutan a dik a akoih uh ahi. (Hiai thuthang kha baseless ahi. Journal article khawng ale hong om tak in kana sui a, tulel a JNU a Philosophy professor Bhagat Oinam toh bangle Sangai Express ah kana ki dawng ek kha ua, Paite namte Naga a om dia va kipia, chih thu thuzuau mah ahi chih ka muhsuah dan ahi. Naga author khat in Naga tribe te list a bawlna ah bel Paite le atelsak kha; huaidan in bel Kuki kichi le Naga Club kichi ten Simon Commission a ngetna ana bawllai bang un Naga sung ah ana gelh lut uhi).

III

Alang nih tuak adia theih tuak khat ahihleh Zomi-Kuki ichih unau tatak mah ina hi ua, kidou a kina thei kihi nawnlou ahi, chih ahi. Unau kal kinak nawn a thilhoih piang di, nam bing neuchik a et ale, omlou himhim. Politics alah manthat vai. Pian leh phung a kikhen thei ihihlouh ban ua I tenna gamlei le akhen didan omlou hilai.

Kei mimal tak bang in chu 1997-98 a kidouna in abeitoh kituak in kitheihsiam tuahna leh kinehna bangtan hiam ah hontun a, kigal a kidou di chih chu kalung sim ah omthei nawnlou hi. Hileleng, ki galsai tuah a, politician thulim lou khenkhat te fuihsiat a sawt i omluat taak ziak un kimuan louh tuahna alian lua a, ahuchih touhzeel leh buaizeel theih leh kilawm bang hi. Tulel a i politician te leh helpawl te iki melmakna uh nekzonna anei tampi om uh ahi (Khat te'n "PZT i telching kei leh TNH kha minister hi di, athu nuai ua ki om di ahi" chi a vote zong, alangkhat lam a le, "TNH achin keileh PZT checkmate tu di om lou di", chih ana hithou. Ana sep uleh competence genkhak hilou. Huaidan mah a, "Z te ahat kei uleh K te'n hon nopneh lawtel di uh" and vice versa).

Zomi pom lamte'n Naga toh unau Kuki kichite buaina i theih pih kisam ahi. 1997-98 a Zomi-Kuki buaina peen conclusion hoihtak kibawl in kilemna toh suai kikai hi. Kuki-Naga conflict peen a zohna omlou, agreement le omlou, tawplou pi a dinkhawl dan ahi. I unaute hill district tuamtuam, abiik in Chandel leh Senapati ah ki thehdalh ua, ana luahsa uh gam tampi Naga te khut a om in, NSCN te map ah Naga area a chiamteh in om hi. Huaiziak in Indo-Naga peace talks kha hong final taleh I unaute gam tampi Naga area a sanctified a hong om dia, gam leh lei I chaan di ua, huai in ei Lamka lak a population influx hontun dia, ei unau kal buaina tungthei nawn dinmun hong hi di ahi, chih thil omthei mah ahi.

Etdan khat ah, Manipur singtang mite'n tutan a 6th schedule nasan ina muh louh uh Naga te ziak ahi; khatvei lai, katheih khelh keileh 1993-95 lak a Rajesh Pilot Internal Security in-charge minister ahihlai a sukfel mai dia om, hilele Naga leadership apan yes omthei lou a mit nawn, chihdan ahi. A greater Nagaland idea uh ziak a Manipur tribal te adia thil tampi noksak uh ahi. Tunai deuh in kitheih thakna khat hon neithak ua, independence lah van akhai hong bang, Naga integration lah atatak adia Nagaland Naga te'n ana ngai khollou, huchih leh thil saikhawm hong nuam hizaw sim hi. Khenkhat te ngaihdan a Zomi-Kuki clashes bangle Rishang Keishing CM nuai a Manipur Government in a tawsawn, Nipamacha hong pan aleh ki lemna hong baihlam ahi, chih bang ahi (Rishang kha December 1997 tan CM, azoh Nipamacha). Naga toh kihou thei, kithei siam ichih bangle tengkhawm a kisukha a I omlouh ziak uh houh adiam, Zomi te? Tangkhul tekhawng theihoih kichi te'n ngaihhuai lua in gen kholkei ve uh aw...

IV

Unau kichi chi ngal a hichih det peen manthat vai ahi. Tulel a poimoh ahih leh Kuki pom te'n 'Kuki' identity kha Zomi pom telaka a impose asawm sawm nawnlouh di uh (1998 Agreement ah kuamah ki impose louh di chih point khat ahi). A nam dan a et a thahat thu inle a belh taak mahmah kei uh, I hihna tatak Kuki ahihlouh gentaak louh in. India in independence amuh tuung apan a kisawm ahita a, politics hi'n saptuam lam ah hitaleh, tutan ahihtheih keileh ahithei lou ding hikha di ahi. Atuam dan in genzual tale, tulel in Zomi kichi te'n Kuki apoimoh sang un Kuki kichi te'n Zomi te poimoh zaw uhi; Zomi lamte luah gam ah direct a threat Kuki lama a ombang in om tadih lou hi.

