Community Development Society (CDS) Teamte toh

User Rating: 4 / 5

Star ActiveStar ActiveStar ActiveStar ActiveStar Inactive
 

COMMUNITY DEVELOPMENT SOCIETY (CDS) TEAM TE TOH
By Vungzamuan Valte

vungzamuan valte new

Christmas ma hilou, kumthak ma ngei a Bulpi lam phak ding kichi nanazenpi a, kumthak nung nangawn a hithei mahmah lou...

Lungkham beidong a ka omlai in zingnisuak toh kituak a thumanpha ahong suah ding lamen in zingsang walking ding le ka lunglut thei taktak kei hial hi.

Himahleh, thuhoih leh thumanpha lah hong suak ngei mahmah lou..ka beidong man sim aka ?

Ani in hon ngak lou ahih maimah chia....oma lam ah kithawnkik mai lehchu, imi isate gamtatna lam a khualzin ding simthu a gamla vong vong sin lua a...

Mung, nang koi a om e.. chih thithe dan lah omlou ?
Zingnisuak kilawm tak mai meizing nuai ah ka thoukhia a, ni 8.1.2018 ahi di e...

Santing lam ka mitmei in a zuan dundun a, Mission Compound leh Tipaimukh Road ka mitkha ah a thamden maimah hi.
Ahon pick up hial unchu dak 7 ahita a, beidothuai simta hi.

Dak giat in Sarah ahon pick up pih hial unchu Vitamin mumlian mu mah bangin ka mit a vak kuau mai a...ahong chiak taktak ta chu dak 8 in ka kipankhe thei khong khong uhi.

Mizoram apat 1994 a ka zineih dek lai a ka phut phei nungnung lai khawng mitkha ah alang dundun mai a..
Bulpi ( root) lam khualzinna zaw awl inah aw ?
Thanlon ka mialtun kei deuh ua, nuam hunlel in ka tung uhi.

Huih anung huau huau mai a vot chihtakpi in avot tonton mai hi. Tui kikhoh ging biahbiah ten lamdang hinkhua hina e, ahon chisak a, Thanlon a tui a haksat dan theilou honsa umaw, chi in, nou tui koi apat nalak ula?

Dialkhai khawkhung a luitui ahi chi uhi, zouzen, km 10 val pha eitel voi.

Ka buai chelchul ua, rice mill unload in ka phe tengtung hial uhi.

CDS te Resource Centre heutute toh kimaituah ut mahle ung singpikhum ngingei dawn masak ngai hi.
Resource Centre heututen ahon ngaklah mahmah mai ua, singtang aksa sihzou toh limtak a pok nek ding ngaklah hilou in, kimelmuh ding ngaklah ahi zaw ding un ka gingta ?

Lamka ah 4 degree ahi a, huih vot hiauhiau toh Thanlon ah 2 degree centigrade nuailam ahi di e, DS inn ah ka paiphei u, mehpok ka hawp khawm nuaunua uzaw damman om takzet ahi e!

Giahna ding mun ka lungkham sim geuguau a, vot lawtel mahmah ahihna ah ka chimul athou sungsung hial hi.EBCC DS pa inn ah giak ding kahih dan ka theih in khamuanhuai mahmah mai a, ka tawl adam huai hial hi.

Nitak dak 6 a EBCC English School ah kimuhkhawm ding chih himahleh, Forest te guest house a omlam kithei suah panpan a, huchi in bank Manager pa toh sawtpi ka va houlim kha nilouh uhi.

Resource Centre kichi phatuam ngaihna thilthawnpiak ahi a, CDS team te nasepna phathuai kasa petmah mai hi. Nitak dak 7 in school lam ah ka kaltou ua vanlam i et chiangin a vak phengpung mai a, ka vandakdak nalam ah ka kusuipai dekdek phial hi. Zuheisuktun, Chongmawi, Hrangchhuan ( Venus and Jupiter) chihte khawng khut a lawng phak ding hile uh kilawm ua, ka en chimthei kei hial hi.

Tutmun a, athawn a neih leh neihlouh thu hilou a, Resource Centre ten naupang 50 ding khawng nitak dak 6 apat dak 8 kikar teacher, a enkoltu ding hon kipia a, kum nawn chiangin nupi papi te bangzah in nahong pang thei ding ua, chihdan hipah lou in, i hamphatpih uhia? Sutzop tuak isa uhia? Chiin Mumung in hon vek pan hi. Ka kisuanglah sim pah a, Mung, sutzop tuak hilou maw? Chihdan in lungsim ka neipah mawk hi.

Inverter apia ua, semtu mi 2 loh nei in akoih uhi. Microphone le om hileh kilawm.

Nupite ahong paukhia ua, lou nasem leh lai siamlou kahi ua, huchidan a naupangte enkol a, naupangte lai hilh leh sinsakna ten, phattuamna tampi tun ahi achi uhi. Kou, nupi mawl chikchik hile ung le, singkhuah, maipuang, balke, nahtang, gawtuai, malta khawng zuak in pan kon la tei ding uh. Hiai, Resource Centre khak hikei hen achi uhi. Kipahna mittui aluang lou thei kei.

Khawpi a naupangte sangin a houpih tak zaw ua, naupangte khut ah mobile phone a om kei a, network muhlouh ziak ahi ringot keihial.

Nupi khenkhat ten, Kawlphemeivak aom ziakin Arirang abuaipih panpan ta uhi.

Nitak dak 8 in ka kikhen ua, lohching ka kisa mahmah mai, aksite ka entou kawm jel a, gallam ( Kaihlam tang) amial bekbuk maimah a, step a kituan suk bouhbouh kawm in theihlouh kar in ka giahphual dingmun pa Song quarter ( EBCC DS) ka tungsuk pah uhi. Local Pastor te toh houlim khawm in dak 10 tan manphatak in hun ka zang thei uhi.
DS pa'n manpha asa a hinteh, zan khat bek giak lai dingin hon khou hilhial a.. ken le manpha kasa a, lungdam peuhmah ing.

Khovot hiaizah zouzai nuai ah, Moreh blanket nuai ah ka ihmu hithit maita a, Tunitan in Resourece Centre leh CDS te nasep ka mitkha ah thamden lai hi.

Hiaibang nasepna etton tak mai hilou in, mundang leh khaw tuamtuamte ah paisawn' sak theihdan om hileh, i Bulpi lam kip semsem dingin gintakna lianpi ka nei hi. Hiai in lunglawpna leh thathohna nasatak in hon guan hi.

I bulpi lam Zodawn ahi kei, Singtang lam ahi kei, i mimasate' kipatkhiakna, i pupate khankhiakna, leh i khawpi lam ahi zaw hi.

What can I do? Ka chichi mai...