Bang Thu Hi Ta Mai A, Ka Tenna Gam A?

User Rating: 0 / 5

Star InactiveStar InactiveStar InactiveStar InactiveStar Inactive
 

BANG THU HI TA MAI A, KA TENNA GAM A?
By Kimbawi’ Pa, Columnist Zogam.com
kimbawi pa    
Thugelh piching dia hiai thu gelh man di ka hi kei, zingkal thoukhia a ki hahsiangthou khin a LPS Vision ah  ‘chibai Mizoram’ ka en a, huai ah ‘Tu ni, tu kum a dia ‘ber’ bei ni di, zingchiang a ‘ber’ kha kipanta di ahi’ chih a hon gen hi. Theihsa himahleh lunglenhuai bang a hong suak ngut hi.
    
Khua a hoih kholouh toh Office kai lou a in a om di ka chih chiang in ka chim zawk sem di ka lau a, Office lam ka manoh teitei hi. Office tun ma in city Bus a kipan in ka kum a, ka Liquor Card full khin himahleh Lower Zarkawt a ‘Hightimes wines’ stores a va nget ka sawm hi. ‘Ber lou’ a tawp kha lou teng khakna di le ‘ber’ kha kipatna welcome-na di, chi’n ka va kitlar (vual) hi. Huchi’n vangphathuai deuh kha kipan di welcome na din ‘Contessa’ bottle 2 leh Kingfisher beer 2 a hon pia uhi. Huchi’n Office lam ka zuan ngauhngauh hi.
    
Office ka tung a, newspaper, Aizawl a dia English edition om sun Newslink a Manipur Assembly Special Session a om di. Huai a Bill puaklut dite 1. Protection of Manipur Bill 2015; 2. The Manipur Land revenue and Reforms Act ( 9th Amendment) Bill 2015; leh, The Manipur Shops and Establishment (2nd Amendment Bill) Act, 2015, chihte a kigelh hi. Ka ngaihtuah a, ‘awle’ i member neihte un hiai thu a pompih tel di uam aw, chi’n ka ngaihtuahna a hong lut pah hi. Assembly paidan ka etna di a om kei a, kua hiam contact di ka chih chiang in a haksa mahmah hi.Ngaihpha lou sim in, vuahzu sim lak ah ka in luahna uh ka zuan hi.
    
Office a ka Computer uh a system a buai ziak in fb ka khoih thei khol kei hi. Huchi bang kal ah in ka tung a, ka dongle a kipan in fb et ka pan hi. Huchi’n Minister Phungzathang Tonsing in mipi’n a hal uh; MLA Vungzagin Valte’ in; MLA T. Manga Vaiphei in; MLA T N Haokip in, chihte ka simkha hi. A lim toh post ahi a, a dik diam ka thei kei. In hal pen thutuam ahi, hiai a tung a Bill ka gente Act a suah di kuamah in dal ngam lou maw? Deih pih vek ihih uleh a hoihna bangziak a i MLA leh Ministerte un huai dia awareness campaign bawl lou uh e? Palaite le kingaihtuah uh henla mipite le i kingaihtuah di uh.
    
Atung a Bill a pass uh hoih a hihleh bangziak a vote campaign a neih lai ua tua i palaite un recommend lou uh? Bangziak a ei a mipite’n dotna bawllolu? Tua amau sum a leisa a hihziak ua ‘Special Assembly’ sam zen a pass uh ahita mai.
    
Meghalaya ah Internal Line Permit demand in a kiphin ua, tu’n a daita hi. Manipur in a hon demand a, a thawm a ngaih mahmah. Pasal khat zahmoh natan fb a hong ki-post zawmah. Tua a Bill pass thumte’ (out of three) a ‘Protection of Manipur People Bill 2015’, a chih uh ILP toh kibang didan a hih ahi ngei di. Huchi ahihleh fb khawng a ka muhdan a Manipur mi hihna diktak neite 1951 census based di chih hi’n ka thei hi. Huai ahihleh a tamzaw foreigner a hon koih sawm uh hilou a diam?
    
Ka lungtang hong puakkham dek a hiai thu k’on gelh ahi.
    
I Prime Minister uh Narendra Modi heu in Parliament Moonson Sesseon a hon nei ngut ua, ni khat a session tutkhawm man crore 2 bang ahi. Himahleh Congress-te leh opposition dangte’ ziak in a thawn a suak sim maimah hi. India sum bangzahta a mangthang tel diam, chih phet ahi. A tukhawm ua, ‘adjourne de sine die’ chih ahi deuh vek. Lok Sabha ah BJP lamte tam mah le uh Rajya Sabha ah minority ahi tadih uhi. PM Modi thuvawk in paisuak haksa a sa mahmah hi.
    
Tua le Goods and Transport Bill puaklut a Parliament a pass sak a ut mahmah hi. Hilele a ngam chiah kei lai hi. Special Parliament Session sap a ut a, tuni tan in a sam ngam kei lai. Hiai Bill pen Congress hun lai a ki-draft ahi zawmah hi. Modi le Special Parliament Session sap di huphurh deuh a bang hi.
    
Huchi ahihleh, Churachandpur district a MLA leh minister i neihte uh O. Ibobi Singh in Special Assembly Session a sap leh a thumang dia tuizul sa a kuan uh ahi di maw? A Bill pros & cons le sim lou, phetlou a theilou a ‘Amen’ chi dia mansa ahi di uh maw? Zumhuai! Mi dangte’ lak a ka mi leh sate’ palaite hichi uh ahi, chih a hon theihpih di uh ka zum.
    
Kuamah dem tuam nei a hiai thu ka gelh ahi kei. Na ka sa a ka gelh ahi. A tung a Bill ki-pass-te eite hamphatna di ngen ahihleh internet hiam, facebook hiam in hon dawng le uh chih ka ngen ahi.
    
Manipur kha Congress government ahi a, bangziak a api uh Sonia enton ngam lou uh ahi ua? A Pi uh Sonia bang in Parliament buaisak dia a MP-te sawl zou ahi. Ka heh.