Deih La Bang Deihlou Lah Bang

User Rating: 5 / 5

Star ActiveStar ActiveStar ActiveStar ActiveStar Active
 

DEIH LA BANG DEIHLOU LAH BANG
~Pauzagin Tonsiing

India Ki-ukna Danbupi Khenpi Gukna nuai a Manipur Tanggam gelhlut diing chih i deihdan uh ahi. Hiai ah chu taise lua om keile kilawm ka sa. A deihloupen kichi Gallengte inle hiai tan kan tunglou diing uh ahi chih amuhdan uh ahi hi. State ngen in homeland ngen in sovereignty bang ngen mahle i kiatna diing uh zaw hiai mah hong hi di hileh kilawm hi. Ahihleh 6th Schedule i deihna ah thuneihna bangteng deih i hi ua chih i chian uh hun mahmah hi.

Niam gen deuhle, "Manipur Hill areas ah 6th Schedule ka deih uh," i chihchiang ua India Constitution amendment hon bawl sak unla Schedule 6na nuai ah hon gelhlut sak un i chihna uh ahi. Hiai Schedule 6na nuai a hong kigelh lut chiang in a huam di sung, a paidan di, thuneihna tuamtuam chihte toh hong kigelh khawm diing ahi hi. Tulel tan ah hiai nuai a gelhlut di deih chihtan ahi a thuneihna, paidan di chihte kha i donsak khak nailouh thil uh hileh kilawm hi. Athei zaw deuh kichite'n huaite a hoih, hiaite a hoih, Bodo-te a bang le hoih chih khawng in i gen tan lel khawng uh hileh kilawm hi.

Nungkik zualle, Parliament in Manipur a Autonomous District Council Act, 1971 a pasik lai ua tua Schedule 6na nuai a ana gelhlut khit didan ahi. Ana hikhata lou ahih chiang un kikhel hiphot, tua ADC Act i zatzat un singtangmite kiang a kivaihawmna kichian leh thuneihna kichuup pelou ahi chih ziak in kum 10 vel zat nung apan in, 1982 vel in, Manipur singtanggam pen 6th Schedule nuai a gelhlut dia hoih sakthu Parliament na tawm ah le ana kigen khin tham hi. Himahleh kum 30 nung inle 6th Schedule nuai ah i om nai tuan kei uhi.

Akhenchiang in 1980s vel a Zogam UT nget taktak lai ua i kithumopna khawngte uh lungsim ah hong langh dundun sek hi. Aphualpi a ki-omkha a, nasa lawtel ngal e, singbul suangbul teng a Zogam UT chih kigelh suak himai. Ahihleh UT bang hi hiam chih kidot chiang a theihbeh nei tuanlou, "Hoih a hoih" himai! Hoih lua in chin UT ngah chiang a zawngtah bang helicopter a lou di, UT ngen a buai in louna sem manlou nupate bang in chu UT muh chiang a 'siik-niik' kileisak diing chih khawng hi in chin.

Huai nung kum 30 nung a khosa leh hingte'n le 6th Schedule muh chiang a sepna bang tam di, sum tam di chih khawng a kikhem lai i hi di ua aw chih ngaihtuahna ah om mahmah hi. Ahihleh 6th Schedule deih taktak i hihleh bang tak deih i hi ua chih kha chiantak a houlim hun mahmahta hi.

India Malsuan Bial a District hunkhop ah hiai 6th Schedule ana kizang a, hiai a kizatna sate lak ah bang hoih a bang hoihlou, amau a dia hoih ei a diing in a hoih diam, amau a dia sia en zattak i suah thei diam chihte gelkhawm leh sutkhawm ngai hi ve aw. Tuni chiang a ei lak a thei deuh a kineite bangle self-study ana bawl peihte kihi lel lai hi. I tuahkhak louh thil ahih chiang in tuamah ahihphot chu ngai ahi ve. Academic deuh a research ana bawl ek a, huai a muhsuahdan gen leh gelh kha kitawm mahmah lai hi ve aw. Tua ei genkhawmdan lel chu Laisiangthou mahni utdandan a kaih toh kibang sim in chin, Acts/Rules chihte khawng deihkaih luat theih hiam thupi tak nawlkhin khak theih chih bangle om hi ve aw

Huaiziak in, 6th Schedule deih taktak i hihleh bangtan deih a bangtan deihlou di, thuneina bang teng deih a, koi a bangchi paidan neih diing hiam chih i genkhawm uh poimoh hi. Tuma I houlimna khat ah Khasi khotate a va khosa talpakte khat in Khasite khanmoh bawk a agen chu 6th Schedule ahi chi thepthup hi. Village in thuneihna tawisang lua in, huai a thuneihna uh zat siamlouh ziak ua a khuate uh khangtou theilou chi hi.

Tulel a i theihdan in hiai 6th Schedule kizatnate lak ah Karbi-te aa leh Bodo-te aa hoih a, Bodo-te bang in thuneihna sangtak tawi uh chih i muhdan uh ahi hi. Ahihleh a thuneihnate uh bangbang a chih kidong lele thei tuanlou di, 'Hoih' chihtan a thei top hile kilawm hi. Huai sang a thuukzaw a i theih uh kisam hi ve aw. Amau a diing a hoih mahmah ei a diing in a hoih taktak diam chih bangle vel khawm a, genkhawm a kikupkup hun ahi. Deih taktak i hihleh. Kuahiam in ana sim tawm pulpit sermon pongpong a pianglou di hi ve aw.

Abu ah thuneihna sangtak kigelh mahleh a zattak hia? Ahihkeileh zattak louh pi a bu a om biaubuau hia chihle i theihlouh ahi hi. Huan, dan (acts/rules) kichi, atung a i gelhsa bang in, lehdan tuamtuam a om thei a, kaihkawi theihdan tuamtuam leng a om thei hi. Tuma in Pu Dr Th Siamkhum toh ka kihoukhakna uah, Bodo-te aa hoih i chih hang un huai chetchet ei hon pia hile uh ahoihlouhna diing ahihleh State kibanglou ahi hon chi a dik mahmah diing in ka gingta hi. Agenzel na ah, Assam in Bodo-te gam etlah saklou ua Manipur in ahihleh singtanggam enlah uh ahihna ah a sung a dan kikhungte heikawidan di om a, huaiziak in tua chet ei hon pia hile uh zattaklouhpi bangle suah thei uh chi hi. Tuadan hon pe diing in ahih uhleh ei toh kituak dia behlap tuak bangle om didan hi ve aw.

6th Schedule deih chi hetloute'n le deih, deih diak a kigente'n le deih, deihlual sim vek kihi. Huchi ahihna ah i deihdan genkhawm a, huai mun dang a kizangdan chet pen ei a dia zat teitei di chihna omlou a, ei toh kituak diing bang teng hihiam chih genkhawm ngai hi ve aw. 6th Schedule nuai a hon guanlut taktak diing ahih uhleh huai hun chiang a 'Ka deihdan uh hiai bang ahi,' chih luikhiak theih ngai hi ve aw. Ana om khin ahihleh lah kipahhuai, hilehle mi bangzah hiam kia in i deihdan uh a theih uh huntawklou diing, kihoukhawm a genkhawm kheukhou chi hi ve aw.

© Pauzagin Tonsing | May 8, 2017 (7:43am)