Kum khat Shillong ah

Shillong a ka kisuan nung kum khat a chingta hi. Ka join ni ahihleh 2012 Zomi Nam Ni geih ahi nawn. Ka tun nung kum khat hita mahleh bangmah theihbeh taktak ka nei tuan kei hi. Sepna lam a lah buailuat chih omlou, office ka kai gige ringot mai hi. Office na a buai pilou chu Police Bazar ka pha zut hi. Laibu sim di hoih deuh ka zon chiang in muh a haksan mahmah a, huchi’n 2012 bul lam in ‘Hinkhua Dakmual’ bu ka simsim mai hi. Huai laibu a article khenkhat review ka sawm sek a, hilele huphurh om ka sa remrawm sim zel hi. Office na lah theihbeh khollou, khawlai lah theihbeh tuan lou, lai gelh lam a lah masawn diak lou ka hi a, kum khat sung chu, masawn lou na-nana Shillong a nungtolh hi pen in ka kithei hi.

A gam mite’ paidan khawng thei ut a, huchi bang kigelhna laibu ka zon chiang in ka mu himhim kei hi. Bangchi bang a kiteng ua, bangchi bang a pasalte mouthak ahi ua, chih khawng thei ut mah leng amau kiang a va kan lem in a lem kei zel hi. Numei gouluah na-nana chu pasalte pata bang le a beh min uh a tuam hilhel mai hi. Tua Assembly election a neih ma ua term a speaker pa bang a beh min Pyngrope ahi a, a tapa’ beh min Nongrum ahi zenhouh hi. Ei toh etkak a chu paidan tuam petmah hi mai a suak hi.

A numeite uh a thunei in a pang ua, a pasalte uh sang in hau le a hausa zaw uh hi. Huchia numeite insung a thunei lua uh hinapi in politics bang ah MLA chih khawng numei a tam law tuan kei uhi. Insung leh a compound suang uah a siangthou mahmah ua, hilele khawlai leh kim leh kiang sianthouna lam a ngai poimoh lawtel kei uhi. Eilawi toh kibang in a luite uh a buah sak mahmah ua, dustbin a suah uhi. Hi keileh Shillong khawsung a lui hiaizah ta om hia tui haksa hetlou di a suak hi.

A gam uh hausa mahmah khat ahi a hilele a hauhsakna zarzou tawmchik a suak uhi. Shillong khawpi sung ah mi changkang mah le uh a khawtate uh tuantual mahmah in a gen uhi. A mawl vanglak chu a bilh a
thou lou hi mai in a gen uhi. Pau dang himhim theilou tam petmah hi’n a gen lai uh. Dik dia ka gintakna ziak tuh numei khat leh pasal khat in sahou khawng office ah hong zuak sek ua, Hindia bang a thei himhim kei uhi. A pasal zaw pen ka seppih pa’n a sahou a lei dek chiang in khat Rs. 150/- ahi a, nih Rs. 250/- di’n a dek sek hi. Huai kha, nih 250/- chi’n a gelh zel a, a zuak pa a gelh sak chiang in 200-50 chi’n a gelh suk mai hi.

Khristian lou tampi om uh a na hi phiangsan ua, a sih chiang un a kihal uhi. Khristian hiloute’n a sumdawnna mun uah – dawr, sa zuakna, adg.-munte ah champra leh malta khau a khil-khawm in a khai uhi. Ka chiamnui
sek a, hiaite pawl pathian in champra leh malta duh pen ahi di, ka chi kha nak hi. Ka in luahna nu uh bang le khristian hilou ahi dia, a vangkim in malta hong ngen sek a, tam pe dek le lah deihlou in a om belbul maimah hi.

Sum deih a dawr bawl chilou in sumnen i neih keileh van a kilei theikei nak hi. Sumnen piaklouh a van khot louh bang poi a sa kei bilbel uhi. Lamka khawng toh a kikhiakna mahmah tuh khawtualte’ dawr a antang bang i lei leh hon doppih mahmah kei ua, a khuttal uh le a hong panpih di’n a kuan kei tel hi. Ei lam a bel a dawr neite’n i puakna di penpen – cycle, rickshaw, adg. ah hong guansak toitoi mai uh. A tung lam bang a antang half bag a lei teitei di sa in khawtualte’ dawr ah ka lei nak ua, ka buaipih thei mahmah uhi. Himahleh a tawp in chu vaite a lei di a hihlam ka phawk ua, huchi’n ka zaangkhai tuan mahmah uhi.

Meh nek lam ah ei nek teng a ne phial uh. Anbong teh zaw nelou ahi di ua, a kizuak le ka mukha kei hi. Pateh bang diakdiak ei sang in a ne hiam zaw mahmah lai uhi. Bekanthu bang a bawl sam ua, a uih chik ngial hi. Sathu zaw nelou uh ahi di. Gawtuaithu bang le a bawl mai sam ua, hilele ka chiam khol kei.

Manipur bang zen kei lele bandh bang a om zeuhzeuh sam a, a bandh chiang in a zahtak mahmah lai uhi.

MLA election a hong om a, ei lamdan a vote zong a public meeting nei chih lah omlou, poster symbol tak lah muh di omlou phial, khawlai a motor khawng a flag a symbol kigelh khawng a taipih maimai uhi. A na omsate’n tutung election a thawm a ngaih, achi ua, en lah a thawm dai sa law mahmah kihidan ahi. Bangchi bang a vote zong uh ahia, chih tanpha a kithei zou kei maimah hi.

Hichi a kum khat hong kivei chu a na hi der mai a, ka sepna bang a kum paisa bangbang a awl tak a ka om theih zel di leh laibu hoih leh lungluthuai nei khawng na om uleh hon khak mai le uchin a diam maw, daih zezen awm lou vanglak.