Sumkung Khenkhat

User Rating: 0 / 5

Star InactiveStar InactiveStar InactiveStar InactiveStar Inactive
 

SUMKUNG KHENKHAT
By Vungzamuan Valte, Columnist Zogam.com

vungzamuanvalte buktep

Singkung tampite lak ah khenkhatte poimoh diak ua, zatna ding tamtuan sese  om uhi. Gamlak aa poumawk mawk, inngei khong a pou khenkhatte, leh suanthoh zong om  ua, a poimohna theihloute a dingin zatna bei hithei veve hi.
 
BAMBOO: Ei Zosuante a dingin singkung  diktak hikei mahleh, GUA (bamboo) poimoh petmah a, a zatna ding pipu ten thei tam ngial uhi. Huandai leh gamgi chiamtehna  khongin suan tangpi ua, I gam toh kituak in hoih mahmah nguaknguak uhi.Gamlakpi ah pou ngekngok thei ua, agam agam in gua leh mau simsenglouhte pou metmot maimah uhi. Tun bel I vatmang ua, I haalmang gawpta ua hiven. Kum khat leh nih sungin piching zungzung mai ua, kumteng in selnou tuaidawng tampipi nei zawmah uhi. Gawtuai hing, gawtuai thu, gawtuai hou, leh tuaiterek (louhaal tung a omte) mehlimtak suak ua, singtangpa khaalmeh muanhuai leh ginom ahi ngitnget hi.Gawpum taknailoute nanglem dingin kila a, seeng, lohpi, lohneu, bempi, bemneu, leh innsung van tampitak hiai gua apat kibawl thei hi. Inn bawlna ding, a sual ding, a tung ding, a baang ding, leh kongkhaak dingin kizang tangpi a, lupna ding nasan in kizang thei hi.
Gawl/kelkong/sialdai/dai umna (fencing), ngawi dohna, thaang kamna, banah keupi, keuneu, tutna, zuthei, tuithei ding khawngin zong kizang phatuam mahmah hi. Silchar gei a Hindustan Paper Mill tawmtupen Mizogamte gua leh mau ahi hi, paper bawlna dingin poimoh petmah hi. Tuni chiangin furniture, handicrafts chituam tuam, incense stick bawlna leh mechanized bamboo-ply (plywood dandeuh) leh adang dang thilphatuam tampitak dingin bamboo products kizang thei hi. I gam hauhsakna I mansuah hangin, I gam honnuse mawk lou in, I suanna mun peuhmah ah ginomtakin pang fanfan a, naapitak a kichituh thak leh piibawl thak dingin kilawm mohlou hial hi. Gawpum khat vaigam ah cheng 80 apat 100 khong man hi, ei gam ah 30 khawng 40 khawng manta hi, I gam awng neih heihuaite ah gua leh mau hahchiin in chiing leng, environment protection nasepna hoihtak banah, sumnaak hoihtak suak ding hi.Soil erosion leh menchim chihte naktak in dal thei zawmah hi.
 
NEEM KUNG: Vaigam ah singkung khenkhat sumkung chihtheih omtham uhi, adiakin NEEM TREE kichi tampetmah a, zattheihna tampitak neitei khanglang hi. Neem teh (leaves) hing dipdip pen anti bacteria properties hoihtak nei ahia, neem teh nek leh atui dawnin sungna (ulcer), sinna (liver damdoi), sisan siangsak, natna hik vengtu (immune system panpih) chi uhi. Neem teh  hoihtak a gawivui pen cosmetic tampitak skin care products, toothpaste, mouth wash, hair oil etc. in kizang tangpi hi. Nem gahtang apat kibawl khia neem oil pen insecticide hoihtak hi a ganhing thahna dingin organic farmer ten hahzat mahmah uhi, mosquito repellant, neem soap, neem shampoo, lotions leh cream dingin hahzat petmah uhi.

A phat vanglak ten hiaidan in gen hial uhi:

It is extremely effective in eliminating bacterial and fungal infections or parasites,
Its antiviral activity can treat warts and cold sores,
it soothes inflammation and reduces redness,
it moisturizes the skin and keeps it supple,
it can even lighten scars and pigmentation.

Neem kunghawng (bark) pen hana damdawi, kamna damdawi leh hani-na damdawi in kizang tangpi hi. Neem oil lakkhiak nasa a ekte, neem cake chi ua, fertilizer leh ganhingte nek dingin zangthei lai uhi. SUAKLU kahiang I khiak khia a, I haizaan a, hanawtna dingin I zatleh kam siang ut mahmah hi, ha zong siang seksok, Neem kahiang huchidan mah in hahzat mahmah ua, hoih mahmah dan ahi hi.
 