Apoi mahmah bel, Kuki te Indo-Naga peace process toh kisai a a lung noplouhna uh theihsiam huailua hi napi, a unau te uh lak a theihsiam sak sawm a va lut a, community level a outreach a bawl hetlouh mawk uh ahi. Huai na malak in unau kal a tungnun kituhna, one-upmanship kia buaipih uh bang maimah hi. Zomi ichih kha sawtpek apan ihihna ahi chih i pom banah, i laa leh thu te ahle ana kizang den a ("Tunnu Zogam"/"Zuunlouh Zogam"/"Zolei", etc), hiaite ziak in a factual ban ah emotional leh psychological mahmah ah le ki internalize gawpta ahi, Zomi pom lamte'n. "Unau ihi uh" chihtoh "Kuki ikichih di uh ahi" chih hon genkhawm chiang ua Zomi pom lamte aheh uh suak hisim phial ahi, chih hon theihpih le uh deih huai mahmah.

Zomi lamte'n le unau te'n Sadar Hills district amuh ua, Lamka kia lou ei a (amau a) chihtheih di aneih uh i vek ua dia thilhoih ahi chih itheih di ahi. Huai lam ah eigam kichian om leh Lamka lak a hong pemlut lut te bangzah hiam hong tawmsot ding hi. Zomi lamte'n tutan in hiai district bawl khiak na di'n open support aneih lam uh kithei nailou hi. Support luat di ahi. Huaichiang in, Chandel leh mun tamtak ei unau te gam ahi a, huaite claim na ale pankhawm louh a piang di omlou. Zomi-Kuki kikhenna ziak in Naga te'n Kuki te nopneh zou uhi; hoihtak in kigawm theile Naga toh equal level a negotiate haksa lou ding hi.

Zomi te'n itheih tuak ahih leh tulel a i zakdah mahmah Kuki lamte thilhih te chihmoh man a nasep hithei ahi. Huaichiang in I genkhawm chiang in Meitei/Ibobi va pibawl sawm lailai te amau sungmah ahle dik salou, haw tinten hunkhop om uh chih ahi. Huai alternative voice pethei di omlou chihthu hileh kilawm. Unau hihna lam ah bel Zomi lam sang in Kuki lamte chiang zaw uh mah bang hi; "sopi haw" honchi gige saam uh ahih chia... Huaichia Meitei ILP agitation lai a a rally uh ana block a, ana kisual pih amau mah hive uh aw, Moreh ah. Imphal a dettak a khosa Kuki leadership in Meitei te toh vakuan a ava lep uh ahi. Imphal pawlam apan leadership hoihtak aneih ma uh hichi tadih di bang uhi. Amau lam khenkhat in hon gen chiang ua kikhen thaang naklua uh, Lamka lak dan a mass mobilization leh mipi voice nei a om thei dia concentration luatna om theilou, huaiziak a amau sung mah a UG tuamtuam te'n nopneh gige thei uh. Bangtan hiam chu dik maithei.

Churachandpur min Lamka a khendi chih thu bang ah le hoihtak a I genchiang in mimal in zaw deihlou chikei ve uh aw. Kangpokpi lamte bang in "Lamka lang" ngen chi uh ahi. Hilele, ei Lamka sung a tengkhawm tengmah narrow politics ziak khawng mah hilel ding hi.

Zimtak a et in, tunai a thiltung te et in bel iki iplah lele lamdang hikei. Amau Naga iplah vilvel, lah thagum a zoh di ahikei chih thei; eitoh kithei siam thei dan a I omchia ha gawi nuam mai uh hikha ding ahi. JAC Against three anti-tribal bills te bang in all tribal meeting asap chiang ua Naga lam honghoh chiang ua Kuki lamte room apan pawtkhe ngal mai, chih khawng ahih chia... Eipawl tageet in Meitei iplah vilvel, tha a zoh didan om bok lou; huaite toh I unaute pangkhawm dek chihdan a I muh chia ha kigawi tei zel. Kuki in Naga threat neutralize nadia Meitei pangbelh sawm. Eipawl in Meitei threat counter na dia Naga chizeel. Buai huai tak ahi.

