Jordan Lui Panin Gilgalah - I

User Rating: 0 / 5

Star InactiveStar InactiveStar InactiveStar InactiveStar Inactive
 

JORDAN LUI PANIN GILGALAH - 1
(Joshua 4:1-21)
- Rev. Dr. J.M. Ngul Khan Pau

jmpaupu

Upna tawh Jordan guntuikhanglai Pasian Bawm pua siampite'n a siksuk uh ciangin leikeu tungah a khe uh kinga lianlian a, a luitui kikhen suakpah loin upna tawh a sikna ciangciang uh leikeu suak hi ding hi. Tuipi San a kan lai-un a tuipi kikhen khinin leikeu masa hi. Ahi zongin Jordan lui hong kan ding uh ciangin tui kikhen masa loin upna tawh tui siksukin tua bangin leikeu ngah uh hi. Topa in a gamciam hong tun taktak ding uh ciangin upna mah tawh lampai ding a kisapna leh tua gamsunga om mite zong upna mah tawh zo bek ding ahihna lak hi. Tuni in Gilgal mun panin a sin ding uh thu pawl khat kikum khawm ni.

1. GILGAL - phawkkikna mun hi (Aneu 2-7, 10):Israel mipite'n Jordan luisung tawnin hong kantan khit uh ciangin tua ciamtehna dingin Topa Pasian in Joshua kiangah Israel nam sawm leh nihte tang dingin suang siampite dinna munah phut ding leh tua ciangin luigei-ah phut dingin thupia hi. Bang deihna tawh tua suangte phut ding hiam cih leh nidang ciangin a tate un hih suangte' bang ciamtehna hiam a cih hun ding gelna ahi hi. Tua suangte a pau theih loh hangin a ging mahmah tawh thugen tawntung ding uh ahih man hi.

Topa muanhuaina thugenna hi ding hi. Topa Pasian in kum sawmli sung tawntung a kepna leh a thuciam ah amah nungkin lo ahihna ciamtehna hi. Israel mite'n thuman loin Pasian deihna zong loin a om uh hangin a thuciampa Topa pen thuciam pelhlo, muanhuai, kingak theih ahihna pulakna hi.
Khangthakte awlmawhna suang hi. Topa' na lamdang bawlte amau mit mahmah tawh a mu khang masate hong bei ciangin khangthakte'n tua na lamdang bawlpa a phawk ding uh deihna hi (Late 71:17-18). Nu leh pate'n amau nuntakna ah Pasian itna, thuakzawhna leh a mite nusia ngeilo ahih lam ciamtehna hi a; amau tate leh tute in zong tua Topa Pasian bek mah upna tawh khah loin a letkip ding uh lametna hi. Hih i gen ciangin i upna tate leh tute tungah kipia thei ding hiam? Ahih kei leh, bang cih leng khangthakte'n Pasian bek mah belhin nei thei ding uh hiam?
Lungdamkohna suang hi (Late 102:18-20). Topa in amaute adingin ama vanglian khut tawh a lamdang a bawlte tungah lungdamkoh ciamtehna hi ding hi. Tuhun ciang zong mualsuang Ebenezer cih kigelh tam mahmah hi. Tuni ciangciang hong tonpih Topa ahihna phawkna leh lungdamkohna ahih bangin Israelte in zong Topa tungah lungdamkohna suang phut uh hi.

2. GILGAL - tawldamna mun hi (Aneu 18-19): Gilgal mun Israel mite adingin a tawlngakna mun masa hi. Bang hangin Gilgal amau adingin manpha hiam cih leh, gamkeu lakah kum 40 sung a pai koikoina panun tawlngakna taktak mun ahi hi. Tua mah bangin gamciam sungah hong lut uh ciangin galdo ding tampi om lai ahih manin tawlngakna kisam uh hi. Tawlngakna a zat siam uh leh thahatna ngah ding uh hi. Nang zong na nuntakna ah galzawhna na neihna dingin tawlngak na kisam hi. Pasian adingin tha leh ngal limpiak nuam lua in tawlnga man loin i om thei hi. Tawlnga loin sep leh bawl ding a neite thupi i sa kha thei hi. I sep tam man maw i sep siam man, koizaw hiam? Hih dotna lite in Gilgal na kisapna hong phawksak ding hi.