MORINGA: Drumstick singkung (Moringa Oleifera) India gam ah tampetmah a, azatna ding musuah thakthak lai uhi. Drumstick ichih meh lemtak ahia, South Indian cuisine ah telmamoh hi.Moringa in ganhing hiip se a, theikung dangte ganhing anesethei tuamtuamte apat vengbit thei hi.A paak nektheih himahleh agah mah poimohpen ahihna ah a paakte kilou khollou hial hi. Drumstick in guhnatna (Osteoporosis) damsak thei a, arthritis natna zong daitheu thei hi. Numei gailai leh naungek neite atui dawnsak sek uhi. Ayurvedic drug tampitak bawlkhiakna dingin kizang den a, cancer natna damdawi ding nasan in hoih ahi chi uhi. Guhna, thana (nerve) damna dingin oil balm bawlkhia ua, massage na ah hahzat mahmah uhi. Moisturizers, skin care, perfume ding khawngin ancient Egypt te nasan in zangkha uhi. MorInga gah keu gawivui in, tuiniin siangsak thei a water pollution control nading in hoih mahmah maithei hi. A phatkha vanglak ten: “FROM DIABETES AND ARTHRITIS, TO DETOX AND MENTAL CLARITY, THE MORINGA IS TOUTED AS A VERITABLE TREE OF LIFE” chi hialthok uhi.
 
MAHUA (Madhuca longifolia) kichi singkung liantak leh sangtak suakthei hi, Central leh North India ah tampetmah mai hi. Hiai singkung pen sumkung ichi hia, singkung ah zu pou ichithei hial ding hi. Metre 20 tan khawngin sangzou a, singkak bekbuak, nah liansim khehkhuah leh khawlum nisa liimnuai bawltu hoihtak ahi hi. Mahua pen Central India aa forest dwellers (tribal) ten keptakpi in kembit ua (protect) biak-in nei hialthok uhi, banghang hiam chihleh, Mahua kung neilou ten zi zong muzoulou lawi om uhi, kung 3 tanbek, kung 10 tunglam neite bel pasal ding a neihtak chithei tribe khenkhat omlaitel uhi. Mahua nah (leaves) pen silh worm chikhat vakna dingin hoih a, tassar silk chikhat bawlkhe thei hi. April leh May kha in Mahua paak sesua a, gahpanta hi, himahleh a paak hunsung sawt hetlou mawk hi. Hiai hun pen, hun poimohtak mai ahi a, ngaklah takin vil thithe hialmah uhi.Gamlak ah vak ua, singnah keu sipsiapte sikpuak giapgiap in, mahua pakzu gimnam vingveng ngaklah petmah uhi. Neulai a Christmas hongtung ding I ngaklah sangin ngaklah zawsem uhi. A paak chiangin, huihkhua teng zelsuak a perfume namtuitak bangin huihkhua zelsuak hial hi. Lungleng zaw ahi ngei ding ua, khawlum phawklou hial in, khavaknuai ah zawlluite ngaihna la sa ua, gamngaih la sa ua, I ngaklah Ni tuang hongtungta chi hileh kilawm hial uhi.......

Mahua paak ahihleh lianlouchik ahia, nitak in pakkhia a, zinglam dak nga velin pulhkhe phungphung mai hi, himahleh agim namtui viuveu hi.Mahua kung khat in paak kg 50 tan khawng suangkhia a summuhna hoihtak suakthei laizang hi. Glucose/sugar content (68-72%)hoihtak nei ahia, khum didi in nektheih jiang maidan ahi, himahleh mawk nek pen hoih khollou hihtuak, mi haisak thei chizel uhi. Food supplement hoihtak hi a, kawltu omlouhna ah sugar chikhat danin tribal ten zangthei uhi. Vasa ten a paak zukhum a tawp khak chiang un buaithei hial uhi, kham chihdan pian in leng kawi doidoi ua, leilak khong ah nuihjathuaipi i om thei sek uhi. Gamsa chituam tuam in duh mahmah ua, sakhi, ngal, vompi, sihal etc. in mihingte zingthohma in ne sek uhi, asung uah ki ferment hiven, kham thei mahmah ua, makpipi in omsek uhi, mahua kham a lum beibui chih khawng. Gamlak ah nisuah ma in mahua paak zongdingin kuankhia ua, aneu alian chih omlou hial in, gamvak souhsouh maidan ahi uhi.