Bangteng hileh, unau ikichih ngal a, kidou thei hi nawnlou chih iki theih leh atatak a pankhawm dan ngaihtuah a, tut khawm a unau kal kihou dial dial poimoh lua ahi. Kikawm tuah di ahi, houlim khawm di, iki muhdan ki share tuah di ahi. Ngaih huai iki sakluat kei leh niteng a kithuah gige ngai lou ahi. Tudan in bel kimuan moh tuahna leh lungsim suangtuah dan mahmah ale kituak theilou, chihdan tampi a om man in trust build nadi'n hun leh tha tampi ngailai ding hi. Alang tuak ah prejudice kihau lua; huaite whatsapp message tungtawn khawng a amplify in, eimah tutna mun mah ale ki iplah dedeuh theihmawk ahi. Hilele Zomi/Kuki te'n I kiim a namdangte bang a politics a survive di ichih leh shared political vision I neih ua, ma I phutkhawm uh alou theilou ahi.

Atung a kina na thei nawnlou, pankhawm ngai ichih naziak te: khatna ah, Unau, suangtu kibang mah ana kihi, I pau neukha aki batlouh hang a I beh-iphung in hon gawm teitei; nihna ah, MLA level khawng a politics sai a, unau kaal i buaibuai kal ua i kiim ua nam te - abiik a Naga leh Meitei - te'n thukhat saat a amau adi long-term politics sai uh. Eilawi bel ei-le-ei mah ki buaipih; namdang te leh solkar mahmah inle amau' interest serve na dia khutzat a hon zangzang thei lai tel uh. Atung a i gen bang a eiteng beek pangkhawm thei hile Naga leh Meitei toh kisaina ale i ma hong vang deuh di aka. Thumna ah, mipi vaihawmna, democracy ah numbers ana poimoh lua ahi. Economist te'n "economies of scale" achih dandeuh uh democratic politics ale ana om a, mipi vaihawmna achu mipi tampi poimoh ahi. Naga te bang in India toh hong kisai tatak chiang ua atawm dan uh kiphawk saan uh, northeast pumpi a tribal teng huap a solidarity neih theih didan khawng bang lunglut phial uh mah bangta ahi. Hiai kha kum tamtak nam-leh-gam toh kisai politics ana buaipihna ua pan a muhkhiak uh hidi dan ahi. Midang te experience apan a zillai muthei te mipil leh hampha uh ahi; eimah experience ahong hih chia zaw aki kheel ana hinuam mahmah ta ahi.

V
Bang chi bang in i pangkhawm thei di ua? Atung a i gen confidence/trust building initiatives te ban ah kigawmna ding in koi tak a kipat ahoih dia? Zomi/Kuki te hon represent thei di regional party khawng a ngaihtuah khawm theih diam? Mipi hon khen gige leh hon pei lung-am politician leh UG te apan politics leh movement bangchi'n mipi deihdan leh lunggulh te ngim in i bawlthei di ua? I gam a institution bit peen saptuam bang in bang pan ala thei dia? I sanggam state khat nei a ana omta Mizo kichi tebang bangchi'n hongpang thei di ua? Kisi thei mahmah leh kingam mahmah pawlnih (mimal nih le hithou) kal bawldik ding leh kilemna tunding in alianzaw deuh neutral third-party poimoh mahmah ahi.

Tulel a tribal movement akipat tung in Mizoram chief minister Pu Lalthanhawla in prime minister Narendra Modi lai ana khak in Manipur tribal, abiik a Zo suante agupthu ana gen hi (Nagaland CM in le lai khak). Hiaiziak in gensiatna leh heekna tampi party leadership level ah tuak hi. February 20, 2016 a MTFD min a ava kimuhna ah lai akhakzoh a Sonia Gandhi toh akimuh masak peen ua Sonia in athil hih kipah pihlou ahihdan ana langsak ahihdan hon gen a, himahleh aman Sonia kiang ah, "Madam, hihkhial kahih leh hon ngaidam in, hilele ka chipihte thuakna a om maimai theilou mah kahi. Blood is thicker than water" chi a dawng mai ahihdan hon gen hi. Mi kibang, pau kithei tuah, gam kizom a teng ihihman un Manipur a Zomite buaile Mizoram le sukha lou theilou di chih Mizo leadership in muban uh hiding hi. Kuki in Manipur ah Zomi apom louh hang in Mizo te hong dawk chiang un Zo suan hihna pom zeel; KNO leadership bang Mizoram ah inteek mahmah uh hileh kilawm. Zomi pom te'n Zomi/Mizo kal kha suffix/prefix issue maimai ahi chi. Tulel a Mizoram apan thu hong kigen alang nihtuak in bildoh mahmah. Huaiziak a Manipur a Zomi/Kuki te gawmtu dia Mizoram poimoh mahmah ahi.

A kuitung ngaihtuahna neithei chiangte'n hiailam khawng ngaihtuah na in lungsim zang panta le hun hoihzaw hongtung ngeiding hi. Hiaite kha hun paisa khaguk sungvel Manipur tribal movement a kibual na apan ngaihtuahna chiang hong suak khia ahi.

***