Gim leh tawl na kisa hiam, gimna hangin sunglam hawmna, keuna na nei hiam? Pasian cih loh buang gim leh tawl thei hi. Gimna i cih ciangin na nasepna hangin gimna zong hi thei hi. Tuate panin zong tawlngakzia kisin ding leh, tawlngak hun kipiak ding kisam hi. 'Pasian in lei leh van leh a sunga omte a bawlzawh in tawlnga hi'kici hi. Amah a gim manin tawlnga hi loin, na thupite a bawl khit manin tawlnga hi ding hi. Nasep gimna sangin lungsim gimna puak-hakzaw hi. Tua bang gimpih na nei hiam? Tua gimna hangin sunglam ah keuna na nei hiam? Thungetna zong nei zo nawn loin, Lai Siangtho sim nangawn limna alna nei nawn loin na om hiam?

Midangte mawhna leh hoih lohna mu thei mahmah napi in nang kisapna mu loin na om kha hiam? Khalam ah i thakiam ciangin mite' hoih lohna kimu thei mahmah napi in tuabang hun ciang maisakna leh hehpihna kinei tuan lo hi. Amau hoihlohna pen nang' hoih na kisakna sangin sia-zaw in na muh manin amau cinlohna genin nein a hi a, ahih hangin nangma kisap lam na kitheihmawhbawl hi. Tua bangin na om leh na pumpi tawlngakna na kisap ban ah khalam tawlngakna zong na kisam hi.

Pasian in hong mangngilh maw, hong awlmawh nawn lo cih ngaihsutna na nei hiam? I pianthak hangin Pasian tawh kikholh gigena kinei tuan lo hi. I pianthak ni bangin kilungdam tawntung lo a, bah ni leh thakiam ni kinei ciat hi. Khatveivei hong mangngilh ahi tam cih ngaihsutna bang om thei hi. Pasian ta cihna kitelna i neihzawh a sawt hangin hong awlmawh nawn lo, hong khual nawn lo ahitam cih hun om hi. David in zong tua bang hun na nei hi (Late 13:1-4). Tua bang ngaihsutna na neih leh tawlngakna na kisam mahmah ta cihna hi.

Khalam thu-ah:Pasian masazaw maw, nangma nopsakna leh hauhna ding lunggulhna? Topa adingin ka kipumpiak hi i cih hangin i sepzia leh gamtatzia pen leitung vai mahmah kitam hi. Pasian gam sangin eima kipawlna i Pawlpi peuh ki-itzaw a, ama gam ading buaipih i kisak laitak in eima gam ading a manlah peuh na kihi thei hi. Pasian min suangin eima nopsakna nading inn leh lo peuh i masasak uh hi. Tua bek hi loin thugen ding a nong sap ding uh leh hihzah sum na kiging un peuh kici ngam zanzan hi. Pasian zat loh in inn hoih penpen ka om sangin ama kha ompihna leh vangliatna tawh bi innah ka om nuamzaw hi.
Sum leh pai hauhna pen Pasian in hong zat leh zatlohna tehna dingin zang himawk leng sawltak Paulte khawng bangmah nei loin na si uh hi (2 Tim 4:13-16). Sum leh pai neihna in kha tawh kidimna lim ahih leh mi siangtho masate nei uh cih thadah zin leh pemtatebangin amau nuntakna nangawn Topa' adingin na pia uh hi (Heb 11:37-40, 1 Pet 2:11). Hih i gen ciangin sum leh pai neite khami hi lo ci ka hi kei hi. Tuate 'tehna' in i zat khak ding lauhna ahi hi. Makaihzia kici laibu khatah "Mi pawlkhat amau hihna a kigen ciangdegree, reverend, sia, cih bang a deih vilvelte pen amau lungsim ah patauhna nei uh ahih manin mite simmawh leh neumuh ding a laute hi," cih kigelh hi. Pasian sungah i dinmun leh kipna a theiciante adingin patauh ding om lo hi.

Thukhupna
Hun ka ngah ciangin a zom ding Gilgal – thadimkikna mun hi (Aneu 8-12), Gilgal – guallelhna khempeuh nusiatna mun hi (Aneu 19-20) leh Gilgal – kipumpiak kikna mun hi (Aneu 20-24) sung kong gelh lai ding hi. A beisa kum sawm lai-in ka laibu sim Jesus for Money, Sex and Power cih sungah Topa Jesu i meetpih sawm dan nam tuamtuam kigen hi. Mawh maisakna leh hong tatkhiatna thu mah tangkopih in, singlamteh mah i thulu hi tawntung hen. Topa in na nuntakna kilam thakna, Amah tawh nisim kikholhna leh gahsuahna hong pia hen.