Siamtu' Hatkhumsa Na Khawnvak Hekmit Mawk Ken!

User Rating: 0 / 5

Star InactiveStar InactiveStar InactiveStar InactiveStar Inactive
 

SIAMTU’ HATKHUMSA NA KHAWNVAK HEKMIT MAWK KEN!
~ Vanlallian Valte
vanlallianvalte 
Leitaksa pawtsan dia man kisa nai tadihlou leh sih-khamuanna takngial le tanglou tampite chinat ziak in mitsipaisuak ta ua, hong huchi tou zel diing hi.  Deihlouh tuak a saaksih guih lah omden.  Damlou gim, sihsual, sih di sihlit a lin, etmai hita te leh; sihsuk mai lunggulh lah si thei himhim lou kikaal zaw agamla mah ve! Hing nuam lai zenpi khailup, ngawngtan, dawtlup leh kaaplup tampi a omlai in lohsam kisa, ngaihlouh kisa leh mabaan bing sa a mahni hinna laa a tualthat kisuah lah beilou – a taanggam hiin phaigam ah hileh, huiha!  Khovel kitaitehna, ki-elna ah kuhkaltak a taidimah ahihlai in lohsam-proof a galthuam kuamah omlou ahihmanin: lohsapnate zillai hoihtak suahsak pilhuai zaw hi.
 
Kholai a nekdi zong uital vialdian na mu ngei tham dia –  niin kholkhawmna lak peuh a nektheih-nekmoh ne dek kimlai vengsung naupanghon in aden bauh kongkong uh na tuakkhak taak ka gingta.  Nang le na deng hiam, na tawpek ka-ngang zuuk-zuuk ngei maithei.  (Uinou leikou daan chu – a sapum koisan hiam  awlsim in deng him dih le, a khe peuh baaisak mawk hiveh aw!)  Awle, uital in a nektup pen (ek-free khawng) nek teitei diing dan gel in kulkal leh lungkelou in pang chinten hi.  Gilvah khop a ngah chian bel, ning khat ah lungkimtakin kual e! Mit lang khat kia bang siing deuhvel veh!  Khovel mundang phawkban himhim lou a’itu.
 
Chetan Bhagat in a laigelh khat ah, “If God wanted us to take our own life, he would have provided a power-off button,” chi hi.  Gen nalh ka sak kawm-kawm in power-off button nei maizen le a venbit hautak nanchia chih hon ngaihtuah sak.  Midang toh kinak ni-khua in; nupa lupkhawm ton; leh, games kimawl chiang bang in pilvan ngai viau maithei.  Himahleh a bawk-bilbel mahni ki-hekmitna di piak hilou hang a, Pathian ah muanna koih in lametna toh daak kimvel le i kungtung a A thilhoih tup hong tangtung diing hi. I hinkhua haksa in i thil tuah te’n hon vit teuteu zongleh uital bawn lungke lou b’a ei apilzaw lungke thahah di ihia?  Uipi vak-hat in saguh a tuah voi!
                                                                                                                      
Khami viau hang la, ginna ah hat huntawk lehang le - khovel bei dong; tatna bukim i tan masiah, Adam khelhna ziak a hamsiatna bei louhial diing hi.  Himahleh laphuaktu khat in, ‘Nang na om leh lei, van a suak sek’ achih bang in Pathian ah kituluut zou peuh le gingtuten huai haksatnate i nuaisiah thei tham uhi.
 
Huan, mi kuahiam lungkia, beidong tawpkhak kisa theih na neih leh panpih diin na kalsuan muangsak ken la, thukhentu’ bil in a thugen te ngaikhe saam ken.  Pathianthu pansan in na thuhilh thei kei ahi maithei: Pathian hon piak na pianken khuak pilna toh houlimpih tiautiau kawm a gingkhelou thumsakna in gahsuang thei hi.  Paracetamol leh pain-reliever peuh tahbawl nilouh lou in - a poimoh anti-biotic choh zaw zeel ni maw.