Mahua paak zatna lianpen bel zu dingin bawl ua, bel ah tui toh a koih chiang un amah ki ferment maidan ahi hi. Nganhuan kichi, distillation bawl ua haat mahmah fife hihtuak. Khatvei 1991 in Bastar region ah, tua hunlai in Raipur District nuai a om ahi, village visit (foundation course) in hohkha ung.  SDO pa`n hong kha hiven, local drink om ahi, hoihtak a distilled and bottled ahi, lauhuai lou, na chep ut uleh chiin bottle khat hon pia hi. Village ah haksatak in va kikhawsa a, nitak khat lawmte toh ka beita uhi, numei thum toh pasal li ka hi ua, hoih a diam a, laithai kimawl in ka zanhak dek phial uhi. Tun bel Chatisgarh ichih ahita, tribalte ngawlsak zou tuanlou chi in government in distillation factory ah bawlsak hi, siangthoutak in leitheih mai dingin zuakkhia mai uhi. Essential drink danin nei ua, a culture utoh kizawitawn mahmah a, festival chiangin amei apa in dawn vek mai uhi. Inn teng phial in zu bilh ua, kum tengin hiai zu a dawn masang un a pathian kiang uah kithoina nei masa zel uhi. Village visit a ka chep chihlouh huaiban zaw chiam khan nawn vet keng.

Mahua gahtang pen oil hoihtak lakkhiakna dingin zang ua, kerosene omlouhna ah lamp oil dingin zang thei uhi. Mahua oil leh paak gawivui pen natna chi tuamtuam TB, malaria, ulcer, snake bite, scorpion bite, fungal infection, asthma, rheumatism, headache, constipation, pile, blood clot, blood disease, tonsil, leh taksa sung, gilsung a parasites/worms beisakna dingin hahzat mahmah uhi. A paak leh a kung hawng (bark) skin diseases tuamtuam (etsakna dingin eczema) damsakna dingin bawlkhia ua, damdawi hoihtak suak thei hi. Hiai oil hoihtakmai hair fixer in zang zawmah ua, industrial production in bel ethanol (bio diesel) dingin hoih mahmah thepthup zel hi. Hiai mahua oil pen edible oil hi a, sahbon bawlna, candle bawlna, grease leh cosmetic tuamtuam bawlkhiakna dingin kizang thei hi. Oil sukkhiak zohna pen cake chimai ua, nga matna dingin hoih vial laizang hi. Manure/fertilizer ding zong hahzat mahmah lai uhi. Mahua sing pen timber hoihtak ahia, furniture nalh taktak bawlkhiakna dingin zattheih a, source of fuel (wood) poimohtak zong ahi veve. Tuateng ziakin, Mahua singkung lian taktak neite bel kisathei mah uhi, oil pen ghee danin zong bawl ua, tuaziak mah ahi ngei ding “Butter Tree” a chihna ziaktak uh. Mihing lakh tampi petmahte kingakna singkung ahia, nektak muhna, sum muhna leh industrial production tawmtu (raw material) liantak ahihna ah, government in bildoh mahmah a, research nasatak in bawl uhi, forest dwellerte khankhiakna singkung ahong himah na! Sumkung leh zu singkung a pou ichih kha dik mahmah suak hi.

I gam ah singthupi inei uhi, hoihna tamkuamtak nei dingin gintakhuai hi. Sungna, BP, santen, leh adang dang damdawi dan a zattheih ahih ngei I lam en. Phukmang mai lou in, suan zaw le, study bawl in damdawi hoihtaktak bawlkhiakna di`n zattheih ngeingei ding hi. Phuinam ngialhouh hoih peuhmah hinchin, zunkhum leh BP a dia genlouh a damdawi hitheijiang maidan ahi, ANSA bangtuh tawlung neite damdawi hoihpen hi`n maw!  Kawltu ngialhouh e`n, kurtai bawlna hiam, kawltu tui sukding leltak a I koih, mi`n sumnak suaksak ua, distillery ah I gam leh nam in I poimoh mahmah ngen pawtkhe zungzung maidan hi`n maw! Grape, sapthei, kawlsing leh suaklu apat bawlkhiak theih, thil phatuam taktak tampitak om hi. Zongsuah le, I gam ah thil thupi piang mohlou hial ding hi.