Kiphunok

KIPHUNOK

~Vanlallian Valte

vanlallianvalte new

Kum 23 val paita in Delhi a North East Delight khang suk lak khawng bangkol station mun poimoh mahmah ahi lai. Htp Chinsum' sanggamnu in kuva zuak a, G Thangpi' nu in tual-tuibuuk nei sek hi. Huchilou, Eimi business hih atam nai kei. Eimite’ bubitna deuh ahihleh Bhim Singh Tokas Building ahi.

Thanghun & Vanlalsiam te lawmta le Delhi hong tungsuk un hon ‘U’ bawl ua, ken le ka nau et pah hi. Thanghnun ngialhouh apa' pute ka hihna uah ana 'tupa' bawl didan zaw hiven. Ni khat Munirka dung-le-vai ah vialvak uhi. Bangkol khihna kiang ah pitek jalebi tutpih mu uhi. Mehpih dia tuisik zang a ahon zial ualeh kg 1 tuak gai uhi. Inn-ngak te nekdi kg kimkhat puak uh. “Kholum hiai bang ah jalebi khawng duh mahmah khang!” chi zenzen uhi. “I hon puak zoh sunsun duhlou, na ki-awi ua leh nou thu!” chiin gai suk navaak uhi.

Ane thei ua, zu-le-sa a kibual lou chihmahtak a sapian uh hoih tuak hi, kolbot bangmai ahi uh. Hinapiin mi zaidam, kamdam a mi kinialpih nilouh theite ahi uhi. Mi’ simmohna kampau leh gamtat bel chillum toh le valh thei lou uh. Ni khat Nanakpura Veng lam ah ana huchih kha uh ahi dia, amau lawmta kia pang in vaite toh kihon sual muatmuat uh. Live telecast muhnophuai sim akhu! “Traffic dakkal bangzahhiam jam ahi!” chi hial uhi.

Traffic jam: Mailam a motor kivual atam luat ziak hiam, lampi khaktantu a om chiangin maban suan theilou in taang uhi. Agen kinaihpih khenkhat: traffic tie-up; blockage, bottleneck; gridlock; logjam; roadblock; rush hour; congestion; hold-up/back; snarl-up; deadlock; standstill; impasse; stoppage; entanglement; mobbing; stalemate; obstruction; stagnation; cramming; slow-down/up; queue line.

Lampi neu gawp: Diesel auto te kia mohsak hun hi nawnlou. Two-wheeler a walking te mah hivehang aw abuaihuai! Lampi le neutuam lou a, mihing leh gari mahmah pungsot lua in chep gawp hizaw hi. Etsakna:- Churachandpur a vehicle gelhlut thak 385 ching tel lawmlawm hi.

Khodang a pai diing Bus parking di hoihtak khat omleh hun. Aziak bel, Lamka leh asehvel a om mihing tamzawte pawt maimai hi ua, va parking doidoi peih a om le ginhuai kei. Lamlian dung ah bel bus/auto stand mun poimoh teng ah om henla, parking phal hikei leh.

“Oneway system plan hoih tak bawl in zang le hilou hiam -Thangzam road, Red Cross road, Salem veng road, Phailian road, Tawna Road, Lailam veng road, Rengkai road, Tipaimukh road chih te zang vek leng motor traffic hichi tel a buai kai lou non ding in um hang” ichi, Ka gingta kei, ‘good citizen’ himasa phot ni. Circular/Ring road chiin Tedim road kualkhum zaw uhen.

Give way/Yield traffic: Lamsuk-lamtou ah van-gik pua gari lampi awn ni. Round-about; merging traffic & intersection ah veilam a gari hong kigolh lampi ot kilawm hi. Traffice rules, signs leh symbols a poimohna munteng a taklat leh zuih kisam petmah ta hi.

Lamka khopi sung puahna dia sum hongpai sutvom tan a tuatkhe thei te lah paungam lou, bang igen ta dia!” Mimang i zon leh vang nuam mahmah hi. I zon in gammang ahihlam atheih kei ngialleh thil haksapi le hisim lim. Nu Neihthang hia choh apasal, G Nengzathang? Gou thelthang na kep tam luat leh na sunnung hun a na ngaihtuahna traffic jam saktu lel ahih ding pilvang in.

Namthil ah le hihna kibang; ngatna lam kikhat; zuanna dang lou sapsap ton khawm thei ihih kei ua leh le, atung masa kituh lou in lampi kiawn le vualzawlvai zaw hiven maw!

vv’Laidiip/19072018