MANIPUR SOLKAL APANG ZOU DIAM?

User Rating: 0 / 5

Star InactiveStar InactiveStar InactiveStar InactiveStar Inactive
 

MANIPUR SOLKAL APANG ZOU DIAM?
~ Pauzagin Tonsing, Columnist Zogam.com

pauzagin

Vaangvot dung gial hiikheek zozen in a hon tawp vaanglakleh a vah mahmah hunsak hetlou in chin, a vah luat mahmah chiang a tawpkip zou nawnlou a tuukkhiak thoh leu mai hi in maw. A vah ma chu lakkhiak I sawmleh a hon tawpna muuk lam kia hilou a ataw lam aletkipna mun na tawp san hiikheek in chin. Manipur Solkal bangle vaangvot toh a kilamdanna om lou a hi dia aw chih sim in a om hi. Manipur solkal I chih chiang in phaizang mite chi in sim in, singtangmite tawp dia zong a kipel ngolngol vaangvot bang toh the theih uh hilou hia I chi hi.

Lungkim theilou hial a singtangmite hihna suhsak a, a hamphatna di tengteng uh dal a, a neihsa tengteng uh laksak a, a tawndan uh nuulmang a, ahihna uh mangngilh thei di khop a singtangmite nuaimaai sawm uh hileh kilawm hi.

Manipur University pen Central University a hong hih tuunglai in kithalawp tah in Central Reservation zui pah zat ua, singtangmite’n gen di I thei kei ua I dak heuhou uhi. Hun sawtkuam tuabang a om nung in reservation toh kisai in a state toh kituak a zat diing dan a hon bawl nawn ua, singtangmite hamphatna diing ahih tak in zat diing a lin ngoingoih uhi. Zatlouh theih teitei a sawm ua, pan a la ua, I dalzekleh OBC lamte bang a hon dousak dek lai uhi.

Kinoh deuh in dan tuamtuam a hon bawl ua, singtanggam hetkha leh gamlaksakna diing a hon bawlkhum ua, pauthei taktak lou in a hon koih uhi. Adan bawl tuamtuamte ua a kiseelgu tuamtuam om toh gamlaksakna diing ngen ngimna ahitangpi hi. Kilawm tak in singtanggam khantouhna leh changkaanna diing chi khempeuh uhi. Hiai Manipur solkal in singtangmite hoihna ding leh khantouhna diing deih taktak hileh tua Phualpi solkal apan scheme leh program om teng kia le hoih tak in hon pichin sak hileh changkaanna diing a om mahmah diing hi. Singtangmite hamphatna dia Phualpi solkal in ahon piak tengteng heikawi omlou in singtang gam tungsak vekle uh leng a hun tawk mahmah diing hi. Himahleh phaizang mun neuchik a mi tampi omte in neekguuk theih teng negu a, vaangvot bang a a tawp theih tawp ua tawp kang nung a singtang gam hong tung pan lel toh singtangmite itna a neih uh pen ngaihsiam haksa mahmah hi.

Singtang gam hoihna diing leh khantouhna diing awlmoh taktak ahih uhleh I gensa bang a Phualpi apan hamphatna di hong paite hon pele uhle tua lehza inle kikhangtou ding hi. Tua naksang in awlmoh leh hoih deihsak bang in singtang gam khantouhna dia hoih di hi-awmtak in dan tuamtuam hon bawlkhum ekek lai uhi.

Hausa nei I hihlam mit a hak kelkul in a heem a Hausa hepkhiakna diing in Village Development Council chih peuh a hon bawl ua, Village Authority Act bang a ut leh dah ua heilamdang sawm in pan a la uhi. Village Authority chih om  zen in ‘Development’ thumal zang a singtang gam Hausa hihna beisak sawm uh himaimah in chin, lungliap huai peuhmah ei ve.

Huchi kallak ah ei lawi lak bang ahle Manipur solkal maipha zong a phaphetlou pawl bang in omna lai uh a, lungziinhuai mahmah maw?
New Land Use Policy bangle thil hoihlua ahi, i gam  singtang lou neihna ah khamkhop a piang nawn kei a, singtanglou neih a kivaakte a diing in kivaakna tham a ching nawn kei hi. Kum teng a gammang lianpi suksiat a, ekmong gozen a lou a I neih haang in kum khat gilvahna diing a piangsak  zou kei hi. Adik hi. Pathian thu genten a gen sek ua, Setan in I lunglutna mah a hon zol ahi a chi sek uhi. Huci bang in Manipur Solkal in singtang lou neihna a gah piang lou I sakdan uh chiantak a thei in, I lunglutna ua pi in I om uh. Louneihna tak khek tuak mahmah e, himahleh Mizogam toh tehkak kawmkawm a hon hih chiang un I gam neihdan uh a kibang kei hi. NLUP hoih law mahmah pichin ma a masak diing gam neihna toh kisai kichian om a poimoh, a kichiansa himahleh huai pen paalzuut thoh mai a, I gam neihdan uh suhsak sawmna lel leng hithei lai hi.

Kum hiai tan Horticulture Department ana om a, kum hiai tan Agriculture Department ana omta a, Fishery, Animal Husbandary leh hihlouh khukkhak leng a om kei hi. Himahleh bang gahsuah I mu uale? Hiai Manipur Solkal nuai ah zaw singtang gam a thil hoih piak a om dek lou di I hiai ve ua, ka gingcha puaoi!

Hah! Manipur Solkal in khem theih tawp in Phualpi Solkal ana khem ua, Phualpi a Congress lubawk lai in chu a gingta ua, San-aute’n a hon gingta gige khol d’uam maw? CM in kum 20 bang kiteelna omlou kiteelna ADC ka om sak ua, singtang gam ah ‘grassroot a kivaihawmna’ ka tungding uh bang chi in Phualpi Solkal bangtan hiam zaw khemzou chu ei ve ua. CM pa in lah a thugen teng in ‘kiteelna’ om theih kisak theihpih in a gen son a, thuneihna le line department teng pekhekhinta bang in a gen a, pekhe khin taktak hia chih a chian utte a diing in tua MDC lawi in PM Modi kiang a ‘dolkhaat’ a khiat uh enle chian mahmah diing hi. Zuau pumlum gengen ahihlam chiang mahmah ve aw.

Hiai vaangvot kha vah mahmahta in chin, tawp a om singtang mite kithutuah louh ziak a lakkhiak zohlouh pen hong vah lo mahmah chiang a amah a hong tuukkhe leu di hi ve aw.

© September 1, 2014 | Pauzagin Tonsing